ཚེ་སྒྲུབ་ལས་མཐའ་ཤིང་ཆེན་བདུད་རྩི་བཞིའི་བཅུད་ལེན།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ཚེ་སྒྲུབ་ལས་མཐའ་ཤིང་ཆེན་བདུད་རྩི་བཞིའི་བཅུད་ལེན་ཡོད༔ དབང་ཆེན་ཧེ་རུ་ཀཿལ་འདུད༔ རྩོད་ལྡན་དུས་ཀྱི་འགྲོ་བ་འགའ༔ ཐར་པའི་ལམ་ལ་འདྲེན་པའི་ཕྱིར༔ ཤིང་ཆེན་བདུད་རྩི་རྣམ་བཞི་ཡི༔ བཅུད་ལེན་ཟབ་མོ་བདག་གིས་འགོད༔ སྐལ་ལྡན་རྣམས་ཀྱིས་ཉམས་སུ་ལོངས༔ ས་མ་ཡཱ༔ རྒྱ་རྒྱ་རྒྱ༔ སྔགས་དང་ཏིང་འཛིན་དམིགས་པར་བཅས༔ བདུད་རྩི་འབྱུང་བའི་ཤིང་བཞི་ཐུ༔ རྡོ་གཞོང་ནང་དུ་ལེགས་པར་མཉེ༔ མང་ཉུང་མེད་པར་ཆ་མཉམ་སྟེ༔ གས་ཆག་མེད་པའི་རྫ་མར་བསྐོལ༔ ཁུ་བ་འདུས་ནས་རས་ལ་བཙག༔ བུ་རམ་སྦྲང་རྩི་མར་དང་ནི༔ དབང་ལག་ཕྱེ་མ་ཅི་མང་སྦྱོར༔ ཆུས་བསྐོལ་དག་ཏུ་བསྲུབ་ནས་ཀྱང་༔ ཁཎྜ་གར་སླ་རན་པའི་དུས༔ རིལ་བུ་ཤ་བའི་རིལ་མ་ཙམ༔ བསྒྲིལ་ཏེ་ཆེ་ཆུང་འབྲིང་སོགས་ཀྱི༔ མ་གོམས་བར་དུ་བསྟེན་མཁས་བྱ༔ གོམས་ནས་ཁ་ཟས་ལྟ་བུར་སྤྱོད༔ ཐོ་རངས་རྩ་སྟོང་དུས་སུ་བཟའ༔ སྔགས་དང་དམིགས་པའི་འཁྲུལ་འཁོར་རླུང་༔ དབང་ལག་བཅུད་ལེན་བཞིན་དུ་སྤྱོད༔ ས་མ་ཡཱ༔ རྒྱ་རྒྱ་རྒྱ༔ བདུད་རྩི་འབྱུང་བའི་ཤིང་སྣ་བཞི༔ མཚེ་དང་བ་ལུ་ཤུག་པ་དང་༔ མཁན་པ་དཀར་པོ་རྣམ་པ་བཞི༔ རྒས་དང་གཞོན་པའི་སྐྱོན་མེད་དུས༔ རྩོལ་བསྒྲུབ་བྱས་ཏེ་འདུལ་དང་སྦྱོར༔ ལས་ལ་སྦྱར་བའི་མན་ངག་ཡིན༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་བསྟེན་པའི་སྐལ་ལྡན་ལ༔ རྒྱལ་བ་རྣམས་ཀྱིས་བྱིན་རློབ་ཅིང་༔ མཁའ་འགྲོ་ལུས་དང་གྲིབ་བཞིན་འགྲོག༔ ཡི་དམ་ཆོས་སྐྱོང་སྤྲིན་བཞིན་འདུ༔ རི་བྲག་རྣམས་ལ་ཟང་ཐལ་འགྲོ༔ ལུས་ཀྱི་གཅོང་དང་འབུ་སྲིན་འབྱང་༔ ལས་ཀྱི་སྒྲིབ་པ་མྱུར་དུ་འདག༔ ཆོས་རྣམས་མ་བསླབས་ཁོང་ནས་འཆར༔ རང་བྱུང་སྤྲོས་བྲལ་རང་ཞལ་མཐོང་༔ ཕ་རོལ་འགྲོ་བའི་སེམས་ཀྱང་ཤེས༔ ཐ་ན་བདུན་ཕྲག་གཅིག་བསྟེན་ན༔ གཅོང་ཆེན་སྡེ་བཞིའི་ནད་རྣམས་འབྱང་༔ ལོ་གཅིག་བསྟེན་ན་རིག་འཛིན་ཚེ༔ ཨོ་རྒྱན་བདག་དང་ཁྱད་པར་མེད༔ གཞན་ཡང་ཕན་ཡོན་བརྗོད་ལས་འདས༔ རྒྱ་གར་འཕགས་ཡུལ་དམ་པ་ན༔ རིག་འཛིན་ཕོ་མོས་འདི་བཞིན་སྤྱོད༔ གྲུབ་ཐོབ་ནམ་མཁའི་སྐར་ཚོགས་འདྲ༔ མཐའ་འཁོབ་བོད་ཀྱི་རྒྱལ་ཁམས་འདིར༔ ཆོས་སྒོར་ཞུགས་ཀྱང་ཆོས་མིན་སྤྱོད༔ གདམས་ངག་ཐོབ་ཀྱང་ཉམས་མི་ལེན༔ བཅུད་ལེན་མི་བསྟེན་འཇའ་ལུས་མེད༔ བོད་ཡུལ་ཆོས་བྱེད་ཡི་རེ་མུག༔ ས་མ་ཡཱ༔ རྒྱ་རྒྱ་རྒྱ༔ མ་འོངས་བསྐལ་པའི་ཐ་མ་ལ༔ བདུད་སྤྲུལ་བྱང་སེམས་ཆས་ལ་འཇུག༔ བཀའ་དང་བསྟན་བཅོས་དཀྲུག་ཅིང་སྤེལ༔ ཐུབ་པའི་བསྟན་པ་ཉམས་པའི་རྟགས༔ པད་འབྱུང་ང་ལ་གཉིས་ཡོད་ཟེར༔ རྫོགས་ཆེན་ཆོས་ལོག་བོན་དང་འདྲེས༔ ཀུན་གྱིས་སྤོངས་ཤིག་མ་བྱེད་ཟེར༔ ང་སྤྲུལ་སྐལ་ལྡན་སྐྱེས་བུ་ཡི༔ ཚུལ་འཆོས་མི་སྣང་མི་བསྟུན་ཚེ༔ ཟོག་པོར་མཐོང་ཞིང་ཐན་དུ་བལྟ༔ བདུད་སྤྲུལ་རྣམས་ལ་འགྲོ་བ་འདུ༔ ཨེ་མ་བསྐལ་པའི་ཡང་མཐའ་ལ༔ སྨོན་ལམ་མཐའ་བཙན་ཁམས་སུ་སྐྱེ༔ ཁམས་ཞིག་ཉི་མ་གྲགས་པ་ཞེས༔ འདོད་བློ་མེད་ཅིང་ཞེ་འདོད་བྲལ༔ མ་དར་ས་ནས་དགྲ་སྡང་ཞིང་༔ བཟང་ལེན་ངན་འཇལ་མི་ཁ་སྡང་༔ དད་མོས་མི་བྱེད་འབར་ཤ་ལྡིར༔ ཞབས་ཏོག་མི་བྱེད་ཞབས་འདྲེན་མང་༔ དེ་ཚེ་བཟོད་པའི་གོ་ཆ་གྱོན༔ ཐུགས་རྗེ་ཆེན་པོའི་ཏིང་འཛིན་བསྒོམས༔ བཅུད་ལེན་བསྟེན་ཞིང་རི་ཁྲོད་འགྲིམས༔ ངེས་མེད་གནས་ལ་སྒྲུབ་པ་གྱིས༔ མཚན་ལྡན་ཕྱག་རྒྱ་གྲོགས་སུ་བསྟེན༔ བདག་ཅན་བུད་མེད་ནོར་མ་གསོག༔ ཆོས་བདག་སྐལ་ལྡན་མ་གཏོགས་པ༔ ཟང་ཟིང་བོར་ལ་བསྒྲུབ་ལ་བརྩོན༔ མི་ངོ་མ་བསྲུང་དམ་ཚིག་སྲུངས༔ པད་འབྱུང་ང་ཡི་བསླབ་སྟོན་ཉོན༔ ཕས་ཟེར་ཉོན་ལ་ཕ་རྗེས་ཤོག༔ པདྨ་འོད་ཀྱི་ཕོ་བྲང་དུ༔ ང་རང་ཕ་སྦད་ཉམས་དབྱངས་སྐྱོང་༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ སྤྲང་བན་འགྲོ་འདུལ་གླིང་པ་ཡི། །ཏེ་སེའི་གངས་ནས་འདི་འདྲ་མཇལ། །མི་མིང་མེད་པའི་བྱ་བྲལ་ང་། །དགའ་ཡང་དགའ་ལ་སྐྱིད་ཀྱང་སྐྱིད། །མངྒ་ལཾ།། །།