སྒྲུབ་ཐབས།
བཀའ་རྫོགས་པ་ཆེན་པོ་ཚེ་སྒྲུབ་བདུད་བཞིའི་གཡུལ་ལས་རྣམ་རྒྱལ་ལས༔ སྒྲུབ་ཐབས་བཞུགས༔ མགོན་པོ་ཚེ་དཔག་མེད་ལ་འདུད༔ སྐྱེ་འཆི་མེད་པའི་རིག་འཛིན་ཞིག༔ ཚེ་འདི་ཉིད་ལ་འཐོབ་བྱའི་ཕྱིར༔ ཚེ་ཡི་སྒྲུབ་ཐབས་རིམ་པ་ཞིག༔ བདག་འདྲ་པདྨས་ཡི་གེར་འདེབས༔ ཉམས་སུ་ལོངས་ཤིག་བདེ་སྟེར་མ༔ ཕྱི་རབས་དོན་དུ་གཏེར་དུ་སྦོས༔ ལས་འཕྲོ་ཅན་གྱིས་སྤྱོད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་གནས་ཕུན་སུམ་ཚོགས་ཤིང་ཡིིད་དང་མཐུན་པར༔ སྒྲུབ་ཁང་སྐྱང་ནུལ་ལེགས་པར་བྱ་ཞིང་སྟེགས་བུ་གནས་ཁང་གི་ཁྱོན་དང་མཐུན་པར་བཟོ་སྟེ༔ བ་ཡི་རྣམ་ལྡ་དང་དྲི་བཟང་གིས་ཆག་ཆག་གདབ༔ ཐིག་ནས་དྲངས་ཤིང་ཆ་ཆེན་ལྟེ་བར་བཅད་དེ༔ གཉིས་པ་ལ་པདྨ་འདབ་མ་བཞི༔ གསུམ་པ་ལ་པདྨ་འདབ་མ་བརྒྱད་དུ་བྱ༔ ལྟེ་བ་དམར་པོ༔ པད་འདབ་བཞི་ཕྱོགས་ཚོན༔ ཕྱི་རོལ་གྱི་པདྨ་འདབ་མ་བརྒྱད་ཀྱི་ཤར་སེར་པོ༔ ལྷོ་ལྗང་གུ༔ ནུབ་དམར་པོ༔ བྱང་ལྗང་གུ༔ ཤར་ལྷོ་དཀར་པོ༔ ལྷོ་ནུབ་སེར་པོ༔ ནུབ་བྱང་དམར་པོ༔ བྱང་ཤར་ལྗང་གུ༔ པད་ཚབ་རྣམས་མཛེས་ཚོན་དུ་བྱའོ༔ དེའི་ཕྱི་རིམ་མུ་ཁྱུད་རྣམ་ལྔ་བསྐོར་ཞིང་༔ ཁྱམ་དང་སྒོ་གྲུ་རྟ་བབས་པད་རྡོར་མེ་རི་ལ་སོགས་སྤྱི་དང་མཐུན་པར་བྱའོ༔ དེའི་དབུས་སུ་ཁྲིའུ་མཛེས་པའི་ཁར་དྲི་བཟང་སྨན་སྤོས་ཀྱིས་བཀང་བའི་བུམ་པ་མཚན་ཉིད་དང་ལྡན་པར་རིགས་ལྔའི་ས་བོན་དང་ཕྱག་མཚན་བྲིས་པ་ལ༔ མགུལ་ཆིངས་དར་དམར་གྱིས་བརྒྱན་པའི་ཁར༔ རབ་གསེར་དངུལ་ལ་སོགས་རིན་པོ་ཆེའི་རིགས༔ འབྲིང་སྨན་འདག་ལས་གྲུབ་པ༔ ཐ་ནའང་དར་རས་ལ་རིས་སུ་བྲིས་པའི་འདྲ་འབག་གཟུགས༔ དར་དམར་གྱི་གུར་ཕུབ༔ མདུན་དུ་ཟན་བཟང་པོ་ལ་རྩི་བཅུད་དང་སྨན་སྤོས་བཏབ་པའི་ཚེ་བུམ་རྒྱན་དང་ལྡན་པ་བཤམས༔ གཡས་སུ་ཨ་མྲི་ཏ་ཛ་གད་ཀྱི་སྙིང་ཁུར་བཏབ་པ་དུམ་བུ་གཅིག་པའི་སྣོད་དུ་བཤམས་ཏེ་མེ་ལོང་སིནྡྷུ་རས་བྱུགས་པ་ལ་རིགས་ལྔ་ཡབ་ཡུམ་གྱི་སྙིང་པོ་བྲིས་པས་ཁ་བཀབ་ཅིང་དར་གུར་ཕུབ༔ གཡོན་དུ་ཁྲག་སྣ་གང་འཛོམ་ལ་པདྨ་རཀྟའི་ཕབས་བཏབ་པ་བཤམས༔ རྒྱབ་ཏུ་སྨན་སྤོས་སྣ་ཚོགས་ལས་གྲུབ་པའི་ཚེ་རིལ་ཉི་ཟླས་བརྒྱན་པ་བཤམས༔ དམ་ཚིག་བསྐུལ་ཞིང་དངོས་གྲུབ་སྡུས་པའི་རྟེན་མདའ་རྒོད་སྒྲོ་མ་ལ་དར་སྣ་ལྔས་བརྒྱན་པའི་མདའ་དར་ཡང་གཟུགས༔ དེ་རྣམས་ཀྱི་ཕྱི་རོལ་དུ་ཚོགས་ཀྱི་འཁོར་ལོ༔ ཕྱི་མཆོད་ཀྱི་རིམ་པ༔ བཀའ་སྲུང་གི་གཏོར་མ་རྣམས་བཤམས༔ སྒྲུབ་པ་པོ་བདེ་བའི་གདན་ལ་འདུག༔ གཞི་བདག་ལ་གཙང་གཏོར་འབུལ་ཞིང་བགེགས་ལ་བཀའ་བསྒོ༔ ཏིང་ངེ་འཛིན་རྣམ་པ་གསུམ་གྱི་ངང་ནས་ལས་ཀྱི་གཞུང་བསྲང་ཞིང་༔ འཁོར་འདས་ཀྱི་ཆོས་ཐམས་ཅད་མི་དམིགས་པ་སྟོང་པ་ཉིད་ཀྱི་ངང་ལས༔ རང་ཉིད་མགོན་པོ་ཚེ་དང་ཡེ་ཤེས་དཔག་ཏུ་མེད་པ་ལོངས་སྤྱོད་རྫོགས་སྐུའི་ཆ་ལུགས་ཅན༔ ཞལ་གཅིག་དམར་ལ་དཀར་བའི་མདངས་དང་ལྡན་ཞིང་ཕྱག་གཉིས་མཉམ་བཞག་གི་སྟེང་ན་ཚེ་བུམ་བསྣམས་པ༔ ཞབས་གཉིས་རྡོ་རྗེའི་སྐྱིལ་མོ་ཀྲུང་ཅན༔ རལ་པའི་གཙུག་ཏོར་ལ་རིགས་ལྔའི་པྲོག་ཞུ་དང་ཅོད་པན་གྱིས་བརྒྱན་པ༔ འཛུམ་པའི་མདངས་ལ་ཞི་བའི་ཉམས་དང་ལྡན་པར་བསྒོམས་པའི་ཐུགས་ཀར་འོད་ལྔ་འཁྲུགས་པའི་ཀློང་དཀྱིལ་ཙིཏྟ་རིན་ཆེན་འབར་བའི་གཞལ་ཡས་ཁང་གི་ནང་དུ༔ དང་པོའི་ཆ་ལ་པདྨ་འདབ་མ་བཞི༔ གཉིས་པ་དེའི་ཕྱི་རིམ་དུ་པདྨ་འདབ་མ་བརྒྱད༔ དེའི་ཕྱི་རིམ་འོད་ལྔའི་ར་བས་ཡོངས་སུ་བསྐོར་བའི་ལྟེ་བར་བདུད་བཞི་དང་ཉི་ཟླ་པདྨའི་གདན་གྱི་སྟེང་དུ༔ ཧཱུྃ་ཡིག་དམར་པོའི་འཕྲོ་འདུ་ལས༔ བཅོམ་ལྡན་འདས་དཔལ་ཆེན་པོ་པདྨ་དབང་གི་རྒྱལ་པོ་རྟ་མཆོག་རོལ་པ་སྐུ་མདོག་བྱི་རུའི་སྡོང་པོ་ལ་ཏིལ་མར་གྱིས་བྱུགས་པ་ལྟ་བུ༔ ཤིན་ཏུ་དམར་བའི་མདོག་ཅན་ཞལ་གཅིག་ཕྱག་གཉིས་ཞབས་གཉིས་དོར་སྟབས་ཀྱིས་བགྲད་པ༔ ཕྱག་གཡས་སྣང་བའི་རྡོ་རྗེ་རྩེ་ལྔ་པ་ནམ་མཁའ་ལ་འཕྱར་བ༔ ཕྱག་གཡོན་སྟོང་པའི་རང་བཞིན་དྲིལ་བུ་དཀུར་བརྟེན་པ༔ དུར་ཁྲོད་ཀྱི་ཆས་བརྒྱད་ཀྱིས་བརྒྱན་ཞིང་སྐྲ་ཁམ་སེར་གྱེན་དུ་འབར་བ༔ ཐོད་སྐམ་ལྔས་དབུ་ལ་བརྒྱན་ཞིང་སྐྲ་གསེབ་ནས་རྟ་མགོ་ལྗང་ཞུར་གྱིས་རྟ་སྐད་འཚེར་བ༔ སྣང་སྟོང་རང་འོད་ཀྱི་ཀློང་དུ་བཞུགས་པའི་པང་དུ་ཡུམ་མཆོག་རྡོ་རྗེ་ཕག་མོ་དམར་མོ༔ ཞལ་གཅིག་ཕྱག་གཉིས་གྲི་ཐོད་ཅན༔ ཞབས་གཉིས་གཡས་བརྐྱང་གཡོན་བརྐུམས་ཡབ་ལ་འཁྲིལ་བ༔ ཞལ་གདང་ལྗགས་འདྲིལ་ཁྲོ་གཉེར་དང་མཆེ་བ་གཙིགས་པ༔ སྤྱན་གསུམ་རབ་ཏུ་བགྲད་པ༔ སྐྲ་ཕྱེད་སྤྱི་བོར་བཅིངས་ཤིང་ཕག་ཞལ་གྱི་ངུར་སྒྲ་འབྱིན་པ༔ ལྷག་མ་སྐུ་རྒྱབ་ཏུ་སིལ་བུར་འཕྱང་བ༔ རུས་རྒྱན་དང་གཟིག་ཤམ་གྱིས་བརྒྱན་པ༔ མི་མགོའི་དོ་ཤལ་དང་དྲིལ་བུ་གཡེར་ཁའི་ཕྲེང་བ་ཅན༔ རིག་སྟོང་དབྱེར་མེད་ཀྱི་ཀློང་དུ་ལྷམ་མེར་གསལ་ཞིང་༔ དེའི་ཕྱི་རོལ་ཕྱོགས་བཞིའི་པད་འདབ་ལ་རིགས་བཞིའི་ཚེ་ལྷ་ཡབ་ཡུམ་བརྒྱད་ལོངས་སྤྱོད་རྫོགས་སྐུ་ཡུམ་དང་འཁྲིལ་བ༔ ཞབས་གཉིས་སྐྱིལ་ཀྲུངཕྱག་གཉིས་མཉམ་བཞག་གི་སྟེང་ན་ཚེ་བུམ་བསྣམས་པ༔ ཡུམ་རྣམས་མདའ་དར་དང་ཚེ་བུམ་ཅན༔ ཡབ་ཡུམ་ཐམས་ཅད་སྐུ་མདོག་ཕྱོགས་ཀྱི་མདོག་ཅན་གསལ་སྟོང་དབྱེར་མེད་ཀྱི་ངང་ནས་རང་འོད་ཀྱི་ཀློང་དུ་བསྐྱེད་ཅིང་༔ དེའི་ཕྱི་རོལ་པད་འདབ་བརྒྱད་ལ་ལྷ་མོ་བཞི་དང་མགྱོགས་མ་བཞི་རྣམས་ཀྱང་མདངས་གསལ་མ་འགག་པའི་རོལ་པར་གསལ་ཞིང་༔ དེ་དག་རྣམས་ཀྱི་མཚམས་མཚམས་ཀྱི་ནམ་མཁའི་ཆ་ལ་སྤྲུལ་པའི་གུ་རུ་མཚན་བརྒྱད་རྣམས་ཀྱང་བསྐྱེད་དོ༔ རང་ཉིད་ཚེ་དཔག་མེད་ཡབ་ཡུམ་གྱི་སྤྱི་གཙུག་ཏུ་རིགས་བདག་སྣང་བ་མཐའ་ཡས༔ ཡན་ལག་བཞི་ལ་སྒོ་མ་བཞི༔ བ་སྤུའི་འོད་ཀློང་རྣམས་སུ་སྐུ་གསུམ་གྱི་སྟོན་པ༔ དུས་གསུམ་གྱི་སངས་རྒྱས༔ རྩ་བ་གསུམ་གྱི་ལྷ་ཚོགས་ཐམས་ཅད་མངོན་སུམ་དུ་གསལ་ཞིང་༔ ཚེ་ལ་དབང་བའི་རིག་འཛིན་དཔའ་བོ་དཔའ་མོའི་འཁོར་ཚོགས་འབུམ་འབུམ་གྱི་ཚོགས་དང་བཅས་པ་ཐམས་ཅད་ཀྱི་གནས་གསུམ་ལས་འོད་ཟེར་གྱི་ཚོགས་གྲངས་མེད་པ་འཕྲོས་པས་རང་འདྲའི་ཡེ་ཤེས་སེམས་དཔའ་ཁ་བ་དང་བུ་ཡུག་འཚུབ་པ་ལྟར་བྱོན་ནས་བདག་མདུན་རྣམས་ལ་ཐིམ་པར་བསྒོམ་ཞིང་༔ སྤྱན་འདྲེན་བཞུགས་གསོལ་མཆོད་བསྟོད་ལ་སོགས་ལས་བྱང་ལྟར་བྱ་ཞིང་༔ རང་ལུས་ཀྱི་སྣང་ཆ་ཚེ་དཔག་མེད་ཡབ་ཡུམ༔ རང་རིག་གི་ངོ་བོ་ཙིཏྟ་འོད་ལྔ་འཁྲུགས་པའི་ཀློང་དུ་རྟ་ཕག་ཡབ་ཡུམ་ལ་ཚེའི་ལྷ་དང་ལྷ་མོའི་ཚོགས་སུ་གསལ་བའི༔ རྟ་ཕག་ཡབ་ཡུམ་གྱི་ཐུགས་ཀར་ཉི་ཟླའི་དཀྱིལ་འཁོར་གྱི་སྟེང་དུ་མན་ཤེལ་ལས་གྲུབ་པའི་རྡོ་རྗེ་རྩེ་ལྔ་པ་སེན་གང་བ་ཞིག་གྱེན་དུ་ལངས་པའི་ལྟེ་བར་ཧཱུྃ་ཡིག་དམར་པོས་མཚན་པའི་ཧ་ཁོག་གི་དཀྱིལ་ན་ཡི་གེ་ཧྲཱི༔ དམར་པོ་ཚེག་དྲག་དང་བཅས་པ་ཞིག་གསལ༔ ཧྲཱིཿདེའི་ཧ་ཁོག་གི་ནང་དུ་ཚེ་སྲོག་མི་འགྱུར་བའི་ངོ་བོ་ཡི་གེ་ནྲི་ལྗང་གུ་བཀྲག་མདངས་དང་ལྡན་པ་ཞིག་བསྒོམ༔ ཧཱུྃ་དམར་པོའི་མཐའ་སྐོར་ཉི་དཀྱིལ་སྟེང་དུ་གཡས་སྐོར་དུ༔ ཨོཾ་ཧཱུྃ་ཏྲཾ་ཧྲཱི༔ ཨཱཾ༔ མུཾ་ལཾ་མཾ་པཾ་ཏཾ༔ ཧྱགྷྲཱི་ཝ་ཛྙཱ་ན་བཛྲ་ཨཱ་ཡུ་ཤེ་ཚེ་བྷྲཱུཾ༔ ཡུ་བྷྲཱུྃ༔ ཡུ་ཚེ་བྷྲཱུྃ༔ མ་མ་སརྦ་སིངྔྷི་སྡུས་སྡུས་པཥྟིང་ཀུ་རུ་ཡེ་སྭཱ་ཧཱ༔ ཅེས་པའི་སྔགས་འབྲུ་རྣམས་རང་སྒྲ་དང་བཅས་གཡས་སུ་འཁོར༔ འོད་ཀྱི་ཕྲེང་ཐག་དམར་པོ་གཡོན་དུ་འཁོར༔ ངག་ནས་བཟླས་པས་ཞལ་ནས་འཐོན་ཏེ་མར་མེ་གཅིག་ལས་གཉིས་ཆད་ཀྱི་རྣམ་པར་འཕྲོས༔ གཟུངས་ཐག་ལ་བརྒྱུད་དེ་སོང་༔ བདུན་བསྐྱེད་བུམ་པའི་ལྷ་དཀྱིལ་འཁོར་གྱི་ལྷ་ཚོགས་དང་བཅས་པའི་ཞལ་དུ་ཞུགས༔ ཐུགས་ཀར་སྔགས་འབྲུ་རྣམས་ལ་ཐིམ་པས་ཐུགས་དམ་གྱི་རྒྱུད་བསྐུལ༔ བདག་མདུན་གྱི་ལྷ་ཚོགས་ཐམས་ཅད་ལས་འོད་ཟེར་གྱི་ཚོགས་དཔག་ཏུ་མེད་པ་ཕྱོགས་བཅུའི་ཞིང་ཁམས་རྣམས་སུ་འཕྲོས༔ སྐུ་གསུམ་གྱི་སྟོན་པ༔ དུས་གསུམ་གྱི་སངས་རྒྱས༔ རྩ་བ་གསུམ་གྱི་ལྷ་ཚོགས་རྣམས་ལ་མཉེས་པའི་མཆོད་པ་ཕུལ༔ སྐུ་གསུང་ཐུགས་ཀྱི་བྱིན་རླབས་ཐམས་ཅད་བསྡུས་འོད་ཟེར་གྱི་རྣམ་པར་སྤྱན་དྲངས་ཤིང་བདག་མདུན་རྣམས་ལ་ཐིམ༔ སྐུ་གསུང་ཐུགས་ཡོན་ཏན་འཕྲིན་ལས་ཀྱི་གཟི་བརྗིད་འོད་དུ་འབར་ཞིང་༔ འཁོར་འདས་ཐམས་ཅད་འོད་དང་ཟེར་གྱིས་ལམ་ལམ་གང་ཞིང་ཡོམ་ཡོམ་འཚེར་བ་ལས༔ ཚེའི་ལྷ་མོ་མགྱོགས་མ་སྒོ་མ་དང་བཅས་པ་གྲངས་མེད་དཔག་ཏུ་མེད་པར་གྱུར་ནས༔ འཁོར་འདས་ཀུན་གྱི་ནུས་སྟོབས་དང་གཟི་བརྗིད་ཐུགས་རྗེ་དང་བྱིན་རླབས་ནུས་མཐུ་ཚེ་བསོད་ནམས་ལོངས་སྤྱོད་ཁ་རྗེ་དབང་ཐང་འབྱུང་བའི་ཁམས་ཀྱི་དྭངས་མ་རང་གི་བླ་ཚེ་ཆད་ཉམས་གས་པ་ཡར་བ་དང་བཅས་པ་ཐམས་ཅད༔ རང་དབང་མེད་པར་དབང་དུ་བསྡུས་ནས་མདུན་བསྐྱེད་ཀྱི་ལྷ་ཚོགས་སྒྲུབ་རྫས་ཀྱི་ངོ་བོར་གསལ་བ་རྣམས་དང་༔ ཁྱད་པར་བདག་ཉིད་ཚེ་དང་ཡེ་ཤེས་དཔག་ཏུ་མེད་པ་ཡབ་ཡུམ་ཐུགས་ཀའི་ཁྲོ་བོ་ཚེ་ཡི་ལྷ་ཚོགས་ཚོམ་བུ་དང་བཅས་པའི་ངོ་བོ་ཡེ་ཤེས་སེམས་དཔའི་རྣམ་པ་ཧཱུྃ་ཡིག་ཧྲཱིཿདང་ཚེ་སྲོག་གི་ངོ་བོ་ནྲི་ཡིག་སྔགས་འབྲུ་རྣམས་ལ་ཐིམ་པས༔ དབང་ཆེན་ཡབ་ཡུམ་ཚེ་ལྷ་རིགས་བདག་སྒོ་མ་དང་བཅས་པ་ཐུགས་རྒྱུད་རབ་ཏུ་དགྱེས་ཤིང་སྙོམས་པར་ཞུགས་པས་དགའ་བཞིའི་ཡེ་ཤེས་བདེ་སྟོང་ཟག་པ་མེད་པའི་ཏིང་ངེ་འཛིན་ཁྱད་པར་ཅན་གྱི་ཉམས་རྟོགས་རྒྱས་ཤིང་༔ ཡབ་ཡུམ་སྙོམས་པར་ཞུགས་པའི་བྱང་སེམས་དཀར་དམར་དང་འཁོར་འདས་ཀུན་གྱི་བྱིན་རླབས་ནུས་བཅུད་ཐམས་ཅད་ཀྱིས་ལུས་ཕྱི་ནང་བ་སྤུའི་བུ་ག་ཐམས་ཅད་དུ་བཅུད་དུ་ཧྲིལ་ཧྲིལ༔ བྱིན་རླབས་སུ་ཐིབ་ཐིབ༔ ནུས་མཐུ་རུ་སྤུང་སྤུང་༔ དངོས་གྲུབ་ཏུ་ཤར་ཤར་བསྒོམ་ཞིང་གོང་གི་སྙིང་པོ་ལ་འབུམ་ཚོ་གཅིག་བཟླས་པས༔ དངོས་གྲུབ་ཐོབ་པའི་རྟགས་ནི་སྣ་ཚོགས་སུ་འབྱུང་སྟེ༔ རབ་དངོས་འབྲིང་ཉམས་ཐ་ནའང་རྨི་ལམ་དུ་མགོན་པོ་ཚེ་དཔག་མེད་ཞལ་མཇལ་བ་དང་༔ གསུང་ཐོས་པ་དང་༔ དབང་བསྐུར་བ་དང་༔ ལུང་སྟོན་པ་སོགས་འབྱུང་ངོ་༔ གལ་སྲིད་སྔོན་གྱི་བག་ཆགས་ཀྱི་སྒྲིབ་པ་སོགས་ཤིན་ཏུ་འཐུག་པའི་རིགས་ཡིན་ཀྱང་རྨི་ལམ་དུ་ལྷས་བཟང་པོ་འདི་དག་འབྱུང་སྟེ༔ ཉི་ཟླ་གདན་དུ་བཏིང་བ༔ ཚེ་བུམ་དང་ཀ་པཱ་ལ་སོགས་བདུད་རྩིས་བཀང་བ་བུད་མེད་བཟང་མོས་འདྲེན་ཞིང་རང་གིས་འཐུང་བ་དང་༔ རྡོ་རྗེ་དྲིལ་བུ་དུང་དཀར་སོགས་རྙེད་པ༔ དར་འཕྱར་བ༔ རོལ་མོ་འཁྲོལ་བ༔ གངས་རི་ལ་འཛེག་པ༔ མཆོག་རྟེན་ལ་བསྐོར་བ༔ གྲུ་ཟམ་ཆུ་བོ་ལས་བརྒལ་བ༔ ཉི་མ་དང་ཟླ་བ་སྙིང་གར་ཐིམ་པ་ལ་སོགས་ཀྱི་ལྟས་ཁྱད་པར་ཅན་འབྱུང་བར་འགྱུར་རོ༔ དངོས་སུ་ཡང་དྲི་བཟང་པོ་འཐུལ་བ་དང་༔ སྒྲུབ་ཁང་དང་དམ་རྫས་རྣམས་ལ་མེ་འབར་བ་དང་༔ དུ་བ་འཐུལ་བ་དང་འོད་འཁྱུག་པ་ལ་སོགས་འབྱུང་བར་འགྱུར་རོ༔ དེ་ལྟར་གྲངས་བསྙེན་རྫོགས་ནས་གང་ཟག་གི་ན་རིམ་ལྟར་གྱི་དངོས་ཉམས་རྨི་ལམ་གྱི་རྟགས་གང་བྱུང་ཡང་རྟོག་པ་མི་བསྐྱིལ་ཞིང་ངོ་བོ་ཉིད་ཀྱི་ཐོག་ཏུ་བཞག༔ རེ་དོགས་ཀྱི་འདུ་འཕྲོ་སོགས་མི་བྱ་བར་རང་རིག་སྐྱེ་འགག་གནས་གསུམ་དང་བྲལ་བའི་རང་མདངས་སུ་ཤེས་པར་བྱའོ༔ བསྙེན་གྲངས་མ་རྫོགས་ཀྱང་རྟགས་ཀྱི་རིམ་པ་རྣམས་ཤིན་ཏུ་གསལ་ན་སྔོན་གྱི་བག་ཆགས་སྲབ་པར་ཤེས་པར་བྱའོ༔ གྲངས་བསྙེན་རྫོགས་ཀྱང་རྟགས་ཀྱི་རིམ་པ་མ་གསལ་ན་སྔོན་གྱི་བག་ཆགས་དང་སྒྲིབ་པ་འཐུག་པས་ཚོགས་བསགས་སྒྲིབ་སྦྱང་གི་རིམ་པ་ལ་འབད་ཅིང་སྒྲུབ་པ་སླར་སྤོག་པར་བྱའོ༔ བསྙེན་གྲངས་རྫོགས་པ་དང་རྟགས་བྱུང་བ་དུས་མཉམ་ན་གང་ཟག་འབྲིང་གི་རྒྱུད་ཚོད་དང་མཐུན་པ་ཤེས་པར་བྱའོ༔ དེ་ཡང་རྒྱུ་ཡེ་ནས་མེད་པ་ལ་འབྲས་བུ་མི་འབྱུང་སྟེ༔ ཅིའི་ཕྱིར་ཞེ་ན༔ དངུལ་རྡོ་མིན་པའི་རྡོ་རིགས་ལ་དངུལ་མི་འབྱུང་བ་དང་༔ འོ་མ་མིན་པའི་རླན་རིགས་ལ་མར་མི་འབྱུང་བ་དང་༔ ཏིལ་མིན་པའི་འབྲུ་ལ་སྣུམ་མི་འབྱུང་བ་ལྟར་རང་རིག་པའི་ངོ་བོ་མ་མཐོང་བ་རྣམས་ཀྱིས་ཚེ་ཡི་རིག་འཛིན་འཐོབ་པ་མེད་དོ༔ དེས་ན་ཚེ་སྒྲུབ་ཀུན་གྱི་རྩ་བ་ནི༔ ད་ལྟར་གྱི་ཤེས་པ་ལ་རང་ངོར་བལྟས་ཚེ༔ མཐོང་དུ་མེད་པའི་སྟོང་པ༔ འཁོར་འདས་དང་སྐྱེ་འཆི་གང་ཡང་ངོ་བོ་ཉིད་ལ་ཡེ་ནས་གྲུབ་མ་མྱོང་ཞིང་༔ བདེ་སྡུག་གི་སྣང་བ་སྐྱེ་ཤིའི་འདུ་བྱེད་ཇི་ལྟར་ཤར་ཡང་ཕན་པ་དང་གནོད་པ་རྡུལ་ཙམ་ཡང་བྱེད་པའི་ཡུལ་མ་གྲུབ་པའི༔ ཀུན་གྱི་འབྱུང་གནས༔ ཀུན་གྱི་བྱེད་པོ༔ ཀུན་གྱི་འཁྲུལ་གཞི༔ ཀུན་གྱི་གྲོལ་གཞི༔ མིང་གི་ཚོགས་ལས་འདས་ཤིང་༔ གཟུགས་ཀྱི་ཡུལ་ལས་འདས་པ༔ མཐོང་མེད་མཐོང་བ་ངོ་བོ་ཉིད་ཀྱི་ཡེ་ཤེས་འདི་རང་ངོར་གསལ་ཞིང་ཞལ་མཇལ་ནས་སྐྱེ་ཤི་མེད་པའི་དོན་རྟོགས་ཚེ༔ ལྷ་དང་སྔགས་དང་རྫས་དང་ཏིང་ངེ་འཛིན་སོགས་ཀྱི་རྐྱེན་དྲག་པོའི་བརྩོན་འགྲུས་ཀྱིས་བསྐུལ་བས༔ མྱུར་དུ་གདོད་མའི་རང་བྱུང་གི་རང་རིག་གཏན་ས་ཟིན་ཚེ༔ སེམས་རྟགས་ལུས་ལ་ཤར་བས་ཟག་བཅས་ཟག་མེད་དུ་གྲོལ་ཞིང་༔ རྡོ་རྗེ་ལྟ་བུའི་ཏིང་ངེ་འཛིན་གྱིས་གསལ་སྣང་ལམ་དུ་བྱས་པས་ཚེ་ཡི་རིག་འཛིན་ལ་སྤྱོད་ཅིང་བདག་ཉིད་པདྨ་འབྱུང་གནས་ལྟར་གཞན་དོན་ལ་འཇུག་པའོ༔ དེས་ན་མ་འོངས་ཀྱི་རྗེས་་འཇུག་ཚེ་བསྒྲུབ་པར་འདོད་པ་རྣམས་ཀྱང་༔ ཟང་ཟིང་དང་འདུ་ལོང་གཡེང་བ་རྣམས་རྒྱང་དུ་བོར་ནས་རང་བྱུང་གི་སེམས་ཉིད་གཏན་ལ་ཕབ་སྟེ༔ ལྷ་བསྒོམ་པ་དང་༔ སྔགས་བཟླ་བ་དང་༔ ཏིང་ངེ་འཛིན་གསལ་བ་དང་༔ ཐབས་དང་རྟེན་འབྲེལ་གྱི་རིམ་པ་རྣམས་བརྩོན་འགྲུས་དྲག་པོས་གནད་དུ་བསྣུན་དང་རིག་འཛིན་ཚེ་ཡི་དངོས་གྲུབ་འཐོབ་ཅིང་༔ སངས་རྒྱས་སྟོང་ཕྲག་མང་པོའི་བསྟན་པ་མ་རྫོགས་ཀྱི་བར་དུ་བསྟན་འགྲོའི་བདེ་ལེགས་བསྐྲུན་པར་ནུས་སོ༔ དེ་ཡང་ཚེའི་སྒྲུབ་པ་འདིར་ཞུགས་པའི་དུས་སུ་ཉམས་འཐིབས་པ་དང་༔ རིག་པ་བྱིང་བ་དང་༔ སྒྲུབ་རྫས་ལ་བག་རྡུལ་ཆགས་པ་ལ་སོགས་མི་མཐུན་པའི་ལྟས་བྱུང་ན༔ རང་ཉིད་ཚེ་དཔག་མེད་ཀྱི་ཐུགས་ཀའི་རྟ་ཕག་ཡབ་ཡུམ་ལས་ཁྲོ་བོ་དང་ཁྲོ་མོ་དཔག་ཏུ་མེད་པ་འཕྲོས་ཏེ༔ དགྲ་བགེགས་འབྱུང་པོ་གདོན་བགེགས་ཕོ་མོ་ཚེ་ལ་བར་དུ་གཅོད་པ་ཐམས་ཅད་ཚར་བཅད་རྒྱ་མཚོའི་ཕ་རོལ་དུ་བསྐྲད་ཅིང་༔ འོད་ཟེར་ཚུར་འདུས་པས་མཚོན་ཆ་རྣམ་ལྔ་དང་ཁྲོ་ཆུང་གོ་མཚོན་ཅན་གྱི་རྣམ་པ་མང་པོར་གྱུར་ནས༔ སྟེང་འོག་བར་གསུམ་ཐམས་ཅད་བསྲུང་བའི་འཁོར་ལོས་གོ་བགོས་པར་དམིགས་ཤིང་༔ ཧཱུྃ་གི་སྣང་གླུ་ལེན་ཏེ་གུ་གུལ་གྱིས་བདུག་པར་བྱའོ༔ དེས་ནི་ཕྱི་ནང་གི་བར་ཆད་ཀྱི་ཚོགས་ཐམས་ཅད་རིང་དུ་བྱེད་དོ༔ སྐབས་སྐབས་བྱིན་འབེབས་དང་འཛབ་བྲོ་སོགས་བྱ་ཞིང་ངོ་བོ་ཉིད་ཀྱི་ཉམས་སྐྱོང་ངོ་༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་ཡང་ཟབ་ཚེ་ཡི་སྒྲུབ་ཐབས་འདི༔ བསྙེན་སྒྲུབ་ལས་སྦྱོར་ཆིག་དྲིལ་གདམས་པའི་མཆོག༔ ས་འོག་ཟབ་ཆོས་གཏེར་གྱི་ཡང་བཅུད་སྟེ༔ པདྨ་བདག་གི་སྙིང་ཐིག་མིན་རེ་ཀན༔ མ་འོངས་ལྔ་བརྒྱའི་དུས་ཀྱི་ཡང་མཐའ་ལ༔ དགེ་དང་མི་དགེ་སྣ་ཚོགས་འཆལ་བར་སྤྱོད༔ དེ་ཡི་དབང་གིས་དཀར་ཕྱོགས་སྲུང་མ་གྱེས༔ ནག་ཕྱོགས་དར་བས་ཆོས་བྱེད་སྐུ་ཚེ་ཐུང་༔ ནད་གདོན་བགེགས་དང་བར་ཆད་ཉེར་འཚེ་མང་༔ དེ་ཚེ་ཚེ་སྒྲུབ་ཀུན་གྱི་སྙིང་བཅུད་འདི༔ ཚུལ་བཞིན་ཉམས་སུ་བླངས་པའི་སྐལ་ལྡན་ལ༔ བྱིན་རླབས་དྲོད་རྟགས་ནམ་མཁའི་སྤྲིན་ལྟར་འདུ༔ དངོས་གྲུབ་སྣ་ཚོགས་ཆར་རྒྱུན་བཞིན་དུ་སྩོལ༔ འཆི་བདག་གཡུལ་ལས་རྒྱལ་བར་གདོན་མི་ཟ༔ དེས་ན་ཉམས་སུ་ལོངས་ཤིག་ཕྱི་རབས་རྣམས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་གནས་མཆོག་ཟབ་བུ་ལུང་པཱ་ལོ་གུ་རུའི་སྒྲུབ་ཕུག་གི་རྡོ་རྗེ་ཧཱུྃ་རྒྱ་བྲག་ནས། ཤིང་མོ་ཡོས་ལོ་ཧོར་ཟླ་ལྔ་པའི་ཚེས་བཅུའི་དགོང་མོ་དབང་གི་དུས་སུ་གདན་དྲངས་ཤིང་། ས་མོ་ལུག་གི་ལོའི་ཧོར་ཟླ་བདུན་པར་ཕུག་ནག་བདེ་བ་ཆེན་པོར་ཤོག་སེར་ལས་ཕབ་པའོ། །མངྒ་ལཾ།། །།