བྱ་ཁྱུང་སྒྲུབ་ཐབས་སྤུ་གྲི་འབར་བ།
ཟབ་ཆོས་པདྨ་དྲག་ཁྲོས་ལས༔ བྱ་ཁྱུང་སྒྲུབ་ཐབས་སྤུ་གྲི་འབར་བ་བཞུགས༔ དྲག་པོ་རྩལ་ལ་ཕྱག་འཚལ་ལོ༔ རི་ནི་བརྗིད་དང་ལྡན་པའི་རྩེ༔ ཡང་ན་མཚོ་འགྲམ་ཤིང་གཅིག་དྲུང་༔ དབེན་པའི་གནས་སུ་མཎྜལ་ལ༔ ཆང་ངམ་ཁྲག་གིས་ཆག་ཆག་གདབ༔ ཐིག་ནས་དྲངས་ཤིང་རི་རབ་འབྲི༔ གསེར་རི་རོལ་མཚོ་གླིང་བཞི་འགོད༔ ལྕགས་རི་ནག་པོ་རྒྱ་མཚོས་བསྐོར༔ དེ་དག་མཛེས་པའི་ཚོན་གྱིས་བསྒྱུར༔ དབུས་སུ་མཉྫིའི་ཁྲིའུ་ཁར༔ ཟངས་ལྕགས་སྣོད་དུ་འབྲུ་ནག་བཤོས༔ དཔལ་གཏོར་ཤ་ཁྲག་བརྒྱན་པ་བཤམས༔ རྩེ་ལ་བྱ་ཁྱུང་ཙཀ་ལི་ལ༔ བསྙེན་སྔགས་གསེར་གྱིས་བྲིས་པ་བཙུགས༔ དར་དམར་གུར་ཕུབ་མཛེས་པར་བཤམས༔ གཞན་ཡང་ཕྱི་ནང་མཆོད་ཚོགས་བཀྲམ༔ རྣལ་འབྱོར་བདེ་བའི་གདན་ལ་འདུག༔ སྐྱབས་སེམས་གཏོར་འབུལ་ཕྲིན་ལས་བཅོལ༔ སྔགས་ཀྱིས་སྦྱངས་ཤིང་བགེགས་རྣམས་བསྐྲད༔ ཀུན་ཁྱབ་མི་དམིགས་སྟོང་པའི་ངང་༔ རིན་ཆེན་རི་རབ་རྩེ་མོ་ནས༔ དཔག་བསམ་ཤིང་གི་རྩ་བ་ན༔ རང་རིག་ལྕགས་སྒོང་ཁྲོཾ་དུ་གྱུར༔ འོད་ཟེར་འཕྲོས་པས་གདོན་བགེགས་བསྐྲད༔ སེམས་ཅན་རྣམས་ཀྱི་སྒྲིབ་པ་སྦྱངས༔ སངས་རྒྱས་རྣམས་ལ་མཆོད་པ་ཕུལ༔ སྐུ་གསུང་ཐུགས་ཀྱི་བྱིན་རླབས་བསྡུས༔ ཁྲོཾ་ལ་ཐིམ་པས་ཡོངས་སུ་གྱུར༔ བདག་མདུན་དཔལ་ཆེན་གྷ་རུ་ཌཱ༔ ལྕགས་ཀྱི་ལུས་ལ་མེ་གཤོག་རྡེབ༔ ལྕགས་ཀྱི་མཆུ་ལ་དུང་གི་མཆེ༔ རྭ་ནི་གནམ་ལྕགས་རྡོ་རྗེའི་སྡེར༔ དབུ་ལ་ནོར་བུ་འབར་བས་བརྒྱན༔ སྤུ་ལས་རྡོ་རྗེའི་ཚྭ་ཚྭ་འཐོར༔ ཀླུ་དང་ས་བདག་ཞལ་དུ་གསོལ༔ ཀྲང་ཀྲང་ཀྲིང་ཀྲིང་སྒྲ་སྒྲོག་བསྒོམ༔ འོད་ཟེར་སྤྲོ་ཞིང་ཡེ་ཤེས་བསྟིམ༔ ཕྱག་དང་མཆོད་བསྟོད་ལ་སོགས་བྱ༔ བདག་མདུན་དཔལ་ཆེན་གྷ་རུ་ཌཱའི༔ ཐུགས་ཀར་ཉི་མའི་དཀྱིལ་འཁོར་སྟེང་༔ ལྕགས་སྒོང་ཁྲོཾ་གྱིས་མཚན་པའི་མཐར༔ རྩ་སྒྲུབ་བསྙེན་པས་བསྐོར་བར་བསམ༔ བསྙེན་པ་བཟླས་པས་སྔགས་འབྲུ་འཁོར༔ འོད་ཟེར་འཕྲོ་འདུའི་སྦྱོར་བ་ཡིས༔ སྡང་བྱེད་དགྲ་དང་གནོད་བྱེད་བགེགས༔ ཁྱད་པར་ས་བདག་ཀླུ་གཉན་རྣམས༔ རང་དབང་མེད་པར་དབང་དུ་བསྡུས༔ ཟིལ་གྱིས་མནན་ཅིང་རྡུལ་དུ་བརླགས༔ ཤ་ཁྲག་དོན་སྙིང་ཁྲུམ་ཁྲུམ་གསོལ༔ གཟི་བརྗིད་ནུས་མཐུ་དྲག་རྩལ་རྒྱས༔ ཆེ་བཙན་འགྲན་ཟླ་མེད་པར་བསྒོམ༔ ཨཱོཾ་ཁྲོཾ་གྷ་རུ་ཌཱ་ཙ་ལེ་ཙ་ལེ་ཧཱུྃཕཊ༔ འབུམ་ཚོ་གསུམ་གྱི་གྲངས་ཐེམས་ན༔ ཀླུ་དང་ས་བདག་དབང་དུ་འདུ༔ ལྔ་བདུན་བཅུ་ལ་སོགས་པ་ཡིས༔ དབང་དྲག་འཕྲིན་ལས་ཐོགས་མེད་ཅིང་༔ སྒྲ་ཐོས་དྲི་ཚོར་རླུང་གིས་རེག༔ ས་བདག་ཀླུ་གཉན་འབོག་ཅིང་བརྒྱལ༔ དེ་ཚེ་རྟགས་ཀྱི་རིམ་པ་ནི༔ རབ་དངོས་འབྲིང་ཉམས་རྨི་ལམ་དུ༔ ཞལ་མཇལ་སྐུ་རུ་གྱུར་བའམ༔ རྒྱ་མཚོ་རྔུབ་དང་རི་བྲག་བཤིགས༔ སྦལ་སྦྲུལ་ཟོས་དང་སྡོམ་སྡིག་བསད༔ མེ་ཆེན་འབར་དང་ནམ་མཁར་འཕུར༔ དེ་སོགས་རྟགས་ནི་སྣ་ཚོགས་འབྱུང་༔ ས་མ་ཡཱ༔ རྒྱ་རྒྱ་རྒྱ༔ ཐུན་སྐབས་རྣམས་སུ་མཆོད་ཅིང་བསྟོད༔ བསྙེན་སྒྲུབ་རྟགས་ཐེམས་སྒྲུབ་རྫས་ལས༔ དབང་བླང་ལྷར་གསལ་རང་ལ་བསྟིམ༔ བསྐྱེད་རིམ་བསྡུ་ཞིང་རྫོགས་རིམ་བསྒོམ༔ དགེ་བ་བསྔོ་ཞིང་སྨོན་ལམ་འདེབས༔ ས་མ་ཡཱ༔ རྒྱ་རྒྱ་རྒྱ༔ བསྟོད་པ་ནི༔ ཧཱུྃ༔ ཁྲཾོ་ལས་གྱུར་པ་ཁྲོ་བོའི་རྒྱལ༔ ས་བདག་ཀླུ་གཉན་རྣམས་ཀྱི་གཤེད༔ སངས་རྒྱས་ཀུན་གྱི་མཐུ་སྟོབས་འཛིན༔ གྷ་རུ་ཌ་ལ་ཕྱག་འཚལ་བསྟོད༔ བྱ་ཁྱུང་ནག་པོའི་སྒྲུབ་ཐབས་འདི༔ གུ་རུ་རྗེ་ཡི་བཀའ་བཞིན་དུ༔ མཚོ་རྒྱལ་བདག་གིས་ཡི་གེར་བྲིས༔ རིན་ཆེན་ས་ལ་གཏེར་དུ་སྦས༔ ཐུགས་སྲས་སྦས་ཚུལ་འགྲོ་བ་འདྲེན༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀཱིརྟིས་ཤངས་ཟབ་བུ་ལུང་གི་བར་སྒོ་ནས། ཤིང་ཡོས་ལ་སྤྱན་དྲངས་ཤིང་། ལྕགས་བྱ་ལ་གུ་རུ་རིན་པོ་ཆེའི་སྒྲུབ་གནས་ཁམས་སྲིང་མོ་རྫོང་གི་ཆགས་རུ་ཕུག་ནག་བདེ་བ་ཆེན་པོ་རྡོ་རྗེའི་ཀེ་ཚང་དུ་ཤོག་སེར་ལས་བོད་ཡིག་ཏུ་བསྒྱུར་བའོ། མངྒཱ་ལཾ།