རྡོར་སེམས་་ལས་མཐའ་འགྲོ་དོན་ཟླ་བ་མཐོང་གྲོལ།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ རྡོ་རྗེ་སེམས་དཔའི་ལས་མཐའ་འགྲོ་དོན་ཟླ་བ་མཐོང་གྲོལ་བཞུགས༔ དཔལ་ཧེ་རུ་ཀཿལ་ཕྱག་འཚལ་ལོ༔ དུས་ཀྱི་ཐ་མ་རྩོད་ལྡན་ལ༔ ཆོས་ལ་མི་སྤྱོད་སྡིག་བཞིན་བསྒྲུབ༔ འབྲས་བུ་དམྱལ་ཁམས་སྡུག་རེ་བསྔལ༔ མི་ཚེ་ཡུད་ཙམ་སྐད་ཅིག་ལ༔ རྟག་འཛིན་འདི་ཕྱི་བརྗེ་རྣམས་འགྱོད༔ དེ་ཚེ་སྐྱེ་འགྲོ་ཐམས་ཅད་ནི༔ སྐྱབས་མེད་ངན་སོང་གླིང་གསུམ་འཁྱམས༔ སེམས་བསྐྱེད་ལྡན་པའི་རྣལ་འབྱོར་པས༔ བྱ་སླ་དོན་ཆེ་ཚེགས་ཆུང་བའི༔ མཐོང་གྲོལ་ཟླ་བའི་འགྲོ་དོན་འདི༔ པདྨས་ཕྱི་རབས་དོན་དུ་བརྗོད༔ ས་མ་ཡཱ༔ རྒྱ་རྒྱ་རྒྱ༔ དེ་ལ་ཟླ་བ་མཐོང་གྲོལ་གྱི་འགྲོ་དོན་ལ་འཇུག་པར་འདོད་པའི་རྣལ་འབྱོར་པས༔ སྔོན་འགྲོ་དངོས་གཞི་རྗེས་གསུམ་གྱིས་ཉམས་སུ་བླང་བར་བྱའོ༔ ས་མ་ཡཱ༔ རྒྱ་རྒྱ་རྒྱ༔ དེ་ལ་སྔོན་དུ་འགྲོ་བའི་རིམ་པ་ནི༔ སྐྱབས་སེམས་སྔོན་ཏུ་བཏང་ནས་ཁྲུས་བྱས་བདེ་བའི་གདན་ལ་འདུག་སྟེ༔ རབ་ཤེལ་འབྲིང་དངུལ་ཐ་ནའང་འོད་པོ་ཆེའི་མེ་ལོང་ལག་མཐིལ་ལྟར་སྙོམས་ཤིང་ཚད་དང་ལྡན་པ་ཞིག་ལ༔ ག་པུར་གྱིས་སྦྱངས་པའི་ཆུ་ནང་དུ་ཤེལ་ཀ་ར་ཚྭ་ཚོད་དང་༔ དུང་གི་ཕྱེ་མ་སྡོར་ཚོད་བཏབ་སྟེ༔ ལེགས་པར་བསྲུབས་པའི་ཁུ་བས་དཔལ་རྡོ་རྗེ་སེམས་དཔའ་སྒྲུབ་གཞུང་དང་མཐུན་པར་བྲི༔ སྐུའི་མཐའ་བསྐོར་དུ་ཡི་གེ་བརྒྱ་པའི་གཟུངས་སྔགས་དང་འདོད་གསོལ་འདི་ལྟར་བྲི་བར་བྱ༔ ཨེ་མ་ཧོ༔ ཐུགས་རྗེའི་རང་བཞིན་འགྲོ་བའི་དཔལ༔ སངས་རྒྱས་ཀུན་འདུས་རྡོ་རྗེ་སེམས༔ བཅོ་ལྔའི་ཉ་རྒྱས་ཐུགས་རྗེའི་ཞལ༔ འོད་ཀྱིས་ཁྱབ་པའི་འགྲོ་བ་རྣམས༔ ངན་སོང་གསུམ་གྱི་སྒོ་ཁེགས་ནས༔ མངོན་པར་དགའ་བའི་ཞིང་ཁམས་སུ༔ འགྲོ་བ་མ་ལུས་སྐྱེ་བར་ཤོག༔ ཅེས་བྲི་ལྷག་ཆད་མེད་པར་བྱ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དངོས་གཞིའི་རིམ་པ་ནི༔ དམིགས་པའི་གབ་ཏིག་སྒྲུབ་གཞུང་བསྟུན༔ མེ་ལོང་དར་དཀའ་དྲིལ་བྱས་ནས༔ བུམ་པའི་སྟེང་བཞག་བསྙེན་ཚད་བསྐྱལ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་རྗེས་ཀྱི་ལས་སྦྱོར་ནི༔ ཆོ་འཕྲུལ་ཆེན་པོའི་བཅོ་ལྔ་ལ༔ མེ་ལོང་རྒྱལ་མཚན་རྩེ་ལ་གདགས༔ ཤར་ཕྱོགས་ནམ་མཁར་ཕྱག་འཚལ་ཏེ༔ ཁྲུས་བྱས་བདེ་བའི་གདན་ལ་འདུག༔ བཅོ་ལྔའི་ཉ་རྒྱས་མེ་ལོང་དང་༔ རྣལ་འབྱོར་རང་དང་བཅས་པ་རྣམས༔ ཧཱུྃ་ལས་བླ་མ་རྡོ་རྗེ་སེམས༔ སྒྲུབ་པའི་གཞུང་དང་མཐུན་པར་བསྐྱེད༔ སྤྱན་འདྲེན་བཞུགས་གསོལ་མཆོད་བསྟོད་འཛབ༔ གཞུང་བཞིན་ཉམས་སུ་བླང་བར་བྱ༔ ཉ་རྒྱས་ཟླ་བའི་འོད་དང་ཟེར༔ རྡོ་རྗེ་སེམས་དཔའི་སྐུ་གསུང་ཐུགས༔ གཉིས་མེད་འཕྲོས་པས་འགྲོ་ལ་ཕོག༔ སྒྲིབ་གཉིས་བག་ཆགས་བཅས་པ་དག༔ མངོན་པར་དགའ་བའི་ཞིང་ཁམས་སུ༔ རིགས་བདག་རྡོ་རྗེ་སེམས་དཔའ་དང་༔ གཉིས་མེད་འབྲས་བུ་ཐོབ་པར་བསམས༔ ཆོས་ཉིད་ཀ་དག་ཀློང་ཡངས་ངང་༔ གྲག་སྟོང་སྐྱེ་མེད་སྔགས་སྒྲ་ལྡིར༔ ཡི་གེ་བརྒྱ་པ་བརྒྱ་ཕྲག་བདུན༔ ལས་སྦྱོར་བཏགས་པ་བརྒྱ་ཕྲག་གཅིག༔ རྣལ་འབྱོར་སེམས་བསྐྱེད་ལྡན་པ་ཡིས༔ བཅོ་ལྔའི་ཟླ་བ་ཤར་ནུབ་བར༔ བསྙེན་སྒྲུབ་ཐེམས་པས་ལས་ལ་སྦྱོར༔ འགྲོ་དྲུག་སེམས་ཅན་ཐམས་ཅད་ཀྱི༔ སྡིག་སྒྲིབ་ལས་ཀྱི་ས་བོན་རྣམས༔ དག་པར་གྱུར་ཅིག་སྙམས་པ་ཡི༔ ངང་ནས་བསྔོ་སྨོན་འདི་ལྟར་བརྗོད༔ ཧཱུྃ་ཧྲཱི༔ ཐུགས་རྗེ་ཆེན་པོ་བཅོམ་ལྡན་འདས༔ ཉ་རྒྱས་ཟླ་བའི་དཀྱིལ་འཁོར་ལ༔ ཐུགས་རྗེའི་འོད་ཟེར་ཁམས་གསུམ་ཁྱབ༔ མ་དག་སེམས་ཅན་ལས་སྒྲིབ་སྦྱངས༔ ཏིང་འཛིན་སྔགས་དང་ཐུགས་རྗེའི་འཕྲུལ༔ བྱིན་རླབས་གཅིག་ཏུ་བསྡུས་པ་ཡི༔ བདེ་ཆེན་དག་པའི་ཞིང་ཁམས་སུ༔ རིགས་བདག་རྡོ་རྗེ་སེམས་དཔའ་དང་༔ གཉིས་སུ་མེད་པར་སངས་རྒྱས་ཤོག༔ ཅེས་བརྗོད་ལྟ་བའི་ཀློང་བཤགས་དང་༔ རཱུ་ཏྲའི་སྨྲེ་བཤགས་འདོན་པར་བྱ༔ ས་མ་ཡཱ༔ རྒྱ་རྒྱ་རྒྱ༔ ལྷ་གཤེགས་བསྐྱེད་རིམ་བསྡུ༔ འཁོར་ལོ་རྒྱལ་མཚན་སྒྲུབ་ཁང་དུ་བཅང་ཞིང་༔ ལོ་གསུམ་ཆག་མེད་དུ་ཉི་ཟླ་མཐོང་གྲོལ་གྱི་འགྲོ་དོན་འདི་བཞིན་འགྲུབ་ན༔ འོད་ཀྱིས་ཕོག་པའི་འགྲོ་བ་རྣམས༔ མངོན་པར་དགའ་དང་བདེ་བ་ཅན༔ ལས་རབ་རྫོགས་དང་དཔལ་དང་ལྡན༔ སྟུག་པོ་བཀོད་སོགས་ཞིང་ལྔ་པོར༔ རིམ་གྱིས་སམ་ནི་ཅིག་ཅར་གྱི༔ དག་དང་མ་དག་སྣ་ཚོགས་ཀྱི༔ འགྲོ་བ་གང་དང་གང་ཡིན་ཀྱང་༔ རྣལ་འབྱོར་དེ་ཡི་སྨོན་ལམ་གྱིས༔ སྐྱེ་འགྱུར་འདི་ལ་ཐེ་ཚོམ་མེད༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བནྡྷེ་ཉི་མ་གྲགས་པས་ཏེ་སེ་ནས་གདན་དྲངས་པའོ། །མངྒ་ལཾ།། །།