རྡོར་སེམས་མཆོད་བསྟོད་ཆོ་ག
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ རྡོར་སེམས་མཆོད་བསྟོད་ཆོ་ག་ཡོད༔ ཧེ་རུ་ཀཿལ་ཕྱག་འཚལ་ལོ༔ རིགས་བདག་རྡོ་རྗེ་སེམས་དཔའ་ཡི༔ མཆོད་བསྟོད་ཆོ་གའི་རིམ་པ་ཞིག༔ མ་འོངས་འགྲོ་བའི་དོན་ཉིད་དུ༔ པདྨ་བདག་གིས་འགོད་པར་བྱ༔ ས་མ་ཡཱ༔ རྒྱ་རྒྱ་རྒྱ༔ རྡོ་རྗེ་སེམས་དཔའི་ཏིང་འཛིན་གྱིས༔ བདག་གཞན་དོན་གཉིས་བསྒྲུབ་འདོད་པས༔ དཀྱིལ་འཁོར་རྫས་དང་ཡོ་བྱད་རྣམས༔ དབང་དང་སྒྲུབ་གཞུང་ལས་སྦྱོར་སོགས༔ གང་འདོད་བཞིན་དུ་སྟ་གོན་བྱ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ལས་བྱང་རིམ་པ་ལ༔ སྔོན་འགྲོ་དངོས་གཞི་རྗེས་གསུམ་ལས༔ དང་པོ་སྔོན་དུ་འགྲོ་བ་ནི༔ རྣལ་འབྱོར་བདེ་བའི་གདན་ལ་འདུག༔ སྐྱབས་སུ་འགྲོ་དང་སེམས་བསྐྱེད་དང་༔ མཆོད་རྫས་བྱིན་བརླབ་བསྐྱེད་རིམ་སྟེ༔ སྔོན་དུ་འགྲོ་བའི་ལས་ཁྲིགས་བཞི༔ ས་མ་ཡཱ༔ རྒྱ་རྒྱ་རྒྱ༔ སྤྱན་འདྲེན་བཞུགས་གསོལ་ཕྱག་མཆོད་བསྟོད༔ འཛབ་ཀྱི་ལས་སྦྱོར་རྣམ་པ་དྲུག༔ དངོས་གཞིའི་ལས་ཁྲིགས་རིམ་པའོ༔ ས་མ་ཡཱ༔ རྒྱ་རྒྱ་རྒྱ༔ བཀྲ་ཤིས་བསྔོ་སྨོན་བསྐྱེད་རིམ་བསྡུ༔ རྫོགས་རིམ་ཆོས་ཉིད་ལམ་ཁྱེར་བཞིས༔ རྗེས་ཀྱི་ལས་ཁྲིགས་རྫོགས་པར་སྟོན༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྐྱབས་སུ་འགྲོ་བ་ནི༔ ཧཱུྃ་ཧྲཱི༔ བདག་དང་འགྲོ་དྲུག་སེམས་ཅན་ཀུན༔ བྱང་ཆུབ་སྙིང་པོ་མ་ཐོབ་བར༔ སྐྱབས་གནས་ཀུན་འདུས་རྡོ་རྗེ་སེམས༔ རྣམ་པ་ཀུན་ཏུ་སྐྱབས་སུ་མཆི༔ སེམས་བསྐྱེད་ནི༔ ཧཱུྃ་ཧྲཱི༔ སྟོང་ཉིད་ངང་ལས་མ་གཡོས་ཀྱང་༔ མཛད་པའི་ཆོ་འཕྲུལ་ཏིང་འཛིན་གྱིས༔ འགྲོ་བ་སྒྲོལ་བར་དམ་བཅའ་ཞིང་༔ གཞན་དོན་བསྒྲུབ་པར་སེམས་བསྐྱེད་དོ༔ མཆོད་རྫས་བྱིན་གྱིས་བརླབ་པ་ནི༔ ཨཱོཾ་ཨཱཿཧཱུྃ༔ ཕྱི་ནང་གསང་བའི་མཆོད་རྫས་རྣམས༔ ཨཱོཾ་གྱིས་དངོས་འཛིན་བག་ཆགས་སྦྱངས༔ ཨཱཿཡིས་ཟག་མེད་བདུད་རྩིར་བསྒྱུར༔ ཧཱུྃ་གིས་འདོད་ཡོན་ལོངས་སྤྱོད་སྤེལ༔ ཨཱོཾ་ཨཱཿཧཱུྃ་བཛྲ་ཨརྒྷཾ་པུཥྤེ་དྷུ་པེ་ཨཱ་ལོ་ཀེ་གྷནྡྷེ་ནཻ་ཝི་ཏེ་ཤཔྟ་ཨཱ་ཧཱུྃ་སྭཱ་ཧཱ༔ ཏིང་འཛིན་ལྷ་ཡི་བསྐྱེད་རིམ་ནི༔ ཨཱོཾ་མ་ཧཱ་ཤུ་ཛྙཱ་ན་སྭ་བྷ་ཝ་དྷརྨཱ་དྷརྟུ་ཧཱུྃ༔ འཁོར་འདས་ཆོས་རྣམས་ཡེ་ནས་སྟོང་༔ སྤྲོས་བྲལ་བློ་འདས་དེ་བཞིན་ཉིད༔ ཀུན་ཁྱབ་བརྩེ་བའི་ངང་ཉིད་ལས༔ རང་བྱུང་ཡེ་ཤེས་ཡི་གེ་ལྔ༔ ཨཱོཾ་ཧཱུྃ་ཏྲཾ་ཧྲཱིཿཨཱཿབྷྲུྃ༔ ཡོངས་སུ་གྱུར་པའི་གཞལ་ཡས་ཁང་༔ མཚན་ཉིད་ཡོངས་རྫོགས་ཕོ་བྲང་དབུས༔ མངོན་པར་དགའ་བའི་ཞིང་ཁམས་སུ༔ ཐུགས་སྲོག་ཧཱུྃ་ཡིག་ཡོངས་གྱུར་པས༔ རིགས་བདག་སྟོན་པ་རྡོ་རྗེ་སེམས༔ ཉི་ཟླ་པདྨའི་གདན་སྟེང་ན༔ ཞལ་གཅིག་ཕྱག་གཉིས་ལོངས་སྤྱོད་རྫོགས༔ ཞབས་གཉིས་རྡོ་རྗེའི་སྐྱིལ་ཀྲུང་ཅན༔ པྲོག་ཞུ་དབུ་བརྒྱན་རྡོ་རྗེ་གཡས༔ ཐུགས་ཀར་གཏོད་པའི་ཚུལ་དུ་བསྣམས༔ དར་ལྗང་སྟོད་གཡོགས་དྲིལ་བུ་གཡོན༔ འགྱིང་ཚུལ་ལྡན་པའི་སྐུ་ལ་བརྟེན༔ སྤྱན་གཉིས་འཛུམ་པའི་མདངས་དང་ལྡན༔ སྣ་ཚོགས་དར་དང་རུས་པས་བརྒྱན༔ ལོངས་སྤྱོད་རྫོགས་སྐུའི་གཟི་འོད་འབར༔ འོད་ལྔ་འཁྲུག་པའི་ཀློང་དུ་བཞུགས༔ དེ་ཡི་ཕྱི་རིམ་ཕྱོགས་བཞི་ན༔ མདངས་ལྡན་པདྨ་འདབ་མ་བཞི༔ ཤར་ཕྱོགས་པདྨ་ཉི་ཟླའི་སྟེང་༔ བྷུདྡྷ་རྡོར་སེམས་སྐུ་མདོག་མཐིང་༔ ལྷོ་ཕྱོགས་པདྨ་ཉི་ཟླའི་སྟེང་༔ རཏྣ་རྡོར་སེམས་སྐུ་མདོག་སེར༔ ནུབ་ཕྱོགས་པདྨ་ཉི་ཟླའི་སྟེང་༔ པདྨ་རྡོར་སེམས་སྐུ་མདོག་དམར༔ བྱང་ཕྱོགས་པདྨ་ཉི་ཟླའི་སྟེང་༔ ཀརྨ་རྡོར་སེམས་སྐུ་མདོག་ལྗང་༔ ཀུན་ཀྱང་ཞལ་གཅིག་ཕྱག་གཉིས་པ༔ གཡས་པས་རང་རྟགས་ཕྱག་མཚན་བསྣམས༔ གཡོན་པས་དྲིལ་བུ་སྐུ་ལ་བརྟེན༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ རྒྱན་དང་ཆ་ལུགས་གཙོ་དང་མཚུངས༔ སྣང་ལ་རང་བཞིན་མེད་པར་གསལ༔ ཕྱི་རིམ་མུ་ཁྱུད་རྡོར་ཕྲེང་དང་༔ འོད་ཟེར་འབར་བའི་ཀློང་རུམ་དུ༔ རྡོ་རྗེ་རིགས་ཀྱི་སེམས་དཔའ་དང་༔ ལཱ་སེ་དཀར་མོ་སེམས་མའི་ཚོགས༔ འདས་དང་མ་བྱོན་ད་ལྟར་གྱི༔ དུས་གསུམ་སངས་རྒྱས་མ་ལུས་པ༔ རྡོ་རྗེ་རིགས་ཀྱི་ངོ་བོར་གསལ༔ གནས་གསུམ་འབྲུ་གསུམ་འོད་ཟེར་གསུམ༔ འཕྲོས་པས་སྐུ་གསུམ་ཞིང་ཁམས་ནས༔ བསྐྱེད་པའི་ལྷ་ཚོགས་སྤྱན་དྲངས་བསྟིམ༔ ས་མ་ཡཱ༔ རྒྱ་རྒྱ་རྒྱ༔ དངོས་གཞི་ལྷ་ཚོགས་སྤྱན་འདྲེན་ཞིང་༔ དྲི་བཟང་སྤོས་དང་རོལ་མོ་འཁྲོལ༔ སྙན་པའི་དབྱངས་ཀྱིས་འདི་སྐད་དོ༔ ཧཱུྃ་ཧྲཱི༔ འོག་མིན་སྟུག་པོ་བཀོད་པ་ནས༔ བྷུདྡྷ་རྡོར་སེམས་འཁོར་དང་བཅས༔ ཆོས་དབྱིངས་ཡེ་ཤེས་ཀློང་ནས་བཞེངས༔ གནས་འདིར་སྤྱན་འདྲེན་གཤེགས་སུ་གསོལ༔ ཧཱུྃ་ཧྲཱི༔ ཤར་ཕྱོགས་མངོན་པར་དགའ་བ་ནས༔ བཛྲ་རྡོར་སེམས་འཁོར་དང་བཅས༔ མེ་ལོང་ཡེ་ཤེས་དབྱིངས་ནས་བཞེངས༔ གནས་འདིར་སྤྱན་འདྲེན་གཤེགས་སུ་གསོལ༔ ཧཱུྃ་ཧྲཱི༔ ལྷོ་ཕྱོགས་དཔལ་དང་ལྡན་པ་ནས༔ རཏྣ་རྡོར་སེམས་འཁོར་དང་བཅས༔ མཉམ་ཉིད་ཡེ་ཤེས་ཀློང་ནས་བཞེངས༔ གནས་འདིར་སྤྱན་འདྲེན་གཤེགས་སུ་གསོལ༔ ཧཱུྃ་ཧྲཱི༔ ནུབ་ཕྱོགས་བདེ་བ་ཆེན་པོ་ནས༔ པདྨ་རྡོར་སེམས་འཁོར་དང་བཅས༔ སོར་རྟོགས་ཡེ་ཤེས་ཀློང་ནས་བཞེངས༔ གནས་འདིར་སྤྱན་འདྲེན་གཤེགས་སུ་གསོལ༔ ཧཱུྃ་ཧྲཱི༔ བྱང་ཕྱོགས་ལས་རབ་རྫོགས་པ་ནས༔ ཀརྨ་རྡོར་སེམས་འཁོར་དང་བཅས༔ བྱ་གྲུབ་ཡེ་ཤེས་ཀློང་ནས་བཞེངས༔ གནས་འདིར་སྤྱན་འདྲེན་གཤེགས་སུ་གསོལ༔ གཞན་ཡང་སངས་རྒྱས་བྱང་སེམས་དང་༔ སྲུང་མ་དམ་ཅན་རྒྱ་མཚོའི་ཚོགས༔ ཕྱོགས་བཅུའི་ནམ་མཁའི་ཁྱོན་བཀང་སྟེ༔ མ་ལུས་ཐམས་ཅད་གཤེགས་སུ་གསོལ༔ རྒྱན་ཆ་མང་པོ་ཁྲོ་ལོ་ལོ༔ ཅོད་པན་དར་དཔྱངས་པུ་རུ་རུ༔ ཕྱག་ཞབས་གདུ་བུ་སི་ལི་ལི༔ འོད་དང་ཟེར་དུ་སྤུངས་སེ་སྤུང་༔ སྐུ་ཡི་རྣམ་འགྱུར་ལིངས་སེ་ལིང་༔ སྒྲ་དང་རོལ་མོ་དི་རི་རི༔ གནས་འདིར་སྤྱན་འདྲེན་གཤེགས་སུ་གསོལ༔ མོས་པའི་བུ་ལ་བྱིན་གྱིས་རློབས༔ མཆོག་དང་ཐུན་མོང་དངོས་གྲུབ་སྩོལ༔ ཨཱོཾ་ཧཱུྃ་ཏྲཾ་ཧྲཱིཿཨཱཿ གུ་རུ་བཛྲ་ས་ཏྭ་ས་མ་ཡ་ཛཿཛ༔ བཞུགས་སུ་གསོལ་བ་ནི༔ ཧཱུྃ་ཧྲཱི༔ རང་བཞིན་ལྷུན་གྲུབ་གཞལ་ཡས་དབུས༔ ཉི་ཟླ་པདྨའི་གདན་ཁྲི་ལ༔ རྒྱལ་བ་རྒྱ་མཚོ་རྡོ་རྗེ་སེམས༔ མ་ལུས་འཁོར་བཅས་བཞུགས་སུ་གསོལ༔ གུ་རུ་བཛྲ་ས་ཏྭ་ས་མ་ཡ་ཏིཥྛ་ལྷན༔ ཕྱག་འཚལ་བ་ནི༔ ཧཱུྃ་ཧྲཱི༔ ཆོས་ཀྱི་དབྱིངས་ནས་སྐུར་བཞེངས་ཏེ༔ མ་འགག་རང་གསལ་ལོངས་སྤྱོད་རྫོགས༔ མཁྱེན་བརྩེ་བླ་མེད་འགྲོ་བའི་མགོན༔ རྡོ་རྗེ་སེམས་དཔའ་ལ་ཕྱག་འཚལ༔ ན་མོ་པུ་རུ་ཤ་ཡ་པཱུ་ཙ་ཧོ༔ མཆོད་པ་ནི༔ ཧཱུྃ་ཧྲཱི༔ དངོས་འབྱོར་ཡིད་སྤྲུལ་མཆོད་པའི་ཚོགས༔ གཟུགས་སྒྲ་དྲི་རོ་རེག་བྱ་ཆོས༔ བླ་མེད་མཆོག་གི་མཆོད་ཡོན་དང་༔ མེ་ཏོག་བདུག་སྤོས་མར་མེ་དྲི༔ ཞལ་ཟས་རོལ་མོའི་ཚོགས་ཀྱིས་མཆོད༔ བཛྲ་ཨརྒཾ་པུཥྤེ་དྷུ་པེ་ཨཱ་ལོ་ཀེ་གྷནྡྷེ་ནཻ་ཝི་ཏེ་ཤཔྟ་ཨཱཿཧཱུྃ༔ བསྟོད་པ་ནི༔ ཧཱུྃ་ཧྲཱི༔ རྒྱལ་དང་རྒྱལ་སྲས་ཐམས་ཅད་ཀྱི༔ མཛོད་འཛིན་བླ་མེད་རྡོ་རྗེ་སེམས༔ ལོངས་སྤྱོད་རྫོགས་སྐུའི་མཚན་དཔེས་སྤྲས༔ བདེ་བར་གཤེགས་ལ་ཕྱག་འཚལ་བསྟོད༔ གསུང་དབྱངས་དྲུག་ཅུ་ཆོས་ཀྱི་དབྱངས༔ འགག་མེད་ནམ་མཁའི་ཁྱོན་བཀང་སྟེ༔ འགྲོ་བའི་གཏི་མུག་རྨོངས་པ་སེལ༔ རྣམ་རོལ་ཁྱོད་ལ་ཕྱག་འཚལ་བསྟོད༔ མཁྱེན་དང་བརྩེ་བའི་ཡེ་ཤེས་ཀྱིས༔ སྤྲུལ་པ་བྱེ་བ་དུང་ཕྱུར་འགྱེད༔ སྨྲ་བསམ་བརྗོད་མེད་དེ་བཞིན་ཉིད༔ ཕ་རོལ་ཕྱིན་ལ་ཕྱག་འཚལ་བསྟོད༔ འཛབ་དགོངས་ལས་གཞུང་སོ་སོར་གསལ༔ དངོས་གཞིའི་ལས་རིམ་ས་མ་ཡཱ༔ རྒྱ་རྒྱ་རྒྱ༔ བཀྲ་ཤིས་བརྗོད་ཅིང་མེ་ཏོག་འཐོར༔ ཧཱུྃ་ཧྲཱི༔ ཤར་གྱི་ཕྱོགས་ནས་བཀྲ་ཤིས་འབྱུང་བའི་ལྷ༔ རྡོ་རྗེ་སེམས་དཔའ་བཀྲ་ཤིས་དཔལ་གྱི་ལྷ༔ མེ་ལོང་ཡེ་ཤེས་བཀྲ་ཤིས་གང་ཡིན་པ༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ ཧཱུྃ་ཧྲཱི༔ ལྷོ་ཡི་ཕྱོགས་ནས་བཀྲ་ཤིས་འབྱུང་བའི་ལྷ༔ རིན་ཆེན་འབྱུང་ལྡན་བཀྲ་ཤིས་དཔལ་གྱི་ལྷ༔ མཉམ་ཉིད་ཡེ་ཤེས་བཀྲ་ཤིས་གང་ཡིན་པ༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ ཧཱུྃ་ཧྲཱི༔ ནུབ་ཀྱི་ཕྱོགས་ནས་བཀྲ་ཤིས་འབྱུང་བའི་ལྷ༔ སྣང་བ་མཐའ་ཡས་བཀྲ་ཤིས་དཔལ་གྱི་ལྷ༔ སོར་རྟོགས་ཡེ་ཤེས་བཀྲ་ཤིས་གང་ཡིན་པ༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ ཧཱུྃ་ཧྲཱི༔ བྱང་གི་ཕྱོགས་ནས་བཀྲ་ཤིས་འབྱུང་བའི་ལྷ༔ དོན་ཡོད་གྲུབ་པ་བཀྲ་ཤིས་དཔལ་གྱི་ལྷ༔ བྱ་བ་གྲུབ་པའི་བཀྲ་ཤིས་གང་ཡིན་པ༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ ཧཱུྃ་ཧྲཱི༔ དབུས་ཀྱི་ཕྱོགས་ནས་བཀྲ་ཤིས་འབྱུང་བའི་ལྷ༔ རྣམ་པར་སྣང་མཛད་བཀྲ་ཤིས་དཔལ་གྱི་ལྷ༔ ཆོས་དབྱིངས་ཡེ་ཤེས་བཀྲ་ཤིས་གང་ཡིན་པ༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ ཧཱུྃ་ཧྲཱི༔ ཕྱོགས་བཅུ་ཀུན་ནས་བཀྲ་ཤིས་འབྱུང་བའི་ལྷ༔ དུས་གསུམ་སངས་རྒྱས་བཀྲ་ཤིས་དཔལ་གྱི་ལྷ༔ སྐུ་གསུམ་ཡེ་ཤེས་བཀྲ་ཤིས་གང་ཡིན་པ༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བསྔོ་སྨོན་ནི༔ ཧཱུྃ་ཧྲཱི༔ བསོད་ནམས་ཡེ་ཤེས་རྣམ་དག་དགེ་བའི་ལས༔ བྱས་དང་བྱེད་འགྱུར་གཞན་ལ་ཡི་རང་སོགས༔ བདག་གཞན་དགེ་རྩ་བྱང་ཆུབ་ཐོབ་ཕྱིར་བསྔོ༔ བླ་མེད་རྫོགས་པའི་བྱང་ཆུབ་ཐོབ་པར་ཤོག༔ བསྐྱེད་རིམ་བསྡུ་བ་ནི༔ ཧཱུྃ་ཧྲཱི༔ སྣང་སྟོང་ཡེ་ཤེས་རོལ་པ་ལྷ་རུ་ཤར༔ གཟུང་འཛིན་སྤྲོས་བྲལ་ངོ་བོ་ཉིད་ཀྱི་ངང་༔ ཕྱི་སྣོད་གཞལ་ཡས་ནང་བཅུད་ལྷ་ལ་ཐིམ༔ ལྷ་སྐུ་ཐུགས་སྲོག་ས་བོན་དམིགས་མེད་ཡལ༔ རྫོགས་རིམ་ནི༔ ཧཱུྃ་ཧྲཱི༔ སྣ་ཚོགས་རྐྱེན་དང་ཚོགས་དྲུག་སྣང་སེམས་རིག༔ དབྱིངས་རིག་ཆོས་དབྱིངས་སྤྲོས་བྲལ་སྐྱེ་མེད་ཨཱ༔ དུས་གསུམ་འགག་མེད་ཁྱབ་བརྡལ་ཀློང་ཡངས་སུ༔ མ་བཅོས་སྤྲོས་མེད་བྱང་ཆུབ་ཉིད་དུ་གནས༔ ཨཱ་ཨཱ༔ རྗེས་ཀྱི་ལས་ཁྲིགས་ས་མ་ཡཱ༔ རྒྱ་རྒྱ་རྒྱ༔ ཨེ་མ༔ རྡོར་སེམས་མཆོད་གཞུང་ལས་རིམ་འདི༔ པདྨས་བཀོད་དེ་གཏེར་དུ་སྦས༔ མ་འོངས་ང་སྤྲུལ་ལས་ཅན་བུ༔ ཟབ་མོའི་ཆོས་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་འདྲ་སྤྲང་བན་འགྲོ་འདུལ་གླིང་པས་གནས་མཆོག་གངས་རིའི་རྒྱལ་པོ་ཏེ་སེའི་བདེ་ཆེན་གསང་བ་ཕུག་ནས་གདན་དྲངས་པའོ། །མངྒ་ལཾ།། །།