བདུད་རྩི་དགུའི་ལོ་རྒྱུས་དང་ཉེ་ཤིང་བཅུད་ལེན།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་རྩི་དགུའི་ལོ་རྒྱུས་དང་ཉེ་ཤིང་བཅུད་ལེན་བཞུགས་སོ༔ ཚེ་བདག་ཧེ་རུ་ཀཿལ་འདུད༔ བདུད་རྩིའི་རྒྱལ་པོ་ཉེ་ཤིང་གི༔ བཅུད་ལེན་མན་ངག་དམ་པ་ཞིག༔ མ་འོངས་སྐལ་ལྡན་སྐྱེས་བུའི་དོན༔ པདྨས་བཀོད་ནས་གཏེར་དུ་སྦས༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་བདུད་རྩི་ཉེ་ཤིང་འདི༔ སྔོན་གྱི་བསྐལ་པའི་དང་པོ་ལ༔ ལྷ་ཆེན་དབང་ཕྱུག་ཆེན་པོ་ཞེས༔ ཆགས་པས་ཁམས་གསུམ་དབང་དུ་བསྡུད༔ ཕོ་མཐོང་གསོད་ཅིང་མོ་མཐོང་སྦྱོར༔ དེ་ཚེ་འོག་མིན་ཆོས་དབྱིངས་ནས༔ ཀུན་ཏུ་བཟང་མོའི་རྣམ་འཕྲུལ་ཞིག༔ རབ་ཏུ་བཀྱེ་སྟེ་དབང་ཕྱུག་མདུན༔ བཅུ་དྲུག་ལོ་ལོན་ཡིད་འོང་མཛེས༔ གཅེར་བུ་ནུ་མ་བྷ་ག་རྒྱས༔ འབུམ་དུ་སྤྲུལ་ནས་བདེ་ཉམས་བསྟན༔ ལྷ་ཆེན་ཆགས་པའི་རྦ་ཀློང་གཡོས༔ ཧཾ་ཡིག་ཞུ་བས་བྱང་སེམས་བབས༔ གསང་བའི་རྡོ་རྗེའི་བུ་ག་ནས༔ ཁམས་ཀྱི་དྭངས་སྙིགས་ཐིགས་པ་དགུ༔ མི་མཇེད་འཇིག་རྟེན་ཁམས་སུ་ལྷུངས༔ ཉེ་ཤིང་ར་མོ་ཤག་དང་ནི༔ གངས་ཐིགས་པ་དང་ཅོང་ཞི་དང་༔ ཅུ་གང་སོགས་ཏེ་དྭངས་མ་ལྔ༔ བ་ལུ་དཀར་པོ་མཁན་པ་དཀར༔ འཚེ་དང་ཤུག་གུ་ཚེར་མ་ཅན༔ སྙིགས་མ་བཞི་སྟེ་དགུ་པོ་སྐྱེས༔ སྤྲུལ་པའི་མཁའ་འགྲོ་དེ་རྣམས་ཀྱིས༔ ཡེ་ཤེས་བདུད་རྩིར་བྱིན་གྱིས་བརླབས༔ ཆོས་ལྡན་སྐྱེས་བུའི་བཙས་སུ་བཞག༔ ས་མ་ཡཱ༔ རྒྱ་རྒྱ་རྒྱ༔ ཐབས་ཤེས་ཡ་བྲལ་དངོས་གྲུབ་མེད༔ ཐབས་ཤེས་འཛོམ་ན་མཆོག་གི་རྫས༔ སྤྲུལ་པའི་མཁའ་འགྲོ་དེ་རྣམས་ཀྱིས༔ བྱང་སེམས་རཀྟ་ཐིག་པ་གསུམ༔ འཇིག་རྟེན་ཁམས་སུ་སྤྲོས་པ་ལས༔ ལི་ཁྲི་དམར་པོ་སིནྡྷུ་ར༔ བདུད་རྩི་བྲག་ཞུན་གསུམ་དུ་གྱུར༔ འགྲོ་དོན་འབྱུང་བའི་སྨོན་ལམ་བཏབ༔ རྒྱུད་དང་སྒྲུབ་ཐབས་ལག་ལེན་མཛད༔ མཁའ་འགྲོའི་གསང་མཛོད་ནང་དུ་སྦས༔ ཡེ་ཤེས་མཁའ་འགྲོ་དབྱིངས་ན་གཤེགས༔ ས་མ་ཡཱ༔ རྒྱ་རྒྱ་རྒྱ༔ དེ་ནས་པདྨ་འབྱུང་གནས་བདག༔ བདེ་བ་ཅན་གྱི་ཞིང་ཁམས་ནས༔ འོད་དཔག་མེད་ཀྱིས་སྤྲུལ་པ་བཀྱེ༔ དྷ་ན་ཀོ་ཤའི་མཚོ་དབུས་སུ༔ པདྨ་གེ་སར་སྦུབས་ལས་སྐྱེས༔ མ་དང་མཁའ་འགྲོའི་ཚོགས་དཔོན་གྱུར༔ ནམ་མཁའི་ལུས་ཅན་ཐོགས་མེད་རྒྱུ༔ མཁའ་འགྲོ་རྣམས་ཀྱི་གསང་མཛོད་བརྟོལ༔ མཆོག་གི་བཅུད་ལེན་བརྒྱ་ཕྲག་གཅིག༔ ཐུན་མོང་བཅུད་ལེན་སྟོང་རྩ་ཤེས༔ མན་ངག་ལས་སྦྱོར་ཁྲི་དང་འབུམ༔ སྟོང་གསུམ་འཇིག་རྟེན་སོ་སོ་ན༔ ཆོས་ལྡན་སྐྱེས་བུའི་དོན་དུ་བཞག༔ བཀའ་དང་གདམས་པ་འཆལ་དགོས་ནས༔ སྒྲུབ་གནས་མང་པོར་གཏེར་དུ་སྦས༔ ས་མ་ཡཱ༔ རྒྱ་རྒྱ་རྒྱ༔ མ་འོངས་བསྐལ་པའི་ཡང་མཐའ་ལ༔ གངས་ཅན་བོད་ཀྱི་རྒྱལ་ཁམས་འདིར༔ སངས་རྒྱས་སྤྲུལ་པའི་སྐྱེས་བུ་འབྱུང་༔ སྦས་ཚུལ་མ་ངེས་འགྲོ་བ་འདྲེན༔ དེ་ཚེ་ནག་པོའི་བདུད་སྤྲུལ་ནི༔ དགེ་བཤེས་བན་བཙུན་མང་དུ་འབྱུང་༔ སྣ་ཚོགས་ཐབས་ཀྱིས་འགྲོ་བ་བསླུ༔ ཆོས་དང་ཟང་ཟིང་སྤེལ་མར་སྤྱོད༔ བདེ་བར་གཤེགས་པའི་བཀའ་རྣམས་དཀྲུག༔ འདྲ་མིན་འདྲ་བཟོ་མང་དུ་འཆོས༔ ཚོང་འདུས་འོ་མ་བཞིན་དུ་འགྱུར༔ བདེ་བར་གཤེགས་པའི་བཀའ་འཆལ་བས༔ ཆོས་སྒོར་ཞུགས་ལ་ཆོས་ལྡན་དཀོན༔ མན་ངག་ཟབ་མོའི་གནད་འཆལ་བས༔ ཉམས་སུ་བླངས་ཀྱང་དྲོད་རྟགས་དཀོན༔ ནག་ཕྱོགས་ལྷ་འདྲེས་རོགས་དན་བྱེད༔ བདུད་སྤྲུལ་མངའ་ཐང་ཆེས་ཆེར་རྒྱས༔ པདྨ་ང་སྤྲུལ་སྐྱེས་བུ་ལ༔ གཤེ་བཀུར་འདེབས་ཤིང་ཐན་དུ་བལྟ༔ དེ་ཚེ་རྒྱ་འགྱུར་མ་འཆུགས་པ༔ པད་འབྱུང་གཏེར་གྱི་ཟབ་ཆོས་ཡིན༔ ཉམས་སུ་ལོངས་ཤིག་སྐལ་ལྡན་རྣམས༔ ས་མ་ཡཱ༔ རྒྱ་རྒྱ་རྒྱ༔ དབང་ལག་རྒྱལ་པོའི་བཅུད་ལེན་ལྟར༔ སྔགས་དམིགས་ཏིང་འཛིན་ལྡན་པ་ཡིས༔ བདུད་རྩི་ཉེ་ཤིང་ས་ལས་བརྐོ༔ པགས་པ་བཤུས་ཏེ་གད་བརྡར་བྱ༔ བརྡུངས་ནས་དྲི་ཆུ་བར་པར་གདབ༔ ལྕགས་སྣོད་བསྐོལ་ནས་ཁུ་བ་ཕྱུངས༔ རས་ཚགས་རྡུལ་སོགས་མེད་པར་བྱ༔ ལན་གསུམ་ཁུ་བ་བསྐྱར་ཏེ་ཕྱུངས༔ གར་སླ་ཐུག་པ་སྐ་ཤོས་ཙམ༔ མར་དང་བུ་རམ་འབྲས་བུ་གསུམ༔ ཞིབ་ཏུ་བཏགས་ལ་ཅི་མང་བཏབ༔ ཅོང་ཞི་ཚ་འདུལ་བྱས་པ་ནི༔ གར་ཆང་རྟར་བསྐྱོན་མང་དུ་བཏབ༔ རིལ་བུ་ཆེ་ཆུང་གང་རུང་བྱ༔ དང་པོ་ཕྲན་བུ་དག་གིས་བསླབ༔ དེ་ནས་འབྲིང་དང་ཆེས་ཆེར་བཏང་༔ རླུང་གི་སྦྱོར་བ་སྔགས་དང་དམིགས༔ འཁྲུལ་འཁོར་ལག་ལེན་ལ་སོགས་པ༔ དབང་ལག་བཅུད་ལེན་བཞིན་དུ་སྤྱོད༔ ས་མ་ཡཱ༔ རྒྱ་རྒྱ་རྒྱ༔ འདི་ལྟར་ཟབ་མོའི་བཅུད་ལེན་འདི༔ བསྟེན་པའི་སྐལ་ལྡན་སྐྱེས་བུ་ལ༔ སྐྲ་དཀར་གཉེར་མ་མེད་པ་དང་༔ བརྒྱད་ཅུའི་ལོ་ལོན་རྒན་པོ་ཡང་༔ བཅུ་དྲུག་གཞོན་ནུའི་མདངས་ལས་གསལ༔ འདུས་པའི་ནད་རྣམས་གཏན་ནས་འབྱང་༔ ཕོ་བའི་མེ་དྲོད་ཉམས་པ་གསོས༔ མིག་གི་དབང་པོ་རབ་ཏུ་གསལ༔ ལྕེ་བདེ་ངག་སྙན་དབང་པོ་དྭངས༔ རྣ་བའི་སྒྲ་ཉམས་སོས་པ་དང་༔ ཡོན་ཏན་བརྗོད་ལས་འདས་པ་འཐོབ༔ ཟླ་བ་གཅིག་དང་ཟླ་འབྲེལ་ལ༔ བསྟེན་དང་ཐུན་མོང་ལས་རྣམས་འགྲུབ༔ ལོར་བསྟེན་མཆོག་གི་ས་ལ་རེག༔ བཤད་པ་བཞིན་དུ་ཉམས་བླངས་ནས༔ ཡོན་ཏན་དེ་དག་མ་ཐོབ་ན༔ པདྨ་བདག་གིས་མ་ཤེས་སོ༔ ཕྱི་རབས་རྣམས་ཀྱིས་ཉམས་སུ་ལོངས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་འདྲ་སྤྲང་བན་འགྲོ་འདུལ་གླིང་པས་ཤིང་མོ་ཡོས་ཀྱི་ལོ་ཧོར་ཟླ་བཅུ་པའི་ཚེས་བཅོ་ལྔའི་ནུབ་མོའི་ཐོ་རེངས་ཁར་གནས་མཆོག་ཆེན་པོ་གངས་རིའི་རྒྱལ་པོ་ཏེ་སེའི་བདེ་ཆེན་གསང་བ་ཕུག་ནས་གཏེར་གྲོགས་ཀུན་བཟང་དབང་མོ་དང་བཅས་ཏེ་གདན་དྲངས་ཤིང་༔ ས་ཕོ་རྟ་ལོའི་ཧོར་ཟླ་བཅུ་པར་ཤོག་སེར་ལས་ཕབ་པའོ། །མངྒ་ལཾ།། །།