བྱ་ཁྱུང་བསྟོད་བསྐུལ་དྲེགས་པ་སྙིང་འབྱིན།
ཟབ་ཆོས་པདྨ་དྲག་ཁྲོས་ལས༔ བྱ་ཁྱུང་བསྟོད་བསྐུལ་དྲེགས་པ་སྙིང་འབྱིན་བཞུགས༔ དྲག་པོ་རྩལ་ལ་ཕྱག་འཚལ་ལོ༔ བདག་ཉིད་པདྨ་དྲག་རྩལ་གྱི༔ སྤྱི་བོའི་བྱ་ཁྱུང་གྷ་རུ་ཌ༔ དྲག་ཏུ་ཁྲོས་ཤིང་གཤོག་པ་བརྡབས༔ ཀྲང་ཀྲང་ཀྲིང་ཀྲིང་སྒྲ་སྒྲོག་པས༔ ཁྱུང་ལས་ཁྱུང་འཕྲོས་སྟོང་གསུམ་གང་༔ དགྲ་འདྲེ་བྱད་མ་རྦོད་གཏོང་དང་༔ ས་བདག་ཀླུ་གཉན་མ་ལུས་པ༔ ཐལ་བའི་རྡུལ་བཞིན་བརླགས་པར་བསམས༔ གཏོར་མ་བྱིན་བརླབས་སྨན་རཀ་སྦྲན༔ རོལ་མོ་འཁྲོལ་ཞིང་འདི་ལྟར་བསྐུལ༔ ཧཱུྃ་ཁྲོཾ་བྷྱོ༔ ང་ནི་པདྨ་དྲག་པོ་རྩལ༔ ཁམས་གསུམ་མ་ལུས་དབང་དུ་སྡུད༔ སྲིད་གསུམ་མ་ལུས་ཟིལ་གྱི་གནོན༔ དྲེགས་པའི་ལྷ་འདྲེ་རྡུལ་དུ་བརླག༔ སྤྲུལ་པ་བྱ་ཁྱུང་ཕོ་ཉར་འགྱེད༔ ཁྲོཾ་ལས་གྱུར་པའི་གྷ་རུ་ཌ༔ རྭ་ནི་གནམ་ལྕགས་རྡོ་རྗེའི་མཆུ༔ ལྕགས་ཀྱི་སྡེར་མོ་དུང་གི་མཆེ༔ མེ་ཡི་གཤོག་པ་སྤུ་གྲིའི་སྒྲོ༔ བྱ་ཁྱུང་རྒྱལ་པོ་གསོལ་ལོ་མཆོད༔ དེ་རིང་དྲག་པོའི་ལས་ལ་བསྐུལ༔ འབོད་དོ་བྱ་ཁྱུང་སྙན་མ་བསྲ༔ གཡབ་བོ་བྱ་ཁྱུང་སྤྱན་མ་བརྟུལ༔ བརྟེན་ནོ་བྱ་ཁྱུང་རྒྱང་མ་རིང་༔ བསྐུལ་ལོ་བྱ་ཁྱུང་བང་མ་བུལ༔ རྦད་དོ་བྱ་ཁྱུང་མཐུ་མ་ཆུང་༔ ཧཱུྃ་ཁྲོཾ་བྷྱོ༔ གནམ་ལྕགས་རྭ་གཉིས་གདེངས་པའི་ཚེ༔ ཁམས་གསུམ་ཀུན་ཀྱང་ཉིལ་ལི་ལི༔ རྡོ་རྗེའི་མཆུ་ཡི་རྐན་བརྡབས་ཚེ༔ སྟོང་གསུམ་ཀུན་ཀྱང་ཁྲག་མཚོར་འཁྱིལ༔ སྤྱན་ནས་ཁྲག་གི་རྦ་ཀློང་འཕྱོ༔ སྲིད་གསུམ་ཀུན་ཀྱང་འབོག་ཅིང་བརྒྱལ༔ ཀྲང་ཀྲང་ཀྲིང་ཀྲིང་སྒྲ་སྒྲོགས་པས༔ ཀླུ་དང་ས་བདག་སྙིང་རྩ་འདྲེན༔ ལྕགས་ཀྱི་སྡེར་མོ་བགྲད་པ་ཡིས༔ ཚངས་པ་ལྷ་ཡི་ཡུལ་ས་འཁྱོམ༔ སྤུ་གྲིའི་གཤོག་པ་བརྡབས་པ་ཡིས༔ གཟའ་ཀླུ་རྒྱལ་བསེན་གཞོབ་ཏུ་བསྲེག༔ བྱ་ཁྱུང་ལུས་ཀྱི་སྤུ་སྤྲུགས་པས༔ དྲག་མེ་རྡོ་རྗེའི་ཚ་ཚ་འཁྲུག༔ ཐུགས་དམ་བསྐུལ་ལོ་འཕྲིན་ལས་མཛོད༔ སྤྲུལ་པའི་ཁྱུང་ཆེན་དུས་ལ་བབས༔ ཀླུ་དང་ས་བདག་རྡུལ་དུ་རློག༔ བཅོལ་བའི་འཕྲིན་ལས་གྲུབ་པར་མཛོད༔ ས་མ་ཡཱ༔ རྒྱ༔ འདི་ལྟར་བསྐུལ་ཞིང་རྦད་པ་ཡིས༔ གཟའ་ཀླུ་ས་བདག་བཟློག་ཅིང་བསྲེག༔ གོང་དུ་བྱ་ཁྱུང་བསྙེན་སྒྲུབ་བསྐྱལ༔ དེ་ནས་ནམ་དགོས་ལས་ལ་སྦྱར༔ འཕྲིན་ལས་མ་ལུས་ཀུན་འགྲུབ་འགྱུར༔ ཅེས་སོ་ཡིད་ཀྱི་བརྣག་པ་མཛོད༔ ཤིན་ཏུ་གསང་ལ་ཚགས་དམ་གྱིས༔ འཆལ་ན་གཏེར་སྲུང་འཁུ་བཟློག་འོང་༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀིརྟིས་ཤངས་ཟབ་བུ་ལུང་གི་བར་སྒོ་ནས་ཤིང་ཡོས་ལ་གདན་དྲངས་ཤིང་། ལྕགས་བྱ་ལ་ཤོག་སེར་ལས་ཞལ་བཤུས་པའོ།། །།མངྒཱ་ལཾ། །