དབང་ལག་གིི་བཅུད་ལེན་ལྷ་བུའི་བདུད་བཅོམ།
བཀའ་རྫོགས་པ་ཆེན་པོ་ཚེ་སྒྲུབ་བདུད་བཞིའི་གཡུལ་ལས་རྣམ་རྒྱལ་ལས༔ དབང་ལག་གིི་བཅུད་ལེན་ལྷ་བུའི་བདུད་བཅོམ་བཞུགས༔ རིག་འཛིན་ཚེ་ཡི་ལྷ་ལ་འདུད༔ བདག་འདྲ་པདྨ་ཐོད་ཕྲེང་གིས༔ མ་འོངས་རྗེས་འཇུག་དོན་ཕྱིར་དུ༔ ལྷ་ཡི་བུ་ཡི་བདུད་གཞོམ་ནས༔ ཚེ་ལ་དབང་བའི་དངོས་གྲུབ་དོན༔ དབང་ལག་རྒྱལ་པོའི་བཅུད་ལེན་བྲི༔ ས་མ་ཡཱ༔ རྒྱ་རྒྱ་རྒྱ༔ སྔོན་ཚེ་བསྐལ་པ་དང་པོ་ལ༔ ལྷ་དང་ལྷ་མིན་འཐབས་ཤིང་འཁྲུགས༔ ལྷ་དབང་བརྒྱ་བྱིན་ལག་པ་ལ༔ ལྷ་མིན་མཚོན་ཆའི་འཁོར་ལོ་ཕོག༔ འཇིག་རྟེན་ཁམས་སུ་ས་ལ་ལྷུང་༔ བདུད་རྩི་དབང་པོ་ལག་པ་སྐྱེས༔ སུམ་ཅུ་རྩ་གསུམ་ལྷ་ཡུལ་ནས༔ མངོན་ཤེས་ལྡན་པའི་ལྷ་ཕྲུག་རྣམས༔ འོད་ཀྱི་རྟར་ཞོན་ས་ལ་བབས༔ བདུད་རྩི་དབང་པོ་ལག་པ་ཟོས༔ མཆོག་དང་ཐུན་མོང་དངོས་གྲུབ་ཐོབ༔ དེ་ཚེ་མ་རུངས་ལྷ་མིན་གྱི༔ སྤྲུལ་པ་འདྲེ་ལག་རྐང་གསུམ་དང་༔ རྐང་གཉིས་རྐང་གཅིག་མཉམ་དུ་སྐྱེས༔ དེ་ཟོས་མཆོག་ཐུན་དངོས་གྲུབ་བསྒྲིབས༔ དེ་ཚེ་བདག་ཉིད་པདྨ་འབྱུང་༔ ལྷ་དབང་བརྒྱ་བྱིན་དེ་ཡིན་པས༔ ལྷ་ཕྲུག་རྣམས་ཀྱིས་བདག་ལ་ཞུས༔ ལྷ་དབང་ཁྱོད་ཕྱག་ས་ལ་བབས༔ ངེད་ཅག་ལྷ་ཕྲུག་རྣམས་ཀྱིས་ཟོས༔ མཆོག་དང་ཐུན་མོང་ཀུན་གྱིས་ཐོབ༔ དེ་ལ་བར་དུ་གཅོད་པའི་བགེགས༔ ལྷ་མིན་སྤྲུལ་པ་འདྲེ་ལག་སྐྱེས༔ ཟོས་པས་མཆོག་ཐུན་དངོས་གྲུབ་འགགས༔ ནད་དང་ཉེ་བར་འཚེ་བ་མང་༔ སྐྱོན་དང་ཡོན་ཏན་དབྱེ་གསལ་ཞུ༔ ཟེར་བས་བདག་གིས་སྐྱོན་ཡོན་བསྟན༔ ཡོན་ཏན་གོང་འཕེལ་མན་ངག་བྱིན༔ སེམས་བསྐྱེད་ངང་ནས་སྨོན་ལམ་བཏབ༔ ཨེ་མ་ང་ཡི་ལག་པ་ལ༔ ལྷ་མིན་མཚོན་ཆའི་འཁོར་ལོ་ཕོག༔ ས་ལ་ལྷུངས་ཀྱང་ས་ལས་སྐྱེས༔ ཡོན་ཏན་འབྱུང་བའི་བདུད་རྩིར་འཁྲུངས༔ དྲི་མེད་སྤྱན་ལྡན་ལྷ་བུས་ཟོས༔ ཁྱད་པར་འཕགས་པའི་ཟས་མཆོག་དེའི༔ དངོས་གྲུབ་འཕྲོག་པའི་འདྲེ་ལག་སྐྱེས༔ ད་སྟེ་ང་ཡི་སེམས་བསྐྱེད་དང་༔ ལེགས་ཉེས་སྐྱོན་ཡོན་བསྟན་པ་ཡིས༔ ལྷ་ཀླུ་མི་གསུམ་ཀུན་གྲོལ་ནས༔ ཡོན་ཏན་ཐམས་ཅད་འཐོབ་པར་ཤོག༔ དངོས་གྲུབ་ཐམས་ཅད་རྙེད་པར་ཤོག༔ དེ་སྐད་བརྗོད་པས་སྟེང་གི་ལྷ༔ འོག་གི་ཀླུ་དང་བར་གྱི་མི༔ ལས་དང་སྐལ་ལྡན་རྣམས་ཀྱིས་ཐོས༔ དབང་ལག་རྒྱུད་དང་ལས་ཚོགས་སུ༔ རང་རང་ཡུལ་གྱི་ཡི་གེར་བཏབ༔ བསྟེན་པས་མཆོག་ཐུན་དངོས་གྲུབ་ཐོབ༔ སྔོན་བྱུང་ལོ་རྒྱུས་རིམ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་ཡོན་ཏན་ལྡན་པ་ཡི༔ རྫས་མཆོག་དབང་ལག་བརྟག་པ་ནི༔ ལོ་མ་ཏ་ལ་ལྟ་བུ་ལ༔ སྡོང་པོ་ནས་ཀྱི་སྙེ་མ་འདྲ༔ མེ་ཏོག་དར་ཡུགས་དྲིལ་བ་འདྲ༔ རྩ་བ་མི་ཡི་ལག་པ་འདྲ༔ སོར་མོ་བདུན་དང་ལྔ་བ་དང་༔ བཞི་བ་གསུམ་པ་མཆོག་འབྲིང་ལ༔ བསྟེན་དུ་མི་རུང་གཉིས་པ་དང་༔ གཅིག་པ་ལྷ་མིན་འདྲེ་ལག་རིགས༔ ལེགས་པར་བཙལ་ཞིང་བསྒྲུབ་པར་བྱ༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་མཚན་ཉིད་བརྟགས་པའི་རྫས༔ བཙལ་ཞིང་བསྒྲུབ་པའི་དུས་བསྟན་པ༔ བསྟེན་པ་པོ་ཡི་གང་ཟག་གི༔ ཚ་ཤས་གྲང་ཤས་ཚ་གྲང་སྙོམས༔ རང་གི་ཁམས་དང་བསྟུན་ཏེ་བསྒྲུབ༔ དབྱར་ཟླ་གསུམ་ལ་དྲོད་ཆེ་ཞིང་༔ ནུས་པ་སྣུམ་དང་ལྡན་པར་བཤད༔ དཔྱིད་ཟླ་གསུམ་ལ་རྩུབ་ཅིང་ཚ༔ འབྱུང་བ་མི་སྙོམས་ཡོན་ཏན་ཉུང་༔ སྟོན་ཟླ་གསུམ་ལ་རོ་མངར་ཞིང་༔ ཚ་གྲང་སྙོམས་པའི་དུས་ཡིན་ནོ༔ དགུན་ཟླ་གསུམ་ལ་ཁམས་སྙོམས་ཞིང་༔ ཤིན་ཏུ་ནུས་པ་ཆེ་བར་བཤད༔ གང་ཟག་དབང་པོའི་ཁམས་བསྟུན་བསྒྲུབ༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་ཕྱི་ནང་ཁམས་བསྟུན་ནས༔ གྲོགས་སུ་གྱུར་པའི་དུས་དག་ཏུ༔ རྣལ་འབྱོར་བྱང་ཆུབ་སེམས་བསྐྱེད་ནས༔ པདྨ་དབང་གི་ཏིང་འཛིན་གྱིས༔ ཕྱག་གཡས་ལྕགས་ཀྱུ་དམར་པོ་བསྣམས༔ ས་ལ་བརྒྱབ་པས་འབྱུང་བཞིའི་བཅུད༔ འོད་ཟེར་དམར་པོའི་འཕྲོ་འདུ་ཡིས༔ དབང་པོ་ལག་པར་ཐིམ་པར་བསམས༔ ཁྲོ་བོའི་ཏིང་འཛིན་ང་རྒྱལ་གྱིས༔ བར་གཅོད་གདོན་བགེགས་བསྐྲད་པར་བསམས༔ ཨོཾ་བཛྲ་ཀྲོ་ཏ་ཧྱ་གྷྲཱི་ཝ་ཧུ་ལུ་ཧུ་ལུ་ཧཱུྃ་ཕཊ༔ འབྱུང་བཞིའི་རོ་ནུས་ཝ་ཤཾ་ཀུ་རུ་ཡེ་སྭཱ་ཧཱ༔ ཏིང་འཛིན་སྔགས་དང་དམིགས་པས་བརྐོ༔ ཐོན་པའམ་རིན་ཆེན་སྣོད་དུ་བསགས༔ ཁ་ནི་ས་བདག་འཁོར་ཚུལ་བལྟ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དངོས་གྲུབ་འབྱུང་བའི་རྫས༔ གད་དང་འཁྲུད་པ་ལེགས་བྱས་ནས༔ བཅུད་ལྡན་འོ་མ་བྲེ་གང་ནང་༔ དབང་པོ་ལག་པ་ཕུལ་གང་འཚོད༔ ཀ་ར་མང་ཉུང་རན་ཙམ་བཏབ༔ སྐོལ་བའི་སྣོད་དེ་ཕག་མོ་ཡུམ༔ བསྲུབ་པའི་སྐྱ་བ་རྡོ་རྗེ་ཡབ༔ རྗས་དེ་དགའ་བཞིའི་རོལ་པ་ལས༔ ཐབས་ཤེས་བྱང་སེམས་དཀར་དམར་གཉིས༔ དབྱེར་མེད་གཅིག་ཏུ་འདྲེས་པར་བསམས༔ ཧྱ་གྷྲཱི་བའི་སྔགས་བགྲང་ཞིང་༔ མེ་ནི་ཆེ་ཆུང་རན་པས་གདུ༔ འདམ་ཐག་བཏང་ནས་རིལ་བུ་བསྒྲིལ༔ ཆུང་ངུ་འབྲིང་དང་ཆེན་པོར་བསླབ༔ བདུན་ནམ་ཟླ་འབྲེལ་ལོ་ལ་སོགས༔ ཚུལ་བཞིན་བསྟེན་པའི་ཕན་ཡོན་ནི༔ རྒས་པ་མེད་ཅིང་ལོ་བརྒྱ་ཐུབ༔ བཀྲག་བཟང་ནད་དང་གཅོང་རིགས་འབྱང་༔ རྩ་རླུང་ཐམས་ཅད་རང་སོར་རྒྱུ༔ ཤ་ལུས་རྒྱས་ཤིང་ཀུནྡ་འཕེལ༔ མཚན་ལྡན་མུ་དྲ་བརྒྱ་ལ་ཐུབ༔ དེ་ལ་བུ་རམ་སྦྱར་ཟོས་ནས༔ གྲང་བ་རླུང་ནད་ཐམས་ཅད་སེལ༔ སེམས་ནི་ལས་སུ་རུང་བ་དང་༔ དབུགས་ཀྱི་སྒྲ་དབྱངས་འབྲུག་ལྟར་འགྱུར༔ དབང་པོ་ལག་པ་ཕུལ་གང་ནང་༔ བ་རའི་འོ་མ་བྲེ་ཕྱེད་བླུགས༔ ཀ་རའི་ཕྱེ་མ་ཁ་ཚར་བཏབ༔ རིལ་བུ་ཤ་རིལ་ཙམ་དུ་སྒྲིལ༔ ཐོ་རངས་དག་ལ་མ་ཆག་ཟ༔ ཏིང་འཛིན་སེམས་ཀྱི་ཉམས་རྟོགས་འཕེལ༔ བཀྲག་བཟང་བཞིན་དཀར་དབང་པོ་གསལ༔ ཡིད་དུ་འོང་ཞིང་ཚེ་རིང་སྟེ༔ བུད་མེད་བརྒྱ་ལ་སྤྱོད་པར་ནུས༔ དབང་པོ་ལག་པ་ཕུལ་གང་ནང་༔ བུར་དཀར་སྦྲང་རྒོད་ཕུལ་དོ་རེ༔ ཀ་རའི་ཁ་ཚར་ཚོད་ཙམ་བཏབ༔ ཨ་རུ་ཤ་ཆེན་ཅི་མང་བཏབ༔ བཟང་པོ་དྲུག་གི་ཐུན་རེ་ལ༔ འབྲི་མར་བྲེ་གསུམ་ནང་དུ་བསྲུབ༔ སྦྲང་བུར་མར་གསུམ་ཆུ་ཆོད་ཚེ༔ སྨན་རྣམས་བཏབ་སྟེ་བསྟེན་པར་བྱ༔ ཕན་ཡོན་བསམ་འདས་བརྗོད་མི་ལང་༔ རང་ལུས་རྡོ་རྗེ་ལས་རུང་ནས༔ བཅུད་ལེན་འདི་དང་གཞན་ལུས་དང་༔ ཚེ་ཡི་སྒྲུབ་ཐབས་གསུམ་དྲིལ་ན༔ ཉི་ཟླ་ལྟ་བུའི་ཚེ་འཐོབ་ཅིང་༔ ཚེ་ཡི་རིག་འཛིན་མ་གྲུབ་ན༔ བདག་ཉིད་པདྨས་ཕྱི་རབས་བསླུས༔ བདུན་གཅིག་བདུན་གཉིས་བདུན་གསུམ་དུ༔ བསྟེན་ཀྱང་བཅུ་ཐུབ་བརྒྱ་ཐུབ་ཅིང་༔ བརྒྱ་ཐུབ་ཉིས་བརྒྱ་ཐུབ་པར་འགྱུར༔ ཚུལ་བཞིན་ལོ་དང་ཟླ་འབྲེལ་བསྟེན༔ སོ་བུད་སྐྲ་དཀར་རྒན་པོ་ཡང་༔ སོའུ་སྐྱེ་དང་སྐྲ་ནག་འཆར༔ གཉེར་མ་མེད་ཅིང་ཤ་ལུས་རྒྱས༔ སྟོབས་རྩལ་གླང་ཆེན་སྨྱོན་པ་འདྲ༔ ཡང་རྩལ་སེང་གེ་དཀར་མོ་ལ༔ བང་ནི་འདབ་ཆགས་བྱ་བཞིན་ཏེ༔ བཀྲག་མདངས་མེ་ཏོག་པདྨ་འདྲ༔ ཉམས་རྟོགས་མཐར་ཕྱིན་དྲོད་རྟགས་འཐོབ༔ མ་མོ་མཁའ་འགྲོ་སྤྲིན་བཞིན་འདུ༔ སྣང་སྲིན་ལྷ་འདྲེས་ཅི་བསྒོས་ཉན༔ འཇིག་རྟེན་མི་མོར་སྤྱོད་པ་རེམ༔ རྩ་རླུང་བདེ་སྟོང་དགའ་བཞི་འཕེལ༔ མཆོག་ཐུན་རྣམ་གཉིས་ཨེ་མ་ཧོ༔ དབང་ལག་སྨན་མར་སྦྱར་ཐབས་ནི༔ གཙང་ཆབ་འབབ་ཆུ་ཕུལ་དོའི་ནང་༔ དབང་ལག་ཕྱེ་མ་ཕུལ་གང་བཏབ༔ འོ་མ་ཕུལ་གང་བཏབ་ལ་འཚོད༔ དེ་ལ་འདམ་ཐག་སོང་བ་དང་༔ འབྲི་མར་བྲེ་དོ་བཅུག་ལ་བཙོ༔ སྦྲང་བུར་ཕུལ་དོ་ཆུ་བཅད་བསྲེས༔ ཀ་རའི་ཁ་ཚར་རན་ཚོད་དང་༔ བཟང་པོ་དྲུག་ནི་ཐུན་རེ་བཏབ༔ ཞག་བདུན་ལྔ་གསུམ་ནས་དཀྱིལ་སྦ༔ དང་པོར་ཆུང་ངུ་བར་དུ་འབྲིང་༔ ཐ་མར་ཁམས་དང་བསྟུན་ཏེ་བཟའ༔ ལོ་དང་ཟླ་བ་གང་འབྱོར་བསྟེན༔ རླུང་སྦྱོར་འཁྲུལ་འཁོར་སྲང་ལ་གཅུན༔ ཚེ་ནི་ཉི་ཟླ་གཉིས་དང་མཉམ༔ ཉམས་རྟོགས་ཁྱད་འཕགས་ཁོར་ཡུག་འཆར༔ གཅོང་ནད་སྡེ་དགུ་ཐམས་ཅད་བྱང་༔ ལོ་བརྒྱ་སོང་ཡང་བཅོ་ལྔའི་མདངས༔ བཞིན་རས་རྒྱས་ཤིང་སྟོབས་རྩལ་ལྡན༔ བདུད་རྩི་དབང་པོ་ལག་པ་དང་༔ མུ་ཏིག་སྦྱར་ཏེ་རིལ་བུར་བསྒྲིལ༔ ཡི་དམ་དབང་ཆེན་རྟ་མགྲིན་གྱི༔ སྙིང་པོ་ཅི་མང་བཏབ་སྟེ་ཟ༔ ཀླུ་རིགས་བཞི་ཡིི་མཛེ་ནད་བྱང་༔ བདུད་རྩི་དབང་པོ་ལག་པ་དང་༔ ཅོང་ཞི་གུ་གུལ་དཀར་པོ་དང་༔ ཆུ་དག་ཨ་རུ་གླ་རྩི་དྲུག༔ སྦྱར་ནས་ཡི་དམ་སྔགས་སྟོང་བཏབ༔ ནང་དུ་བཟའ་ཞིང་ཕྱི་ནས་བྱུག༔ གཉན་ལྷོག་སྐྲངས་དང་ཤུ་བ་དང་༔ རྨ་ལེབ་ཕོལ་མིག་གནོད་པ་ཐུབ༔ བདུད་རྩི་དབང་པོ་ལག་པ་དང་༔ གུ་གུལ་དཀར་པོ་གཉིས་སྦྱར་ནས༔ འབྲས་ལ་ཡུན་དུ་བྱུགས་གྱུར་ན༔ འབྲས་ཀྱི་གནོད་པ་འཇོམས་པར་བྱེད༔ བདུད་རྩི་དབང་པོ་ལག་པ་དང་༔ ཨ་རུ་ར་དང་ཙན་དན་སྦྱར༔ ཧཱུྃ་ཡ་ར་ཙ་ག་མོ་ཏ་ན་མ་ར་ན་སོལ་སོལ་སྭཱ་ཧཱ༔ སྔགས་འདི་འབུམ་ཚོ་གཅིག་བཟླས་ནས༔ མིག་ལ་བྱུག་ཅིང་ཁ་རུ་བཟའ༔ རབ་རིབ་མིག་གི་གནོད་པ་སེལ༔ བདུད་རྩི་དབང་པོ་ལག་པ་དང་༔ ཁྱི་ལུད་ཁུ་བར་མཁྲིས་སྣ་གང་འཛོམ་སྦྱོར༔ ཨཱོཾ་ཁྲག་རཾ་ཆེ་སྭཱ་ཧཱ༔ སྔགས་ཆུ་འཐུངས་པས་ཤ་དུག་སེལ༔ བདུད་རྩི་དབང་པོ་ལག་པ་དང་༔ ལྕ་སྒ་སྦྱར་ནས་ཁོང་དུ་བཏང་༔ ཕྱི་ནས་བྱུགས་པས་ཕོ་གླང་སེལ༔ བདུད་རྩི་དབང་པོ་ལག་པ་དང་༔ ཟས་དང་བསྲེས་པའི་ཁུ་བ་བཙགས༔ འཐུངས་པས་བུད་མེད་མངལ་ཁྲག་འཆད༔ བདུད་རྩི་དབང་པོ་ལག་པའི་ཕྱེ༔ ཞིབ་བཏགས་མིག་ཏུ་བཏབ་པ་ན༔ མིག་གི་ནད་ནི་ལིང་ཏོག་དང་༔ ཁ་བས་ཕྱིད་དམ་དུ་བས་ཕྱིད༔ རབ་རིབ་མིག་ནད་ཀུན་ལ་ཕན༔ བདུད་རྩིའི་ཕྱེ་མ་ཚིལ་བུའམ༔ མར་དང་སྦྱར་ནས་བྱུགས་གྱུར་ན༔ འབྲུཾ་བུ་སྐྲངས་བརྡོལ་ཤ་ཀྲ་དང་༔ ཟ་འཕྲུག་གཡེམ་པ་མེ་ལྕེ་འཁོར༔ བས་ལྡགས་སྐྲངས་པ་རྣམས་ལ་ཕན༔ བདུད་རྩིའི་ཕྱེ་མ་ཆུ་དང་སྦྱར༔ ལྡེ་གུ་བྱས་ནས་བྱུགས་གྱུར་ན༔ འབྲས་ཀྱི་ཤ་རོ་ཕོལ་མིག་འཇོམས༔ བདུད་རྩིའི་ཕྱེ་མ་མར་ཁུའམ༔ སྦྲང་རྩི་ཆུ་བཅད་གང་རིགས་སྦྱར༔ ནས་ཀྱི་དཀྱིལ་དུ་སྦས་ནས་ཀྱང་༔ ཐོ་རངས་ཁམ་རེ་ཆག་མེད་བཟའ༔ རླུང་མཁྲིས་བད་ཀན་འདུས་པ་རྣམས་ཀྱང་བྱང་༔ གདམས་པ་ཟབ་མོ་འདི་དག་གི༔ ཉམས་ལེད་བྱེད་དུས་ཤ་རུལ་དང་༔ ཉ་རུལ་སྒོག་བཙོང་ལ་ཕུག་དང་༔ སྔོ་རིགས་ཟྭ་ཚོད་ཐམས་ཅད་སྤང་༔ མཐུན་སྦྱོར་གང་ཟག་ཁམས་དང་བསྟུན༔ ཤ་ཆང་གསར་པ་དཀར་མངར་བཟང་༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་ཟབ་ཆོས་ཆ་རྐྱེན་དུ༔ ལྷ་ཡི་བུ་ཡི་བདུད་གཞོམ་ཕྱིར༔ ཚེ་ཡི་རིག་འཛིན་འཐོབ་པའི་ཕྱིར༔ དབང་ལག་ལས་ཚོགས་བཅུད་ལེད་རྣམས༔ ཡི་གེར་བཏབ་ནས་གཏེར་དུ་སྦས༔ ལས་འཕྲོ་ཅན་གྱིས་སྤྱོད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྦྲང་བན་ཉི་མ་གྲགས་པས་ཟབ་བུ་ལུང་ནས་གདན་དྲངས་པའོ། །མངྒ་ལཾ།