བརྒྱུད་འདེབས་བྱིན་རླབས་མྱུར་འཇུག
འཇམ་དབྱངས་དཀར་པོའི་བརྒྱུད་འདེབས་བྱིན་རླབས་མྱུར་འཇུག་ཞེས་བྱ་བ་བཞུགས། མཁྱེན་བརྩེའི་གཏེར་མཛོད་འཕགས་མཆོག་འཇམ་དཔལ་དབྱངས། །ངག་གི་འདོད་འཇོ་ཚངས་སྲས་དབྱངས་ཅན་མ། །སློབ་དཔོན་ཆེན་པོ་འཇམ་དཔལ་བཤེས་གཉེན་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ཐམས་ཅད་མཁྱེན་པ་བློ་ལྡན་མཆོག་སྲེད་དཔལ། །མཁའ་འགྲོའི་གཙོ་མོ་བདེ་ཆེན་རྒྱ་མཚོ་དང་། །སྐད་གཉིས་སྨྲ་བ་ལོ་ཆེན་ཀླུ་དབང་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ཟབ་གཏེར་སྒོ་འབྱེད་གར་དབང་འགྲོ་འདུལ་གླིང་། །རིགས་ཆོས་སྲས་ཀྱི་ཐུ་བོ་བསོད་ནམས་མཚན། །གང་དེས་རྗེས་བཟུང་བསྟན་པའི་རྒྱལ་མཚན་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །སྣོད་བཅུད་ཐམས་ཅད་འཇམ་དཔལ་དཀྱིལ་འཁོར་ལྷ། །གྲགས་པ་ཐམས་ཅད་གསུང་དབྱངས་དྲུག་ཅུའི་སྒྲ། །རྟོག་ཚོགས་ཐམས་ཅད་དག་པ་རང་གྲོལ་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །བཀའ་གསང་དམ་ཚིག་གཉེན་པོའི་བྱ་ར་བ། །ཡེངས་མེད་མེལ་ཚེས་ཆོས་ལྡན་བསྲུང་སྐྱོབ་ཞིང་། །འགལ་བྱེད་དུས་ཀྱི་ཆད་པས་རླག་མཛད་པར། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །རྩེ་གཅིག་ཤུགས་དྲག་མོས་པས་གསོལ་བཏབ་འབྲས། །བསྐལ་མང་སྦྱང་དཀའི་སྡིག་སྒྲིབ་ཉེས་ལྟུང་རྣམས། །བ་མོར་ཉིན་བྱེད་ཟེར་གྱིས་འཕོག་པ་བཞིན། །སྐད་ཅིག་ཉིད་ལ་བྱང་ཞིང་དག་གྱུར་ཅིག །མཆོག་དང་མྱུར་དང་བརྟན་པའི་ཤེས་རབ་དང་། །འཛིན་དང་གོ་ཡུལ་སྤོབས་པ་རྨད་བྱུང་བས། །ཇི་ལྟ་ཇི་སྙེད་ཤེས་བྱའི་གནས་རྣམས་ལ། །ཐོགས་མེད་སྤྱོད་པའི་རྣམ་དཔྱོད་མཆོག་གྲུབ་ཤོག །སྒྲ་ཚད་བཟོ་དང་གསོ་བ་ནང་རིག་པ། །སྐར་རྩིས་སྙན་ངག་མངོན་བརྗོད་སྡེབ་སྦྱོར་དང་། །ཟློས་གར་ལ་སོགས་བཅུ་ཕྲག་རིག་པའི་ལམ། །འཁྲུལ་མེད་ཁོང་དུ་ཆུད་པར་བྱིན་གྱིས་རློབས། །འཆད་རྩོད་རྩོམ་དང་ཐོས་བསམ་སྒོམ་པའི་ལས། །ཉིན་མཚན་གཡེལ་བ་མེད་པར་རབ་བརྩོན་ཞིང་། །མ་རྟོགས་ལོག་རྟོག་མེད་པ་རྣམ་དག་གིས། །རྒྱལ་བའི་བསྟན་པ་གསལ་བར་བྱེད་ནུས་ཤོག །མདོར་ན་གནས་སྐབས་མཐར་ཐུག་ཐམས་ཅད་དུ། །འཇམ་མགོན་ཁྱོད་ཀྱིས་བརྩེ་བས་རྗེས་འཛིན་ཞིང་། །བདག་གཞན་ཕན་བདེའི་རླབས་ཆེན་སྤྱོད་པ་ཡིས། །ལུས་ཅན་རྣམ་མཁྱེན་མཆོག་གི་གནས་ཐོབ་ཤོག །ཅེས་གཏེར་གསལ་འཇམ་དབྱངས་དཀར་པོའི་བརྒྱུད་འདེབས་སྨོན་ལམ་དང་བཅས་པ་འདི་ནི་ངག་དབང་མཆོག་ལྡན་དང་རྣམ་གྲོལ་སོགས་དོན་དུ་གཉེར་བ་དག་གིས་བསྐུར་བའི་ངོར། འཕགས་པ་འཇམ་དཔལ་ལ་མི་ཕྱེད་པའི་དད་པ་དང་ལྡན་པ་དཀོན་མཆོག་བློ་བཟང་དཔལ་འབར་སོགས་དུ་མའི་མིང་ཅན་གྱིས་སྦྱར་བའོ། །མངྒ་ལཾ།། །།