འཇམ་དཔལ་སྐུའི་སྒྲུབ་ཐབས་གསེར་གྱི་རྡོ་རྗེ།
ཟབ་ཆོས་པདྨ་དྲག་ཁྲོས་ལས༔ འཇམ་དཔལ་སྐུའི་སྒྲུབ་ཐབས་གསེར་གྱི་རྡོ་རྗེ་བཞུགས༔ དྲག་པོ་རྩལ་ལ་ཕྱག་འཚལ་ལོ༔ དུར་ཁྲོད་ནགས་ཚལ་དབེན་གནས་སུ༔ མཎྜལ་དྲི་བཟང་ཆག་ཆག་གདབ༔ ཐིག་གདབ་འཁོར་ལོ་རྩིབས་བཞི་འབྲི༔ རྡོ་རྗེ་མེ་རི་རང་མདོག་བསྐོར༔ འཁོར་ལོ་རྩིབས་བཞི་སེར་པོས་བྱུག༔ དབུས་སུ་མུཉྫིའི་ཁྲིའུ་ཁར༔ རྒྱས་པའི་གཏོར་མ་གྲུ་བཞི་བཤམས༔ འཇམ་དཔལ་གཤིན་རྗེའི་ཙཀ་ལི་ལ༔ གསེར་གྱིས་སྙིང་པོ་བྲིས་པ་གཟུག༔ དར་སེར་གུར་ཕུབ་མཛེས་པར་བྱ༔ གཡས་གཡོན་སྨན་གཏོར་རཀྟ་དང་༔ ཐ་མར་མཆོད་པ་རྣམ་ལྔས་བསྐོར༔ རང་ཉིད་བདེ་བའི་གདན་ལ་འདུག༔ སྐྱབས་སེམས་སྔོན་བཏང་གཏོར་མ་འབུལ༔ དཀར་ཕྱོགས་སྐྱོང་ལ་འཕྲིན་ལས་བཅོལ༔ ནག་ཕྱོགས་གདོན་བགེགས་སྦྱང་ཞིང་བསྐྲད༔ བསྲུང་བའི་འཁོར་ལོ་དྲག་ཏུ་བསྒོམ༔ དེ་ནས་སྐད་ཅིག་དྲན་རྫོགས་སུ༔ ཆོས་རྣམས་མི་དམིགས་སྟོང་པར་བསྒོམ༔ སྟོང་པའི་ངང་ལས་རང་རིག་ཨཱོཾ༔ སེར་ནག་མདངས་དང་ལྡན་པར་བསྒོམ༔ འོད་ཟེར་འཕྲོས་པས་རྒྱལ་བ་མཆོད༔ སེམས་ཅན་རྣམས་ཀྱི་སྒྲིབ་པ་སྦྱངས༔ གདོན་བགེགས་འབྱུང་པོ་ཚར་བཅད་ཅིང་༔ སྐུ་ཡི་ལྷ་ཚོགས་སྐུ་གསུང་ཐུགས༔ བྱིན་རླབས་ནུས་མཐུ་ཐུགས་རྗེའི་དཔལ༔ མ་ལུས་ཐམས་ཅད་དབང་བསྡུས་ནས༔ ཨཱོཾ་ཡིག་ལ་ཐིམ་གཟི་བརྗིད་འབར༔ སྐད་ཅིག་གནས་གྱུར་དྲན་རྫོགས་སུ༔ འཇམ་དཔལ་སེར་ནག་ཁྲོ་བོའི་སྐུ༔ དོར་སྟབས་ཐོད་དབྱུག་འཁོར་ལོ་བསྣམས༔ དབུ་སྐྲ་ཁམ་ནག་རྩེ་བྲན་སྤྲས༔ གླང་ཆེན་མི་ལྤགས་སྟག་ཤམ་དང་༔ སྦྲུལ་དང་ཐོད་ཕྲེང་ཐལ་བས་བྱུག༔ ཞག་དང་ཁྲག་གི་ཐིག་ལེས་བརྒྱན༔ པདྨ་ཉི་ཟླའི་གདན་ལ་འགྱིང་༔ རིན་ཆེན་འབྱུང་ལྡན་དབུ་ལ་བརྒྱན༔ སྣང་སྟོང་ངང་དུ་ལྷམ་མེར་བསྒོམ༔ ཡེ་ཤེས་སྤྱན་དྲངས་མཆོད་བསྟོད་བྱ༔ བདག་མདུན་འཇམ་དཔལ་ཁྲོ་བོའི་རྒྱལ༔ ཐུགས་ཀར་གསེར་གྱི་འཁོར་ལོའི་སྟེང་༔ ཐུགས་སྲོག་ཨཱོཾ་གྱི་ཐ་མ་ལ༔ གསང་སྒྲུབ་སྔགས་ཀྱི་ཕྲེང་བས་བསྐོར༔ འོད་ཟེར་སྤྲོ་བསྡུ་ཡང་ཡང་ངང་༔ རང་ཉིད་ཁྲོ་རྒྱལ་མངོན་སུམ་གྱུར༔ སྐུ་ཡི་དངོས་གྲུབ་ཀུན་ཐོབ་བསམས༔ ཨཱོཾ་ཡ་མཱནྟ་ཀ་མཉྫུ་ཤྲཱི་ཧཱུྃ་ཕཊ༔ འབུམ་ཚོ་གཅིག་གཉིས་གསུམ་ལ་སོགས༔ གང་ཟག་དབང་པོའི་ན་རིམ་དང་༔ བརྩོན་འགྲུས་ལ་སོགས་སྐབས་བསྟུན་བཟླས༔ དེ་ཚེ་བྱིན་རླབས་ཐོབ་པའི་རྟགས༔ རབ་དངོས་འབྲིང་ཉམས་ཐ་མ་ལ༔ ཞལ་མཇལ་གསུང་ཐོས་ཉི་ཟླ་ཤར༔ དུང་འབུད་དར་འཕྱར་གཏེར་རྙེད་འཕུར༔ རལ་གྲི་འཁོར་ལོ་པོ་ཏི་རྙེད༔ དགེ་བའི་ལྟས་མང་འཆར་བ་དང་༔ མི་རྟོག་ཡེ་ཤེས་ཤེས་རབ་འབར༔ འཇམ་དཔལ་གཤིན་རྗེ་གྲུབ་པའི་རྟགས༔ ས་མ་ཡཱ༔ རྒྱ་རྒྱ་རྒྱ༔ བསྙེན་ཅིང་བསྒྲུབ་པའི་ཐུན་སྐབས་སུ༔ ཕྱི་ནང་གསང་མཆོད་གཞུང་ལྟར་འབུལ༔ བསྟོད་པའི་རིམ་པས་འདི་ལྟར་བསྟོད༔ ཧཱུྃ༔ སྐུ་མཆོག་འགྱུར་བ་མེད་པའི་ལྷ༔ རྒྱལ་བ་རྣམས་ཀྱིས་དབང་བསྐུར་ཞིང་༔ མཁྱེན་བརྩེ་ནུས་མཐུ་མཐར་སོན་པའི༔ ཁྲོ་རྒྱལ་མཆོག་ལ་ཕྱག་འཚལ་བསྟོད༔ ཅེས་བསྟོད་བསྙེན་སྒྲུབ་རྟགས་ཐོན་ནས༔ སྒྲུབ་རྫས་རང་གི་གནས་གསུམ་གཏུགས༔ དབང་བཞི་བླང་ཞིང་གསོལ་བ་གདབ༔ ཡི་གེ་བརྒྱ་པས་ལྷག་ཆད་བསྐང་༔ ཙཀ་ལི་དར་དྲིལ་བླ་རྡོར་བཅང་༔ ཡེ་ཤེས་སེམས་དཔའ་དབྱིངས་སུ་གཤེགས༔ དམ་ཚིག་རང་གི་ལུས་ལ་བསྡུ༔ སྔགས་ཕྲེང་ས་བོན་ཨཱོཾ་ལ་བསྟིམ༔ ཐིག་ལེ་ནཱ་དར་དམིགས་མེད་ཡལ༔ མ་བཅོས་ངང་ལ་ལྷང་ངེར་བསྐྱང་༔ རང་བྱུང་ངང་ལ་རྗེན་ནེར་བསྐྱང་༔ མི་དམིགས་ངང་ལ་ལྷུག་གེར་བསྐྱང་༔ ས་མ་ཡཱ༔ རྒྱ་རྒྱ་རྒྱ༔ འཇམ་དཔལ་སྐུ་ཡི་སྒྲུབ་ཐབས་འདི༔ མ་ཚོར་རྡོ་རྗེ་གསང་ཕུག་ཏུ༔ སློབ་དཔོན་ཆེན་པོས་བདག་ལ་གནང་༔ ཁོ་མོས་ཤོག་སེར་ལོགས་ལ་བཏབ༔ མ་འོངས་དོན་དུ་གཏེར་དུ་སྦས༔ ལས་འཕྲོ་ཅན་དང་འདི་འཕྲད་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀཱིརྟིས་ཤངས་ཟབ་བུ་ལུང་གི་བར་སྒོ་ཧཱུྃ་རྒྱ་བྲག་ནས་ཤིང་ཡོས་ལ་སྤྱན་དྲངས་ཤིང་། ལྕགས་བྱ་ལ་ཤོག་སེར་ལས་བོད་ཡིག་ཏུ་བསྒྱུར་བའོ། །མངྒ་ལཾ། །