བསྙེན་སྒྲུབ་ཀྱི་འཛབ་བཟླས་དམིགས་པའི་འཁྲུལ་འཁོར་ཤིན་ཏུ་གསང་བའི་ངག་འདོན།
བསྙེན་སྒྲུབ་ཀྱི་འཛབ་བཟླས་དམིགས་པའི་འཁྲུལ་འཁོར་ཤིན་ཏུ་གསང་བའི་ངག་འདོན་པདྨ་ཐེག་མཆོག་བསྟན་པའི་རྒྱལ་མཚན་གྱི་ལྗགས་བསྒྲིགས་ནི། །སྣང་བའི་ངོ་བོ་ལས་ཀྱི་ཧེ་རུ་ཀ༔ སྟོང་པའི་རང་རྩལ་ཨུ་མ་དྷེ་ཝ་ཡུམ། །ཐུགས་ཀར་དབང་ཆེན་ཡབ་ཡུམ་གསལ་བ་ཡི། །ཡབ་གྱི་ཐུགས་ཀར་ཉི་དཀྱིལ་ལྟེ་བ་རུ། །ཡེ་ཤེས་རང་བྱུང་རྡོ་རྗེ་རྩེ་ལྔ་པ། །ནས་འབྲུ་ཙམ་གྱི་ལྟེ་བའི་ནང་ཁོངས་སུ། །དབང་ཕྱུག་ཆེན་པོའི་ཐུགས་སྲོག་ཧྲཱིཿདམར་པོ། །རིང་ཆ་ཚེག་དྲག་ལྡན་མཐར་སྔགས་འཁོར་ལས། །འོད་དམར་སྤྱི་གཙུག་རིགས་བདག་ཐུགས་ཀར་འཕྲོས། །རྒྱུད་བསྐུལ་དེ་ཡི་ཧྲཱིཿལས་འོད་ཀྱི་ཟེར། །དམར་པོ་ལྕགས་ཀྱུའི་དབྱིབས་ཅན་སྲིད་པའི་རྩེར། །ལྷ་ཆེན་ཡབ་ཡུམ་གནས་གསུམ་ཕོག་པ་ལས། །འོད་ཀྱིས་རྒྱུད་བསྐུལ་སྐད་ཅིག་ལ་བྱོན་ནས། །རྟེན་དང་བརྟེན་པར་བཅས་པ་རྣམས་ལ་ཐིམ། །སླར་ཡང་རྒྱལ་ཀུན་འདུས་པ་ཐོད་ཕྲེང་རྩལ། །དབང་མཛད་དབང་གི་རྒྱལ་པོ་ཡབ་ཡུམ་གྱི། །གནས་གསུམ་ལས་ནི་འོད་ཟེར་དཔག་མེད་འཕྲོས། །རྟ་སྐད་ཕག་ཞལ་ངུར་བའི་སྒྲས་བསྐུལ་ནས། །ཕྱོགས་བཅུའི་ཞིང་གི་སྐུ་གསུམ་སྟོན་པ་དང་། །རྒྱལ་བ་སྲས་བཅས་ཡི་དམ་དཀྱིལ་འཁོར་ལྷ། །དཔའ་བོ་མཁའ་འགྲོ་རྩ་བ་གསུམ་གྱི་ཚོགས། །ཐུགས་རྗེ་བྱིན་རླབས་ནུས་པའི་སྟོབས་རྩལ་རྣམས། །རང་དབང་མེད་པར་དབང་དུ་བསྡུས་ནས་ཀྱང་། །བདག་དང་མདུན་གྱི་བསྐྱེད་པ་རྣམས་ལ་བསྟིམ། །མཆོག་ཐུན་དངོས་གྲུབ་གཟི་བྱིན་དཔལ་དུ་འབར། །དབང་ཕྱུག་ཡབ་ཡུམ་རང་སྲོག་སྔགས་འཕྲེང་དང་། །འཁོར་བཅས་ཀུན་གྱི་གནས་གསུམ་ལས་འཕྲོས་པའི། །འོད་དམར་ལྕགས་ཀྱུ་ཞགས་པ་ལྕགས་སྒྲོག་དང་། །དྲིལ་བུའི་དབྱིབས་ཅན་གྲངས་མེད་ཕྱོགས་བཅུར་འཕྲོས། །གཟུགས་ཅན་གཟུགས་མེད་ཆེ་བཙན་དྲེགས་པ་ཅན། །ཕོ་རྒྱུད་མོ་རྒྱུད་གང་དམིགས་རྣམས་ལ་ཕོག །རང་དབང་མེད་པར་སྐད་ཅིག་ཉིད་ལ་བཀུག །ཡིད་དབང་བསྒྱུར་ནས་རང་ཞབས་མགོ་བཏུད་དེ། །ཅི་བགྱིའི་བཀའ་ཉན་ལས་སྒྲུབ་བྲན་དུ་གྱུར། །ལྷ་མིའི་དཔལ་འབྱོར་མཁོ་དགུའི་ཡོ་བྱད་རྣམས། །སྦུར་མ་རླུང་གིས་བདས་པ་ཇི་བཞིན་དུ། །འུབ་འུབ་ཡོམ་ཡོམ་ཁྲོལ་ཁྲོལ་དབང་དུ་བསྡུས། །ཡེ་ཤེས་འཇིག་རྟེན་སྡེ་དང་བཅས་རྣམས་ཀྱང་། །སྣང་གྲགས་དག་པ་ལྷ་སྔགས་འདུ་འཕྲོ་སྒྱུར། །རྩེ་གཅིག་ཏིང་འཛིན་དམིགས་པའི་འཁྲུལ་འཁོར་ངང་། ཧྲཱིཿཧྲཱིཿམཉྫུ་ཀུག་ཏ་མ་ཧཱ་དྷེ་ཝ་ཀ་བྷི་ར་ཀོ་བྷི་ར་ཨ་ཀཪྴ་ཡ་ཧྲིང་ཧྲིང་ཛཿཛཿ བསྙེན་དང་བསྒྲུབ་པའི་རྩ་བསྙེན་འདི་ཁོ་ན། བཛྲ་རཏྣ་པདྨ་ཀརྨ་སིདྡྷི་ཧཱུྃ༔ ཨ་ཏྲི་ནྲི་སརྦ་ཛཿ ཁམས་གསུམ་ཀུན་གྱི་སྙིང་བསྒུལ༔ འགྲམ་ཆོག༔ སེམས་དཀྲུགས༔ ན་ན་ཁ་དྷེ་པུཥྟིང་ཀུ་རུ་ཡེ་སྭཱ་ཧཱ༔ འདི་ནི་ལས་ཀྱི་སྦྱོར་སྔགས་སྤྱི་ཙམ་སྟེ༔ བསྒྲུབ་པའི་སྔགས་དམིགས་རྟགས་མཚན་མ་བྱུང་བར། །བརྩོན་ནས་ལས་སྦྱོར་སྤྱི་དང་བྱེ་བྲག་གི༔ ། རང་གཞུང་ཡིག་ཆའི་དགོངས་པ་གཙོ་བོར་འདོན། །ཞེས་བཟླས་པའི་མཇུག་ཏུ་དབྱངས་གསལ་ཡིག་བརྒྱ་རྟེན་སྙིང་རྣམས་དང་མཆོད་བསྟོད་དབང་བཞི་བླངས་བཅས་བྱའོ།། །།