འཇམ་དབྱངས་དཀར་བོའི་སྒྲུབ་ཐབས།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ འཇམ་དབྱངས་དཀར་བོའི་སྒྲུབ་ཐབས་བཞུགས༔ ཧེ་རུ་ཀཿལ་ཕྱག་འཚལ་ལོ༔ བླ་མ་བདེ་མཆོག་འཁོར་ལོ་ཡི༔ ཆོས་ལ་སྤྱོད་པའི་རྣལ་འབྱོར་དོན༔ འཇམ་དབྱངས་དཀར་པོའི་སྒྲུབ་ཐབས་ཤིག༔ བདག་ཉིད་པདྨས་བརྗོད་པར་བྱ༔ ཕྱི་རབས་ཉམས་སུ་ལོངས་ཤིག་བུ༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་སྔོན་འགྲོ་དངོས་གཞི་རྗེས་ཀྱི་རིམ་པ་གསུམ་དུ་སྟོན༔ དང་པོ་སྔོན་དུ་འགྲོ་བ་ནི༔ དབེན་པའི་གནས་སུ་གཞི་བདག་ལ༔ དཀར་གཏོར་ཕུལ་ཏེ་བདེན་སྟོབས་བརྗོད༔ མེ་ཏོག་དཀར་པོ་སྐྱེ་བའམ༔ བྲག་དཀར་བེའུ་ལ་སོགས་པའི༔ ཁ་དོག་དཀར་ཞིང་མཛེས་པའི་སར༔ རྣལ་འབྱོར་བདེ་བའི་གདན་ལ་འདུག༔ སྐྱབས་འགྲོ་སེམས་བསྐྱེད་སྔོན་སོང་ནས༔ བདེ་བར་གཤེགས་པའི་བཀའ་རྣམས་ལ༔ རབ་འབྱམས་གཅིག་ཤེས་ཀུན་གྲོལ་གྱི༔ གོ་བས་ཆོས་ཉིད་དོན་རྟོགས་ཕྱིར༔ འཇམ་དཔལ་དཀར་པོའི་ཏིང་འཛིན་བསྐྱེད༔ བསམ་པའི་འདུ་ཤེས་དྲག་པོ་ཡིས༔ རྩེ་གཅིག་ངང་ནས་འདི་སྐད་བརྗོད༔ ཧཱུྃ་ཧྲཱི༔ ཆོས་རྣམས་སྟོང་དང་སྙིང་རྗེ་ངང་༔ བདག་མེད་བློ་འདས་ཆེན་པོར་གསལ༔ ཨཱོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭཱ་བྷཱ་ཝ་ཤུདྡྷོ྅་ཧཾ༔ སེམས་ཉིད་རང་བྱུང་སྙིང་པོ་ཆེ༔ ས་བོན་ཡི་གེ་ཨཱཿདཀར་པོ༔ ཡན་ལག་བརྒྱད་ལྡན་རྒྱ་མཚོ་དཀར༔ རབ་འཁྱིལ་དབུས་ན་པད་སྡོང་ལྗང་༔ ཟླ་བའི་དཀྱིལ་འཁོར་སྟེང་དུ་བསྒོམ༔ ཨཱཿདཀར་ཡོངས་སུ་གྱུར་པ་ལས༔ བདག་ཉིད་རྗེ་བཙུན་འཇམ་དཔལ་དབྱངས༔ ཞལ་གཅིག་ཕྱག་གཉིས་མཆོག་སྦྱིན་ལ༔ གཡོན་པས་ཨུཏྤལ་མེ་ཏོག་བསྣམས༔ རྡོ་རྗེ་སྐྱིལ་ཀྲུང་འོད་ཉམས་འཁྱུག༔ ལོངས་སྤྱོད་རབ་རྫོགས་ཅོད་པན་འཕུར༔ དབུ་སྐྲ་ཐོར་ཅོག་རིན་ཆེན་བརྒྱན༔ འོད་དཀར་ཟླ་བའི་རྒྱབ་ཡོལ་མཛེས༔ འཛུམ་ཉམས་བཞད་མདངས་མུ་ལེར་བསྒོམ༔ དཔྲལ་བར་ཨཱོཾ་དང་མགྲིན་པར་མཱུཾ༔ ཐུགས་སྲོག་ཡི་གེ་ཨཱཿདཀར་པོ༔ འོད་ཟེར་དཀར་པོ་གྲངས་མེད་པ༔ འཕྲོས་པས་འོག་མིན་དབྱིངས་དང་ནི༔ རི་བོ་རྩེ་ལྔའི་ཕོ་བྲང་ནས༔ ཡེ་ཤེས་སེམས་དཔའ་རང་འདྲ་བ༔ བུ་ཡུག་འཚུབ་པ་ལྟ་བུར་བྱོན༔ དམ་ཚིག་སེམས་དཔར་གཉིས་མེད་ཐིམ༔ སྤྱན་འདྲེན་གསལ་འདེབས་འདི་ལྟར་བརྗོོད༔ ཧཱུྃ་ཧྲཱི༔ རང་བཞིན་དབྱིངས་དང་གཞལ་ཡས་ནས༔ སྐུ་མཆོག་འཇམ་དཔལ་གཤེགས་སུ་གསོལ༔ ཁྱད་པར་རི་བོ་རྩེ་ལྔ་ནས༔ ཐུགས་བསྐྱེད་སྨོན་ལམ་མཐར་ཕྱིན་ཅིང་༔ འགྲོ་བའི་སྐྱབས་དང་མགོན་མཆོག་ཆེ༔ བདག་གིས་དད་པས་སྤྱན་འདྲེན་ན༔ ཐུགས་རྗེའི་དབང་གིས་གཤེགས་སུ་གསོལ༔ ཨཱོཾ་མཉྫུ་ཤྲཱི་བཛྲ་ས་མ་ཡ་ཛ༔ བརྟན་པར་བཞུགས་ཚིག་བྱ་བ་ནི༔ ཧཱུྃ་ཧྲཱི༔ ཡན་ལག་བརྒྱད་ལྡན་རྒྱ་མཚོ་དང་༔ པད་སྡོང་ལྗང་སེར་ཟླ་བའི་སྟེང་༔ ཐུགས་རྗེའི་མངའ་བདག་འཇམ་དཔལ་དབྱངས༔ གཉིས་མེད་བརྟན་པར་བཞུགས་སུ་གསོལ༔ ཨཱོཾ་མཉྫུ་ཤྲི་ས་མ་ཡཱ་ཏིཥྛ་ལྷན༔ གུས་པས་ཕྱག་མཆོད་བརྗོད་ཚིག་ནི༔ ཧཱུྃ་ཧྲཱི༔ ལྷག་པའི་ལྷ་མཆོག་ཐུགས་རྗེའི་དཔལ༔ འདྲེན་པའི་གཙོ་བོ་འཇམ་དཔལ་དབྱངས༔ མ་རིག་མུན་སེལ་སྒྲོན་མེའི་མཆོག༔ ཕྱག་འཚལ་རྡོ་རྗེ་འཇམ་དབྱངས་ལ༔ ཨཱོཾ་མཉྫུ་ཤྲི་ཨ་ཏི་པུ་ཧོཿཔྲ་ཏི་ཙྪཧོ༔ དངོས་འབྱོར་ཡིད་སྤྲུལ་མཆོད་ཚིག་ནི༔ ཧཱུྃ་ཧྲཱི༔ རབ་འབྱམས་ནམ་མཁའི་མཐའ་ཀླས་པར༔ མེ་ཏོག་དང་ནི་དྲི་ཞིམ་སྤོས༔ མུན་སེལ་ཉི་ཟླ་མར་མེའི་མདངས༔ དྲི་མཆོག་ལྔ་ལྡན་བྱུག་པ་དང་༔ འབྲུ་བཅུད་རྐྱེན་སྦྱར་ཞལ་ཟས་བཤོས༔ ཏིང་ཏིང་ཤགས་སོགས་རོལ་མོའི་སྒྲ༔ འགྲོ་བའི་དོན་དུ་འབུལ་ལགས་ན༔ ཐུགས་རྗེའི་དབང་གིས་བཞེས་སུ་གསོལ༔ ཨཱོཾ་མཉྫུ་ཤྲི་བཛྲ་པུཥྤེ་དྷུ་པེ་ཨཱ་ལོ་ཀེ་གྷནྡྷེ་ནཻ་ཝི་ཏེ་ཤཔྟ་ཨཱཿཧཱུྃ༔ བསྟོད་པ་དབྱངས་ཀྱིས་འདི་ལྟར་བརྗོད༔ ཧཱུྃ་ཧྲཱི༔ སྔོན་འདས་བསྐལ་པ་མང་པོའི་གོང་རོལ་ནས༔ ཡང་དག་རྡོ་རྗེ་ལྟ་བུའི་སྐུ་བརྙེས་ཀྱང་༔ འགྲོ་བའི་སྐྱབས་དང་བསྟན་པའི་རྩ་ལག་ཏུ༔ མྱ་ངན་མི་འདའ་རྟག་པར་རྒྱུན་དུ་བཞུགས༔ གུས་པས་ཕྱག་འཚལ་འཇམ་དབྱངས་རྡོ་རྗེ་ལ༔ ཁྱོད་ཀྱི་སྐུ་མཆོག་འོད་དཀར་འཆང་བ་ཡིས༔ མ་རིག་མུན་པའི་ཚོགས་རྣམས་འཇོམས་པའི་ལྷ༔ ཤེས་དང་ཤེས་བྱའི་སྒྲིབ་གཉིས་སྦྱོང་བྱེད་པ༔ གུས་པས་ཕྱག་འཚལ་འཇམ་དབྱངས་རྡོ་རྗེ་ལ༔ ལོངས་སྤྱོད་རྫོགས་སྐུ་མཚན་དང་དཔེ་བྱད་འབར༔ རིན་ཆེན་རྒྱན་ཆ་དར་གྱི་ཅོད་པན་འཕུར༔ མཆོག་སྦྱིན་ཕྱག་རྒྱ་རྡོ་རྗེ་སྐྱིལ་ཀྲུང་ཅན༔ གུས་པས་ཕྱག་འཚལ་འཇམ་དབྱངས་རྡོ་རྗེ་ལ༔ སྒྲུབ་པ་འཛབ་ཀྱི་རིམ་པ་ནི༔ ཧཱུྃ་ཧྲཱི༔ སྣང་སྟོང་དབྱེར་མེད་ཟུང་འཇུག་རྡོ་རྗེའི་སྐུ༔ འོད་སྣང་ལས་གྲུབ་མགོན་པོ་འཇམ་དཔལ་དབྱངས༔ ཐུགས་ཀར་ཟླ་དཀྱིལ་ཨཱཿལ་སྔགས་ཀྱིས་བསྐོར༔ འོད་ཟེར་འཕྲོས་པས་དུས་གསུམ་རྒྱལ་བ་མཆོད༔ མཁྱེན་བརྩེ་བསྡུས་ཏེ་བདག་དང་འགྲོ་ལ་ཐིམ༔ ཐམས་ཅད་མཁྱེན་པའི་ཡེ་ཤེས་ཐོབ་པར་བསམས༔ རྩེ་གཅིག་ངང་ནས་སྙིང་པོ་འདི་ལ་འབད༔ ཨཱོཾ་ཝ་ཀྱེ་དེ་ཝི་པྲ་ཛྙཱ་ཛྙཱ་ན་སརྦ་སིདྡྷི་ཧཱུྃ༔ ཐུན་སྐབས་མཆོད་པས་མཆོད༔ བསྟོད་པས་བསྟོད༔ རྗེས་སུ་བསྔོ་སྨོན་འདི་ལྟར་བརྗོད༔ ཧཱུྃ་ཧྲཱི༔ ཐུགས་རྗེའི་མངའ་བདག་འཕགས་མཆོག་འཇམ་དཔལ་དབྱངས༔ བསྒོམ་བཟླས་མཆོད་བསྟོད་ཕུལ་བའི་བསོད་ནམས་ཀྱིས༔ བདག་ནི་འདི་ནས་ཚེ་རབས་ཐམས་ཅད་དུ༔ རྗེས་སུ་བཟུང་ནས་དྲན་དང་རྟོགས་པ་ཡི༔ ཏིང་ངེ་འཛིན་ལ་རང་དབང་མཆོག་ཐོབ་ནས༔ སྲིད་ཞིའི་མགོན་པོ་ཁྱོད་དང་དབྱེར་མེད་ཤོག༔ བྱང་སེམས་ཁྱོད་ཀྱི་ཐུགས་རྗེའི་མཐུ་ལྟ་བུས༔ མར་གྱུར་སེམས་ཅན་བདག་གིས་སྒྲོལ་བར་ཤོག༔ ཅེས་བརྗོད་བསྐྱེད་རིམ་བསྡུ༔ རྫོགས་རིམ་དུས་གསུམ་ཁྱབ་བརྡལ་ཀློང་ཡངས་བློ་འདས་ཆེན་པོར་སྤྱོད་པར་བྱའོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ སྤྲང་བན་འགྲོ་འདུལ་གླིང་པས་གངས་རིའི་རྒྱལ་པོ་ཏེ་སེའི་བདེ་ཆེན་གསང་བ་ཕུག་ནས་གདན་དྲངས་པའོ། །མངྒ་ལཾ།། །།