བདུད་རྩི་ཉེ་ཤིང་བཅུད་ལེན།
བཀའ་རྫོགས་པ་ཆེན་པོ་ཚེ་སྒྲུབ་བདུད་བཞིའི་གཡུལ་ལས་རྣམ་རྒྱལ་ལས༔ བདུད་རྩི་ཉེ་ཤིང་བཅུད་ལེན་བཞུགས༔ ཚེ་ལྷ་རིག་འཛིན་རྣམས་ལ་འདུད༔ ཚེ་ཡི་དངོས་གྲུབ་འཐོབ་པ་དང་༔ ལོངས་སྤྱོད་ལྷ་བུའི་བདུད་གཞོམ་ཕྱིར༔ བདུད་རྩི་ཉེ་ཤིང་བཅུད་ལེན་ཞིག༔ ཡི་གེར་འདེབས་ནས་གཏེར་དུ་སྦ༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ རང་ཉིད་རྟ་མགྲིན་ང་རྒྱལ་གྱིས༔ ཉེ་ཤིང་ཡོད་པའི་ཡུལ་དུ་ཕྱིན༔ དཀར་ཕྱོགས་སྐྱོང་བའི་གཞི་བདག་ལ༔ གསེར་སྐྱེམས་མཆོད་ཅིང་འཕྲིན་ལས་བཅོལ༔ འབྱུང་པོའི་བར་ཆད་བདུད་ཀྱི་ཚོགས༔ རྟ་མགྲིན་དྲག་སྔགས་བཟླས་ལ་བསྲེག༔ གཡས་པའི་ལྕགས་ཀྱུ་དམར་པོ་ཡིས༔ ས་ལ་བརྒྱབས་པས་འཁོར་འདས་བཅུད༔ འོད་ཟེར་དམར་པོས་དབང་དུ་བསྡུས༔ ཉེ་ཤིང་བདུད་རྩིའི་རྫས་ལ་བསྟིམ༔ དངོས་གྲུབ་འབྱུང་བའི་ཕུང་པོར་བསམས༔ སརྦ་སིངྔྷིའི་སྔགས་བཟླས་ཤིང་༔ ས་ལས་བརྐོས་ཏེ་སྣོད་དུ་བསགས༔ ཆོམས་ཙམ་བརྡུང་ཞིང་དྲི་ཆུར་བཏབ༔ མེ་ལ་བསྐོལ་ཞིང་རས་ལ་བཙགས༔ ལན་གསུམ་ཁུ་བ་གདུ་བར་བྱ༔ ཅོང་ཞི་འདུལ་མ་གཙོ་བོར་སྦྱར༔ ཨ་བར་སྐྱུར་གསུམ་ཕྱེ་མ་དང་༔ བུ་རམ་སྟོན་མར་ཅི་འབྱོར་བཏབ༔ རིལ་བུ་ཆེ་ཆུང་རན་ཙམ་བསྒྲིལ༔ བདག་བསྐྱེད་ཚེ་སྒྲུབ་དམིགས་པ་ལ༔ སྤྱི་བོར་རྩ་བའི་བླ་མ་གསལ༔ ཚེ་ལྷ་དྲང་སྲོང་རིག་འཛིན་དང་༔ བརྒྱུད་ལྡན་རྩ་གསུམ་འཁོར་ཚོགས་བསྐྱེད༔ རྒྱལ་བ་རྒྱ་མཚོ་ཚེ་དཔག་མེད༔ མཚུངས་མེད་བླ་མ་ཆོས་ཀྱི་རྗེ༔ ཚེ་ལྷ་དྲང་སྲོང་རིག་པ་འཛིན༔ རྩ་གསུམ་ཆོས་སྐྱོང་སྲུང་མ་ལ༔ མི་ཕྱེད་གསོལ་བ་སྙིང་ནས་འདེབས༔ བདུད་རྩི་ཉེ་ཤིང་བཅུད་ལེན་འདི༔ འཕྲིན་ལས་སྦྱོར་བ་ལས་རུང་ཞིང་༔ འཆི་མེད་ཚེ་ཡི་དངོས་གྲུབ་སྩོལ༔ མཁའ་སྤྱོད་འགྲུབ་པའི་དངོས་གྲུབ་སྩོལ༔ གྲུབ་ཆེན་བརྒྱད་ཀྱི་དངོས་གྲུབ་སྩོལ༔ མཆོག་ཐུན་དངོས་གྲུབ་ཐམས་ཅད་སྩོལ༔ ཅེས་པའི་གསོལ་འདེབས་གནད་བསྣུན་ནས༔ ལྷ་ཚོགས་བླ་མ་རང་ལ་བསྟིམ༔ དབང་བཞི་ལེན་ཞིང་མ་བཅོས་བཞག༔ རང་ལུས་རླུང་སྦྱོར་གནད་དུ་བསྣུན༔ འཁྲུལ་འཁོར་གཅུན་ཞིང་ཆུང་ངུ་འབྲིང་༔ གོམས་ནས་ཆེས་ཆེར་བསྟེན་པར་བྱ༔ ས་མ་ཡཱ༔ རྒྱ་རྒྱ་རྒྱ༔ འདི་ལྟར་བསྟེན་པའི་རྣལ་འབྱོར་ལ༔ ཏིང་འཛིན་ཁོར་ཡུག་གསལ་བ་དང་༔ སྤྱན་དང་མངོན་ཤེས་རྫུ་འཕྲུལ་འཐོབ༔ ཟག་པ་ཟད་ནས་ཟག་མེད་གྲོལ༔ ཚེ་ནི་ཚེ་དཔག་མེད་དང་མཉམ༔ ན་ཆུང་གཞོན་ནུའི་བཅུད་འཕྲོག་ཅིང་༔ ཁམས་དང་དྭངས་མ་ཆེས་ཆེར་རྒྱས༔ བཀྲག་དང་གཟི་བརྗིད་འོད་དུ་འཚེར༔ ནད་དང་ཉེར་འཚེ་ཐམས་ཅད་གྲོལ༔ ཟབ་པའི་སྙིང་པོ་དམ་པ་འདི༔ མ་འོངས་དུས་ཀྱི་ཡང་མཐའ་ལ༔ ལས་འཕྲོ་ཅན་གྱིས་རྙེད་གྱུར་ནས༔ འགྲོ་བའི་དོན་ཆེན་འབྱུང་བར་ཤོག༔ སྲུང་མས་ཆོས་འདིར་མེལ་ཚེ་མཛོད༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཉན་རྒྱ༔ ཟབ་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་ཤངས་ཟབ་བུ་ལུང་ནས་གདན་དྲངས་པའོ། །མངྒ་ལཾ།། །།