ཆར་འབེབས་རྒྱ་མཚོ་ཁ་འབྱེད།
ཟབ་ཆོས་པདྨ་དྲག་ཁྲོས་ལས༔ ཆར་འབེབས་རྒྱ་མཚོ་ཁ་འབྱེད་བཞུགས༔ ཐོད་ཕྲེང་རྩལ་ལ་ཕྱག་འཚལ་ལོ༔ མ་འོངས་དུས་ཀྱི་རྣལ་འབྱོར་པས༔ སེམས་ཅན་ཀུན་ལ་ཕན་པའི་ཕྱིར༔ ཆར་པ་འབེབས་ན་འདི་ལྟར་བྱ༔ ཀླུ་གནས་ཆུ་མིག་གཉན་པོར་ཕྱིན༔ རང་ཉིད་ཡི་དམ་ལྷ་རུ་བསྒོམ༔ ཕྱོགས་བཞིར་སྐྱེར་ཕུར་བཞི་གདབ་ཅིང་༔ ཛཿཧཱུྃ་བཾ་ཧོ༔ ཨཾ་གུ་ཤ་ཛ༔ པ་ཤ་ཧཱུྃ༔ སྥོ་ཊ་བཾ༔ གྷནྡྷེ་ཧོ༔ ཨ་ཝེ་ཤ་ཡས་ཀླུ་ས་བདག༔ ཆུ་མིག་དེ་དང་གཉིས་མེད་བསམས༔ དེ་ནས་བཅའ་གཞི་འདི་ལྟར་བྱ༔ བ་དཀར་འོ་མས་བག་ཕྱེ་སྦྲུ༔ ཀླུ་སྨན་བཏབ་ཅིང་སྦལ་བཟུགས་བཟོས༔ སྐྱེར་པར་བྲུས་པའི་གཞོང་པར་གཞུག༔ དེ་སྟེང་ཟངས་གཞོང་ཆུ་དཀར་བཀང་༔ གཡམ་པ་བྱ་རོག་མས་བཀབ་ཅིང་༔ སྟེང་དུ་ཐིག་རྒྱབ་འདབ་བརྒྱད་འདྲི༔ ཡི་གེ་ཕུཿབརྒྱད་ཚོན་གྱིས་སྒྱུར༔ བག་ཕྱེར་བཟོས་པའི་སྦལ་གཟུགས་བརྒྱད༔ ཕྱོགས་བཞི་མཚམས་བཞིའི་པདྨར་འགོད༔ དབུས་སུ་ཀླུ་སྨན་ལྡན་པ་ཡི༔ དཀར་གྱི་གཏོར་མ་རྒྱན་ལྡན་བཤམས༔ གཞི་བདག་རྣམས་ལ་གཙང་གཏོར་འབུལ༔ བདེན་པ་བདར་ཞིང་འཕྲིན་ལས་བཅོལ༔ གནོད་བྱེད་བགེགས་ལ་ཆངས་བུ་སྦྱིན༔ སྔགས་ཀྱིས་བསྐྲད་ཅིང་སྲུང་འཁོར་བསྒོམ༔ ལས་གཞུང་བསྲང་ཞིང་ཚོགས་འཁོར་བསྐོར༔ མདུན་བསྐྱེད་ཀླུ་ཡི་ཕོ་བྲང་ནང་༔ ཀླུ་རྣམས་ཐམས་ཅད་བཀུག་པར་བསམས༔ བདེན་སྟོབས་བརྗོད་ཅིང་ཕྱག་རྒྱས་བསྟིམ༔ སྔོ་སྒོག་བཙོང་དང་ལ་ཕུག་སོགས༔ ཤ་ཁྲག་ལ་སོགས་ཁ་ཟས་སྤང་༔ དེ་ནས་ཀླུ་རྒྱལ་འཁོར་བཅས་ཀྱིས༔ བཀའ་ཉན་ལས་བསྒྲུབ་ཆར་ཕབ་བསམས༔ ཏིང་འཛིན་ངང་ནས་སྔགས་འདི་བཟླ༔ ཨཱོཾ་ཨཱཿཧཱུྃ་ནཱ་ག་ཕུ་རཱ་ཛཿཕུ་ཏྲིག་ཏྲག་རཱ་ཛ་ལི་ཆར་ཕོབ་ཧཱུྃ་ཧཱུྃ༔ ཉིན་རེ་བཞིན་དུ་སྟོང་རེ་བཟླས༔ ཐུན་སྐབས་ཀླུ་གཏོར་ཀླུ་མཆོད་ཅིང་༔ ཀླུ་འབུམ་ལ་སོགས་སྒྲོག་པར་བྱ༔ སྐབས་སྐབས་སྤྲིན་སྡུད་སྔགས་འདི་འདོན༔ ཨཱོཾ་ནཱ་ག་ར་ཛ་ཙིཏྟ་ཕུ་ཏིང་སར་རུ་ཏིང་ཧྲིང་ཛཿཛཿསྤྲིན་སྡུས་སྭཱ་ཧཱ༔ རླུང་གིས་གནོད་ན་འདི་ལྟར་བྱ༔ དཀར་པོའི་དར་ལ་རླུང་ལྷ་ནི༔ ཤ་བ་ཉལ་དང་རུ་དར་སྒྲིལ༔ ཉམས་པའི་གཟུགས་བྲིས་ཐ་མ་ལ༔ ཧཱུྃ༔ རླུང་མ་རི་ཤ་ཀུ་རི་ན་ཡ་དུ་ནི་རི་ན་ཁེར༔ འབྱུང་བ་རླུང་ཆོད༔ ཅེས་བྲིས་དགུག་གཞུག་ལེགས་པར་བྱ༔ རེ་བས་དྲིལ་ཞིང་ཉལ་མལ་འོག༔ གྲུ་གསུམ་བྲུས་པའི་ནང་དུ་གཞུག༔ རྒྱ་གྲམ་བྲིས་པའི་གཡམ་པས་བཀབ༔ ཡུངས་ཀར་ཡུངས་ནག་ཀེ་ཚེ་ལ༔ སྔགས་བཟླས་ཐུན་སྐབས་ཐུན་གྱིས་བྲབ༔ ཨཱོཾ་ཡམ་རི་བྷ་ན་ཤི་རི་ཐུམ་ཐུམ་བྷནྡྷ་ཚིནྡྷ་སྟམ་བྷ་ཡ་ནན༔ འདིས་ནི་བསྐལ་པའི་རླུང་ཡང་གཅོད༔ ས་མ་ཡཱ༔ རྒྱ་རྒྱ་རྒྱ༔ འདི་ལྟར་ལས་ལ་འབད་པའི་ཚེ༔ སྤྲིན་འདུ་ཟངས་གཞོང་རླངས་པ་འོང་༔ དེ་ཚེ་གླང་མའི་མེ་ནར་འབུད༔ དུད་པ་མ་ཆད་ཙམ་དུ་བྱ༔ ཆར་ནི་དར་ལ་དྲག་པ་འབྱུང་༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀིརྟིས་ཟབ་བུ་ལུང་ནས་གདན་དྲངས་པའོ། མངྒ་ལཾ། །