བདེ་མཆོག་འཁོར་ལོའི་ཆ་ལག་ཚེ་སྒྲུབ་ཀྱི་དབང་བཤད།
བདེ་མཆོག་འཁོར་ལོའི་ཆ་ལག་ཚེ་སྒྲུབ་ཀྱི་དབང་བཤད་བཞུགས། འོ་ན་ད་ལམ་ཁྱེད་རྣམས་ལ་འཆི་བ་མེད་པའི་རིག་འཛིན་ཚེའི་དབང་བསྐུར་བའི་ཐོག་མར་ལོ་རྒྱུས་ཀྱི་རྣམ་པ་མདོ་ཙམ་ཞིག་བརྗོད་པར་བྱ་སྟེ། དེའང་སྔོན་བསྐལ་པ་བསམ་གྱིས་མི་ཁྱབ་པའི་གོང་རོལ་དུ་གླིང་ཆེན་པོ་བཞི་ལ་དབང་བའི་རྒྱལ་པོ་ཆེན་པོ་རྩིབས་ཀྱི་མུ་ཁྱུད་འཛིན་ཞེས་བྱ་བས་རྫོགས་པའི་སངས་རྒྱས་རིན་ཆེན་སྙིང་པོ་ལ་སེམས་བསྐྱེད་དེ། བསྐལ་པ་གྲངས་མེད་གསུམ་ལ་ཚོགས་བསགས། གྲངས་མེད་གསུམ་ལ་སྒྲིབ་པ་སྦྱངས། དེ་ནས་གྲངས་མེད་གསུམ་གྱི་མཐར་ནུབ་ཕྱོགས་བདེ་བ་ཅན་གྱི་ཞིང་ཁམས་སུ་འཁོར་ལོས་སྒྱུར་བའི་རྒྱལ་པོ་བཟང་པོ་མཆོག་གི་སྲས་སུ་སྐུ་འཁྲུངས་ནས་མངོན་པར་རྫོགས་པར་སངས་རྒྱས་ཏེ། ཞིང་དེའི་སྟེང་ཕྱོགས་ཀྱི་ནམ་མཁའ་ལ་ཡོན་ཏན་དཔག་ཏུ་མེད་པ་ཞེས་བྱ་བའི་ཞིང་ཁམས་སུ་བཞུགས་པའོ། །རྫོགས་པའི་སངས་རྒྱས་དེ་ཉིད་ཀྱིས་རིགས་དྲུག་གི་སེམས་ཅན་རྣམས་ལ་འགྲོ་བའི་དོན་བསམ་གྱིས་མི་ཁྱབ་པར་མཛད་པའི་ནང་ནས་འཛམ་གླིང་ལས་ཀྱི་ས་པ་འདིར། རྩོད་ལྡན་ཚེ་ལོ་བརྒྱ་པའི་ཚེ་སངས་རྒྱས་ཤཱཀྱ་ཐུབ་པའི་བསྟན་པ་ལ་གསང་སྔགས་ཆོས་ཀྱིས་འགྲོ་བ་འདྲེན་པའི་ཕྱིར་དུ་རྡོ་རྗེ་ཧྲཱིཿཡིག་གིས་མཚན་པ་ཞིག་དྷ་ན་ཀཽ་ཤའི་རྒྱ་མཚོར་འཕྲོས་པས། མཚོ་དེའི་དབུས་སུ་ངོ་བོ་གསེར་གྱི་བྱེ་མས་བརྒྱན་པ་ཞིག་ཆགས་པའི་ལྷོ་ངོས་སུ་ཡན་ལག་བརྒྱད་ལྡན་གྱི་ཆུ་མིག་གསུམ་འབབས་པའི་དབུས་མ་ལ་མེ་ཏོག་པདྨ་གེ་སར་གྱི་སྡོང་པོ་སྐྱེས་པ་ལས། ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་སྐུ་དབང་ཆེན་ཆུ་ཕོ་སྤྲེལ་གྱི་ལོ་ལ་འཁྲུངས་ནས་ཨོ་རྒྱན་རྒྱལ་པོ་ཨིནྡྲ་བྷོ་དྷིས་མཇལ་བའི་ཚེ་གསོལ་བ། ཀྱེ་ཁྱེའུ་ཆུང་དམ་པ་ཁྱོད་ཀྱི་ཡབ་གང་ཡིན། ཡུམ་སུ་ཡིན། ཟས་སུ་ཅི་གསོལ། འདི་རུ་ཅི་མཛད་པར་བཞུགས་ཞུས་པས་བཀའ་སྩལ་པ། བདག་གི་ཕ་ནི་རིག་པའི་ཡེ་ཤེས་ཡིན༔ མ་ནི་བདེ་སྟོང་ཀུན་ཏུ་བཟང་མོ་ཡིན༔ ཡུམ་ནི་ཆོས་དབྱིངས་སྐྱེ་བ་མེད་པ་ཡིན༔ ཟས་སུ་གཉིས་སྣང་རྟོག་པ་བཟའ་བ་ཡིན༔ འདིར་ནི་ཉོན་མོངས་གསོད་པའི་སྤྱོད་པ་སྐྱོང་༔ ཅེས་གསུངས་པར་རྒྱལ་པོ་དགྱེས་ཏེ་ཐོར་ཅོག་དགུ་ལྡན་གྱི་ཕོ་བྲང་དུ་སྲས་སྐལ་ལ་ཕེབས་པར་གསོལ་བ་བཏབ་ནས་སྤྱན་དྲངས་ཏེ་མཚན་པདྨ་རྒྱལ་པོ་ཞེས་གསོལ། དེ་ཡང་ནུབ་ཕྱོགས་ཨོ་རྒྱན་གྱི་ཡུལ་ནི་ཆ་ལང་ཁ་སྦུབ་པའི་དབྱིབས་སུ་ཆགས་པའི་རྒྱ་ནི་འཛམ་གླིང་སུམ་གཉིས་དང་ལྡན་པའི་དབུས་སུ། དྷ་ན་ཞེས་ཙན་དན་གྱི་ལྗོན་པའི་གླིང་ན་ཀཽ་ཤ་ཞེས་ལུས་མི་གདོང་དྲེད་རྐང་ལག་ལྕགས་ཀྱི་སྡེར་མོ་ལུས་ལ་རིན་པོ་ཆེ་ཕྲན་བུ་མང་པོས་བལྟམས་པའི་སེམས་ཅན་གྱིས་གང་བའི་དབུས་ན་མཚོ་དེ་ཉིད་ཡོད་ཅིང་༔ རྒྱ་གར་གྱི་སྐད་དུ་དྷ་ན་ཀཽ་ཤའི་སཱ་ག་ར། བོད་སྐད་དུ་ཀླུ་རྫིང་ཕུག་ལེགས་ཞེས་བྱ་སྟེ། མིའི་ཡན་ལག་བརྒྱད་ལྡན་གྱིས་གང་བའི་མཚོ་དེ་ནི་ཀླུའི་རྒྱལ་པོ་འཇོག་པོའི་ཕོ་བྲང་ངོ་༔ ཡུལ་དེའི་སྐྱེ་འགྲོ་རྣམས་ཀྱི་གོས་ནི་རས་དཀར་སྔོ་སྣ་ཚོགས་སུ་གྱོན་ཞིང་སྐྱེས་པ་རྣམས་ཀྱི་སྐྲའི་ཐོར་ཅོག་སྤྱི་བོར་བཅིངས་ཤིང་གསེར་དངུལ་དང་མུ་མེན་གྱིས་བརྒྱན་པ༔ བུད་མེད་རྣམས་ཀྱི་སྐྲ་མདུན་རྒྱབ་གཉིས་སུ་བཅིངས་ནས་དུང་དང་རུས་པའི་རྒྱན་གྱིས་སྤྲས་པ་ཤ་སྟག་གོ། དེ་ལ་སྤྱིར་འཛམ་གླིང་འདིར་མཁའ་འགྲོ་འདུ་བའི་གནས་བརྒྱ་དང་བཅུ་གསུམ་དུ་གསུངས་པའི་ནང་ནས་མཆོག་གི་གནས་བརྒྱད་ཡུལ་དེ་ཉིད་དུ་བཞུགས་པས་གསང་སྔགས་བླ་ན་མེད་པའི་ཆོས་ཁོ་ན་དར་ཞིང་སྤྱོད་པའི་གླིང་ཕུན་སུམ་ཚོགས་པ་ལྔའི་རང་བཞིན་ཅན་ནོ། །དེ་ལྟ་བུའི་ཡུལ་མཆོག་ཁྱད་པར་ཅན་དུ་སྐུ་འཁྲུངས་པའི་གུ་རུ་རིན་པོ་ཆེ་དེ་ཉིད་རྒྱལ་པོའི་ཁབ་ཏུ་ལོ་ལྔ། བསིལ་བ་ཚལ་དུ་ལོ་ལྔ། རིག་གནས་སྦྱངས་པར་ལོ་བཅུ། རྒྱ་གར་རྒྱ་ནག་ཨོ་རྒྱན་ཟ་ཧོར་མ་གྷ་དྷ་མུ་སྟེགས་ཁ་ཆེ་སེང་ག་ལ་ལི་ཡུལ་མེ་རུ་རྩེ་ལ་སོགས་པའི་ཡུལ་རྣམས་སུ་ཉིས་བརྒྱ་ཉིས་བརྒྱ་བཞུགས། འ་ཤ་བྲུ་ཤ་ཤམ་བྷ་ལ་ཞང་ཞུང་ཏ་ཟིག་གེ་སར་ཐོ་གར་རུག་མ་སྲིན་པོ་ཀླུ་ཡུལ་རྣམས་སུ་དགུ་བཅུ་རྩ་བརྒྱད་རེ་བཞུགས། བལ་ཡུལ་མི་ལོ་བཞི་བཅུར་འགྲོ་དོན་མཛད། མཚན་ཡང་པདྨ་འགྲོ་མགོན་རྩལ་དང་། པདྨ་དབང་ཕྱུག་མགོན་དང་། པདྨ་བློ་གྲོས་མཆོག་ལྡན་དང་། པདྨ་མི་མཆོག་རྩལ་དང་། པདྨ་བཛྲ་རྩལ་དང་། པདྨ་མཁའ་འགྲོའི་དབང་ཕྱུག་རྩལ་དང་། པདྨ་གུ་རུ་མཚོ་སྐྱེས་རྡོ་རྗེ་དང་གུ་རུ་པདྨ་རྒྱལ་པོ་དང་། པདྨ་ཉི་མ་འོད་ཟེར་དང་། པདྨ་སམ་བྷ་ཝ་དང་། པདྨ་རྡོ་རྗེ་དྲག་པོ་རྩལ་དང་། པདྨ་མཐོང་གྲོལ་རྩལ་དང་། པདྨ་བིར་ཝ་པ་དང་། པདྨ་ནག་པོ་སྤྱོད་པ་དང་། པདྨ་མཁའ་ལྡིང་རྩལ་དང་། པདྨ་ས་ར་ཧ་དང་། པདྨ་འགྲོ་བའི་སྐྱབས་དང་། པདྨ་འཕྲིན་ལས་མགོན་དང་། པདྨ་དོན་ཡོད་ཞགས་པ་དང་། པདྨ་ཌོམ་བྷི་ཧེ་རུ་ཀཿདང་། པདྨ་རིགས་ལྡན་དཀར་པོ་དང་། པདྨ་གཟི་བརྗིད་འོད་འཕྲོ་དང་། གུ་རུ་པདྨ་འབྱུང་གནས་ལ་སོགས་མཚན་གྱི་རྣམ་གྲངས་དང་སྐུའི་སྤྲུལ་སྒྱུར་སྣ་ཚོགས་སུ་མཛད་ནས། གང་ལ་གང་འདུལ་གྱི་བསྟན་འགྲོའི་དོན་མཛད་པའི་སྐབས་སུ་བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱིས་སྤྱན་དྲངས་པས། བསྟན་འགྲོའི་དོན་དུ་བོད་ཡུལ་དུ་ཕེབས་ནས་ལྷ་འདྲེ་མི་གསུམ་ཆོས་ལ་བཙུད། སངས་རྒྱས་ཀྱི་བསྟན་པ་བཙུགས་པའི་དུས་སུ་ཆོས་འཁོར་དཔལ་གྱི་བསམ་ཡས་མཆིམས་ཕུའི་དགེ་གོང་དུ། ལས་ལྡན་གྱི་རྗེ་འབངས་རྣམས་ལ་བཀའ་རྫོགས་པ་ཆེན་པོ་བླ་མ་བདེ་མཆོག་དབང་གི་འཁོར་ལོའི་ཟབ་ཆོས་ཀྱི་གདམས་པ་རྣམས་གནང་བའི་ཚེ་གུ་རུའི་ཞལ་ནས། མ་འོངས་དུས་ཀྱི་ཐ་མ་ལ༔ ནད་རིམས་རྐྱེན་དང་བར་ཆད་མང་༔ བློ་བུར་ཡེ་འབྲོག་འཚུབ་པའི་དུས༔ ཆོས་ལྡན་སྐྱེས་བུའི་རྐྱེན་ཟློག་ཏུ༔ རིག་འཛིན་ཚེ་ཡི་སྒྲུབ་པ་ནི༔ ཟབ་ལས་ཆེས་ཟབ་ཁྱད་འཕགས་ཤིག༔ ཚེ་ཡི་རིག་འཛིན་པདྨས་བརྗོད༔ སྐལ་ལྡན་ཀུན་གྱིས་ཉམས་སུ་ལོངས༔ ཞེས་དང་། དེ་བཞིན་དུ། བསྙེན་སྒྲུབ་ཐེམས་པའི་རྣལ་འབྱོར་པས༔ དབང་ཆོག་འདི་བཞིན་གཞན་དོན་སྤྱོད༔ སྡིག་ཅན་འགྲོ་ལ་སྦ་བར་བྱ༔ ཆོས་ལྡན་སྐྱེས་བུའི་གྲོགས་སུ་ཤོག༔ སྔོན་ཆད་འཛམ་གླིང་བོད་ཡུལ་འདིར༔ དབང་མཆོག་འདི་འདྲ་མ་གྲགས་སོ༔ པདྨ་བདག་གི་ཐུགས་ཐིགས་ཡིན༔ རང་གི་སྲོག་གིས་ཅི་རི་རྣམས༔ ཟབ་མོའི་དབང་འདིའི་ཡོན་དུ་རི༔ མཆོག་གི་དངོས་གྲུབ་ཚེ་འདིས་འགྲུབ༔ ཐུན་མོང་ཙམ་ལ་སྨོས་ཅི་དགོས༔ ཉམས་སུ་ལོངས་ཤིག་རྗེས་འཇུག་རྣམས༔ སྲུང་མས་བཀའ་འདིའི་བྱ་ར་གྱིས༔ ལས་འཕྲོ་ཅན་དང་འཕྲད་པར་ཤོག༔ ཅེས་གསུངས་པའི་ཟབ་ཆོས་ཚེའི་སྒྲུབ་ཐབས་དབང་གི་རིམ་པ་དང་བཅས་པ་འདི་མ་མཁའ་འགྲོ་ཡེ་ཤེས་མཚོ་རྒྱལ་གྱིས་མཁའ་འགྲོའི་ཡི་གེར་བཏབ་ནས་གནས་མཆོག་ཆེན་པོ་གངས་རིའི་རྒྱལ་པོ་ཏེ་སེ་ཞེས་མདོ་རྒྱུད་དུ་མ་ནས་ལུང་བསྟན་པའི་ཕོ་བྲང་མཁའ་འགྲོའི་གསང་མཛོད་དུ་སྦས་པ། གུ་རུ་སངས་རྒྱས་གཉིས་པའི་ལུང་བསྟན་དུས་བབ་ལྟར་དུ། མ་འོངས་བསྐལ་པའི་ཐ་མ་ལ༔ བདུད་སྤྲུལ་བྱང་སེམས་ཆས་ལ་འཇུག༔ བཀའ་དང་བསྟན་བཅོས་དཀྲུག་ཅིང་སྤེལ༔ ཐུབ་པའི་བསྟན་པ་ཉམས་པའི་རྟགས༔ པད་འབྱུང་ང་ལ་གཉིས་ཡོད་ཟེར༔ རྫོགས་ཆེན་ཆོས་ལོག་བོན་དང་འདྲེས༔ ཀུན་གྱིས་སྤོངས་ཤིག་མ་བྱེད་ཟེར༔ ང་སྤྲུལ་སྐལ་ལྡན་སྐྱེས་བུ་ཡིས༔ ཚུལ་འཆོས་མི་སྣང་མི་བསྟུན་ཚེ༔ ཟོག་པོར་མཐོང་ཞིང་ཐན་དུ་བལྟ༔ བདུད་སྤྲུལ་རྣམས་ལ་འགྲོ་བ་འདུ༔ ཨེ་མ་བསྐལ་པའི་ཡང་མཐའ་ལ༔ ལོ་ཙཱ་ཀླུ་ཡི་དབང་པོ་ཁྱོད༔ སྨོན་ལམ་མཐའ་བཙན་ཁམས་སུ་སྐྱེ༔ ཁམས་ཞིག་ཉི་མ་གྲགས་པ་ཞེས༔ འདོད་བློ་མེད་ཅིང་ཞེ་འདོད་བྲལ༔ མ་དར་ས་ནས་དགྲ་སྡང་ཞིང་༔ བཟང་ལེན་ངན་འཇལ་མི་ཁ་སྡང་༔ དད་མོས་མི་བྱེད་འབར་ཤ་ལྡིར༔ ཞབས་ཏོག་མི་བྱེད་ཞབས་འདྲེན་མང་༔ དེ་ཚེ་བཟོད་པའི་གོ་ཆ་གྱོན༔ ཐུགས་རྗེ་ཆེན་པོའི་ཏིང་འཛིན་བསྒོམས༔ བཅུད་ལེན་བསྟེན་ཞིང་རི་ཁྲོད་འགྲིམས༔ ངེས་མེད་གནས་ལ་སྒྲུབ་པ་གྱིས༔ མཚན་ལྡན་ཕྱག་རྒྱ་གྲོགས་སུ་བསྟེན༔ བདག་ཅན་བུད་མེད་ནོར་མ་གསོག༔ ཆོས་བདག་སྐལ་ལྡན་མ་གཏོགས་པ༔ ཟང་ཟིང་བོར་ལ་བསྒྲུབ་ལ་བརྩོན༔ མི་ངོ་མ་བསྲུང་དམ་ཚིགས་སྲུངས༔ པད་འབྱུང་ང་ཡི་བསླབ་སྟོན་ཉོན༔ ཕས་ཟེར་ཉོན་ལ་ཕ་རྗེས་ཤོག༔ པདྨ་འོད་ཀྱི་ཕོ་བྲང་དུ༔ ང་རང་ཕ་སྤད་ཉམས་དབྱངས་སྐྱོང་༔ ཞེས་གསུངས་པ་ལྟར་དུ། གངས་ཏེ་སེའི་བདེ་ཆེན་གསང་བ་ཕུག་ནས་ཤིང་མོ་ཡོས་ཀྱི་ལོ་ལ་གདན་དྲངས་ཤིང་ས་ཕོ་རྟ་ལོར་ཁམས་སྲིང་མོ་རྫོང་གི་གནས་མཆོག །གུ་ཧ་ཀཱ་ལར་ཤོག་སེར་ལས་བསྒྱུར་བའི་དབང་དང་གདམས་པ་བདག་གིས་ལེགས་པར་ཐོབ་པ་ཁྱེད་རང་རྣམས་ཀྱིས་ཞུ་བའི་དོན་དུ་ཞེས་པ་ནས་གཞུང་བཞིན་ལག་ལེན་མཐོང་བརྒྱུད་ལྟར་དབང་རྣམས་བསྐུར་བར་བྱའོ། ཞེས་པ་འདི་ཡང་ལྷ་སྟེང་སྐུ་སྐྱེ་བློ་གྲོས་རྒྱ་མཚོར་ཕན་ཕྱིར་རིག་འཛིན་པས་བྲིས། མངྒ་ལཾ།། །།