རྡོར་སེམས་སྒྲུབ་པའི་ལག་ལེན་དང་ལས་སྦྱོར་དམིགས་པའི་གབ་ཐིག
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ རྡོ་རྗེ་སེམས་དཔའི་སྒྲུབ་པའི་ལག་ལེན་དང་ལས་སྦྱོར་དམིགས་པའི་གབ་ཐིག་ཡོད༔ ཧེ་རུ་ཀཿལ་ཕྱག་འཚལ་ལོ༔ ལྷ་མཆོག་རྡོ་རྗེ་སེམས་དཔའ་ཡི༔ སྒྲུབ་པ་ཉམས་ལེན་མན་ངག་མཆོག༔ མ་འོངས་བུ་ཡི་དོན་ཕྱིར་དུ༔ པདྨ་བདག་གིས་ལེགས་པར་བཤད༔ ས་མ་ཡཱ༔ རྒྱ་རྒྱ་རྒྱ༔ དཔལ་རྡོ་རྗེ་སེམས་དཔའི་སྒྲུབ་པ་ཉམས་སུ་ལེན་པར་འདོད་པའི་གང་ཟག་གིས༔ སྟེགས་བུ་གྱེན་ཐུར་དུ་ཁྲུ་གང་པ་དཀར་འཇམ་མཁྲེགས་པར་བཟོས༔ དྲི་བཟང་གིས་ཆག་ཆག་གདབ༔ ཚངས་ཐིག་དང་བཅས་པདྨ་འདབ་མ་བཞི་ལ་མུ་ཁྱུད་ཡོད་པ༔ རྡོ་རྗེའི་ཕྲེང་བས་བསྐོར་བ་བྲི༔ ཤར་སྔོ༔ ལྷོ་སེར༔ ནུབ་དམར༔ བྱང་ལྗང་༔ པད་ཚབ་རྣམས་མཛེས་ཚོན་བྱ༔ མུ་ཁྱུད་དམར་པོ༔ རྡོར་ཕྲེང་དཀར་པོ་བྱའོ༔ དེའི་དབུས་སུ་ཁྲིའུ་ཁར་བུམ་པ་མཚན་ལྡན་མགུལ་ཆིངས་དཀར་པོས་བརྒྱན་པའི་ནང་དུ་དྲི་བཟང་གི་བུམ་སྨན་གདབ༔ ཀུ་ཤ་དང་སྒྲོ་མདོངས་མེ་ལོང་ལ་རྡོར་སེམས་ཀྱི་སྐུ་ག་བུར་གྱི་ཆུས་བྲིས་པ་གཟུག༔ བུམ་པའི་མདུན་དུ་བྷུདྡྷ་རྡོ་རྗེ་སེམས་དཔའི་ངོ་བོ་རྡོ་རྗེ་རྩེ་ལྔ་པ་དར་སྔོན་གྱིས་བརྒྱན་པ་བཞག༔ རིན་འབྱུང་རྡོ་རྗེ་སེམས་དཔའི་ངོ་བོ་ལྷོ་རུ་པྲོག་ཞུ་ཅོད་པན་དང་བཅས་པ་བཞག༔ སྣང་མཐའ་རྡོ་རྗེ་སེམས་དཔའི་ངོ་བོ་ནུབ་ཏུ་དྲིལ་བུ་དར་དམར་གྱིས་བརྒྱན་པ་བཞག༔ ཀརྨ་རྡོ་རྗེ་སེམས་དཔའི་ངོ་བོ་བྱང་དུ་དུང་ཆོས་དྲི་བཟང་གི་ཆུས་བཀང་བ་བཞག༔ མཐར་ཨརྒྷཾ་སོགས་མཆོད་པ་བཤམས༔ དེ་ནི་དཀྱིལ་འཁོར་སྒྲུབ་རྫས་སྟ་གོན་ནོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་བསྐྱེད་རིམ་ལྷའི་རྣལ་འབྱོར་ནི༔ དཀྱིལ་འཁོར་མི་དམིགས་པ་སྟོང་པར་བསམས༔ སྟོང་པའི་ངང་ལས་ཤར་ཕྱོགས་མངོན་པར་དགའ་བའི་ཞིང་ཁམས་བཀོད་པ་ཚད་མེད་པའི་དབུས་སུ་བུམ་པ་བྷྲུཾ་ལས་གཞལ་ཡས་ཀྱི་ཁང་པ་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་བཅོམ་ལྡན་འདས་དཔལ་རྡོ་རྗེ་སེམས་དཔའ་གསང་སྒྲུབ་ལྟ་བུར་བསྐྱེད་ལ༔ དེའི་ཤར་གྱི་པད་འདབ་ལ་སངས་རྒྱས་རྡོར་སེམས་མཐིང་ག༔ ལྷོའི་པད་འདབ་ལ་རིན་འབྱུང་རྡོར་སེམས་སེར་པོ༔ ནུབ་ཀྱི་པད་འདབ་ལ་པདྨ་རྡོར་སེམས་དམར་པོ༔ བྱང་གི་པད་འདབ་ལ་ཀརྨ་རྡོར་སེམས་ལྗང་གུ༔ དེ་རྣམས་ཀྱང་ཞལ་གཅིག་ཕྱག་གཉིས་གཡས་རང་རྟགས་ཀྱི་ཕྱག་མཚན་དང་གཡོན་ཐམས་ཅད་དྲིལ་བུ་འཛིན་པ༔ ཞབས་རྡོ་རྗེའི་སྐྱིལ་ཀྲུང་ཅན་ལོངས་སྤྱོད་རྫོགས་སྐུའི་ཆས་ཐམས་ཅད་ཀྱིས་བརྒྱན་པ༔ སྤྱན་གཉིས་ཟིམ་བུས་གཙོ་བོའི་ཐུགས་ཀར་གཟིགས་པ༔ འོད་དང་གཟི་བརྗིད་དཔག་ཏུ་མེད་པ་འཕྲོ་བ༔ པདྨ་དང་ཉི་ཟླའི་གདན་ལ་བཞུགས་ཤིང་འཛུམ་པའི་མདངས་དང་ལྡན་པ༔ གསལ་བའི་འོད་དང་ལྡན་པ༔ དགྱེས་པའི་ཉམས་དང་ལྡན་པ༔ ལོངས་སྐུའི་ཆས་དང་ལྡན་པ༔ ཆོས་སྐུའི་ངོ་བོ་དང་ལྡན་པ༔ སྤྲུལ་སྐུའི་མཁྱེན་བརྩེ་དང་ལྡན་པ༔ སྣང་སྟོང་རང་འོད་ཀྱི་སྐུ་ཅན་ཡེ་ཤེས་ཀྱི་འོད་ལྔ་འཁྲུག་པའི་ཀློང་དུ་བཞུགས་པར་བསམས༔ དེ་ལྟར་གཙོ་འཁོར་ཐམས་ཅད་ཀྱི་གནས་གསུམ་དང་ཐུགས་ཀར་རང་རང་གི་ས་བོན་ཧཱུྃ་ཨཱོཾ་སྭཱ་ཨཱཾཿཧཱ་རྣམས་ཀྱིས་མཚན་པའི་མཐར་གཟུངས་དང་ཉེ་སྙིང་རྣམས་ཀྱིས་མཚན་པ༔ འོད་ཀྱི་ཕྲེང་ཐག་ལ་ཞོན་པ༔ སྔགས་འབྲུ་རྣམས་ཀྱི་རང་སྒྲ་དིར་དིར་སྒྲོག་ཅིང་སྔགས་འབྲུ་གཡས་དང་འོད་ཟེར་གཡོན་དུ་འཁོར་བར་བསམས༔ སློབ་མ་འཇུག་ཅིང་དབང་བསྐུར་ན༔ ཉེ་སྙིང་རྣམས་ལ་སྟོང་ཕྲག་རེ༔ གཟུངས་ལ་བརྒྱ་བཟླས་ལས་ལ་འཇུག༔ ཉི་ཟླ་འཁོར་ལོ་མཐོང་གྲོལ་གསུམ༔ ཆུ་བོ་མྱོང་གྲོལ་ལས་སྦྱོར་བཞི༔ བསྒྲུབ་ན་གཙོ་བོའི་ཉེ་སྙིང་ལ༔ ཁྲི་ཚོ་ལྔ་དང་གཞན་བཞི་ལ༔ ཁྲི་ཚོ་རེ་རེ་གཟུངས་རིང་ལ༔ བརྒྱ་བཟླས་རང་གཞུང་ལས་བཞིན་སྦྱོར༔ དེ་ནི་དམིགས་པའི་གབ་ཏིག་ཡིན༔ མ་འོངས་ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་འདྲ་སྤྲང་བན་འགྲོ་འདུལ་གླིང་པས་གནས་མཆོག་ཆེན་པོ་གངས་རིའི་རྒྱལ་པོ་ཏེ་སེའི་བདེ་ཆེན་གསང་བ་ཕུག་ནས་གདན་དྲངས་པའོ། །མངྒ་ལཾ།། །།