གཞོན་ནུ་ཆེན་པོ་རྩེ་གསུམ་པའི་སྐོར།
ལྷ་ཆེན་ལས་ཀྱི་ཧེ་རུ་ཀའི་སྒྲུབ་ཐབས།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ལྷ་ཆེན་ལས་ཀྱི་ཧེ་རུ་ཀའི་སྒྲུབ་ཐབས་བཞུགས༔ ལས་ཀྱི་ཧེ་རུ་ཀཿལ་འདུད༔ ཆོས་ལ་སྤྱོད་པའི་སྐལ་ལྡན་རྣམས༔ མི་ནག་སྐྱེ་བོས་བྲན་བཀོལ་ཞིང་༔ ཁ་ཉན་ཉམས་ཆུང་དབང་རྒུད་ན༔ ལས་ཀྱི་བདག་སྟེ་ལས་ཀྱི་རྒྱལ༔ ཆེ་དྲེགས་ལས་ཀྱི་ཧེ་རུ་ཀ༔ སྲིད་གསུམ་མངའ་བདག་ལྷ་ཆེན་གྱི༔ སྒྲུབ་ཐབས་འདི་བཞིན་ཉམས་སུ་ལོངས༔ ས་མ་ཡཱ༔ རྒྱ༔ དེ་ཡང་ལས་མཛད་གར་གྱི་ཧེ་རུ་ཀཿ འདི་སྒྲུབ་པའི་ཐབས་བསྟན་པ་དོན་གསུམ་སྟེ༔ སྔོན་འགྲོ་དངོས་གཞི་རྗེས་སོ༔ དང་པོ་སྔོན་དུ་འགྲོ་བ་ལ་གསུམ་སྟེ༔ ཕྱི་གནས་ཀྱི་སྟ་གོན༔ ནང་ཡོ་བྱད་ཀྱི་སྟ་གོན༔ གསང་བ་སྒྲུབ་རྫས་སྟ་གོན་ནོ༔ ས་མ་ཡཱ༔ རྒྱ༔ དང་པོ་ཕྱི་གནས་ཀྱི་སྟ་གོན་ནི༔ སྐར་མ་རྒྱལ་ལ་བབས་པའི་ཉིན་པར༔ ཏེ་སེ་དང་ཙ་རི་ལྟ་བུ་ལྷ་ཆེན་ཡབ་ཡུམ་གྱི་གནས་སམ༔ ཡང་ན་ཁ་ནུབ་ཕྱོགས་ལ་བལྟ་བ༔ ས་མདོག་དམར་ཞིང་མེ་ཏོག་ཀྱང་དམར་པོ་སྐྱེ་བའི་གླིང་༔ ཆུ་བོ་དབང་གི་ཕྱོགས་ནས་འབབ་པ༔ གནམ་ས་ཡང་ཟླ་གམ་གྱི་ཚུལ་དུ་གྲུབ་པ༔ གངས་རི་བརྟན་ཆགས་ལ་མགུལ་ལྷ་དང་དགེ་བསྙེན་གང་རིགས་གནས་པ༔ ཐ་མ་ན་བྲག་རི་ལ་སྨན་མོ་མང་པོ་གནས་པ༔ རི་ལ་ཆུ་འབབ་མང་ཞིང་ཀླུ་ས་ཆེ་བ༔ ན་ཐང་དང་སྤ་མ་སོགས་ནགས་ཚལ་རྒྱས་པ༔ མཚོ་ལ་མཚོ་སྨན་གྱི་ཕོ་བྲང་ཡོད་ངེས་པ་དེ་ལྟ་བུ་ཞིག་གལ་ཆེའོ༔ གཉིས་པ་ནང་ཡོ་བྱད་གྱི་སྟ་གོན་ནི༔ ཁམས་ཀྱི་མཐུན་རྐྱེན་སོགས་དང་ཚོགས་ཀྱི་འཁོར་ལོའི་རྫས་སོགས་ཚོགས་པར་བསག་གོ༔ གསུམ་པ་གསང་བ་སྒྲུབ་རྫས་ཀྱི་སྟ་གོན་ནི༔ ཡིག་ཆུང་ལྟར་བླ་རྡོ་ལ་གང་དགོས་དང་༔ ལས་སྦྱོར་ལྟར་སྐབས་སུ་གང་ལ་དམིགས་པའི་རྫས་རྣམས་མ་ཚང་བ་མེད་པར་བསྒྲུབ་པར་བྱའོ༔ ས་མ་ཡཱ༔ རྒྱ༔ གཉིས་པ་དངོས་གཞི་སྒྲུབ་པའི་རིམ་པ་ལ་གཉིས་ཏེ༔ ལྷ་བསྐྱེད་པ་དང་བསྙེན་སྒྲུབ་ཀྱི་རིམ་པའོ༔ ས་མ་ཡཱ༔ རྒྱ༔ དང་པོ་ལྷ་བསྐྱེད་པ་ནི༔ འཁོར་འདས་ཀྱི་ཆོས་ཐམས་ཅད་སྟོང་ཞིང་བདག་མེད་པ་ཞིག་ཏུ་བསྒོམ༔ སྟོང་པའི་ངང་ལས་ཡི་གེ་ཧྲཱིཿཞིག་རང་བྱུང་དུ་ཤར༔ ཧྲཱིཿདེ་ལས་སྒྲ་རང་བྱུང་གི་ཧྲཱིཿཧྲཱིཿ ཞེས་ཡོངས་སུ་འབྲུག་སྟོང་ལྡིར་བ་ཙམ་དུ་གྲགས་པས༔ སྲིད་པའི་རྩེ་མོ་དང་མནར་མེད་ཀྱི་ཁམས་ཐམས་ཅད་ཡོངས་སུ་ཁྱབ༔ དེའི་སྟོབས་ཀྱིས་འཁོར་འདས་ཐམས་ཅད་འཁྱོམ་རབ་ཏུ་འཁྱོམཿ འུར་རབ་ཏུ་འུརཿ ལྡེག་རབ་ཏུ་ལྡེག༔ འབར་རབ་ཏུ་འབར༔ འཚེག་རབ་ཏུ་འཚེགས༔ འཁྲུག་རབ་ཏུ་འཁྲུགས་པས་ལས༔ ཧྲཱིཿཡིག་དེ་ལས་འོད་ལྔ་ལྡན་ཚ་ལ་མྱུར་བ་མང་པོ་ཕྱོགས་བཅུར་འཕྲོས༔ འཁོར་འདས་ཐམས་ཅད་ཀྱི་ནུས་སྟོབས་དང་ཡོན་ཏན་ཐམས་ཅད་སྐད་ཅིག་གི་དབང་དུ་རྡོ་ཁབ་ལེན་གྱིས་ལྕགས་ཕྱེ་བླངས་པ་ལྟར་འུབས་ཀྱིས་བསྡུས༔ ས་བོན་ལ་གཉིས་སུ་མེད་པར་ཐིམ༔ གཟི་བརྗིད་དང་འོད་ཟེར་རབ་ཏུ་འཁྲུག་ཅིང་སྐད་ཅིག་གིས་གནས་གྱུར་ཏེ༔ ཟླ་གམ་དམར་པོ་དབང་གི་ཕོ་བྲང་གི་དབུས་སུ་རྟ་བདུན་རླུང་གི་ད་ལ་རབ་ཏུ་འཁྲུག་པའི་ཀློང་དཀྱིལ་དུ༔ ཐབས་ཤེས་ཉི་ཟླ་གའུ་ཁ་སྦྱོར་གྱི་གདན་སྟེང་དུ༔ རང་རིག་སྣང་བའི་ངོ་བོ་ལས་ཀྱི་ཧེ་རུ་ཀ༔ ལྷ་ཆེན་པོ་སྐུ་མདོག་བྱི་རུའི་སྡོང་པོ་ལ་ཏིལ་གྱི་མར་ཁུས་བྱུགས་པ་ལྟར་རབ་ཏུ་དམར་བའི་མདངས་དང་ལྡན་པའི་ཞལ་གཅིག་ཅུང་ཟད་ཁྲོས་པ་ལ་འཛུམ་པའི་ཉམས་ཅན༔ རལ་པ་སྨུག་ནག་གྱེན་དུ་འབར་ཞིང་རིན་པོ་ཆེའི་རྩེ་བྲན་གྱིས་བརྒྱན་པ༔ ཕྱག་གཡས་ཁ་ཊྲཱཾ་ནམ་མཁའ་ལ་འཕྱར་ཞིང་གཡོན་ལྕགས་ཀྱུ་བསྣམས་པས་ཡུམ་ལ་འཁྱུད་པ༔ ཞབས་གཉིས་དོར་སྟབས་སུ་འགྱིང་བ༔ གཅེར་བུ་རབ་ཏུ་སྒེག་པའི་ཉམས་དང་ལྡན་པའི་པང་དུ༔ སྟོང་པའི་རང་རྩལ་ཡུམ་མཆོག་ཨུ་མ་དྷེ་ཝ་དམར་མོ་ཞལ་གཅིག་ཕྱག་གཉིས་གཡས་སྣང་སྲིད་གསལ་བའི་མེ་ལོང་འཛིན་ཞིང་ཡབ་ལ་འཁྱུད་པ༔ གཡོན་ཉི་མའི་དཀྱིལ་འཁོར་འོད་ཟེར་སྟོང་ལྡན་འབར་བ་བསྣམས་པ༔ ཞབས་གཉིས་གཡས་བརྐྱང་ཞིང་གཡོན་ཡབ་ལ་འཁྲིལ་བ༔ བདེ་བའི་ཉམས་དང་ལྡན་པ་དབུ་སྐྲ་སིལ་མ་སྐུ་རྒྱབ་ཏུ་འཕྱང་བ༔ ནུ་མ་བྷ་ག་ལང་ཚོ་རབ་ཏུ་རྒྱས་པ་ཟུང་འཇུག་ཏུ་འཁྲིལ་བའི་སྤྱི་བོར་རིགས་ཀྱི་བདག་པོ་བདག་ཉིད་ཐོད་པ་རྩལ་སྨུག་ནག་ཞལ་གཅིག་ཕྱག་གཉིས་སྤྱན་གསུམ་སྡང་མིག་ཏུ་བལྟ་བ༔ སྙན་ལ་དུང་གི་ཝལ་མིག་གིས་བརྒྱན་པ༔ གཡས་སེང་ལྡིང་གི་ཌཱ་མ་རུ་ནམ་མཁའ་ལ་འཁྲོལ་བ༔ གཡོན་མི་རྐང་གི་གླིང་བུ་འབུད་པ༔ རལ་པའི་ཐོད་བཅིངས་པ༔ རུས་པའི་རྒྱན་བཏགས་པ༔ དཔའ་བོ་སྟག་གི་ཤམ་ཐབས་གསོལ་བ༔ ཞབས་གཉིས་གར་སྟབས་སུ་འཁྲབ་པ༔ གཟི་བརྗིད་དང་ལྡན་པ་ཞིག་ཏུ་བསྒོམ༔ ལྷ་ཆེན་པོའི་ཐུགས་ཀར་པདྨ་དབང་གི་རྒྱལ་པོ་ཞལ་གཅིག་ཁྲོས་པའི་ཉམས་ལྡན་སྤྱན་གསུམ་བགྲད་པ༔ ཕྱག་གཡས་རྡོ་རྗེ་གཡོན་དྲིལ་བུ་བསྣམས་པ༔ ཞབས་གཉིས་དོར་སྟབས་སུ་འགྱིང་བ༔ དམར་ལ་སྨུག་པའི་མདངས་ཅན་རལ་པའི་ཁྲོད་ནས་དབང་ཆེན་རྟ་དབུ་ལྗང་ཞུར་འཚེར་བ་ཞིག་ཏུ་བསྒོམ༔ ཡུམ་གྱི་ཐུགས་ཀར་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་གྲི་ཐོད་ཅན་སྤྱན་གསུམ་བགྲད་ཅིང་མཆེ་བ་གཙིགས་པ༔ ལང་ཚོ་རབ་ཏུ་རྒྱས་པས་བདེ་བའི་ཆུ་རྒྱུན་འཕྲུག་པ༔ གཅེར་བུ་སྤྱི་བོ་ནས་ཕག་ཞལ་མཐིང་ནག་ངུར་སྒྲ་འབྱིན་པ༔ ཡབ་ཡུམ་གཉིས་མེད་རང་སྣང་གི་དབྱིངས་སུ་འདུ་འབྲལ་མེད་པར་འཁྲིལ་བ༔ གཅེར་བུ་མདངས་དང་ལྡན་པར་བསྒོམ༔ དེ་ལྟར་ཟླ་གམ་ཕོ་བྲང་དབང་གི་གཞལ་ཡས་ཀྱི་དབུས་སུ་འོད་ཟེར་དམར་པོ་འཁྱིལ་བའི་ཀློང་དུ༔ ལྷ་ཆེན་པོ་ཡབ་ཡུམ་ཟུང་འཇུག་ཏུ་བཞུགས་པའི་ཕྱི་རོལ་ཕྱོགས་བཞིར་འཁོར་ལོ་རྩིབས་བཞིའི་སྟེང་དུ་མུ་སྟེགས་ཀྱི་དྷཀྐི་སྡེ་བཞི་དཀར་སེར་དམར་ལྗང་བཞིའིི་མདོག་ཅན་གཡས་ཐམས་ཅད་ན་ཁ་ཊྲཱཾ་འཕྱར་བ༔ གཡོན་ཐམས་ཅད་ན་ཞགས་པ་ཐོགས་པ༔ ཞབས་ཐམས་ཅད་བརྐྱང་བསྐུམ་གར་སྟབས་ཅན༔ གཅེར་བུ་ལང་ཚོ་རྒྱས་ཤིང་སྐྲ་སིལ་བུར་འཕྱོ་བ༔ རང་རང་ལ་འོད་ཟེར་དཔག་མེད་འབར་བའི་ཀློང་དུ་བཞུགས་པར་བསྐྱེད༔ ཟླ་གམ་དབང་གི་ཕོ་བྲང་གི་ཕྱི་རོལ་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི་སྒོ་བཞི་དང་ལྡན་པའི་ཤར་སྒོར་རྒྱལ་པོ་ཆེན་པོ་ཡུལ་འཁོར་སྲུང་༔ ལྷོ་སྒོར་འཕགས་སྐྱེས་པོ༔ ནུབ་སྒོར་མིག་མི་བཟང་༔ བྱང་སྒོར་རྣམ་ཐོས་སྲས་བཞི་པོ་ཡང་སྐུ་མདོག་དཀར་སྔོ་དམར་སེར་དུ་འབར་བ༔ རང་རྟགས་ཀྱི་ཕྱག་རྒྱ་ཅན༔ གོ་ཁྲབ་དང་བཅས་ཞབས་སྟངས་སྟབས་སུ་བསྒྱུར་ཞིང་བཀའ་ཉན་འཕྲིན་ལས་བཞི་ཐོགས་མེད་དུ་བསྒྲུབ་པའི་ཚུལ་དུ་གསལ་ཞིང་༔ སྤྱན་འདྲེན་བཞུགས་གསོལ་མཆོད་བསྟོད་ལ་སོགས་བྱའོ༔ གཉིས་པ་བསྙེན་སྒྲུབ་ཀྱི་རིམ་པ་ནི༔ བདག་བསྐྱེད་སྒྲུབ་པའི་བླ་རྡོ་དང་བཅས་པ་ཐམས་ཅད་སྣང་སྟོང་འགག་མེད་ཀྱི་རོལ་པ་ལས༔ བསྐྱེད་རིམ་ལྷ་ཡི་ཏིང་འཛིན་དེ་ལྟར་གསལ་བའི་པདྨ་དབང་ཆེན་གྱི་ཐུགས་ཀར་ཉི་དཀྱིལ་གྱི་སྟེང་དུ༔ ཡེ་ཤེས་རང་བྱུང་གི་ངོ་བོ་རྡོ་རྗེེ་ལྔ་པ་ནས་འབྲས་ཙམ་གྱེན་དུ་ལངས་པའི་ཁོང་གསེང་དུ་ལྷ་ཆེན་པོའི་ཐུགས་སྲོག་ཧྲཱིཿདམར་པོ་ཚེག་དྲག་དང་ལྡན་པ་ཞིག་གསལ༔ ཡེ་ཤེས་ཀྱི་རྡོ་རྗེ་ལས་འོད་དམར་པོ་སྟེང་གི་ཕྱོགས་སུ་འཕྲོས་པས་རིགས་བདག་གི་ཐུགས་ཀར་ཕོག༔ ཐུགས་དམ་གྱི་རྒྱུད་བསྐུལ༔ དེའི་ཐུགས་ཀའི་ས་བོན་ཧྲཱིཿཡིག་ལས་འོད་ཟེར་སྐར་མདའ་ཆད་པ་ལྟར་སྲིད་པའི་རྩེ་མོར་འཕྲོས་པས༔ ལྷ་ཆེན་པོ་ཡབ་ཡུམ་གྱིས་གནས་གསུམ་ལ་ཕོག༔ འོད་ཟེར་གྱི་གཟི་བརྗིད་མ་བཟོད་ནས་ལྷུང་ཐབས་ཀྱི་ངང་ནས་ལམ་གྱིས་བྱོན༔ བསྐྱེད་པ་རྣམས་ལ་ཐིམ༔ སླར་ཡང་རིགས་བདག་གི་གནས་གསུམ་ལས་འོད་ཟེར་དཔག་ཏུ་མེད་པ་ཕྱོགས་བཅུར་འཕྲོས༔ སྐུ་གསུམ་གྱི་སངས་རྒྱས༔ དུས་གསུམ་གྱི་བླ་མ་ཡེ་ཤེས་ལྔའི་ནུས་སྟོབས་ཐམས་ཅད་བསྡུས་ནས༔ བདག་བསྐྱེད་དང་སྒྲུབ་རྫས་རྣམས་ལྷར་གསལ་བ་ལ་ཐིམ༔ ཐུགས་རྗེ་དང་ཡེ་ཤེས་ཀྱི་གཟི་འོད་འབར༔ བླ་མ་དང་སློབ་དཔོན་ཐམས་ཅད་རང་གི་དབང་དུ་གྱུར༔ ཡི་དམ་དབང་ཆེན་ཡབ་ཡུམ་གྱི་གནས་གསུམ་ལས་འོད་ཟེར་འཕྲོས་ཤིང་རྟ་སྐད་དང་ཕག་སྐད་ལྡིར་བས༔ ཡེ་ཤེས་ཀྱི་ལྷ་ཚོགས་ཕོ་རྒྱུད་མོ་རྒྱུད་ཐམས་ཅད་རང་དབང་མེད་པར་དབང་དུ་བསྡུས༔ གཉིས་སུ་མེད་པར་ཐིམ་པས་མཆོག་གི་དངོས་གྲུབ་རྣམས་མངོན་དུ་གྱུར༔ སླར་ལྷ་ཆེན་པོ་ཡབ་ཡུམ་གཉིས་ཀྱི་ཐུགས་ཀའི་ས་བོན་སྔགས་འབྲུ་འཁོར་བཀའ་སྡོད་དང་བཅས་པ་ཐམས་ཅད་ལས་འོད་ཟེར་སྟོང་གསུམ་གྱི་སྟོང་ཆེན་པོ་ཡོངས་སུ་ཁྱབ་པར་འཕྲོས༔ ལྕགས་ཀྱུའི་རྣམ་པའི་འོད་ཟེར་གྱིས་གསེར་དངུལ་ཟངས་ལྕགས་མུ་ཏིག་བྱི་རུ་སྤོས་ཤེལ་མེན་ཤེལ་ཆུ་ཤེལ་སོགས་ཀྱི་ནོར་གྱི་དངོས་པོ་འབྲུ་སྣ་སྣ་ཚོགས༔ དར་ཟབ་མཁོ་དགུའི་ཡོ་བྱད་རྣམས་བསྡུས༔ ཞགས་པའི་རྣམ་པ་དཔག་ཏུ་མེད་པས་འགྲོ་བ་ལྷ་མི་གཟུགས་ཅན་གཟུགས་མེད་ཐམས་ཅད་ཤིང་ལོ་སྐམ་པོ་རླུང་གིས་དེད་པ་ལྟར་རང་དབང་མེད་པར་སྐད་ཅིག་གིས་བཀུག༔ ལྕགས་སྒྲོག་གི་རྣམ་པའི་འོད་ཟེར་དཔག་ཏུ་མེད་པས༔ ལྷ་འདྲེ་མི་གསུམ་གྱི་ཆེ་བཙན་དྲེགས་པ་ཅན་དེ་ཐམས་ཅད་བཀའ་ཉན་གསུང་སྡོད་བྲན་དང་ཕོ་ཉར་བཀོལ་ཕྱིར་རང་དབང་དུ་འདུས་པར་བཅིངས༔ དྲིལ་བུའི་རྣམ་པའི་འོད་ཟེར་དཔག་ཏུ་མེད་པས་དེ་རྣམས་ཀྱི་ཚོར་བ་དང་ང་རྒྱལ་གྱི་ཕུང་པོ་རབ་ཏུ་མྱོས་སུ་བཅུག་ནས༔ རང་གིས་ཅི་བཅོལ་བའི་བྲན་དང་ཡང་བྲན་དུ་བསྒོམ་ཞིང་༔ ཡེ་ཤེས་ཀྱི་ལྷ་དབང་ཆེན་ཡབ་ཡུམ༔ འཇིག་རྟེན་གྱི་ལྷ་ལས་ཀྱི་ཧེ་རུ་ཀཿཡབ་ཡུམ༔ སངས་རྒྱས་ཀུན་འདུས་ཀྱི་ངོ་བོ་བདག་ཉིད་ཐོད་པ་རྩལ༔ ཡོན་ཏན་འགགས་མེད་ཀྱི་རང་མདངས་མཁའ་འགྲོ་སྡེ་བཞི༔ འཕྲིན་ལས་རབ་འབྱམས་ཀྱི་སྣང་ཚུལ་རྒྱལ་པོ་བཞི་བཀའ་ཉན་དང་བཅས་པ་ཐམས་ཅད་ཀྱི་ཞལ་ནས༔ གསང་བའི་ཡང་སྙིང་བསྙེན་སྒྲུབ་ཆིག་དྲིལ་དུ་བསྟན་པའི་སྔགས་སྒྲ་བུང་བ་ཚང་ཞིག་པའི་སྒྲ་ལྟར་ཟིང་ལྷོང་ལྷོང་དུ་ཡོད་པར་བསམས་ཤིང་ཡང་སྙིང་འདི་མི་ཚིག་གིས་བར་མ་ཆོད་པར་ཞག་བདུན་བཟླ་བར་བྱའོ༔ ཧྲཱིཿཧྲཱིཿམཉྫུ་ཀུག་ཏ་མ་ཧཱ་དྷེ་ཝ་ཀ་བྷི་ར་ཀོ་བྷི་ར་ཨ་ཀར་ཤ་ཡ་ཧྲིང་ཧྲིང་ཛཿཛཿ འདི་བསྙེན་སྒྲུབ་ཀྱི་རྩ་བསྙེན་ཡིན༔ བཛྲ་རཏྣ་པདྨ་ཀརྨ་སིདྡྷི་ཧཱུྃ༔ ཨ་ཏྲི་ནྲི་སརྦ་ཛཿཁམས་གསུམ་ཀུན་གྱི་སྙིང་བསྒུལ༔ འགྲམ་ཆོག༔ སེམས་དཀྲུགས༔ ན་ན་ཁ་དྷེ་པུཥྟིཾ་ཀུ་རུ་ཡེ་སྭཱ་ཧཱཿ འདི་རྣམས་ལས་སྦྱོར་ཡོངས་རྫོགས་སོ༔ འདི་ལྟར་ཞག་བདུན་བསྒྲུབས་པ་ཡིས༔ སྲིད་པ་འཁྲུག་ཅིང་ས་རྡོ་འཕར༔ ཉི་ཟླའི་ཟེར་འཕྲོ་འབྱུང་བཞི་གཡོ༔ གྲགས་པས་འཇིག་རྟེན་ས་སྟེང་ཁྱབ༔ ལྷ་འདྲེ་མ་ལུས་བཀའ་ཉན་བྱེད༔ མགོ་ནག་འགྲོ་བ་བྲན་དུ་ཁོལ༔ ལྷ་རྣམས་ཐམས་ཅད་གྲོགས་སུ་འགྱུར༔ འདྲེ་ངན་ཐམས་ཅད་སྐད་ངན་འབྱིན༔ རྟགས་ནི་རབ་དངོས་འབྲིང་ཉམས་དང་༔ ཐ་ན་རྨི་ལམ་ལ་སོགས་སུ༔ བསྐྱེད་རིམ་དམིགས་པ་དང་མཚུངས་ལྟར༔ ཉི་ཟླར་ཞོན་དང་གླིང་བཞི་བསྐོར༔ རྒྱ་མཚོ་རྔུབ་དང་རི་རབ་འདེགས༔ དབང་བསྡུས་ཟིལ་མནན་བཀའ་བསྒོས་ཉན༔ ལྕགས་ཀྱུ་ཁ་ཊྭཱཾ་ཞགས་པ་རྙེད༔ དེ་ལ་སོགས་པའི་རྟགས་རྣམས་འབྱུང་༔ བསྙེན་སྒྲུབ་ཞག་གྲངས་རྫོགས་ན་ཡང་༔ རྟགས་ཀྱི་རིམ་པ་མ་གསལ་ན༔ ཐེངས་གསུམ་ལྔ་བདུན་དགུ་ལ་སོགས༔ ཡང་ཡང་བསྐྱར་ཞིང་རྟགས་རྫོགས་ཚེ༔ གང་འདོད་ལས་སྦྱོར་སྔགས་དམིགས་རྣམས༔ ཤེས་རབ་རིག་པས་ཟུར་གསལ་བལྟ༔ བརྩམས་པའི་འཕྲིན་ལས་མ་གྲུབ་ན༔ པདྨ་འབྱུང་གནས་མ་ཤེས་འཁྲུལ༔ དེ་ཕྱིར་ཐེ་ཚོམ་ཡིད་གཉིས་སྤོངས༔ བརྩོན་འགྲུས་ལྡན་པས་ཉམས་སུ་ལོངས༔ ས་མ་ཡཱ༔ རྒྱ༔ གསུམ་པ་རྗེས་ཀྱི་རིམ་པ་དམ་ཚིག་བསྟན་པ་ལ་དྲུག་སྟེ༔ ལྷ་ཆེན་གྱི་སྐུ་ཡི་དམ་ཚིག་ཏུ་ཉིན་ཞག་ཕྲུགས་རེ་ལ་བསྐྱེད་རིམ་ཐུན་རེ་གསལ་ཞིང་༔ བསྙེན་པ་བརྒྱ་སྟོང་གང་བྱུང་རེ་མ་ཆགས་པར་བྱའོ༔ གསུང་གི་དམ་ཚིག་ཏུ་སྒྲུབ་ཡིག་བཅང་ཞིང་ཕ་རོལ་ལ་གསང་རྒྱ་རབ་ཏུ་བསྡམ་མོ༔ ཐུགས་ཀྱི་དམ་ཚིག་ཏུ་བླ་རྡོ་དང་མ་བྲལ་བར་བྱའོ༔ ཡོན་ཏན་གྱི་དམ་ཚིག་ཏུ་ཕྱག་མཚན་འཆང་༔ འཕྲིན་ལས་ཀྱི་དམ་ཚིག་ཏུ་ཚོགས་གཏོར་ནར་མའམ་ཉ་ཆེན་ལ་གསོལ་མཆོད་འབུངས༔ ཡོངས་རྫོགས་ཀྱི་དམ་ཚིག་ཏུ་ལོངས་སྤྱོད་ཐམས་ཅད་ཆ་གཅིག་བླ་མ་ལ༔ ཆ་གཅིག་སྦྱིན་པ༔ ཆ་གཅིག་རང་གིས་ལོངས་སྤྱོད་དོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གསང་རྒྱ༔ དམ་རྒྱ༔ གཏད་རྒྱ༔ གཉན་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་ཁམས་པ་ཉི་མ་གྲགས་པས་གནས་མཆོག་ཆེན་པོ་གངས་རིའི་རྒྱལ་པོ་ཏེ་སེ་ནས་ཤིང་མོ་ཡོས་ལོ་ལ་གདན་དྲངས་ཤིང་ལྕགས་ཕོ་སྤྲེལ་གྱི་ལོ་ལ་ཤོག་སེར་ལས་ཕབ་པའོ། །མངྒཱ་ལཾ།། །།
བསྙེན་སྒྲུབ་ལས་གསུམ་གྱི་ཁ་སྐོང་མཆོད་བསྟོད་ཀྱི་ཆོ་ག
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ལྷ་ཆེན་དབང་ཕྱུག་ཆེན་པོའི་བསྙེན་སྒྲུབ་ལས་གསུམ་གྱི་ཁ་སྐོང་མཆོད་བསྟོད་ཀྱི་ཆོ་ག་བཞུགས༔ ལས་མཛད་ཧེ་རུ་ཀཿལ་བསྟོད༔ དམ་ཚིག་ཆོས་ལྡན་སྐྱེས་བུ་ཡིས༔ ལོ་ཀ་ཆོས་ལ་དབང་བསྒྱུར་ཕྱིར༔ ཆགས་པས་རྗེས་ཆགས་དབང་མཛད་ལྷ༔ སྒྲུབ་པ་ལས་སྦྱོར་སྨིན་བྱེད་དབང་༔ ཀུན་གྱི་སྤྱི་ཆིངས་འདི་ལྟར་སྤྱོད༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ དེ་ལ་འཕྲིན་ལས་ཐམས་ཅད་ཀྱི་ཁ་སྐོང་བསྙེན་སྒྲུབ་ཀྱི་ལྡེ་མིག་མཆོད་བསྟོད་ཀྱི་ཆོ་ག་སྟོན་པ་འདི་ལ་དོན་གསུམ་སྟེ༔ སྔོན་དུ་འགྲོ་བ་དང་དངོས་གཞི་རྗེས་སོ༔ དང་པོ་སྔོན་དུ་འགྲོ་བ་ལ་ལྔ་སྟེ༔ བཀའ་བསྒོ་བ༔ མཚམས་གཅོད་པ༔ སྐྱབས་སུ་འགྲོ་བ༔ སེམས་བསྐྱེད་པ༔ མཆོད་རྫས་བྱིན་གྱིས་བརླབ་པའོ༔ ས་མ་ཡཱ༔ རྒྱ༔ དང་པོ་བཀའ་བསྒོ་བ་ནི༔ ཧཱུྃ༔ བདག་ཉིད་ལས་ཀྱི་ཧེ་རུ་ཀ༔ རྩ་གསུམ་དབང་གི་དཀྱིལ་འཁོར་འདིར༔ འདུ་བའི་རིགས་རྣམས་མ་གཏོགས་པ༔ དམ་མེད་ལོག་ལྟ་གདོན་གྱི་ཚོགས༔ ཆངས་བུའི་གཏོར་མ་འདི་ཁྱེར་ལ༔ སྐད་ཅིག་ཉིད་ལ་ཕྱིར་དེངས་ཤིག༔ ཧྲཱིཿབཛྲ་དྷཀྐི་ནི་མ་ཧཱ་དྷེ་ཝ་ཤྲཱི་ཧེ་རུ་ཀ་ཧཱུྃ༔ ཨུ་ཙ་ཡ་བྷིདྱ་རཱ་ཛ་ཡ་ཕཊ༔ གཉིས་པ་མཚམས་གཅོད་པ་ནི༔ ཧཱུྃ༔ མ་ཧཱ་དྷེ་ཝ་དབང་ཆེན་ཐུགས་ཀ་ནས༔ འོད་ཟེར་འཕྲོ་འདུས་སྟེང་འོག་ཕྱོགས་མཚམས་ཁྱབ༔ བསྲུང་བའི་འཁོར་ལོས་བར་མཚམས་མེད་པར་བལྟམས༔ འབྱུང་པོ་གདོན་བགེགས་ནམ་ཡང་མ་འདའ་ཞིག༔ ཧྲཱིཿབཛྲ་དྷཀྐི་ནི་མ་ཧཱ་དྷེ་ཝ་ཤྲཱི་ཧེ་རུ་ཀཿཛྭ་ལ་རཾ་རཾ་རཀྵ་ཧཱུྃ༔ གསུམ་པ་སྐྱབས་སུ་འགྲོ་བ་ནི༔ ཧཱུྃ༔ བརྒྱུད་པ་ཀུན་འདུས་ཐོད་ཕྲེང་རྩལ༔ དཔལ་ཆེན་པདྨ་རྟ་མགྲིན་དབང་༔ རྡོ་རྗེ་ཕག་མོ་ཡུམ་དང་བཅས༔ མ་ཧཱ་དྷེ་ཝ་ཡབ་ཡུམ་ལ༔ དངོས་གྲུབ་དོན་དུ་སྐྱབས་སུ་མཆི༔ བཞི་པ་སེམས་བསྐྱེད་པ་ནི༔ ཧཱུྃ༔ སངས་རྒྱས་བསྟན་དང་འགྲོ་བའི་དོན༔ བྱང་ཆུབ་དམ་པར་སེམས་བསྐྱེད་དེ༔ དབང་མཛད་ལྷ་ཡི་ཏིང་འཛིན་གྱིས༔ འགྲོ་རྣམས་སྒྲོལ་བར་དམ་བཅའ་འོ༔ ལྔ་པ་མཆོད་པ་བྱིན་གྱིས་བརླབ་པ་ནི༔ ཧཱུྃ༔ ལྷ་ཆེན་དབང་གི་ཐུགས་ཀ་ནས༔ འོད་ཟེར་འཕྲོས་པའི་ཆོ་འཕྲུལ་གྱིས༔ མཆོད་པའི་མ་དག་འབགས་ཚོགས་སྦྱངས༔ འདོད་ཡོད་སྤྲིན་ཕུང་བདུད་རྩིར་བསྒྱུར༔ ཨཱོཾ་ཨཱཿཧཱུྃ་སརྦ་ཛྙཱ་ན་པུཥྩ་ས་མ་ཡེ་སྭཱ་ཧཱ༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་དངོས་གཞིའི་རིམ་པ་ལ་བདུན་ཏེ༔ གཞལ་ཡས་བསྐྱེད་པ༔ ལྷ་བསྐྱེད་པ༔ སྤྱན་འདྲེན་པ༔ བཞུགས་སུ་གསོལ་བ༔ ཕྱག་འཚལ་བ༔ མཆོད་པ་འབུལ་བ༔ བསྟོད་པ་བྱ་བའོ༔ ས་མ་ཡཱ༔ རྒྱ་རྒྱ་རྒྱ༔ དང་པོ་གཞལ་ཡས་ཁང་བསྐྱེད་པ་ནི༔ ཧཱུྃ༔ གཟུགས་སྣང་སྟོང་པའི་ངང་ཉིད་ལས༔ དབང་ཆེན་ཕོ་བྲང་མུ་ཁྱུད་རྩིབས༔ སྒོ་གྲུ་རྟ་བབས་གདུགས་ཏོག་མཛེས༔ སྣ་ཚོགས་རིན་ཆེན་གཞལ་ཡས་ཁང་༔ རྒྱན་བཀོད་ཡིད་འོང་ལྟ་ན་སྡུག༔ ཧྲཱིཿབྷྲཱུྃ་ཛྙཱ་ན་མཎྜལ་བྷྲཱུྃ༔ གཉིས་པ་ལྷ་བསྐྱེད་པ་ནི༔ ཧཱུྃ༔ ཕོ་བྲང་ཟླ་གམ་དབང་ཆེན་ཀློང་༔ ཐུགས་སྲོག་ཧྲཱིཿཡིག་འཕྲོ་འདུ་ལས༔ རྟ་བདུན་རླུང་གི་ད་ལའི་དཀྱིལ༔ ཐབས་ཤེས་གའུ་ཁ་སྦྱོར་སྟེང་༔ བདག་ཉིད་ལས་ཀྱི་ཧེ་རུ་ཀ༔ སྐུ་མདོག་དམར་པོ་གཟི་བརྗིད་འབར༔ ཞལ་གཅིག་ཕྱག་གཉིས་དོར་སྟབས་བཞུགས༔ ཕྱག་གཡས་རྩེ་གསུམ་ནམ་མཁར་འཕྱར༔ ཕྱག་གཡོན་ལྕགས་ཀྱུ་ཡུམ་ལ་འཁྱུད༔ རལ་བ་གྱེན་བརྫེས་རྩེ་བྲན་སྤྲས༔ ཞི་འཛུམ་གཅེར་བུ་སྒེག་ཉམས་ལྡན༔ ཡུམ་མཆོག་ལྷ་མོ་དམར་མོ་ནི༔ ཞལ་གཅིག་ཕྱག་གཉིས་ཡབ་ལ་འཁྱུད༔ འདོད་ཁམས་དབང་སྡུད་མེ་ལོང་གཡས༔ གཟུགས་ཁམས་དབང་སྡུད་ཉི་དཀྱིལ་གཡོན༔ ཞབས་གཉིས་གཡས་བརྐྱང་གཡོན་བསྐུམ་འཁྲིལ༔ དབུ་སྐྲ་ཐུར་འཕྱང་ལང་ཚོ་རྒྱས༔ བདེ་བའི་ཉམས་དང་ལྡན་པར་བསྐྱེད༔ སྤྱི་གཙུག་རིགས་བདག་ཐོད་ཕྲེང་རྩལ༔ སྨུག་ནག་ཞལ་གཅིག་སྤྱན་གསུམ་བགྲད༔ གཡས་པས་སེང་ལྡེང་ཌཱ་རུ་འཁྲོལ༔ གཡོན་པས་མི་རྐང་གླིང་བུ་འབུད༔ གཅེར་བུ་དབུ་སྐྲ་ཐོད་པས་བཅིངས༔ དཔའ་བོ་སྟག་གི་ཤམ་ཐབས་དཀྲིས༔ རུས་པའི་ཕྲེང་བས་སྐུ་ལ་བརྒྱན༔ གར་སྟབས་གཟི་མདངས་ལྡན་པར་བསྐྱེད༔ ལྷ་ཆེན་དབང་གི་ཐུགས་ཀ་རུ༔ དབང་མཛད་དམར་པོ་དབང་གི་ལྷ༔ པདྨ་དབང་ཆེན་སྨུག་ནག་ཁྲོ༔ ཞལ་གཅིག་སྤྱན་གསུམ་སྡང་མིག་བགྲད༔ ཆགས་པའི་ཉམས་ལྡན་མཆེ་བ་གཙིགས༔ ཞབས་གཉིས་དོར་སྟབས་འགྱིང་ཞིང་བརྗིད༔ ཕྱག་གཡས་རྡོ་རྗེ་ནམ་མཁར་འཕྱར༔ ཕྱག་གཡོན་དྲིལ་བུ་དཀུ་ལ་བརྟེན༔ གཅེར་བུ་རལ་ཁྲོད་རྟ་སྐད་འཚེར༔ བདེ་བ་རྒྱས་པའི་ཚུལ་དུ་བསྒོམ༔ ཡུམ་མཆོག་ལྷ་མོའི་ཐུགས་ཀ་རུ༔ རྡོ་རྗེ་ཕག་མོ་སྐུ་མདོག་དམར༔ ཞལ་གཅིག་ཕྱག་གཉིས་སྤྱན་གསུམ་པ༔ གྲི་གུག་ཐོད་ཁྲག་ཕྱག་རྒྱ་ཅན༔ ཕག་ཞལ་མཐིང་ནག་ངུར་སྒྲ་སྒྲོགས༔ ཞབས་གཉིས་གར་སྟབས་ལིང་ལིང་དུ༔ ཆགས་པའི་ལང་ཚོ་རྒྱས་པ་ཡི༔ བདེ་བའི་ཆུ་རྒྱུན་འཁྲུག་པ་ལ༔ སྣང་སྟོང་ངང་ནས་ཟུང་འཇུག་བསྐྱེད༔ ཧཱུྃ༔ ཕྱི་རིམ་འཁོར་ལོ་རྩིབས་བཞིའི་སྟེང་༔ མུ་སྟེགས་ཕྲ་མེན་མཁའ་འགྲོ་བཞི༔ ཤར་ན་རྡོ་རྗེ་དྷཀྐི་མ༔ དཀར་ནག་ཏྲི་ཤུལ་བ་དན་བསྣམས༔ ལྷོ་རུ་རིན་ཆེན་དྷཀྐི་མ༔ སེར་ནག་ཏྲི་ཤུལ་བ་དན་བསྣམས༔ ནུབ་ཏུ་པདྨ་དྷཀྐི་མ༔ དམར་ནག་ཏྲི་ཤུལ་བ་དན་བསྣམས༔ བྱང་དུ་ཀརྨ་དྷཀྐི་མ༔ ལྗང་ནག་ཏྲི་ཤུལ་བ་དན་བསྣམས༔ ཀུན་ཀྱང་རུས་རྒྱན་བརྐྱང་བསྐུམ་འཁྲབ༔ རལ་པའི་ཐོར་ཚུགས་རུས་པས་བརྒྱན༔ བསྐལ་པའི་རླུང་གི་དཀྱིལ་འཁོར་གཡོ༔ རང་འདྲའི་སྤྲུལ་པ་འབུམ་བཅས་གསལ༔ རང་འོད་འབར་བའི་ཀློང་དུ་བསྐྱེད༔ དབང་གི་དཀྱིལ་འཁོར་སྒོ་བཞི་རུ༔ དབང་ཆེན་བཀའ་ཉན་རྒྱལ་ཆེན་བཞི༔ སྐུ་མདོག་དཀར་སྔོ་དམར་སེར་འབར༔ རང་རྟགས་ཕྱག་མཚན་ཕྱག་རྒྱ་ཅན༔ གོ་ཁྲབ་དར་དཔྱངས་རྒྱན་གྱིས་སྤྲས༔ གར་སྟབས་ལས་མཛད་འཕྲིན་ལས་བསྒྲུབ༔ གཞན་ཡང་སྟེང་འོག་ཕྱོགས་མཚམས་སུ༔ ཡེ་ཤེས་ལས་གྲུབ་དབང་གི་ལྷ༔ རྩ་གསུམ་ཆོས་སྐྱོང་སྤྲིན་ལྟར་འཁྲིགས༔ སྣང་སྟོང་དབྱིངས་སུ་ལམ་མེར་བསྒོམ༔ གསུམ་པ་སྤྱན་འདྲེན་པ་ནི༔ ཧཱུྃ༔ ཁམས་གསུམ་སྲིད་པའི་རྩེ་མོ་དང་༔ སུམ་ཅུ་རྩ་གསུམ་ལྷ་ཡུལ་ནས༔ ལྷ་ཆེན་ཡབ་ཡུམ་གཤེགས་སུ་གསོལ༔ ལྷོ་ནུབ་སྲིན་པོའི་གྲོང་ཁྱེར་ནས༔ རིགས་ཀྱི་བདག་པོ་གཤེགས་སུ་གསོལ༔ པདྨ་དབང་གི་གཞལ་ཡས་ནས༔ རྟ་མཆོག་རྒྱལ་པོ་གཤེགས་སུ་གསོལ༔ ནུབ་ཕྱོགས་ཨོ་རྒྱན་ཕོ་བྲང་ནས༔ རྡོ་རྗེ་ཕག་མོ་གཤེགས་སུ་གསོལ༔ མུ་སྟེགས་ཆགས་པའི་དུར་ཁྲོད་ནས༔ དྷཀྐིི་སྡེ་བཞི་གཤེགས་སུ་གསོལ༔ རི་རབ་ཆེན་པོའི་ཕྱོགས་བཞི་ནས༔ རྒྱལ་ཆེན་སྡེ་བཞི་གཤེགས་སུ་གསོལ༔ ཡེ་ཤེས་འཇིག་རྟེན་ཐམས་ཅད་ནས༔ དབང་གི་ལྷ་ཚོགས་གཤེགས་སུ་གསོལ༔ གདུང་བའི་ཡིད་ཀྱིས་སྤྱན་འདྲེན་ན༔ ཐུགས་རྗེའི་ཤུགས་ཀྱིས་གཤེགས་ནས་ཀྱང་༔ འདོད་པའི་དངོས་གྲུབ་སྩལ་དུ་གསོལ༔ ཧྲཱིཿབཛྲ་དྷཀྐི་ནི་མ་ཧཱ་དྷེ་ཝ་ཤྲཱི་ཧེ་རུ་ཀཿཧཱུྃ༔ བཛྲ་ས་མ་ཡ་ཛཿཛ༔ བཞི་པ་བཞུགས་སུ་གསོལ་བ་ནི༔ ཧཱུྃ༔ དབང་ཆེན་འབར་བའི་ཕོ་བྲང་འདིར༔ ཡེ་ཤེས་འཇིག་རྟེན་དབང་གི་ལྷ༔ འཁོར་འདས་ཀུན་ནས་བྱིན་ཕོབ་ལ༔ འདུ་འབྲལ་མེད་པར་བཞུགས་སུ་གསོལ༔ ཧྲཱིཿབཛྲ་དྷཀྐི་ནི་མ་ཧཱ་དྷེ་ཝ་ཤྲཱི་ཧེ་རུ་ཀཿཏིཥྛ་ལྷན༔ ལྔ་པ་ཕྱག་འཚལ་བ་ནི༔ ཧཱུྃ༔ ཡེ་ཤེས་ལྷ་སྟེ་ཡེ་ཤེས་སྐུ༔ དབང་གི་ལྷ་སྟེ་དབང་གི་དཔལ༔ གཉིས་མེད་ཟུང་འཇུག་དཀྱིལ་འཁོར་ལྷ༔ དབྱེར་མེད་ངང་ནས་ཕྱག་འཚལ་ལོ༔ ཧྲཱིཿབཛྲ་དྷཀྐི་ནི་མ་ཧཱ་དྷེ་ཝ་ཤྲཱི་ཧེ་རུ་ཀཿཨ་ལ་ལ་ཧོ༔ དྲུག་པ་མཆོད་པ་འབུལ་བ་ནི༔ ཧཱུྃ༔ ཡེ་ཤེས་འཇིག་རྟེན་དབང་གི་ལྷ༔ དབང་མཛད་དབང་གི་ལྷ་ཚོགས་ལ༔ ཕྱི་ནང་གསང་བའི་མཆོད་པའི་ཚོགས༔ གཉིས་སུ་མེད་པར་འབུལ་ལགས་ན༔ དགྱེས་པའི་ཚུལ་གྱིས་བཞེས་སུ་གསོལ༔ ཧྲཱིཿབཛྲ་དྷཀྐི་ནི་མ་ཧཱ་དྷེ་ཝ་ཤྲཱི་ཧེ་རུ་ཀཿསརྦ་པུཥྩ་ས་མ་ཡ་ཧོ༔ ཧཱུྃ༔ རིན་ཆེན་སྣོད་དུ་སྦྱར་བ་ཡི༔ བྷ་ལིང་རྒྱན་ལྡན་ཞལ་ཟས་བཤོས༔ དུམ་གཅིག་བྷན་དྷ་འབར་བ་རུ༔ བདུད་རྩི་སྨན་དང་རཀྟ་དམར༔ ཡབ་ཡུམ་གསང་བའི་མཁའ་ཀློང་དུ༔ ཐབས་ཤེས་དཀར་དམར་བྱང་ཆུབ་སེམས༔ དབང་གི་དཀྱིལ་འཁོར་ལྷ་ལ་འབུལ༔ བཞེས་ནས་དངོས་གྲུབ་སྩལ་དུ་གསོལ༔ ཧྲཱིཿབཛྲ་དྷཀྐི་ནི་མ་ཧཱ་དྷེ་ཝ་ཤྲཱི་ཧེ་རུ་ཀཿཔཉྩ་ཨ་མྲྀ་ཏ་བྷ་ལིངྟ་རཀྟ་བྷོ་དྷི་ཙིཏྟ་ཁ་ཁ་ཁཱ་ཧི་ཁཱ་ཧི༔ བདུན་པ་བསྟོད་པ་བྱ་བ་ནི༔ ཧཱུྃ༔ གདོད་ནས་དག་པའི་ཡེ་ཤེས་འཕྲུལ༔ སྲིད་གསུམ་ཀུན་བདག་ལྷ་ཆེན་པོ༔ སུམ་ཅུ་རྩ་གསུམ་ལྷ་ཡི་ལྷ༔ ཁམས་གསུམ་དབང་སྒྱུར་ཧེ་རུ་ཀ༔ དབང་མཛད་ལྷ་ལ་ཕྱག་འཚལ་བསྟོད༔ ཐབས་ཤེས་གཉིས་མེད་སྦྱོར་བའི་ཡུམ༔ ཆགས་པའི་རྦ་ཀློང་ལང་ཚོ་རྒྱས༔ སྲིད་གསུམ་ཁམས་གསུམ་མཁའ་ལ་རྫོགས༔ དབང་གི་རྒྱལ་མོ་དབང་གི་ཡུམ༔ ཨུ་མ་དྷེ་ཝར་ཕྱག་འཚལ་བསྟོད༔ རིགས་བདག་ཐུགས་རྗེའི་གཞལ་ཡས་ནས༔ སངས་རྒྱས་ཀུན་འདུས་རྒྱལ་བའི་སྐུ༔ རྨད་བྱུང་འཕྲིན་ལས་སྐུ་བཞིའི་དཔལ༔ ཐོད་པ་རྩལ་ལ་ཕྱག་འཚལ་བསྟོད༔ ཡབ་ཡུམ་ཙིཏྟའི་འཁོར་ལོ་ནས༔ འཁོར་འདས་མ་ལུས་ཡོངས་ཀྱི་བདག༔ དབང་གིས་དབང་སྡུད་དབང་གི་རྒྱལ༔ རྟ་ཕག་ཡབ་ཡུམ་ལ་ཕྱག་འཚལ༔ འཁོར་ལོ་འབར་བའི་རྩིབས་བཞི་ནས༔ ལས་བཞི་བསྒྲུབ་པའི་མཁའ་འགྲོ་བཞིས༔ འདོད་པའི་དངོས་གྲུབ་ཆར་ལྟར་འབེབས༔ མུ་སྟེགས་དྷཀྐི་བཞི་ལ་བསྟོད༔ དཀྱིལ་འཁོར་བར་འཁྱམས་ཁོར་ཡུག་ནས༔ ཡེ་ཤེས་འཇིག་རྟེན་དབང་གི་ལྷ༔ བཀའ་ཉན་ལས་བྱེད་རྒྱལ་ཆེན་བཞིར༔ གུས་པའི་ཚུལ་གྱིས་ཕྱག་འཚལ་བསྟོད༔ ས་མ་ཡཱ༔ རྒྱ༔ གསུམ་པ་རྗེས་ཀྱི་རིམ་པ་ལ་དགུ་སྟེ༔ ཚོགས་འཁོར་བསང་བ༔ ཚོགས་ཕུད་འབུལ་བ༔ ལྷག་མ་བསྔོ་བ༔ ཐུགས་དམ་བསྐུལ་བ༔ དངོས་གྲུབ་ཞུ་བ༔ ཆད་མཐོ་གྱེར་བ༔ བསྟན་མ་སྐྱོང་བ༔ བཀྲ་ཤིས་བརྗོད་པ༔ བསྐྱེད་རིམ་བསྡུ་པ་དང་དགུའོ༔ ས་མ་ཡཱ༔ རྒྱ༔ དང་པོ་ཚོགས་འཁོར་བསང་བ་ནི༔ ཧཱུྃ༔ འདོད་ཡོན་ཚོགས་ཀྱི་ཞལ་ཟས་རྣམས༔ དབང་མཛད་ལྷ་ཡི་ཏིང་འཛིན་གྱིས༔ བསྲེགས་གཏོར་སྦྱངས་བཀྲུས་བདུད་རྩིར་བསྒྱུར༔ འདོད་ཡོན་མཆོད་སྤྲིན་རྒྱ་མཚོར་འཁྱིལ༔ ཧ་ཧོ་གྷ་ན་པུཥྩ་ཧཱུྃ༔ གཉིས་པ་ཚོགས་ཕུད་འབུལ་བ་ནི༔ ཧཱུྃ༔ ཞལ་ཟས་ཚོགས་ཀྱི་མཆོད་པ་འདི༔ འཁོར་འདས་སྟོང་གི་བཅུད་བསྡུས་ཤིང་༔ འབྲུ་བཅུད་སྣ་ཚོགས་རོ་སྦྱར་ནས༔ མཆོད་སྤྲིན་རྒྱ་མཚོར་བསྒྱུར་ཞིང་འབུལ༔ བཞེས་ནས་དངོས་གྲུབ་སྩལ་དུ་གསོལ༔ ཧྲཱིཿབཛྲ་དྷཀྐི་ནི་མ་ཧཱ་དྷེ་ཝ་ཤྲཱི་ཧེ་རུ་ཀཿགྷ་ན་པུཥྩ་ས་མ་ཡ་ཁཱ་ཧི་ཁཱ་ཧི༔ གསུམ་པ་ལྷག་མ་བསྔོ་བ་ནི༔ ཧཱུྃ༔ ལས་མཛད་དབང་གི་འཕྲིན་ལས་བདག༔ ལྷ་མོ་ཀླུ་མོ་གནོད་སྦྱིན་མོ༔ དྷཀྐི་སྡེ་བཞི་བྲན་གཡོག་འབུམ༔ ལྷག་མའི་གཏོར་མ་འདི་ལོངས་ལ༔ དབང་གི་འཕྲིན་ལས་གྲུབ་པར་མཛོད༔ དྷཀྐི་སརྦ་ས་མ་ཡ་ཁཱ་ཧི་ཁཱ་ཧི༔ བཞི་པ་ཐུགས་དམ་བསྐུལ་བ་ནི༔ ཧཱུྃ༔ བཞེངས་ཤིག་བཞེངས་ཤིག་ལྷ་ཆེན་པོ༔ ཨུ་མ་དྷེ་ཝ་ཡུམ་དང་བཅས༔ འོག་མིན་གནས་ནས་སྐུ་བསྐྱོད་ལ༔ ཁམས་གསུམ་ཐམས་ཅད་དབང་དུ་སྡུས༔ སྲིད་གསུམ་ཐམས་ཅད་ཟིལ་གྱི་གནོན༔ སྟོང་གསུམ་ཀུན་གྱི་བཅུད་སྡུས་ལ༔ རྣལ་འབྱོར་བདག་ལ་དངོས་གྲུབ་སྩོལ༔ འཛམ་གླིང་ལོ་ཀ་དབང་སྡུས་ལ༔ ཐམས་ཅད་བདག་གི་བྲན་དུ་བཀོལ༔ ཁྱེད་ནི་ཆགས་མཛད་དབང་གི་ལྷ༔ སྔོན་ཚེ་དབང་གི་དངོས་གྲུབ་བརྙེས༔ ད་ལྟ་དབང་གི་འཕྲིན་ལས་མཛད༔ དབང་མཛད་ཐུགས་རྗེའི་ལྕགས་ཀྱུ་ཡིས༔ དམིགས་བྱའི་དཀར་ནག་མཚམས་ནས་བཟུང་༔ རང་དབང་མེད་པར་བཀུག་ནས་ཀྱང་༔ བདག་གི་དབང་དུ་འདུ་བར་མཛོད༔ བརྒྱན་པའི་མཆོད་གཏོར་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་མཛོད༔ རིགས་བདག་དབང་གི་དཀྱིལ་འཁོར་ནས༔ ཐོད་ཕྲེང་རྩལ་གྱི་ཐུགས་དམ་བསྐུལ༔ སྐུ་གསུམ་ཀུན་གྱི་བྱིན་རླབས་སྡུས༔ སྒོ་གསུམ་རྣལ་འབྱོར་ལུས་ལ་བསྟིམ༔ སྐུ་བཞིའི་ཡེ་ཤེས་དངོས་གྲུབ་སྩོལ༔ བརྒྱན་པའི་མཆོད་གཏོར་འདི་བཞེས་ལ༔ ཐུགས་རྗེ་དབང་གི་འཕྲིན་ལས་མཛོད༔ ལྷ་ཆེན་ཡབ་ཡུམ་ཐུགས་ཀ་ནས༔ དབང་དྲག་དབང་ཆེན་འདུལ་བའི་ལྷ༔ རྟ་ཕག་ཡབ་ཡུམ་ཐུགས་དམ་བསྐུལ༔ བརྒྱན་པའི་མཆོད་གཏོར་འདི་བཞེས་ཤིག༔ འཁོར་འདས་ཐམས་ཅད་དབང་སྡུས་ལ༔ མཆོག་གི་དངོས་གྲུབ་བདག་ལ་སྩོལ༔ ཟླ་གམ་དབང་གི་ཁོར་ཡུག་ནས༔ ཡེ་ཤེས་འཇིག་རྟེན་དབང་གི་ལྷ༔ མཁའ་འགྲོ་ཆོས་སྐྱོང་སྲུང་མར་བཅས༔ སྐུ་ཡི་གར་སྒྱུར་སྟོང་གསུམ་ཁྱབ༔ གསུང་གི་ང་རོས་སྲིད་གསུམ་འགེངས༔ ཐུགས་ཀྱིས་འཁོར་འདས་དབང་དུ་སྡུད༔ ཁྱེད་རྣམས་ཡེ་ཤེས་རྩལ་འཆང་ཞིང་༔ ཁྱེད་རྣམས་ཐུགས་རྗེའི་ཤུགས་ཕྱུངས་ལ༔ ལྷ་མི་ཀུན་གྱི་སྙིང་ནས་དྲོངས༔ མགོ་ནག་མི་ཡི་འགྲམ་པ་ཆོག༔ ཕོ་བརྒྱུད་རྒྱལ་འབངས་སེམས་འཕྱོར་ཆུག༔ མོ་བརྒྱུད་ཆགས་པའི་རྦ་ཀློང་གཡོས༔ རྐང་བཞི་དུད་འགྲོ་དབང་མེད་སྡུས༔ རིན་ཆེན་འབྲུ་ནོར་ཆར་པ་ཕོབ༔ ཟས་གོས་དཔལ་འབྱོར་དངོས་གྲུབ་སྩོལ༔ བརྒྱན་པའི་མཆོད་གཏོར་འདི་བཞེས་ལ༔ འདོད་པའི་དངོས་གྲུབ་དུས་འདིར་སྩོལ༔ བཅོལ་བའི་འཕྲིན་ལས་གྲུབ་པར་མཛོད༔ ལྔ་པ་དངོས་གྲུབ་ཞུ་བ་ནི༔ སྒྲུབ་རྫས་གནས་གསུམ་དུ་རེག༔ ཡང་ན་ཡིད་ཀྱིས་དབང་བླངས༔ ཧཱུྃ༔ དབང་ཆེན་དབང་གི་ལྷ་ཚོགས་རྣམས༔ འགྱུར་མེད་སྐུ་ཡི་དཀྱིལ་འཁོར་ནས༔ འཆི་མེད་ཚེ་ཡི་དངོས་གྲུབ་སྩོལ༔ འགག་མེད་གསུང་གི་དཀྱིལ་འཁོར་ནས༔ ཚངས་དབྱངས་དྲུག་ཅུའི་དངོས་གྲུབ་སྩོལ༔ སྤྲོས་མེད་ཐུགས་ཀྱི་དཀྱིལ་འཁོར་ནས༔ ཕྱག་རྒྱ་དགའ་བཞིའི་དངོས་གྲུབ་སྩོལ༔ ཡོན་ཏན་རེ་སྐོང་དཀྱིལ་འཁོར་ནས༔ ཁམས་གསུམ་དབང་སྡུད་དངོས་གྲུབ་སྩོལ༔ འཕྲིན་ལས་འགྲོ་འདུལ་དཀྱིལ་འཁོར་ནས༔ སྲིད་གསུམ་ཟིལ་གནོན་དངོས་གྲུབ་སྩོལ༔ དྲུག་པ་ཆད་མཐོ་གྱེར་བ་ནི༔ ཧཱུྃ༔ སྔོན་ཚེ་བསྐལ་པའི་དང་པོ་ལ༔ འོག་མིན་དགའ་ལྡན་ཕོ་བྲང་དུ༔ བཅོམ་ལྡན་པདྨ་ཧེ་རུ་ཀས༔ དབང་ཆེན་རྟ་སྐད་འཚེར་ནས་ཀྱང་༔ མ་ཧཱ་དྷེ་ཝ་ཡུམ་དང་བཅས༔ ལྷ་ཆེན་བརྒྱད་དང་ཀླུ་ཆེན་བརྒྱད༔ གཟའ་ཆེན་བརྒྱད་དང་གནོད་སྦྱིན་བརྒྱད༔ འདོད་ཁམས་སྲིད་པའི་རྩེ་མོ་ནས༔ ན་རག་དམྱལ་བ་ཡན་ཆད་ཀྱི༔ འཁོར་འདས་ཐམས་ཅད་དབང་དུ་བསྡུས༔ དམ་ལ་བཏགས་ཚེ་ཐ་ཚིག་བོར༔ བཀའ་བསྒོས་རྡོ་རྗེ་སྤྱི་བོར་བཞག༔ ངག་ཏུ་དམ་རྫས་བདུད་རྩི་བླུད༔ གསང་མཚན་བཏགས་ཤིང་ལུང་བསྟན་མཛད༔ ཐ་ཚིག་བོར་བ་འདི་མིན་ནམ༔ བསྟན་པ་བསྲུང་ཞིང་རྣལ་འབྱོར་སྐྱོངས༔ འཕྲིན་ལས་བསྒྲུབ་ཅིང་དགྲ་བགེགས་སྒྲོལ༔ འདུ་བ་རྣམ་བཞིས་དམ་ལྡན་སྐྱོངས༔ སྔོན་གྱི་དམ་བཅས་རྗེས་དགོངས་ལ༔ དམ་ཚིག་དབང་གིས་གཏོར་མ་བཞེས༔ ཐུགས་དམ་དབང་གིས་འཕྲིན་ལས་མཛོད༔ ལོ་ཀ་སརྦ་དབང་དུ་སྡུས༔ དངོས་གྲུབ་མ་ལུས་ཆར་ལྟར་ཕོབ༔ རྣལ་འབྱོར་བཅོལ་བའི་འཕྲིན་ལས་མཛོད༔ བདུན་པ་བསྟན་མ་སྐྱོང་བ་ནི༔ ཧཱུྃ༔ ལྷ་མོ་ཀླུ་མོ་གནོད་སྦྱིན་མོ༔ བདུད་མོ་ལ་སོགས་སྨན་མོ་འབུམ༔ བཤལ་ཆུའི་གཏོར་མ་འདི་བཞེས་ལ༔ སྔོན་ཚེ་དབང་ཆེན་བཀའ་བཞིན་དུ༔ དམ་བཅས་དགོངས་ལ་འཕྲིན་ལས་མཛོད༔ དྷཀྐི་རཀྨོ་མ་མ་ཁ་ཁ་ཁཱ་ཧི་ཁཱ་ཧི༔ ༈ལྷ་ཆེན་གྱི་བྲོ་བརྡུང་ནི། ཧཱུྃ༔ ཟླ་གམ་དབང་གི་ཕོ་བྲང་འདིར། །ལྷ་ཆེན་ཡབ་ཡུམ་ཁྲོས་པའི་བྲོ། །སྒབ་འདྲེ་དམ་སྲིའི་སྟེང་དུ་བརྡུང་། །ལོག་འདྲེན་འབྱུང་པོ་རྡུལ་དུ་རློགས། ཧཱུྃ་ཧཱུྃ་ལཾ་ལཾ་སྟམ་བྷ་ཡ་ནན། ཉི་མ་གྲགས་པས་མཛད་པའོ།། །།བརྒྱད་པ་བཀྲ་ཤིས་བརྗོད་པ་ནི༔ ཧཱུྃ༔ ཟླ་གམ་འབར་བའི་ཕོ་བྲང་ནས༔ ལྷ་ཆེན་ཡབ་ཡུམ་བཀྲ་ཤིས་ཤོག༔ སྤྱི་གཙུག་རིགས་བདག་དཀྱིལ་འཁོར་ནས༔ རྩ་བརྒྱུད་བླ་མའི་བཀྲ་ཤིས་ཤོག༔ ཙིཏྟ་འབར་བའི་ཕོ་བྲང་ནས༔ དབང་ཆེན་ཡབ་ཡུམ་བཀྲ་ཤིས་ཤོག༔ བཀའ་ཉན་འཕྲིན་ལས་ད་ལ་ནས༔ མཁའ་འགྲོ་ཆོས་སྐྱོང་བཀྲ་ཤིས་ཤོག༔ དགོས་འདོད་འབྱུང་བའི་ཕོ་བྲང་ནས༔ མཆོག་ཐུན་དངོས་གྲུབ་བཀྲ་ཤིས་ཤོག༔ དགུ་པ་རྫོགས་རིམ་ནི༔ ཧཱུྃ༔ ལྷ་ཚོགས་སྣང་སྟོང་ཆོས་ཀྱི་སྐུ༔ མ་འགགས་རོལ་པ་རང་སར་གྲོལ༔ གཟུང་འཛིན་ཡོངས་གྲོལ་ཨ་ལ་ལ༔ གཤེགས་བཞུད་མེད་པར་དབྱིངས་སུ་མུ༔ ཞེས་བརྗོད་བསྔོ་སྨོན་སོགས་སྤྱི་ཁྱབ་ལྟར་བྱའོ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་དབང་ཕྱུག་དབང་གི་བདག༔ མ་འོངས་སྐལ་ལྡན་རྒྱ་མཚོའི་མིང་༔ མཐའ་མི་ཐམས་ཅད་དབང་སྒྱུར་ནས༔ བོད་ཁམས་བདེ་བ་བསྐྲུན་པའི་ཕྱིར༔ ཡང་ཟབ་འདི་ལ་ཉམས་ལེན་གྱིས༔ དབང་གི་འཕྲིན་ལས་ལས་སྦྱོར་འབུངས༔ རྒྱལ་འབངས་ཀུན་གྱིས་བཀའ་ཉན་ཅིང་༔ བསྟན་དང་འགྲོ་དོན་དཔག་མེད་འབྱུང་༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ ཟབ་རྒྱ༔ གསང་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བནྡྷེ་ཉི་མ་གྲགས་པས་གནས་མཆོག་གངས་དཀར་ཏེ་སེ་ནས་ཤིང་མོ་ཡོས་ཀྱི་ལོ་ལ་གདན་དྲངས་ཤིང་ལྕགས་ཕོ་སྤྲེལ་གྱི་ལོ་ལ་ཤོག་སེར་ལས་ཕབ་པའོ། །མངྒཱ་ལཾ།། །།
ལྷ་ཆེན་པོའི་སྒོ་ནས་སློབ་བུ་རྗེས་འཛིན་གྲོལ་བྱེད་དབང་གི་རིམ་པ།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ལྷ་ཆེན་པོའི་སྒོ་ནས་སློབ་བུ་རྗེས་འཛིན་གྲོལ་བྱེད་དབང་གི་རིམ་པ་བཞུགས༔ ལས་མཛད་དབང་གི་ལྷ་ལ་འདུད༔ ལྷ་ཆེན་མ་ཧཱ་དྷེ་ཝ་ཡིས༔ སློབ་མ་རྗེས་འཛིན་གྲོལ་བྱེད་དབང་༔ སྔོན་འགྲོ་དངོས་གཞི་རྗེས་གསུམ་དུ༔ དབྱེ་སྟེ་པདྨ་བདག་གིས་བཀོད༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ དང་པོ་སྔོན་དུ་འགྲོ་བ་ལ༔ ཐུན་མོང་དང་ནི་ཁྱད་པར་རོ༔ ཐུན་མོང་དཀྱིལ་འཁོར་སྟ་གོན་ལ༔ ལུང་དང་མཐུན་པའི་གནས་དང་ནི༔ ཤིང་གཅིག་དྲུང་ངམ་དུར་ཁྲོད་དུ༔ དམར་པོའི་ས་ལ་སྟེགས་བུ་བཟོ༔ ཆེ་ཆུང་ཁྲུ་གང་མདའ་གང་སོགས༔ གནས་ཁང་རང་གི་འདོད་ལྟར་བྱ༔ རྒྱལ་པོའི་ཕོ་བྲང་གནས་གཞི་དང་༔ ཚོང་འདུས་གྲོང་བརྡལ་དགོན་ཆེན་སོགས༔ ས་སྣ་བླང་ཞིང་སྟེགས་བུར་བསྲེ༔ སྨད་འཚོང་ཆུ་ཡིས་ཆག་ཆག་གདབ༔ ཐིག་གིས་བཅད་ཅིང་ལྟེ་བ་ལ༔ ཟླ་གམ་སྒོ་ཅན་མུ་ཁྱུད་ཅན༔ ཕྱི་རིམ་འཁོར་ལོ་རྩིབས་བཞིར་བཅད༔ སྒོ་གྲུ་རྟ་བབས་སྤྱི་མཐུན་བྱ༔ ལྟེ་བ་ལྷ་ཡི་སྐུ་མདོག་ལྟར༔ དུར་ཁྲོད་རྡོ་ཚོན་དག་གིས་བསྒྱུར༔ ས་མ་ཡཱ༔ རྒྱ༔ གཉིས་པ་ཁྱད་པར་གྱི་སྔོན་འགྲོ་ནི༔ སྒྲུབ་པ་ལས་སྦྱོར་སོ་སོ་ལྟར༔ རྫས་རྣམས་དགོད་དགྲམ་རང་གཞུང་གཙོ༔ དབང་རྫས་དབུས་སུ་ཟངས་བུམ་དམར༔ ཁ་རྒྱན་མགུལ་ཆིངས་དྲི་བཟང་ཅན༔ མདུན་དུ་རྩ་བའི་བླ་རྡོ་དང་༔ གཡས་གཡོན་རྒྱབ་མདུན་སྨན་གཏོར་རག༔ ཁ་ཊྭཱཾ་ལྕགས་ཀྱུ་མེ་ལོང་བཤམས༔ མཆོད་རྫས་གྷ་ནའི་ལོངས་སྤྱོད་དགྲམ༔ གཞུང་བསྲང་བརྒྱ་སྟོང་བསྙེན་ཁ་གསོ༔ ས་མ་ཡཱ༔ རྒྱ༔ གཉིས་པ་དངོས་གཞིའི་རིམ་པ་ནི༔ སློབ་བུ་འཇུག་དང་དབང་བསྐུར་གཉིས༔ དང་པོ་སློབ་བུ་འཇུག་པ་ནི༔ སྣོད་ལྡན་བུ་ཡིས་རིན་ཆེན་ནོར༔ ཁྱད་པར་འཕགས་པའི་མཎྜལ་བཅས༔ གསོལ་བ་འདེབས་པ་འདི་སྐད་དོ༔ ཧཱུྃ༔ དབང་མཛད་བླ་མ་དགོངས་སུ་གསོལ༔ བདག་ནི་དབང་གི་ཕོ་བྲང་དུ༔ དབང་གི་འཕྲིན་ལས་འདོད་པའི་བུ༔ དབང་ཆེན་འབར་བའི་དབང་བསྐུར་སྩོལ༔ ཅེས་ཞུ་གསེར་དངུལ་མཎྜལ་དབུལ༔ ཁྲུས་བྱས་བགེགས་བསྐྲད་བསྲུང་འཁོར་བསྒོམ༔ དབང་གི་མཚམས་སྦྱོར་ལོ་རྒྱུས་བཤད༔ དམིགས་པ་གཏད་ཅིང་བྱིན་དབབ་བསྟིམ༔ ས་མ་ཡཱ༔ རྒྱ༔ གཉིས་པ་དངོས་གཞིའི་དབང་དོན་ལྔ༔ བུམ་པ་སྐུ་དང་བདུད་རྩི་གསུང་༔ བླ་རྡོ་ཐུགས་དང་སྒྲུབ་དཔེ་ཡོན༔ འཕྲིན་ལས་གཏོར་མ་ཕྱག་མཚན་གཏད༔ དང་པོ་བུམ་པ་སྐུ་ཡི་དབང་༔ སློབ་བུའི་མགོར་བཞག་འདི་སྐད་དོ༔ ཧཱུྃ༔ བུམ་པ་དབང་མཛད་ལྷ་ཡི་སྐུ༔ དཀྱིལ་འཁོར་ལྷ་ཚོགས་སྐུ་ཡི་དབང་༔ སྐལ་ལྡན་བུ་ཁྱོད་སྨིན་གྲོལ་ནས༔ ལྷ་དབང་ལུས་ལ་ཐོབ་པར་ཤོག༔ རྩ་སྔགས་ཀཱ་ཡ་ཨ་བྷི་ཥིཉྩ་ཧཱུྃ༔ གཉིས་པ་བདུད་རྩི་གསུང་གི་དབང་༔ བྷནྡྷ་བདུད་རྩི་མགྲིན་པར་གཏད༔ ཧཱུྃ༔ དུམ་གཅིག་ཡངས་པའི་སྣོད་མཆོག་ཏུ༔ བྱང་སེམས་དཀར་དམར་བདེ་བའི་རྒྱུན༔ སྐལ་ལྡན་བུ་ལ་དབང་བསྐུར་བས༔ གསང་དབང་ངག་ལ་ཐོབ་པར་ཤོག༔ རྩ་སྔགས་ཝཱཀྐ་ཨ་བྷི་ཥིཉྩ་ཧཱུྃ༔ གསུམ་པ་བླ་རྡོ་ཐུགས་ཀྱི་དབང་༔ སྙིང་གར་བཞག་ཅིང་འདི་སྐད་དོ༔ ཧཱུྃ༔ དབང་མཛད་གར་མཁན་ཧེ་རུ་ཀ༔ ཁྱོད་ཀྱི་སྙིང་ལ་ཡང་དག་ཤར༔ བླ་རྡོ་གསང་བ་ཐུགས་ཀྱི་དབང་༔ དེ་རིང་ཁྱོད་ལ་དབང་བསྐུར་བས༔ དབང་ཆེན་འབར་བའི་དོན་རྟོགས་ཤོག༔ རྩ་སྔགས་ཙིཏྟ་ཨ་བྷི་ཥིཉྩ་ཧཱུྃ༔ བཞི་པ་སྒྲུབ་ཡིག་ཡོན་ཏན་དབང་༔ ལྟེ་བར་བཞག་ཅིང་འདི་སྐད་དོ༔ ཧཱུྃ༔ དབང་ཆེན་དཔེ་བུམ་དཔག་བསམ་ཤིང་༔ སྐལ་ལྡན་ཁྱོད་ལ་འདི་སྦྱིན་ནོ༔ བསྙེན་བསྒྲུབ་ལས་སྦྱོར་མཐར་ཕྱིན་ནས༔ ཁམས་གསུམ་དབང་དུ་འདུ་བར་ཤོག༔ རྩ་སྔགས་རཏྣ་ཨ་བྷི་ཥིཉྩ་ཧཱུྃ༔ ལྔ་པ་འཕྲིན་ལས་གཏོར་མ་མགོ༔ ཕྱག་མཚན་གཉིས་པོ་ལག་ཏུ་གཏད༔ ཧཱུྃ༔ ལྷ་དང་གཉིས་མེད་བྷ་ལིངྟཿ འཕྲིན་ལས་འདོད་བསྒྱུར་ཕྱག་མཚན་དབང་༔ རིགས་ཀྱི་བུ་ལ་འདི་སྦྱིན་པས༔ ཡོངས་རྫོགས་འཕྲིན་ལས་དབང་ཐོབ་སྟེ༔ སྲིད་གསུམ་ཟིལ་གྱིས་གནོན་པར་ཤོག༔ རྩ་སྔགས་ཀརྨ་ཨ་བྷི་ཥིཉྩ་ཧཱུྃ༔ ས་མ་ཡཱ༔ གསུམ་པ་རྗེས་ཆོག་རིམ་པ་གསུམ༔ གསང་བའི་དམ་ཚིག་སྲོག་ལྟར་བསྲུང་༔ དགའ་སྟོན་ཚོགས་ཀྱི་འཁོར་ལོར་རོལ༔ ལུས་ངག་བླ་མའི་བྲན་དུ་དབུལ༔ ས་མ་ཡ༔ རྒྱ༔ གཏེར་རྒྱ༔ སྦས་རྒྱ༔ གསང་རྒྱ༔ ཟབ་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བནྡྷེ་ཉི་མ་གྲགས་པས་གཏེར་ནས་གདན་དྲངས་ཤིང་ཤོག་སེར་ལས་ཕབ་པའོ། །མངྒ་ལཾ།། །།
ལྷ་ཆེན་དབང་ཕྱུག་ཆེན་པོའི་སྙིང་བྱང་བླ་རྡོ་རབ་ཏུ་གསང་བ།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ལྷ་ཆེན་དབང་ཕྱུག་ཆེན་པོའི་སྙིང་བྱང་བླ་རྡོ་རབ་ཏུ་གསང་བ་བཞུགས༔
ལས་མཛད་ཧེ་རུ་ཀཿལ་འདུད༔ དབང་སྡུད་ལས་ཀྱི་ཡང་ཁོལ་གྱི་སྙིང་བྱང་བླ་རྡོ་འདི་བཞིན་བྲི་བར་བྱའོ༔ དར་དམར་པོ་ཤིན་ཏུ་ལེགས་པའམ་རྒྱ་ཤོག་ལ༔ འཁོར་ལོ་མུ་ཁྱུད་ལྔ་རུ་བསྐོར་ཏེ༔ ལྟེ་བ་ཆོས་འབྱུང་དུ་བཅད་པའི་དཀྱིལ་དུ་ཕོ་མཚན་བྲི༔ ཕོ་མཚན་གྱི་ནང་དུ་ཨེ་མཉྫུ་ཀུག་ཏ་ཧཱུྃ༔ ཅེས་འབྲི༔ ཆོས་འབྱུང་ནང་གི་ལོགས་གསུམ་དུ་ཧྲཱིཿཨུ་མ་དྷེ་ཝི་ཧཱུྃ༔ ཅེས་འབྲི༔ ཆོས་འབྱུང་ཕྱིའི་ཟླ་གམ་གསུམ་ལ༔ མ་ཧཱ་གྷུ་རུ་སིདྡྷི་ཧཱུྃ༔ ཨཱོཾ་ཧྱ་གྷྲི་ཝ་ཧཱུྃ༔ ཛྙཱ་ན་དྷཀྐི་ཧཱུྃ༔ ཅེས་འབྲི༔ དེའི་ཕྱི་རིམ་མུ་ཁྱུད་ལ་རྩིབས་བརྒྱད་བཅད་ཅིང་༔ ཕྱོགས་བཞིའི་རྩིབས་བཞི་ལ་ཀ་བྷི་ར་ཀོ་བྷི་ར་འབྲུ་དྲུག་ཚང་མ་རེ་འབྲིའོ༔ མཚམས་བཞིར་བཛྲ་སིདྡྷི་ཧཱུྃ༔ རཏྣ་སིདྡྷི་ཧཱུྃ༔ པདྨ་སིདྡྷི་ཧཱུྃ༔ ཀརྨ་སིདྡྷི་ཧཱུྃ༔ ཅེས་འབྲིའོ༔ རྩིབས་མཆན་བརྒྱད་ལ༔ ཡེ་ཤེས་དང་འཇིག་རྟེན་གྱི་ལྷ་ཐམས་ཅད་བདག་གི་དབང་དུ་སྡུས་ཤིག༔ བླ་མ་དང་སློབ་དཔོན་ཐམས་ཅད་བདག་གི་དབང་དུ་སྡུས་ཤིག༔ རྒྱལ་པོ་དང་དཔོན་ཆེན་ཐམས་ཅད་བདག་གི་དབང་དུ་སྡུས་ཤིག༔ བན་བཙུན་དང་དགེ་འདུན་ཕོ་མོ་ཐམས་ཅད་བདག་གི་དབང་དུ་སྡུས་ཤིག༔ བཙུན་མོ་དང་བུད་མེད་མོ་བརྒྱུད་ཐམས་ཅད་བདག་གི་དབང་དུ་སྡུས་ཤིག༔ བློན་འབངས་དང་རིག་གནས་མཁན་སོགས་སྐྱེས་པ་ཕོ་བརྒྱུད་ཐམས་ཅད་བདག་གི་དབང་ད་སྡུས་ཤིག༔ རྟ་གླང་ནོར་ཕྱུགས་སོགས་དུད་འགྲོ་ནོར་ཐམས་ཅད་བདག་གི་དབང་དུ་སྡུས་ཤིག༔ རིན་ཆེན་འབྲུ་ནོར་ལོངས་སྤྱོད་དར་ཟབ་གོས་ཕྲུག་ཐམས་ཅད་བདག་གི་དབང་དུ་སྡུས་ཤིག༔ ཅེས་རྩིབས་བརྒྱད་ལ་འབྲིའོ༔ དེའི་ཕྱི་རིམ་མུ་ཁྱུད་ལ༔ ཧྲཱིཿཧྲཱིཿམཉྫུ་ཀུག་ཏ་མ་ཧཱ་དྷེ་ཝ་ཀ་བྷི་ར་ཀོ་བྷི་ར་ཨ་ཀར་ཤ་ཡ་ཧྲིང་ཧྲིང་ཛཿཛ༔ བཛྲ་རཏྣ་པདྨ་ཀརྨ་སིདྡྷི་ཧཱུྃཿ རིན་ཆེན་འབྲུ་ནོར་ལོངས་སྤྱོད༔ ལྷབ་ལྷུབ་གོས༔ རྐང་བཞི་དུད་འགྲོ༔ རྨ་གཡང་ཟས༔ འཛམ་གླིང་གི་ནོར་དང་བཅུད་ཐམས་ཅད་སྒུལ་ཅིག་སྐྱོད་ཅིག༔ ཅེས་འབྲི༔ དེའི་ཕྱི་རིམ་མུ་ཁྱུད་ལ༔ ཧྲཱིཿམཉྫུ་ཀུག་ཏ་དྷེ་ཝ་ཧྲིང་ཛཿ ཀ་བྷི་ར་ཀོ་བྷི་ར་ཨ་ཏྲི་ནྲི་སརྦ་མགོ་ནག་ཕོ་བརྒྱུད་ཀྱི་སྐྱེ་འགྲོ་ལྷ་འདྲེ་མི་གསུམ་དང་བཅས་པ་ཐམས་ཅད་ཀྱི་སེམས་དཀྲུགས༔ སྙིང་འཕྱོ་རུ་ཆུག༔ ཡིད་ཀྱི་རྣམ་པར་ཤེས་པ་རང་དབང་མེད་པར་ཁུག༔ མི་སྙིང་སྒུལ་སྒུལ༔ མི་འགྲམ་ཆོག་ཆོག༔ མི་སེམས་དུང་དུང་འདུས་འདུས་སྡུས་སྡུས་ཅེས་འབྲི༔ དེའི་ཕྱི་རིམ་མུ་ཁྱུད་ལ༔ ཧྲཱིཿམཉྫུ་ཀུག་ཏ་དྷེ་ཝ་ཧྲིང་ཛཿཀ་ར་བྷི་ཀོ་ར་བྷི་མགོ་ནག་མོ་བརྒྱུད་མ་མོ་མཁའ་འགྲོ་ཀླུ་མོ་སྨན་མོ་གནོད་སྦྱིན་མོ་དང་ལྷ་མོ་ལ་སོགས་ཐམས་ཅད་ཀྱི་སེམས་དཀྲུགས་སྙིང་འཕྱོ་རུ་ཆུག༔ རྐང་པ་འགྲོ་རུ་ཆུག༔ ཡིད་ཀྱི་རྣམ་པར་ཤེས་པ་རང་དབང་མེད་པར་ཁུག༔ ཨ་ཀར་ཤ་ཡ་ཧྲི་དུང་དུང་འདུས་འདུས་སྡུས་སྡུས་འུབ་འུབ་འདུ་འདུ༔ ཅེས་འབྲི༔ ལྷག་ཆད་བྲིས་སུབ་སོགས་ཡང་དག་པར་སྤང་བར་བྱའོ༔ དེ་ལྟ་བུའི་འཁོར་ལོ་སྙིང་བྱང་ཆེན་མོ་འདི༔ དར་རམ་རྒྱ་ཤོག་ལ་རབ་གསེར་དངུལ་འབྲིང་མཚལ་ཐ་ནའང་རྒྱ་སྣག་གི་ཁུ་བར་བྱང་སེམས་དཀར་དམར་བཏབ་པས་མངོན་རྟོགས་ལྟར་ཡབ་ཡུམ་གྱི་སྐུ་གཉིས་སོ་སོར་ལེགས་པར་བྲིས་པའི་བར་དུ་འཁོར་ལོ་འདི་ལྟེམས་ཏེ༔ སྨན་ལྔ་སྤོས་ལྔ་དྲི་ལྔ་རིན་པོ་ཆེ་ལྔ་འབྲུ་ལྔ་སྙིང་པོ་ལྔ༔ ལས་སྦྱོར་གཉིས་ཀྱི་གཞུང་གི་རྫས་སོགས་འཁོར་ལོའི་ནང་དུ་བཏབ་ཅིང་༔ གུ་གུལ་གྱིས་བདུག་བགེགས་བསྐྲད་ལྟེ་བ་མ་ཉམས་པར་ལྟེབ་ཅིང་དར་མཚན་སྣ་ལྔས་དྲིལ་ཏེ༔ ཟངས་ཀྱི་ཕོ་མཚན་ཚུལ་དང་ལྡན་པའི་ནང་དུ་བཞུགས་ནས་དཀྱིལ་འཁོར་གྱི་དབུས་སུ་འགོད༔ སྒྲུབ་པ་ཚར་ནས་ལུས་ལ་བཅང་༔ དུས་ཆེན་རྣམས་སུ་མཆོད་བསྟོད་འབུལ་ཞིང་རབ་གནས་སྐྱོར༔ རྟེན་དེ་ལྷ་ཆེན་ཡེ་ཤེས་སེམས་དཔའ་རང་དམ་ཚིག་སེམས་དཔར་གསལ་ཏེ༔ དམ་ཚིག་ཡེ་ཤེས་གཉིས་མེད་ཟུང་འཇུག་ཏུ་དམིགས་ཤིང་དམ་ཚིག་རྣམས་བཟུང་བར་བྱའོ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་གསང་བའི་ཡང་ཁོལ་འདི༔ མཚོ་རྒྱལ་ཀླུ་དབང་གཉིས་ལ་གདམས༔ མ་སྤེལ་རིན་ཆེན་གཏེར་དུ་སྦོས༔ ལན་གཅིག་དུས་ཀྱི་ཐ་མ་ལ༔ བོད་ཁམས་མཐའ་མིའི་དབང་དུ་འགྲོ༔ དེ་ཚེ་བསྟན་འཛིན་སྐྱེས་བུ་ཡིས༔ བསྟན་པའི་དོན་དུ་སེམས་བསྐྱེད་ནས༔ གདམས་པ་འདི་བཞིན་ཉམས་བླངས་ན༔ མཐའ་མི་བོད་ཀྱི་བྲན་དུ་ཁོལ༔ སངས་རྒྱས་བསྟན་པའི་མེལ་ཚེར་འགྱུར༔ ཅེས་གསུངས་པ་རྣམས་བདག་མཚོ་རྒྱལ་གྱིས་བརྡ་ཡིག་ཏུ་བཏབ་སྟེ་རིན་པོ་ཆེའི་གཏེར་དུ་སྦས་པའོ༔ གཏེར་རྒྱ༔ གསང་རྒྱ༔ དམ་རྒྱ༔ གཉན་རྒྱ༔ ཟབ་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་གྱིས་གངས་རིའི་རྒྱལ་པོ་ཏེ་སེ་ནས་གདན་དྲངས་ཤིང་ཤོག་སེར་ལས་ཕབ་པའོ། །མངྒཱ་ལཾ།། །།
ལས་ཀྱི་ཧེ་རུ་ཀའི་སྙིང་བྱང་ཞལ་ཁྲིད་ཤིན་ཏུ་གསང་བ།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ལས་ཀྱི་ཧེ་རུ་ཀའི་སྙིང་བྱང་ཞལ་ཁྲིད་ཤིན་ཏུ་གསང་བ་བཞུགས༔ ལས་མཛད་ཧེ་རུ་ཀཿལ་འདུད༔ མ་འོངས་ལྷ་ཆེན་རྣལ་འབྱོར་པས༔ ཆོས་ལ་སྤྱོད་པའི་ཆ་རྐྱེན་དང་༔ སངས་རྒྱས་བསྟན་པའི་དར་ནུབ་སོགས༔ བྱང་ཆུབ་ལམ་གྱི་གེགས་སེལ་དུ༔ དབང་གི་འཕྲིན་ལས་དངོས་གྲུབ་རྣམས༔ སྤྱོད་པར་འདོད་པའི་གང་ཟག་གིས༔ གདམས་པ་འདི་བཞིན་ཉམས་སུ་ལོངས༔ ས་མ་ཡཱ༔ རྒྱ་རྒྱ་རྒྱ༔ ལྷ་ཆེན་པོ་དབང་ཕྱུག་ཡབ་ཡུམ་བསྒྲུབ་པའི་སྙིང་བྱང་ཞལ་ཁྲིད་ཀྱི་རིམ་པ་ནི་འདི་ལྟ་སྟེ༔ ཕོ་བརྒྱུད་མོ་བརྒྱུད་ལོངས་སྤྱོད་གསུམ་རྐྱང་འདེད་དུ་བསྒྲུབ་པ་ནི༔ ལས་སྦྱོར་སོ་སོར་གསལ་བ་ལྟར་ཡིན་ཞིང་༔ ཡོངས་རྫོགས་སུ་བསྒྲུབ་ན་རྟེན་གསུམ་སོ་སོར་རང་གཞུང་ལྟར་བཅའ་ཞིང་༔ དབང་སྡུད་ལས་ཀྱི་ཡང་ཁོལ་སྙིང་བྱང་གི་བླ་རྡོ་དབུས་སུ་འགོད༔ གཞན་གསུམ་པོ་ཕྱོགས་གསུམ་མམ་མདུན་དུ་འགོད༔ དར་དམར་པོའི་གུར་ཕུབ༔ མཐའ་སྐོར་རྣམས་སུ་རང་རང་གི་ཀ་ཅ༔ ཁྱད་པར་དུ་ཁ་ཊྭཱཾ་མེ་ལོང་མདའ་དར་ཅན༔ ལྕགས་ཀྱུ་ཞགས་པ་དམར་པོ་བ་དན་དམར་པོ་བྱང་སེམས་དཀར་པོས་བྲན་པའི་ཆང་ཕུད༔ དམར་པོས་བྲན་པའི་རཀྟ༔ འབྲུ་སྣ་སྨན་སྣ་ཚོགས་ལས་གྲུབ་པའི་དབང་གི་གཏོར་མ་ལ་འཁོར་བཤོས་ཕྲན་བརྒྱད་དང་ཨུག་སྐྱུ་ཤ་སྣ་ཚིལ་སྣ་མང་པོས་མཐའ་བསྐོར་བ༔ གཞན་ཡང་མེ་ཏོག་དམར་པོ་སྣ་ཚོགས༔ དྲི་བཟང་གི་དུད་པ་སྣ་ཚོགས༔ ཞལ་ཟས་ཀྱི་ཚོགས་འཁོར་ཡོ་བྱད་ཕུན་སུམ་ཚོགས་པ་ལ་སོགས་ཏེ་བཀོད་པས་ཁྱད་པར་འཕགས་པ༔ མཛེས་ཤིང་ཡིད་དུ་འོང་བར་བྱའོ༔ དེ་ནས་སྐྱབས་སེམས་སྔོན་དུ་བཏང་ཞིང་ལས་ཀྱི་གཞུང་བསྲང་༔ སྒྲུབ་པའི་བསྐྱེད་རིམ་ལ་འཇུག་ཅིང་སྔ་དྲོའི་ཆ་ལ་ཕོ་བརྒྱུད་དབང་དུ་བསྡུ་བའི་དམིགས་པ་གཙོ་བོར་འདོན༔ དགུང་ཐུན་ལ་ནོར་རྫས༔ དགོང་མོ་མོ་བརྒྱུད༔ ཡང་ན་ཐོར་ཁ་ལོངས་སྤྱོད༔ ནམ་ལངས་བླ་མ་སློབ་དཔོན༔ དྲོ་བར་དགེ་འདུན་ཕོ་མོ༔ ཉིན་དགུང་རྒྱལ་པོ༔ དགུང་ཡོལ་བློན་པོ༔ དགོང་ཀ་བཙུན་མོ༔ སྲོད་ལ་ལྷ་འདྲེ༔ ནམ་དགུང་སྐྱེ་འགྲོ་ཕལ་པ་དང་རིག་གནས་མཁན་ཚོང་པ་ལ་སོགས་ཏེ༔ སྐབས་སྐབས་སུ་དམིགས་པའི་ལས་སྦྱོར་གནད་དུ་བསྣུན་པ་ནི་ཡང་ཟབ་ཆིག་དྲིལ་གྱི་སྙིང་བྱང་འདི་ཁོ་ནའོ༔ འདི་དག་རྣམས་སུ་བཟླས་པའི་སྔགས་ནི་སྒྲུབ་གཞུང་ལྟར་རམ༔ ཡང་ན་འདི་བཞིན་བཟླ་བ་ནི་ཤིན་ཏུ་ཟབ་ཐིག་གོ༔ ཧྲཱིཿཧྲཱིཿམཉྫུ་ཀུག་ཏ་མ་ཧཱ་དྷེ་ཝ་ཀ་བྷི་ར་ཀོ་བྷི་ར་ཨ་ཀར་ཤ་ཡ་ཧྲིང་ཧྲིང་ཛཿཛཿབཛྲ་རཏྣ་པདྨ་ཀརྨ་སིདྡྷི་ཧཱུྃ༔ ཨ་ཏྲི་ནྲི་སརྦ་ཛཿན་ན་ཁ་དྷེ་ཧཱུྃ༔ ཕོ་བརྒྱུད་མོ་བརྒྱུད་ཡུལ་ཁམས་མངའ་ཐང་ལོངས་སྤྱོད་དཔལ་འབྱོར་དང་བཅས་པ་ཐམས་ཅད་བདག་གི་དབང་དུ་དུང་དུང་འདུས་འདུས་སྡུས་སྡུས་འུབ་འུབ་འདུ་འདུ༔ སྐྱེ་འགྲོ་ཐམས་ཅད་ཀྱི་སེམས་དཀྲུག༔ སྙིང་འཕྱོ་རུ་ཆུག༔ རྐང་འགྲོ་རུ་ཆུག༔ མི་འགྲམ་ཆོག༔ མི་སེམས་དཀྲུགས༔ ཡིད་ཀྱི་རྣམ་པར་ཤེས་པ་རང་དབང་མེད་པར་ཁུག༔ ཅེས་བཟླ་བར་བྱའོ༔ འདི་ནི་སྔགས་ཀྱི་ཡང་སྙིང་ཙིཏྟ་དམར་ཕྱུང་གི་སྒྲོམ་ཞེས་བྱ་བ༔ ཆིག་བརྒྱུད་བུ་ལ་སྤེལ་ཀྱང་མནའ་རྒྱས་ལན་གསུམ་བཏབ་ནས་སྤེལ་ལོ༔ གདམས་པ་འདི་ལྡན་འཁོར་ལོས་བསྒྱུར་པའི་རྒྱལ་སྲིད་ལ་དབང་བ་དང་འདྲ་ཞིང་༔ འདི་མེད་ཆོས་ཀྱི་དྲོད་རྟགས་ཐོབ་ཀྱང་ཁམས་གསུམ་ཡོངས་སྒྲོལ་གྱི་འཕྲིན་ལས་མི་ནུས་སོ༔ དེས་ན་འདི་ནི་དྲོད་ཐོབ་པའི་སྐྱེས་བུའི་འཕྲིན་ལས་སོ༔ འཕུང་འཚེང་བྱེད་པས་ཤིན་ཏུ་གསང་བར་བྱའོ༔ སྒྲུབ་པའི་རྟགས་འགྱངས་ན་སྒྲུབ་རྫས་རྣམས་ཀླད་ལ་བསྐོར༔ ཞབས་འོག་ལ་དྲིལ༔ དགུག་གཞུག་དྲག་ཏུ་བྱ༔ ཐུན་གྱིས་བྲབ་ཅིང་བསྐྱེད་རིམ་གནད་དུ་གཟིར་བར་བྱའོ༔ འདི་ནི་ཤིན་ཏུ་འགྱངས་ན་མ་གཏོགས་མི་བྱའོ༔ ཡུལ་གཉན་ཞིང་བསོད་ནམས་རབ་ཏུ་ཆེ་བའི་རིགས་ལ་གོང་དུ་རྩ་བའི་སྒྲུབ་པ་བསྐྱལ་ཞིང་༔ དེ་ནས་རྐྱང་འདེད་དུ་བརྩོན་པས་ཐོགས་པ་མེད་དོ༔ གདམས་པ་འདིའི་མ་བུ་གབ་སྤྲད་ཚུལ་བཞིན་སྤྱད་ན༔ ཚངས་པ་དང་བརྒྱ་བྱིན་རྒྱལ་པོ་ཆེན་པོ་བཞི་དང་བཅས་པ་ཐམས་ཅད་ཀྱིས་བཀའ་ཉན་ལས་བྱེད་ན༔ ཕ་རོལ་གྱི་སྐྱེ་འགྲོ་ལྷ་འདྲེ་མི་གསུམ་སོགས་ལ་སྨོས་ཀྱང་ཅི་འཚལ་ཏེ༔ གང་དགོས་སུ་སྤྱད་པར་བྱའོ༔ ཉི་ཟླའི་ཟེར་འཕྲོག་པ་རྡོ་འགུལ་ན་ཕྲན་ཚེགས་ཀྱི་ནོར་སོགས་ནི་བསྒྲུབ་པ་འདི་ལ་ཞུགས་པ་ཙམ་གྱིས་དགོས་འདོད་ལ་ལོངས་སྤྱོད་པས་ཐེ་ཚོམ་སྤོངས་ཤིག༔ ཕོ་མོ་རྐྱང་འདེད་ཀྱི་འཁོར་ལོ་དམིགས་བྱའི་གཟུགས་སམ་ལིངྒ་བྲིས་པའི་ལག་པ་བཞི་ལ༔ ཆེ་གེའི་ལག་པ་གཡོས་ཅེས་འབྲི༔ རྐང་པ་བཞི་ལ་རྐང་པ་འགྲོ་རུ་ཆུག༔ བྱ་བ་འབྲི༔ རྐང་ཞབས་བཞི་ལ་ཡཾ་བཞི་འབྲི༔ དཔྲལ་བར་རུས་ཀྱི་མིང་འབྲི༔ ཚིགས་པ་བཞི་ལ་ཛཿཧཱུྃ་བཾ་ཧོཿབཞི་འབྲི༔ འདོམས་གཉིས་ལ་ཆགས་པའི་རྦ་ཀློང་གཡོས་བྱ་བ་འབྲི༔ བརླ་བཞི་ལ་བླ་རྟགས་ཀྱི་ས་བོན་ནམ་གཟུགས་འབྲི༔ སྤྱི་བོར་ཁོ་རང་གི་བླ་མ་སློབ་དཔོན་གྱི་མིང་འབྲི༔ ཕྲག་པ་གཡས་གཉིས་ལ་ཕོ་ལྷ༔ གཡོན་གཉིས་ལ་མོ་ལྷ༔ བརླ་གཡས་གཉིས་ལ་ཡུལ་ལྷ༔ གཡོན་གཉིས་ལ་ཞང་ལྷ༔ རྩིབས་ལོགས་གཡས་གཉིས་ལ་འགོ་བའི་ལྷ་སྲུང་ཿ གཡོན་གཉིས་ལ་སྐྱེས་སྨེ༔ རྐང་ལག་གི་མཐིལ་བཞི་དང་བུ་ག་རྣམས་སུ་རང་དབང་མེད་པར་ཁུག་བྱ་བ་འབྲི༔ གནས་ཡིག་དེ་ཐམས་ཅད་ཀྱི་མཇུག་ཏུ་བདག་གི་དབང་དུ་ཁུག་ཅེས་ཤམ་བུར་སྦྱར་ཏེ་འབྲི༔ འདི་ནི་རབ་ཏུ་གཅེས་པས་ཤིན་ཏུ་གསང་༔ གདམས་པ་འདི་ཡི་ཕྱི་ནང་གི༔ གབ་སྤྲད་ལག་ལེན་དང་ལྡན་ན༔ གོང་མི་ནོན་དང་ལོག་བརྡུགས་འཁྱམས༔ མེད་དོ་མི་སྲིད་ཡིད་ཆེས་བསྐྱེད༔ བསྙེན་སྒྲུབ་འདིར་ཞུགས་རྣལ་འབྱོར་ལ༔ སྡེ་བརྒྱད་ཕྱི་ནང་གསང་བ་དང་༔ ཁྱད་པར་གཟའ་ཀླུ་ལ་སོགས་ཀྱིས༔ རབ་ཏུ་འདུད་ཅིང་བྲན་བྱེད་པས༔ དེ་དག་དུག་རླངས་གནོད་པ་སོགས༔ བཟློག་དང་བསྲུང་ཐབས་ལྡན་པ་གཅེས༔ དེ་མེད་མཛེ་ཤུ་ཕོལ་མིག་དང་༔ འཕྲལ་རྐྱེན་སྣ་ཚོགས་ངེས་པར་འབྱུང་༔ མོ་བརྒྱུད་ཕྱི་ནང་ཤ་རུལ་ལ༔ སྦྲང་བུ་འཚུབ་པ་ལྟར་འོང་བས༔ དེ་སྟོབས་རང་གི་ཐིག་ལེ་འཕྲོག༔ བཀྲག་དང་དབང་པོའི་མདངས་ཉམས་པས༔ དེ་དུས་དེ་རྣམས་བསྲུང་བ་བརྩམ༔ སྒྲུབ་པ་ཐོན་ནས་བླ་རྡོ་རྣམས༔ མགོ་ནག་འགྲོ་བས་མི་མཐོང་བཅང་༔ རབ་ཏུ་གསང་བ་དངོས་གྲུབ་གནད༔ གསང་དམ་ཉམས་ན་དངོས་གྲུབ་ཡལ༔ འགོ་བའི་ལྷ་ཡང་རིང་དུ་འགྱུར༔ དེ་ཕྱིར་ཆོས་འདི་གསང་སྟེ་སྤྱོད༔ ཞག་དུས་བསྙེན་པ་ཐུན་རེ་བསྐྱང་༔ ཟླ་དུས་མཆོད་གཏོར་ཚར་རེ་འབུལ༔ ལོ་དུས་སྒྲུབ་པ་ལན་རེ་བསྐྱེལ༔ འདི་རྣམས་སྙིང་གི་ཁ་བྱང་སྟེ༔ འཇིག་རྟེན་ལྷ་སྟེ་འཇིག་རྟེན་མགོན༔ ལས་མཛད་སྲིད་གསུམ་གར་དབང་རྩལ༔ ཧེ་རུ་ཀཿདཔལ་རྩེ་གསུམ་པའི༔ རྒྱུད་ལུང་མན་ངག་བརྒྱ་རྩ་བརྒྱད༔ བདག་ཉིད་པདྨས་ཡོངས་རྫོགས་ཤེས༔ ཕྱི་ནང་བླ་མ་མང་དུ་བསྟེན༔ མན་ངག་དཔག་མེད་སེམས་ལ་གབ༔ ཐབས་དང་ཤེས་རབ་སྣ་ཚོགས་ལ༔ རབ་འབྱམས་འཕྲིན་ལས་མཐའ་ཡས་ཀྱིས༔ སྐྱེ་འགྲོ་མ་ལུས་ཆོས་ལ་བཀོད༔ ད་ལྟ་བོད་ཡུལ་སྐུ་ཡིས་བཏུལ༔ རྒྱལ་བློན་རྗེ་འབངས་དངོས་གྲུབ་ཐོབ༔ མཐའ་འཁོབ་གངས་ཀྱི་ར་བ་འདིར༔ མདོ་སྔགས་ཆོས་ཀྱི་ཉི་མ་ཤར༔ བདག་ནི་རྔ་ཡབ་ཀློང་དུ་འགྲོ༔ སྲིན་ཚོགས་ཆོས་ཀྱི་ཁ་ལོ་སྒྱུར༔ སངས་རྒྱས་སྟོང་གི་མཐུ་བརྡུགས་ཀྱང་༔ ཤ་ཟ་སྲིན་པོ་ང་ཡིས་འདུལ༔ མ་འོངས་བོད་ཡུལ་སྤྲུལ་པས་སྐྱོང་༔ དེ་དུས་བོད་ཀྱི་རྒྱལ་ཁམས་འདིར༔ བདུད་རྒྱལ་བདུད་སྤྲུལ་མང་དུ་འོང་༔ ཆོས་ལུགས་མི་གཅིག་གྲུབ་མཐའ་མང་༔ ངན་སེམས་དུག་ཆུ་ལྟ་བུར་ཁོལ༔ ཨོ་རྒྱན་ང་ལ་གཉིས་ཡོད་ཟེར༔ གསང་སྔགས་ཆོས་ཀྱི་ཚ་ཁང་འགྲིམ༔ བདུད་སྤྲུལ་རང་བཟོའི་གྲུབ་མཐའ་རྣམས༔ སོ་སོར་རྒྱས་ཤིང་ཕྲག་དོག་རྩོད༔ ལྟ་སྒོམ་སྤྱོད་གསུམ་དྲོད་རྟགས་ཡལ༔ སངས་རྒྱས་བཀའ་ཡི་བྱིན་རླབས་ཉམས༔ བསམ་ཡས་ཁྱི་རོ་བཞིན་དུ་རུལ༔ ཆོས་འཁོར་མཆིམས་ཕུར་དམེ་འཁྲུག་བྱེད༔ གཙང་འགྲམ་ལྷ་ཁང་ཞིག་རལ་ཚེ༔ བོད་ཁམས་སེམས་ཅན་བསོད་ནམས་ཟད༔ བདུད་སྤྲུལ་མི་མགོ་བྲན་གྱིས་བྱེད༔ ལྟ་ལོག་ཆོས་ཀྱི་སྒོམ་བསྒྲུབ་དར༔ མཁར་ཆུའི་ཕོ་བྲང་གནས་ཀྱི་རྩེར༔ དམ་ཉམས་བདུད་སྤྲུལ་ལྷ་ཁང་བརྩིག༔ བོད་ཡུལ་གནས་དགོན་ཐམས་ཅད་ཀྱི༔ རྟེན་འབྲེལ་བཟང་གསུམ་ཐམས་ཅད་ཉམས༔ དམ་སྲི་འགོང་པོ་ཁ་རྒྱས་འཕྱུར༔ མཐའ་དམག་འོང་ཞིང་བོད་ཡུལ་འཇོམས༔ དེ་དུས་ཆོས་རྒྱལ་ཚངས་པ་ཡི༔ སྤྲུལ་པས་བོད་སྐྱོང་བྱང་མི་འདུལ༔ རྒྱ་བོད་ཧོར་གསུམ་ནོར་སྣ་འཚོག༔ བོད་ཁམས་ལོངས་སྤྱོད་ཆེར་རྒྱས་པས༔ ཆོས་པ་རྣམས་ཀྱང་ཐུགས་འཁྲུལ་ཏེ༔ ནོར་ཕྱིར་འབྲེང་ནས་ཉམས་རྟོགས་མེད༔ དེ་དུས་དབང་ཕྱུག་སྤྲུལ་པ་ཡིས༔ ཧོར་དང་རྒྱ་ནག་སྦྲེལ་བ་འབྱུང་༔ བོད་ཡུལ་ལྷ་མི་ཟ་བར་བརྔམ༔ དུས་རྟགས་མི་རུང་སྣ་ཚོགས་འབྱུང་༔ དེ་དུས་རྒྱ་མཚོའི་མིང་ཅན་གྱིས༔ བོད་ཀྱི་མི་མགོ་བྱེད་པའི་ཚེ༔ ལྕགས་ཀྱིས་ལྕགས་རྣམས་འདུལ་བ་དང་༔ རྡོ་ཡིས་རྡོ་རྣམས་བཤགས་པ་ལྟར༔ དབང་ཕྱུག་ལས་ཀྱི་ཧེ་རུ་ཀའི༔ སྒྲུབ་པ་དབང་ཆེན་སྙིང་ཐིག་འདི༔ ཉམས་སུ་བླངས་ཤིང་ལས་སྦྱར་ན༔ མཐའ་མི་དབང་འདུ་བོད་ཁམས་བདེ༔ མི་ལོ་དྲུག་ཅུར་བསྟན་པ་རྒྱས༔ བདག་སྤྲང་བན་རིག་འཛིན་འགྲོ་འདུལ་བས་གངས་རིའི་རྒྱལ་བོ་ཏེ་སེ་ནས་གདན་དྲངས་པའོ། །སརྦ་མངྒ་ལཾ་ཛ་ཡནྟུ།