ཐུགས་དམ་བསྐུལ་ཆོག་དགྲ་བགེགས་ཀུན་འདུལ།
ཟབ་ཆོས་པདྨ་ཁྲོས་ལས༔ ཐུགས་དམ་བསྐུལ་ཆོག་དགྲ་བགེགས་ཀུན་འདུལ་བཞུགས༔ ཐོད་ཕྲེང་རྩལ་ལ་ཕྱག་འཚལ་ལོ༔ དྲག་པོ་པདྨའི་རྣལ་འབྱོར་པས༔ དགྲ་བགེགས་གནོད་པ་བཟློག་སྒྱུར་དོན༔ ཐུགས་དམ་དབྱིངས་ནས་བསྐུལ་བ་ནི༔ དགྲ་བགེགས་བསྒྲལ་བའི་ཤ་ཁྲག་རུས༔ གཏོར་མར་འབུལ་ཞིང་འདི་སྐད་དོ༔ ཧཱུྃ༔ ང་ནི་པདྨ་ཧེ་རུ་ཀ༔ ང་ནི་བདུད་རྣམས་ཡོངས་ཀྱི་གཤེད༔ ང་ནི་བགེགས་རྣམས་ཡོངས་ཀྱི་དགྲ༔ ང་ནི་སྲིད་གསུམ་ཡོངས་ཀྱི་བདག༔ ང་ལས་ཆེ་བཙན་སུ་ཡང་མེད༔ ཧཱུྃ༔ དབུ་དགུ་ཕྱག་ནི་བཅོ་བརྒྱད་འབར༔ དྲག་ཏུ་ཁྲོས་པ་གཏུམ་པའི་སྐུ༔ གནམ་ས་བར་སྣང་ཁྱབ་ཅིང་འཁྲུག༔ ཞལ་གདངས་སྤྱན་ལྡོག་ཁྲོ་གཉེར་ཅན༔ ཕྱག་མཚན་མཚོན་ཆས་གདུག་བྱེད་སྒྲོལ༔ དྲག་པོའི་མཆེ་གཙིགས་སྲོག་ལ་བརྔམ༔ བདུད་དཔུང་སྒྲོལ་ཞིང་རྐན་སྒྲ་རྡེབ༔ གདོན་བགེགས་འབྱུང་པོ་རྡུལ་དུ་རློག༔ ཁྲོ་རྒྱལ་ཡབ་ཡུམ་ཐུགས་དམ་བསྐུལ༔ ཤ་ཁྲག་དམར་གྱི་གཏོར་མ་བཞེས༔ ཐུགས་དམ་དབང་གིས་འཕྲིན་ལས་མཛོད༔ ཧཱུྃ༔ ཁྲོ་བོ་ཆེན་པོའི་དཀྱིལ་འཁོར་ནས༔ སྐུ་ལ་དྲག་པོའི་ལྷ་ཚོགས་རྫོགས༔ དུང་ཁང་འབར་བའི་གཞལ་ཡས་ནས༔ ཡ་མཱནྟ་ཀའི་ཐུགས་དམ་བསྐུལ༔ ལོངས་སྤྱོད་འཁོར་ལོའི་གཞལ་ཡས་ནས༔ ཧྱ་གྷྲཱི་བའི་ཐུགས་དམ་བསྐུལ༔ ཆོས་ཀྱི་དབྱིངས་ཀྱི་གཞལ་ཡས་ནས༔ བཛྲ་པཱ་ཎིའི་ཐུགས་དམ་བསྐུལ༔ ཡོན་ཏན་སྤྲུལ་པའི་གཞལ་ཡས་ནས༔ དྷཀྐི་སྡེ་ལྔའི་ཐུགས་དམ་བསྐུལ༔ འཕྲིན་ལས་དྲག་པོའི་གཞལ་ཡས་ནས༔ ཡཀྴ་མེ་དབལ་ཐུགས་དམ་བསྐུལ༔ རིགས་བདག་འབར་བའི་གཞལ་ཡས་ནས༔ ཨ་མི་དྷེ་ཝའི་ཐུགས་དམ་བསྐུལ༔ སྤྱི་གཙུག་སྟེང་གི་ནམ་མཁའ་ནས༔ བྱ་ཁྱུང་རྒྱལ་པོའི་ཐུགས་དམ་བསྐུལ༔ ཤར་ལྷོ་ནུབ་བྱང་གཞལ་ཡས་ནས༔ རིགས་བཞི་དྲག་པོའི་ཐུགས་དམ་བསྐུལ༔ སྟེང་འོག་ཕྱོགས་བཞི་མཚམས་བརྒྱད་ནས༔ ཁྲོ་བོ་བཅུ་ཡི་ཐུགས་དམ་བསྐུལ༔ བཀའ་ཉན་ལས་བྱེད་ད་ལ་ནས༔ སྒོ་མ་བཞི་ཡི་ཐུགས་དམ་བསྐུལ༔ སྤྲུལ་པ་ཡང་སྤྲུལ་གཞལ་ཡས་ནས༔ ཆོས་སྐྱོང་སྲུང་མའི་ཐུགས་དམ་བསྐུལ༔ ཤ་ཁྲག་དམར་གྱི་གཏོར་མ་བཞེས༔ སྔོན་གྱི་ཐུགས་དམ་དུས་ལ་བབས༔ བསྟན་པ་བཤིག་པའི་དགྲ་དང་བགེགས༔ མྱུར་དུ་སོད་ལ་དྲག་ཏུ་སྒྲོལ༔ ཁུག་ཅིག་དྲོངས་ཤིག་དབང་དུ་སྡུས༔ མྱོས་པར་མཛོད་ལ་རྡུལ་དུ་རློག༔ བཅོལ་བའི་འཕྲིན་ལས་གྲུབ་པར་མཛོད༔ ཅེས་བརྗོད་ལིང་རོ་གཏོར་མར་འབུལ༔ ལྷ་ཚོགས་སྤྲུལ་པ་ཡང་སྤྲུལ་གྱིས༔ དགྲ་བགེགས་གནོད་བྱེད་དབང་དུ་སྡུས༔ རྡུལ་དུ་བརླག་པའི་ལས་མཛད་བསམས༔ ས་མ་ཡཱ༔ འདི་ལྟར་དྲག་པོའི་འཕྲིན་ལས་བསྐུལ༔ དུས་མིན་གང་ཐོད་མི་བྱ་བར༔ བསྟན་དགྲ་བར་ཆད་ནམ་སྡང་དུས༔ དྲག་པོའི་གཏོར་མས་བཟློག་ཅིང་སྒྱུར༔ ཐུགས་དམ་བསྐུལ་ཆོག་འདི་འབད་ཅིང་༔ གཏོར་མ་མི་མཐུན་དགྲ་ལ་འཕེན༔ བརྩམས་པའི་འཕྲིན་ལས་ཐོགས་མེད་འགྲུབ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀཱིརྟིས་ཤངས་ཟབ་བུ་ལུང་ནས་གདན་དྲངས་པའོ།། །།མངྒ་ལཾ། །