རྡོ་རྗེ་སེམས་དཔའི་གསང་སྒྲུབ།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ རྡོ་རྗེ་སེམས་དཔའི་གསང་སྒྲུབ་བཞུགས༔ དཔལ་ཧེ་རུ་ཀཿལ་ཕྱག་འཚལ་ལོ༔ བདག་ཉིད་པདྨ་འབྱུང་གནས་ཀྱིས༔ སྔོན་སྦྱངས་ལས་འཕྲོ་ཆོས་ལ་སྤྱད༔ ད་ལྟ་དུས་གསུམ་སངས་རྒྱས་ཀུན༔ གྲོགས་པོར་བསྟེན་ཞིང་གླེང་མོ་བྱེད༔ ཁྱད་པར་རིགས་བདག་རྡོ་རྗེ་སེམས༔ ལུས་དང་གྲིབ་མའི་ཚུལ་དུ་འགྲོག༔ ཐུགས་བསྐྱེད་སྨོན་ལམ་གཅིག་པའི་མཐུས༔ རྡོར་སེམས་གསང་སྒྲུབ་པདྨས་བཀོད༔ ཕྱི་རབས་སྐལ་ལྡན་ཉམས་སུ་ལོངས༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་དབེན་ཞིང་དྭངས་ལ་མཐོ་བ༔ གངས་རི་བརྟན་ཆགས་ཡོད་པ་ཞིག་གི་གནས་སུ་ཕྱིན་ལ༔ བདེ་བའི་གདན་ལ་སྐྱིལ་ཀྲུང་བཅའ༔ རླུང་རོ་འབུད༔ རྣམ་སྣང་གི་ཆོས་བདུན་དང་ལྡན་པར་བྱ་ཞིང་སྐྱབས་སེམས་རྣམས་སྤྱི་མཐུན་ལྟར་བརྗོད༔ དེ་ནི་སྔོན་འགྲོའི་རིམ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དངོས་གཞིའི་ཏིང་འཛིན་ནི༔ ཨཱོཾ་སྭ་བྷ་ཝ་ཤུདྡྷོ་སརྦ་དྷརྨཱ་སྭ་བྷཱ་ཝ་ཤུདྡྷོ྅་ཧཾ༔ ཞེས་བརྗོད་པས་ཕྱི་ནང་སྣོད་བཅུད་དང་བཅས་པ་ཐམས་ཅད་སྟོང་པར་བསམ༔ སྟོང་པའི་ངང་ལས་སྐད་ཅིག་གི་པདྨ་དང་ཉི་མ་ཟླ་བའི་དཀྱིལ་འཁོར་གྱི་སྟེང་དུ༔ སེམས་ཉིད་ཀྱི་ངོ་བོ་ཡི་གེ་ཧཱུྃ་དཀར་ལ་འཚེར་བ་གཟི་བརྗིད་དང་ལྡན་པ་ཞིག་ཏུ་བསམ༔ འོད་ཟེར་འཕྲོས་ཕྱོགས་དུས་ཀྱི་རྒྱལ་བ་ཐམས་ཅད་ལ་མཉེས་པའི་མཆོད་པ་ཕུལ༔ སྐུ་གསུང་ཐུགས་ཀྱི་བྱིན་རླབས་ཐམས་ཅད་ཡི་གེ་ཨཱོཾ་ཨཱཿཧཱུྃ་གསུམ་གྱིས་རྣམ་པར་བསྡུས༔ སེམས་ཉིད་ཀྱི་ངོ་བོ་ཡི་གེ་ཧཱུྃ་ལ་ཐིམ༔ ཧཱུྃ་ཡོངས་སུ་གྱུར་པ་ལས་ཆུ་ལས་ཉ་འཕར་བ་ལྟར་པདྨ་དང་ཉི་མ་ཟླ་བའི་དཀྱིལ་འཁོར་ཉ་གང་བའི་སྟེང་དུ༔ རིགས་རྣམས་ཀུན་འདུས་ཀྱི་ངོ་བོ་དཔལ་རྡོ་རྗེ་སེམས་དཔའ༔ སྐུ་མདོག་ཤེལ་བུམ་འོ་མས་གང་བ་ལྟར་དཀར་ལ་འཚེར་བ༔ ཞལ་གཅིག་སྤྱན་གཉིས་བྷུདྡྷའི་བལྟ་སྟངས་ཅན༔ ཞབས་གཉིས་རྡོ་རྗེའི་སྐྱིལ་ཀྲུང་ཅན༔ ཕྱག་གཡས་ཀྱིས་རྡོ་རྗེ་རྩེ་ལྔ་པ་ཐུགས་ཀར་གཏོད་ཚུལ་གྱིས་བསྣམས་པ༔ ཕྱག་གཡོན་རྡོ་རྗེས་མཚན་པའི་དྲིལ་བུ་དཀུར་བརྟེན་པ༔ དབུ་སྐྲ་རལ་པའི་ཐོར་ཅོག་གྱེན་བུ་བཅིངས་པ་ལ་པྲོག་ཞུ་དང་རིན་པོ་ཆེའི་རྩེ་བྲན་གྱིས་བརྒྱན་པ༔ དར་སྔོ་ལྗང་གི་སྟོད་གཡོག་གསོལ་བ༔ དར་དམར་པོའི་ཤམ་ཐབས་དཀྲིས་པ༔ ཕྱག་གདུབ་དང་༔ ཞབས་གདུབ་དང་༔ མགུལ་ཆུན་དང་༔ དཔུང་རྒྱན་དང་༔ སེ་མོ་དོ་དང་༔ མེ་ཏོག་སྣ་ཚོགས་ཀྱི་རྒྱན་ཕྲེང་དུ་མས་བརྒྱན་པ༔ དར་སྣ་ཚོགས་ཀྱི་ཅོད་པན་འཕུར་བ༔ འོད་ཟེར་སྣ་ཚོགས་འཕྲོ་བའི་ཀློང་དུ་སྐུ་གཡོན་འགྱིང་གི་སྒེག་ཉམས་སུ་བཞུགས་པ༔ སྣང་ལ་སྟོང་པ༔ སྟོང་ལ་སྣང་བ༔ སྣང་སྟོང་དབྱེར་མེད་ཀྱི་ཆ་ལས་གྲུབ་པ༔ དར་དཀར་པོའི་གུར་ཕུབ་པ་ལྟ་བུ་ཞིག་ཏུ་གསལ་བར་བསྒོམས༔ དེ་ལྟར་གསལ་བའི་སྤྱི་བོ་དང་༔ མགྲིན་པ་ཐུགས་ཀ་རྣམས་སུ་ཡི་གེ་གསུམ་གྱིས་མཚན་པ་ལས་འོད་ཟེར་འཕྲོས༔ འོག་མིན་ལྟུག་པོ་བཀོད་པའི་ཞིང་ཁམས་ནས་རང་འདྲ་བའི་ཡེ་ཤེས་སེམས་དཔའ་དཔག་ཏུ་མེད་པ་བྱོན༔ བསྐྱེད་པའི་སྐུ་དང་གཉིས་མེད་དུ་གྱུར་པར་བསམས་ལ༔ ཡིད་ཀྱིས་མཆོད་བསྟོད་འབུལ་ཞིང་ཡི་དམ་ལྷའི་ཏིང་ངེ་འཛིན་ལ་དར་གཅིག་མཉམ་པར་བཞག༔ ས་མ་ཡཱ༔ རྒྱ་རྒྱ་རྒྱ༔ དེ་ནས་རང་ཉིད་རིགས་འདུས་རྡོ་རྗེ་སེམས༔ འོད་སྣང་སྐུ་ཡི་ཐུགས་ཀར་ཟླ་དཀྱིལ་ལ༔ ཐུགས་སྲོག་ཧཱུྃ་ལ་གཟུངས་ཀྱི་སྔགས་འབྲུ་རྣམས༔ འོད་ཟེར་དཀར་པོའི་རྟར་ཞོན་གཡས་སུ་འཁོར༔ འོད་ཀྱི་ཕྲེང་ཐག་གཡོན་དུ་འཁོར་བ་ལས༔ ཐབས་ཤེས་ངོ་བོ་དབྱེར་མེད་ཡེ་ཤེས་ལྔའི༔ འོད་ཟེར་ལྔ་པོ་ཕྱོགས་བཅུ་ཀུན་ཏུ་འཕྲོས༔ འཁོར་འདས་ལྷ་དང་འགྲོ་བ་ཀུན་ལ་ཕོག༔ རྒྱལ་བ་མཆོད་ཅིང་སེམས་ཅན་ལས་སྒྲིབ་སྦྱངས༔ བདག་དང་མར་གྱུར་འགྲོ་བ་སེམས་ཅན་རྣམས༔ རིགས་བདག་མགོན་པོ་དེ་དང་གཉིས་མེད་བསམས༔ སྨོན་འཇུག་སེམས་བསྐྱེད་ངར་ལྡན་དབྱངས་སྙན་པོས༔ བདེ་གཤེགས་ཀུན་འདུས་ཡིག་བརྒྱ་འདི་ལྟར་བརྗོད༔ ཨཱོཾ་བཛྲ་ས་ཏྭ་ས་མ་ཡ༔ མ་ནུ་པཱ་ལ་ཡ༔ བཛྲ་ས་ཏྭ་ཏྭེ་ནོ་པ༔ ཏིཥྛ་ཌི་ཌྷོ་མེ་བྷ་ཝ༔ སུ་ཏོ་ཥྱོ་མེ་བྷ་ཝ༔ སུ་པོ་ཥྱོ་མེ་བྷ་ཝ༔ ཨ་ནུ་རཀྟོ་མེ་བྷ་ཝ༔ སརྦ་སིདྡྷི་མེ་པྲ་ཡཙྪ༔ སརྦ་ཀརྨ༔ སུ་ཙ་མེ༔ ཙིཏྟཾ་ཤྲི་ཡཾ་ཀུ་རུ་ཧཱུྃ༔ ཧ་ཧ་ཧ་ཧ་ཧོ༔ བྷ་ག་ཝཱན་སརྦ་ཏ་ཐཱ་ག་ཏ༔ བཛྲ་མཱ་མེ་མུཉྩ༔ བཛྲི་བྷ་ཝ༔ མ་ཧཱ་ས་མ་ཡ་ས་ཏྭ་ཨཱ༔ ཞེས་བཟླ༔ ས་མ་ཡཱ༔ རྒྱ་རྒྱ་རྒྱ༔ ཡང་གསང་བླ་མེད་བདེ་གཤེགས་ཀུན་འདུས་པའི༔ གསང་བའི་སྙིང་པོ་ཡི་གེ་བརྒྱ་པ་འདི༔ སྟོང་ཙམ་བཟླས་ན་ལས་ཀྱི་སྡིག་པ་འདག༔ ཁྲི་ཙམ་བཟླས་ན་མི་དགེ་བཅུ་འདག་ཅིང་༔ འབུམ་དུ་བཟླས་ན་མཚམས་མེད་ལྔ་ཡང་བྱང་༔ དེ་ལས་མང་ན་སྐལ་ལྡན་སྐྱེས་བུ་དེ༔ རིགས་བདག་མགོན་པོ་མངོན་འགྱུར་ཨེ་མ་ཧོ༔ ས་མ་ཡཱ༔ རྒྱ་རྒྱ་རྒྱ༔ མ་འོངས་རྩོད་ལྡན་བཞི་བཅུའི་ཡང་མཐའ་ལ༔ སུམ་བཅུ་ཁ་རལ་སྐྱེ་འགྲོར་བདེ་བ་མེད༔ སྟེང་འོག་བར་གསུམ་ལྷ་མིན་ལྟར་དུ་འཁྲུག༔ མཐའ་མི་བོད་ལྷུང་བོད་རྣམས་མཐའ་ལ་འབྲོས༔ བཙན་རྫོང་བརྩིགས་པ་རང་གི་བཙོན་ཁང་འགྱུར༔ སེར་སྣས་བསགས་པའི་ནོར་རྫས་དགྲ་ཡིས་སྤྱོད༔ དགེ་བཤེས་མཁན་པོ་ཆོས་རྗེ་ཞབས་དྲུང་ཟེར༔ མི་དགེ་བཅུར་སྤྱོད་དགེ་བཅུའི་བཤད་པ་རྒྱག༔ སོ་ནམ་དམག་འདྲེན་ལས་སུ་གསོད་གཅོད་བརྩོན༔ བསྟན་འཛིན་ཡིན་ཞེས་བསྟན་པ་ཐབས་ཀྱིས་བསྣུབས༔ ཆོས་མཛད་དགེ་སློང་དགེ་ཚུལ་དགེ་བསྙེན་ཟེར༔ སྡེ་དགོན་ཚོང་འདུས་ཐམས་ཅད་བཙུན་པས་འགེངས༔ པཎྜི་ཏ་དང་རབ་འབྱམས་དཀའ་བཅུའི་མིང་༔ མང་ཇས་ཉོ་ཞིང་གྲུབ་མཐའ་སུ་མཁས་ཆེ༔ སྐྱེ་བོར་མནའ་མེད་སྒོམ་ཆེན་བན་བཙུན་རྣམས༔ སྲོག་ལས་དམར་གཡོས་མནར་མེད་རང་གིས་སྒྲུབ༔ མི་ལུས་ལན་གཅིག་རྙེད་པའི་འབྲས་བུ་ལ༔ མནར་མེད་ངན་སོང་བསྒྲུབ་པ་ཡ་རེ་ཆ༔ ས་མ་ཡཱ༔ རྒྱ་རྒྱ་རྒྱ༔ དེ་དུས་ཆོས་འཁོར་གཉན་པོའི་ཤར་གྱི་ཕྱོགས༔ མདོ་ཁམས་གླིང་ནས་ང་ཡི་སྤྲུལ་པ་འབྱུང་༔ ཏེ་སེའི་གངས་ནས་ཟབ་མོའི་གཏེར་འདི་འདོན༔ འཛམ་གླིང་ལྟེ་བ་གངས་རིའི་ཏེ་སེ་རུ༔ ང་སྤྲུལ་བུ་དེས་སྒྲུབ་པ་འདི་བྱས་ནས༔ འཛམ་གླིང་སྐྱེ་འགྲོ་ལན་གཅིག་ངན་སོང་ཁེགས༔ བོད་ཡུལ་མངའ་རིས་དབུས་དང་ཁམས་གསུམ་དུ༔ སྒྲུབ་པ་འདི་ཉིད་ལན་གསུམ་སྒྲུབས་ཤིག་བུ༔ རིགས་བདག་རྡོ་རྗེ་སེམས་དཔའི་བྱིན་རླབས་དང་༔ རིག་འཛིན་པདྨ་ང་ཡི་སེམས་བསྐྱེད་དང་༔ སྐལ་ལྡན་སྐྱེས་བུ་ཁྱོད་ཀྱི་སྨོན་ལམ་གྱིས༔ རྩོད་ལྡན་འགྲོ་བའི་སྒྲིབ་གཉིས་འདག་པར་ངེས༔ ས་མ་ཡཱ༔ རྒྱ་རྒྱ་རྒྱ༔ རིགས་ཀུན་འདུས་པའི་སྒྲུབ་པ་འདི་ཉིད་ལ༔ བརྩོན་འགྲུས་དྲག་པོས་བདར་ཤ་བཅད་གྱུར་ན༔ བྱིན་རླབས་ཐོབ་དང་དངོས་གྲུབ་བརྙེས་པའི་རྟགས༔ རབ་དངོས་འབྲིང་ཉམས་ཐ་མ་རྨི་ལམ་དུ༔ ཞལ་མཇལ་གསུང་ཐོས་ངོ་སྤྲོད་འཐོབ་སོགས་འབྱུང་༔ གཞན་ཡང་མཆོད་རྟེན་གངས་རི་གོས་དཀར་གྱོན༔ ཁྲུས་བྱས་འོ་མ་འཐུང་དང་ཤེལ་བུམ་རྙེད༔ རྣག་ཁྲག་ཟགས་དང་དུང་བུས་རོལ་མོ་འཁྲོལ༔ དགེ་བའི་ལྟས་བཟང་རིགས་བདག་སེམས་དཔའ་གྲུབ༔ སེམས་བསྐྱེད་ལྡན་པས་ལས་སྦྱོར་གཞན་དོན་སྒྲུབས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་འགྲོ་འདུལ་གླིང་པས་གནས་མཆོག་གངས་རིའི་རྒྱལ་པོ་ཏེ་སེའི་བདེ་ཆེན་གསང་བ་ཕུག་ནས་གདན་དྲངས་པའོ། །མངྒ་ལཾ།། །།