ལས་བྱང་འཕྲིན་ལས་ལྷུན་གྲུབ།

ཟབ་ཆོས་པདྨ་དྲག་ཁྲོས་ལས༔ ལས་བྱང་འཕྲིན་ལས་ལྷུན་གྲུབ་བཞུགས༔ ཐོད་ཕྲེང་རྩལ་ལ་ཕྱག་འཚལ་བསྟོད༔ དུར་ཁྲོད་ནགས་འདབ་རི་བོའི་སུལ༔ དྲག་པོའི་འཕྲིན་ལས་བསྒྲུབ་པའི་སར༔ དུར་ཁྲོད་ས་རྡོར་སྟེགས་བུ་བཟོ༔ དུག་དང་ཁྲག་གིས་ཆག་ཆག་གདབ༔ རོ་སོལ་ནག་པོས་ཁ་དོག་བསྒྱུར༔ ཐིག་ནས་དྲངས་ཤིང་དཀྱིལ་འཁོར་བྲི༔ མཛེས་པའི་ཚོན་གྱིས་ལེགས་པར་བྱུག༔ ཡང་ན་འབྲུ་ཡི་ཚོམ་བུ་ནི༔ ལྷ་ཡི་གྲངས་དང་མཉམ་པར་བཀོད༔ དབུས་སུ་དཔལ་གཏོར་བརྗིད་ལྡན་བཤམས༔ གཡས་གཡོན་སྨན་རག་བྷནྡྷར་བཀྲམ༔ མདུན་དུ་ཚོགས་ཀྱི་འཁོར་ལོ་དང་༔ ཐ་མར་མཆོད་པ་སྣ་ཚོགས་བཀོད༔ རྣལ་འབྱོར་བདེ་བའི་གདན་ལ་འདུག༔ སྐྱབས་སེམས་བཏང་ཞིང་སྨན་རག་སྦྲེང་༔ གཏོར་ཚོགས་མཆོད་པ་བྱིན་གྱིས་བརླབ༔ བགེགས་གཏོར་བསྔོ་བ་འདི་སྐད་དོ༔ ཧཱུྃ༔ ང་ནི་པདྨ་དྲག་པོའི་སྐུ༔ ཉོན་ཅིག་ལན་ཆགས་སྡེ་བརྒྱད་བགེགས༔ འདོད་ཡོན་ཆངས་བུ་འདི་སྣོམས་ལ༔ གསང་བའི་གནས་འདིར་མ་འདུག་པར༔ རང་རང་སོ་སོའི་ཡུལ་དུ་དེང་༔ བཀའ་ལས་འདས་ན་བརླག་པར་བྱེད༔ དེ་བས་མྱུར་དུ་ཕྱིར་དེངས་ཤིག༔ ཨ་ཡ་མ་དུ་རུ་ཙ་ཤ་ན་གནོད་བྱེད་འབྱུང་པོ་མཱ་ར་ཡ་ཧཱུྃ་ཧཱུྃ་ཕཊ༔ མཚམས་གཅོད་པ་ནི༔ ཧཱུྃ༔ ཐོད་ཕྲེང་དྲག་པོའི་ཐུགས་ཀ་ནས༔ སྤྲུལ་པའི་འོད་ཟེར་གློག་ལྟར་འཁྱུག༔ ཁྲོ་བོ་ཁྲོ་མོ་སྐར་ལྟར་འཕྱོ༔ ཡེ་ནས་དག་པའི་གཞལ་ཡས་འདིར༔ གདོན་བགེགས་འབྱུང་པོ་མཚམས་ཆོད་ཅིག༔ བྷྲཱུྃ་བཛྲ་རཀྵ་རཀྵ་ཧཱུྃ་ཕཊ༔ ལྷ་བསྐྱེད་པ་ནི༔ ཧཱུྃ༔ ཆོས་རྣམས་གདོད་ནས་རྣམ་པར་དག༔ བྱང་ཆུབ་སེམས་ཀྱི་ཆོ་འཕྲུལ་ལས༔ བརྩེ་བའི་སྙིང་རྗེ་རྒྱུ་རུ་ཤར༔ རྡོ་རྗེ་ཧཱུྃ་གིས་མཚན་པར་བསམ༔ ཨེ་འཕྲོས་སྟོང་ཉིད་ནམ་མཁའི་ཀློང་༔ ཡཾ་འཕྲོས་རྒྱ་གྲམ་རླུང་གི་སྟེང་༔ ར་འཕྲོས་རཀྟའི་རྦ་ཀློང་འཁྲུག༔ སུམ་འཕྲོས་ཞིང་ཆེན་ས་གཞི་བརྡལ༔ ཀེཾ་འཕྲོས་རུས་པའི་རི་རབ་འཇིགས༔ རཾ་འཕྲོས་མེ་དཔུང་དམར་ནག་འབར༔ བྷྲཱུྃ་འཕྲོས་དྲག་པོའི་གཞལ་ཡས་ཁང་༔ ཧཱུྃ༔ མི་མགོ་སྐམ་རློན་རྩིག་པས་གཏམས༔ གནམ་ལྕགས་ཁྲོ་ཆུ་ཞུན་མས་བསྡམས༔ ཀླུ་ཆེན་བརྒྱད་ཀྱི་ཀ་གདན་སྟེང་༔ གཟའ་ཆེན་བརྒྱད་ཀྱི་ཀ་བ་བཙུགས༔ ཉི་ཟླ་འབར་བའི་ཀ་གཞུས་བརྒྱན༔ ལྷ་ཆེན་བརྒྱད་ཀྱི་གདུང་མ་བྲེས༔ རྒྱུ་སྐར་ཉེར་བརྒྱད་དྲལ་ཕྱམ་ཚགས༔ ཐོག་ནི་ཞིང་ཆེན་ལྤགས་པས་འཇིམ༔ རྡོ་རྗེའི་རྭ་ཐེམ་གནམ་ལྕགས་སྒོ༔ ཐོད་སྐམ་ཕྲེང་བའི་བ་གམ་མཛེས༔ ནང་རོལ་དྲ་ཕྱེད་ཙིཏྟའི་ཕོད༔ མི་ལྤགས་ཞིང་གི་འཕན་གདུགས་བརྒྱན༔ རྟ་བབས་ཆོས་འཁོར་གདུགས་ཏོག་མཐོ༔ ཧཱུྃ༔ དུར་ཁྲོད་དྲག་པོའི་ཕོ་བྲང་དབུས༔ གྲུ་གསུམ་དམར་ནག་འབར་བའི་དཀྱིལ༔ སྡེ་བརྒྱད་རྒྱལ་བསེན་བསྣོལ་བའི་སྟེང་༔ བསྐལ་པའི་མེ་རི་སྨུག་ནག་ཀློང་༔ པདྨ་དྲག་པོ་ཁྲོས་པའི་སྐུ༔ དབུ་དགུ་ཕྱག་ནི་བཅོ་བརྒྱད་དེ༔ ཞབས་བརྒྱད་བརྐྱང་བསྐུམ་དོར་སྟབས་བགྲད༔ གཡས་གསུམ་ཁྲོ་འཛུམ་དཀར་བའི་ཞལ༔ སྟེང་གི་ལྷ་རྣམས་འདུལ་བར་བྱེད༔ གཡོན་གསུམ་སྔོན་པོ་ཁྲོ་བོའི་ཞལ༔ འོག་གི་ཀླུ་རྣམས་ཟིལ་གྱིས་གནོན༔ དབུས་གསུམ་དམར་ནག་རྔམ་བརྗིད་འབར༔ སྡེ་བརྒྱད་སྲིན་པོ་རྡུལ་དུ་བརླག༔ གཡས་དགུ་གྲི་གུག་རྡོ་རྗེ་གྲི༔ མེ་དཔུང་རླུང་ནག་རཀྟའི་མཚོ༔ རི་རབ་ལྕགས་ཀྱུ་ཞགས་པ་བསྣམས༔ གཡོན་དགུ་ཐོད་ཁྲག་ཉི་ཟླ་དང་༔ རྩེ་གསུམ་ཐོང་གཤོལ་རྔེའུ་ཆུང་༔ དྲིལ་བུ་ལྕགས་སྒྲོག་སྡིག་པ་འཛིན༔ དབུ་སྐྲ་ཁམ་ནག་གྱེན་ལ་སྒྲེང་༔ སྨ་ར་སྨིན་མ་མེ་འོད་འབར༔ ཐོད་སྐམ་དབང་གི་རྩེ་བྲན་སྤྲས༔ རྡོ་རྗེ་རིན་ཆེན་གཤོག་པ་གདེང་༔ གསེར་གྱི་རྡོ་རྗེའི་གོ་ཁྲབ་གསོལ༔ དུར་ཁྲོད་འཇིགས་པའི་ཆས་བརྒྱད་བརྒྱན༔ ཧཱུྃ༔ ཡུམ་མཆོག་ཕག་མོ་མཐིང་ནག་འཁྲིལ༔ བརྐྱང་བསྐུམ་གྲི་ཐོད་ཕག་སྐད་སྒྲོག༔ སྐྲ་གྲོལ་རུས་རྒྱན་པྲོག་ཞུ་ལྡན༔ དུར་ཁྲོད་ཆས་ལྡན་གཟི་བརྗིད་འབར༔ ཡབ་ཡུམ་སྐུ་ལ་བདེ་སྟོང་རྫོགས༔ ཧཱུྃ༔ སྤྱི་གཙུག་རིགས་བདག་དམར་པོ་ནི༔ མཉམ་གཞག་ཚེ་བུམ་ལོངས་སྤྱོད་རྫོགས༔ སངས་རྒྱས་ཀུན་གྱི་བདག་ཉིད་ཅན༔ གཟི་བརྗིད་མདངས་དང་ལྡན་པར་བསྐྱེད༔ ཧཱུྃ༔ དཔྲལ་བར་གཤིན་རྗེ་སེར་ནག་ཁྲོ༔ གཡས་གཡོན་ཐོད་དབྱུག་འཁོར་ལོ་བསྣམས༔ མགྲིན་པར་དབང་ཆེན་རྟ་སྐད་འབྱིན༔ གཡས་གཡོན་རྡོ་རྗེ་དྲིལ་བུ་འཛིན༔ ཐུགས་ཀར་རྡོ་རྗེ་གཏུམ་པོ་མཐིང་༔ རྡོ་རྗེ་གཡས་ལ་སྡིགས་མཛུབ་གཡོན༔ ཀུན་ཀྱང་ཁྲོ་གཏུམ་དཔའ་ལ་སྒེག༔ དུར་ཁྲོད་ཆས་ལྡན་དོར་སྟབས་འགྱིང་༔ ལྟེ་བར་མཁའ་འགྲོ་སྡེ་ལྔ་ནི༔ རང་རྟགས་གྲི་ཐོད་གར་སྟབས་འཁྲབ༔ དཀར་སེར་དམར་ལྗང་རུས་པས་བརྒྱན༔ གསང་གནས་ཡཀྴ་མེ་དབལ་སྨུག༔ གཡས་གཡོན་ཐོ་བ་ཞགས་པ་བསྣམས༔ དུར་ཁྲོད་ཆས་ལྡན་དོར་སྟབས་བགྲད༔ སྟེང་གི་མཁའ་ལ་བྱ་ཁྱུང་ལྡིང་༔ ལྕགས་རྭ་གསེར་མིག་མེ་གཤོག་བརྡེབ༔ ཀླུ་དང་ས་བདག་གཤེད་མར་བསྒོམ༔ ཧཱུྃ༔ ཕྱི་རིམ་འཁོར་ལོའི་རྩིབས་བཞི་ལ༔ བཛྲ་རཏྣ་པདྨ་དང་༔ ཀརྨ་རྡོ་རྗེ་དྲག་པོ་རྩལ༔ ཀུན་ཀྱང་ཞལ་གཅིག་ཕྱག་གཉིས་པ༔ གཡས་པས་རང་རྟགས་གཡོན་སྡིག་པ༔ སྐུ་ལ་དྲག་པོའི་ཆས་རྣམས་རྫོགས༔ རིགས་བཞི་དྲག་པོ་ཁྲོས་པའི་སྐུ༔ བརྐྱང་བསྐུམ་དོར་སྟབས་ལྡན་པར་བསྐྱེད༔ ཧཱུྃ༔ དེ་ཡི་ཕྱི་རིམ་རྩིབས་བཅུ་ལ༔ ཕྱོགས་སྐྱོང་ཁྲོ་ཆེན་འབར་བ་བཅུ༔ མཐིང་ནག་རྡོ་རྗེ་ཐོད་ཁྲག་ཅན༔ རབ་འཇིགས་ཁྲོ་ཆས་ལྡན་པར་བསྐྱེད༔ ཧཱུྃ༔ དྲག་པོའི་ཕོ་བྲང་སྒོ་བཞི་རུ༔ སེང་གདོང་སྟག་གདོང་ཁྱུང་གདོང་མ༔ ཕག་གདོང་ཕྲ་མེན་མཁའ་འགྲོ་བཞི༔ གཡས་རྣམས་ལྕགས་ཀྱུ་ཞགས་པ་དང་༔ ལྕགས་སྒྲོག་དྲིལ་བུ་ནམ་མཁར་འཕྱར༔ གཡོན་རྣམས་ཐོད་ཁྲག་ཐུགས་ཀར་བསྐྱིལ༔ དཀར་སེར་དམར་ལྗང་མདངས་དང་ལྡན༔ ཁྲོ་མོའི་ཆས་གསོལ་འཇིགས་པར་བསྐྱེད༔ སྤྱན་འདྲེན་པ་ནི༔ རོལ་མོ་འཁྲོལ་ཏེ༔ རྐང་གླིང་དང་གསུར་ཆེན་གྱི་དུད་པ་བཏང་ཞིང་༔ ཧཱུྃ༔ ཉི་མ་ལྷོ་ནུབ་རྔ་ཡབ་གླིང་༔ ལངྐ་མགྲིན་བཅུ་སྲིན་པོའི་ཡུལ༔ ཟངས་མདོག་དཔལ་རིའི་རྩེ་མོ་ནས༔ དྲག་མེ་དམར་ནག་འཁྲུག་པའི་ཀློང་༔ ཤ་ཁྲག་རྒྱ་མཚོ་མུ་མཐའ་མེད༔ ཐོད་མཁར་འབར་བའི་ཕོ་བྲང་ནས༔ པདྨ་དྲག་པོ་ཁྲོས་པའི་སྐུ༔ ཁྲོ་བོ་ཁྲོ་མོ་སྐར་ལྟར་འཁྲུག༔ སྤྲུལ་པ་ཡང་སྤྲུལ་གློག་ལྟར་འཁྱུག༔ གནས་འདིར་སྤྱན་འདྲེན་གཤེགས་སུ་གསོལ༔ ཆོས་ཀྱི་དབྱིངས་ཀྱི་ཕོ་བྲང་ནས༔ སྐུ་ཡི་ལྷ་ཚོགས་གཤེགས་སུ་གསོལ༔ དབང་ཆེན་རོལ་པའི་དུར་ཁྲོད་ནས༔ གསུང་གི་ལྷ་ཚོགས་གཤེགས་སུ་གསོལ༔ ལྕང་ལོ་ཅན་ཀྱི་ཕོ་བྲང་ནས༔ ཐུགས་ཀྱི་ལྷ་ཚོགས་གཤེགས་སུ་གསོལ༔ ཡོན་ཏན་སྣ་ཚོགས་ཕོ་བྲང་ནས༔ མ་བརྒྱུད་མཁའ་འགྲོ་གཤེགས་སུ་གསོལ༔ འཕྲིན་ལས་ཐོགས་མེད་གཞལ་ཡས་ནས༔ ཡཀྴ་མེ་དབལ་གཤེགས་སུ་གསོལ༔ ཧཱུྃ༔ ཞེ་སྡང་མེ་ལྟར་འབར་བ་ནས༔ རྡོ་རྗེ་དྲག་པོ་གཤེགས་སུ་གསོལ༔ ང་རྒྱལ་རི་ལྟར་ཉིལ་བ་ནས༔ རཏྣ་དྲག་པོ་གཤེགས་སུ་གསོལ༔ འདོད་ཆགས་ཆུ་ལྟར་འཁྲུག་པ་ནས༔ པདྨ་དྲག་པོ་གཤེགས་སུ་གསོལ༔ ཕྲག་དོག་རླུང་ལྟར་འཚུབ་པ་ནས༔ ཀརྨ་དྲག་པོ་གཤེགས་སུ་གསོལ༔ གཏི་མུག་མུན་ལྟར་གཏིབས་པ་ནས༔ བྷུདྡྷ་དྲག་པོ་གཤེགས་སུ་གསོལ༔ སྟེང་འོག་ཕྱོགས་བཞི་མཚམས་བརྒྱད་ནས༔ འབར་བའི་ཁྲོ་བཅུ་གཤེགས་སུ་གསོལ༔ བཀའ་ཉན་ཕྲ་མེན་དྷཀྐིའི་ཚོགས༔ བྲན་གཡོག་འཁོར་བཅས་གཤེགས་སུ་གསོལ༔ བཞུགས་སུ་གསོལ་བ་ནི༔ ཧཱུྃ༔ གྲུ་གསུམ་འབར་བ་དྲག་པོའི་ཞིང་༔ ཐོད་མཁར་འབར་བའི་ཕོ་བྲང་དབུས༔ པདྨ་དྲག་པོའི་ལྷ་ཚོགས་རྣམས༔ གཉིས་སུ་མེད་པར་བཞུགས་སུ་གསོལ༔ བཛྲ་ས་མ་ཡཱ་ཛཿཧཱུྃ༔ བཾ་ཧོ་ཏིཥྛ་ལྷན༔ ཕྱག་འཚལ་བ་ནི༔ ཧཱུྃ༔ སངས་རྒྱས་ཀུན་གྱི་སྐུ་གསུང་ཐུགས༔ གཉིས་མེད་ཡེ་ཤེས་རྒྱལ་བའི་སྲས༔ པདྨ་དྲག་པོའི་ལྷ་ཚོགས་ལ༔ གུས་པའི་ཡིད་ཀྱིས་ཕྱག་འཚལ་ལོ༔ ཨ་ལ་ལ་ཏེ་པཱུ་ཙ་ཧོ༔ ཕྱི་མཆོད་ནི༔ ཧཱུྃ༔ དྲག་པོ་པདྨའི་ལྷ་ཚོགས་ལ༔ མེ་ཏོག་དྲི་ཞིམ་བདུག་པའི་སྤོས༔ སྣང་གསལ་སྒྲོན་མེ་དྲི་བཟང་ཆབ༔ ཞལ་ཟས་རོ་མཆོག་རྔ་གླིང་དུང་༔ མཆོད་པ་འབུལ་ལོ་བཞེས་སུ་གསོལ༔ ཨཱོཾ་བཛྲ་པུཥྤེ་དྷཱུ་པེ་ཨཱ་ལོ་ཀེ་གྷནྡྷེ་ནཻ་ཝི་ཏྱ་ཤཔྟ་པཱུ་ཙ་ཧོ༔ ནང་མཆོད་ནི༔ ཧཱུྃ༔ དྲག་པོ་པདྨའི་ལྷ་ཚོགས་ལ༔ དབང་པོ་ལྔ་ཡི་མཆོད་པ་འབུལ༔ ཤ་ཆེན་རྣམ་ལྔའི་མཆོད་པ་འབུལ༔ བདུད་རྩི་ལྔ་ཡི་མཆོད་པ་འབུལ༔ དུག་གསུམ་སྐུ་གསུང་ཐུགས་ལ་མཆོད༔ དུག་ལྔ་ཡེ་ཤེས་ལྔ་རུ་བཞེས༔ མ་ཧཱ་མཾ་ས་ཙིཏྟ་ཙཀྵུ་བྷ་སུ་ཏ་པཉྩ་ལ་ཁ་རཾ་ཁཱ་ཧི༔ གསང་མཆོད་ནི༔ ཧཱུྃ༔ དྲག་པོ་པདྨའི་ལྷ་ཚོགས་ལ༔ ཡབ་ཡུམ་སྦྱོར་བའི་བྱང་ཆུབ་སེམས༔ དཀར་དམར་འདྲེས་པའི་ཀུནྡ་འདི༔ མཆོད་པར་འབུལ་ལོ་དགྱེས་པར་བཞེས༔ བདེ་སྟོང་བླ་མེད་དངོས་གྲུབ་སྩོལ༔ ཨཱོཾ་བྷོ་དྷི་ཙིཏྟ་ཧཱུཾ༔ སྨན་མཆོད་ནི༔ ཧཱུྃ༔ དྲག་པོ་པདྨའི་ལྷ་ཚོགས་ལ༔ གདོད་ནས་དག་པའི་ཨ་མྲྀ་ཏ༔ རང་བྱུང་བདུད་རྩིའི་མཆོད་པ་འབུལ༔ བཞེས་ནས་མཆོག་ཐུན་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི༔ རཀྟ་འབུལ་བ་ནི༔ ཧཱུྃ༔ དྲག་པོ་པདྨའི་ལྷ་ཚོགས་ལ༔ ཞིང་བཅུ་བསྒྲལ་བའི་རཀྟ་དང་༔ ཟུང་འཇུག་སྦྱར་བའི་སིནྡྷུ་ར༔ རྒྱུ་དྲུག་བསྒྲལ་བའི་མུ་ལ་དང་༔ གཏར་དང་གཞུར་བའི་ཁྲག་སྣས་མཆོད༔ མ་ཧཱ་རཀྟ་ལ་ཁཱ་རཾ་ཁཱ་ཧི༔ གཏོར་མ་འབུལ་བ་ནི༔ ཧཱུྃ༔ དྲག་པོ་པདྨའི་ལྷ་ཚོགས་ལ༔ བྷནྡྷ་ཡངས་པའི་གཏོར་གཞོང་དུ༔ དགྲ་བགེགས་ཤ་ཁྲག་དཔལ་བཤོས་བཙུགས༔ འབྲུ་བཅུད་རྐྱེན་སྦྱར་བདུད་རྩིས་སྦྲན༔ བྷ་ལིང་མཆོད་པ་བཞེས་སུ་གསོལ༔ མ་ཧཱ་བྷ་ལིང་ཏ་ལ་ཁ་རཾ་ཁཱ་ཧི་ཁཱ་ཧི༔ བསྟོད་པ་བྱ་བ་ནི༔ ཧཱུྃ༔ རྒྱལ་བའི་སྤྱི་གཟུགས་དབང་དྲག་རྫོགས༔ པདྨ་དྲག་རྩལ་ཁྲོས་པའི་སྐུ༔ ཁམས་གསུམ་གཡོ་ཞིང་སྲིད་གསུམ་འདར༔ ཐོད་ཕྲེང་རྩལ་ལ་ཕྱག་འཚལ་བསྟོད༔ བདེ་སྟོང་འབར་བའི་གཞལ་ཡས་ནས༔ དགའ་བཞིའི་ཡེ་ཤེས་མཆོད་པའི་ཡུམ༔ སངས་རྒྱས་ཀུན་གྱི་གསང་བ་འཛིན༔ རྡོ་རྗེ་ཕག་མོར་ཕྱག་འཚལ་བསྟོད༔ རིགས་བདག་དབང་གི་དཀྱིལ་འཁོར་ནས༔ ཆགས་མེད་ཚེ་དང་ཡེ་ཤེས་ལྷ༔ སྣང་བ་མཐའ་ཡས་ཆོས་ཀྱི་སྐུ༔ འོད་དཔག་མེད་ལ་ཕྱག་འཚལ་བསྟོད༔ འགྱུར་མེད་སྐུ་ཡི་གཞལ་ཡས་ནས༔ སྐུ་ཡི་ལྷ་ལ་ཕྱག་འཚལ་བསྟོད༔ ཆགས་མེད་གསུང་གི་ཕོ་བྲང་ནས༔ གསུང་གི་ལྷ་ལ་ཕྱག་འཚལ་བསྟོད༔ འཁྲུལ་མེད་ཐུགས་ཀྱི་དཀྱིལ་འཁོར་ནས༔ ཐུགས་ཀྱི་ལྷ་ལ་ཕྱག་འཚལ་བསྟོད༔ ཡོན་ཏན་ལྷུན་གྱིས་གྲུབ་པ་ནས༔ མ་བརྒྱུད་ལྷ་ལ་ཕྱག་འཚལ་བསྟོད༔ འཕྲིན་ལས་ཐོགས་པ་མེད་པ་ནས༔ ཕོ་ཉའི་ཚོགས་ལ་ཕྱག་འཚལ་བསྟོད༔ དུག་ལྔ་གནས་གྱུར་ཧེ་རུ་ཀ༔ དྲག་པོ་རིགས་བཞིར་ཕྱག་འཚལ་བསྟོད༔ ཡེ་ཤེས་སྤྲུལ་པས་ཕྱོགས་བཅུ་སྐྱོང་༔ ཁྲོ་བོ་བཅུ་ལ་ཕྱག་འཚལ་བསྟོད༔ བཀའ་ཉན་འགུགས་འཆིང་སྡོམ་དགྱེས་རོལ༔ ཕྲ་མེན་སྒོ་མ་བཞི་ལ་བསྟོད༔ གང་འདུལ་ཚུལ་སྟོན་ས་བདག་འདུལ༔ གྷ་རུ་ཌ་ལ་ཕྱག་འཚལ་བསྟོད༔ ཨཱོཾ་ཨཱཿཧཱུྃ་ཨརྩིག་ནེརྩིག་ན་མོ་བྷ་ག་ཝ་ཏེ་ཧཱུྃ་ཕཊ༔ ཨ་ཡ་མ་དུ་རུ་ཙ་ཤ་ན་ས་མ་ཡ་བྷྱོ་ཟློག༔ ཅེས་དམིགས་པ་གསལ་ཞིང་བསྙེན་བསྒྲུབ་བསྐྱང་༔ བདུད་རྩིས་ཚོགས་བསང་འདི་སྐད་དོ༔ ཧཱུྃ༔ འབར་བ་དབང་གི་དཀྱིལ་འཁོར་འདིར༔ དྲག་པོའི་འོད་ཟེར་འཕྲོ་འདུའི་རྩལ༔ བཟའ་བཏུང་ཚོགས་ཀྱི་འཁོར་ལོར་ཕོག༔ མ་དག་སྦྱངས་ཤིང་བདུད་རྩིར་སྤེལ༔ ཨཱོཾ་ཨཱཿཧཱུྃ༔ ཚོགས་ཕུད་སྤྲོ་ཞིང་༔ ཧཱུྃ༔ དྲག་པོ་པདྨའི་ལྷ་ཚོགས་ལ༔ ཞལ་ཟས་ཚོགས་ཀྱི་མཆོད་པ་འབུལ༔ དགྱེས་པ་ཆེན་པོས་བཞེས་ནས་ཀྱང་༔ མཆོག་དང་ཐུན་མོང་དངོས་གྲུབ་སྩོལ༔ བཤགས་པ་ནི༔ ཧཱུྃ༔ དྲག་པོ་ཁྲོས་པའི་ལྷ་ཚོགས་དགོངས༔ ཉམས་ཆགས་འགལ་འཁྲུལ་ཅི་མཆིས་པ༔ ཚོགས་ཀྱི་མཆོད་པས་མཐོལ་ལོ་བཤགས༔ གཉིས་མེད་ཚངས་པའི་དངོས་གྲུབ་སྩོལ༔ སྒྲལ་མཆོད་ནི༔ ཧཱུྃ༔ པདྨ་དྲག་རྩལ་ཁྲོས་པའི་སྐུ༔ སྐུ་གསུང་ཐུགས་ཀྱི་དཀྱིལ་འཁོར་ནས༔ དྲག་པོའི་སྤྲུལ་པས་སྟོང་གསུམ་གང་༔ ལས་བྱེད་ཚོགས་ཀྱིས་སྲིད་གསུམ་གཡོ༔ དགྲ་བགེགས་ཐལ་བ་རྡུལ་དུ་རློགས༔ དགྲ་བགེགས་ཤ་ཏྲུཾ་མཱ་ར་ཡ་ཧཱུྃ་ཕཊ༔ སྟབ་པ་ནི༔ ཧཱུྃ༔ སྡང་བྱེད་དགྲ་དང་གནོད་བྱེད་བགེགས༔ དྲག་པོའི་ཤུགས་ཀྱིས་བསྒྲལ་བ་ཡི༔ དབང་པོ་དོན་སྙིང་ཤ་ཁྲག་རུས༔ པདྨ་དྲག་རྩལ་ལྷ་ཚོགས་ཀྱི༔ ཞལ་དུ་སྟབ་བོ་བཞེས་སུ་གསོལ༔ ཁ་རཾ་ཁཱ་ཧི་ཁཱ་ཧི༔ འབགས་ལྷག་སྦྲན་ཏེ༔ ཧཱུྃ༔ པདྨ་དྲག་རྩལ་བཀའ་འཁོར་ནས༔ ཕྲ་མེན་མཁའ་འགྲོ་རྒྱ་མཚོའི་ཚོགས༔ བཀའ་ཡི་ཕམ་ཕབས་ལྷག་མ་ལོང་༔ བཅོལ་བའི་འཕྲིན་ལས་གྲུབ་པར་མཛོད༔ བཛྲ་རཏྣ་པདྨ་ཀརྨ་ཌཱཀྐི་ནི་ཁཱ་ཧི་ཁཱ་ཧི༔ ཆད་ཐོ་ནི༔ ཧཱུྃ༔ སྔོན་ཚེ་བསྐལ་པའི་དང་པོ་ལ༔ ཟབ་ལུང་མ་ཚོར་གསང་ཕུག་ཏུ༔ རིག་འཛིན་རྡོ་རྗེ་ཐོད་ཕྲེང་གིས༔ པདྨ་དྲག་པོའི་སྐུར་བསྟན་ནས༔ དམ་སྲིན་སྡེ་བརྒྱད་དབང་དུ་བསྡུས༔ ལྷ་སྲིན་དྲེགས་པ་བྲན་དུ་བཀོལ༔ སྲོག་སྙིང་ཕུལ་ནས་སྲུང་མར་བསྐོས༔ སྔོན་གྱི་དམ་བཅའ་རྗེས་དགོངས་ལ༔ ཤ་ཁྲག་དམར་གྱི་གཏོར་མ་བཞེས༔ རྗེས་འཇུག་རྣལ་འབྱོར་བུ་བཞིན་སྐྱོངས༔ སངས་རྒྱས་བསྟན་སྲུངས་འཕྲིན་ལས་སྒྲུབས༔ ནད་གདོན་བགེགས་དང་བར་ཆད་ཟློག༔ བཅོལ་བའི་འཕྲིན་ལས་གྲུབ་པར་མཛོད༔ བསྟན་མ་སྐྱོང་བ་ནི༔ ཧཱུྃ༔ འདིར་གཤེགས་བསྟན་སྐྱོང་སྲུང་མ་རྣམས༔ ཚོགས་ལྷག་བཤལ་ཆུའི་གཏོར་མ་འདི༔ དམ་ཚིག་བཀའ་ཡི་ཟས་ཡིན་ཕྱིར༔ སྔོན་གྱི་དམ་བཅའ་རྗེས་དགོངས་ལ༔ དགྱེས་པ་ཆེན་པོའི་མདངས་ཀྱིས་བཞེས༔ བསྟན་པ་སྐྱོངས་ལ་གང་ཟག་སྲུངས༔ བཅོལ་བའི་འཕྲིན་ལས་གྲུབ་པར་མཛོད༔ པཉྩ་ཨ་མྲྀ་ཏ་ལ་ཁཱ་ཧི་ཁཱ་ཧི༔ བྲོ་བརྡུང་བ་ནི༔ ཧཱུྃ༔ དབང་དྲག་ཁྲོས་པའི་དཀྱི་འཁོར་འདིར༔ རྡོ་རྗེ་ཁྲོས་པའི་བྲོ་བརྡུངས་པས༔ དགྲ་བགེགས་འབྱུང་པོ་དམ་སྲིའི་ཚོགས༔ རྡུལ་ཕྲན་བཞིན་དུ་བརླག་པར་མཛོད༔ ཧཱུྃ་ཧཱུྃ་ལཾ་ལཾ་སྟཾ་བྷ་ཡ་ནན༔ གཤེགས་གསོལ་ནི༔ ཧཱུྃ༔ ཡང་གསང་ཁྲོས་པ་དྲག་པོའི་ལྷ༔ ཤེས་བྱའི་རེ་བ་བསྐངས་ནས་ཀྱང་༔ སྐྱེ་མེད་ཀློང་དུ་གཤེགས་སུ་གསོལ༔ དམ་ཚིག་ལྷ་ཚོགས་རང་ལ་བསྡུ༔ དམིགས་མེད་བློ་འདས་རང་བབས་སྐྱོང་༔ བསྔོ་བ་སྨོན་ལམ་ནི༔ ཧཱུྃ༔ པདྨ་དྲག་པོའི་ལྷ་ཚོགས་ལ༔ བསྒོམ་བསྒྲུབ་མཆོད་བསྟོད་ཕུལ་བའི་མཐུས༔ ཐམས་ཅད་སངས་རྒྱས་འཐོབ་པར་ཤོག༔ དབང་དང་དྲག་པོའི་ཕྲིན་ལས་ཀྱིས༔ མཆོག་ཐུན་དཔལ་ལ་སྤྱོད་གྱུར་ཅིག༔ བཀྲ་ཤིས་ནི༔ ཧཱུྃ༔ ཆོས་དབྱིངས་རོལ་པ་ཆེན་པོ་ནས༔ ཕྲིན་ལས་འགྲོ་བའི་དོན་དུ་སྤྲུལ༔ མཆོག་དང་ཐུན་མོང་ཀུན་གྱི་བདག༔ རྩ་བ་གསུམ་གྱི་བཀྲ་ཤིས་ཤོག༔ རང་ལུས་བསྲུང་ཞིང་རྒྱུན་སྤྱོད་བྱ༔ ས་མ་ཡཱ༔ རྒྱ་རྒྱ་རྒྱ༔ སྤྲང་བན་དྷེས་ཤངས་ཟབ་བུ་ལུང་གི་བར་སྒོ་ནས་ཤིང་ཡོས་ལ་སྤྱན་དྲངས་ཤིང་། ལོ་བདུན་གསང་དམ་གྱི་ཁོངས་ནས་སྐལ་ལྡན་ཙན་སྒོ་ལྷ་བཟོ་ཡབ་སྲས་ཀྱིས་བཀའ་ནན་གྱིས་བསྐུལ་ངོར་ལྕགས་བྱ་ལ་ཤོག་སེར་ལས་བོད་ཡིག་ཏུ་ཕབ་པའོ། །སངས་རྒྱས་ཀུན་གྱི་ཡེ་ཤེས་སྤྱི་ཡི་གཟུགས། །པདྨ་ཐོད་ཕྲེང་དབང་དྲག་ཁྲོས་པའི་སྐུར། །བཞེངས་ནས་མི་བསྲུན་དྲེགས་པའི་སྙིང་འབྱིན་པ། །གང་གི་མཆོད་ཕྲིན་པར་དུ་བཞེངས་པའི་དགེས། །བསྟན་འགྲོར་འཚེ་བའི་བདུད་དཔུང་གཡུལ་ཕམ་ནས། །རྒྱལ་བསྟན་འཕེལ་ཞིང་རྒྱས་པའི་སྙན་གྲགས་ཀྱི། །རྔ་སྒྲ་ཚངས་ཆེན་ཞིང་དུ་ཁྱབ་པ་དང་། །འགྲོ་ཀུན་ཟབ་དོན་སྙིང་པོ་རྟོགས་པར་ཤོག །ཅེས་པར་བྱང་སྨོན་ལམ་འདི་པདྨའི་མིང་ཅན་གྱིས་སོ། །མངྒ་ལཾ།། །།