འཇམ་དབྱངས་དཀར་པོའི་དབང་བཤད།
འཇམ་དབྱངས་དཀར་པོའི་དབང་བཤད་བཞུགས། ད་ལམ་ཁྱེད་རྣམས་ལ་མགོན་པོ་འཇམ་དཔལ་དབྱངས་དཀར་པོའི་དབང་བསྐུར་བའི་ཐོག་མར་ལོ་རྒྱུས་ཀྱི་རྣམ་པ་མདོ་ཙམ་ཞིག་བརྗོད་པར་བྱ་སྟེ། དེ་ཡང་ལྷག་པའི་ལྷ་ཆེན་པོ་འདི་ནི་སྐུ་གསུམ་གྱི་སངས་རྒྱས་རྣམས་དང་དབྱེར་མེད་པ་ཞིག་ཡིན་ཀྱང་། ཐུགས་བསྐྱེད་ཀྱི་སྨོན་ལམ་རྒྱ་ཆེ་བས། ཁམས་གསུམ་གྱི་འཁོར་བ་དོང་ནས་མ་སྤྲུགས་ཀྱི་བར་དུ་ས་བཅུའི་མགོན་པོའི་ཚུལ་དུ་བཞུགས་ནས་གང་འདུལ་གྱི་འཕྲིན་ལས་བསམ་གྱི་མི་ཁྱབ་པས་འགྲོ་བའི་སྐྱབས་དང་མགོན་མཛད་པའི་ཆེ་བའི་ཡོན་ཏན་ནི་རྡོ་རྗེའི་ལྗགས་དང་ལྡན་པས་ཀྱང་བརྗོད་པར་དཀའ་སྟེ། །ཇི་སྐད་དུ། སངས་རྒྱས་ཀུན་ལས་སྔར་སངས་རྒྱས། །མི་ཤེས་དྲི་མ་ཀུན་བཅོམ་པ། །མགོན་པོ་ས་བཅུའི་དབང་ཕྱུག་ཆེ། །ནམ་མཁའ་ཁྱབ་པར་གར་བྱེད་པ། །སྲིད་པའི་དྲ་བ་མ་ལུས་གཅོད། །ཅེས་སོ། །དེ་ལྟ་བུའི་ལྷག་པའི་ལྷ་དེའི་དབང་སྒྲུབ་ཐབས་ཀྱི་རིམ་པ་འདི་ཡང་། རྟོག་གེ་མཁན་སོགས་ཀྱི་འདོད་ཆོས་ཀྱིས་བསླད་པ་མ་ཡིན་ཞིང་ཆེ་བའི་ཡོན་ཏན་འདི་ལྟ་བུ་དང་ལྡན་པའི་སློབ་དཔོན་ཆེན་པོས་མཛད་པ་ཡིན། །ཇི་སྐད་དུ། ཆོས་དབྱིངས་གནས་སུ་ཀུན་ཏུ་བཟང་པོ་དང་༔ སྟུག་པོ་བཀོད་པར་རྡོ་རྗེ་འཆང་ཆེན་པོ༔ རྡོ་རྗེ་གདན་དུ་ཐུབ་པ་ཆེན་པོ་ཉིད༔ དབྱེར་མེད་པདྨ་ང་རུ་ལྷུན་གྱིས་གྲུབ༔ བདེ་བ་ཅན་ན་བདེ་གཤེགས་འོད་དཔག་མེད༔ རི་བོ་ཏ་ལར་མགོན་པོ་སྤྱན་རས་གཟིགས༔ དྷ་ན་ཀཽ་ཤར་བརྫུས་སྐྱེས་པདྨ་འབྱུང་༔ མཚོན་ཚུལ་ཙམ་ལ་གསུམ་དུ་སྣང་གྱུར་ཀྱང་༔ དོན་ལ་དབྱེར་མེད་སོ་སོ་ཐ་མི་དད༔ ཅེས་གསུངས་པས་རྒྱལ་བ་ཀུན་འདུས་ཀྱི་ངོ་བོ་གུ་རུ་རིན་པོ་ཆེ་པདྨ་འབྱུང་གནས་ཀྱིས་ཆོས་འཁོར་དཔལ་གྱི་བསམ་ཡས་མཆིམས་ཕུའི་དགེ་གོང་དུ་བླ་མ་བདེ་མཆོག་དབང་གི་འཁོར་ལོའི་སྨིན་གྲོལ་རྣམས་ལས་ལྡན་བོད་ཀྱི་རྗེ་འབངས་རྣམས་ལ་བཀའ་སྩལ་བའི་ཆ་ལག་ཏུ་གདམས་པ་ཟབ་མོ་འདི་མ་འོངས་དུས་ངན་གྱི་ཐ་མ་ལ་ཆོས་བཞིན་སྤྱོད་པའི་གང་ཟག་ཏུ་དགོངས་ལུང་འདི་ལྟར་གསུང་ནས་གནང་བ་སྟེ། ཇི་སྐད་དུ། མ་འོངས་བསྐལ་པའི་ཡང་མཐའ་ལ༔ ཆོས་སྒོར་ཞུགས་པའི་གང་ཟག་དང་༔ ལྷ་འདྲེ་མི་གསུམ་མི་དགེ་སྤྱོད༔ དེ་ཡི་དབང་གིས་གྲིབ་ཀྱིས་ནོན༔ ཆོས་དང་གང་ཟག་ཡ་བྲལ་ཏེ༔ རྒྱལ་བའི་བཀའ་ལ་གོ་བ་མེད༔ གསར་རྙིང་ཟེར་ཏེ་གྲུབ་མཐའ་རྩོད༔ བཀའ་གཏེར་ཟེར་ཏེ་ཁྱད་དུ་གསོད༔ ཤཱཀྱའི་བསྟན་པ་རྟགས་ཀྱིས་འཛིན༔ བཀའ་ལ་རས་གཅོད་གཟུ་ལུམ་བྱེད༔ གང་ཟག་བདག་འཛིན་ཆོས་དང་བསྲེ༔ ས་མིང་ཆོས་ཀྱི་གྲུབ་མཐའ་འཛིན༔ བྱང་སེམས་སྤྲུལ་པ་མང་འབྱུང་ཡང་༔ བདུད་སྤྲུལ་རྣམས་ཀྱིས་འཕུང་དཀྲུག་རྩོམ༔ དམ་སེལ་སློབ་དཔོན་སློབ་མས་བཀྲོང་༔ མེ་དགེའི་ལྟས་ངན་བོད་དུ་སྡང་༔ ཀྱེ་མ་བསྐལ་པའི་ཡང་མཐའ་ལ༔ ཆོས་དང་གང་ཟག་རྒྱལ་བསྟན་དོན༔ བཀའ་བསྟན་གོ་བས་ཉམས་ལེན་ཕྱིར༔ འཇམ་དཔལ་དཀར་པོའི་སྒྲུབ་ཐབས་དང་། ལག་ལེན་དབང་དང་གསུམ་དུ་ཕྱེ༔ བདག་གཞན་དོན་གཉིས་བསྒྲུབ་པའི་ཕྱིར༔ ལས་སྦྱོར་དག་དང་རྣམ་པ་བཞི༔ གནས་ཆེན་ཏེ་སེའི་གངས་ལ་སྦས༔ ཞེས་དང་། གཏེར་དེ་འབྱིན་པའི་དུས་དང་གང་ཟག་གི་ལུང་ཡང་། །ཇི་སྐད་དུ། མ་འོངས་རྩོད་ལྡན་ཡང་མཐའ་ལ༔ མི་རྣམས་བཞི་བཅུ་ཁ་རལ་ཏེ༔ སུམ་ཅུར་ཉེ་བའི་དུས་དག་ཏུ༔ གར་དབང་འགྲོ་འདུལ་གླིང་པ་ཞེས༔ ཐུགས་ཀྱི་སྲས་ཤིག་ཁམས་ནས་འོང་༔ འགྲོ་བ་འདྲེན་པའི་སྐྱེས་བུ་དེས༔ ཏེ་སེའི་གངས་ནས་གཏེར་འདི་འདོན༔ འགྲོ་དོན་སྟོད་ཀྱི་ཕྱོགས་སུ་འབྱུང་༔ ཆོས་བདག་བུ་ལ་འཕྲོད་གྱུར་ན༔ བསྟན་པ་ཉི་མ་ཤར་བ་འདྲ༔ ཞེས་གསུངས་པ་རྣམས་མཁའ་འགྲོ་ཡེ་ཤེས་མཚོ་རྒྱལ་གྱིས་མཁའ་འགྲོའི་ཡི་གེར་བཏབ་ནས་གནས་མཆོག་ཆེན་པོ་གངས་རིའི་རྒྱལ་པོ་ཏེ་སེའི་བདེ་ཆེན་གསང་བ་ཕུག་ཏུ་མཁའ་འགྲོའི་གསང་མཛོད་དུ་སྦས་པ། གུ་རུ་སངས་རྒྱས་གཉིས་པའི་ལུང་བསྟན་དུས་བབས་ལྟར་དུ་ཁམས་པ་ཉི་མ་གྲགས་པ་ཞེས་ཐུགས་རྗེ་ཆེན་པོའི་རྣམ་འཕྲུལ་རྡོ་རྗེ་ཕུར་བའི་གྲུབ་ཐོབ་ཀླུའི་དབང་པོའི་སྐྱེ་མཐའ། སངས་རྒྱས་སོ་བདུན་པ་དྲག་པོ་ཆེན་པོ་ཞེས་རྫོགས་པའི་སངས་རྒྱས་སུམ་ཅུ་རྩ་བདུན་གྱི་སྐུ་ཚེ་དང་མཛད་འཕྲིན་གཅིག་ཏུ་བསྡོམས་པའི་ཚད་ཀྱིས་མཁའ་མཉམ་གྱི་འགྲོ་བའི་དོན་མཛད་པར་ལུང་བསྟན་པའི་རྡོ་རྗེ་སློབ་དཔོན་དེ་ཉིད་ཀྱི་བཀའ་དྲིན་ལ་བརྟེན་ནས། བདག་གིས་ལེགས་པར་ཐོབ་པའི་དབང་ཞུ་བའི་དོན་དུ་གསོལ་བ་འདེབས་པ་སོགས་ནས་གཞུང་བཞིན་བསྐུར། ཅེས་པ་འདི་ཡང་བློ་གྲོས་རྒྱ་མཚོའི་དོན་དུ་བྲིས། །མངྒ་ལཾ།། །།