ཛམ་ལྷ་དམར་པོའི་སྐོར།
ཛམ་ལྷ་དམར་པོའི་སྒྲུབ་ཐབས།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ཛམ་ལྷ་དམར་པོའི་སྒྲུབ་ཐབས་བཞུགས༔ ན་མོ་ཤྲཱི་ཧེ་རུ་ཀ༔ བདག་འདྲ་པདྨ་འབྱུང་གནས་ཀྱིས༔ ལྔ་བརྒྱ་དུས་ཀྱི་ཐ་མ་ལ༔ ཆོས་བྱེད་དབུལ་བ་སེལ་བའི་ཕྱིར༔ བདེ་མཆོག་དབང་གི་ཆོས་སྐོར་དུ༔ ཛམ་དམར་ནོར་སྒྲུབ་གདམས་པ་སྟོན༔ ས་མ་ཡཱ༔ རྒྱ་རྒྱ་རྒྱ༔ སྟོན་ཀ་འབྲས་བུ་སྨིན་པའི་དུས༔ ཡང་ན་དཔྱིད་ཀ་རྒྱས་པའི་ཚེ༔ ཚེས་བརྒྱད་ཡར་ངོའི་འགྲུབ་སྦྱོར་ལ༔ མཎྜལ་གྲུ་བཞིར་དམར་པོས་བྱུག༔ ཚོང་དུས་གནས་གཞི་ཕོ་བྲང་གི༔ ས་སྣ་བསྲེ་ཞིང་ཆག་ཆག་གདབ༔ སྣ་ཚོགས་འབྲུ་ལ་ཚོམ་བུ་གསུམ༔ རིན་ཆེན་འབར་བའི་ཚུལ་དུ་བཀོད༔ དབུས་སུ་ཛམ་ལྷའི་སྒྲུབ་རྟེན་འགོད༔ མདུན་དུ་བྷ་ལིང་གཏོར་མ་དང་༔ གཡས་གཡོན་སྨན་རག་བྱང་ཕྱོགས་སུ༔ གྷ་ནའི་ཡོ་བྱད་ཚོགས་པར་བཤམ༔ ཡི་དམ་ལས་ཀྱི་རང་གཞུང་བསྲང་༔ རང་ཉིད་ཡི་དམ་ལྷར་གསལ་བའི༔ ཐུགས་ཀ་མདུན་གྱི་སྒྲུབ་རྫས་གཉིས༔ སྐད་ཅིག་གནོད་སྦྱིན་ཛམ་ལྷ་དམར༔ ཞལ་གཅིག་འཛུམ་མདངས་སྐུ་ལུས་སྒེག༔ ཕྱག་གཡས་ནོར་བུ་དབང་རྒྱལ་བསྣམས༔ ཐུགས་ཀར་གཏོད་པའི་ཚུལ་གྱིས་འཛིན༔ ཕྱག་གཡོན་ནེའུ་ལེ་སྐུ་རྐེད་བརྟེན༔ གཡས་བསྐུམས་གཡོན་བརྐྱང་དོར་སྟབས་འགྱིང་༔ སྤྱན་གསུམ་སྨ་ར་སྨིན་མ་སེར༔ དབུ་སྐྲ་ཐོར་ཅོག་རྒྱན་གྱིས་བརྒྱན༔ སྣ་ཚོགས་རྒྱན་སྤྲས་དར་དཔྱངས་འཕྱོ༔ འོད་དམར་འཁྱིལ་བའི་ཀློང་དུ་བསྒོམ༔ དཱིཿ ལས་གཡས་སུ་ནོར་བདག་ནི༔ མི་དམར་ལྕགས་ཀྱུ་བུམ་པ་ཅན༔ ཞེ་སྡང་འབར་བའི་ཕོ་མཚན་བསྒྲེངས༔ སྨ་ར་སྨིན་མ་རལ་པ་གཟེངས༔ ཞབས་གཉིས་གར་སྟབས་འགྱིང་བག་ལྡན༔ གཡོན་དུ་ཧྲཱིཿལས་ལྷ་མོ་དམར༔ ཕྱག་གཡས་ཟངས་ཀྱི་གྲི་གུག་དམར༔ ཕྱག་གཡོན་དབང་གི་ཞགས་པ་བསྣམས༔ ནུ་འབུར་བྷ་ག་ལང་ཚོ་རྒྱས༔ རིན་ཆེན་རྒྱན་ལྡན་གར་སྟབས་ཅན༔ རལ་པའི་ཅོད་པན་སིལ་བུར་འཕྱོ༔ གཟི་མདངས་འོད་དང་ལྡན་པར་བསྐྱེད༔ བདག་མདུན་བསྒོམ་པའི་ལྷ་གསུམ་གྱི༔ ཐུགས་ཀར་ཉི་མའི་དཀྱིལ་འཁོར་སྟེང་༔ ཛཾ་ཧྲཱིཿདཱི་གསུམ་ས་བོན་མཐར༔ ཨཱོཾ་ཛཾ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཅེས་པའི་སྔགས་འབྲུས་བསྐོར་བ་ལས༔ འོད་འཕྲོས་སངས་རྒྱས་བྱང་སེམས་མཆོད༔ བྱིན་རླབས་བསྡུས་ནས་རང་ལ་ཐིམ༔ ཛཾ་ལྷ་ཡུམ་སྲས་གཙོ་འཁོར་གསུམ༔ ནུས་སྟོབས་གཟི་བརྗིད་སྟོང་ཁམས་འཁྲུག༔ འཛམ་གླིང་འཇིག་རྟེན་ཟས་ནོར་དང་༔ བྱང་ཕྱོགས་གནོད་སྦྱིན་ལོངས་སྤྱོད་དཀོར༔ ཐམས་ཅད་ཛཾ་ལྷའི་ཟེར་གྱིས་བསྡུས༔ ཕོ་རྒྱུད་འགྲོ་བ་སྲས་ཀྱིས་བཀུག༔ མོ་རྒྱུད་སྐྱེ་འགྲོ་ཡུམ་གྱིས་བཀུག༔ འཛམ་གླིང་ཕོ་མོ་ཟས་ནོར་དབང་༔ སྐད་ཅིག་ཉིད་ལ་བསྡུས་ནས་ཀྱང་༔ དབང་བསྡུས་ཟིལ་མནན་བཀའ་ཉན་ཅིང་༔ དངོས་གྲུབ་ཐམས་ཅད་ཐོབ་པར་བསམས༔ གོང་གི་བསྙེན་པ་ཞག་གསུམ་བཟླས༔ སྐབས་སུ་རྩ་སྔགས་ཤམ་བུ་རུ༔ པཉྩ་རཀྟ་བྷ་ལིངྟ་སརྦ་མ་ཧཱ་པུཥྩ་བཛྲ་པུཥྤེ་དྷུ་པེ་ཨཱ་ལོ་ཀེ་གྷནྡྷེ་ནཻ་ཝི་ཏེ་ཤཔྟ་པཱུ་ཙ་ཧོ༔ ཞེས་པ་དང་༔ ཚོགས་ཀྱི་འཁོར་ལོ་སོགས་འབུལ་བར་བྱའོ༔ དེ་ཚེ་གྲུབ་རྟགས་དངོས་སམ་ཉམས༔ ཐ་ན་ཐོར་ཁའི་རྨི་ལམ་དུ༔ ཞལ་མཇལ་གསུང་ཐོས་དྲི་བཟང་འཐུལ༔ ཕྱག་མཚན་རྙེད་དང་གཏེར་བཏོན་སོགས༔ དྲི་བཟང་འཐུལ་དང་འོད་དམར་འཁྱུག༔ དངོས་སུ་གྲུབ་པའ་ིརྟགས་ཡིན་ནོ༔ དེ་ནས་ཤམ་བུ་འདི་བཏགས་བཟླ༔ སིདྷི་སྡུས་སྡུས༔ རཏྣ་སིདྡྷི་སྡུས་སྡུས༔ ས་མ་ཡཱ་ཕི་ཤི་པུར་ཎ་ཁུག་ཁུག༔ སིདྡྷི་ཧཱུྃ་སྭཱ་ཧཱ༔ ཅེས་པ་ཞག་གསུམ་ཉི་དྲོས་བཞི༔ བཟླ་ཞིང་གོང་གི་དམིགས་པ་རྣམས༔ དྲག་ཏུ་གཅུན་ཞིང་རབ་ཏུ་གཟིར༔ ཁྲོམ་ཚོགས་ཟས་ནོར་བཀུར་སྟི་བྱེད༔ ཁྲི་ལ་བསྡད་དང་ཆས་གོས་གཟབས༔ ཉི་མ་ཤར་དང་མེ་ཏོག་འཐུས༔ རིན་ཆེན་གླིང་དུ་ཕྱིན་པ་སོགས༔ རྨི་ལྟས་ཡ་མཚན་བྱུང་བའི་ཚེ༔ སྒྲུབ་རྫས་ལག་བླངས་གནས་གསུམ་གཏུག༔ དབང་བཞི་ལེན་ཞིང་བསྐྱེད་རིམ་གསལ༔ ཛམ་ལྷའི་གཏོར་མ་འཛམ་གླིང་གི༔ དངོས་གྲུབ་འདུས་པའི་ཕུང་པོར་བསམས༔ རང་གིས་རོལ་ཞིང་གཞན་ལ་བསྡམས༔ ཕྱིས་ཀྱང་རྟ་དང་བྱ་སྦོའི་ཉར༔ པཱུ་ཙ་དབུལ་ཞིང་གསོལ་བ་གདབ༔ སྒྲུབ་རྫས་བཅང་ཞིང་ཉིན་རེ་བཞིན༔ བརྒྱ་རྩ་བརྒྱད་ཀྱི་བསྙེན་པ་བགྲང་༔ འཛམ་གླིང་ཟས་ནོར་ལོངས་སྤྱོད་འདུ༔ འཁོར་ལོས་སྒྱུར་རྒྱལ་དང་མཚུངས་ཤིང་༔ ཕྱི་མ་དབང་བསྒྱུར་རྒྱལ་པོར་སྐྱེ༔ འདི་ནས་བྱང་ཆུབ་མ་ཐོབ་པར༔ དབུལ་བའི་སྡུག་བསྔལ་རྒྱུན་གཅོད་བྱེད༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གསང་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་དྷེ་ཉི་མ་གྲགས་པས་གངས་ཏེ་སེ་ནས་གདན་དྲངས་ཤིང་ཤོག་སེར་ལས་ཞལ་བཤུས་པའོ། །མངྒ་ལཾ།། །།
ཛམ་བྷ་ལྷའི་སྒྲུབ་རྟེན་བཅའ་ཐབས།
ཛམ་བྷ་ལྷའི་སྒྲུབ་རྟེན་བཅའ་ཐབས་བཞུགས༔ དཔལ་ཆེན་པོ་ལ་ཕྱག་འཚལ་ལོ༔ གནོད་སྦྱིན་ཛམ་བྷ་ལ་དམར་པོའི་སྒྲུབ་རྟེན་བཅའ་ཐབས་ནི༔ སྒྲུབ་གནས་ཁྱད་པར་ཅན་གྱི་ས་སྣ་ལ་རིན་པོ་ཆེ་སྣ་ཚོགས་ཀྱི་ཕྱེ་མ་བསྲེ༔ འཇིམ་པ་ཚད་དང་ལྡན་པར་བཟོས་ལ༔ གནོད་སྦྱིན་ཛམ་བྷ་ལ་མངོན་རྟོགས་བསྐྱེད་རིམ་དང་མཐུན་པ་ལ༔ འབྲུག་ལ་ཆིབས་པ་ཞིག་བཞེངས་ཤིང་གྲོ་ཤོག་གང་རུང་ལ་བསྙེན་སྔགས་རིན་པོ་ཆེའི་ཁུ་བས་བྲིས་ཏེ་ཐུགས་ཀར་གཞུག༔ གསེར་དངུལ་སོགས་རིན་ཆེན་འབྲུ་སྣ་དར་ཟབ་གོ་མཚོན་ལ་སོགས་འབྱོར་ཚད་གཟུངས་གཞུག་ཏུ་འབུལ༔ དེ་རྫ་དམར་པོའི་གའུ་ནོར་བུའི་དབྱིབས་ཅན་གྱི་ནང་དུ་གཞུག་ཅིང་༔ དར་ཚོན་སྣ་ཚོགས་ཀྱིས་དྲིལ༔ འབྲུ་སྨན་རིན་ཆེན་སྣ་ཚོགས་ལྷན་དུ་དྲིལ་ཏེ༔ རྫའི་གའུ་ཚོམ་བུའི་དབུས་སུ་འགོད༔ སྒྲུབ་པ་ཐོན་ནས་ལུས་ལ་བཅང་བའམ་བང་མཛོད་ཀྱི་དབུས་སུ་སྦ༔ ལོ་རེ་བཞིན་རབ་གནས་བྱ༔ ཟླ་བ་གང་ཤར་གྱི་བཅོ་ལྔ་ལ་མཆོད་འབུལ་ཚོགས་འཁོར་རེ་ཆག་མེད་བྱས་ལ་ཛམ་བྷ་ལ་དངོས་སུ་བསྐྱེད་ཅིང་དམ་མེད་སྐྱེ་འགྲོ་གང་གིས་ཀྱང་མི་མཐོང་བར་བཅང་བར་བྱའོ༔ རྟེན་ལ་རང་གིས་གང་འདོད་པའི་ཟས་གོས་ལོངས་སྤྱོད་མལ་ཆ་སོགས་གང་ཕུལ་བ་དེའི་དངོས་གྲུབ་འཕྲལ་དུ་འབྱུང་བར་འགྱུར་རོ༔ རྟེན་འབྲེལ་ཆེ་བས་གཟབས་ཏེ་བཅང་བར་བྱའོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་དྷེ་ཉི་མ་གྲགས་པས་གངས་རིའི་རྒྱལ་པོ་ཏེ་སེ་ནས་གདན་དྲངས་ཤིང་ཤོག་སེར་ལས་ཕབ་པའོ། །མངྒ་ལཾ།། །།
ཛམ་ལྷའི་ཆུ་སྦྱིན་གཏོང་ཐབས།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ཛམ་ལྷའི་ཆུ་སྦྱིན་གཏོང་ཐབས་བཞུགས༔ དཔལ་ཆེན་པོ་ལ་ཕྱག་འཚལ་ལོ༔ ཆོས་ལྟར་སྤྱོད་པའི་རྣལ་འབྱོར་པ་ལོངས་སྤྱོད་ཀྱིས་དབུལ་ན༔ ཟངས་ཀྱི་སྣོད་དུ་ཛམ་བྷ་ལ་དམར་པོ་གཞུང་ལྟར་བསྐྱེད༔ དམ་ཚིག་ཡེ་ཤེས་གཉིས་སུ་མེད་པར་བསྒོམ༔ ཛམ་བྷ་ལའི་ལྟོ་བར་ནོར་བུ་དབང་གི་རྒྱལ་པོ་གཟི་བརྗིད་རབ་ཏུ་རྒྱས་པས༔ འོད་ཟེར་གྱི་མེ་ལྕེ་དམར་པོ་བུ་ག་ཐམས་ཅད་ནས་ཉུག་ཉུག་ཏུ་འབར་ཚེ༔ བྱིན་གྱིས་བརླབས་པའི་ཆུ་གཙང་ཕུལ་བས༔ སྐོམ་པའི་གདུང་བ་རབ་ཏུ་བསལ༔ ཐུགས་རྒྱུད་དགྱེས་ཏེ་ཐུགས་རིན་པོ་ཆེའི་དཔལ་བེའུ་ཟུར་བརྒྱད་པ་སྒོ་ཕྱེ་ནས་རིན་ཆེན་འབྲུ་ནོར་ལོངས་སྤྱོད་འདོད་དགུའི་ཆར་ཆེན་པོས༔ རང་གི་འདོད་པ་ཐམས་ཅད་ཡོངས་སུ་ཚིམ་པའི་དངོས་གྲུབ་ཐོབ་པར་བསྒོམ་ཞིང་༔ ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྭཱ་ཧཱ༔ ཅེས་བརྗོད་བརྒྱ་རྩ་བརྒྱད་ཀྱིས་ཆུ་གཙང་དབུལ༔ ཡེ་ཤེས་པ་གཤེགས་དམ་ཚིག་པ་རང་ལ་བསྡུ༔ བསྔོ་སྨོན་གདབ༔ ཆུ་སྦྱིན་ལྕེ་ལ་མཐེབ་སྲིན་གྱིས་རེག་ཅིང་ཕྱོགས་བཞིར་གཏོར༔ ཡང་ན་འབབ་ཆུའི་ནང་དུ་སྐྱིལ༔ འདི་ལ་མ་ཆག་བརྩོན་གྱུར་ན༔ ཐུན་མོང་དངོས་གྲུབ་སྤྲིན་བཞིན་འདུ༔ ཁྱད་པར་ཟས་སྐོམ་འདུ་བ་རྒྱས༔ ཁམས་རྒྱས་སྟོབས་འཕེལ་རྒས་སྲ་ཞིང་༔ ཕ་རོལ་སྐྱེ་འགྲོ་ཤུགས་ཀྱིས་འདུ༔ བསོད་ནམས་རྒྱས་དུས་མཆོད་སྦྱིན་འབུངས༔ ཕྱི་མའང་བྱང་ཆུབ་མངོན་དུ་བྱེད༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་དྷེ་ཉི་མ་གྲགས་པས་གངས་རིའི་རྒྱལ་པོ་ཏེ་སེ་ནས་གདན་དྲངས་ཤིང་ཤོག་སེར་ལས་ཕབ་པའོ། །མངྒ་ལཾ།། །།
ཛམ་དམར་གྱི་ལས་བྱང་ཁ་སྐོང་།
བླ་མ་བདེ་མཆོག་འཁོར་ལོའི་ཆ་ལག་ལས་བྱུང་བ་ཛམ་དམར་གྱི་ལས་བྱང་ཁ་སྐོང་བཞུགས། མགོན་པོ་ཛམ་བྷ་ལ་ལ་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་བརླབ་ཅིང་དངོས་གྲུབ་རྣམ་གཉིས་སྩལ་དུ་གསོལ་ལོ། །ལྷག་པའི་ལྷ་འདིའི་སྒྲུབ་པ་ལ་འཇུག་ཚེ་བསྙེན་སྒྲུབ་ཀྱི་ཁ་སྐོང་ལས་ཀྱི་བྱང་བུའི་རིམ་པ་ནི། སྒྲུབ་རྫས་སྟ་གོན་མཐོང་བརྒྱུད་བཞིན་བྱ་ཞིང་། བཀའ་བསྒོ་མཚམས་གཅོད་སྐྱབས་སེམས་མཆོད་རྫས་བྱིན་བརླབས་ལས། དང་པོ་བཀའ་བསྒོ་བ་ནི། རང་ཉིད་རྟ་མགྲིན་དམར་པོར་བསྒོམ་ཞིང་། ཧཱུྃ། ང་ནི་དབང་ཆེན་ཁྲོ་བོའི་རྒྱལ། །དབང་གི་དཀྱིལ་འཁོར་ཆེན་པོ་འདིར། །འདུ་བའི་རིགས་རྣམས་མ་གཏོགས་པ། །དམ་མེད་བསེ་རག་བྲེལ་ཕོངས་ཚོགས། །ཆངས་བུའི་གཏོར་མ་འདི་ཁྱེར་ལ། །སྐད་ཅིག་ཉིད་ལ་ཕྱིར་དེངས་ཤིག །ཨཱོཾ་ཧྱ་གྷྲཱི་ཝ་ཧུ་ལུ་ཧུ་ལུ་ཧཱུྃ་ཕཊ༔ ཨཱོཾ་སུམ་བྷ་ནི་སོགས། མཚམས་གཅོད་པ་ནི། ཧཱུྃ། དབང་ཆེན་ཁྲོ་བོའི་ཐུགས་ཀ་ནས། །ཡེ་ཤེས་ལྔ་ཡི་རོལ་པ་ལས། །དཀར་སེར་དམར་ལྗང་མཐིང་གའི་གུར། །རིམ་ལྔ་མེ་དཔུང་ཁྲོ་བོས་གཏམས། །འབྱུང་པོའི་ཚོགས་རྣམས་མ་འདའ་ཞིག །བྷྲཱུྃ་བཛྲ་རཀྵ་རཀྵ་ཡེ་སྭཱ་ཧཱཿ སྐྱབས་སུ་འགྲོ་བ་ནི། ཧཱུྃ། ས་བརྒྱད་གནོད་སྦྱིན་དབང་གི་རྗེ། ཛམ་ལྷ་ཡབ་ཡུམ་སྲས་གསུམ་ལ། །དེང་ནས་བཟུང་སྟེ་བྱང་ཆུབ་བར། །གུས་པ་ཆེན་པོས་སྐྱབས་སུ་མཆི། །སེམས་བསྐྱེད་པ་ནི། ཧཱུྃ། སངས་རྒྱས་བསྟན་དང་འགྲོ་བའི་དོན༔ བྱང་ཆུབ་དམ་པར་སེམས་བསྐྱེད་དེ༔ དབང་མཛད་ལྷ་ཡི་ཏིང་འཛིན་གྱིས༔ འགྲོ་བ་སྒྲོལ་བར་དམ་བཅའ་འོ༔ མཆོད་པ་བྱིན་བརླབ་ནི༔ ཧཱུྃ། དབང་ཆེན་ཁྲོ་བོའི་ཐུགས་ཀ་ནས༔ འོད་ཟེར་འཕྲོས་པའི་ཆོ་འཕྲུལ་གྱིས༔ མཆོད་པའི་མ་དག་འབགས་བཙོག་ཚོགས་སྦྱངས༔ འདོད་ཡོན་མཆོད་སྤྲིན་བདུད་རྩིར་བསྒྱུར༔ ཨཱོཾ་ཨཱཿཧཱུྃ་སརྦ་ཛྙཱ་ན་པཱུ་ཙ་ས་མ་ཡེ་སྭཱ་ཧཱ༔ གཉིས་པ་དངོས་གཞིའི་ལས་རིམ་བདུན་ལས། གཞལ་ཡས་ལྷ་བསྐྱེད་སྤྱན་འདྲེན་བཞུགས་གསོལ་ཕྱག་འཚལ་མཆོད་འབུལ་བསྟོད་པའོ། །དང་པོ་གཞལ་ཡས་ལྷ་བསྐྱེད་ནི། ཧཱུྃ། གཟུགས་སྣང་སྟོང་པའི་ངང་ཉིད་ལས༔ དབང་གི་ཕོ་བྲང་འོད་དམར་ཀློང་༔ ཉི་ཟླ་པདྨའི་གདན་སྟེང་དུ༔ ཛཾ་ཧྲཱིཿདཱི་གསུམ་ས་བོན་ལས༔ འོད་འཕྲོས་འཕགས་མཆོད་ལས་སྒྲིབ་སྦྱངས༔ དབང་གི་ལྷ་ཚོགས་བྱིན་རླབས་བསྡུས༔ ཐུགས་སྲོག་ཡིག་འབྲུ་གསུམ་ལ་ཐིམ༔ སྐད་ཅིག་གནས་གྱུར་དྲན་རྫོགས་སུ༔ འབྲུག་དམར་གློག་དམར་འཁྱུག་འདྲའི་སྟེང་༔ འཕགས་མཆོག་མགོན་པོ་ཛམ་ལྷ་དམར༔ ཞལ་གཅིག་འཛུམ་མདངས་སྐུ་ལུས་སྒེག༔ ཕྱག་གཡས་ནོར་བུ་དབང་རྒྱལ་བསྣམས༔ ཐུགས་ཀར་གཏོད་པའི་ཚུལ་གྱིས་འཛིན༔ ཕྱག་གཡོན་ནེའུ་ལེ་སྐུ་རྐེད་བསྟེན༔ གཡས་བསྐུམ་གཡོན་བརྐྱངས་དོར་སྟབས་བགྱིང་༔ སྤྱན་གསུམ་སྨ་ར་སྨིན་མ་སེར༔ དབུ་སྐྲ་ཐོར་ཅོག་རྒྱན་གྱིས་བརྒྱན༔ སྣ་ཚོགས་རྒྱན་སྤྲས་དར་དཔྱངས་འཕྱོ༔ འོད་དམར་འཁྱིལ་བའི་ཀློང་དུ་བསྒོམ༔ དཱི་ལས་གཡས་སུ་ནོར་བདག་ནི༔ མི་དམར་ལྕགས་ཀྱུ་བུམ་པ་ཅན༔ ཞེ་སྡང་འབར་བའི་ཕོ་མཚན་བསྒྲེངས༔ སྨ་ར་སྨིན་མ་རལ་པ་གཟེངས༔ ཞབས་གཉིས་གར་སྟབས་འགྱིང་བག་ལྡན༔ གཡོན་དུ་ཧྲཱིཿལས་ལྷ་མོ་དམར༔ ཕྱག་གཡས་ཟངས་ཀྱི་གྲི་གུག་དམར༔ ཕྱག་གཡོན་དབང་གི་ཞགས་པ་བསྣམས༔ རིན་ཆེན་རྒྱན་ལྡན་གར་སྟབས་ཅན༔ རལ་པའི་ཅོད་པན་སིལ་བུར་འཕྱོ༔ གཟི་མདངས་འོད་དང་ལྡན་པར་བསྐྱེད༔ བདག་མདུན་གནས་གསུམ་འོད་ཟེར་གྱིས༔ ཡེ་ཤེས་ལྷ་ཚོགས་སྤྱན་དྲངས་གྱུར༔ སྤྱན་འདྲེན་པ་ནི༔ ཧཱུྃ། རི་བོ་ཆེན་པོའི་བྱང་གི་ཕྱོགས། །གནོད་སྦྱིན་དབང་གི་ཕོ་བྲང་ནས། ཛམ་ལྷ་དམར་པོ་གཤེགས་སུ་གསོལ། །ནོར་བདག་དམར་པོ་གཤེགས་སུ་གསོལ། །ཡུམ་མཆོག་ལྷ་མོ་གཤེགས་སུ་གསོལ། །ནོར་ལྷ་རྒྱ་མཚོ་གཤེགས་སུ་གསོལ། །ཡེ་ཤེས་འཇིག་རྟེན་ཐམས་ཅད་ནས། །དབང་གི་ལྷ་ཚོགས་གཤེགས་སུ་གསོལ། །གདུང་བའི་ཡིད་ཀྱིས་སྤྱན་འདྲེན་ན། །ཐུགས་རྗེའི་ཤུགས་ཀྱིས་གཤེགས་ནས་ཀྱང་། །མོས་པའི་བུ་ལ་དངོས་གྲུབ་སྩོལ། །ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ༔ བཛྲ་ས་མ་ཡ་ཛཿཛཿ བཞུགས་གསོལ་ནི། ཧཱུྃ། དབང་ཆེན་འབར་བའི་ཕོ་བྲང་འདིར། །ཛམ་ལྷ་ཡབ་ཡུམ་སྲས་གསུམ་བཅས། །འཁོར་འདས་ཀུན་ནས་བྱིན་ཕོབ་ལ། །འདུ་འབྲལ་མེད་པར་བཞུགས་སུ་གསོལ། །ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ༔ ཏིཥྛ་ལྷན། ཕྱག་ནི། ཧཱུྃ། དབང་མཛད་གནོད་སྦྱིན་ཛམ་ལྷ་དམར། །ཡུམ་མཆོག་ལྷ་མོ་དམར་མོ་དང་༔ ཐུགས་སྤྲུལ་སྲས་མཆོག་དམར་པོ་སྟེ༔ ནོར་ལྷ་རྒྱ་མཚོར་ཕྱག་འཚལ་ལོ། །ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ༔ ཨ་ལ་ལ་ཧོ༔ མཆོད་པ་ནི། ཧཱུྃ། འཕགས་པ་ཡབ་ཡུམ་སྲས་གསུམ་དང་། །དབང་མཛད་དབང་གི་ལྷ་ཚོགས་ལ། ཕྱི་ནང་གསང་བའི་མཆོད་པའི་ཚོགས༔ གཉིས་སུ་མེད་པར་འབུལ་ལགས་ན༔ དགྱེས་པའི་ཚུལ་གྱིས་བཞེས་སུ་གསོལ། ཨཱོཾ་ཛམ་བྷ་ལ་ཧྲཱིཿདཱ་ཡ་ཧཱུྃ་ཧཱུྃ༔ སརྦ་པཱུ་ཙ་ས་མ་ཡ་ཧོ༔ ཧཱུྃ། རིན་ཆེན་སྣོད་དུ་སྦྱར་བ་ཡི༔ བྷ་ལིང་རྒྱན་ལྡན་ཞལ་ཟས་བཤོས༔ དུམ་གཅིག་བྷན་དྷ་འབར་བ་རུ༔ བདུད་རྩི་སྨན་དང་རཀྟ་དམར༔ ཡབ་ཡུམ་གསང་བའི་མཁའ་ཀློང་དུ༔ ཐབས་ཤེས་དཀར་དམར་བྱང་ཆུབ་སེམས༔ དབང་གི་དཀྱིལ་འཁོར་ལྷ་ལ་འབུལ༔ བཞེས་ནས་དངོས་གྲུབ་སྩལ་དུ་གསོལ༔ ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ༔ པཉྩ་ཨ་མྲྀ་ཏ་བྷ་ལིངྟ་རཀྟ་བྷོ་དྷི་ཙིཏྟ་ཁ་ཁ་ཁཱ་ཧི་ཁཱ་ཧི༔ བསྟོད་པ་ནི། ཧཱུྃ། མི་ཟད་རིན་ཆེན་འདོདའབྱུང་གནས། །འབྲུག་དམར་གློག་དམར་འཁྱུག་འདྲའི་སྟེང་། །འགྱིང་བག་ཚུལ་གྱིས་བཞུགས་པའི་ལྷ༔ ཛམ་ལྷ་དམར་པོར་ཕྱག་འཚལ་བསྟོད། །གཡས་སུ་ནོར་བདག་གནོད་སྦྱིན་དམར། །གཡོན་དུ་ཡུམ་མཆོག་ལྷ་མོ་སྟེ། །ཡབ་ཡུམ་སྲས་གསུམ་གཙོ་དང་འཁོར། །ནོར་ལྷ་རྒྱ་མཚོར་ཕྱག་འཚལ་བསྟོད། །ལྟ་སྒོམ་ཉམས་ཆག་འགལ་འཁྲུལ་བཤགས། །མཆོག་དང་ཐུན་མོང་དངོས་གྲུབ་སྩོལ། །ཡིག་བརྒྱ་བཟླ། འཛབ་ནི། ཧཱུྃ༔ བདག་མདུན་བསྒོམ་པའི་ལྷ་གསུམ་གྱི༔ ཐུགས་ཀར་ཉི་མའི་དཀྱིལ་འཁོར་སྟེང་༔ ཛཾ་ཧྲཱིཿདཱི་གསུམ་ས་བོན་མཐར༔ སྔགས་དང་ཕྲེང་ཐག་ཐབས་ཤེས་འཁོར༔ འོད་འཕྲོས་སངས་རྒྱས་བྱང་སེམས་མཆོད༔ བྱིན་རླབས་བསྡུས་ནས་རང་ལ་ཐིམ༔ ཛམ་ལྷ་ཡུམ་སྲས་གཙོ་འཁོར་གསུམ༔ ནུས་སྟོབས་གཟི་བརྗིད་སྟོང་ཁམས་འཁྲུག༔ འཛམ་གླིང་འཇིག་རྟེན་ཟས་ནོར་དང་༔ བྱང་ཕྱོགས་གནོད་སྦྱིན་ལོངས་སྤྱོད་དཀོར༔ ཐམས་ཅད་ཛམ་ལྷའི་ཟེར་གྱིས་བསྡུས༔ ཕོ་བརྒྱུད་འགྲོ་བ་སྲས་ཀྱིས་བཀུག༔ མོ་བརྒྱུད་སྐྱེ་འགྲོ་ཡུམ་གྱིས་བཀུག༔ འཛམ་གླིང་ཕོ་མོ་ཟས་ནོར་དབང་༔ སྐད་ཅིག་ཉིད་ལ་བསྡུས་ནས་ཀྱང་༔ དབང་བསྡུས་ཟིལ་མནན་བཀའ་ཉན་ཅིང་༔ དངོས་གྲུབ་ཐམས་ཅད་ཐོབ་པར་བསྒོམ༔ མ་ཡེངས་སྙིང་པོའི་འཛབ་ལ་འབད༔ ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ སྒྲུབ་གཞུང་ལྟར་བཟླས་ཤམ་བུའང་སྦྱར། ཐུན་མཚམས་གོང་གི་མཆོད་བསྟོད་བྱ། རྗེས་ཀྱི་རིམ་པ་ནི། ཚོགས་བསང་ཚོགས་མཆོད་ལྷག་མ་བསྔོ། ཐུགས་དམ་བསྐུལ། དངོས་གྲུབ་ཞུ་ཆད་ཐོ་བསྟན་མ་བཀྲ་ཤིས་དང་བསྐྱེད་རིམ་བསྡུ་བའོ། །ཚོགས་བསང་བ་ནི། ཧཱུྃ། འདོད་ཡོན་ཚོགས་ཀྱི་ཞལ་ཟས་རྣམས༔ དབང་མཛད་ལྷ་ཡི་ཏིང་འཛིན་གྱིས༔ བསྲེགས་གཏོར་སྦྱངས་བཀྲུས་བདུད་རྩིར་བསྒྱུར༔ འདོད་ཡོན་མཆོད་སྤྲིན་རྒྱ་མཚོར་འཁྱིལ༔ ཧ་ཧོ་གྷ་ན་པཱུ་ཙ་ཧོ༔ མཆོད་པ་ནི། ཧཱུྃ༔ ཞལ་ཟས་ཚོགས་ཀྱི་མཆོད་པ་འདི༔ འཁོར་འདས་སྟོང་གི་བཅུད་བསྡུས་ཤིང་༔ འབྲུ་བཅུད་སྣ་ཚོགས་རོ་སྦྱར་ནས༔ མཆོད་སྤྲིན་རྒྱ་མཚོར་བསྒྱུར་ཞིང་འབུལ༔ བཞེས་ནས་དངོས་གྲུབ་སྩལ་དུ་གསོལ༔ ཨཱོཾ་ཛམ་བྷ་ལ་ཧྲཱིཿདཱ་ཡ་ཧཱུྃ་ཧཱུྃ་གྷ་ན་པཱུ་ཙ་ས་མ་ཡ་ཁཱ་ཧི་ཁཱ་ཧི༔ ལྷག་མ་ནི༔ ཧཱུྃ༔ དབང་མཛད་དབང་གི་འཕྲིན་ལས་བདག༔ ལྷ་མོ་ཀླུ་མོ་གནོད་སྦྱིན་མོ༔ དྷཀྐི་སྡེ་བཞི་བྲན་གཡོག་འབུམ༔ ལྷག་མའི་གཏོར་མ་འདི་ལོངས་ལ༔ དབང་གི་འཕྲིན་ལས་གྲུབ་པར་མཛོད༔ དྷཀྐི་ནི་ས་མ་ཡ་ཁཱ་ཧི་ཁཱ་ཧི༔ ཐུགས་དམ་བསྐུལ་བ་ནི། ཧཱུྃ༔ བཞེངས་ཤིག་བཞེངས་ཤིག་ལྷ་ཆེན་པོ༔ ཛམ་ལྷ་ཡབ་ཡུམ་སྲས་གསུམ་བཅས། །གནོད་སྦྱིན་ནོར་ལྷ་རྒྱ་མཚོ་བཞེངས། །རི་རབ་བྱང་ནས་སྐུ་སྐྱོད་ལ༔ ཁམས་གསུམ་ཐམས་ཅད་དབང་དུ་སྡུས༔ སྲིད་གསུམ་ཐམས་ཅད་ཟིལ་གྱིས་གནོན༔ སྟོང་གསུམ་ཀུན་གྱི་བཅུད་སྡུས་ལ༔ རྣལ་འབྱོར་བདག་ལ་དངོས་གྲུབ་སྩོལ༔ འཛམ་གླིང་ལོ་ཀ་དབང་སྡུས་ལ༔ ཐམས་ཅད་བདག་གི་བྲན་དུ་བཀོལ༔ ཁྱོད་ནི་ཆགས་མཛད་དབང་གི་ལྷ༔ སྔོན་ཚེ་དབང་གི་དངོས་གྲུབ་བརྙེས༔ ད་ལྟ་དབང་གི་འཕྲིན་ལས་མཛད༔ དབང་མཛད་ཐུགས་རྗེའི་ལྕགས་ཀྱུ་ཡིས༔ དམིགས་བྱའི་དཀར་ནག་མཚམས་ནས་བཟུང་༔ རང་དབང་མེད་པར་བཀུག་ནས་ཀྱང་༔ བདག་གི་དབང་དུ་བསྡུ་བར་མཛོད༔ བརྒྱན་པའི་མཆོད་གཏོར་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་མཛོད༔ འོད་དམར་དབང་གི་ཀློང་ཆེན་ནས། ཡེ་ཤེས་འཇིག་རྟེན་དབང་གི་ལྷ༔ མཁའ་འགྲོ་ཆོས་སྐྱོང་སྲུང་མར་བཅས༔ སྐུ་ཡི་གར་བསྒྱུར་སྟོང་གསུམ་ཁྱབ༔ གསུང་གི་ང་རོས་སྲིད་གསུམ་འགེངས༔ ཐུགས་ཀྱིས་འཁོར་འདས་དབང་དུ་སྡུད༔ ཁྱེད་རྣམས་ཡེ་ཤེས་རྩལ་འཆང་ཞིང་༔ ཁྱེད་རྣམས་ཐུགས་རྗེའི་ཤུགས་ཕྱུངས་ལ༔ ལྷ་མི་ཀུན་གྱི་སྙིང་ནས་དྲོངས༔ མགོ་ནག་མི་ཡི་འགྲམ་པ་ཆོག༔ ཕོ་རྒྱུད་རྒྱལ་འབངས་སེམས་འཕྱོར་ཆུག༔ མོ་རྒྱུད་ཆགས་པའི་རྦ་ཀློང་གཡོས༔ རྐང་བཞི་དུད་འགྲོ་དབང་མེད་སྡུས༔ རིན་ཆེན་འབྲུ་ནོར་ཆར་པ་ཕོབ༔ ཟས་གོས་དཔལ་འབྱོར་དངོས་གྲུབ་སྩོལ༔ དངོས་གྲུབ་ཞུ་བ་ནི༔ ཧཱུྃ༔ དབང་ཆེན་དབང་གི་ལྷ་ཚོགས་རྣམས༔ འགྱུར་མེད་སྐུ་ཡི་དཀྱིལ་འཁོར་ནས༔ འཆི་མེད་ཚེ་ཡི་དངོས་གྲུབ་སྒྲུབ་སྩོལ༔ འགག་མེད་གསུང་གི་དཀྱིལ་འཁོར་ནས༔ ཚངས་དབྱངས་དྲུག་ཅུའི་དངོས་གྲུབ་སྩོལ༔ སྤྲོས་མེད་ཐུགས་ཀྱི་དཀྱིལ་འཁོར་ནས༔ ཕྱག་རྒྱ་དགའ་བཞིའི་དངོས་གྲུབ་སྩོལ༔ ཡོན་ཏན་རེ་སྐོང་དཀྱིལ་འཁོར་ནས༔ ཁམས་གསུམ་དབང་བསྡུད་དངོས་གྲུབ་སྩོལ༔ ཕྲིན་ལས་འགྲོ་འདུལ་དཀྱིལ་འཁོར་ནས༔ སྲིད་གསུམ་ཟིལ་གནོན་དངོས་གྲུབ་སྩོལ༔ རིན་ཆེན་རྣམ་ལྔའི་དངོས་གྲུབ་སྩོལ། །བང་མཛོད་འབྲུ་ཡི་དངོས་གྲུབ་སྩོལ། །ལྷབ་ལྷུབ་གོས་ཀྱི་དངོས་གྲུབ་སྩོལ། དར་ཟབ་སྣ་ཚོགས་དངོས་གྲུབ་སྩོལ། རྨ་གཡང་ཟས་ཀྱི་དངོས་གྲུབ་སྩོལ། འཕེན་པོ་མི་ཡི་དངོས་གྲུབ་སྩོལ། རྐང་བཞི་དུད་འགྲོའི་དངོས་གྲུབ་སྩོལ། བརྒྱུད་འཛིན་རིགས་ཀྱི་དངོས་གྲུབ་སྩོལ། ཁྱེའུ་སྲིད་ཀྱི་དངོས་གྲུབ་སྩོལ། ཡུལ་ཞིང་དཔལ་འབྱོར་དངོས་གྲུབ་སྩོལ། སྙན་གྲགས་གདུལ་བྱའི་དངོས་གྲུབ་སྩོལ། ཕྲིན་ལས་རྣམ་བཞིའི་དངོས་གྲུབ་སྩོལ༔ མཆོག་དང་ཐུན་མོང་ཟད་མེད་གཏེར༔ དངོས་གྲུབ་མ་ལུས་བདག་ལ་སྩོལ༔ ཨཱོཾ་ཛམ་བྷ་ལ་ཧྲཱིཿདཱ་ཡ་ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཕ་ལ་ཧཱུྃ༔ ཆད་ཐོ་ནི། ཧཱུྃ༔ སྔོན་ཚེ་སྐུ་གསུམ་སྟོན་པ་དང་། །རྒྱལ་བ་ཤཱཀ་ཐུབ་པད་འབྱུང་གིས། །བཀའ་དང་དམ་ལ་བཞག་པ་ཡི། །ཕྱི་རྒྱུད་འཇིག་རྟེན་སྐྱོང་རྣམས་དང་། །ཁྱད་པར་གནོད་སྦྱིན་བཀའ་འཁོར་སྐྱོང་། །རྒྱན་གྱི་མཆོད་གཏོར་འདི་བཞེས་ལ། །རྣམ་བཞིའི་འཕྲིན་ལས་བསྒྲུབ་པ་དང་། །དཔལ་འབྱོར་ཕུན་ཚོགས་དངོས་གྲུབ་སྩོལ༔ བཅོལ་བའི་འཕྲིན་ལས་གྲུབ་པར་མཛོད། །བསྟན་མ་ནི། ཧཱུྃ༔ ལྷ་མོ་ཀླུ་མོ་གནོད་སྦྱིན་མོ༔ བདུད་མོ་ལ་སོགས་སྨན་མོ་འབུམ༔ བཤལ་ཆུའི་གཏོར་མ་འདི་བཞེས་ལ༔ སྔོན་ཚེ་དབང་ཆེན་བཀའ་ལུང་བཞིན༔ དམ་བཅས་དགོངས་ལ་འཕྲིན་ལས་མཛོད༔ དྷཀྐི་རཀྨོ་མ་མ་བྷ་ལིངྟ་ཁཱ་ཧི་ཁཱ་ཧི༔ བཀྲ་ཤིས་ནི། ཧཱུྃ༔ འོད་དམར་དབང་གི་ཕོ་བྲང་ནས། །ཛམ་ལྷ་ཡབ་ཡུམ་སྲས་གསུམ་དང་། །རྩ་གསུམ་ཆོས་སྐྱོང་སྲུང་མར་བཅས། །དཀྱིལ་འཁོར་ལྷ་ཚོགས་བཀྲ་ཤིས་ཤོག །བསྡུ་ཆོག་ནི། ཧཱུྃ༔ ལྷ་ཚོགས་སྣང་སྟོང་ཆོས་ཀྱི་སྐུ༔ མ་འགགས་རོལ་པ་རང་སར་གྲོལ༔ གཟུང་འཛིན་ཡོངས་གྲོལ་ཨ་ལ་ལ༔ གཤེགས་བཞུད་མེད་པར་དབྱིངས་སུ་མུ༔ ཞེས་དང་། བསྔོ་སྨོན་གྱིས་རྒྱས་གདབ། བསྙེན་སྒྲུབ་མཆོད་བསྟོད་དམ་ཚིག་གཞུང་ལྟར་བསྲུང་། ཞེས་པ་འདི་ཡང་ཉམས་སུ་ལེན་པར་འདོད་པ་རྣམས་ལ་མཁོ་བར་སེམས་ཏེ། ཛམ་ལྷ་རང་གཞུང་ལ་ལྷ་ཆེན་གྱིས་ཁ་བསབ་མེད་དུ་མི་རུང་བ་ཅུང་ཟད་ཀྱིས་ཟུར་བརྒྱན་ཏེ་ཁམས་པ་ཉི་མ་གྲགས་པས་བྲིས། གཏེར་ཚག་མེད་པ་རྣམས་ཁ་སྐོང་གི་ཟུར་རྒྱན་ཡིན། རྒྱུན་ལྡན་ཉམས་ལེན་རྒྱ་ཚོས་ཀྱིས་བྱུག་པ་འདོན་བྱ་ཡིན་པས་ངེས་པར་མཛོད། །མངྒཱ་ལཾ།། །།
ཛམ་དམར་གྱི་གསོལ་འདེབས།
ཛམ་དམར་གྱི་གསོལ་འདེབས་བདུད་རྩི་ཁཱ་ཧི་བསྐང་བ་དང་བཅས་བཞུགས། ཨཱོཾ་ཨཱཿཧཱུྃ་ཆོས་སྐུ་རྡོ་རྗེ་འཆང་ཆེན་ལ་གསོལ་བ་འདེབས་སོ། །ལོངས་སྐུ་ཕྱག་ན་རྡོ་རྗེ་ལ་གསོལ་བ་འདེབས་སོ། །སྤྲུལ་སྐུ་པདྨ་འབྱུང་གནས་ལ་གསོལ་བ་འདེབས་སོ། །མཁའ་འགྲོ་ཡེ་ཤེས་མཚོ་རྒྱལ་ལ་གསོལ་བ་འདེབས་སོ། །ལོ་ཆེན་ཀླུ་ཡི་དབང་པོ་ལ་གསོལ་བ་འདེབས་སོ། །རིག་འཛིན་ཉི་མ་གྲགས་པ་ལ་གསོལ་བ་འདེབས་སོ། །ཐུགས་སྲས་ཨུ་རྒྱན་བསྟན་འཛིན་ལ་གསོལ་བ་འདེབས་སོ། །ཐེག་མཆོག་བསྟན་པའི་རྒྱལ་མཚན་ལ་གསོལ་བ་འདེབས་སོ། །དྲིན་ཅན་རྩ་བའི་བླ་མ་ལ་གསོལ་བ་འདེབས་སོ། །འཕགས་མཆོག་ཛམ་ལྷ་དམར་པོ་ལ་གསོལ་བ་འདེབས་སོ། །ཡུམ་མཆོག་ལྷ་མོ་དམར་མོ་ལ་གསོལ་བ་འདེབས་སོ། །སྲས་མཆོག་ནོར་བདག་དམར་པོ་ལ་གསོལ་བ་འདེབས་སོ། །བཀའ་སྲུང་རྡོ་རྗེ་ལེགས་པ་ལ་གསོལ་བ་འདེབས་སོ། །གཏེར་སྲུང་ལྷ་བཙན་ཆེན་པོ་ལ་གསོལ་བ་འདེབས་སོ། །ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཕ་ལ་ཧཱུྃ། གསུམ། ལག་མཆོད་ཁཱ་ཧི་ལ། །ཆོས་སྐུ་རྡོ་རྗེ་འཆང་ཆེན་ཞལ་དུ་སརྦ་པཉྩ་ཨ་མྲྀ་ཏ་ལ་ཁཱ་རཾ་ཁཱ་ཧི། སོགས། བསྐང་བ་ལ་ཡང་། ཧཱུྃ། བསྐང་ངོ་མཆོད་དོ་ཐུགས་དམ་གཉེན་པོ་བསྐང་། །ཆོས་སྐུ་རྡོ་རྗེ་འཆང་ཆེན་ཐུགས་དམ་བསྐང་། །ལོངས་སྐུ་ཕྱག་ན་རྡོ་རྗེའི་ཐུགས་དམ་བསྐང་། །སྤྲུལ་སྐུ་པདྨ་འབྱུང་གནས་ཐུགས་དམ་བསྐང་། །མཁའ་འགྲོ་ཡེ་ཤེས་མཚོ་རྒྱལ་ཐུགས་དམ་བསྐང་། །ལོ་ཆེན་ཀླུ་ཡི་དབང་པོའི་ཐུགས་དམ་བསྐང་། །རིག་འཛིན་ཉི་མ་གྲགས་པའི་ཐུགས་དམ་བསྐང་། །ཐུགས་སྲས་ཨུ་རྒྱན་བསྟན་འཛིན་ཐུགས་དམ་བསྐང་། །ཐེག་མཆོག་བསྟན་པའི་རྒྱལ་མཚན་ཐུགས་དམ་བསྐང་། །དྲིན་ཅན་རྩ་བའི་བླ་མའི་ཐུགས་དམ་བསྐང་། །འཕགས་མཆོག་ཛམ་ལྷ་དམར་པོའི་ཐུགས་དམ་བསྐང་། །ཡུམ་མཆོག་ལྷ་མོ་དམར་མོའི་ཐུགས་དམ་བསྐང་། །སྲས་མཆོག་ནོར་བདག་དམར་པོའི་ཐུགས་དམ་བསྐང་། །བཀའ་བསྲུང་རྡོ་རྗེ་ལེགས་པའི་ཐུགས་དམ་བསྐང་། །གཏེར་བསྲུང་ལྷ་བཙན་ཆེན་པོའི་ཐུགས་དམ་བསྐང་། ཐུགས་དམ་བསྐང་ལ་མཆོག་ཐུན་དངོས་གྲུབ་སྩོལ། །ཉམས་ཆག་རྟོག་སྒྲིབ་ཐམས་ཅད་འཐོལ་ལོ་བཤགས། །ཞེས་དང་ཡིག་བརྒྱ་བརྗོད། །ཅེས་པ་འདི་ཉི་མ་གྲགས་པས་ཁ་སྐོང་དུ་སྦྱར་བའོ། །མངྒཱ་ལཾ། ༈ཧཱུྃ། སྐུ་གསུམ་ཞིང་ཁམས་ཡངས་པ་ནས། །རྩ་བརྒྱུད་བླ་མའི་ཐུགས་དམ་བསྐང་། །དབང་མཛད་དབང་གི་ཕོ་བྲང་ནས། །མགོན་པོ་ཛམ་ལྷ་ཡུམ་སྲས་བཅས། །གཙོ་འཁོར་སྤྲུལ་པའི་ཐུགས་དམ་བསྐང་། །བཀའ་ཡི་འཕྲིན་ལས་དཀྱིལ་འཁོར་ནས། །དམ་ཅན་གཏེར་སྲུང་ཐུགས་དམ་བསྐང་། །ཉམས་ཆག་འགལ་འཁྲུལ་ཅི་མཆིས་བཤགས། །བཅོལ་བའི་འཕྲིན་ལས་གྲུབ་པར་མཛོད། །མངྒ་ལཾ།། །།༈ཧཱུྃ། དབང་མཛད་དབང་གི་ལྷ་ཚོགས་རྣམས། །ཐབས་ཤེས་རོལ་པའི་བྲོ་བརྡུང་བས། །འཇུར་གེགས་བསེ་རག་ལན་ཆགས་ཚོགས། །ནམ་ཡང་ལྡང་བའི་གོ་སྐབས་མེད། །ཆོས་ཀྱི་དབྱིངས་སུ་རྒྱས་གདབ་བོ། །ཧཱུྃ་ཧཱུྃ་ལཾ་ལཾ་སྟམྦྷ་ཡ་ནན། ༈བསྔོ་སྨོན་ནི། །ཟག་བཅས་ཟག་མེད་དགེ་བ་ཡིས། །བདག་སོགས་མཁའ་མཉམ་ལུས་ཅན་ཀུན། །ཚོགས་གཉིས་རབ་རྫོགས་བྱང་ཆུབ་ཀྱི། །འབྲས་བུ་མངོན་དུ་འགྱུར་བར་ཤོག །༈ཧཱུྃ། འདོད་ཡོན་ལོངས་སྤྱོད་བསོད་ནམས་དཔལ། །དངོས་གྲུབ་ཟད་མེད་ཆུ་བོའི་རྒྱུན། །ཡིད་བཞིན་རེ་བ་སྐོང་མཛད་པའི། །བཀྲ་ཤིས་དེས་ཀྱང་དངོས་གྲུབ་སྩོལ། །མངྒ་ལཾ་སིདྡྷི་ཛཾ་ཨ་ལ་ལ་ཧཱུྃ།། །།
ཛམ་བྷ་ལའི་ཆུ་སྦྱིན་ཟུར་གསལ།
ཛམ་བྷ་ལའི་ཆུ་སྦྱིན་ཟུར་གསལ་སྒོམ་སྡེ་པས་སྦྱར་བ་བཞུགས། ཛམ་ལའི་ཆུ་སྦྱིན་གཏོང་བར་འདོད་པས། ཟངས་གཞོང་རྣམས་སུ་ཆུ་བླུགས་སྦྲན་ཏེ། ཨཱོཾ་ཨཱཿཧཱུྃ། གསུམ། ཧཱུྃ། བདག་གཞན་དབུལ་བ་རྒྱུན་གཅོད་ཕྱིར། །ཛམ་བྷ་ལྷ་ལ་སྐྱབས་སུ་མཆི། །བྱང་ཆུབ་མཆོག་ཏུ་སེམས་བསྐྱེད་དོ། །མདུན་དུ་ཛམ་ལྷ་སྐུ་མདོག་དམར། །ཞལ་གཅིག་ཕྱག་གཉིས་སྐུ་ལུས་སྒེག༔ ཕྱག་གཡས་ནོར་བུ་དབང་རྒྱལ་བསྣམས༔ ཐུགས་ཀར་གཏོད་པའི་ཚུལ་གྱིས་འཛིན། །ཕྱག་གཡོན་ནེའུ་ལེ་སྐུ་རྐེད་བརྟེན། །གཡས་བསྐུམས་གཡོན་བརྐྱང་དོར་སྟབས་འགྱིངས། །སྤྱན་གསུམ་སྨ་ར་སྨིན་མ་སེར། །དབུ་སྐྲ་ཐོར་ཅོག་རྒྱན་གྱིས་བརྒྱན། །སྣ་ཚོགས་རྒྱན་ལྡན་དར་དཔྱངས་འཕྱོ། །འོད་དམར་འཁྱིལ་བའི་ཀློང་དུ་བསྒོམ། །གཞན་ཡང་ནོར་ལྷ་རྒྱ་མཚོའི་ཚོགས། །དཔག་ཏུ་མེད་པས་བསྐོར་བར་བསྒོམ། །དམ་ཚིག་ཡེ་ཤེས་གཉིས་མེད་གསལ། །ཐུགས་ཀའི་ནོར་བུ་དབང་རྒྱལ་ལས། །འོད་ཟེར་མེ་ལྕེ་དམར་པོར་འབར། །བྱིན་གྱིས་བརླབས་པའི་ཆུ་ཕུལ་བས། །སྐོམ་པའི་གདུང་བ་ཡོངས་སུ་ཚིམ། །འདོད་པའི་དངོས་གྲུབ་ཀུན་ཐོབ་གྱུར། ཅེས་བརྗོད་ཅིང་། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྭཱ་ཧཱ༔ བརྒྱ་རྩ་བརྒྱད་ཀྱིས་ཆུ་གཙང་འབུལ། ཨརྒྷཾ་སོགས་ཀྱིས་མཆོད། ཧཱུྃ། ནོར་གྱི་དབང་ཕྱུག་ཛམ་བྷ་ལྷ། །དབུལ་བ་སེལ་བའི་ཀུ་ལེ་ཡུམ། །གནོད་སྦྱིན་ནོར་ལྷའི་ཚོགས་རྣམས་ལ། །མཆོད་པ་དམ་པ་འདི་འབུལ་བཞེས། །འཛམ་གླིང་ཟས་ནོར་དཔལ་འབྱོར་དབང་། །ཁ་རྗེ་དབང་ཐང་ཚེ་བསོད་སྟོབས། །སྙན་གྲགས་གཟི་བརྗིད་བསྡུ་བ་བཞི། ཐམས་ཅད་དབང་བསྡུས་བདག་ལ་སྩོལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྭཱ་ཧཱ༔ སརྦ་སིདྡྷི་ཕ་ལ་ཧཱུྃ། ཅེས་བརྗོད་ཡེ་ཤེས་པ་གཤེགས། །དམ་ཚིག་པ་བསྡུ། ཆུ་སྦྱིན་ལས་མཐེབ་སྲིན་གྱིས་ལྕེ་ལ་རེག་ཅིང་ཕྱོགས་བཞིར་གཏོར། ཧཱུྃ། འདོད་ཡོན་ལོངས་སྤྱོད་བསོད་ནམས་དཔལ། །དངོས་གྲུབ་ཟད་མེད་ཆུ་བོའི་རྒྱུན། །ཡིད་བཞིན་རེ་བ་སྐོང་མཛད་པའི། །བཀྲ་ཤིས་དེང་ཀྱང་དངོས་གྲུབ་སྩོལ། །བསོད་ནམས་རི་བོ་བཞིན་དུ་བརྟན་པ་དང་། །བརྒྱུད་འཛིན་ཉི་ཟླ་བཞིན་དུ་གསལ་བ་དང་། །སྙན་གྲགས་ནམ་མཁའ་ལྟ་བུར་ཁྱབ་པ་ཡི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །སོགས་བསྔོ་སྨོན་ཅི་ཤེས་པ་བྱའོ། །ཅེས་པ་འདི་འཇང་པ་གྲུབ་ཆེན་ཆོས་འཛིན་པས་བསྐུལ་ངོར་རིག་འཛིན་རྣམ་རྒྱལ་གྱིས་སྦྱར་བ་དགེ་ལེགས་འཕེལ། །མངྒ་ལཾ།། །།
ཛམ་དམར་གྱི་དབང་བསྐུར་ཟབ་མོ།
བླ་མ་བདེ་མཆོག་ལས་བྱུང་བ་ཛམ་དམར་གྱི་དབང་བསྐུར་ཟབ་མོ་དམ་མེད་ལ་ཨྠིྀ། མགོན་པོ་ཛམ་བྷ་ལ་ལ་ཕྱག་འཚལ་ལོ། །དབང་བྱེད་པར་འདོད་པས་དབང་གི་རྫས་མཐོང་བརྒྱུད་ལྟར་བསགས། གཞུང་བསྲང་བསྙེན་སྒྲུབ་ཁ་གསོ། ཚོགས་ཀྱི་འཁོར་ལོ་ཁྱད་འཕགས་བསྐོར། ལས་བུམ་བསྐྱེད། བདག་འཇུག་དངོས་གྲུབ་ཞུ་ཆོག་གིས་བླང་། ནོར་སྣ་ཁྱད་འཕགས་ཀྱི་མཎྜལ་འབུལ་ཞིང་གསོལ་འདེབས་ནི། ཧཱུྃ། དགའ་ཆེན་ཁྱོད་བདག་སྟོན་པ་པོ། །རྡོ་རྗེ་འཛིན་པ་མཆོག་ཁྱོད་ཀྱིས། །བདག་ཅག་རྗེས་སུ་ཡོངས་བཟུང་སྟེ། །ཛམ་ལྷ་དམར་པོའི་དབང་བསྐུར་སྩོལ། །གསུམ། །དེ་ནས་སྐྱབས་སེམས་འབོགས། སྔགས་ཀྱིས་སྦྱངས་ཏེ་བསྐྱེད་རིམ་གཏད། སྤྱན་འདྲེན། ཡེ་ཤེས་པ་བསྟིམ། ཏིཥྛ་བཛྲ་གྱིས་བརྟན་པར་བྱ། བུམ་པ་སྤྱི་བོར་བཞག །ཧཱུྃ། རིན་ཆེན་ཟངས་ཀྱི་བུམ་པ་འདི། །ཛམ་བྷ་ལ་དང་གཉིས་སུ་མེད། །སྐལ་ལྡན་བུ་ལ་དབང་བསྐུར་བས། །བུམ་པ་སྐུ་ཡི་དབང་ཐོབ་ཤོག །རྩ་སྔགས་ཀཱ་ཡ་ཨ་བྷི་ཥིཉྩ་ཧཱུྃ། སློབ་དཔོན་གྱི་ཐུགས་ཀའི་སྔགས་ཕྲེང་ཞལ་ནས་ཐོན་ཁྱེད་རང་རྣམས་ཀྱི་ཞལ་དུ་ཞུགས། ཐུགས་ཀར་ཉི་དཀྱིལ་ས་བོན་གྱི་མཐར་སྔགས་ཕྲེང་གཡས། །འོད་དམར་ཕྲེང་ཐག་གཡོན་དུ་འཁོར་བར་དམིགས་ལ། བཟླས་ལུང་སྦྱིན་སྔགས་ཕྲེང་སྤྱི་བོར་བཞག །དབྱངས་གསལ་བྱེད་དང་ཡེ་དྷརྨཱ་བརྗོད། སྒྲུབ་རྟེན་ནམ་ཙག་ལི་ཐུགས་ཀྱི་དབང་ནི། ཧཱུྃ། འཕགས་མཆོག་མགོན་པོ་ཛམ་བྷ་ལའི། །སྒྲུབ་རྟེན་སྐུ་བརྙན་ཐུགས་ཀྱི་དབང་། །སྐལ་ལྡན་བུ་ལ་དབང་བསྐུར་བས། །སྒྲུབ་རྟེན་ཐུགས་ཀྱི་དབང་ཐོབ་ཤོག །རྩ་སྔགས་ཙིཏྟ་སྙིང་གར་བསྐུར། ཡོན་ཏན་དཔེ་བུམ་ལག་དང་ལྟེ་བར་བཞག །ཧཱུྃ། འཕགས་མཆོག་མགོན་པོ་ཛམ་བྷ་ལའི། །སྒྲུབ་ཐབས་དཔེ་བུམ་པོ་ཏིའི་དབང་། །སྐལ་ལྡན་ཁྱོད་ལ་དབང་བསྐུར་བས། །ཡོན་ཏན་ཡོངས་རྫོགས་དབང་ཐོབ་ཤོག །རྩ་སྔགས་རཏྣ་ཨ་བྷི་ཥིཉྩ་ཧཱུྃ། འཕྲིན་ལས་གཏོར་མ་སྤྱི་བོར་བཞག །ཧཱུྃ། འཕགས་མཆོག་མགོན་པོ་ཛམ་བྷ་ལའི། །དངོས་གྲུབ་ཕུང་པོ་བྷ་ལིངྟ། །སྐལ་ལྡན་ཁྱོད་ལ་དབང་བསྐུར་བས། །འཕྲིན་ལས་ཡོངས་རྫོགས་དབང་ཐོབ་ཤོག །རྩ་སྔགས་ཀརྨ་ཨ་བྷི་ཥིཉྩ་ཧཱུྃ། བརྒྱུད་རིམ་མཐར་དངོས་གྲུབ་ལེན་ཆོག་སྦྱར། །སློབ་མ་རང་ལའང་རྟེན་འབྲེལ་ཆེ་བས་ནོར་སྣ་ཁྱད་པར་ཅན་གྱི་མཎྜལ་མེད་པ་ལ་མི་སྦྱིན། ཛམ་བྷ་ལའི་ཁ་སྐོང་འདི་རྣམས་ཆོས་བརྒྱུད་འཛིན་ངེས་མ་གཏོགས་སུ་ཐོད་ལ་མ་སྟོན། གསང་རྒྱ་དམ་པོ་མཛོད། ཤིན་ཏུ་ཟབ་པར་ཡོད། ཁམས་པ་ཉི་མ་གྲགས་པས་སྦྱར། མངྒ་ལཾ།། །།
ཛམ་དམར་གྱི་སྦྱིན་སྲེག
བླ་མ་བདེ་མཆོག་ལས་ཛམ་དམར་གྱི་སྦྱིན་སྲེག་བཞུགས། མགོན་པོ་ཛམ་བྷ་ལ་དམར་པོ་ལ་ཕྱག་འཚལ་ལོ། །དབང་ཐོབ་ཅིང་དམ་ཚིག་དང་ལྡན་པའི་རྣལ་འབྱོར་པས། དོན་གཉིས་ཀྱི་ཕྱིར་དབང་གི་སྦྱིན་སྲེག་གི་ཆོ་ག་བྱ་བར་འདོད་པས། དེ་ལ་གསུམ། སྔོན་འགྲོ་དངོས་གཞི་རྗེས་སོ། །དང་པོ་ལ་འབྲིང་པོ་བཞིའི་ཉི་ཤུ་ལ་སོགས་པ་དབང་གི་དུས་ཁྱད་པར་ཅན་ལ། གནས་དབེན་ཞིང་ཡིད་དུ་འོང་བའམ། དབང་གི་ལས་དང་རྗེས་སུ་མཐུན་པའི་གནས་ཉིད་དུ། སྒྲུབ་པའི་ཁོག་འབུབ་ནས་འབྱུང་བ་ལྟར་ས་ཆོག་ལེགས་པར་བྱས་པའི་ས་ལ་སྟེགས་བུ་རྒྱར་མདའ་གང་བ། དཔངས་སུ་ཁྲུ་གང་བར་བྱས་པའི་དབུས་སུ་དབང་གི་ཐབ་ཁུང་དམར་པོ་ཟླ་གམ་རྒྱར་ཁྲུ་གང་དང་། དཔངས་སུ་མཐོ་གང་བ་རྐན་གཉེར་རིམ་པ་གསུམ་དང་ལྡན་པའི་ཁ་ཁྱེར་ལ་པདྨའམ་ལྕགས་ཀྱུའི་ཕྲེང་བས་བསྐོར་བ་བརྩེགས་ཤིང་དམར་པོར་བྱུག་སྟེ། ལྟེ་བ་ལ་རཾ་གྱི་ཁོང་སེང་དུ་ཛཾ་དམར་པོས་མཚན་པའི་མཐར་ནོར་བུ་གསུམ་གྱི་དཀྱིལ་དུ་ཡབ་ཡུམ་གསུམ་གྱི་ས་བོན་ནམ་ཕྱག་མཚན་མདོག་མཚུངས་ཚོན་གྱིས་བསྒྱུར་བ་གང་བདེར་བྱས་ལ་ཐབ་ཁུང་གི་ནང་དུ་ཙན་དན་ནམ་མཛོ་མོ་ཤིང་ངམ། ཨ་ཀ་རུ་སོགས་དབང་ལ་ཤིས་པའི་བུད་ཤིང་རྒྱ་ཚོས་ལ་དྲི་བཟང་བཏབ་པས་མདོག་བསྒྱུར་བ་ཟླ་གམ་དུ་བརྩེག །གཡས་ལོགས་སུ་གོང་དུ་བཤད་པའི་ཤིང་ཟླ་གམ་གྱི་དབྱིབས་སུ་གཞོགས་ལ་རིང་ཐུང་སོར་བཅུ་གཉིས། སྦོམ་ཕྲ་སྲིན་ལག་གམ་གོང་མོ་ཙམ་བྱས་པ་ལ་བསྒྲུབ་བྱ་དམིགས་བསལ་ཡོད་ན་མིང་རུས་དང་། མེད་ན་སྣང་སྲིད་ཐམས་ཅད་དབང་དུ་བསྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ ཞེས་རྒྱ་སྐྱེགས་ཀྱི་ཁུ་བས་བྲིས་པ་གྲངས་ལྡན་ལ་བུ་རམ་དང་ཏིལ་མར་གྱིས་བྱུགས་པ། མར་ཁུ། ཏིལ། ཡུངས་ཀར། ཟས་སྣ། དཱུརྦ། འབྲས། ནས། སྲན་མ། སོ་བ། གྲོ། ཀུ་ཤ །ཕྲུམ། འབྲུ་སྣ། དར་སྣ། ཤིང་ཏོག༣། ཟངས། བྱི་རུ། བུར་སྦྲང་། ཧ་ལོ། ཨུག་ཆོས། གླང་སྣ་དམར་པོ། བཙོད། རྒྱ་སྐྱེགས། དར་ཟབ་དམར་པོའི་རིགས་སོགས་དབང་ལ་འོས་པའི་རྫས་གང་ཚོགས། མར་ལ་གོ་ཡུ་བཏབ་པའི་སོ་རྩི་གོས་ཟུང་རྣམས་དང་། གཡོན་དུ་ཉེར་སྤྱོད་སྨན་རག་གཏོར་མ་རྣམས་ཀྱང་དམར་པོའི་ཚོན་གྱིས་བསྒྱུར་བར་འོས་པ་རྣམས་བསྒྱུར་བ་དང་། མདུན་དུ་རྡོར་དྲིལ་དགང་གཟར་བླུགས། ཀུ་ཤ་ལས་བུམ་སོགས་ཉེ་བར་མཁོ་བ་ཐམས་ཅད་དང་། གཞན་ཡང་ཛམ་ལྷ་དམར་པོའི་མཆོད་གཏོར་ཚོགས་མཆོད་སོགས་ཀྱང་བཟང་ཞིང་གྱ་ནོམ་པ། སྣང་བ་གཡོ་བར་ནུས་པའི་རྔམ་བརྗིད་དང་ལྡན་པའི་ས་རྒྱན་གནམ་རྒྱན་སོགས་བཀོད་པའི་རྟེན་འབྲེལ་རབ་ཏུ་ཕུན་སུམ་ཚོགས་པར་བཤམས་ལ། ལས་གཞུང་བསྲང་ཞིང་བསྙེན་པའི་སྐབས་སུ་ཝ་ཤཾ་ཀུ་རུའི་ཤམ་བུ་ཅན་གྱི་བཟླས་པ་དང་དབང་སྡུད་ཀྱི་དམིགས་པ་དང་ལྡན་པའི་སྒོ་ནས་ལོང་སྐབས་དང་བསྟུན་ཏེ་བཟླ། ཚོགས་ལྷག་ཡན་སོང་ནས་ལས་བུམ་བསང་། སྟོང་པའི་ངང་ལས་བུམ་པ་ནི། །རིན་པོ་ཆེ་ཡི་གཞལ་ཡས་ཁང་། །མཚན་ཉིད་རྫོགས་པའི་ནང་ཉིད་དུ། དབང་གི་ཁྲོ་བོ་རྟ་མཆོག་དཔལ། །དམར་པོ་རྡོར་དྲིལ་ཡུམ་ལ་འཁྱུད། །རྟ་མགོས་མཚན་ཞིང་ཁྲོ་ཆས་རྫོགས། །སྐུ་ལས་སྤྲུལ་པའི་ཁྲོ་ཆུང་གིས། །གདོན་བགེགས་བཅོམ་ནས་བུམ་པའི་ཆུར། ཐིམ་པས་བུམ་ཆུ་ནུས་ལྡན་གྱུར། །ཨཱོཾ་བཛྲ་ཀྲོ་ཏ་ཧྱ་གྷྲཱྀ་ཝ་ཧཱུྃ་ཕཊཿ གང་མང་བཟླས་རྗེས། ཁྲོ་བོ་ཞུ་ནས་བུམ་ཆུར་འདྲེས། ལས་ཀུན་བསྒྲུབ་པའི་བདུད་རྩིར་གྱུར། དེ་ནས་སྒྲུབ་པ་པོ་དམར་པོའི་ཆས་གོས་དང་རྒྱན་གྱིས་བརྒྱན་ཏེ་བརྗིད་ཅིང་སྒེག་པའི་ཆ་ལུགས་དང་ལྡན་པས་མེ་ཐབ་བསྐོར་ཏེ་རོལ་མོ་རྣམས་སྦིར་ཞིང་། རང་ཉིད་རྟ་མགྲིན་དམར་པོར་གསལ་བའི་སྐུ་ལས་སྤྲོས་པའི་མེ་དཔུང་དང་མཚོན་ཆའི་ཚོགས་ཀྱིས་གདོན་བགེགས་འབྱུང་པོ་ཐམས་ཅད་ཐལ་བར་བརླགས་ཤིང་སྟེང་འོག་ཕྱོགས་མཚམས་ཐམས་ཅད་ཁྲོ་ཆུང་མཚོན་ཆ་ཐོགས་པ་དང་དམར་ནག་མེ་དཔུང་འཁྱིལ་བའི་བསྲུང་བའི་འཁོར་ལོར་གྱུར་བར་བསམས་ལ། ཧཱུྃ། ནོར་ལྷ་རྒྱ་མཚོའི་ཕོ་བྲང་འདིར། །འབྱུང་བ་མེ་ཡི་མཆོད་སྤྲིན་གྱི། །གསང་བ་མཆོག་ཏུ་བསྒྲུབ་པ་ལ། །ཉན་དང་ལྟ་བར་མི་དབང་པའི། །གདོན་བགེགས་འབྱུང་པོ་གཞན་དུ་སོང་། །བཀའ་དང་དམ་ལས་འདའ་བྱེད་ན། །དབང་ཆེན་རྟ་མགྲིན་ཐུགས་ཁྲོས་ནས། །གཏུམ་པའི་ཁྲོ་མོས་བགེགས་དཔུང་འཇོམས། །འབར་བའི་མེ་ཡིས་གཟུགས་ཕུང་བསྲེག །རྣོ་དབལ་མཚོན་ཆས་དུམ་བུར་གཏོང་། །ཡེ་ཤེས་རྡོ་རྗེས་མགོ་བོ་འགེམས། །དེ་བས་མ་འདུག་གཞན་དུ་སོང་། །ཨཱོཾ་སུམྦྷ་ནི་སོགས་བརྗོད། ཧཱུྃ། སྟེང་ནི་མེ་ཡི་བླ་རེ་ལ། །འོག་ཀྱང་འབར་བའི་ཕྲེང་བས་དཀྲིགས། །ཕྱོགས་མཚམས་ཀུན་ཀྱང་མེ་རིའི་གུར། །བར་སྣང་མེ་ཡི་སྤྲིན་ཕུང་གཏིབས། །གཞན་དུ་མེ་ཡི་ཚ་ཚ་འཕྲོ། །མེ་སྒྲ་འུར་འུར་ཆེམ་ཆེམ་ལྡིར། །འབར་བ་མེ་ཡི་གུར་ཁང་ལ། །སྲིད་ཞི་སུས་ཀྱང་མི་ཚུགས་པའི། །མཚམས་ཀྱི་དཀྱིལ་འཁོར་གཞོམ་དུ་མེད། ཨཱོཾ་བཛྲ་རཀྵ་ཛྭ་ལ་རཾ་རཾ། ཞེས་བསྒོ་ཞིང་གྲལ་དུ་འཁོད་ལ། ལས་བུམ་གྱི་ཆུས་རྫས་རྣམས་ལ་འཐོར་ཞིང་། ཨཱོཾ་བཛྲ་ཀྲོ་ཏ་ཧྱ་གྷྲཱྀ་ཝ་ཧཱུྃ་ཕཊཿཀྱིས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་པྃ་ལས་པདྨ་འབར་བའི་སྣོད་ཡངས་ཤིང་རྒྱ་ཆེ་བའི་ནང་དུ་མཆོད་རྫས་དང་སྲེག་རྫས་ཀྱི་དངོས་པོ་རྣམས་ཟག་མེད་ཀྱི་བདུད་རྩི་ལ་རྣམ་པ་སོ་སོའི་མཚན་ཉིད་མ་འདྲེས་པར་གསལ་བར་རྫོགས་པ། ཆགས་ལྡན་སྙིང་རྩ་འདར་ཞིང་རྒྱལ་བའི་བསམ་གཏན་གཡོ་བར་ནུས་པའི་རྒྱལ་སྲིད་རིན་ཆེན་བཀྲ་ཤིས་རྫས་རྟགས་འདོད་ཡོན་ཉེར་སྤྱོད་སོགས་མཆོད་པའི་སྤྲིན་གྱི་ཕུང་པོ་མ་ཚང་བའི་དངོས་པོ་མེད་པས་ནམ་མཁའ་ས་གཞི་བར་སྣང་ཐམས་ཅད་ཁེངས་པར་གྱུར་པར་བསམས་ལ། ཨཱོཾ་ཨཱཿཧཱུྃ་སརྦ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་ཧྲཱིཿཐཱ༔ གསུམ་མམ་བདུན་གྱི་བྱིན་གྱིས་བརླབ། དེ་ནས་རྗེའུ་རིགས་སམ་སྨད་འཚོང་མ་ལས་བླངས་པའི་མེ་སྤར་ལ་རླུང་གཡབ་ཀྱིས་གཡབ་ཅིང་། རཾ། སྤྱི་མཐུན་ལས་ཀྱི་བསོད་ནམས་དང་། །རྒྱལ་བའི་ཐུགས་བསྐྱེད་ལས་གྲུབ་པའི། །ལྗོན་ཤིང་ནགས་ཚལ་བསྲུང་བ་ཡི། །ཤིང་གི་ལྷ་མོས་ཤིང་ཐུས་ལ། །སྐྱེ་དགུ་ཀུན་གྱི་སྲོག་འཛིན་ཅིང་། །སྣང་བ་རབ་ཏུ་གསལ་བའི་སྒྲོན། །མེ་ཡི་ལྷ་མོ་སྲེག་བྱེད་མས། །མེ་ལྷའི་ཡུལ་ནས་མེ་སྤོར་ཞིག །འོག་གཞི་རྗོ་རྗེ་རྒྱ་གྲམ་གྱིས། །ཡང་ཞིང་གཡོ་བའི་བ་དན་འཛིན། །འབྱུང་བ་རླུང་ལ་མངའ་མཛད་མས། །རླུང་ལྷའི་ཡུལ་ནས་རླུང་གཡོབས་ཤིག །ཨཱོཾ་ཨགྣཱེ་ཡེ་སྭཱ་ཧཱ༔ ཞེས་པའི་སྔགས་བདུན་དང་མར་ཁུ་དགང་བླུགས་བདུན་གྱིས་གསོ། དེ་ནས་ཐབ་ཀྱི་ཁ་ཁྱེར་ལ་ཀུ་ཤ་དགྲམ་ཞིང་། ཧཱུྃ། གཙང་ཞིང་དགེ་བ་ཀུ་ཤའི་རྩྭ། །རྒྱལ་བས་བྱང་ཆུབ་བརྙེས་པའི་གདན། །དག་ཅིང་ཚངས་པའི་རྫས་མཆོག་འདིས། །བགེགས་རྣམས་གཞིལ་ཞིང་ཤིས་པར་མཛོད། །ཨཱོཾ་བཛྲ་ས་ཏྭ་ཨཱཿ ཞེས་བཀྲམ་མོ། །དེ་ནས་དངོས་གཞི་ལ་གཉིས་ཀྱིས། འཇིག་རྟེན་པའི་མེ་ལྷ་མཆོད་པ་ནི། ལས་བུམ་ཀྱི་ཆུས་མེ་ཐབ་ལ་འཐོར་ཞིང་བསང་སྦྱངས། མེ་ཐབ་མི་དམིགས་པ་སྟོང་པ་ཉིད་དུ་གྱུར། སྟོང་བའི་ངང་ལས་འབར་པའི་ཐབ་ཁུང་ཟླ་གམ་དམར་པོ་ཡངས་ཤིང་རྒྱ་ཆེ་བ་རྐན་གཉེར་རིམ་པ་གསུམ་དང་ལྡན་ཞིང་ཁ་ཁྱེར་ལ་ལྕགས་ཀྱུ་དམར་པོའི་ཕྲེང་བས་བསྐོར་བ་ཟླ་གམ་དབང་གི་གཞལ་ཡས་ཁང་གི་བཀོད་པ་ཐམས་ཅད་རྫོགས་པ། དེ་དག་གི་དབུས་སུ་པད་ཉིའི་གདན་ལ་རཾ་ཡིག་དམར་པོ་ཡོངས་སུ་གྱུར་པ་ལས་མེ་ལྷ་དམར་པོ་ཞལ་གཅིག་ཕྱག་གཉིས་པ། ཕྱག་གཡས་མེ་ཡི་འཁོར་ལོ་དང་གཡོན་པས་རླུང་གི་འཁོར་ལོ་བསྣམས་པ། ར་སྐྱེས་ཁམ་པ་འཇའ་འོད་དང་གློག་གི་ཕྲེང་བའི་གོང་རྨེད་དང་སྲབ་མཐུར་ཅན་ལ་བཅིབས་པ། རིན་པོ་ཆེ་སྣ་ཚོགས་པ་དང་པདྨའི་ཕྲེང་བས་བརྒྱན་ཞིང་ཞི་འཛུམ་སྒེག་པའི་ཉམས་དང་ལྡན་པ། དེའི་སྤྱི་བོར་ཨཱོཾ་མགྲིན་པར་ཨཱཿཐུགས་ཀར་ཧཱུྃ་གི་ཁོང་གསེང་དུ་ཐུགས་སྲོག་རཾ་གྱིས་མཚན་པ། དེ་ལས་འོད་ཟེར་འཕྲོས་པས་བསྒོམ་པ་དང་འདྲ་བའི་ཡེ་ཤེས་པ་སྤྱན་དྲངས། སྤྱན་འདྲེན་ནི། ཧཱུྃ། དད་པས་སྤྱན་འདྲེན་དྲང་སྲོང་ཆེ། །དམ་ཚིག་དབང་གིས་ད་ཚུར་སྤྱོན། །ཁམས་གསུམ་སྲིད་གསུམ་དབང་བསྡུད་ཕྱིར། །དྲང་སྲོང་ཆེན་པོ་གཤེགས་སུ་གསོལ། ཨཱོཾ་ཨགྣཱེ་ཡེ་ཛཿཧཱུྃ་བཾ་ཧོཿབཛྲ་ས་མ་ཡ་ཛཿཛཿ བཞུགས་སུ་གསོལ་བ་ནི། ཧཱུྃ། དྲང་སྲོང་ཆེན་པོ་འཕྲིན་ལས་བདག །འདོད་པའི་དངོས་གྲུབ་སྤེལ་བའི་ལྷ། །དེང་གི་གནས་མཆོག་དམ་པ་འདིར། །འབར་བའི་གདན་ལ་བཞུགས་སུ་གསོལ། །ཨཱོཾ་ཨགྣཱེ་ཡེ་བཛྲ་ས་མ་ཡ་ཏིཥྛ་ལྷན། ཕྱག་འཚལ་བ་ནི། ཧཱུྃ། མེ་ཡི་ལྷ་སྟེ་དྲང་སྲོང་ཆེ། །ལས་བཞིའི་འཕྲིན་ལས་སྩོལ་བའི་ལྷ། །མཐུ་སྟོབས་རྫུ་འཕྲུལ་བསམ་མི་ཁྱབ། །འབར་བ་ཁྱོད་ལ་ཕྱག་འཚལ་ལོ། །ཨཱོཾ་བཛྲ་ཨགྣཱེ་ཡེ་ས་མ་ཡ་ཨ་ཏི་པུ་ཧོཿ མཆོད་པ་ནི། ཧཱུྃ། སྟོང་གསུམ་འཇིག་རྟེན་རབ་འབྱམས་ན། །ཕྱི་ནང་གསང་བའི་མཆོད་པའི་ཚོགས། །དངོས་བཤམས་ཡིད་ཀྱིས་རྣམ་སྤྲུལ་ཏེ། །སྲེག་བྱེད་མེ་ཡི་ལྷ་ལ་འབུལ། །ཨཱོཾ་ཨགྣཱེ་ཡེ་སརྦ་པཱུ་ཙ་ཧོཿ ཧཱུྃ། དྲང་སྲོང་ཆེན་པོ་འཁོར་འཅས་ལ། །དངོས་གྲུབ་མྱུར་དུ་སྩོལ་བའི་ཕྱིར། །སྨན་གཏོར་རཀྟའི་མཆོད་པ་འབུལ། །བཞེས་ནས་དངོས་གྲུབ་སྩལ་དུ་གསོལ། །ཨཱོཾ་ཨགྣཱེ་ཡེ་མ་ཧཱ་པཉྩ་རཀྟ་བ་ལིངྟ་པཱུ་ཙ་ཁཱ་ཧི། བསྟོད་པ་ནི། ཧཱུྃ། གཟི་བརྗིད་འབར་བ་མེ་ཡི་ལྷ། །ཚངས་པ་འཇིག་རྟེན་དབང་པོའི་སྲས། །འཕྲིན་ལས་མ་ལུས་ཀུན་གྱི་བདག །འབར་བ་ཁྱོད་ལ་ཕྱག་འཚལ་བསྟོད། །བྱོན་སྐྱེམས་ནི། མེ་ལྷའི་ལྗགས་པདྨ་འདབ་མ་བརྒྱད་པའི་ལྟེ་བར་རཾ་དང་དགང་བླུགས་ཀྱི་རྩེར་ཛཾ་ཡིག་དམར་པོས་མཚན་པར་གྱུར་པར་བསམས་ཤིང་། ཧཱུྃ། འབྲུ་མར་རྩི་མར་བཅུད་ལྡན་སྲེག་པའི་རྫས། །དམ་རྫས་བདུད་རྩིའི་མཆོད་པ་བླ་མེད་འདི། །དྲང་སྲོང་ཆེན་པོ་མེ་ཡི་ལྷ་ལ་འབུལ། །བདག་གི་འདོད་དོན་འཕྲིན་ལས་གྲུབ་པར་མཛོད། །ཨཱོཾ་ཨགྣཱེ་ཡེ་སྭཱ་ཧཱ༔ ཨཱོཾ་ཨགྣཱ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ན་ཡེ་ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤཾ་ཀུ་རུ་ཡེ་སྭཱ་ཧཱ༔ ཞེས་བདུན་འབུལ། ཡམ་ཤིང་ལ། ཨཱོཾ་བྷོ་དྷི་བྲྀཀྵ་ཡེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤཾ་ཀུ་རུ་ཡེ་སྭཱ་ཧཱ༔ མར་ཁུ་ལ། ཨཱོཾ་ཨགྣཱེ་ཡེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤཾ་ཀུ་རུ་ཡེ་སྭཱ་ཧཱ༔ ཏིལ་ལ། ཨཱོཾ་སརྦ་པཱ་པཾ་ད་ཧ་ན་བཛྲ་ཡ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤཾ་ཀུ་རུ་ཡེ་སྭཱ་ཧཱ༔ ཡུངས་ཀར་ལ། ཨཱོཾ་སརྦ་ཨཪྠ་ས་དྷཱ་ཡ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ ཟས་སྣ་ལ། ཨཱོཾ་སརྦ་སཾ་བྷ་དེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ དཱུརྦ་ལ། ཨཱོཾ་བཛྲ་ཨཱ་ཡུ་ཥེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ འབྲས་ལ། ཨཱོཾ་བཛྲ་པུཥྟཱ་ཡེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ སོ་བ་ལ། ཨཱོཾ་བཛྲ་བྀ་ཛཱ་ཡ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ ནས་ལ། ཨཱོཾ་མ་ཧཱ་བེ་གྷཱ་ཡ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ སྲན་མ་ལ། ཨཱོཾ་བཛྲ་མ་ཧཱ་བ་ལཱ་ཡ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ གྲོ་ལ། ཨཱོཾ་བཛྲ་གྷསྨ་རེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ ཀུ་ཤ་ལ། ཨཱོཾ་ཨ་པྲ་ཏི་ཧ་ཏ་བཛྲ་ཡ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ ཕྲུམ་ལ། ཨཱོཾ་ཨཱཿསྭཱ་ཧཱཿ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ འབྲུ་སྣ་ལ། ཨཱོཾ་ཛྲིཾ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ ཤིང་ཏོག་ལ། ཨཱོཾ་བཛྲ་ཤྲཱི་བཱ་ཡ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ དར་སྣ་ལ། ཨཱོཾ་བཛྲ་ཝསྟྲ་ཡེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ སྲེག་རྫས་སྔགས་མེད་པའི་རིགས་ཐམས་ཅད་ལ། ཨཱོཾ་ཀུ་རུ་ཀུ་རུ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ ཧཱུྃ། འབར་བ་མེ་ཡི་ལྷ་ཚོགས་ལ། །ཕྱི་ནང་གསང་བ་སྨན་རག་དང་། །དམ་རྫས་གཏོར་མའི་མཆོད་པ་སོགས། །རབ་འབྱམས་མཆོད་སྤྲིན་རྒྱ་མཚོས་མཆོད། ཨཱོཾ་ཨགྣཱེ་ཡེ་ས་པ་རི་ཝཱ་ར་སརྦ་པཱུ་ཙ་ཧོཿས་མཆོད། ཧཱུྃ། འབར་བ་མེ་ཡི་ཀློང་དཀྱིལ་ན། །གཟི་བརྗིད་འབར་ཞིང་འཕྲིན་ལས་མཛད། །རྩལ་ལྡན་ར་སྐྱེས་སྟེང་ནས་བརྗིད། །འབར་བའི་དབའ་བོ་ཁྱོད་ལ་བསྟོད། །ཀྱིས་བསྟོད། ཧཱུྃ། ཨགྣཱི་རཱ་ཛ་མེ་ཡི་ལྷས། །རྫས་རྣམས་ལྷག་པའི་ལྷར་འབུལ་ཞིང་། །མེ་ཡང་ཡེ་ཤེས་མེར་མཛད་ནས། །སྣང་བ་དབང་དུ་བསྡུ་བར་མཛོད། ཅེས་འཕྲིན་ལས་བཅོལ། བཛྲ་མུཿས་མེ་ལྷ་ཡེ་ཤེས་པ་ཐབ་ཀྱི་ཤར་ལྷོར་གཤེགས་ནས་མཆོད་བསྟོད་འཕྲིན་ལས་ཀྱི་དཔང་པོ་མཛད་པར་གྱུར། ༈གཉིས་པ་ཡེ་ཤེས་པའི་མེ་ལྷ་མཆོད་པ་ནི། །དམ་ཚིག་མེ་ལྷའི་ལྟོ་བ་ཟབ་ཅིང་ཡངས། །རབ་འབྱམས་ཆོས་ཀྱི་དབྱིངས་དང་མཉམ་པའི་ནང་། དབང་གི་ཕོ་བྲང་འོད་དམར་ཀློང་༔ ཉི་ཟླ་པདྨའི་གདན་སྟེང་དུ༔ ཞེས་པ་ནས། ནོར་ལྷ་རྒྱ་མཚོར་ཕྱག་འཚལ་བསྟོད། ཅེས་པའི་བར་ལས་བྱང་ལྟར་བྱས་པ་ཚར་རྗེས། དེ་ལྟར་མཆོད་ཅིང་བསྟོད་པས་ལྷ་ཚོགས་རྣམས་ཀྱང་བརྩེ་བའི་ཐུགས་རྗེ་ཆེན་པོས་འགྲོ་བ་ཡོངས་ལ་རྗེས་སུ་ཆགས་པའི་སྐུ་མདོག་པདྨ་རཱ་གའི་ལྷུན་པོ་ལྟར་དམར་ཞིང་འཚེར་བའི་སྐུའི་གཟི་བརྗིད་ཀྱིས་བརྟན་གཡོ་ཐམས་ཅད་དབང་མེད་དུ་འགུགས་པར་ནུས་པའི་མཐུ་དང་ལྡན་པར་གྱུར། ལྷ་རྣམས་ཀྱི་ལྗགས་པདྨ་དམར་པོ་འདབ་མ་བརྒྱད་པའི་ལྟེ་བར་རཾ་དང་དགང་བླུགས་ཀྱི་ཁར་ཛཾཿཡིག་དམར་པོ་འོད་དང་བཅས་པས་མཚན་པར་གྱུར་པར་བསམས་ལ། ཧཱུྃ། འབྲུ་མར་རྩི་མར་བཅུད་ལྡན་བསྲེག་པའི་རྫས། །དམ་རྫས་བདུད་རྩིའི་མཆོད་པ་དམ་པ་འདི། །མེ་ལྷ་ནོར་ལྷ་རྒྱ་མཚོའི་ཚོགས་ལ་འབུལ། །བདག་གི་འདོད་དོན་འཕྲིན་ལས་བསྒྲུབ་པར་མཛོད། །ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱཿ ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ན་ཡེ་སྭཱ་ཧཱ༔ ཞེས་སམ་ཨཱོཾ་ཨགྣཱེ་ཡེ་སྭཱ་ཧཱ༔ ཞེས་གཉིས་ཀའམ་གང་རུང་རྩ་སྔགས་དང་སྦྲེལ་བ་བདུན་གྱིས་འབུལ། དེ་ནས་ཡམ་ཤིང་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨཱོཾ་བོ་དྷི་བྲྀཀྵ་ཡེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ མར་ཁུ་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨཱོཾ་ཨགྣཱེ་ཡེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱཿ ཏིལ་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨཱོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ ཡུངས་ཀར་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨཱོཾ་སརྦ་ཨཪྠ་ས་དྷཱ་ཡ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ ཟས་སྣ་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨཱོཾ་སརྦ་སཾ་བྷ་དེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ དཱུརྦ་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨཱོཾ་བཛྲ་ཨཱ་ཡུ་ཥེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ འབྲས་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨོཾ་བཛྲ་པུཥྟ་ཡེ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ སོ་བ་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨཱོཾ་བཛྲ་བི་ཛཱ་ཡེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡ་སྭཱ་ཧཱ༔ ནས་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨཱོཾ་མ་ཧཱ་བེ་གྷཱ་ཡེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ སྲན་མ་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨཱོཾ་བཛྲ་མ་ཧཱ་བ་ལཱ་ཡ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ གྲོ་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨཱོཾ་བཛྲ་གྷསྨ་ཡེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ ཀུ་ཤ་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨཱོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ ཕྲུམ་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨཱོཾ་ཨཱཿསྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ འབྲུ་སྣ་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨཱོཾ་ཛྲིཾ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ ཤིང་ཏོག་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨཱོཾ་བཛྲ་ཤྲི་བཱ་ཡ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ དར་སྣ་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨཱོཾ་བཛྲ་ཝསྟྲ་ཡེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ སྲེག་རྫས་སྔགས་མེད་པའི་རིགས་ཐམས་ཅད་ལ། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱ༔ ཨཱོཾ་ཀུ་རུ་ཀུ་རུ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ སླར་ཡང་། ཨཱོཾ་ཛམ་བྷ་ལ་ཧྲཱིཿད་ཡ་ཧཱུྃ་ཧཱུྃ་སྡུས་སྡུས་སྭཱ་ཧཱཿ ཨཱོཾ་ཨགྣཱེ་ཡེ་སྭཱ་ཧཱས་བྱོན་སྐྱེམས་ལྟར་གཤེགས་སྐྱེམས་ཀྱང་ཕུལ་ལ། ཧྲཱིཿ དབང་མཛད་དབང་གི་ལྷ་ཚོགས་ལ། །ཕྱི་ནང་གསང་བའི་མཆོད་པ་དང་། །སྨན་རག་གཏོར་སོགས་འཇིག་རྟེན་གྱི། མཆོད་པའི་རྫས་ཀུན་ཡོངས་སུ་འབུལ། ཨཱོཾ་ཛམ་བྷ་ལ་ས་པ་རི་ཝཱ་ར་ཨརྒྷཾ་ནས། ཤཔྟ་པཉྩ་ཨ་མྲྀ་ཏ་རཀྟ་བྷ་ལིངྟ་པཱུ་ཙ་ཁཱ་ཧིས་མཆོད། ཨཱོཾ་བཛྲ་ཏམྦུ་ལཱ་ཡེ་སྭཱ་ཧཱས་སོ་རྩི་དང་། ཨཱོཾ་བཛྲ་ཝསྟྲ་ཡེ་སྭཱ་ཧཱས་གོས་ཟུང་འབུལ་ཞིང་། ཧཱུྃ༔ མི་ཟད་རིན་ཆེན་འདོད་འབྱུང་གནས༔ ནས། ནོར་ལྷ་རྒྱ་མཚོར་ཕྱག་འཚལ་བསྟོད༔ ཅེས་པའི་བར་ལས་བྱང་བཞིན་བྱ། དེ་ནས་འཕྲིན་ལས་བཅོལ་བ་ནི། ཧོཿ དུས་གསུམ་ནོར་ལྷ་རྒྱ་མཚོའི་སྤྱི་གཟུགས། གནོད་སྦྱིན་ནོར་བདག་རྣམས་ཀྱི་ཆེ་བཙན། དངོས་གྲུབ་དཀྱིལ་འཁོར་ཀུན་གྱི་གཙོ་བོ། སྲིད་ཞིའི་དཔལ་འབྱོར་ཀུན་འབྱུང་ནོར་བུ། སྲིད་གསུམ་དབང་མཛད་ཛམ་ལྷ་དམར་པོ། ཤེས་རབ་ཡུམ་ཆེན་ལྷ་མོ་དམར་མོ། གཉིས་མེད་མཆོག་སྤྲུལ་སྲས་མཆོག་ནོར་བདག །རྡོ་རྗེ་འཆང་ཆེན་བརྒྱུད་ལྡན་བླ་མ། ནོར་ལྷ་རྒྱ་མཚོ་བཀའ་གཏེར་སྲུང་མ་རྒྱ་མཚོ་དང་བཅས་པ་ཁྱེད་རྣམས་ལ་སྲེག་བྱེད་མེ་ཡི་མཆོད་པས་མཉེས་པར་བྱས་ཏེ། འདོད་དོན་གྱི་འཕྲིན་ལས་གསོལ་བ་ནི། ཟག་མེད་མྱ་ངན་ལས་འདས་པའི་ཐུགས་རྗེ་དང་། འཕྲིན་ལས་ཐམས་ཅད་བླ་ན་མེད་པའི་ཐུགས་རྗེའི་ཤུགས་ཀྱིས་དབང་དུ་བསྡུས་ནས་བདག་ལ་སྩལ་ཏེ་ཚེ་འདི་ཉིད་དུ་མངོན་པར་བྱང་ཆུབ་པར་མཛད་དུ་གསོལ། ཚངས་དབང་བརྒྱ་བྱིན་རྒྱལ་ཆེན་བཞི་དང་། འཁོར་ལོས་བསྒྱུར་བའི་རྒྱལ་པོ་ལ་སོགས་ཟག་བཅས་འཁོར་བའི་དཔལ་ཐམས་ཅད་དབང་དུ་བསྡུས་ནས་སྲིད་པའི་ཁམས་འདིར་མངོན་པར་མཐོ་བར་མཛད་དུ་གསོལ། འཇིག་རྟེན་ཁམས་ཀྱི་རྒྱལ་བློན་ཆེ་བཙུན་ཁ་དྲག་མོ་བཙུན་འབངས་དང་བཅས་པ་རྗེས་ཆགས་སྙིང་རྗེའི་སྟོབས་ཀྱིས་དབང་དུ་སྡུས་ལ་བྱང་ཆུབ་ཆེན་པོར་འགོད་པར་མཛད་དུ་གསོལ། སྲིད་པ་གསུམ་གྱི་དཔལ་འབྱོར་ལོངས་སྤྱོད་རིན་ཆེན་དར་ཟབ་འབྲུ་སྨན་རྐང་འགྲོ་སོགས་འབྱོར་བའི་དཔལ་ཐམས་ཅད་དབང་དུ་བསྡུས་ལ་བསོད་ནམས་ཀྱི་ཚོགས་ཡོངས་སུ་རྫོགས་པར་མཛད་དུ་གསོལ། འཁོར་འདས་ཀུན་གྱི་ཚེ་དཔལ་དང་འབྱོར་བ་ཐམས་ཅད་དབང་དུ་སྡུས་ལ་སྲིད་ཞིའི་ཕུན་ཚོགས་ཐམས་ཅད་རབ་ཏུ་འཕེལ་ཞིང་རྒྱས་པར་མཛད་དུ་གསོལ། ཞེས་གསོལ་ཞིང་དངོས་གྲུབ་བླང་བ་ལ་རྟེན་ཅིང་འབྲེལ་འབྱུང་བཟང་བའི་ཟས་ཀྱི་དངོས་པོ་སྣ་ཚོགས་པ་བཏེགས་ལ། ཧཱུྃ། དབང་མཛད་དབང་གི་ལྷ་ཚོགས་རྣམས༔ ནས། དངོས་གྲུབ་མ་ལུས་བདག་ལ་སྩོལ། ཨཱོཾ་ཛམ་བྷ་ལ་ཧྲཱིཿད་ཡ་ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཕལ་ཧཱུྃ། ཅེས་བརྗོད་ཅིང་རྫས་རྣམས་དངོས་གྲུབ་ཏུ་རོལ། ཡི་གེ་བརྒྱ་པས་ལྷག་ཆད་བསྐང་ཞིང་། མ་འབྱོར་པ་དང་ཉམས་པ་དང་། སོགས་ཀྱིས་ནོངས་པ་བཟོད་པར་གསོལ། ཧཱུྃ། ལྷ་ཚོགས་སྣང་སྟོང་ཆོས་ཀྱི་སྐུ༔ མ་འགགས་རོལ་པ་རང་སར་གྲོལ༔ གཟུང་འཛིན་ཡོངས་གྲོལ་ཨ་ལ་ལ༔ གཤེགས་གཞུད་མེད་པར་དབྱིངས་སུ་མུ༔ ཡེ་ཤེས་པ་གཤེགས། དམ་ཚིག་པ་རང་ལ་བསྡུ། སླར་ཡང་། འཇིག་རྟེན་པའི་མེ་ལྷ་ཐབ་ཀྱི་ཤར་ལྷོར་དཔང་པོར་བཞུགས་པ་བཛྲ་ས་མཱ་ཛཿ དམ་ཚིག་པ་དང་གཉིས་སུ་མེད་པར་གྱུར་པ་ལ་ཨརྒྷཾ་སོགས་ཀྱིས་མཆོད་ཅིང་། ཧཱུྃ། བསྲེག་པའི་རེག་བྱ་ཚ་བའི་ཀློང་། །འབར་བའི་ནུས་པས་སྲིད་གསུམ་གྱི། །ལོག་པར་འདྲེན་པ་ཀུན་སྲེག་པའི། །ལྷ་ཡི་ལྷ་མཆོག་ཁྱོད་ལ་བསྟོད། དེ་ནས་ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ན་ཡེ་སྭཱ་ཧཱ༔ ཨཱོཾ་ཨགྣཱེ་ཡེ་སྭཱ་ཧཱ༔ ཞེས་འབུལ། ཨཱོཾ་བོ་དྷི་བྲྀཀྵ་ཡེ་སྭཱ་ཧཱ༔ ཡམ་ཤིང་གིའོ། །ཨཱོཾ་ཨགྣཱེ་ཡེ་སྭཱ་ཧཱ༔ མར་ཁུའོ། །ཨཱོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ༔ ཏིལ་གྱིའོ། །ཨཱོཾ་སརྦ་ཨཪྠ་ས་དྷཱ་ཡ་སྭཱ་ཧཱ༔ ཡུངས་ཀར་གྱིའོ། །ཨཱོཾ་སརྦ་སཾ་བྷ་དེ་སྭཱ་ཧཱ༔ ཟས་སྣའོ། །ཨཱོཾ་བཛྲ་ཨཱ་ཡུ་ཥེ་སྭཱ་ཧཱ༔ དཱུརྦའོ། །ཨཱོཾ་བཛྲ་པུཥྟཱེ་ཡེ་སྭཱ་ཧཱ༔ འབྲས་ཀྱིའོ། །ཨཱོཾ་བཛྲ་བི་ཛཱ་ཡེ་སྭཱ་ཧཱ༔ སོ་བ་ལའོ། ཨཱོཾ་མ་ཧཱ་བེ་གྷཱ་ཡ་སྭཱ་ཧཱ༔ ནས་ཀྱིའོ། ཨཱོཾ་བཛྲ་མ་ཧཱ་བ་ལཱ་ཡ་སྭཱ་ཧཱ༔ སྲན་མའོ། །ཨཱོཾ་བཛྲ་གྷསྨ་རེ་སྭཱ་ཧཱ༔ གྲོའོ། །ཨཱོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ༔ ཀུ་ཤའོ། །ཨཱོཾ་ཨཱཿསྭཱ་ཧཱ༔ ཕྲུམ་གྱིའོ། །ཨཱོཾ་ཛྲིཾ་སྭཱ་ཧཱ༔ འབྲུ་སྣའོ། །ཨཱོཾ་བཛྲ་ཤྲཱི་བཱ་ཡ་སྭཱ་ཧཱ༔ ཤིང་ཏོག་གོ། ཨཱོཾ་བཛྲ་ཝསྟྲ་ཡེ་སྭཱ་ཧཱ༔ དར་སྣའོ། །ཨཱོཾ་ཀུ་རུ་ཀུ་རུ་སྭཱ་ཧཱ༔ སྲེག་རྫས་སྔགས་མེད་པའི་རིགས་ཐམས་ཅད་ཀྱིའོ། །ཨཱོཾ་བཛྲ་ཏམྦུ་ལ་ཡེ་སྭཱ་ཧཱ༔ ས་ོརྩིའོ། ཨཱོཾ་བཛྲ་ཝསྟྲ་ཡེ་སྭཱ་ཧཱ༔ གོས་ཟུང་གིའོ། ཞེས་པ་རྣམས་ལ་གསུམ་མམ་བདུན་སོགས་འབུལ། རྒྱས་པར་རེ་རེ་ལའམ། བསྡུ་ན་ཀུན་གྱི་མཐར་འདོད་གསོལ་ཞིག་བྱས་ཀྱང་རུང་། དེ་ནས་གཏོར་མ་ལ། ཨཱོཾ་ཨགྣཱེ་ཡེ་ས་པ་རི་ཝཱ་ར་ཨི་དམ་བ་ལིངྟ་ཁ་ཁ་ཁཱ་ཧི་ཁཱ་ཧི༔ ཅེས་འབུལ། སླར་ཡང་ཨརྒྷཾ་ནས། ཤཔྟའི་བར་གྱིས་མཆོད་ཅིང་། ཧཱུྃ། གཟི་བརྗིད་ཕུང་པོ་ལྟ་ན་སྡུག །འོད་བཟང་ཉི་མའི་དཔལ་དུ་འབར། །རབ་འབྱམས་འཕྲིན་ལས་རྒྱ་མཚོའི་དཔལ། །ཨགྣཱི་རཱ་ཛ་ཁྱོད་ལ་བསྟོད། །ཅེས་བསྟོད། ཡི་གེ་བརྒྱ་པ་བརྗོད། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་བ། །དེ་ཀུན་མགོན་པོས་བཟོད་པར་མཛོད། །མེ་ལྷའི་རྒྱལ་པོ་གང་ཁྱོད་ཀྱིས། །བདག་གཞན་དོན་གཉིས་ཀུན་མཛོད་ཅིག །ཆོས་ཉིད་ཀློང་དུ་གཤེགས་ནས་ཀྱང་། །གསོལ་བ་བཏབ་ན་སླར་ཡང་བྱོན། ཨགྣཱ་ཡེ་མུཿ ཅེས་ཡེ་ཤེས་པ་གཤེགས། དམ་ཚིག་པ་མེའི་ཕུང་པོར་གྱུར་པར་བསམ་མོ། དེ་ནས་ཤིས་བརྗོད་ནི། ཧཱུྃ། འོད་དམར་དབང་གི་ཕོ་བྲང་ནས། །ཛམ་ལྷ་ཡབ་ཡུམ་སྲས་གསུམ་དང་། །རྩ་གསུམ་ཆོས་སྐྱོང་བསྲུང་མར་བཅས། །དཀྱིལ་འཁོར་ལྷ་ཚོགས་བཀྲ་ཤིས་ཤོག །བསྔོ་སྨོན་ནི། ཟག་བཅས་ཟག་མེད་དགེ་བ་ཡིས། །བདག་སོགས་མཁའ་མཉམ་ལུས་ཅན་ཀུན། །ཚོགས་གཉིས་རབ་རྫོགས་བྱང་ཆུབ་ཀྱི། །འབྲས་བུ་མངོན་དུ་འགྱུར་བར་ཤོག །དེ་ནས་ཐལ་བ་ཆུ་བོ་རྒྱུན་བཟང་ལ་ཕབ་བོ། །ཅེས་པ་འདི་ཁམས་པ་ཉི་མ་གྲགས་པའི་མིང་གིས་བྲིས་པ། དམ་མེད་ལ་མ་སྟོན། མ་དྲིས་པ་ལ་དཔེ་མ་གཅོད། བཀའ་ཡི་རྒྱས་བཏབ་བོ། མངྒ་ལཾ།། །།
ཛམ་དམར་གྱི་གཏོར་འབུལ།
ཛམ་དམར་གྱི་གཏོར་འབུལ་བཞུགས། དབང་གི་ལྷ་ལ་ཕྱག་འཚལ་ལོ། །ཛམ་བྷ་ལར་གཏོར་མ་འབུལ་བར་འདོད་ན། གཏོར་མ་ཟླུམ་པོ་མཐེབ་སྐྱུ་བཞིས་བསྐོར་བ་ལ་བཟའ་བཏུང་དང་སྨན་རག་གིས་བྲན་ལ། རཾ་ཡཾ་ཁཾ། གསུམ། ཨཱོཾསྭཱ་བྷ་ཝས་སྦྱངས། །སྟོང་པའི་ངང་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་འདོད་པའི་ཡོན་ཏན་ལྔ་དང་ལྡན་པ་ཡེ་ཤེས་ཀྱི་བདུད་རྩིའི་རང་བཞིན་ཟད་མི་ཤེས་པ་ནམ་མཁའི་མཐའ་དང་མཉམ་པར་གྱུར། ཨཱོཾཨཱཿཧཱུྃ་ལན་གསུམ་གྱི་བྱིན་གྱིས་བརླབས། རང་ཉིད་ཡི་དམ་དུ་གསལ་བའི་མདུན་དུ་པདྨ་དང་ཉི་ཟླའི་གདན་ལ་འབྲུག་དམར་གློག་ལྟར་འཁྱུག་པའི་སྟེང་དུ་ཛཾ་ཡིག་དམར་པོ་ཡོངས་སུ་གྱུར་པ་ལས་མགོན་པོ་ཛམ་བྷ་ལ་སྐུ་མདོག་པདྨ་རཱ་གའི་མདོག་ལྟར་དམར་བ་ཞི་འཛུམ་བརྗིད་པ་སྒེག་པའི་ཉམས་ཅན་ཕྱག་གཡས་ནོར་བུ་དང་གཡོན་ནེའུ་ལེ་བསྣམས་པ་དར་དང་རིན་པོ་ཆེའི་རྒྱན་ཅན་གཡས་སུ་ནོར་བདག་དམར་པོ་གཡོན་དུ་ལྷ་མོ་དམར་མོ་སྟེ་གཙོ་འཁོར་གསུམ་ལ་གནོད་སྦྱིན་ནོར་ལྷའི་འཁོར་ཚོགས་ཀྱིས་བསྐོར་བའི། གནས་གསུམ་འབྲུ་གསུམ་གྱི་མཚན་པ་ལས་འཕྲོས་པའི་འོད་ཟེར་དང་རང་གི་ཐུགས་ཀ་ནས་ཡེ་ཤེས་ཀྱི་འོད་ཟེར་ལྕགས་ཀྱུ་ལྟ་བུ་འཕྲོས་པས་རི་རབ་ཀྱི་བྱང་ཕྱོགས་ལྕང་ལོ་ཅན་སོགས་དབང་གི་གནས་ནས་བསྐྱེད་པ་དང་འདྲ་བའི་ཡེ་ཤེས་པ་སྤྱན་དྲངས། ཨཱོཾ་ཛམྦྷ་ལ་ཧྲཱིཿད་ཡ་ཧཱུྃ་ཧཱུྃབཛྲ་ས་མ་ཡ་ཛཿཛཿ ཏིཥྛ་ལྷན། ཨ་ལ་ལ་ཧོ༔ བཛྲ་པུཥྤེ་དྷུཥྤེ་ཨ་ལོ་ཀེ་གྷནྡྷེ་ནཻ་ཝི་དྱ་ཤཔྟ་པཉྩ་རཀྟ་བྷ་ལིངྟ་སརྦ་མ་ཧཱ་པུ་ཙ་ཁ་ཁ་ཁཱ་ཧི་ཁཱ་ཧི། ཧཱུྃ། མི་ཟད་རིན་ཆེན་འདོད་འབྱུང་གནས། །འབྲུག་དམར་གློག་དམར་འཁྱུག་འདྲའི་སྟེང་། །འགྱིང་བག་ཚུལ་གྱིས་བཞུགས་པའི་ལྷ། །ཛམ་ལྷ་དམར་པོར་ཕྱག་འཚལ་བསྟོད། །ནོར་བདག་དམར་པོར་ཕྱག་འཚལ་བསྟོད། །ཡུམ་མཆོག་ལྷ་མོར་ཕྱག་འཚལ་བསྟོད། །ནོར་ལྷ་རྒྱ་མཚོར་ཕྱག་འཚལ་བསྟོད། དམ་རྫས་མཆོད་གཏོར་འདི་བཞེས་ཤིག །ཁམས་གསུམ་སྲིད་གསུམ་སྐྱེ་འགྲོ་དང་། །ཟས་ནོར་ལོངས་སྤྱོད་དར་ཟབ་གོས། །རིན་ཆེན་འབྲུ་སྨན་རྐང་འགྲོ་སོགས། །དཔལ་འབྱོར་དབང་བསྡུས་བདག་ལ་སྩོལ། །ཆོས་བརྒྱུད་བསྟན་པ་དེ་འཛིན་བཅས། ཕྱོགས་དུས་ཀུན་ཏུ་དར་ཞིང་རྒྱས། །ཡུན་དུ་གནས་ཤིང་ཕུན་སུམ་ཚོགས། །བཀྲ་ཤིས་དཔལ་གྱིས་ཀུན་ཁྱབ་མཛོད། ཅེས་མཆོད་བསྟོད་འཕྲིན་ལས་བཅོལ་བར་བྱའོ། གཏོར་མ་འབུལ་ཐབས་འཁྱེར་བདེ་འདི་ཡང་པདྨ་ཐེག་མཆོག་བསྟན་པའི་རྒྱལ་མཚན་གྱིས་སྦྱར་བ་དགེ་ལེགས་སུ་གྱུར་ཅིག །མངྒ་ལཾ།། །།
ཛམ་དམར་དབང་ཆོག་བློ་གསལ་ཡིད་འཕྲོག
ཛམ་དམར་དབང་བསྐུར་བྱ་ཚུལ་ལ་ཉེར་འཁོའི་ཟུར་འདེབས་ལྷན་ཐབས་སུ་སྦྱར་བ་བློ་གསལ་ཡིད་འཕྲོག་ཞེས་པ་ཡོད། ཨཱོཾ་སྭ་སྟི་སིདྡྷཾ། དྲན་པ་ཙམ་གྱིས་སྲིད་ཞིའི་དབུལ་བ་ལས། །ངེས་པར་སྐྱོབས་པའི་ཚད་མེད་ཐུགས་རྗེ་དང་། །དངོས་གྲུབ་འདོད་པ་འཇོ་བའི་འཕྲིན་ལས་ཅན། །བླ་མ་ཡིད་བཞིན་ནོར་བུར་གུས་བཏུད་ནས། །རྨུགས་འཛིན་དབང་གི་རྒྱལ་པོའི་བསྒོམ་བཟླས་ཀྱི། །དངོས་གྲུབ་བསྒྲུབ་ལ་བྱིན་རླབས་འབྱུང་བའི་སྒོ། །བརྒྱུད་ལྡན་ཞལ་གྱི་བདུད་རྩིས་ཡོངས་གང་བའི། །དབང་ཆོག་འདོད་པ་འཇོ་བའི་བུམ་བཟང་བྱ། །འདིར་འཕགས་པ་ཛམ་བྷ་ལ་དམར་པོའི་དབང་བསྐུར་ཇི་ལྟར་བྱ་བའི་ཚུལ་རྗེ་གཏེར་ཆེན་ཉིད་ཀྱིས་སྩལ་བ་ལ་ཉེ་བར་འཁོ་བ་འགའ་ཞིག་འདིར་ལྷན་ཐབས་སུ་སྡེབས་ནས་བཀླག་ཆོག་ཏུ་བསྒྲིག་པར་བྱ་སྟེ། དེ་ཡང་སྔོན་འགྲོ་དངོས་གཞི་རྗེས་ཀྱི་ཆིངས་གསུམ་དུ་བསྡུས་ཏེ་བསྟན་པར་བྱའོ། །དང་པོ་ནི། །གང་དུ་བྱ་བའི་གཞི་དེར་སྟེགས་བུ་ཁེབས་དམར་པོ་དང་ལྡན་པའི་སྟེང་དུ་འབྲུ་སྣ་ཚོགས་རྒྱ་སྐྱེགས་ཀྱིས་མདོག་བསྒྱུར་བ་ནོར་བུ་སུམ་སྒྲོམ་ཀྱི་དབྱིབས་སུ་བཀོད་པའི་སྟེང་མཉྫིའི་ཁར་ཟངས་བུམ་བཅུད་ལྡན་མགུལ་ཆིངས་དམར་ཁ་རྒྱན་གཟུངས་རྡོར་དང་བཅས་པ་འགོད། དབུས་སུ་བྱི་རུའམ་པདྨ་རཱ་ག་སོགས་རིན་པོ་ཆེའི་དབང་ཕྲེང་ལས་མཐུན་མདོག་ཅན། གཡོན་དུ་སྒྲུབ་རྟེན་ནམ་ཙཀ་ལི། རྒྱབ་ཏུ་སྒྲུབ་ཡིག །མདུན་དུ་གཏོར་མ་རིན་ཆེན་འབར་བ། མཐའ་སྐོར་དུ་མཆོད་པ་རྣམ་ལྔ་མདོག་ཁ་བསྒྱུར་བ་དང་གཞན་ཡང་སློབ་དཔོན་མདུན་དུ་ཌཱ་དྲིལ། ནས་ཟེ། སྤོས་ཐུན་སྣོད། ལས་བུམ། བགེགས་གཏོར། །མཎྜལ་སོགས་ཚོགས་པར་བྱས་ལ། ལས་གཞུང་བསྲང་། འཛབ་བསྙེན་ནུས་ལྡན་དུ་བྱ། བདག་འཇུག་བླངས། བཀའ་གཏེར་མཆོད། ཚོགས་མཆོད་ཡན་སོང་ནས། ལས་བུམ་བསངས། །སྟོང་པའི་ངང་ལས་བུམ་པ་ནི། །རིན་པོ་ཆེ་ཡི་གཞལ་ཡས་ཁང་། །མཚན་ཉིད་རྫོགས་པའི་ནང་ཉིད་དུ། །དབང་གི་ཁྲོ་བོ་རྟ་མཆོག་དཔལ། །དམར་པོ་རྡོར་དྲིལ་ཡུམ་ལ་འཁྱུད། །རྟ་མགོས་མཚན་ཞིང་ཁྲོ་ཆས་རྫོགས། །སྐུ་ལས་སྤྲུལ་པའི་ཁྲོ་ཆུང་གིས། །གདོན་བགེགས་བཅོམ་ནས་བུམ་པའི་ཆུར། །ཐིམ་ནས་བུམ་ཆུ་ནུས་ལྡན་གྱུར། །ཨཱོཾབཛྲ་ཀྲོ་ཏ་ཧྱ་གྷྲཱི་ཝ་ཧཱུྃ་ཕཊ༔ གང་མང་བཟླས་རྗེས། ཁྲོ་བོ་ཞུ་ནས་བུམ་ཆུར་འདྲེས། །ལས་ཀུན་བསྒྲུབ་པའི་བདུད་རྩིར་གྱུར། །ཞེས་བསྐྱེད་བཟླས་གྲུབ་ནས། སློབ་མ་རྣམས་ཁྲུས་བྱས། གྲལ་དུ་འཁོད། བགེགས་བསྐྲད། བསྲུང་འཁོར་བསྒོམ། སློབ་དཔོན་གྱིས་ཉན་པར་བསྐུལ་ཞིང་། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕངས་རིན་པོ་ཆེ་ཐོབ་པར་བྱ། དེའི་ཆེད་དུ་འཕགས་པ་ཛམ་བྷ་ལ་དམར་པོའི་དབང་བསྐུར་བ་གསན་ནས་ཚུལ་བཞིན་དུ་ཉམས་སུ་བླངས་ནས་རང་དང་གཞན་གྱིདོན་རྒྱ་ཆེན་པོ་བགྱིའོ་སྙམས་པའི་ཐུགས་བསྐྱེད་ལེགས་པར་གསལ་བཏབ་ནས་གསན་པར་ཞུ། དེ་ཡང་སྟོན་པ་ཡང་དག་པར་རྫོགས་པའི་སངས་རྒྱས་རྡོ་རྗེ་འཆང་ཆེན་པོས་སྔགས་ཀྱི་རྒྱུད་སྡེ་རྣམས་སུ་ལྷག་པའི་ལྷ་རབ་འབྱམས་ཇི་སྙེད་ཅིག་སྩལ་བ་ཐམས་ཅད་ཀྱང་མཆོག་ཐུན་གྱི་དངོས་གྲུབ་སྒྲུབ་པའི་ཐབས་ཁྱད་པར་ཅན་ཁོ་ན་ལས། ལྷག་པར་ཐུན་མོང་དུ་ནོར་སྒྲུབ་ཀྱི་རིགས་མང་དུ་སྩལ་བ་ཀུན་གྱི་ནང་ནས་ནོར་ལྷའི་གཙོ་བོ་ནི་འཕགས་པ་ཛམ་བྷ་ལ་ཉིད་ཡིན་ཏེ། དེའི་སྒྲུབ་ཐབས་གསར་རྙིང་གི་རྒྱུད་དང་མན་ངག་རྣམས་ལས་མང་དུ་འབྱུང་མོད། འོན་ཀྱང་ངོ་བོའི་སྒོ་ནས་དབྱེར་མེད་ཀྱང་རྣམ་པ་རིགས་དང་ཁ་དོག་གིས་དབྱེ་བའི་ཁྱད་པར་མི་འདྲ་བ་མང་དུ་ཡོད་པ་ལས། འདིར་ཛམ་བྷ་ལ་དམར་པོ་སྟེ། དེ་ཡང་དོན་དམ་པར་རྒྱལ་བ་ཀུན་གྱི་གསུང་རྡོ་རྗེའི་རང་བཞིན་ལས་རྣམ་པ་གནོད་སྦྱིན་རྒྱལ་པོའི་ཚུལ་དུ་སྤྲུལ་ནས་འགྲོ་བ་རྣམས་གནས་སྐབས་དབུལ་བའི་གདུང་བ་ལས་སྐྱོབས་ཤིང་མཐར་ཐུག་ཕན་བདེའི་དངོས་པོ་མཐའ་དག་བདེ་བླག་ཏུ་སྩོལ་བའི་ནོར་ལྷའི་གཙོ་བོར་སྐུར་བཞེངས་པ་སྟེ། དགེ་བཤེས་དབང་ཕྱུག་འབར་གྱི་གཏེར་མའི་ཛམ་དམར་ལས། རྒྱལ་བ་ཀུན་གྱི་གསུང་ལས་ལེགས་སྤྲུལ་ཞིང་༔ ཐུགས་རྗེ་ཆགས་པས་སྐུ་མདོག་དམར་པོར་བཞུགས༔ དབང་གི་ཕྲིན་ལས་རྫོགས་མཛད་ཛམ་བྷ་ལ༔ ཞེས་གསུངས་སོ། །དེ་ཡང་སློབ་དཔོན་ཆེན་པོ་པདྨ་འབྱུང་གནས་ཀྱིས་རྩོད་དུས་ཀྱི་གདུལ་བྱ་རྣམས་ལ་ཉེ་བར་བརྩེ་བས་དགོངས་ཏེ་སྒྲུབ་ཐབས་ཀྱི་རིགས་མི་འདྲ་བ་མང་དུ་མཛད་ནས་གཏེར་ཁ་མང་པོར་གཏེར་དུ་སྦས་པ་དག་སྤྲུལ་པའི་གཏེར་སྟོན་དག་གིས་རིམ་པར་སྤྱན་དྲངས་ནས་སྤེལ་བའི་གདམས་ཟབ་ཤིན་ཏུ་མང་བ་གཏེར་ཁ་སོ་སོ་ནས་འབྱུང་བ་ལས། འདི་ནི་གཏེར་ཆེན་ཆོས་ཀྱི་རྒྱལ་པོ་གར་དབང་འགྲོ་འདུལ་གླིང་པའམ་རིག་འཛིན་ཉི་མ་གྲགས་པ་རྩལ་ཞེས་མཚན་ཡོངས་སུ་གྲགས་པའི་སྤྲུལ་པའི་གཏེར་སྟོན་དེ་ཉིད་ཀྱིས་གངས་རིའི་རྒྱལ་པོ་ཏེ་སེ་ནས་གདན་དྲངས་པའི་ཛམ་བྷ་ལ་དམར་པོའི་སྒྲུབ་ཐབས་བླ་མ་བདེ་མཆོག་དབང་གི་འཁོར་ལོའི་ཆ་ལག་ལས་བྱུང་བ་སྟེ། འདི་ཉིད་ཀྱི་སྒྲུབ་ཐབས་ལས། བདག་འདྲ་པདྨ་འབྱུང་གནས་ཀྱིས༔ ལྔ་བརྒྱ་དུས་ཀྱི་ཐ་མ་ལ༔ ཆོས་བྱེད་དབུལ་བ་སེལ་བའི་ཕྱིར༔ བདེ་མཆོག་དབང་གི་ཆོས་སྐོར་དུ༔ ཛམ་དམར་ནོར་སྒྲུབ་གདམས་པ་སྟོན༔ ཞེས་དང་། ལྔ་བརྒྱ་དུས་ཀྱི་ཐ་མ་ལ༔ ཆོས་བྱེད་དབུལ་བ་བསལ་བའི་ཕྱིར༔ སློབ་དཔོན་པདྨ་འབྱུང་གནས་ཀྱིས༔ གངས་རིའི་རྒྱལ་པོ་ཏེ་སེ་ལ༔ རྒྱ་ཡིས་བཏབ་ནས་གཏེར་དུ་སྦས༔ ཕྱི་རབས་འབྱུང་འགྱུར་ལུང་དུ་བསྟན༔ རྡོ་རྗེ་ལེགས་བས་བཀའ་འདི་སྲུངས༔ ལྷ་བཙན་ཆེན་པོས་གཏེར་འདི་འཚོས༔ ལས་འཕྲོའི་བུ་དང་འཕྲད་པར་ཤོག༔ ཞེས་གསུངས་པ་ལྟར་ཟབ་ཅིང་བྱིན་རླབས་ཀྱི་ཚན་ཁ་ཆེ་བ་གཞན་ལས་ཆེས་ཆེར་མཆོག་ཏུ་འཕགས་པ་གནས་སྐབས་དང་མཐར་ཐུག་གི་དོན་མ་ལུས་པ་འབད་པ་མེད་པར་སྩོལ་ནུས་པ་ཞིག་སྟེ། འཛམ་གླིང་ཟས་ནོར་ལོངས་སྤྱོད་འདུ༔ འཁོར་ལོས་བསྒྱུར་རྒྱལ་དང་མཚུངས་ཤིང་༔ ཕྱི་མ་དབང་བསྒྱུར་རྒྱལ་པོར་སྐྱེ༔ འདི་ནས་བྱང་ཆུབ་མ་ཐོབ་བར༔ དབུལ་བའི་སྡུག་བསྔལ་རྒྱུན་གཅོད་བྱེད༔ ཅེས་དང་། ཐུན་མོང་དངོས་གྲུབ་སྤྲིན་ལྟར་འདུ༔ ཁྱད་པར་ཟས་སྐོམ་འདུ་བ་རྒྱས༔ ཁམས་རྒྱས་སྟོབས་འཕེལ་རྒས་སྲ་ཞིང་༔ ཕ་རོལ་སྐྱེ་འགྲོ་ཤུགས་ཀྱིས་འདུ༔ བསོད་ནམས་རྒྱས་དུས་མཆོད་སྦྱིན་འབུངས༔ ཕྱི་མའང་བྱང་ཆུབ་མངོན་དུ་བྱེད༔ ཅེས་གསུངས་པར་མ་ཟད་གཏེར་སྟོན་རིག་འཛིན་ཆེན་པོ་ཉིད་ལ་ཛམ་བྷ་ལས་ཞལ་མངོན་སུམ་དུ་བསྟན་ནས་ཕྲིན་ལས་ཐམས་ཅད་སྒྲུབ་པའི་སྡོང་གྲོགས་མཛད་པར་ཞལ་གྱིས་བཞེས་པ་ཡིན་ཏེ། གཏེར་ཆེན་ཉིད་ཀྱི་གསུངས་ལས། །འདི་ཉིད་མ་འཕྲད་དཀའ་མོ་བྱུང་། །ཚོགས་དང་བཤགས་པ་གཏང་རག་འབུལ། །བཀའ་འདི་བཙན་པས་དམ་དུ་ཟུངས། །འཁུ་ཞིང་ལྡོག་ན་ང་མ་ལན། །འཚོ་ཤེས་གཏེར་གྱི་དངོས་གྲུབ་འབྱུང་། །ཞེས་ཆེས་ཟབ་ཅིང་གཉན་པའི་ཚུལ་དང་། བོད་ཡུལ་དབུས་གཙང་རུ་བཞི་ལ། །ཉི་མ་ལྟར་གྲགས་ཡོངས་ལ་ཁྱབ། །སྙན་དང་གྲགས་པ་ཐོབ་བྱེད་པ། །འདིའི་མཐུ་ཡིན་པ་ཤེས་པར་གྱིས། །ཞེས་གཏེར་ཆེན་ཉིད་ཕྲིན་ལས་ཀྱི་སྒོ་འཕར་གདམས་པ་འདི་དང་ལྷག་པའི་ལྷ་འདི་ལ་བསྟེན་ནས་ཕྱེས་ཚུལ་གསལ་བར་གསུངས་པ་ཡིན་ལ། གཞན་ཡང་རྗེས་འཇུག་དམ་ལྡན་སློབ་བུ་རྒྱུད་འཛིན་དང་བཅས་པ་རྣམས་ལའང་དངོས་གྲུབ་སྩོལ་ཞིང་ཕྲིན་ལས་བསྒྲུབ་པར་ཞལ་ཀྱིས་བཞེས་པ་ཡིན་ཏེ། གཏེར་ཆེན་གྱིས་རྗེས་འཇུག་རྣམས་ཀྱིས་མཆོད་པ་དང་གཏོར་མ་ལ་རེམ་དང་དངོས་གྲུབ་འབྱུང་བར་ཛམ་བྷ་ལས་ཞལ་བཞེས་ཡོད་པ་ཡིན་ཞེས་གསུངས་ཏེ། དེས་ན་ཟབ་ཁྱད་དང་བྱིན་རླབས་ཀྱི་བཀའ་བབས་གཞན་ལས་ཆེས་བཟང་ཞིང་སྒྲུབ་ཐག་ཉེ་བ་དངོས་གྲུབ་ཆེ་བ་འདི་ལྟ་བུའི་གདམ་སྲོལ་འདི་ནི། ཨོ་རྒྱན་དུས་གསུམ་མཁྱེན་པས་སྒྲིབ་མེད་ཡེ་ཤེས་ཀྱི་གཟིགས་པས་ཡུལ་དུས་གང་ཟག་ཐམས་ཅད་ཇི་བཞིན་མཁྱེན་ནས་དུས་སུ་གཏེར་ནས་གདན་དྲངས་ཤིང་འགྲོ་དོན་འབྱུང་བའི་སྨོན་ལམ་ཐ་ཚིག་གི་བཀའ་རྒྱ་དང་བཅས་གཏེར་དུ་སྩལ་བ་ཇི་བཞིན་དུས་སུ་བབས་པའི་གཏེར་ཁ་ཟབ་མོ་ཞལ་ཕྱེ་བ་ལས་བྱུང་བས་ན་བྱིན་རླབས་ཀྱི་ཚན་ཁ་ཆེ་བ་དང་། གཏེར་ཆེན་ཉིད་ལ་ཛམ་བྷ་ལའི་ཞལ་མངོན་སུམ་དུ་བསྟན་ནས་ཕྲིན་ལས་སྒྲུབ་པར་ཞལ་བཞེས་གནང་བ་ཐོབ་པས་དོན་གྱི་དག་སྣང་མང་ཡང་འགྱུར་བས་བརྒྱུད་པའི་ཆུ་བོ་གཉིས་འདྲེས་ཀྱི་ཆེ་བ་དང་། ཕྱི་རབས་རྗེས་འཇུག་རྣམས་ལའང་དངོས་གྲུབ་སྩོལ་བའི་ཞལ་བཞེས་ཐ་ཚིག་དང་ལྡན་པའི་ཆེ་བ་སྟེ། ཆེ་བ་གསུམ་གྱིས་ཁྱད་པར་དུ་བྱས་པའི་གདམ་ཟབ་འདིར་འཇུག་པའི་ཐོག་མར་དབང་བསྐུར་ནས་ནུས་ལྡན་དུ་བྱ་དགོས་པས་དེས་ན་ད་ལམ་དབང་བསྐུར་བ་ལ་སློབ་དཔོན་གྱིས་བགྱི་འོས་རྣམས་ལེགས་པར་གྲུབ་པ་ཡིན། ཁྱེད་རང་སློབ་མ་རྣམས་ཀྱིས་དབང་བསྐུར་ཟབ་མོ་ཞུ་བའི་ཡོན་དུ་དམིགས་ཏེ་མཎྜལ་འབུལ་བར་ཞུ། ཞེས་བརྗོད་མཎྜལ་ཕུལ་གྲུབ་ནས། ༈བླ་མ་བདེ་མཆོག་ལས་བྱུང་བ་ཛམ་དམར་གྱི་དབང་བསྐུར་ཟབ་མོ་དམ་མེད་ལ་ཨྠིྀ༔ མགོན་པོ་ཛམ་བྷ་ལྷ་ལ་ཕྱག་འཚལ་ལོ། །དབང་བྱེད་པར་འདོད་པས་དབང་གི་རྫས་མཐོང་བརྒྱུད་ལྟར་བསགས། གཞུང་བསྲང་བསྙེན་སྒྲུབ་ཁ་གསོ། ཚོགས་ཀྱི་འཁོར་ལོ་ཁྱད་འཕགས་སྐོར། ལས་བུམ་བསྐྱེད། བདག་འཇུག་དངོས་གྲུབ་ཞུ་ཆོག་གིས་བླངས། ནོར་སྣ་ཁྱད་འཕགས་ཀྱི་མཎྜལ་དབུལ་ཞིང་གསོལ་འདེབས་ནི། དེ་ནས་དབང་གི་དོན་དུ་གསོལ་བ་གདབ་པ་འདིའི་རྗེས་བཟློས་མཛོད། ཧཱུྃ། དགའ་ཆེན་ཁྱོད་བདག་སྟོན་པ་པོ། །རྡོ་རྗེ་འཛིན་པ་མཆོག་ཁྱོད་ཀྱིས། བདག་ཅག་རྗེས་སུ་ཡོངས་བཟུང་སྟེ། །ཛམ་ལྷ་དམར་པོའི་དབང་བསྐུར་སྩོལ། །གསུམ། དེ་ནས་སྐྱབས་སེམས་འབོག །དེ་ནས་ཁྱེད་རང་རྣམས་ཀྱི་མདུན་གྱི་ནམ་མཁར་བླ་མ་དང་མགོན་པོ་ཛམ་བྷ་ལྷ་དབྱེར་མེད་པ་ཕྱོགས་དུས་ཀྱི་སྐྱབས་ཡུལ་ཐམས་ཅད་ཀྱིས་བསྐོར་ནས་བཞུགས་པར་དམིགས་ལ། སྐྱབས་སུ་འགྲོ་བ་དང་སེམས་བསྐྱེད་པ་འདིའི་རྗེས་བཟློས་མཛོད། ཧཱུྃ༔ ས་བརྒྱད་གནོད་སྦྱིན་དབང་གི་རྗེ༔ ཛམ་ལྷ་ཡབ་ཡུམ་སྲས་གསུམ་ལ༔ དེང་ནས་བཟུང་སྟེ་བྱང་ཆུབ་བར༔ གུས་པ་ཆེན་པོས་སྐྱབས་སུ་མཆི༔ གསུམ༔ ཧཱུྃ༔ སངས་རྒྱས་བསྟན་དང་འགྲོ་བའི་དོན༔ བྱང་ཆུབ་དམ་པར་སེམས་བསྐྱེད་དེ༔ དབང་མཛད་ལྷ་ཡི་ཏིང་འཛིན་གྱིས༔ འགྲོ་རྣམས་སྒྲོལ་བར་དམ་བཅའོ༔ ལན་གསུམ་སོང་ནས་སྔགས་ཀྱིས་སྦྱངས་ཏེ་བསྐྱེད་རིམ་གཏད། སྤྱན་འདྲེན་ཡེ་ཤེས་པ་བསྟིམ་ཏིཥྛ་བཛྲ་གྱིས་བརྟན་པར་བྱ། ཞེས་པ་སློབ་བུ་རྣམས་ལས་བུམ་གྱི་ཆུས་བསངས་ལ། ཨཱོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཞེས་བརྗོད་པས། ཁྱེད་རང་གི་ཕུང་ཁམས་ཀྱིས་མཚོན་པའི་དངོས་པོ་ཐམས་ཅད་སྟོང་པར་སྦྱངས། དེའི་ངང་ལས་སྐད་ཅིག་གིས་སྣང་སྟོང་རང་འོད་ལས་གྲུབ་པའི་འོད་དམར་དབང་གི་ཕོ་བྲང་གི་དབུས་སུ་ཉི་ཟླ་པདྨའི་གདན་ལ་ས་བོན་ཛཾ་དཱི་ཧྲཱིཿགསུམ་ཡོངས་སུ་གྱུར་པ་ལས་འབྲུག་དམར་གློག་ལྟར་འཁྱུག་པའི་སྟེང་དུ་ཁྱེད་རང་འཕགས་པ་ཛམ་བྷ་ལ་སྐུ་མདོག་དམར་པོ་ཞལ་གཅིག་ཕྱག་གཉིས་སྒེག་ཅིང་ཆགས་པའི་ཉམས་ཅན་ཕྱག་གཡས་ནོར་བུ་དབང་གི་རྒྱལ་པོ་ཐུགས་ཀར་གཏོད་པའི་ཚུལ་གྱིས་འཛིན་ཞིང་གཡོན་པས་འདོད་འབྱུང་ནེའུ་ལེའི་རྐྱལ་པ་སྐུ་སྐེད་ལ་བརྟེན་པའི་ཚུལ་གྱིས་བསྣམས་པ། ཞབས་བརྐྱང་བསྐུམ་འགྱིང་བག་གི་ཚུལ་གྱིས་བཞུགས་པ་དར་དང་རིན་པོ་ཆེའི་རྒྱན་གྱིས་སྤྲས་པ། དཱི་ལས་གཡས་སུ་ནོར་བདག་དམར་པོ་མི་དམར་ལྕགས་ཀྱུ་དང་བུམ་པ་བསྣམས་པ། གཅེར་བུ་འགྱིང་བག་གཟི་བརྗིད་དང་ལྡན་པ། གཡོན་དུ་ཧྲཱིཿལས་ཡུམ་མཆོག་ལྷ་མོ་དམར་མོ་གཡས་གྲི་གུག་དང་གཡོན་དབང་གི་ཞགས་པ་འཛིན་པ། གཅེར་བུ་ནུ་མ་འབུར་ཞིང་བྷ་གའི་ལང་ཚོ་རབ་ཏུ་རྒྱས་ནས་དབུ་སྐྲ་སིལ་བུར་འཕྱོ་བ་རིན་པོ་ཆེའི་རྒྱན་གྱིས་བརྒྱན་པ་གཟི་བརྗིད་འོད་དང་ལྡན་པར་གསལ་གདབ། དེ་ལྟར་གཙོ་འཁོར་གསུམ་གའི་ཐུགས་སྲོག་ས་བོན་དང་གནས་གསུམ་འབྲུ་གསུམ་གྱིས་མཚན་པ་ལས་འཕྲོས་པའི་འོད་ཟེར་དང་བླ་མ་དང་མདུན་བསྐྱེད་ཀྱི་དཀྱིལ་འཁོར་ལས་ཀྱང་འོད་ཟེར་བསམ་གྱིས་མི་ཁྱབ་པ་འཕྲོས་པས་བྱང་ཕྱོགས་ལྕང་ལོ་ཅན་གྱི་ཕོ་བྲང་ནས་བསྒོམ་པ་དང་འདྲ་བའི་ཡེ་ཤེས་པ་ཁ་ཆར་བུ་ཡུག་འཚུབ་པ་ལྟར་བྱོན་ནས་ཁྱེད་རང་ལ་སིབ་སིབ་ཐིམ་བྱུང་སྙམ་པའི་མོས་པ་རྩེ་གཅིག་ཏུ་སྒོམས་ཤིག །སྤོས་རོལ་དང་བཅས། ཧཱུྃ༔ རི་བོ་ཆེན་པོ་བྱང་གི་ཕྱོགས། །གནོད་སྦྱིན་དབང་གི་ཕོ་བྲང་ནས། །ཛམ་ལྷ་དམར་པོ་གཤེགས་སུ་གསོལ། །ནོར་བདག་དམར་པོ་གཤེགས་སུ་གསོལ། །ཡུམ་མཆོག་ལྷ་མོ་གཤེགས་སུ་གསོལ། །ནོར་ལྷ་རྒྱ་མཚོ་གཤེགས་སུ་གསོལ། །ཡེ་ཤེས་འཇིག་རྟེན་ཐམས་ཅད་ནས། །དབང་གི་ལྷ་ཚོགས་གཤེགས་སུ་གསོལ། །གདུང་བའི་ཡིད་ཀྱིས་སྤྱན་འདྲེན་ན། །ཐུགས་རྗེའི་ཤུགས་ཀྱིས་གཤེགས་ནས་ཀྱང་། །མོས་པའི་བུ་ལ་དངོས་གྲུབ་སྩོལ། ཨཱོཾ་ཛཾ་བྷ་ལ་ཧྲཱིཿད་ཡ་ཧཱུྃ་ཧཱུྃཿ བཛྲ་ས་མ་ཡ་ཛཿཛཿ ཨ་བེ་ཤ་ཡ་ཨ་ཨཱཿ ཞེས་བྱིན་དབབ་པའི་དམིགས་པ་ནན་ཏན་བྱས་ལ། སྤྱན་དྲངས་པའི་ཡེ་ཤེས་པ་རྣམས་བརྟན་པའི་མོས་པ་མཛོད། མེ་ཏོག་འཐོར་ཞིང་རྡོ་རྗེ་མགོར་བཞག །ཏིཥྠ་བཛྲ་ཞེས་བརྗོད། བུམ་པ་སྤྱི་བོར་བཞག༔ ཧཱུྃ༔ རིན་ཆེན་ཟངས་ཀྱི་བུམ་པ་འདི། །ཛམ་བྷ་ལ་དང་གཉིས་སུ་མེད། །སྐལ་ལྡན་བུ་ལ་དབང་བསྐུར་བས། བུམ་པ་སྐུ་ཡི་དབང་ཐོབ་ཤོག །རྩ་སྔགས་ཀཱ་ཡ་ཨ་བྷི་ཥིཉྩ་ཧཱུྃ། སློབ་དཔོན་གྱི་ཐུགས་ཀའི་སྔགས་ཕྲེང་ཞལ་ནས་ཐོན་ཁྱེད་རང་རྣམས་ཀྱི་ཞལ་དུ་ཞུགས། ཐུགས་ཀར་ཉི་དཀྱིལ་ས་བོན་གྱི་མཐར་སྔགས་ཕྲེང་གཡས་འོད་དམར་ཕྲེང་ཐག་གཡོན་དུ་འཁོར་བར་དམིགས་ལ། བཟླས་ལུང་སྦྱིན། སྔགས་ཕྲེང་སྤྱི་བོར་བཞག་དབྱངས་གསལ་བྱེད་དང་ཡེ་དྷརྨཱ་བརྗོད། སྒྲུབ་རྟེན་ནམ་ཙཀ་ལི་ཐུགས་ཀྱི་དབང་ནི། ཧཱུྃ༔ འཕགས་མཆོག་མགོན་པོ་ཛམ་བྷ་ལའི། སྒྲུབ་རྟེན་སྐུ་བརྙན་ཐུགས་ཀྱི་དབང་། །སྐལ་ལྡན་བུ་ལ་དབང་བསྐུར་བས། །སྒྲུབ་རྟེན་ཐུགས་ཀྱི་དབང་ཐོབ་ཤོག །རྩ་སྔགས་ཙིཏྟ་སྙིང་གར་བསྐུར། ཡོན་ཏན་དཔེ་བུམ་ལག་དང་ལྟེ་བར་བཞག །ཧཱུྃ༔ འཕགས་མཆོག་མགོན་པོ་ཛམ་བྷ་ལའི། །སྒྲུབ་རྟེན་དཔེ་བུམ་པོ་ཏིའི་དབང་། སྐལ་ལྡན་ཁྱོད་ལ་དབང་བསྐུར་བས། ཡོན་ཏན་ཡོངས་རྫོགས་དབང་ཐོབ་ཤོག །རྩ་སྔགས་རཏྣ་ཨ་བྷི་ཥིཉྩ་ཧཱུྃ། ཕྲིན་ལས་གཏོར་མ་སྤྱི་བོར་བཞག །ཧཱུྃ༔ འཕགས་མཆོག་མགོན་པོ་ཛམ་བྷ་ལའི། །དངོས་གྲུབ་ཕུང་པོ་བྷ་ལིངྟ། །སྐལ་ལྡན་ཁྱོད་ལ་དབང་བསྐུར་བས། འཕྲིན་ལས་ཡོངས་རྫོགས་དབང་ཐོབ་ཤོག །རྩ་སྔགས་ཀརྨ་ཨ་བྷི་ཥིཉྩ་ཧཱུྃ། བརྒྱུད་རིམ་མཐར་དངོས་གྲུབ་ལེན་ཆོག་སྦྱར། སློབ་མ་རང་ལའང་རྟེན་འབྲེལ་ཆེ་བས་ནོར་སྣ་ཁྱད་པར་ཅན་གྱི་མཎྜལ་རེ་མེད་པ་ལ་མི་སྦྱིན་ཛམ་བྷ་ལའི་ཁ་སྐོང་འདི་རྣམས་ཆོས་རྒྱུད་འཛིན་ངེས་མ་གཏོག་སུ་ཐོད་ལ་མ་སྟོན་གསང་རྒྱ་དམ་པོ་མཛོད། ཤིན་ཏུ་ཟབ་པར་ཡོད། ཁམས་པ་ཉི་མ་གྲགས་པས་སྦྱར་བ་མངྒལཾ། བརྒྱུད་རིམ་མཐར་དངོས་གྲུབ་ལེན་ཆོག་སྦྱར་གསུངས་པས། ཨཱོཾ་ཨཱཿཧཱུྃ། ཆོས་སྐུ་རྡོ་རྗེ་འཆང་ཆེན་ལ་གསོལ་བ་འདེབས། །ལོངས་སྐུ་ཕྱག་ན་རྡོ་རྗེ་ལ་གསོལ་བ་འདེབས། །སྤྲུལ་སྐུ་པདྨ་འབྱུང་གནས་ལ་གསོལ་བ་འདེབས། །མཁའ་འགྲོ་ཡེ་ཤེས་མཚོ་རྒྱལ་ལ་གསོལ་བ་འདེབས། །ལོ་ཆེན་ཀླུ་ཡི་དབང་པོ་ལ་གསོལ་བ་འདེབས། །རིག་འཛིན་ཉི་མ་གྲགས་པ་ལ་གསོལ་བ་འདེབས། །ཐུགས་སྲས་ཨོ་རྒྱན་བསྟན་འཛིན་ལ་གསོལ་བ་འདེབས། །ཐེག་མཆོག་བསྟན་པའི་རྒྱལ་མཚན་ལ་གསོལ་བ་འདེབས། །རིག་རྩལ་ཐོགས་མེད་གླིང་བ་ལ་གསོལ་བ་འདེབས། །ངེས་དོན་བསྟན་འཛིན་བཟང་པོ་ལ་གསོལ་བ་འདེབས། །ཨོ་རྒྱན་བསྟན་པའི་ཉི་མ་ལ་གསོལ་བ་འདེབས། །མི་འགྱུར་ནམ་མཁའི་རྡོ་རྗེ་ལ་གསོལ་བ་འདེབས། །འཇིག་མེད་ཆོས་དབྱིངས་རྡོ་རྗེ་ལ་གསོལ་བ་འདེབས། །ཀུན་བཟང་ཐེག་མཆོག་རྡོ་རྗེ་ལ་གསོལ་བ་འདེབས། །ཨོ་རྒྱན་འགྲོ་འདུལ་རྡོ་རྗེ་ལ་གསོལ་བ་འདེབས། །ཐུབ་བསྟན་ཆོས་ཀྱི་རྡོ་རྗེ་ལ་གསོལ་བ་འདེབས། །དྲིན་ཆེན་རྩ་བའི་བླ་མ་ལ་གསོལ་བ་འདེབས། །འཕགས་མཆོག་ཛམ་ལྷ་དམར་པོ་ལ་གསོལ་བ་འདེབས། །ཡུམ་མཆོག་ལྷ་མོ་དམར་མོ་ལ་གསོལ་བ་འདེབས། །སྲས་མཆོག་ནོར་བདག་དམར་པོ་ལ་གསོལ་བ་འདེབས། །བཀའ་སྲུང་རྡོ་རྗེ་ལེགས་པ་ལ་གསོལ་བ་འདེབས། །གཏེར་སྲུང་ལྷ་བཙན་ཆེན་པོ་ལ་གསོལ་བ་འདེབས། །ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཕ་ལ་ཧཱུྃ། ཧཱུྃ༔ དབང་ཆེན་དབང་གི་ལྷ་ཚོགས་རྣམས༔ འགྱུར་མེད་སྐུ་ཡི་དཀྱིལ་འཁོར་ནས༔ འཆི་མེད་ཚེ་ཡི་དངོས་གྲུབ་སྩོལ༔ འགག་མེད་གསུང་གི་དཀྱིལ་འཁོར་ནས༔ ཚངས་དབྱངས་དྲུག་ཅུའི་དངོས་གྲུབ་སྩོལ༔ སྤྲོས་མེད་ཐུགས་ཀྱི་དཀྱིལ་འཁོར་ནས༔ ཕྱག་རྒྱ་དགའ་བཞིའི་དངོས་གྲུབ་སྩོལ༔ ཡོན་ཏན་རེ་སྐོང་དཀྱིལ་འཁོར་ནས༔ ཁམས་གསུམ་དབང་བསྡུས་དངོས་གྲུབ་སྩོལ༔ ཕྲིན་ལས་འགྲོ་འདུལ་དཀྱིལ་འཁོར་ནས༔ སྲིད་གསུམ་ཟིལ་གནོན་དངོས་གྲུབ་སྩོལ༔ རིན་ཆེན་རྣམ་ལྔའི་དཀྱིལ་འཁོར་ནས༔ བང་མཛོད་འབྲུ་ཡི་དངོས་གྲུབ་སྩོལ༔ ལྷབ་ལྷུབ་གོས་ཀྱི་དངོས་གྲུབ་སྩོལ༔ དར་ཟབ་སྣ་ཚོགས་དངོས་གྲུབ་སྩོལ༔ རྨ་གཡང་ཟས་ཀྱི་དངོས་གྲུབ་སྩོལ༔ འཕེན་པོ་མི་ཡི་དངོས་གྲུབ་སྩོལ༔ རྐང་བཞི་དུད་འགྲོའི་དངོས་གྲུབ་སྩོལ༔ བརྒྱུད་འཛིན་རིགས་ཀྱི་དངོས་གྲུབ་སྩོལ༔ ཁྱེའུ་སྲིད་ཀྱི་དངོས་གྲུབ་སྩོལ༔ ཡུལ་ཞིང་དཔལ་འབྱོར་དངོས་གྲུབ་སྩོལ༔ སྙན་གྲགས་གདུལ་བྱའི་དངོས་གྲུབ་སྩོལ༔ ཕྲིན་ལས་རྣམ་བཞིའི་དངོས་སྩོལ༔ མཆོག་དང་ཐུན་མོང་ཟད་མེད་གཏེར༔ དངོས་གྲུབ་མ་ལུས་བདག་ལ་སྩོལ༔ ཨཱོཾ་ཛམ་བྷ་ལ་ཧྲཱིཿད་ཡ་ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཕ་ལ་ཧཱུྃ༔ ཞེས་གཏོར་མ་སྤྱི་བོར་བཞག་ལྷ་ཚོགས་བརྒྱུད་པ་རྣམས་སློབ་མ་ལ་བསྟིམ་ཞིང་གཏོར་ཟན་ཅུང་ཟད་བདུད་རྩིར་ཞུ་བས་ལྕེར་མྱོང་ངོ་། །དེ་ནས་མེ་ཏོག་འཐོར་ཞིང་། ཧཱུྃ༔ འོད་དམར་དབང་གི་ཕོ་བྲང་ནས༔ ཛམ་ལྷ་ཡབ་ཡུམ་སྲས་གསུམ་དང་༔ རྩ་གསུམ་ཆོས་སྐྱོང་བསྲུང་མར་བཅས༔ དཀྱིལ་འཁོར་ལྷ་ཚོགས་བཀྲ་ཤིས་ཤོག༔ ཧཱུྃ༔ འདོད་ཡོན་ལོངས་སྤྱོད་བསོད་ནམ་དཔལ། །དངོས་གྲུབ་ཟད་མེད་ཆུ་བོའི་རྒྱུན། །ཡིད་བཞིན་རེ་བ་སྐོང་མཛད་པ། །བཀྲ་ཤིས་དེས་ཀྱང་དངོས་གྲུབ་སྩོལ། ཞེས་དང་། འབད་དང་རྩོལ་བ༴ སོགས། ཞེས་སོགས་ཤིས་བརྗོད་ཅི་རིགས་དང་། གསུམ་པ་རྗེས་ཀྱི་རིམ་པ་ནི། དམ་ཚིག་ཁས་བླང་། གཙོ་བོས་ཇི་ལྟར་སོགས། གཏང་རག་མཎྜལ། སྐུ་དྲིན་ཡོན་འབུལ། དེང་ནས་བརྩམས་ཏེ་སོགས། དགེ་བ་བསྔོ། ཚོགས་འཁོར་ཡོད་ན་དངོས་གྲུབ་ཏུ་རོལ། སློབ་མ་རྣམས་རང་གནས་བཏང་། ཚོགས་ལྷག་བཏང་། བཀའ་གཏེར་བསྐུལ། ཆད་ཐོ་བསྟན་སྐྱོས་སོགས་མཇུག་བསྐྱང་ཞིང་རྗེས་ཀྱི་བྱ་བ་རྣམས་གསང་བ་སྤྱིའི་འགྲོས་བཞིན་ཤེས་པར་བྱའོ། །ཡིད་ལ་བསམ་པའི་རེ་བ་མ་ལུས་པ། །འབད་མེད་སྐྱོང་བའི་ཡིད་བཞིན་དབང་གི་རྒྱལ། །ཆེས་ཟབ་གདམས་པའི་ནོར་བུ་འདི་ཡོད་བཞིན། །ཆུ་གཏེར་བགྲོད་པའི་ངལ་བས་ཅི་ཞིག་བྱ། །འདིར་ཡང་རྣམ་འདྲེན་གསུང་གི་ཟེར་ཕྲེང་གིས། །བདག་བློ་རྣམ་དཔྱོད་ཆུ་སྐྱེས་ཡོངས་བཞད་རྩེར། །ལེགས་བཤད་ཀུན་དགའ་གསར་བའི་དྲི་བསུང་ཅན། བློ་གསལ་བུང་བའི་ཡིད་འཕྲོག་འདི་མིན་ནམ། །ཚུལ་འདི་རབ་གསལ་ལེགས་བཤད་ཟབ་མོའི་ངག །གདུང་སེལ་སྣང་བའི་དཔལ་དང་དབང་ཕྱུག་ཏུ། །འདོད་འཇོ་རིན་ཆེན་ཏོག་གི་བློ་གྲོས་བཞིན། །ནུབ་མེད་སྙན་པར་གྲགས་བཞིན་མཛེས་གྱུར་ཅིག །ཅེས་འདི་ཡང་གཏེར་ཆེན་གྱིས་བསྩལ་བའི་ཛམ་དམར་དབང་ལ་ཁ་འགེངས་ཟུར་འདེབས་དགོས་རིགས་ལྷན་ཐབས་ཚུལ་དུ་བསྒྲིགས་ཤིང་དབང་བཤད་མདོར་བསྡུས་ཡེ་ཤེས་དབབ་པའི་གསལ་འདེབས་ཕྲན་བུ་རྣམས་གསར་དུ་སྤེལ་ཞིང་གཏེར་ཆེན་གྱི་གསུང་ལ་བཅོས་ལྷད་ཅུང་ཟད་ཀྱང་མེད་པར་མཚམས་སྦྱོར་ཀླག་ཆོག་ཏུ་བཀོད་པ་འདི་ཡང་རྨོངས་བརྟུལ་ཝ་གིནྡྲིའི་མིང་གིས་སྤེལ་བ་དགེ་ལེགས་འཕེལ།། །།
ཛཾ་དམར་ཕྱྭ་གཡང་འགུགས་པའི་འཕྲིན་ལས་དངོས་གྲུབ་རྒྱ་མཚོའི་འབྱུང་གནས།
མགོན་པོ་ཛམ་བྷ་ལ་དམར་པོའི་སྒྲུབ་ཐབས་ལ་བརྟེན་ནས་ཕྱྭ་གཡང་འགུགས་པའི་འཕྲིན་ལས་དངོས་གྲུབ་རྒྱ་མཚོའི་འབྱུང་གནས་བཞུགས་སོ། །དཔལ་ལྡན་སངས་རྒྱས་ཀུན་ངོ་བོ། །ཁྱབ་བདག་པདྨ་རྒྱལ་པོ་ལ། །སྒོ་གསུམ་གུས་པས་བཏུད་བྱས་ནས། །དབང་མཛད་མགོན་པོ་ཛམ་བྷ་ལའི། །ཕྱ་གཡང་འགུགས་པའི་ཕྲིན་ལས་ཉིད། །ཇི་བཞིན་འབད་ལ་གནང་བ་སྩོལ། །དེ་ཡང་རང་གཞུང་གདམས་སྐོར་ལས། །སྒྲུབ་རྟེན་སྐུ་དང་གཏོར་མ་ལ། །བརྟེན་ནས་ཏིང་འཛིན་དམིགས་པ་ཡི། །འཁྲུལ་འཁོར་བཟླས་པའི་གྲངས་རྟགས་ཀྱི། །དངོས་གྲུབ་འགུགས་པའི་ཐབས་ཙམ་ལས། །སྤྲོས་བཅས་གསུངས་པ་མེད་མོད་ཀྱང་། །གང་ཟག་སྤྲོས་པ་ལ་དགའ་བའི། །དཀྱིལ་འཁོར་བསྒྲུབ་རྫས་གཡང་རྟེན་དང་། །ཚིག་གིས་མཚོན་པའི་དངོས་གྲུབ་ཀྱི། །རེ་འབྲས་འདོད་ཚེ་འདི་ཀོ་རྨད། །དེ་ལ་འདིར་སྔོན་འགྲོ་དངོས་གཞི་རྗེས་གསུམ་ལས། དང་པོ་ནི་གཞུང་ལས། །སྟོན་ཀ་འབྲས་བུ་སྨིན་པའི་དུས༔ ཡང་ན་དཔྱིད་ཀ་རྒྱས་པའི་ཚེ༔ ཚེས་བརྒྱད་ཡར་ངོའི་འགྲུབ་སྦྱོར་ལ༔ མཎྜལ་གྲུ་བཞི་དམར་པོས་བྱུགས༔ ཚོང་འདུས་གནས་གཞི་ཕོ་བྲང་གི༔ ས་སྣ་བསྲེ་ཞིང་ཆག་ཆག་གདབ༔ ཅེས་གསུངས་པས་གནས་ཁང་བང་མཛོད་ཀྱི་སྦུགས་སམ་གང་རུང་དུ་སྒྲོམ་ལེགས་པར་བྱི་བ་འབུ་སྲིན་སོགས་ཀྱིས་མི་གནོད་པར་བྱ། དེའི་ནང་གོང་ལྟར་འཇིམ་ཞལ་སྲབ་མོའི་སྟེང་། བྲ་བོ་མ་གཏོགས་པའི་འབྲུ་རིགས་གང་འཛོམ་གྱི་ཚོམ་བུ་ནོར་བུ་སུམ་སྒྲོམ་ཚུལ་དུ་དབུས་སུ་འགོད། དེ་སྟེང་མཉྫིའམ་མ་འབྱོར་ཚེ་མཛོ་མོ་ཤིང་ངམ་ཤུག་པ་གང་རུང་གི་ཐུར་མའི་ཨོམ་བཅིངས་ལ། དེའི་ཁར་སྒྲུབ་རྟེན་བཅའ་ཐབས་ལྟར་གྱི་སྐུ་འབུར་ཐོན་ན་རབ། མ་འབྱོར་ན་ཐིག་ལྡན་གྱི་བྲིས་སྐུ་རས་གཞིར་རྫས་རྣམས་བསྲེས་པའི་སྐུ་མངོན་རྟོགས་ལྟར་བྲིས་པའི་རྒྱབ་ཏུ་རིན་ཆེན་ཁུ་བས་བསྙེན་སྔགས་མཐར་དབྱངས་གསལ། རྟེན་སྙིང་སུ་པྲ་ཏིཥྛ་བཛྲ་ཡེ་རྣམས་བྲིས་པའི་མདུན་གཤམ་ངོས་ནོར་བུའི་གཞོང་པ་དང་བཙུན་བློན་རྣ་ཆ་རྣམས་བྲི། དབྱངས་གསལ་ཡེ་དྷར་སོགས་ཀྱིས་རབ་གནས་ཤིས་བརྗོད་མེ་ཏོག་འཐོར་ལ་དར་ཚོན་ལྔའི་ན་བཟའ་གསོལ་ཏེ། རྫའམ་ཟངས་ཀྱི་གའུ་སོགས་གང་འབྱོར་ནོར་བུའི་དབྱིབས་ཅན་པད་གདན་དང་བཅས་ཡོད་པའི་ནང་དུ་མདུན་རྒྱབ་མ་ནོར་བར་བཞུགས། དེའི་མདུན་དུ་སྒྲུབ་གཏོར་འབྲུ་ཕྱེ་བཟང་པོར་མར་གྱིས་སྦྲུས་པར་གཏོར་མ་པད་འདབ་བཞི་པ་ཁ་ཕྱིར་སྦུབ་ཉི་གདན་གྱི་ཚུལ། དེའི་སྟེང་ནོར་བུ་སུམ་སྒྲོམ་དབྱིབས་ལ་མེ་རི་པ་ཏྲའི་རྒྱན་ཅན་དམར་པོ་བརྗིད་ལྡན་རྣམས་སྣོད་གས་ཆག་མེད་པའི་ཟངས་སམ་སྡེར་མ་གང་རུང་ནང་དུ་འགོད། གཡས་གཡོན་སྨན་རག་ཕབ་ལྡན། མཆོད་པ་སྣ་བདུན་སྒོར་མོར་བཤམས། བཀའ་གཏེར་སྲུང་མའི་གཏོར་མ་གཡས་གཡོན་དུ་འགོད། དབུས་ཀྱི་ཚོམ་བུར་ཨ་མྲྀ་ཏ་སོགས་བྱིན་རྟེན་སེལ་མེད་དང་ས་སྣ་ཁྱད་འཕགས་བླ་མ་རྒྱལ་བློན་ཚེ་རིང་ཅན་ཆེ་བཙན་ཁེ་གྲགས་སྟོབས་འབྱོར་ཅན་གྱི་སྐྲ་གོས། རིན་ཆེན་རིགས་སོགས་གང་འཛོམ་དང་། ཤར་དུ་རིན་ཆེན་ཤེལ་དངུལ་དར་གོས་སོགས་ཁ་དོག་དཀར་པོའི་རིགས་གང་འཛོམ་དངོས་དང་ཤིང་བྱང་རིས་སུ་བྲིས་པ། དེ་བཞིན་ལྷོར་གསེར་དང་སྤོས་ཤེལ་དར་གོས་སོགས་སེར་པོའི་རིགས། ནུབ་ཏུ་བྱི་རུ་པད་རག་ཟངས་དང་དར་གོས་སོགས་དམར་པོའི་རིགས། བྱང་དུ་གཡུ་མུ་མེན་ལྕགས་དང་དར་གོས་སོགས་སྔོན་པོའི་རིགས་དང་། གཞན་ཡང་གོ་མཚོན་ཕོ་ཆས་མོ་ཆས་རྟ་ལུག་འབྲི་གཡག་སོགས་རྐང་བཞི་དུད་འགྲོ་གཡང་ཅན་གྱི་ཤ་སྤུ་ཚིལ་གསུམ་གང་འཛོམ་གཙང་སྦྲ་གང་ཆེ་བྱས་ལ། ཤིང་བྱང་སོགས་དེར་མཐུན་བཀོད་པའམ། དངོས་འབྱོར་གྱི་རྫས་མཆོད་བྱུང་ན་ཤིང་བྱང་མི་དགོས་སོ། །སྟེང་ཕྱོགས་སུ་བླ་བྲེ་འཕན་དར་སོགས་གང་འབྱོར་གྱིས་བརྒྱན་པ་དང་སྨན་སྣ་གང་འཛོམ་དུག་མེད་རིགས་ཀྱི་ཕྱེ་མས་ཕྱོགས་ཀུན་ཁྱབ་པར་འཐོར་ལ་དྲི་ཞིམ་པར་བྱ། མདའ་རྒོད་སྒྲོ་མ་ཉམས་པར་དར་སྣ་ལྔ་དང་མེ་ལོང་ཟངས་ཀྱི་ལྕགས་ཀྱུ་ལྕགས་སྒྲོག་གྲི་གུག་སོགས་ཆུང་ངུས་བརྒྱན་པ་ནུབ་ཕྱོགས་སུ་བཞག །ཕྱེ་མར་ཇ་ཆང་འོ་མ་སྐོམ་སོགས་བཟའ་བཏུང་གི་རིགས་ཕྱོགས་ཕྱོགས་ན་སྤུངས་པ་སོགས་ཀྱིས་བག་དྲོ་བྱིན་ཆེ་བར་བྱའོ། །གཞན་ཡང་ཡི་དམ་ཆོས་སྲུང་སྤྱི་སྒོས་ཀྱི་མཆོད་གཏོར་དང་ཚོགས་ཀྱི་ཡོ་བྱད་སོགས་འདུ་བྱའོ། །གཉིས་པ་ནི། ཐོག་མར་སྔོན་འགྲོ་ཆོས་སྤྱོད་གསོལ་འདེབས་དཀར་བགེགས་ནས་ལས་བྱང་དཀྱུས་བཞིན་བསྲང་ལ། ལས་གཞུང་བསྙེན་པ་སྔགས་དམིགས་གནད་དུ་བསྣུན་ལ། བསྙེན་ཚད་གཞུང་དུ་མ་གསུངས་ཀྱང་གཡང་སྒྲུབ་རྐྱང་པར་རང་གཞན་གྱི་དོན་དུ་བྱེད་ན། །གཞུང་ནས་རྩ་བསྙེན་ཞག་གསུམ་བྱེད་པར་གསུངས་པས་དེ་ལྟར་དང་། །གྲངས་བསྙེན་བྱེད་ཚེ་གསང་སྔགས་སྤྱི་ཡི་འགྲོས་ལྟར་མཚམས་སྒྲུབ་ཇི་བཞིན་གཞུང་ལྟར་སྒྲུབ་རྟེན་ལས་རྫས་གཞན་དགོས་ཆེད་ཆེར་མི་སྣང་ཞིང་། །ཚོགས་རྫོགས་ཆེད་འབྱོར་ན་རབ་སྟེ། བསྙེན་པ་ནི་ལར་དུས་གྲངས་རྟགས་གསུམ་གྱི་རིམ་པ་ལས་ཤེས་ལ། གྲངས་བསྙེན་འབྲུ་འབུམ་འགྲོ་དགོས་པར་འབུམ་ཕྲག་བཅུ་བཞི་ཙམ་བགྲང་ན་ལེགས་འདྲ་སྙམས་ཤིང་ཤམ་བུའང་འབུམ་ཕྲག་གསུམ་ཙམ་དང་། ཐ་ནའང་ཆིག་འབུམ་ཙམ་བགྲང་དགོས་པ་འདྲ་བས་རང་བཞིན་ཞལ་འཕྲོས་ཏེ། གཡང་སྒྲུབ་ཁོ་ན་ལའང་དེ་ལྟར་གྲུབ་ན་རབ་མ་འགྲུབ་ཀྱང་རྩ་བསྙེན་གོང་ལྟར་ཞག་གསུམ་ལ་ཤམ་བུའང་ཉིན་རེ་བརྒྱ་ཙམ་བཟླས་ན་མཆོག །གོང་བསྙེན་ཞག་གྲངས་རྫོགས་ན་མཐར་ཤམ་བུ་བཏགས་པ་ཞག་གཉིས་ཙམ་དགོས་པར་ཞག་གྲངས་མང་ཉུང་ལྔ་བདུན་བཅུ་སོགས་འཁོས་བསྟུན་དང་། ཐོག་མར་སྒྲུབ་སྐབས་སུ་ཐ་ནའང་ཞག་ལྔ་ལས་མི་ཉུང་བར་དངོས་གྲུབ་ཀྱང་ཡོང་རེ་འབད་པ་སྒྱིད་ལུགས་ཀྱིས་དོན་མི་འགྲུབ་པས་གནད་དུ་བསྣུན་པར་བྱ། དེ་ནས་ཉིན་དང་པོ་ནས་བཟུང་བསྙེན་མཐར་དབྱངས་གསལ་ཡིག་བརྒྱ་རྟེན་སྙིང་སོགས་བརྗོད་ལ་མཆོད་བསྟོད་དང་། བཀའ་གཏེར་སྲུང་མ་གཉིས་སོགས་ཆོས་སྐྱོང་བསྐང་གསོལ་གང་དགོས་དང་། ཚོགས་མཆོད་བསྐང་བ་ཚར་གྲངས་གསོག་པ་སོགས་བབས་བསྟུན་གྱི་བཤགས་པ་བཅས་གྲུབ་ནས། ཐོག་མར་ནོར་བདག་བཞིན་མི་ལ་བཀར་ཡས་ཀྱི་གླུད་བསྔོས་ན་ལེགས་འདྲ་བས་དེ་ལྟར་བྱའོ། །དེ་ནས་ཕྱི་རོལ་ཁང་ཐོག་གང་བདེར་བསང་བཏང་། ནང་དུ་མཆོད་རྫས་ལ་དྲི་བཟང་གི་ཆབ་ཀྱིས་བྲན་ལ། སྔགས་དྲུག་ཕྱག་རྒྱ་དྲུག་གིས་བྱིན་གྱིས་བརླབས་ལ་བསང་སྦྱངས་སྤེལ། ཨཱོཾ་སྭ་བྷཱ་ཝས་སྦྱངས། སྟོང་པའི་ངང་ལས་བྷྲཱུྃ་ཡོངས་སུ་གྱུར་པ་ལས་མདུན་གྱི་ད་ལ་འདི་ཉིད་དབང་མཛད་དབང་གི་དཀྱིལ་འཁོར་པདྨ་རཱ་གའི་ས་གཞི་ལྟར་བཀོད་ལེགས་པར་གྱུར། རྟེན་རྫས་རྣམས་དབང་ཆེན་ནོར་བདག་ཛམ་བྷ་ལ་དངོས་སུ་གྱུར་པའི་མཐུ་བྱིན་གྱིས་འཁོར་འདས་ཀུན་གྱི་ཚེ་དཔལ་སྟོབས་འབྱོར་མངའ་ཐང་ལོངས་སྤྱོད་མ་ལུས་པ་རྡོ་ཁབ་ལེན་གྱིས་ལྕགས་ཕྱེ་བསྡུས་པ་ལྟར་རང་དབང་མེད་པར་འདུས་ནས་སྣོད་བཅུད་ཐམས་ཅད་ཕྱྭ་གཡང་གི་དཔལ་ཕུན་སུམ་ཚོགས་པ་དང་ལྡན་པར་གྱུར། ཅེས་བརྗོད་ལ་སྤོས་རོལ་དབྱངས་དང་བཅས། ཧཱུྃ༔ འོག་མིན་ཆོས་དབྱིངས་ཕོ་བྲང་ནས། །ཆོས་སྐུ་རྡོ་རྗེ་འཆང་ཆེན་ཡང་། །སྤྲོས་བྲལ་ཐུགས་རྗེའི་ཀློང་ནས་བཞེངས། །ཕྱྭ་གཡང་གནས་འདིར་བྱིན་ཆེན་ཕོབ། །གསང་ཆེན་རོལ་པའི་དུར་ཁྲོད་ནས། །ལོངས་སྐུ་ཕྱག་ན་རྡོ་རྗེ་ཡང་། །མ་འགགས་ཐུགས་རྗེའི་ཀློང་ནས་བཞེངས། །ཕྱྭ་གཡང་གནས་འདིར་བྱིན་ཆེན་ཕོབ། །ལྷོ་ནུབ་ཟངས་མདོག་དཔལ་རི་ནས། །གུ་རུ་པདྨ་རྒྱལ་པོ་ཡང་། །འགྲོ་འདུལ་ཐུགས་རྗེའི་ཀློང་ནས་བཞེངས། །ཕྱྭ་གཡང་གནས་འདིར་བྱིན་ཆེན་ཕོབ། །མཁའ་སྤྱོད་དག་པའི་ཞིང་མཆོག་ནས། །མཁའ་འགྲོ་ཡེ་ཤེས་མཚོ་རྒྱལ་ཡང་། །བདེ་སྟོང་དགའ་བཞིའི་ཀློང་ནས་བཞེངས། །ཕྱྭ་གཡང་གནས་འདིར་བྱིན་ཆེན་ཕོབ། །ཡེར་པ་ལྷ་རི་སྙིང་པོ་ནས། །ལོ་ཆེན་ཀླུ་ཡི་དབང་པོ་ཡང་། །མཁྱེན་བརྩེ་ནུས་པའི་ཀློང་ནས་བཞེངས། །ཕྱྭ་གཡང་གནས་འདིར་བྱིན་ཆེན་ཕོབ། །སྣ་ཚོགས་འགྲོ་འདུལ་ཞིང་ཁམས་ནས། །རིག་འཛིན་ཉི་མ་གྲགས་པ་ཡང་། །ཟབ་གཏེར་རྒྱ་མཚོའི་ཀློང་ནས་བཞེངས། །ཕྱྭ་གཡང་གནས་འདིར་བྱིན་ཆེན་ཕོབ། །ངེས་གསང་སྙིང་པོའི་ཕོ་བྲང་ནས། །ཐུགས་སྲས་ཨོ་རྒྱན་བསྟན་འཛིན་རྗེ། །རིག་འཛིན་བསྟན་སྐྱོང་རྒྱ་མཚོ་དང་། །ཨོ་རྒྱན་བསྟན་པའི་ཉི་མ་ཡང་། །སྨིན་གྲོལ་ཐུགས་རྗེའི་ཀློང་ནས་བཞེངས། །ཕྱྭ་གཡང་གནས་འདིར་བྱིན་ཆེན་ཕོབ། །ཐུགས་རྗེ་ཕྱོགས་མེད་ཞིང་ཁམས་ནས། །དྲིན་ཅན་རྩ་བརྒྱུད་བླ་མ་ཡང་། །བྱིན་རླབས་ཐུགས་རྗེའི་ཀློང་ནས་བཞེངས། །ཕྱྭ་གཡང་གནས་འདིར་བྱིན་ཆེན་ཕོབ། །དབང་མཛད་དབང་གི་ཕོ་བྲང་ནས། །འཕགས་མཆོག་ཛམ་ལྷ་དམར་པོ་མཆོག །ཡུམ་སྲས་གནོད་སྦྱིན་སྡེ་ཚོགས་དང་། །བཀའ་བསྲུང་གཏེར་བདག་རྒྱ་མཚོར་བཅས། །དབང་བསྡུས་ཟིལ་གནོན་ཀློང་ནས་བཞེངས། །ཕྱྭ་གཡང་གནས་འདིར་བྱིན་ཆེན་ཕོབ། །རྟེན་པའི་རྫས་ལ་གཉིས་མེད་བཞུགས། །ཕྱྭ་གཡང་དངོས་གྲུབ་མ་ལུས་སྩོལ། །ཅེས་བྱིན་འབེབས་རོལ་མོ་འཁྲོལ། །དེ་ནས་ལས་རྡོར་རམ་སློབ་དཔོན་གྱི་ལག་གཡས་པས་མདའ་དར་གཡབ་གཡོན་པས་ཕྱེ་མར་བཟུང་རོལ་མོ་དབྱངས་སྙན་འགྱུར་དང་བཅས་འདི་སྐད་དོ། །ཀྱཻ། སྲིད་པ་དང་པོ་ཚངས་པས་བསྐོས་བཏབ་པར། །འབྱུང་བཞིའི་དངས་མ་རིན་ཆེན་ལྔ་སོགས་ནས། །སྙིགས་མ་རྣམས་ལ་ས་རྡོ་རི་བྲག་གྲུབ། །ཁམས་གསུམ་སྲིད་གསུམ་ཕྱི་སྣོད་ནང་བཅུད་ཆགས། །རང་ལས་རང་བྱུང་སྲིད་དཔལ་ལོངས་སྤྱོད་ཚེ། །གཡང་ཆེན་དགུ་སྲིད་དཔལ་གཡང་འབྱུང་བའི་བཅུད། །བསྐལ་པ་རྫོགས་ལྡན་གཉིས་ལྡན་གསུམ་ལྡན་དུ། །བདེ་དགའི་དཔལ་ལྡན་ད་དུས་ངན་པའི་ཚེ། །འབྱུང་བཞིའི་བཅུད་ཉམས་སེམས་ཅན་བསོད་ནམས་དམན། །མི་དགེའི་ལས་ཀྱིས་མནར་བའི་སྡུག་བསྔལ་བར། །རྩ་གསུམ་རྒྱལ་བ་རྒྱ་མཚོ་ནོར་ལྷའི་ཚོགས། །ཐུགས་རྗེ་མ་ཆུང་དགོངས་པའི་སྤྱན་གྱིས་གཟིགས། །ཕྱྭ་གཡང་བཀྲ་ཤིས་སྦྲང་ཆར་ཉི་ལི་ལི། །བྱིན་རླབས་དངོས་གྲུབ་རྒྱ་མཚོ་འཁྱིལ་བར་མཛོད། །ཧཱུྃ། དཔལ་ལྡན་རྡོ་རྗེ་འཆང་དབང་ཕྱག་ན་རྡོར། །པདྨ་འབྱུང་གནས་རྒྱལ་ཡུམ་མཚོ་རྒྱལ་མ། །ལོ་ཆེན་ཀླུ་དབང་གཏེར་ཆེན་ཉི་གྲགས་སོགས། །རྩ་བརྒྱུད་བླ་མ་རྒྱལ་བ་སྲས་བཅས་ཀྱི། །མཁྱེན་བརྩེ་ནུས་གསུམ་བྱིན་རློབས་ཡོན་ཏན་ཀུན། །སྐུ་རྟེན་འདྲ་འབག་འདི་དང་དབྱེར་མེད་ཁུག །ཕྱྭ་གཡང་རྟེན་བྱེད་རྫས་ལ་བྱིན་རླབས་ཤིག །ཐུགས་བསྐྱེད་མ་གཡེལ་བསྐུལ་ལོ་མཐུ་མ་ཆུང་། །ཁུག་ཡེ་ཁུག་ཡེ་ཕྱྭ་ཁུག་གཡང་ཁུག་ཅིག །རིན་ཆེན་སྣ་ལྔ་ཆར་ལྟར་ཁྲོ་ལོ་ལོ། །དར་ཟབ་གོས་རིགས་སྤྲིན་ལྟར་ཐིབས་སེ་ཐིབ། །སྐྱེ་འགྲོ་ཕོ་མོ་ཤ་སྦྲང་བཞིན་དུ་འཚུབས། །ཆེ་བཙན་རྒྱལ་བློན་ཉེ་རིགས་བཞིན་དུ་བརྩེ། །མཁས་གྲུབ་བཤེས་གཉེན་ཉིན་བྱེད་ཟེར་ལྟར་འཁྱུད། །ཆོས་ལ་འདུན་སེམས་པདྨོ་ལྟར་བཞད་དང་། །རྐང་བཞི་དུད་འགྲོ་རྩི་ཐོག་བཞིན་དུ་བཀྲ། །བང་མཛོད་འབྲུ་རིགས་ཟད་མེད་ཆུ་གཏེར་བཞིན། །དཔའ་མཛངས་རིགས་བརྒྱུད་མུ་ཏིག་སྟར་བརྒྱུས་འདྲ། །བཟའ་བ་རི་ལྟར་བཏུང་བ་རྒྱ་མཚོ་འདྲ། །ཚེ་རིང་ཉི་ཟླ་ལྟ་བུར་ནད་མེད་གཡང་། །དཔལ་འབྱོར་སྟོབས་དང་ཚེ་དབང་གཡང་ཁུག་ཅིག །ཧཱུྃ། བྱང་ཕྱོགས་གནོད་སྦྱིན་དབང་གི་ཕོ་བྲང་ནས། །ནོར་བདག་གནོད་སྦྱིན་ཆེན་པོ་ཛམ་བྷ་ལ། །ཡུམ་སྲས་འཁོར་དང་བཅས་པ་ཐམས་ཅད་ཀྱི། །ཐུགས་རྗེ་ནུས་པ་ཡོན་ཏན་མ་ལུས་ཀུན། །སྐུ་རྟེན་འདྲ་འབག་འདི་དང་དབྱེར་མེད་ཁུག །ཐུགས་བསྐྱེད་མ་གཡེལ་བསྐུལ་ལོ་མཐུ་མ་ཆུང་། །ཁུག་ཡེ་ཁུག་ཡེ་ཕྱྭ་ཁུག་གཡང་ཁུག་ཅིག །རིན་ཆེན་སྣ་ལྔ་ཆར་ལྟར་ཁྲོ་ལོ་ལོ། །དར་ཟབ་གོས་རིགས་སྤྲིན་ལྟར་ཐིབས་སེ་ཐིབ། །སྐྱེ་འགྲོ་ཕོ་མོ་ཤ་སྦྲང་བཞིན་དུ་འཚུབས། །ཆེ་བཙན་རྒྱལ་བློན་ཉེ་རིགས་བཞིན་དུ་བརྩེ། །མཁས་གྲུབ་བཤེས་གཉེན་ཉིན་བྱེད་ཟེར་ལྟར་འཁྱུད། །ཆོས་ལ་འདུན་སེམས་པདྨོ་ལྟར་བཞད་དང་། །རྐང་བཞི་དུད་འགྲོ་རྩི་ཐོག་བཞིན་དུ་བཀྲ། །བང་མཛོད་འབྲུ་རིགས་ཟད་མེད་ཆུ་གཏེར་བཞིན། །དཔའ་མཛངས་རིགས་བརྒྱུད་མུ་ཏིག་སྟར་བརྒྱུས་འདྲ། །བཟའ་བ་རི་ལྟར་བཏུང་བ་རྒྱ་མཚོ་འདྲ། །ཚེ་རིང་ཉི་ཟླ་ལྟ་བུར་ནད་མེད་གཡང་། །དཔལ་འབྱོར་སྟོབས་དང་ཚེ་དབང་གཡང་ཁུག་ཅིག །ཧཱུྃ། ཤར་ཕྱོགས་རྡོ་རྗེ་སེམས་དཔའི་ངོ་བོ་ཉིད། །ཞི་བའི་ལས་མཛད་མགོན་པོ་ཛམ་བྷ་ལས། །དྲི་ཟའི་རྒྱལ་པོ་འཁོར་བཅས་དབང་བསྡུས་ལ། །ཆེ་བཙན་རྒྱལ་བློན་ཉེ་རིགས་བཞིན་དུ་བརྩེ། །མཁས་གྲུབ་བཤེས་གཉེན་ཉིན་བྱེད་ཟེར་ལྟར་འཁྱུད། །ཆོས་ལ་འདུན་སེམས་པདྨོ་ལྟར་བཞད་དང་། །རྐང་བཞི་དུད་འགྲོ་རྩི་ཐོག་བཞིན་དུ་བཀྲ། །བང་མཛོད་འབྲུ་རིགས་ཟད་མེད་ཆུ་གཏེར་བཞིན། །དཔའ་མཛངས་རིགས་བརྒྱུད་མུ་ཏིག་སྟར་བརྒྱུས་འདྲ། །བཟའ་བ་རི་ལྟར་བཏུང་བ་རྒྱ་མཚོ་འདྲ། །ཚེ་རིང་ཉི་ཟླ་ལྟ་བུར་ནད་མེད་གཡང་། །དཔལ་འབྱོར་སྟོབས་དང་ཚེ་དབང་གཡང་ཁུག་ཅིག །ཧཱུྃ། ནུབ་ཕྱོགས་སྣང་མཐའ་པདྨའི་ངོ་བོ་ཉིད། །དབང་གི་ལས་མཛད་མགོན་པོ་ཛམ་བྷ་ལ། །ཀླུ་དབང་རྒྱལ་པོ་འཁོར་བཅས་དབང་བསྡུས་ལ། །ནུབ་ཕྱོགས་འཇིག་རྟེན་སྲིད་པའི་ཕྱྭ་གཡང་ཀུན། །རིན་ཆེན་བྱི་རུའི་རྫས་དང་དབྱེར་མེད་བསྟིམ། །ཁུག་ཡེ་ཁུག་ཡེ་ཕྱྭ་ཁུག་གཡང་ཁུག་ཅིག །རིན་ཆེན་སྣ་ལྔ་ཆར་ལྟར་ཁྲོ་ལོ་ལོ། །དར་ཟབ་གོས་རིགས་སྤྲིན་ལྟར་ཐིབས་སེ་ཐིབ། །སྐྱེ་འགྲོ་ཕོ་མོ་ཤ་སྦྲང་བཞིན་དུ་འཚུབས། །ཆེ་བཙན་རྒྱལ་བློན་ཉེ་རིགས་བཞིན་དུ་བརྩེ། །མཁས་གྲུབ་བཤེས་གཉེན་ཉིན་བྱེད་ཟེར་ལྟར་འཁྱུད། །ཆོས་ལ་འདུན་སེམས་པདྨོ་ལྟར་བཞད་དང་། །རྐང་བཞིན་དུད་འགྲོ་རྩི་ཐོག་བཞི་དུ་བཀྲ། །བང་མཛོད་འབྲུ་རིགས་ཟད་མེད་ཆུ་གཏེར་བཞིན། །དཔའ་མཛངས་རིགས་བརྒྱུད་མུ་ཏིག་སྟར་བརྒྱུས་འདྲ། །བཟའ་བ་རི་ལྟར་བཏུང་བ་རྒྱ་མཚོ་འདྲ། །ཚེ་རིང་ཉི་ཟླ་ལྟ་བུར་ནད་མེད་གཡང་། །དཔལ་འབྱོར་སྟོབས་དང་ཚེ་དབང་གཡང་ཁུག་ཅིག །ཧཱུྃ། བྱང་ཕྱོགས་དོན་ཡོད་གྲུབ་པའི་ངོ་བོ་ཉིད། །དྲག་པོའི་ལས་མཛད་མགོན་པོ་ཛམ་བྷ་ལས། །གནོད་སྦྱིན་རྒྱལ་པོ་འཁོར་བཅས་དབང་བསྡུས་ལ། །བྱང་ཕྱོགས་འཇིག་རྟེན་སྲིད་པའི་ཕྱྭ་གཡང་ཀུན། །རིན་ཆེན་ལྕགས་སོགས་རྫས་དང་དབྱེར་མེད་བསྟིམ། །ཁུག་ཡེ་ཁུག་ཡེ་ཕྱྭ་ཁུག་གཡང་ཁུག་ཅིག །རིན་ཆེན་སྣ་ལྔ་ཆར་ལྟར་ཁྲོ་ལོ་ལོ། །དར་ཟབ་གོས་རིགས་སྤྲིན་ལྟར་ཐིབས་སེ་ཐིབ། །སྐྱེ་འགྲོ་ཕོ་མོ་ཤ་སྦྲང་བཞིན་དུ་འཚུབས། །ཆེ་བཙན་རྒྱལ་བློན་ཉེ་རིགས་བཞིན་དུ་བརྩེ། །མཁས་གྲུབ་བཤེས་གཉེན་ཉིན་བྱེད་ཟེར་ལྟར་འཁྱུད། །ཆོས་ལ་འདུན་སེམས་པདྨོ་ལྟར་བཞད་དང་། །རྐང་བཞི་དུད་འགྲོ་རྩི་ཐོག་བཞིན་དུ་བཀྲ། །བང་མཛོད་འབྲུ་རིགས་ཟད་མེད་ཆུ་གཏེར་བཞིན། །དཔའ་མཛངས་རིགས་བརྒྱུད་མུ་ཏིག་སྟར་བརྒྱུས་འདྲ། །བཟའ་བ་རི་ལྟར་བཏུང་བ་རྒྱ་མཚོ་འདྲ། །ཚེ་རིང་ཉི་ཟླ་ལྟ་བུར་ནད་མེད་གཡང་། །དཔལ་འབྱོར་སྟོབས་དང་ཚེ་དབང་གཡང་ཁུག་ཅིག །ཧཱུྃ། སྟེང་འོག་ཕྱོགས་བཅུའི་འཇིག་རྟེན་སྐྱོང་བའི་མགོན། །ཚུལ་བསྟེན་འཕགས་མཆོག་མགོན་པོ་ཛམ་བྷ་ལས། །ཟག་བཅས་ཟག་མེད་འཁོར་འདས་དཔལ་གཡངཀུན། །བསྡུས་ཏེ་རྟེན་རྫས་རྣམས་དང་དབྱེར་མེད་བསྟིམ། །ཁུག་ཡེ་ཁུག་ཡེ་ཕྱྭ་ཁུག་གཡང་ཁུག་ཅིག །རིན་ཆེན་སྣ་ལྔ་ཆར་ལྟར་ཁྲོ་ལོ་ལོ། །དར་ཟབ་གོས་རིགས་སྤྲིན་ལྟར་ཐིབས་སེ་ཐིབ། །སྐྱེ་འགྲོ་ཕོ་མོ་ཤ་སྦྲང་བཞིན་དུ་འཚུབས། །ཆེ་བཙན་རྒྱལ་བློན་ཉེ་རིགས་བཞིན་དུ་བརྩེ། །མཁས་གྲུབ་བཤེས་གཉེན་ཉིན་བྱེད་ཟེར་ལྟར་འཁྱུད། །ཆོས་ལ་འདུན་སེམས་པདྨོ་ལྟར་བཞད་དང་། །རྐང་བཞི་དུད་འགྲོ་རྩི་ཐོག་བཞིན་དུ་བཀྲ། །བང་མཛོད་འབྲུ་རིགས་ཟད་མེད་ཆུ་གཏེར་བཞིན། །དཔའ་མཛངས་རིགས་བརྒྱུད་མུ་ཏིག་སྟར་བརྒྱུས་འདྲ། །བཟའ་བ་རི་ལྟར་བཏུང་བ་རྒྱ་མཚོ་འདྲ། །ཚེ་རིང་ཉི་ཟླ་ལྟ་བུར་ནད་མེད་གཡང་། །དཔལ་འབྱོར་སྟོབས་དང་ཚེ་དབང་གཡང་ཁུག་ཅིག །ཅེས་བརྗོད་ཚར་གྲངས་ཅི་མང་དམིགས་པས་རྩིས་ཟིན་པར་བྱའོ། །དེ་ནས་ལྷག་མ་སོགས་ཆོ་གའི་མཇུག་སྐྱོང་ངོ་། །གསུམ་པ་རྗེས་ཀྱི་རིམ་པ་ལ་སྒྲུབ་ཞག་ཐ་མའི་ཉིན་ལྷག་མ་བཏང་ནས་ཐུགས་དམ་བསྐུལ་ཞིང་དངོས་གྲུབ་བླང་བར་སྒྲུབ་རྫས་དེ་མགོན་པོ་ཛམ་བྷ་ལ་དངོས་སུ་མོས་པའི་ཏིང་ངེ་འཛིན་གྱིས་དབང་བཞི་བླངས་པའམ། ཡང་ན་རྟེན་རང་གི་མགོར་བཞག་ལ་ཅི་འདོད་པའི་དངོས་གྲུབ་ཞུ་བར་མོས་ལ། ལར་རྟེན་གཏོར་སོགས་འདི་འདྲའི་རིགས་བསྒུལ་བསྐྱོད་མི་ཉན་གསུངས་པས་སྒྲུབ་པ་དངོས་ཡིན་ཚེ་རང་ལུས་ལ་བཅངས་པའམ། བང་མཛོད་ཕུགས་སུ་སྦ་བར་གསུངས་པས་གང་འདོད་བྱ། གཡང་རྟེན་དུ་བྱེད་ཚེ་རང་ངམ་ཡོན་བདག་གཙོ་བོ་ལྟ་བུའི་མགོ་བོར་བཞག་ནས་འདོད་དོན་གསོལ་འདེབས་སོགས་བགྱིས་ཀྱང་འགལ་བ་མེད་དམ་སྙམ་ལ་དུས་མིན་སྒུལ་སྐྱོད་མི་ཉན་པར་གནད་ཆེ་བར་མཐོང་བས་འདི་དང་པོ་སྒྲུབ་པའི་དུས་ཡིན། །ཕྱིས་སུ་ལོ་རེ་བཞིན་མ་ཆག་པར་དགོས་དུས་གཡང་རྫས་རྣམས་ཆེ་འཛོམས་ཆུང་འཛོམས་ཀྱིས་ཁ་གསོས་བྱེད། འབྲུ་སྣ་དང་མཆོད་གཏོར་གསར་པའང་དགོས། དེ་སྐབས་མཆོད་གཏོར་ལས་དབང་བཞི་ལེན་ཞིང་གཏོར་ཟན་ཅུང་ཟད་དངོས་གྲུབ་ཏུ་རོལ་ན་རུང་ངམ་སྙམ་མོ། །དེ་ནས་ཆད་བསྟན་རྟ་བྲོ་ཐོན་རྗེས་སུ་ཡོན་བདག་གི་ལག་ཏུ་མདའ་དར་དང་ཕྱེ་མར་གཏད་ལ་ཐམས་ཅད་ཀྱིས་འབྲུ་སྣ་མཆོད་ཅིང་འདོད་པའི་དོན་ལ་གསོལ་བ་བཏབ་ལ་བརྟན་བཞུགས་ནི། ཧཱུྃ། ཕྱྭ་གཡང་བཀྲ་ཤིས་གནས་མཆོག་འདིར། །དབང་མཛད་མགོན་པོ་ཛམ་བྷ་ལ། །མ་ལུས་འཁོར་བཅས་བརྟན་པར་བཞུགས། །ཕྱྭ་དང་གཡང་གི་དངོས་གྲུབ་སྩོལ། །སྐུ་རྟེན་འདྲ་འབག་དམ་ཚིག་རྫས། །ནོར་ལྷ་རྒྱ་མཚོ་བརྟན་པར་བཞུགས། །རིན་ཆེན་འབྲུ་ནོར་ལོངས་སྤྱོད་ལ། །ནོར་ལྷ་རྒྱ་མཚོ་བརྟན་པར་བཞུགས། །དད་འབྱོར་ལྡན་པའི་སྦྱིན་བདག་ལ། །ནོར་ལྷ་རྒྱ་མཚོས་མགོན་སྐྱོབས་མཛོད། །རྣལ་འབྱོར་མི་ནོར་ལོངས་སྤྱོད་ལ། །ནོར་ལྷ་རྒྱ་མཚོས་སྲུང་སྐྱོབས་མཛོད། །མདོར་ན་འདི་ཕྱི་དུས་ཀུན་ཏུ། །འཕགས་མཆོག་ཁྱོད་དང་འབྲལ་མེད་པའི། །ཚེ་ནོར་ཆོས་གསུམ་དཔལ་གཡང་ཀུན། །འབད་མེད་ལྷུན་གྱིས་གྲུབ་པར་མཛོད། །ཅེས་འབྲུ་སྣ་སོགས་འཐོར་ལ་ལོ་ལྟར་གསོ་ཚེ་འདི་ན་གཡང་རྟེན་གསར་བའི་རིགས་ཕྱོགས་ཕྱོགས་སུ་འབུལ་བ་ནོར་བདག་བཞིན། །ཕྱྭ་ཐམས་ཅད་ཁུག་ཡེ་ཁུག་ཡེ། གཡང་ཐམས་ཅད་ཁུག་ཡེ་ཁུག་ཡེ། བསྡུས་བསྡུས་སརྦ་པ་ཤང་ཀུ་རུ་ཡེ་སྭཱ་ཧཱ། འཕེལ་འཕེལ་སརྦ་པུཥྟིང་ཀུ་རུ་ཡེ་སྭཱ་ཧཱ༔ ཅེས་བརྗོད་ལ་ཚོགས་དང་ཕྱེ་མར་སོགས་གཡང་རྫས་ལ་ཡོན་མཆོད་ཀུན་གྱིས་རོལ། དེ་ནས་ཕྱི་སྒོ་བསྡམ་པ་ནི། ཀྱཻ་གཡང་སྐྱོབས་ཤར་ཀྱི་སྒོ་སྲུང་ནི། །གཡང་གི་ལྷ་མོ་རྡོ་རྗེའི་རིགས། །དཀར་མོ་ཟླ་བའི་མདངས་འཛིན་མ། །ཕྱག་གཡས་མདའ་དར་ཕྱྭ་གཡང་འགུགས། །གཡོན་པ་རིན་ཆེན་རྡོ་རྗེ་བསྣམས། །ཕྱྭ་གཡང་བསྲུང་བའི་འཕྲིན་ལས་མཛོད། །ཀྱཻ་གཡང་སྐྱོབས་ལྷོ་ཡི་སྒོ་སྲུངས་ནི། །གཡང་གི་ལྷ་མོ་རིན་ཆེན་རིགས། །སེར་མོ་ཉི་མའི་མདངས་འཛིན་མ། །ཕྱག་གཡས་མདའ་དར་ཕྱྭ་གཡང་འགུགས། །གཡོན་པ་རིན་ཆེན་འབར་བ་བསྣམས། །ཕྱྭ་གཡང་བསྲུང་པའི་འཕྲིན་ལས་མཛོད། །ཀྱཻ་གཡང་སྐྱོབས་ནུབ་ཀྱི་སྒོ་སྲུང་ནི། །གཡང་གི་ལྷ་མོ་པདྨའི་རིགས། །དམར་མོ་བྱི་རུའི་མདངས་འཛིན་མ། །ཕྱག་གཡས་མདའ་དར་ཕྱྭ་གཡང་འགུགས། །གཡོན་པ་རིན་ཆེན་པདྨ་བསྣམས། །ཕྱྭ་གཡང་བསྲུང་བའི་འཕྲིན་ལས་མཛོད། །ཀྱཻ་གཡང་སྐྱོབས་བྱང་གི་སྒོ་སྲུང་ནི། །གཡང་གི་ལྷ་མོ་ལས་ཀྱི་རིགས། །ལྗང་མོ་ཨིནྡྲའི་མདངས་འཛིན་མ། །ཕྱག་གཡས་མདའ་དར་ཕྱྭ་གཡང་འགུགས། །གཡོན་པ་རིན་ཆེན་རྒྱ་གྲམ་བསྣམས། །ཕྱྭ་གཡང་བསྲུང་བའི་འཕྲིན་ལས་མཛོད། ཀྱཻ་སྒོ་བཞི་བསྲུང་མཛད་ལྷ་མོ་བཞིའི། །ཕྱག་རྒྱ་འབར་བས་རྒྱས་གདབ་པས། །གཡང་སྐྱོབས་བཀྲ་ཤིས་བརྟན་པར་མཛོད། །ཕྱི་སྒོ་བསྡམས་པས་གཡང་མ་རལ། །བར་སྒོ་བསྡམས་པས་གཡང་མ་ཉམས། །ནང་སྒོ་བསྡམས་པས་བཅུད་མ་འབོ། །སྒོ་བཞི་བསྡམས་པས་གེགས་མ་འཇུག །ཕྱྭ་གཡང་བཀྲ་ཤིས་དཔལ་དུ་འབར། །མི་མཐུན་ཕྱོགས་ལས་རྣམ་རྒྱལ་ཤོག །བཛྲ་རཏྣ་པདྨ་ཀརྨ་སྲུངས་ཤིག་རཀྵ་རཀྵཿ ཅེས་ཕྱོགས་བཞིར་རབ་ཕྱག་མཚན་བྲིས་འབུར་རམ། མི་འབྱོར་ཚེ་ཕྱེ་མར་གྱིས་སྲུང་འཛུག་གོ། དེ་ནས་བརྟན་བཞུགས་དང་ཡོན་བདག་ལ་བཀྲ་ཤིས་བརྗོད་ཅིང་མེ་ཏོག་གི་ཆར་དབབ། རྗེས་ཆོག་སླར་ཡང་མཆོད་བསྟོད་བཤགས་ཚིག་ཏིང་འཛིན་ཉམས་དང་རྫས་མ་འཚོགས། སོགས་ཡིག་བརྒྱ་དབྱངས་གསལ་རྟེན་སྙིང་བསྡུ་རིམ་བསྔོ་སྨོན་ཤིས་བརྗོད་རྒྱས་པར་བྱ། གྲངས་བསྙེན་བསྐྱལ་ཚེ་ཁ་བསྐང་སྦྱིན་སྲེག་དབུལ་བ་དང་སྤྱི་དང་ཁྱད་པར་གྱི་དམ་ཚིག་བསྲུང་བ་གལ་ཆེ་ཞིང་དེར་མཐུན་ཚོགས་དང་བསྐང་བཤགས་ཆུ་སྦྱིན་སོགས་རྣམ་དཀར་ལ་འབད་པ་གང་ཅིའི་ལག་ལེན་མ་འཆོལ་བར་བྱའོ། །ཅེས་འདི་རང་གཞུང་ཚིག་གི་ཟུར་ཙམ་ལས། །ཕྱྭ་གཡང་དངོས་གྲུབ་འགུགས་པའི་ཐབས་ཚུལ་དག །མེད་ཀྱང་དབང་བསྡུད་ཐུགས་རྗེའི་ལྕགས་ཀྱུ་ཆེས། །གང་གི་གདམས་སྐོར་རྟེན་འབྲེལ་གནད་མ་འཆུག །ཟབ་གཏེར་རིག་འཛིན་མཁའ་འགྲོའི་ཞལ་རླངས་ཀྱི། །དྲོད་མ་ཡལ་བར་སཱུརྱ་ཀཱིརྟི་ཡིས། །ཕྱྭ་གཡང་གཞན་ལས་ཁྱད་འཕགས་སྙིང་འདྲ་བའི། །གདམས་པ་ཟབ་མོའི་ཆོས་ཚུལ་འཛིན་པ་ཚོས། །ཉམས་ལེན་གསོལ་མཆོད་མ་ཆགས་བརྩོན་གྱུར་ན། །དངོས་གྲུབ་ལོངས་སྤྱོད་ཡོང་ཞེས་གནོད་སྦྱིན་ལས། །ཞལ་བཞེས་ཐོབ་གསུངས་ཡིད་བཞིན་ནོར་འདྲའི་ཆོས། །འདི་ལྟར་བདག་འདྲའི་བླུན་ཚིག་ལུང་མ་བསྟན། །མཆིང་བུའི་རིགས་ཀྱིས་དེ་འདྲར་བསྒྲིགས་འོས་མིན། །འོན་ཀྱང་རང་ཉིད་ཆོས་ལ་ཡིད་ཆེས་དང་། །དད་པ་ཐོབ་པས་བྱིན་རླབས་སྙིང་ལ་ཞུགས། །དེ་ཕྱིར་འདི་ཚུལ་དགོས་ཞེས་དད་ལྡན་པ། །གྲཱ་རིག་བསྟན་འཛིན་གྱུར་མེད་མིང་ཅན་ནས། །ལྷ་རྫས་སྐྱེམས་བཅས་བསྐུལ་ངོ་མ་ལྡོག་ཙམ། །རྩོམ་ཁྲལ་ཇི་བཞིན་བཀོད་པ་བློ་ཡིས་ནི། །གླེགས་བམ་ཞལ་ཕྱེས་སྒྲུབ་གཞུང་ལ་བལྟས་ཚེ། །འོད་དམར་ཞིག་གིས་ཁང་ཁྱིམ་ཀུན་གང་བའི། །སྣང་བ་བྱུང་ཡང་འདི་ཚུལ་ཚིག་ཟིན་ཙམ། །མེད་པའི་སྒྱིད་ལུགས་འོལ་ཚོད་ཅིག་གིས་ནི། །བཀོད་ཀྱང་བསྟན་འགྲོར་ཕན་ཐོགས་ཡོང་མིན་གྱི། །རྟེན་འབྲེལ་བརྟགས་པས་ནུབ་མོ་རྨི་ལམ་དུ། །གྲྭ་ཚང་མང་འདུ་གྲྭ་པ་འགའ་རེ་ཡིས། །དུང་དཀར་བུས་པས་སྐད་བཟང་གྲགས་པ་དང་། །ཟས་སྟོན་འགའ་ཞིག་ཟོས་པ་འཁྲུལ་སྣང་དུ། །བྱུང་བས་བསྟན་འགྲོར་ཕན་ཐོགས་ཡོང་ངམ་སྙམ། །གང་དྲན་ཚིག་གི་སྲད་བུ་འདི་འདྲ་བྱས། །ལྷ་རིགས་བན་བཙུན་སྙོམས་ལས་ཆོས་བརྒྱད་མཁན། །རིམ་གཉིས་ནུས་དྲོད་ཏིལ་ཙམ་མེད་པ་ཡི། །ནེ་ཙོ་སྨྲ་མཁས་བཞིན་དུ་ཁ་བདེ་མོས། །བླུན་ཚིག་ཤར་མར་སྤེལ་བའི་གོས་བཟང་གི། རྒྱལ་མཚན་འདི་བསྒྲུབས་ཟབ་ཆོས་ཡིད་བཞིན་ནོར། །གང་དེ་མཆོད་ཅིང་བསྐུར་བའི་འགྲོ་ཀུན་ལ། །དགོས་འདོད་དངོས་གྲུབ་ཆར་ཆེན་དབབ་པ་ཡིས། །དབུལ་བའི་སྡུག་བསྔལ་ཡོངས་སུ་སེལ་གྱུར་ཅིག །ཨྠིྀཨ་ཧོ་ངོ་མཚར་རྨད་བྱུང་ཆོས། །སཱུརྱཱ་ཀཱིརྟིའི་གདམས་ཟབ་ལས། །དམར་པོ་གསུམ་དུ་གྲགས་པ་ཡི། །ཟབ་ཁྱད་བཀའ་རྒྱ་ཅན་གྱི་གྲས། །ཛམ་ལྷ་དམར་པོའི་སྒྲུབ་ཐབས་ལས། །ཕྱྭག་གཡང་འགུགས་པའི་ཕྲིན་ལས་ཙམ། །འདི་ཉིད་ཆོས་དང་གང་ཟག་ལ། །སྙིང་ནས་དད་པ་མེད་པ་ཡི། །ཁ་གསགས་ཅན་གྱི་རང་འདོད་ལ། །ནོར་འགུགས་ཙམ་དུ་གདམས་པས་ན། །བརྟེན་ཀྱང་དངོས་གྲུབ་མེད་པའི་ཁར། །བསྲུང་མའི་བཀའ་ཆད་འབྱུང་ངོ་ཨང་། །དབང་ལུང་མེད་ཀྱང་གྲོང་ཆོག་འདོད། །བསྙེན་བསྒྲུབ་དབེན་ཀྱང་དངོས་གྲུབ་རེ། །དེ་འདྲའི་སྐྱེས་བུ་འབྱུང་སྲིད་ཚེ། །དམ་མེད་ཆམས་ལ་འབེབས་པ་ཡི། །སྲུང་མ་རྡོ་རྗེ་ལེགས་པ་དང་། །ལྷ་བཙན་འབར་བས་བཀའ་འདི་སྲུངས། །གཏེར་ཆོས་མིན་ཀྱང་དག་སྣང་ཡིན། །དག་སྣང་མིན་ཀྱང་མན་ངག་ཡིན། །མན་ངག་མིན་ཀྱང་དག་སྣང་ཡིན། །དབང་ལུང་ལྡན་པས་འདི་འབད་ཚེ། །དངོས་གྲུབ་རྣམ་གཉིས་ཨེ་མ་ཧོ། །དེ་ཕྱིར་སྤྱོད་ཤེས་གྱིས་ཤིག་ཨང་། །ཅེས་འདི་ཡང་གཅེས་ཞལ་གདམས་སུ། །འཇིགས་མེད་ཆོས་དབྱིངས་རྡོ་རྗེས་སྨྲས། །མངྒ་ལཾ། བཀྲ་ཤིས་ཤོག །ཞལ་དྲོ།། །།
དབང་མཛད་ལྷ་གསུམ་གྱི་བསྐང་བསྡུས་དངོས་གྲུབ་ཆར་འབེབ།
དབང་མཛད་ལྷ་གསུམ་གྱི་བསྐང་བསྡུས་དངོས་གྲུབ་ཆར་འབེབ་བཞུགས་སོ། །དབང་ཆེན་གསང་བདག་ལྷ་ལ་ཕྱག་འཚལ་ནས། །དབང་མཛད་ལྷ་གསུམ་བསྐང་བ་མདོར་བསྡུས་བྲི། །བསྐང་རྟེན་འབྱོར་ཚོགས་གཏོར་མཆོད་ཚོགས་བྱས་ནས། གདུང་ཤུགས་བསྐྱེད་དེ་རོལ་མོ་དབྱངས་སྙན་བཅས། ཧཱུྃ། དབང་མཛད་ལྷ་མཆོག་སྲིད་གསུམ་ཟླ་བྲལ་བ། །དབང་གི་འཕྲིན་ལས་ཐོགས་པ་བྲལ་བ་ཡིས། །དབང་དུ་ཟག་བཅས་ཟག་མེད་ཀུན་བསྡུ་བའི། །དབང་ཕྱུག་ཆེན་པོ་ལྷ་ཆེན་ཡབ་དང་ཡུམ། །འཁོར་དང་བཅས་པའི་ཐུགས་དམ་གཉེན་པོ་བསྐང་། །བསྐལ་མང་གོང་ནས་བྱང་ཆུབ་མངའ་བརྙེས་ཀྱང་། །ས་བརྒྱད་ངལ་བསོས་འགྲོ་བའི་དབུལ་སེལ་ལྷ། །དངོས་གྲུབ་གཏེར་མཛོད་རྣམ་སྲས་ཡིད་བཞིན་ནོར། །རིགས་བཞི་སྲས་མཆོག་སྐྱ་བརྒྱད་ཀླུ་ཆེན་བརྒྱད། །སྒོ་སྐྱོང་མ་ལུས་འཁོར་བཅས་ཐུགས་དམ་བསྐང་། །ཟད་པ་མེད་པའི་དངོས་གྲུབ་སྩོལ་མཛད་ལྷ། །རྣམ་མང་སྲིད་ཞི་མ་ལུས་དབང་མཛད་པའི། །ཛམ་ལྷ་དམར་པོ་སྲས་མཆོག་ཡུམ་དང་བཅས། ནོར་ལྷ་འཁོར་ཚོགས་བཅས་པའི་ཐུགས་དམ་བསྐང་། །ཐུགས་དམ་བསྐང་བའི་དམ་རྫས་མཆོད་སྤྲིན་ནི། །ཕྱི་སྣོད་ནང་བཅུད་བཀྲ་ཤིས་རྫས་རྟགས་དང་། །རིན་ཆེན་དར་ཟབ་ཡོལ་བ་བླ་བྲེ་དང་། །སྤྱན་གཟིགས་སྣ་ཚོགས་ཀ་ཅ་དཀོར་ཆའི་རིགས། ཕྱི་ནང་གསང་མཆོད་རོལ་མོའི་རིགས་བྱེད་སྒྲ། །ཁྱད་པར་གྷ་ནའི་ལོངས་སྤྱོད་སྨན་རཀ་གཏོར། །བློ་ཡིས་བླངས་ཏེ་དངོས་འབྱོར་ཡིད་སྤྲུལ་གྱིས། །ཐུགས་དམ་བསྐང་ངོ་ཉེས་བྱས་ཉམས་ཆག་བཤགས། །དབང་དང་དངོས་གྲུབ་མ་ལུས་སྩལ་དུ་གསོལ། །ཅེས་པ་འདི་ནི་དགེ་སློང་ཡེ་ཤེས་རྡོ་རྗེས་གཏེར་གསར་བསྐང་གསོའི་རིགས་ཉུང་བསྡུས་ཤིག་དགོས་ཞེས་བསྐུལ་བར་དེ་བཞིན་བྲིས་པ་ལ་ལྷ་ནོར་ཛམ་གསུམ་དོན་མ་ཚང་འདུག་པས། སླར་ཡང་འདི་བཞིན་ཨོ་རྒྱན་བསྟན་འཛིན་གྲགས་པས་བྱང་ཡིད་ལྷུང་དུ་སྦྱར་བ་མངྒ་ལཾ།། །