སྦྱིན་སྲེག
བཀའ་རྫོགས་པ་ཆེན་པོ་ཚེ་སྒྲུབ་བདུད་བཞིའི་གཡུལ་ལས་རྣམ་རྒྱལ་ལས༔ སྦྱིན་སྲེག་བཞུགས༔ མགོན་པོ་ཚེ་དཔག་མེད་མགོན་ལ༔ གུས་པ་ཆེན་པོས་ཕྱག་འཚལ་ལོ༔ ཚེ་སྒྲུབ་བདུད་བཞི་རྣམ་རྒྱལ་ལས༔ སྦྱིན་སྲེག་མེ་ཡི་འཕྲིན་ལས་ཤིག༔ མ་འོངས་དོན་དུ་ལེགས་པར་འབྲི༔ ལས་འཕྲོ་ཅན་གྱིས་སྤྱོད་པར་ཤོག༔ ཞི་སོགས་འཕྲིན་ལས་རྣམ་པ་བཞིའི༔ མེ་མཆོད་ལག་ལེན་བསྟན་པ་ནི༔ མཎྜལ་འདོམ་གང་གྲུ་བཞི་པའི༔ དབུས་སུ་ལིང་ཙེ་བཞི་བྱས་ཏེ༔ དྲི་བཟང་ཆུ་ཡིས་ཆག་ཆག་གདབ༔ ལས་བཞིའི་ཐིག་ཆོག་སྤྱི་འགྲོས་བསྟུན༔ དབུས་སུ་འདབ་བཞི་ལྟེ་བ་ཟླུམ༔ ཚེ་ལྷ་རིགས་ལྔའི་ས་བོན་ནམ༔ ཕྱག་མཚན་ཚོན་གྱིས་བྲི་བར་བྱ༔ ཙན་དན་རྒྱ་ཤུག་་མཛོ་མོ་ཤིང་༔ ཚེར་མ་ཅན་སོགས་ཤིང་སྣ་བཞི༔ ཟླུམ་པོ་གྲུ་བཞི་ཟླ་གམ་དང་༔ གྲུ་གསུམ་ཚུལ་དུ་ཐབ་ཁུང་བརྩིག༔ རང་ཉིད་ཡི་དམ་ལྷ་རུ་བསྒོམ༔ སྟོང་པའི་རང་རྩལ་ཐབ་ཁུང་བཞི༔ རིན་ཆེན་གཞལ་ཡས་ཁང་དུ་བསམས༔ བསོད་ནམས་ཅན་ལས་མེ་བླངས་སྦར༔ མེ་ལྷ་སྤྱན་འདྲེན་འདི་སྐད་དོ༔ ཨཱོཾ་ཚུར་བྱོན་འབྱུང་བ་མེ་ཡི་ལྷ༔ ཆིབས་སུ་ར་སྐྱེས་ཁམ་པ་བཅིབས༔ མེ་རླུང་བ་དན་ཕྱག་ན་བསྣམས༔ གནས་འདིར་སྤྱན་འདྲེན་གཤེགས་སུ་གསོལ༔ བར་གཅོད་ཞི་དང་ཚེ་བསོད་སྤེལ༔ སྣང་སྲིད་དབང་སྡུད་སྡེ་བརྒྱད་འདུལ༔ འཕྲིན་ལས་རྣམ་བཞི་བསྒྲུབ་པའི་ཕྱིར༔ གནས་འདིར་སྤྱན་འདྲེན་གཤེགས་ནས་ཀྱང་༔ སྲེག་བླུགས་ཞལ་ཟས་མཆོད་པ་བཞེས༔ མེ་ལྷའི་ལྟོ་བར་མགོན་པོ་ཚེ་ཡི་ལྷ༔ རིག་འཛིན་བརྒྱུད་པའི་སློབ་དཔོན་ཡི་དམ་ལྷ༔ མཁའ་འགྲོ་ཆོས་སྐྱོང་ཏིལ་གང་ལྟ་བུར་གསལ༔ རྩ་སྔགས་ཤམ་བུར༔ ཨཱོཾ་ཨགྣ་ཡེ་ནད་གདོན་བར་ཆད་ཤིནྟང་ཀུ་རུ་ཡེ་སྭཱ་ཧཱ༔ ཤར་དུ་འབུལ༔ དེ་བཞིན་ལྷོ་རུ་ཚེ་དང་བསོད་ནམས་པུཥྟིང་ཀུ་རུ་ཡེ་སྭཱ་ཧཱ༔ ནུབ་ཏུ་ལྷ་འདྲེ་མི་གསུམ་ཝ་ཤང་ཀུ་རུ་ཡེ་སྭཱ་ཧཱ༔ བྱང་དུ་དགྲ་བགེགས་གནོད་བྱེད་ཐམས་ཅད་སརྦ་ཛྭ་ལ་རཾ་པ་ཡེ་སྭཱ་ཧཱ༔ བརྒྱ་དང་རྩ་བརྒྱད་དག་གིས་ལེགས་པར་འབུལ༔ གསེར་དངུལ་ཟངས་ལྕགས་སྣོད་ནང་དུ༔ འཕྲིན་ལས་བཞི་ཡི་སྲེག་རྫས་རྣམས༔ དངུལ་དུང་འབྲས་ཏིལ་མར་དཀར་ཤར༔ གསེར་དང་འབྲུ་སྨན་གཏོར་མ་ལྷོ༔ ཟངས་དང་ཤ་ཆེན་ལན་ཚྭ་ནུབ༔ ལྕགས་དང་སྲན་མ་ཏིལ་ནག་བྱང་༔ ཀུན་གྱི་སྐྱོབས་ནི་ཕྱེ་དང་མར༔ མཆོད་རྫས་འདོད་ཡོན་ལྔ་རུ་བསམས༔ ཡི་གེ་འབྲུ་གསུམ་སྔགས་བྱིན་བརླབ༔ ཡེ་ཤེས་བསྐྱེད་བསྟིམ་ལས་གཞུང་བསྲང་༔ ཁྱད་པར་རྫས་ལ་ངེས་པ་མེད༔ རང་གི་འདོད་པའི་ལོངས་སྤྱོད་རྫས༔ མཁོ་དགུ་ཡིད་ལ་ཅི་འདོད་རྣམས༔ སྔགས་ཀྱི་ཤམ་བུ་འདོད་གསོལ་བསྒྱུར༔ འབུལ་བ་མན་ངག་གནད་ཡིན་ནི༔ འདི་ནི་ཕྲིན་ལས་རྩ་བ་སྟེ༔ བསམ་པའི་དོན་འགྲུབ་བར་ཆད་ཞི༔ དབང་དྲག་ལས་ལ་ཐོགས་མེད་འགྱུར༔ དེ་ལྟར་ཆོ་ག་རྫོགས་ནས་ཀྱང་༔ ལྷ་ཚོགས་རང་གིི་སྙིང་གར་བསྡུ༔ ད་ལ་བསྡུ་ཞིང་བསྔོ་སྨོན་བརྗོད༔ ས་མ་ཡཱ༔ རྒྱ་རྒྱ་རྒྱ༔ སྦྱིན་སྲེག་མེ་ཡི་འཕྲིན་ལས་འདི༔ ད་ལྟ་མཚོ་རྒྱལ་ཁྱོད་ལ་གདམས༔ མ་འོངས་དོན་དུ་གཏེར་དུ་སྦོས༔ ཡ་མཚན་མཁའ་འགྲོ་འདུ་བའི་གླིང་༔ ཟབ་བུ་ལུང་གི་བར་སྒོ་ན༔ པདྨ་ང་ཡི་སྒྲུབ་ཕུག་ཏུ༔ རྒྱ་གསུམ་བཏབ་པའི་ཟབ་ཆོས་འདི༔ མ་འོངས་དུས་ཀྱི་ཡང་མཐའ་ལ༔ སྦས་པའི་རྣལ་འབྱོར་ང་ཡི་བུ༔ མཐའ་འཁོབ་ཁམས་ཀྱི་ཡུལ་ནས་འོང་༔ པདྨ་རིགས་ཀྱི་དཔའ་བོ་སྟེ༔ གསང་མཚན་རྡོ་རྗེ་སྨེ་བས་བརྒྱན༔ མ་སྲིང་རྒྱ་མཚོ་ཤུགས་ཀྱིས་འཁོར༔ ངེས་མེད་སྣང་སྤྱོད་ཆོ་ལེ་བ༔ ཀླུ་དབང་སྐྱེ་བའི་ཐ་མ་ལ༔ ཉི་མའི་མིང་ཅན་མ་བྱུང་བར༔ སྲུང་མས་ཆོས་འདིའི་བྱ་ར་གྱིས༔ ལས་འཕྲོ་ཅན་གྱི་ལག་ཏུ་སྤྲོད༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ བདག་སྤྲང་བན་གཡུ་རྣ་ཅན་གྱིས། ཤིང་མོ་ཡོས་ལོ་ཧོར་ཟླ་ལྔ་པའི་ཚེས་བཅུའི་ཉིན་མོ་གནས་མཆོག་ཆེན་པོ་ཤངས་ཟབ་བུ་ལུང་པཱ་ལོ་གུ་རུའི་སྒྲུབ་ཕུག་ནས་གདན་དྲངས་པའོ། །མངྒ་ལཾ།། །།