ཚེ་དཔག་མེད་ཀྱི་སྒྲུབ་ཐབས་ལས་བྱང་དང་འབྲེལ་བ།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ཚེ་དཔག་མེད་ཀྱི་སྒྲུབ་ཐབས་ལས་བྱང་དང་འབྲེལ་བ་བཞུགས༔ དཔལ་ཆེན་ཧེ་རུ་ཀཿལ་ཕྱག་འཚལ་ལོ༔ མ་འོངས་དུས་ཀྱི་ཐ་མ་ལ༔ ནད་རིམས་རྐྱེན་དང་བར་ཆད་མང་༔ གློ་བུར་ཡེ་འབྲོག་འཚུབས་པའི་དུས༔ ཆོས་ལྡན་སྐྱེས་བུའི་རྐྱེན་ཟློག་ཏུ༔ རིག་འཛིན་ཚེ་ཡི་སྒྲུབ་པ་ནི༔ ཟབ་ལ་ཆེས་ཆེར་ཁྱད་འཕགས་ཤིག༔ ཚེ་ཡི་རིག་འཛིན་པདྨས་བརྗོད༔ སྐལ་ལྡན་ཀུན་གྱིས་ཉམས་སུ་ལོངས༔ ས་མ་ཡཱ༔ རྒྱ་རྒྱ་རྒྱ༔ དེ་ལ་ཡང་ཟབ་བླ་ན་མེད་པའི་སྒྲུབ་པ་ཚེའི་གཏེར་མཛོད་འདི་ཉམས་སུ་ལེན་པར་འདོད་པའི་རྣལ་འབྱོར་པས༔ སྔོན་འགྲོ་དངོས་གཞི་རྗེས་གསུམ་གྱིས་ཉམས་སུ་བླང་བར་བྱའོ༔ དེ་ལ་དང་པོ་སྔོན་དུ་འགྲོ་བ་ནི༔ གནས་ཡིད་དང་མཐུན་ཞིང་ནུབ་ཕྱོགས་སུ་ཁ་བསྟན་པའམ༔ ཤར་དུ་བལྟ་བ་ལ་གངས་རི་བརྟན་ཆགས་བྱུང་ན་རབ༔ ཐ་ནའང་རི་རྩེ་ཐོན་པ༔ ཤར་གཞོལ་བ༔ ལྷོ་སྤུངས་པ༔ ནུབ་སྐྱོར་བ༔ བྱང་ཡོལ་བ༔ སྨན་སྣ་ཚོགས་སྐྱེ་ཞིང་བྱ་ཚོགས་མང་པོའི་སྐད་སྙན་སྒྲོག་པ༔ རྟག་ངུ་འཚེ་དང་བ་ལུ་ལ་སོགས་པའི་བཅུད་ལེན་གྱི་སྨན་སྐྱེ་བའི་གླིང་ཞིག་ཏུ་ཕྱིན་ལ༔ སྒོ་གསུམ་གྱི་བྱ་བ་བློས་བཏང་ཞིང་སྒྲུབ་ཁང་ལ་གད་བདར་བྱས་ཏེ༔ གཞི་བདག་ལ་དཀར་གཏོར་འབུལ༔ ཐོད་པ་ཆང་གིས་བཀང་འདྲའམ༔ རིན་པོ་ཆེའི་བུམ་པ་འདྲ་བའི་རི་ནས་སྟེགས་བུའི་ས་བླང་ཞིང་རྒྱ་དང་སྲིད་དུ་ཁྲུ་གང་བ༔ མཛེས་པ༔ དབུས་མཐོ་བ༔ མཐའ་སྙོམས་པ༔ གས་པ་དང་སྲུབ་མེད་པར་བྱས་ཏེ༔ ས་ཚོན་དཀར་པོས་བྱུག༔ དྲི་བཟང་གིས་ཆག་ཆག་གདབ༔ ཐིག་ཚོན་རྣམས་བྱིན་གྱིས་བརླབ་ཅིང་ཨཱོཾ་ཨཱཿཧཱུྃ་གསུམ་མམ་མང་དུ་བརྗོད༔ ཚེ་སྒྲུབ་རྟེན་གྱི་གཟུངས་མ་ལ་ཐིག་སྣ་གཏད་ཅིང་ཐིག་གདབ༔ ཨཱོཾ་ཨཱཿཧཱུྃ་བྷྲཱུྃ་ཛྙཱ་ན་ཨཱ་ཡུ་ཥེ་བྷྲཱུྃ༔ ཞེས་བརྗོད༔ ཐིག་གདབ་ཅིང་༔ ཆ་ཆེན་དང་པོ་ལྟེ་བའི་ཆ་གཉིས་དང་གསུམ་དུ་པད་འདབ་བཞི༔ ཕྱོགས་ཚོན་མཚམས་བཞི་མཛེས་པར་བྱ༔ ཁྱམས་དང་སྒོ་སོགས་སྤྱི་ལྟར་རོ༔ དེ་དབུས་མཉྫིའི་ཁྲིའུ་ཁར༔ བུམ་པ་མཚན་ལྡན་མགུལ་ཆིངས་དཀར༔ འཚེ་དང་བ་ལུ་ཤུགས་པ་དང་༔ རྟག་ངུ་གསུམ་དང་དབང་ལག་དང་༔ ཉེར་ལྔའི་བུམ་རྫས་གཞུང་ལྟར་གདབ༔ ཁྱེའུ་གཙང་མས་ཆུ་བླང་ཞིང་༔ སུམ་ཆ་བཀང་སྟེ་ཁ་རྒྱན་བཅས༔ དཀྱིལ་འཁོར་དེ་ཡི་དབུས་སུ་བཞག༔ འབྲས་སམ་དཀར་མོའི་ནས་ཀྱི་ཕྱེར༔ རྡོ་རྗེས་མཚན་པའི་ཚེ་བུམ་བཅས༔ རིན་ཆེན་རྒྱན་ལྡན་མདུན་དུ་འགོད༔ རིན་པོ་ཆེ་ཡི་སྣོད་ནང་དུ༔ སྤོད་ལྡན་ཚེ་ཟན་ལྷོ་རུ་བཞག༔ མཚན་ལྡན་དུམ་བུ་གཅིག་པ་རུ༔ སྨན་བཏབ་ཚེ་ཆང་ནུབ་ཏུ་བཞག༔ མདའ་མོ་ཚིགས་གསུམ་རྒོད་སྒྲོ་མར༔ དར་སྣ་ལྔ་བཏགས་བྱང་དུ་འགོད༔ མེ་ཏོག་བདུག་སྤོས་མར་མེ་དྲི༔ ཞལ་ཟས་རོལ་མོའི་མཆོད་པ་བཤམས༔ ཡི་གེ་གསུམ་གྱི་བྱིན་གྱིས་བརླབ༔ སྔོན་དུ་འགྲོ་བའི་རིམ་པའོ༔ ས་མ་ཡཱ༔ རྒྱ་རྒྱ་རྒྱ༔ རྣལ་འབྱོར་བདེ་བའི་གདན་ལ་འདུག༔ དྲི་བཟང་སྤོས་བཏང་རོལ་མོ་འཁྲོལ༔ སྐྱབས་སུ་འགྲོ་བ་འདི་སྐད་དོ༔ ཧཱུྃ་ཧྲཱི༔ རྐང་གཉིས་གཙོ་བོ་སངས་རྒྱས་ཚེ་དཔག་མེད༔ ཞི་བ་ཆགས་བྲལ་ཚེ་སྒྲུབ་དམ་པའི་ཆོས༔ ཚོགས་ཀྱི་མཆོག་གྱུར་ཚེ་ཡི་རིག་པ་འཛིན༔ ཚེ་ཡི་རིག་འཛིན་བསྒྲུབ་ཕྱིར་སྐྱབས་སུ་མཆི༔ སེམས་བསྐྱེད་ནི༔ ཧཱུྃ་ཧྲཱི༔ ཟབ་ཅིང་སྤྲོས་བྲལ་སྐྱེ་འཆི་མེད་པའི་དོན༔ མ་རིག་སྒྲིབ་པས་བཅིངས་པའི་འགྲོ་བ་རྣམས༔ འཆི་བདག་བདུད་ཀྱི་བར་ཆད་བཟློག་པའི་ཕྱིར༔ རིག་འཛིན་ཚེ་ཡི་སྒྲུབ་ཐབས་ཉམས་སུ་ལེན༔ བགེགས་ལ་བཀའ་བསྒོ་བ་ནི༔ ཧཱུྃ་ཧྲཱི༔ རང་བྱུང་རིག་པ་དོན་གྱི་ཡེ་ཤེས་ལ༔ མ་རིག་བསྒྲིབས་པས་སྣང་སེམས་འཁྲུལ་བྱེད་འདྲེ༔ ཚེ་ལ་བར་དུ་གཅོད་བྱེད་བདུད་དང་བགེགས༔ ལོག་པར་བལྟ་བའི་ཚོགས་རྣམས་ཕྱིར་དེངས་ཤིག༔ གནོད་བྱེད་འབྱུང་པོའི་ཚོགས་རྣམས་མཱ་ར་ཡ་ཕཊ༔ བསྲུང་འཁོར་ནི༔ ཧཱུྃ་ཧྲཱི༔ ཡེ་ནས་རྣམ་དག་ཚེ་དཔག་མེད་པའི་ཞིང་༔ ཐུགས་རྗེའི་རང་བཞིན་ཁྲོ་ཚོགས་རླུང་ལྟར་འཚུབ༔ མཚམས་ཀྱི་དཀྱིལ་འཁོར་རང་བཞིན་ལྷུན་གྱིས་གྲུབ༔ རྡོ་རྗེ་འཁོར་ལོ་མེ་དཔུང་དམར་ནག་གཏམས༔ སྲུངས་ཤིག་བཛྲ་རཀྵ་རཀྵ་ཧཱུྃ༔ མཆོད་རྫས་བྱིན་གྱིས་བརླབ་པ་ནི༔ ཨཱོཾ་ཨཱཿཧཱུྃ༔ ཧཱུྃ་ཧྲཱི༔ མ་དག་འབགས་ཚོགས་དྲི་མའི་ཚོགས༔ རྣམ་དག་ཆོས་དབྱིངས་མཁའ་ཀློང་ནས༔ ཡི་གེ་གསུམ་གྱི་འོད་འཕྲོས་སྦྱངས༔ ཕྱི་ནང་གསང་མཆོད་ཡེ་ཤེས་ལྔ༔ ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ༔ ཨཱོཾ་ཨཱཿཧཱུྃ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ་ཧྲཱིཿཋཱ༔ ཨཱོཾ་ཨཱཿཧཱུྃ་མ་ཧཱ་བྷ་ལིངྟ་བྷ་ལ་བྷ་ལིངྟ་ཧཱུྃ་ཧྲཱིཿཋ༔ ཨཱོཾ་ཨཱཿཧཱུྃ་བཛྲ་པུཥྤེ་དྷཱུ་པེ་ཨཱ་ལོ་ཀེ་གྷནྡྷེ་ནཻ་ཝི་ཏེ་ཤཔྟ་ཨཱཿཧཱུྃ་སྭཱ་ཧཱ༔ ཏིང་ངེ་འཛིན་ནི༔ ཧཱུྃ་ཧྲཱི༔ སྣང་སྲིད་འཁོར་འདས་ཆོས་དབྱིངས་སྐྱེ་བ་མེད༔ དུས་གསུམ་འགག་མེད་ངོ་བོ་སྤྲོས་དང་བྲལ༔ རང་བྱུང་ལྷན་སྐྱེས་དེ་བཞིན་ཉིད་ཀྱི་སྐུ༔ སྣ་ཚོགས་རང་གྲོལ་དེ་བཞིན་ཉིད་དུ་བརྡལ༔ དྷརྨཱ་དྷརྟུ་ཛྙཱ་ན་ཨཱ༔ གཞལ་ཡས་ཁང་བསྐྱེད་པ་ནི༔ ཧཱུྃ་ཧྲཱི༔ ཀུན་ཁྱབ་བརྩེ་བའི་སྙིང་རྗེ་ཆེན་པོའི་ངང་༔ གཟུང་འཛིན་མཚན་མ་ཀུན་བྲལ་ཡི་གེ་ཧྲཱི༔ ཧྲཱི༔ ལས་འོད་འཕྲོས་ཕྱི་སྣོད་ཞིང་དུ་བརྡལ༔ བྷྲཱུྃ་ཆད་འོད་འཕྲོས་རིན་ཆེན་གཞལ་ཡས་ཁང་༔ ཟུར་བཞི་ལོགས་བཞི་སྒོ་བཞི་རྟ་བབས་ལྡན༔ པད་རྡོར་མེ་རི་བྲག་ཆེན་དུར་ཁྲོད་བཅས༔ སྟོང་ཉིད་ནམ་མཁའི་ཀློང་དུ་འཇའ་ལྟར་ཤར༔ ཕྱི་ནང་མེད་པ་ཟངས་ཐལ་འོད་ཀྱི་ཀློང་༔ བྷྲཱུྃ་བྷི་ཤ་བྷི་ཤུདྡྷེ་ཨཱ༔ ལྷ་བསྐྱེད་པ་ནི༔ ཧཱུྃ་ཧྲཱི༔ སྐྱེ་མེད་སྣ་ཚོགས་རང་བྱུང་སེམས་ཉིད་འདི༔ མ་བཅོས་སྤྲོས་བྲལ་མགོན་པོ་ཚེ་དཔག་མེད༔ དཀར་གསལ་ཞལ་གཅིག་ཕྱག་གཉིས་ལོངས་སྤྱོད་རྫོགས༔ རལ་པའི་ཐོར་ཅོག་རཏྣའི་པྲོག་ཞུ་མཛེས༔ ཐུགས་རྗེའི་རང་བཞིན་སྤྱན་གཉིས་འགྲོ་ལ་གཟིགས༔ རུས་པའི་རྒྱན་དྲུག་དར་གྱི་ཅོད་པན་འཕུར༔ ཕྱག་གཉིས་མཉམ་བཞག་ཚེ་བུམ་ཡུམ་ལ་འཁྱུད༔ འོད་ཀློང་ཉི་ཟླ་པད་སྟེང་བཞེངས་ཏེ་བཞུགས༔ ཧཱུྃ་ཧྲཱི༔ དེ་ཡི་པང་ཡུམ་ཚེ་ཡི་རིག་མ་ནི༔ བདེ་འབྱིན་ཛྙཱ་ན་དཀར་དམར་མདངས་དང་ལྡན༔ ཞལ་གཅིག་ཕྱག་གཉིས་ཞབས་གཉིས་དགྱེས་སྦྱོར་འཁྲིལ༔ ཕྱག་གཡས་མདའ་དར་ཡབ་ཀྱི་མགུལ་ནས་འཁྱུད༔ ཕྱག་གཡོན་འཆི་མེད་ཚེ་ཡི་བུམ་པ་བསྣམས༔ སྤྱན་དཀྱུས་རིང་ཞིང་འཛུམ་པའི་མདངས་དང་ལྡན༔ བཅུ་དྲུག་ན་ཚོད་རིན་ཆེན་རྒྱན་གྱིས་སྤྲས༔ འོད་ཟེར་སྣ་ཚོགས་འཕྲོ་བའི་ཀློང་དུ་བསྐྱེད༔ འཁོར་བསྐྱེད་པ་ནི༔ ཧཱུྃ་ཧྲཱི༔ ཤར་ཕྱོགས་པདྨ་ཉི་ཟླ་འོད་ཀྱི་ཀློང་༔ ཚེ་ཡི་བུམ་པ་སངས་རྒྱས་ཚེ་དཔག་མེད༔ སྐུ་མདོག་མཐིང་ག་རང་འོད་ཡུམ་དང་འཁྲིལ༔ ལྷོ་ཕྱོགས་པདྨ་ཉི་ཟླ་འོད་ཀྱི་ཀློང་༔ རིན་ཆེན་ཚེ་ཟན་རཏྣ་ཚེ་དཔག་མེད༔ སྐུ་མདོག་སེར་པོ་རང་འོད་ཡུམ་དང་འཁྲིལ༔ ནུབ་ཕྱོགས་པདྨ་ཉི་ཟླ་འོད་ཀྱི་ཀློང་༔ ཚེ་ཆང་བདུད་རྩི་པདྨ་ཚེ་དཔག་མེད༔ སྐུ་མདོག་དམར་པོ་རང་འོད་ཡུམ་དང་འཁྲིལ༔ བྱང་ཕྱོགས་པདྨ་ཉི་ཟླ་འོད་ཀྱི་ཀློང་༔ མདའ་དར་ངོ་བོ་ཀརྨ་ཚེ་དཔག་མེད༔ སྐུ་མདོག་ལྗང་གུ་རང་འོད་ཡུམ་དང་འཁྲིལ༔ ཀུན་ཀྱང་ཞལ་གཅིག་ཕྱག་གཉིས་ལོངས་སྤྱོད་རྫོགས༔ གཡས་པས་མདའ་དར་གཡོན་པས་ཚེ་བུམ་བསྣམས༔ ཞབས་གཉིས་གར་སྟབས་སྣང་སྲིད་དབང་དུ་བསྡུད༔ སྤྱན་གཉིས་བྱམས་པའི་སྙིང་རྗེས་འགྲོ་ལ་གཟིགས༔ རང་འོད་ཡུམ་རྣམས་ཡབ་ཀྱི་ཞལ་དང་སྦྱོར༔ ཞལ་གཅིག་ཕྱག་གཉིས་སྤྱན་གཉིས་དགྱེས་འཛུམ་མདངས༔ གཡས་རྣམས་མདའ་དར་ཡབ་ཀྱི་མགུལ་ནས་འཁྱུད༔ གཡོན་རྣམས་ཟག་མེད་ཚེ་བུམ་ལོངས་སྤྱོད་རྫོགས༔ ཞབས་གཉིས་གཡས་བརྐྱང་གཡོན་བསྐུམ་ཡབ་ལ་འཁྲིལ༔ སྟོད་གཡོག་སྨད་དཀྲིས་སྣ་ཚོགས་རྒྱན་གྱིས་སྤྲས༔ གསེར་གྱི་གདུ་བུ་དར་གྱི་ཅོད་པན་འཕུར༔ རྣམ་དག་ཆོས་དབྱིངས་ངང་དུ་ལམ་མེར་གསལ༔ ཁྱམས་ལ་རྩ་གསུམ་བརྒྱུད་པའི་བླ་མ་ལྷ༔ སྒོ་བཞིར་སྒོ་མ་བཞི་དང་ཕྱི་རོལ་དུ༔ ཆོས་སྐྱོང་སྲུང་མ་ལས་བྱེད་ཕོ་ཉར་གསལ༔ སྤྱན་འདྲེན་པ་ནི༔ སྤོས་བསྲེག་རོལ་མོ་འཁྲོལ་ཞིང་འདི་སྐད་དོ༔ ཧཱུྃ་ཧྲཱི༔ འོག་མིན་ཆོས་དབྱིངས་གནས་མཆོག་དམ་པ་ནས༔ བཅོམ་ལྡན་མགོན་པོ་རྒྱལ་བ་ཚེ་དཔག་མེད༔ ཡབ་ཡུམ་འཁོར་བཅས་མ་ལུས་སྤྱན་འདྲེན་ན༔ ཚེ་དབང་དངོས་གྲུབ་སྩོལ་ཕྱིར་གཤེགས་སུ་གསོལ༔ ཤར་ལྷོ་ནུབ་བྱང་སྟེང་འོག་ཕྱོགས་བཅུ་ནས༔ ཚེ་ལྷ་རིགས་ལྔ་རྩ་གསུམ་བརྒྱུད་པར་བཅས༔ བཀའ་སྡོད་སྒོ་བ་ལས་མཁན་ཕོ་ཉ་བྲན༔ མ་ལུས་འཁོར་བཅས་གནས་འདིར་སྤྱན་འདྲེན་ན༔ ཚེ་དབང་དངོས་གྲུབ་སྩོལ་ཕྱིར་གཤེགས་སུ་གསོལ༔ ཨཱོཾ་བཛྲ་ཨཱཿཡུ་ཥེ་བཛྲ་ས་མ་ཡ་ཛཿཛ༔ བརྟན་བཞུགས་ནི༔ ཧཱུྃ་ཧྲཱི༔ གེ་སར་པདྨ་ཉི་ཟླ་འོད་ཀྱི་ཀློང་༔ བདེ་བར་གཤེགས་པ་བཅོམ་ལྡན་ཚེ་ཡི་ལྷ༔ བདག་སོགས་འགྲོ་བ་ཐུགས་རྗེས་རབ་དགོངས་ཏེ༔ མི་གཡོ་དགྱེས་ཤིང་བརྟན་པར་བཞུགས་སུ་གསོལ༔ ཨཱོཾ་བཛྲ་ཨཱཿཡུ་ཥེ་ས་མ་ཡ་ཏིཥྛ་ལྷན༔ ཕྱག་འཚལ་བ་ནི༔ ཧཱུྃ་ཧྲཱི༔ བདེ་བར་གཤེགས་པ་སངས་རྒྱས་བཅོམ་ལྡན་འདས༔ དངོས་གྲུབ་སྩོལ་མཛད་ཡི་དམ་ལྷ་ཡི་ཚོགས༔ མཁའ་འགྲོ་ཆོས་སྐྱོང་བཀའ་སྲུང་གཏེར་བདག་ལ༔ ལུས་ངག་ཡིད་གསུམ་གུས་པས་ཕྱག་འཚལ་ལོ༔ ཨཱོཾ་བཛྲ་ཨཱཿཡུ་ཥེ་ཨ་ཏི་པུ་ཧོཿཔྲ་ཏིཙྪ་ཧོ༔ མཆོད་པ་ནི༔ ཧཱུྃ་ཧྲཱི༔ འགྲོ་བའི་མགོནཔོ་ཚེ་ཡི་ལྷ་ཚོགས་ལ༔ ཕྱི་ཡི་མཆོད་པ་འདོད་ཡོན་རྣམ་ལྔ་དང་༔ ནང་གི་མཆོད་པ་སྨན་གཏོར་རཀྟའི་ཚོགས༔ གསང་བའི་མཆོད་པ་བདེ་སྟོང་དགའ་བ་བཞི༔ རང་སྣང་རྣམ་དག་དཀྱིལ་འཁོར་ལྷ་ལ་འབུལ༔ ཨཱོཾ་བཛྲ་ཨཱཿཡུ་ཥེ་སརྦ་པཱུ་ཙ་མེ་གྷ་ས་མ་ཡ་ཁ་ཁ་ཁཱ་ཧི་ཁཱ་ཧི༔ བསྟོད་པ་ནི༔ ཧཱུྃ་ཧྲཱི༔ ཆོས་སྐུ་དྲི་མེད་རྣམ་དག་ཚེ་དཔག་མེད༔ མ་འགགས་རང་གསལ་ལོངས་སྤྱོད་རྫོགས་པའི་དཔལ༔ རྣམ་འཕྲུལ་དཔག་ཡས་འགྱེད་པ་སྤྲུལ་པའི་སྐུ༔ རྒྱལ་བ་ཚེ་དཔག་མེད་ལ་ཕྱག་འཚལ་བསྟོད༔ ཧཱུྃ་ཧྲཱི༔ ནད་གདོན་ཞི་མཛད་བཛྲ་ཚེ་དཔག་མེད༔ ཚེ་དཔལ་རྒྱས་མཛད་རཏྣ་ཚེ་དཔག་མེད༔ སྲིད་གསུམ་བཅུད་སྡུད་པདྨ་ཚེ་དཔག་མེད༔ བདུད་བཞི་བཟློག་མཛད་ཀརྨ་ཚེ་དཔག་མེད༔ ལུས་ངག་ཡིད་གསུམ་གུས་པས་ཕྱག་འཚལ་བསྟོད༔ ཧཱུྃ་ཧྲཱི༔ བྱིན་རླབས་འབྱུང་གནས་བརྒྱུད་པའི་བླ་མ་དང་༔ དངོས་གྲུབ་མཆོག་སྩོལ་ཡི་དམ་དཀྱིལ་འཁོར་ལྷ༔ དཔའ་བོ་མཁའ་འགྲོ་ཆོས་སྐྱོང་གཏེར་གྱི་བདག༔ ཡོངས་རྫོགས་དཀྱིལ་འཁོར་ལྷ་ལ་ཕྱག་འཚལ་བསྟོད༔ བཟླས་པ་ནི༔ ཨཱོཾ་ཧཱུྃ་ཏྲཾ་ཧྲཱིཿཨཱཾ༔ ཛྙཱ་ན་བཛྲ་ཨཱཿཡུ་ཥེ་ཚེ་བྷྲཱུྃ༔ སརྦ་སིདྡྷི་ཧཱུྃ་ཧྲཱི༔ བསྙེན་དུས་གསོལ་བ་འདེབས་པའི་ཚུལ༔ མ་ཡེངས་ངང་ནས་འཛབ་འདི་བཟླ༔ སྒྲུབ་དུས་མཆོད་དང་བསྟོད་པའི་ཚུལ༔ འོད་ཟེར་སྤྲོ་བསྡུའི་ངང་ནས་བཟླ༔ ལས་སྦྱོར་བཞི་ལ་རང་གསལ་ཞིང་༔ བདག་གཞན་འཕྲིན་ལས་ཨེ་མ་ཧོ༔ ཐུན་སྐབས་མཆོད་ཅིང་བསྟོད་པས་བསྟོད༔ དེ་དག་སྒྲུབ་པའི་དངོས་གཞིའོ༔ ས་མ་ཡཱ༔ རྒྱ་རྒྱ་རྒྱ༔ ཚོགས་འཁོར་བཤམས་ཤིང་བྱིན་གྱིས་བརླབ༔ སྤྱན་འདྲེན་མཆོད་ཅིང་བཤགས་པ་འབུལ༔ ཚེ་བདུད་བསྒྲལ་ཞིང་སྟོབ་པ་དང་༔ ཚོགས་ལ་རོལ་ཞིང་ལྷག་མ་བསྔོ༔ ཆད་ཐོ་བསྟན་སྐྱོང་དཀྱིལ་འཁོར་བསྡུ༔ ཤིས་པ་བརྗོད་ཅིང་བསྔོ་སྨོན་གདབ༔ ས་མ་ཡཱ༔ རྒྱ་རྒྱ་རྒྱ༔ ཚོགས་བྱིན་གྱིས་བརླབ་པ་ནི༔ ཧཱུྃ་ཧྲཱི༔ རྣམ་དག་མཆོག་གི་ལོངས་སྤྱོད་ཞལ་ཟས་ཚོགས༔ མ་རིག་སྒྲིབ་འཁྲུལ་འབགས་བཙོག་མིང་མེད་ཀྱང་༔ ཡེ་ཤེས་རྡོ་རྗེ་ལྟ་བུའི་ཏིང་འཛིན་གྱིས༔ རཾ་ཡཾ་ཁཾ་གིས་ཉེས་སྐྱོན་དབྱིངས་སུ་སྦྱངས༔ ཡི་གེ་གསུམ་གྱིས་ཟག་མེད་བདུད་རྩིར་བསྒྱུར༔ ཨཱོཾ་ཨཱཿཧཱུྃ༔ ཚོགས་ལ་སྤྱན་འདྲེན་པ་ནི༔ ཧཱུྃ་ཧྲཱི༔ སྐུ་གསུམ་ཞིང་ཁམས་རྒྱལ་བའི་ཕོ་བྲང་ནས༔ བཅོམ་ལྡན་མགོན་པོ་རྡོ་རྗེ་ཚེ་ཡི་ལྷ༔ བླ་མ་ཡི་དམ་མཁའ་འགྲོ་ཆོས་སྐྱོང་བཅས༔ མ་ལུས་འཁོར་བཅས་ཚོགས་ལ་སྤྱན་འདྲེན་གཤེགས༔ མཆོད་པ་ནི༔ ཧཱུྃ་ཧྲཱི༔ ཞལ་ཟས་ཚོགས་ཀྱི་མཆོད་པ་བླ་མེད་རྫས༔ རིག་འཛིན་ཡོངས་འདུས་ཚེ་བདག་རྒྱལ་བ་ལ༔ གཉིས་མེད་གུས་པ་ཆེན་པོས་འབུལ་ལགས་ན༔ རྣམ་དག་ཐུགས་རྗེའི་ཀློང་དུ་བཞེས་སུ་གསོལ༔ ཨཱོཾ་བཛྲ་ཨཱཿཡུ་ཥེ་གྷ་ན་ཙཀྲ་པཱུ་ཙ་ཁཱ་ཧི༔ བཤགས་པ་ནི༔ ཧཱུྃ་ཧྲཱི༔ རང་རིག་ཆོས་སྐུ་ཉོན་མོངས་དབང་གིས་བསྒྲིབས༔ མ་རྟོགས་རྨོངས་པས་ཁམས་གསུམ་འཁོར་བར་འཁྱམས༔ གཉིས་འཛིན་འཁྲུལ་བའི་ལས་ཉོན་བག་ཆགས་རྣམས༔ ཚོགས་ཀྱི་མཆོད་པས་མཐོལ་བཤགས་དག་གྱུར་ཅིག༔ བཛྲ་ས་མ་ཡཱ་ཤུདྡྷེ་ཨཱ༔ བསྒྲལ་ལས༔ ཧཱུྃ་ཧྲཱི༔ ལས་མཛད་ཀརྨ་ཚེ་དཔག་མེད་མགོན་རྒྱལ༔ རཱུ་ཏྲ་འདུལ་མཛད་ལྗང་ནག་ཕུར་པ་འགྲིལ༔ ཟ་གསོད་ཕོ་ཉ་མང་པོ་སྐར་ལྟར་འཁྲུག༔ ཚེ་བདུད་བར་ཆད་སྒྲོལ་བའི་དུས་ལ་བབས༔ ཨཱོཾ་ཀརྨ་བཛྲ་ཀྲོ་ཏ་ཀཱི་ལི་ཀཱི་ལཱ་ཡ༔ གནོད་བྱེད་འབྱུང་བོ་མཱ་ར་ཡ་ཕཊ༔ སྟོབ་པ་ནི༔ ཧཱུྃ་ཧྲཱི༔ མ་རིག་རཱུ་ཏྲ་ཐུགས་རྗེའི་ཤུགས་ཀྱིས་བསྒྲལ༔ འགྲོ་དྲུག་བག་ཆགས་དབྱིངས་སུ་སྦྱོང་བའི་ཕྱིར༔ ཁྲོ་བོ་ཁྲོ་མོ་སྤྲུལ་པ་ཡང་སྤྲུལ་བཅས༔ མཆོད་རྫས་དགྲ་བགེགས་ཤ་ཁྲག་ཞལ་དུ་སྟོབ༔ ཁ་རཾ་ཁཱ་ཧི༔ ལྷག་མ་ནི༔ ཧཱུྃ་ཧྲཱི༔ སྔོན་ཚེ་དཔལ་གྱི་བཀའ་ལུང་དམ་བཅའ་བཞིན༔ དཀྱིལ་འཁོར་སྐྱོང་བའི་བཀའ་སྡོད་སྲུང་མའི་ཚོགས༔ ལྷག་མའི་ཞལ་ཆབ་བདུད་རྩིའི་ལོངས་སྤྱོད་བཞེས༔ རྣལ་འབྱོར་བཅོལ་བའི་འཕྲིན་ལས་གྲུབ་པར་མཛོད༔ ཨུ་ཚིནྡྷ་བྷ་ལིངྟ་ཁཱ་ཧི༔ ཆད་ཐོ་ནི༔ ཧཱུྃ་ཧྲཱི༔ སྔོན་ཚེ་བར་དང་ཐ་མ་རྩོད་ལྡན་དུས༔ ཚེ་དཔག་མེད་དང་བདག་ཉིད་པད་འབྱུང་གིས༔ གཡར་དམ་ཕོག་པའི་བཀའ་སྐྱོང་ལྷ་སྲིན་ཚོགས༔ གཏོར་མ་འདི་བཞེས་རྣལ་འབྱོར་འཕྲིན་ལས་སྒྲུབས༔ བར་གཅོད་འབྱུང་པོ་མཐའ་ཡི་དམག་དཔུང་ཟློག༔ བསྟན་མ་ནི༔ ཧཱུྃ་ཧྲཱི༔ བསྟན་མ་སྐྱོང་མཛད་མ་སྲིང་མཁའ་འགྲོའི་ཚོགས༔ ཁྱེད་རྣམས་བདག་ཉིད་པདྨ་ཐོད་ཕྲེང་དང་༔ སློབ་མ་འཁོན་ཆེན་ཀླུ་ཡི་དབང་པོ་ཡིས༔ བཀའ་བསྒོས་དམ་ཚིག་རྡོ་རྗེ་སྤྱི་བོར་བཞག༔ ངག་ཏུ་བདུད་རྩི་བྲན་དུ་སྲོག་སྙིང་ཕུལ༔ སྔོན་གྱི་ཐ་ཚིག་གཉན་པོ་དུས་འདིར་དགོངས༔ བཤལ་ཆུའི་གཏོར་མ་བཞེས་ལ་འཕྲིན་ལས་སྒྲུབས༔ བླ་མེད་བསྟན་པ་ཕྱོགས་བཅུར་རྒྱས་པར་མཛོད༔ མ་མ༔ ཏང་ཏང་༔ ཏིང་ཏིང་༔ ལང་ལང་༔ ལིང་ལིང་ཁཱ་ཧི་ཁཱ་ཧི༔ བཀྲ་ཤིས་ནི༔ ཧཱུྃ་ཧྲཱི༔ རྒྱལ་བ་ཚེ་དཔག་མེད་མགོན་ཐུགས་རྗེའི་དཔལ༔ བདག་སོགས་འགྲོ་ལ་བརྩེ་བས་རྗེས་དགོངས་ནས༔ ཕྱོགས་དུས་རྒྱལ་བའི་ཐུགས་རྗེ་བྱིན་རླབས་བསྡུས༔ མཆོག་ཐུན་དངོས་གྲུབ་འཐོབ་པའི་བཀྲ་ཤིས་ཤོག༔ བསྔོ་བ་ནི༔ ཧཱུྃ་ཧྲཱི༔ བསོད་ནམས་ཡེ་ཤེས་དམིགས་མེད་ཆོས་དབྱིངས་ཀློང་༔ བདག་གཞན་འགྲོ་བ་བྱང་ཆུབ་འཐོབ་ཕྱིར་བསྔོ༔ སྨོན་ལམ་ནི༔ ཧཱུྃ་ཧྲཱི༔ ལས་ཉོན་བག་ཆགས་སྒྲིབ་གཉིས་ཡོངས་དག་ནས༔ སྐུ་བཞིའི་འབྲས་བུ་མངོན་དུ་འགྱུར་བར་ཤོག༔ གཤེགས་གསོལ་ནི༔ ཧཱུྃ་ཧྲཱི༔ སྐྱེ་མེད་ཀློང་ནས་ཐུགས་རྗེའི་དཔལ་དུ་ཤར༔ འགག་མེད་ཀློང་དུ་གཤེགས་བཞུད་མེད་པར་མུ༔ སླར་ཡང་བསྟན་དང་འགྲོ་བའི་དོན་གྱི་ཕྱིར༔ མི་མངོན་དབྱིངས་ནས་གནས་འདིར་རྗེས་དགོངས་མཛོད༔ རྫོགས་རིམ་ནི༔ ཧཱུྃ་ཧྲཱི༔ སྣང་སྟོང་གཉིས་མེད་གཞལ་ཡས་ཞིང་ཁམས་ལྷ༔ གཙོ་བོ་ལ་ཐིམ་ཡབ་ཡུམ་འོད་དུ་ཞུ༔ སྔགས་འབྲུ་ས་བོན་ཐིག་ལེ་ནཱ་དར་ཡལ༔ སྤྲོས་བྲལ་སྐྱེ་མེད་ཆོས་སྐུ་མངོན་དུ་གྱུར༔ ཨ་ཨ་ཨཱ༔ འདི་རྣམས་རྗེས་ཀྱི་ལས་རིམ་རྫོགས་པར་བསྟན༔ ས་མ་ཡཱ༔ རྒྱ་རྒྱ་རྒྱ༔ བདག་འདྲ་པདྨ་ཐོད་ཕྲེང་ངས༔ ཤར་ཕྱོགས་རི་བོ་ཏ་ལ་ན༔ མ་ར་ཏི་ཀའི་བྲག་ཕུག་ནང་༔ ཚེ་སྒྲུབ་བྱས་ཤིང་ལྷ་ཞལ་མཇལ༔ དངོས་གྲུབ་ཐོབ་པའི་པད་འབྱུང་ངས༔ རིག་འཛིན་ཚེ་ཡི་སྒྲུབ་ཐབས་དང་༔ མན་ངག་ལག་ལེན་མང་དུ་བརྩམས༔ འགྲོ་དོན་སྨོན་ལམ་རྒྱ་ཡིས་བཏབ༔ རིན་ཆེན་ས་ལ་གཏེར་དུ་སྦས༔ ཁྱད་པར་འཕགས་པའི་གདམས་པ་འདི༔ མཚོ་རྒྱལ་ཀླུ་དབང་གཉིས་ལ་གདམས༔ སྤེལ་བར་ཕངས་ནས་ཏེ་སེར་སྦས༔ རྡོ་རྗེ་ལེགས་པས་བཀའ་འདི་སྲུངས༔ ལྷ་བཙན་ཁྱོད་ཀྱིས་བྱ་ར་གྱིས༔ ལས་འཕྲོ་ཅན་དང་འཕྲད་པར་ཤོག༔ སྐལ་མེད་རྣམས་ཀྱི་དབང་པོ་སྣུབས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་འདྲ་སྤྲང་བན་འགྲོ་འདུལ་གླིང་པས་གནས་མཆོག་ཆེན་པོ་གངས་རིའི་རྒྱལ་པོ་ཏེ་སེའི་བདེ་ཆེན་གསང་བ་ཕུག་ནས༔ ཡོས་ལོ་ཧོར་ཟླ་བཅུ་པའི་ཚེས་བཅོ་ལྔའི་ནུབ་མོའི་ཐོ་རངས་ཁར་གདན་དྲངས་ཤིང་༔ རྟ་ལོ་ཧོར་ཟླ་བཅུ་པར་ཁམས་སྲིང་མོ་རྫོང་གི་གུ་རུའི་སྒྲུབ་གནས་ཕུག་ནག་བདེ་བ་ཆེན་པོར་ཤོག་སེར་ལས་ཕབ་པའོ། །མངྒ་ལཾ།། །།