འཇམ་དབྱངས་དཀར་པོ་སྒྲུབ་པའི་ལག་ལེན་དམར་ཁྲིད།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ འཇམ་དབྱངས་དཀར་པོ་སྒྲུབ་པའི་ལག་ལེན་དམར་ཁྲིད་བཞུགས༔ དཔལ་ཆེན་པོ་ཧེ་རུ་ཀཿལ་ཕྱག་འཚལ་ལོ༔ འཇམ་དབྱངས་དཀར་པོ་སྒྲུབ་པ་ཡི༔ སྔོན་འགྲོ་དངོས་གཞི་རྗེས་གསུམ་གྱི༔ སྟ་གོན་ལག་ལེན་དམར་འཁྲིད་བསྟན༔ ས་མ་ཡཱ༔ རྒྱ་རྒྱ་རྒྱ༔ དེ་ལ་དང་པོ་ས་གཞི་བྱིན་ཆེ་ཞིང་ཉམས་དགའ་བ༔ ཤེས་པ་དྭངས་ཤིང་མེ་ཏོག་དཀར་པོ་སྐྱེ་བའི་གླིང་པདྨ་ཁ་བྱེ་བ་ལྟ་བུར༔ སྒྲུབ་ཁང་ཡང་ཁ་དོག་དཀར་པོ་བྱ་ཞིང་༔ གོས་གདན་ལ་སོགས་པ་རྣམས་ཀྱང་དཀར་པོ་འཆང་༔ ཤ་ཆང་སྒོག་པ་ལ་སོགས་སྤང་༔ བུད་མེད་ལ་མི་སྤྱོད༔ ཚངས་སྤྱོད་དང་རྒྱུན་ཞུགས་ཀྱི་འདུལ་ཁྲིམས་མཁན་ཡིན་ན་སྒྲུབ་པ་ལ་འཇུག་ཁ་གསོ་སྦྱོང་བླང་༔ སྐྱེ་བོ་ཕོ་མོ་ཡིན་ན་བསྙེན་གནས་ཀྱི་སྡོམ་པ་བླངས་ཏེ༔ སྒྲུབ་པ་ལ་ཞུགས་ནས་མ་གྲོལ་གྱི་བར་དུ༔ ནང་རེ་བཞིན་ཡན་ལག་ལྔ་ཁྲུས་རེ་བྱེད༔ ཆོས་སྤྱོད་གཞན་རྣམས་སྤང་ཞིང་སྐབས་སྐབས་སུ་མཚན་བརྗོད་དང་༔ འཇམ་དཔལ་གྱིས་དམ་བཅས་པའི་གཟུངས་རྣམས་བརྗོད༔ རྐང་པ་ཡང་རྡོ་རྗེ་སྐྱིལ་ཀྲུང་དང་སེམས་དཔའི་སྐྱིལ་ཀྲུང་འཕྲུལ་འཁོར་གྱི་གནད་དུ་ཆེ་བས༔ དེ་ལྟར་མ་བྲལ་བར་བྱ༔ ལུས་ངག་ཡིད་གསུམ་ཞི་དུལ་གྱི་སྤྱོད་ལམ་ལ་སྤྱད༔ ངག་ཚིག་གཞན་དང་མ་འདྲེས་པར་སྨྲར་བཅད༔ དེ་ནི་སྔོན་འགྲོ་གནས་དང་སྒྲུབ་ཁང་ལུས་ངག་གི་སྟ་གོན་ནོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྒྲུབ་རྫས་སྟ་གོན་ནི༔ གནས་ཁང་སྐྱང་ནུལ་ལེགས་པར་བྱས་ཏེ༔ སྟེགས་བུ་དཀར་འཇམ་མཁྲེགས་པ་གྱེན་ཐུར་དུ་ཁྲུ་གང་བ་ཞིག་བརྩིགས༔ བ་ར་དཀར་མོའི་འོ་མས་ཆག་ཆག་གདབ༔ ཙན་དན་དཀར་པོ༔ ག་པུར༔ སྤོས་དཀར་གསུམ་སྦྱངས་པའི་ཆུས་བྱུག༔ ཚངས་པའི་ཐིག་གདབ་ཅིང་སྟེགས་བུ་ཆ་གསུམ་དུ་བགོས་ལ༔ ལྟེ་བའི་ཆ་ལ་པདྨ་དཀར་པོ་འདབ་མ་བརྒྱད་པ་འབྲི༔ པད་ཚབས་རྣམས་ལྗང་གུར་བྱ༔ མུ་ཁྱུད་སྔོན་པོ་ལ་མེ་ཏོག་དཀར་པོ་ཕྲེང་བས་བརྒྱན་པ་འབྲི༔ བར་གྱི་ཆ་ལ་ཆུ་རིས་རྒྱ་མཚོར་དཀར་པོས་བཅད་རྒྱབ་པ་འབྲི༔ མཐའི་ཆ་ལ་དུང་དང་༔ ཉ་དང་༔ གླང་པོ་ཆེ་དང་༔ ངང་པ་དང་༔ ངུར་སེར་དང་༔ ནེ་ཙོ་དང་༔ ཁུ་བྱུག་དང་༔ རལ་གྲི་དང་༔ པོ་ཏི་དང་༔ རྒྱལ་མཚན་དང་༔ གདུགས་དང་༔ མེ་ཏོག་གི་ཕྲེང་བ་དང་༔ འཁོར་ལོ་དང་༔ དཔལ་བེའུ་དང་༔ དཔག་བསམ་གྱི་ཤིང་དང་༔ ཉི་མ་དང་༔ ཟླ་བ་དང་༔ མེ་ལོང་ལ་སོགས་པའི་རི་མོ་མཛེས་ཚོན་གྱིས་འབྲི༔ དེ་ནས་དཀྱིལ་འཁོར་གྱི་དབུས་སུ་ཁྲིའུ་ཁར་དངུལ་ལམ་ཁ་དོག་དཀར་པོའི་བུམ་པ་མཚན་ལྡན་གྱི་ནང་དུ༔ ཁྱེའུ་བཀྲ་ཤིས་མིང་རུས་ལེགས་ཤིང་ཕ་མ་འཛོམ་པས་གཙང་ཆབ་ཀྱི་ཆུ་བླང་༔ བུམ་པའི་སུམ་ཆ་དཀང་༔ བུམ་རྫས་སྤྱི་མཐུན་ལྟར་བཏབ༔ མགུལ་ཆིངས་ཡང་དཀར་པོ་བྱ༔ འབྲས་བུ་ཅན་གྱི་ཤིང་ངམ་བ་ལུ་དཀར་པོས་ཁ་བརྒྱན༔ གཟུངས་ཐག་རྡོ་རྗེ་ལ་ཁ་དོག་དཀར་པོའི་སྐུད་པ་བཏགས་ལ་བུམ་པར་བརྒྱན༔ དུང་ཆོས་ནང་དུ་འོ་མ་ལ་ག་པུར་བཏབ་པ་བླུགས་ཏེ་བུམ་པའི་ཁར་བཞག༔ བུམ་པའི་གཡས་སུ་དུང་དཀར་བཞག༔ གཡོན་དུ་མཚན་བརྗོད་ཀྱི་པོ་ཏི་བཞག༔ རྒྱབ་ཏུ་མེ་ལོང་བཞག༔ མདུན་དུ་མཎྜལ་གྱི་སྟེང་དུ་འབྲས་གྲོ་རྒྱ་སྲན་གསུམ་གྱི་ཚོམ་བུ་བཀོད་དེ་བཞག༔ མཐའ་སྐོར་དུ་རྣམ་ལྔ་བཤམས༔ དེ་ནི་སྒྲུབ་རྫས་སྟ་གོན་ནོ༔ ས་མཡཱ༔ རྒྱ་རྒྱ་རྒྱ༔ དེ་ནས་དངོས་གཞི་ལ༔ སྒྲུབ་པ་པོ་བདེ་བའི་གདན་ལ་འདུག༔ སྐྱབས་སེམས་བརྗོད་པ་ནི༔ ཧཱུྃ་ཧྲཱི༔ སྐྱབས་གྱུར་ངོ་བོ་བླ་མེད་དཀོན་མཆོག་གསུམ༔ འགྲོ་བའི་དོན་དུ་གུས་པས་སྐྱབས་སུ་མཆི༔ འགྲོ་དྲུག་མ་རིག་སྒྲིབ་པ་བསལ་བའི་ཕྱིར༔ འཇམ་དབྱངས་དཀར་པོའི་སྒོམ་བཟླས་ཉམས་སུ་ལེན༔ མཆོད་རྫས་དང་སྒྲུབ་རྫས་རྣམས་བྱིན་གྱིས་བརླབ་པ་ནི༔ མཆོད་རྫས་དང་དཀྱིལ་འཁོར་རྣམས་སྤོས་ཆུས་འཐོར་ཞིང་༔ ཨཱོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཤུདྡྷོ྅་ཧཾ༔ ཞེས་བརྗོད་པས་དངོས་པོར་གྱུར་པའི་ཆོས་ཐམས་ཅད་སྟོང་པར་བསམས༔ སྟོང་པའི་ངང་ལས་རྣམ་པར་དག་པའི་ཞིང་ཁམས་དཀར་ལ་འཚེར་བ་གསལ་ལ་འབར་བ་ཞིག་ཏུ་གྱུར༔ ཞིང་ཁམས་དེའི་དབུས་སུ་རིན་པོ་ཆེ་ཤེལ་ལས་གྲུབ་པའི་གཞལ་ཡས་ཀྱི་ཁང་པ་རྒྱ་ཆེ་ལ་དཔངས་མཐོ་བ༔ མཛེས་པ་ལྟ་ན་སྡུག་པ་རིན་པོ་ཆེ་སྣ་ཚོགས་ཀྱི་རྒྱན་ཕྲེང་དུ་མས་བརྒྱན་པ་ཞིག་གི་དབུས་སུ༔ རིན་པོ་ཆེའི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་པ༔ ཆུ་དང་བཅུད་ཀྱིས་བལྟམས་པ༔ འབྲས་བུ་ཅན་གྱི་ཤིང་གིས་ཁ་བརྒྱན་པ༔ གཟུངས་ཐག་རྡོ་རྗེ་ལ་ས་བོན་གྱིས་མཚན་པ༔ དུང་ཆོས་ཀྱི་ནང་དུ་དམ་ཚིག་སེམས་དཔའ་དང་བཅས་པ་གསལ༔ གཡས་སུ་དུང་དཀར་པོ་ལ་ཨཱ་ལིས་མཚན་པར་གྱུར༔ གཡོན་དུ་པོ་ཏི་ལ་ཀཱ་ལིས་མཚན་པར་གྱུར༔ རྒྱབ་ཏུ་མེ་ལོང་ལ་ཡེ་ཤེས་ལྔའི་རྣམ་པ་ཨཱོཾ་ཧཱུྃ་ཏྲཾ་ཧྲཱིཿཨཱཿརྣམས་ཀྱིས་མཚན་པར་གྱུར༔ མདུན་དུ་མེ་ཏོག་གི་ཚོམ་བུ་ལ་མཱུཾ་གྱིས་མཚན་པ་ཡོངས་སུ་གྱུར་པ་ལས་མཆོད་པའི་ལྷ་མོ་རྣམས་སུ་གསལ༔ དེའི་མཐའ་སྐོར་རྣམས་སུ་མེ་ཏོག་བདུག་སྤོས་མར་མེ་དྲི་ཆབ་ཞལ་ཟས་རོལ་མོ༔ གཟུགས་སྒྲ་དྲི་རོ་རེག་བྱ་ལ་སོགས་པ་རྣམས་དང་༔ བཀྲ་ཤིས་པའི་རྟགས་བརྒྱད་རྣམས་ལ་འོད་ཟེར་གྱི་མདངས་དང་རོ་བཅུད་ཀྱི་ནུས་པ་ལྡན་པ༔ བྱ་ཚོགས་ཡིད་དུ་འོང་བ་མང་པོས་སྐད་སྙན་སྒྲོག་པ༔ གླང་པོ་ཆེ་ས་ལ་རབ་བརྟན་ལ་སོགས་པ་རིན་པོ་ཆེ་དང་ལྡན་པའི་དུད་འགྲོ་མང་པོས་རྩེད་འཇོ་འཁྲབ་པ༔ ཡིད་དུ་འོང་ཞིང་དྲི་ཞིམ་པའི་མེ་ཏོག་སྣ་ཚོགས་ཀྱིས་བརྒྱན་པར་བསམ་མོ༔ ས་མ་ཡཱ༔ རྒྱ་རྒྱ་རྒྱ༔ ཁྱད་པར་གྱི་དངོས་གཞི་ཏིང་འཛིན་དམིགས་པའི་འཕྲུལ་འཁོར་ནི༔ བདག་དང་དཀྱིལ་འཁོར་ཐ་དད་མེད་པ་མགོན་པོ་འཇམ་དབྱངས་སུ་གསལ་བའི་བསྐྱེད་རིམ་ཆུ་ཟླའམ་མེ་ལོང་གི་གཟུགས་བརྙན་ལྟར་སྣང་ལ་རང་བཞིན་མ་གྲུབ་པར་གསལ་ཞིང་བསྒོམ༔ དེ་ལྟར་བསྐྱེད་རིམ་དང་ལྡན་པའི་ཐུགས་ཀའི་སྔགས་ཕྲེང་ཨ་ལི་ཀཱ་ལིའི་རྣམ་པར་བདག་བསྐྱེད་ཀྱི་ཞལ་ནས་འཐོན༔ གཟུངས་ཐག་ལ་བརྒྱུད་དེ་སོང་༔ མདུན་བསྐྱེད་ཀྱི་ཞལ་དུ་ཞུགས༔ ཐུགས་དམ་གྱི་བརྒྱུད་བསྐུལ༔ འོད་ཟེར་དཔག་ཏུ་མེད་པར་འཕྲོས༔ རྒྱལ་བ་རྣམས་ལ་མཉེས་པའི་མཆོད་པ་ཕུལ༔ སྐུ་གསུང་ཐུགས་ཀྱི་བྱིན་རླབས་དང་་མཁྱེན་བརྩེ་ཐམས་ཅད་འོད་ཟེར་གྱི་རྣམ་པར་ཚུར་བསྡུས༔ བདག་དང་མདུན་བསྐྱེད་ལ་ཐིམ༔ སྒྲིབ་པ་གཉིས་དག༔ ཚོགས་གཉིས་རྫོགས༔ སྐུ་དང་ཡེ་ཤེས་མངོན་དུ་གྱུར་པར་བསམས་ཏེ༔ སྙིང་པོ་འདི་ལ་འབུམ་ཕྲག་བཅུ་བགྲང་བར་བྱའོ༔ ཨཱོཾ་ཝཱ་ཀྱེ་དྷེ་ཝི་པྲ་ཛྙཱ་ཛྙཱ་ན་སརྦ་སིདྡྷི་ཧཱུྃ༔ དེ་ལྟར་བརྩོན་འགྲུས་ལྡན་པ་ཡིས༔ ཉམས་སུ་བླངས་པའི་སྐལ་ལྡན་ལ༔ རྟགས་ཀྱི་རིམ་པ་འདི་ལྟར་འོང་༔ ཉི་མ་ཟླ་བར་ཞོན་པ་དང་༔ གདན་དུ་གཏིང་དང་ནམ་མཁར་འཕུར༔ འོ་མ་བཏུང་དང་ཆུ་དཀར་བཀྲུས༔ གོས་དཀར་གྱོན་དང་མེ་ཏོག་བཏུས༔ རལ་གྲི་རྙེད་དང་གངས་རིར་འཛེག༔ མཆོད་རྟེན་བསྐོར་དང་རོལ་མོ་དཀྲོལ༔ ཕྱི་དང་ནང་གི་རྟགས་ཡིན་པས༔ འཇམ་དཔལ་དབྱངས་ཀྱི་བྱིན་རླབས་འཐོབ༔ རྒྱལ་བའི་བཀའ་ལ་གོ་བ་ཐེབས༔ མ་འདྲེས་ཆོས་རྣམས་སོ་སོར་འབྱེད༔ འཛིན་དང་སྤོབས་པ་མཐའ་ཡས་ཤིང་༔ ཕ་རོལ་རྒོལ་བའི་སྟོབས་ལྡན་འགྱུར༔ བསོད་ནམས་འཕེལ་ཞིང་ཚེ་མཐར་ཕྱིན༔ སྙན་དང་གྲགས་པས་ས་སྟེང་ཁྱབ༔ ས་མ་ཡཱ༔ རྒྱ་རྒྱ་རྒྱ༔ ཁྱད་པར་མཆོག་གི་རྟགས་གསུམ་ནི༔ ཞལ་མཇལ་གསུང་ཐོས་དྲི་བཟང་འཐུལ༔ རབ་དངོས་འབྲིང་ཉམས་ཐ་ན་འང་༔ རྨི་ལམ་ནང་དུ་བྱུང་གྱུར་ན༔ གང་ཟག་དེ་ནི་འཕགས་པའི་སྐུ༔ འཇམ་དཔལ་དབྱངས་དང་གཉིས་སུ་མེད༔ དེ་ཚེ་སྐལ་ལྡན་སྐྱེས་བུ་ལ༔ ཡ་མ་ཟུང་གི་མངོན་ཤེས་འཆར༔ མཐོང་ཐོས་དྲན་རེག་ཆོས་ལ་འཛུད༔ སྐྱེ་བ་མེད་པ་ཆོས་ཀྱི་སྐུ༔ བླ་མ་མེད་ཀྱང་རང་ངོ་འཕྲོད༔ ཆོས་དང་ཆོས་མིན་སྣ་ཚོགས་ཀྱི༔ ཐོག་མཐའ་བར་གསུམ་ཀུན་མཁྱེན་ཞིང་༔ བླང་དོར་བྲལ་བའི་གདེང་རྙེད་ནས༔ མཆོག་གི་དངོས་གྲུབ་ཚེ་འདིས་འཐོབ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་རྗེས་ཀྱི་སྟ་གོན་ནི༔ སྒྲུབ་རྫས་དཀྱིལ་འཁོར་བཅའ་གཞི་རྣམས༔ དམ་མེད་ཐ་མར་མི་མཐོང་བྱ༔ གསང་ཞིང་སྤྱད་ན་དངོས་གྲུབ་མྱུར༔ ཞི་བའི་སྦྱིན་སྲེག་ཅི་མང་འདེབས༔ ནམ་ལངས་ཞི་བའི་དུས་དག་ཏུ༔ ལྷར་གསལ་ལས་སྦྱོར་ཤམ་བུ་འདི༔ གདགས་ཏེ་སྙིང་པོ་བརྒྱ་ཚར་བགྲང་༔ སྒྲིབ་གཉིས་བག་ཆགས་དང་བཅས་པ་ཐམས་ཅད་ཤཱནྟིང་ཀུ་རུ་ཡེ་སྭཱ་ཧཱ༔ བསྔོ་སྨོན་སྒྲུབ་པའི་གཞུང་ལྟར་བརྗོད༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་བདག་འདྲ་པདྨ་འབྱུང་༔ འཕགས་པ་རིགས་གསུམ་མགོན་པོ་དང་༔ གཉིས་སུ་མེད་ཅིང་ཐ་མི་དད༔ ར་གཱ་རཀྟའི་གནས་མཆོག་ཏུ༔ ལྷག་པའི་ལྷ་མཆོག་འདི་བསྒྲུབས་པས༔ ཐམས་ཅད་མཁྱེན་པའི་ཡེ་ཤེས་ཐོབ༔ སློབ་དཔོན་འཇམ་དཔལ་བཤེས་གཉེན་ལ༔ ཕྱི་རབས་འགྲོ་བའི་དོན་བསམས་ནས༔ འཇམ་དཔལ་རྒྱུད་ལུང་མང་དུ་ཞུས༔ ཕྱི་རབས་དོན་དུ་ཡི་གེར་བཏབ༔ ཇི་སྙེད་གཏེར་ཁ་འགའ་ལ་སྦས༔ ཁྱད་པར་འཕགས་པའི་གདམས་པ་འདི༔ མཚོ་རྒྱལ་ཀླུ་དབང་གཉིས་ལ་སྦྱིན༔ སྤེལ་བར་ཕངས་ནས་ཏེ་སེར་སྦས༔ མ་འོངས་རྩོད་ལྡན་ཡང་མཐའ་ལ༔ མི་རྣམས་བཞི་བཅུ་ཁ་རལ་ཏེ༔ སུམ་ཅུར་ཉེ་བའི་དུས་དག་ཏུ༔ གར་དབང་འགྲོ་འདུལ་གླིང་པ་ཞེས༔ ཐུགས་ཀྱི་སྲས་ཤིག་ཁམས་ནས་འོང་༔ འགྲོ་བ་འདྲེན་པའི་སྐྱེས་བུ་དེས༔ ཏེ་སེའི་གངས་ནས་གཏེར་འདི་འདོན༔ འགྲོ་དོན་སྟོད་ཀྱི་ཕྱོགས་སུ་འབྱུང་༔ ཆོས་བདག་བུ་ལ་འཕྲོད་གྱུར་ན༔ བསྟན་པ་ཉི་མ་ཤར་བ་འདྲ༔ ཞེས་གསུངས་པ་རྣམས་བདག་མཚོ་རྒྱལ་གྱིས་ཡི་གེར་བཏབ་ནས༔ བདེ་མཆོག་འཁོར་ལོའི་ཆོས་སྐོར་དུ་ཏེ་སེའི་གངས་ལ་སྦས་པའོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ གནས་མཆོག་གངས་རིའི་རྒྱལ་པོ་ཏེ་སེའི་བདེ་ཆེན་གསང་བ་ཕུག་ནས་རིག་འཛིན་འགྲོ་འདུལ་གླིང་པས་བཏོན་པའོ། །མངྒ་ལཾ།། །།