རྡོར་སེམས་ལས་མཐའ་འགྲོ་དོན་ཉི་མ་མཐོང་གྲོལ།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ རྡོ་རྗེ་སེམས་དཔའི་ལས་མཐའ་འགྲོ་དོན་ཉི་མ་མཐོང་གྲོལ་བཞུགས་སོ༔ དཔལ་ཧེ་རུ་ཀཿལ་ཕྱག་འཚལ་ལོ༔ ལྔ་བརྒྱའི་དུས་ཀྱི་ཐ་མ་ལ༔ རྡོ་རྗེ་སེམས་དཔའི་རྣལ་འབྱོར་པས༔ གཞན་དོན་འགྲོ་ལ་སེམས་བསྐྱེད་ནས༔ ལས་སྦྱོར་རིམ་པ་འདི་ལྟར་བྱ༔ ས་མ་ཡཱ༔ རྒྱ་རྒྱ་རྒྱ༔ ཉི་མ་འཁོར་ལོའི་སྙིང་པོ་ལ༔ རྟེན་འབྲེལ་ཐབས་ཀྱི་སྔགས་དགོངས་ཀྱིས༔ འགྲོ་བ་ཀུན་སྒྲོལ་མན་ངག་ནི༔ སྔོན་འགྲོ་དངོས་གཞི་རྗེས་གསུམ་གྱི༔ རིམ་པར་དབྱེ་སྟེ་པདྨས་བཀོད༔ ས་མ་ཡཱ༔ རྒྱ་རྒྱ་རྒྱ༔ དེ་ལ་སྔོན་འགྲོ་བཅའ་གཞིའི་རིམ་པ་ནི༔ དུས་བཟང་ཡར་ངོའི་གཟའ་སྐར་བཟང་པོ་ལ༔ སྐྱབས་འགྲོ་སེམས་བསྐྱེད་སྔོན་དུ་བཏང་ནས༔ རྣལ་འབྱོར་བདེ་བའི་གདན་ལ་འདུག་སྟེ༔ མེ་ལོང་ལ་རབ་གསེར༔ འབྲིང་མཚལ༔ ཐ་ནའང་རྒྱ་སྣག་གིས་དཔལ་རྡོ་རྗེ་སེམས་དཔའི་སྐུ་སྒྲུབ་གཞུང་དང་མཐུན་པར་བྲིས་པའི་གནས་གསུམ་དུ་ཡི་གེ་གསུམ་འགོད༔ མཐའ་མར་ཡི་གེ་བརྒྱ་པ་དང་འདོད་གསོལ་འདི་ལྟར་བྲི༔ ཨཱོཾ་ཐུགས་རྗེ་ཆེན་པོ་རྡོ་རྗེ་སེམས༔ དྲི་མེད་དུང་མདོག་མཆོག་གི་གཟུགས༔ ཐུགས་རྗེ་ཉི་མའི་སྙིང་པོ་དང་༔ གཉིས་མེད་དབྱིངས་ནས་འགྲོ་ལ་གཟིགས༔ འཁོར་བ་སྡུག་བསྔལ་རྒྱ་མཚོ་ལས༔ ད་ལྟ་ཉིད་དུ་སྒྲོལ་བར་མཛོད༔ ཅེས་བྲི་ལྷག་ཆད་མེད་པར་བྱ༔ སྔོན་དུ་འགྲོ་བའི་རིམ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དངོས་གཞིའི་རིམ་པ་ནི༔ འགྲོ་དོན་དམིགས་པའི་གབ་ཏིག་དང་༔ སྒྲུབ་གཞུང་བཞིན་དུ་ཉམས་སུ་བླང་༔ མེ་ལོང་དར་དཀར་དྲི་མེད་དྲིལ༔ བུམ་པའིསྟེང་དུ་བཞག་ལ་བསྒྲུབ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་རྗེས་ཀྱི་རིམ་པ་ནི༔ བསྙེན་སྒྲུབ་ཐེམས་ནས་ལས་ལ་སྦྱོར༔ ཆོ་འཕྲུལ་ཆེན་པོའི་གནམ་གང་ཉིན༔ མེ་ལོང་རྒྱལ་མཚན་རྩེ་ལ་གདགས༔ རང་ཉིད་ཁྲུས་བྱས་གོས་གསར་གྱོན༔ ཤར་ཕྱོགས་ནམ་མཁར་ཕྱག་འཚལ་ཏེ༔ མེ་ལོང་ནམ་མཁའི་ཉི་མ་གཉིས༔ རྣལ་འབྱོར་རང་དང་བཅས་པ་གསུམ༔ དབྱེར་མེད་ཐ་མི་དད་པ་ལ༔ རིགས་བདག་བླ་མ་རྡོ་རྗེ་སེམས༔ ཕྱོགས་དུས་སྐྱབས་གྱུར་ཀུན་གྱིས་བསྐོར༔ འོད་ཟེར་འཕྲོས་པས་འགྲོ་དྲུག་ཁྱབ༔ སེམས་ཅན་མ་ལུས་ཀུན་ལ་ཕོག༔ ཐུགས་རྗེའི་འོད་ཟེར་བྱིན་རླབས་ཀྱིས༔ བདག་དང་འགྲོ་དྲུག་མ་ལུས་པ༔ མངོན་པར་དགའ་བའི་ཞིང་ཁམས་སུ༔ རྡོ་རྗེ་སེམས་དཔའི་སྐུ་གསུང་ཐུགས༔ གཉིས་མེད་འབྲས་བུ་ཐོབ་པར་བསམས༔ འཁོར་འདས་གཉིས་མེད་ཡོངས་གྲོལ་གྱིས༔ ཁྱབ་བརྡལ་བློ་འདས་ངང་ཉིད་ལས༔ ཡི་གེ་བརྒྱ་པ་བརྒྱ་ཕྲག་དགུ༔ ལས་སྦྱོར་བཏགས་པ་བརྒྱ་ཕྲག་གཅིག༔ རྣལ་འབྱོར་ལྔ་གསུམ་བདུན་གྱིས་འདོན༔ གཙོ་བོར་བསྙེན་སྒྲུབ་ཐེམས་གལ་ཆེ༔ བདག་དང་སེམས་ཅན་ཐམས་ཅད་ཀྱི༔ སྒྲིབ་གཉིས་བག་ཆགས་བཅས་པ་རྣམས༔ མཐོལ་བཤགས་སྙམ་པའི་འདུན་པ་ཡིས༔ ལྟ་བའི་ཀློང་བཤགས་རཱུ་ཏྲའི་སྨྲེ་བཤགས་འདོན༔ རྗེས་སུ་བསྔོ་སྨོན་འདི་ལྟར་གདབ༔ ཧཱུྃ་ཧྲཱི༔ ཐུགས་རྗེ་ཆེན་པོ་རྡོ་རྗེ་སེམས༔ ལྷག་པའི་ལྷ་མཆོག་འགྲོ་བའི་སྐྱབས༔ ཐུགས་རྗེའི་འོད་ཟེར་མཁའ་དབྱིངས་ཁྱབ༔ མཛད་པའི་ཕྲིན་ལས་ཉི་མ་ཤར༔ སྒྲིབ་གཉིས་བག་ཆགས་དབྱིངས་སུ་སྦྱངས༔ སྔགས་དང་ཏིང་འཛིན་རྟེན་འབྲེལ་རྫས༔ ལྷག་པའི་ལྷ་ཡི་ཐུགས་རྗེ་དང་༔ རྣལ་འབྱོར་བདག་གི་སེམས་བསྐྱེད་མཐུས༔ འོད་ཀྱིས་ཁྱབ་པའི་འགྲོ་བ་རྣམས༔ ཆོས་དབྱིངས་རྣམ་དག་ཕོ་བྲང་དུ༔ ཆོས་སྐུའི་སངས་རྒྱས་འཐོབ་པར་ཤོག༔ ངེས་པ་ལྔ་ལྡན་ཞིང་རྣམས་སུ༔ ལོངས་སྤྱོད་རྫོགས་སྐུར་ལྷུན་གྱིས་གྲུབ༔ མ་དག་འགྲོ་བའི་ཞིང་རྣམས་སུ༔ སྤྲུལ་པའི་སྐུ་རུ་སངས་རྒྱས་ཤོག༔ ཇི་སྲིད་འཁོར་བ་མ་སྟོངས་བར༔ སྤྲུལ་པ་ཉི་མའི་ཟེར་བཞིན་གྱི༔ གང་ལ་གང་འདུལ་སྣ་ཚོགས་པས༔ འགྲོ་དྲུག་འཁོར་བ་དོང་སྤྲུག་ཤོག༔ ཅེས་མང་དུ་བརྗོད༔ དབྱངས་གསལ་བྱེད་དང་ཡེདྷརྨ་སོགས་འདོན༔ ཤིས་པ་བརྗོད༔ མེ་ཏོག་འཐོར༔ རྒྱལ་མཚན་མེ་ལོང་དང་བཅས་པ་ལྷར་གསལ་མཆོད་བསྟོད་འབུལ༔ ཡེ་ཤེས་པ་གཤེགས༔ དམ་ཚིག་པ་བསྡུ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་ཁྱད་པར་འཕགས་པའི་མན་ངག་འདི༔ ཡིད་བཞིན་ནོར་བུ་ལས་ཀྱང་ལྷག༔ ལྷ་མཆོག་རྡོ་རྗེ་སེམས་དཔའ་ལ༔ ལུང་ཞུས་མ་འོངས་འགྲོ་བའི་དོན༔ ཡི་གེར་བཏབ་ནས་གཏེར་དུ་སྦས༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་གངས་རིའི་རྒྱལ་པོ་ཏེ་སེ་ནས་གདན་དྲངས་ཤིང་ཕུག་ནག་བདེ་བ་ཆེན་པོར་ཤོག་སེར་ལས་ཕབ་པའོ། །མངྒ་ལཾ།། །།