རྡོ་རྗེའི་ཙཀྲ་ལ་བརྟེན་ནས་མོ་རྒྱུད་དབང་དུ་བསྡུ་བའི་ལས་སྦྱོར།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ རྡོ་རྗེའི་ཙཀྲ་ལ་བརྟེན་ནས་མོ་རྒྱུད་དབང་དུ་བསྡུ་བའི་ལས་སྦྱོར་བཞུགས༔ ལས་མཛད་ཧེ་རུ་ཀ་ལ་འདུད༔ ལྷ་ཆེན་བསྒྲུབ་པའི་རྣལ་འབྱོར་པས༔ མོ་བརྒྱུད་ཐམས་ཅད་དབང་བསྡུད་ཅིང་༔ བཀའ་ཉན་བྲན་དུ་བཀོལ་འདོད་ན༔ ལས་སྦྱོར་འདི་ལ་བརྩོན་པར་བྱ༔ ས་མ་ཡཱ༔ རྒྱ༔ དེ་ཡང་ཕོ་མཚན་རྡོ་རྗེའི་ཙཀྲ་ལ་བརྟེན་ནས་མོ་བརྒྱུད་ཐམས་ཅད་དབང་དུ་བསྡུ་བའི་གདམས་པ་འདི་ལ་གསུམ་སྟེ༔ སྔོན་འགྲོ་དང་དངོས་གཞི་རྗེས་སོ༔ དང་པོ་སྔོན་དུ་འགྲོ་བ་ལ་གཉིས་ཏེ༔ འཁོར་ལོ་འབྲི་བ་དང་རྫས་བསག་པའོ༔ དང་པོ་འཁོར་ལོ་བྲི་བ་ནི༔ ཡར་ངོའི་ཚེས་བཅུའམ་འགྲུབ་སྦྱོར་ལ་བབས་ཚེ༔ གྲོ་གའམ་ཤོག་བུ་ལ་བཅུ་དྲུག་གཙང་མའི་རཀྟས༔ གང་ལ་དམིགས་པའི་གཟུགས་སྐྱེ་མཆེད་དོད་པ་ལ་དབང་པོ་ཚང་བ་ཞིག་བྲིས་པའི་ལྟོ་བར་འཁོར་ལོ་མུ་ཁྱུད་བཞི་རུ་བསྐོར་ཏེ༔ ལྟེ་བར་ཕོ་མཚན་ཞིག་འབྲི༔ དེའི་དཀྱིལ་དུ་ནྲི་བྲི༔ ཐ་མར་སྔགས་འདི་བཀོད༔ ཆེ་གེ་མོའི་སྙིང་དཀྲུགས༔ སེམས་འཕྱོ་རུ་ཆུག༔ དུང་དུང་སྡུས་སྡུས་སྭཱ་ཧཱ༔ ཅེས་བྲི༔ དེའི་ཕྱི་རིམ་མུ་ཁྱུད་ལ་རྩིབས་བཞིར་བཅད་ཅིང་༔ ཧྲཱིཿམཉྫུ་ཀུག་ཏ་ཨུ་མ་ཧྲིང་ཛ༔ ཀ་ར་བྷི་ཀོ་ར་བྷི༔ ནྲི་ཨ་ཀར་ཤ་ཡ་ཧྲཱིཿ ཀ་ལི་སརྦ་པ་ཤ་མ་མ་སྲོག་འདུ་འདུ༔ ཅེས་རྩིབས་བཞིར་འགོད༔ རྩིབས་མཆན་བཞི་ལ༔ མཉྫུ་ཀུག་ཏ་ཧཱུྃ་ཧྲཱིཿཛ༔ ཅེས་ཚར་རེ་འགོད༔ དེའི་ཕྱི་རིམ་མུ་ཁྱུད་ལ༔ ཧྲཱིཿམཉྫུ་ཀུག་ཏ་ཧཱུྃ་ཀ་ར་བྷི་ཀོ་ར་བྷི་ཨ་ཀཪྴ་ཡ་ཧྲིང་ཛ༔ ཨུ་ཙུས་མ་ཀུག་ཏ་ཧཱུྃ༔ ཨ་ཏྲི་ནྲི་སརྦ་བདག་གི་དབང་དུ་ཨ་ཀཪྴ་ཡ་ཧྲིང་ཛཿ ཁུག་ཁུག་འདུས་འདུས་རང་དབང་མེད་པར་ཁུག༔ ཅེས་བྲི༔ དེ་ཡི་ཕྱི་རིམ་མུ་ཁྱུད་ལ༔ ཧྲཱིཿམཉྫུ་ཀུག་ཏ་དྷེ་མ་ཧྲིང་ཛ༔ ཀ་ར་བྷི་ཀོ་ར་བྷི༔ མགོ་ནག་མོ་བརྒྱུད་ཐམས་ཅད་དམ་ཆེ་གེ་མོའི་སེམས་དཀྲུགས་སྙིང་འཕྱོ་རུ་ཆུག༔ རྐང་པ་འགྲོ་རུ་ཆུག༔ ཡིད་ཀྱི་རྣམ་པར་ཤེས་པ་རང་དབང་མེད་པར་ཁུག༔ ཅེས་བྲི༔ ལྷག་ཆད་སྤང་ཞིང་བྲིས་བསྲུབ་མེད་པར་བྱའོ༔ གཉིས་པ་རྫས་བསག་པ་ནི༔ རང་གི་སྲིན་ལག་གཡོན་པའི་ཁྲག༔ བྱིའུ་ནས་ཟན་གྱི་ཁྲག༔ ཁོ་ཤོག་འབྲུ་གུ༔ ཐང་ཕྲོམ་འབྲུ་གུཿ རྡོ་ཁབ་ལེན༔ བྱ་ཕོ་ཚ་ལུའི་ཟེ་ཁྲག༔ བོང་བུའི་ས་བོན༔ རང་གི་ཐིག་ལེ་དེ་རྣམས་ཆ་སྙོམས༔ ཆ་གཅིག་འཁོར་ལོར་བྱུག༔ ཆ་གཅིག་སྨྱུག་དོང་དུ་བཅད༔ བསྙེན་སྒྲུབ་ཀྱི་དྲོད་ཐོབ་ནས་རིལ་བུ་སྒྲིལ་ཏེ་གང་ལ་དམིགས་པའི་ལྟོར་གཏོང་ངོ་༔ འཁོར་ལོ་ལ་དམིགས་བྱའི་ཟག་རྫས་བྱུག་གོ༔ ས་མ་ཡཱ༔ རྒྱ༔ གཉིས་པ་དངོས་གཞི་བསྒྲུབ་པ་ལ་གཉིས་ཏེ༔ རྫས་འགོད་པ་དང་བསྙེན་སྒྲུབ་བོ༔ དང་པོ་རྫས་འགོད་པ་ནི་དཀྱིལ་འཁོར་གྱི་དབུས་སུ་ཁྲིའུ་ཁར་འཁོར་ལོ་རྒྱ་སྐྱེགས་ཀྱི་ཕོ་མཚན་ནང་དུ་གཞུག༔ མགུལ་དུ་སྨྱུག་དོང་གི་རྫས་དང་དར་དམར་པོའི་མགུལ་ཆིངས་བཏགས༔ མཐའ་སྐོར་རྣམས་སུ་མཆོད་པའི་ཡོ་བྱད་ཚོགས་ཀྱི་འཁོར་ལོ༔ གང་ལ་བརྩམ་པའི་ལུས་གོས་སམ་མོ་ཆས་མང་པོའི་གཟུགས་བྲིས་པ་བཀོད༔ གཉིས་པ་བསྒྲུབ་པ་ནི་གཞུང་ལྟ་བུ་ལ༔ ཁྱད་པར་དམིགས་པའི་སྤྲོ་བསྡུ་ཡུལ་མཆོག་ཨུ་མ་དྷེ་ཝ་མུ་སྟེགས་ཀྱི་མཁའ་འགྲོ་བཞི་དང་བཅས་པའི་ནུས་པའི་སྤྲུལ་བསྒྱུར་གཙོ་བོར་འདོན་ཞིང་༔ རྒྱལ་མོ་དང་རྗེ་མོ་བྲན་མོ་མཛའ་མོ་ལ་སོགས་གང་ལ་དམིགས་པ་དེ་སྐད་ཅིག་རང་དབང་མེད་པར་དབང་དུ་བསྡུས༔ བྲན་དུ་བཀོལ་བར་བསམས་ཤིང་བསྙེན་པ་རང་གཞུང་ལྟར་ལ༔ ཨ་ཀཪྴ་ཡ་ཧྲི་དུང་དུང་འདུས་འདུས་སྡུས་སྡུས་འུབ་འུབ་འདུ་འདུ་ཆེ་གེའི་སེམས་དཀྲུགས༔ སྙིང་འཕྱོ་རུ་ཆུག༔ རྐང་འགྲོ་རུ་ཆུག༔ ཡིད་ཀྱི་རྣམ་པར་ཤེས་པ་རང་དབང་མེད་པར་ཁུག༔ ཅེས་མི་ཚིག་གིས་བར་མ་ཆོད་པར་བརྩོན་འགྲུས་དང་ལྡན་པས་ཉམས་སུ་བླང་ངོ་ཿ ས་མ་ཡཱ༔ རྒྱ་རྒྱ་རྒྱ༔ གསུམ་པ་རྗེས་ཀྱི་རིམ་པ་ལ་གཉིས་ཏེ༔ དམ་ཚིག་དང་ཡོན་ཏན་ནོ༔ དང་པོ་དམ་ཚིག་ནི་བུད་མེད་ཡོངས་ལ་གུས་ཤིང་བྱམས་པ་དང་ཐིག་ལེ་མི་ཉམས་པ་གལ་ཆེའོ༔ གཉིས་པ་ཡོན་ཏན་ནི༔ མ་མོ་མཁའ་འགྲོ་འདུ་ཞིང་བར་ཆད་སེལ༔ སྨན་མོ་དང་ཀླུ་མོས་ནོར་འབུལ༔ འཇིག་རྟེན་མི་མོ་ཐམས་ཅད་བྲན་དང་གཡོག་ཏུ་འགྱུར༔ གང་ལ་བརྩམས་པ་མི་རྒྱབ་ཀྱི་ཁྱི་བཞིན་འབྲེང་༔ དབང་དུ་འདུས་ནས་ཤེས་རྒྱུད་ཆོས་ལ་འཁོད་ན་གཉིས་མེད་བྱང་ཆུབ་འཐོབ༔ ཆོས་ལས་འགལ་ཀྱང་སྐྱེ་བ་བརྒྱ་སྟོང་དུ་ནག་ཆགས་བུད་མེད་རྣམས་ཀྱིས་གཙུག་ཏུ་མཆོད༔ བཀའ་ཉན་ལས་བྱེད་མོ་བརྒྱུད་དབང་དུ་འདུ༔ ས་མ་ཡཱ༔ རྒྱ་རྒྱ་རྒྱ༔ ཅེས་པ་འདི་ཡང་སློབ་དཔོན་ཆེན་པོས་བདག་མཚོ་རྒྱལ་དང་ཀླུ་དབང་ལ་གནང་ཤོག་སེར་དུ་ཁོ་མོས་བཏབ་སྟེ་རིན་པོ་ཆེའི་གཏེར་དུ་སྦས་པའོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱཿ ཟབ་རྒྱ༔ གསང་རྒྱ༔ བདག་སྤྲང་བན་དྷེ་ཉི་མ་གྲགས་པས་གངས་རིའི་རྒྱལ་པོ་ཏེ་སེ་ནས་གདན་དྲངས་ཤིང་ཤོག་སེར་ལས་ཕབ་པའོ། །མངྒ་ལཾ།། །།