ལས་ཚོགས་ཆར་པ་འབེབས་ཐབས།
ཟབ་ཆོས་པདྨ་དྲག་ཁྲོས་ལས༔ ལས་ཚོགས་ཆར་པ་འབེབས་ཐབས་བཞུགས༔ ཐོད་ཕྲེང་རྩལ་ལ་ཕྱག་འཚལ་བསྟོད༔ པདྨ་དྲག་པོའི་རྣལ་འབྱོར་པས༔ གཞན་དོན་འགྲོ་ལ་སེམས་བསྐྱེད་ནས༔ རྫས་ཀྱིས་ཆར་པ་འབེབས་པའི་ཐབས༔ གཙོད་ཁྲག་ཡུགས་སའི་རཀྟ་དང་༔ གླ་རྩི་བཙན་དུག་མུ་ཟི་དང་༔ རྟ་བོན་ཤིང་ཀུན་རྣམ་པ་བདུན༔ ཆ་མཉམ་ཞིབ་བཏགས་རིལ་བུ་བྱ༔ སྨྱུག་ཚིགས་ནང་བླུག་སྤྲ་ཚིལ་བསྡམས༔ གཡག་རོག་སྙིང་རྩིད་སྐུད་པས་བཅིངས༔ ནཱ་ག་གནས་པའི་ཡུལ་དུ་ཕྱིན༔ གླ་རྩི་གུ་གུལ་མུ་ཟི་དང་༔ བཙན་དུག་སྦྲེ་དང་ཁྱི་སྤྱང་བྲུན༔ ཞིབ་པར་བསྣུར་ཞིང་དྲི་ཆུས་སྦྲུས༔ རང་གི་བུ་ག་དགུ་རུ་བྱུག༔ རྣ་བར་རྨ་བྱའི་སྒྲོ་མདོངས་གཟེར༔ བདེན་པ་བདར་ཞིང་བསྐྱེད་རིམ་བསྒོམ༔ གསེར་སྐྱེམས་མཆོད་ཅིང་ཆུ་མིག་སྦ༔ རྫས་ལ་ཆུ་ཡིས་རླན་ཤོར་ན༔ རང་ལ་ཙི་ཙི་ཛྭ་ལས་ཟིན༔ བརྩོན་འགྲུས་བརྩམས་པ་གནད་ཡིན་ནོ༔ འདི་དང་གཞུང་གི་ལས་ཚོགས་གཉིས༔ སྦྲན་ན་རྣོ་མྱུར་ཐོག་དང་འདྲ༔ ས་མ་ཡཱ༔ རྒྱ་རྒྱ་རྒྱ༔ ཡང་ཟབ་གནད་ཡིག་གདམས་པ་འདི༔ དུས་ཀྱི་ཐ་མ་རྩོད་ལྡན་དུས༔ བོད་ཡུལ་མཐའ་མི་ཧོར་གྱིས་འཛིན༔ རྟ་ཤ་ཟ་ཞིང་ལྷ་ནད་སྡང་༔ དུག་ལྔ་ཚང་བའི་ཁ་ཟས་ཤིག༔ དྲི་ལ་བཟའ་ཞིང་ནམ་མཁར་ཕུ༔ བོད་ཁམས་སྲུང་མ་བརྒྱལ་ཞིང་འབོག༔ རྩ་ལ་རྒྱུག་ཅིང་དབང་པོ་འཐོམ༔ དེ་ཡི་སྟོབས་ཀྱིས་རྒྱལ་ཁམས་མི༔ ཚེ་ཐུང་ནད་མང་ལྷ་སྲུང་འབྲོས༔ ཟག་པ་དྲི་ཆུ་ས་ལ་དོར༔ ཀླུ་དང་ས་བདག་གྲོང་ཁྱེར་ཉམས༔ འབྱུང་ནི་ནག་པོ་རྒྱ་ནས་འབྱུང་༔ དར་ནི་ཧོར་གྱི་ཡུལ་དུ་དར༔ ཟ་ནི་བོད་ཁམས་འགྲོ་བས་ཟ༔ དེ་ཡི་དབང་གིས་འཛམ་གླིང་འདིར༔ མི་ཕྱེད་ནམ་མཁའི་ཟེར་གྱིས་འགུམ༔ ཆར་ཆུ་མི་སྙོམས་སད་སེར་སྡང་༔ དུས་ངན་ཐ་མའི་ཟས་དེ་ལ༔ ཁ་ཟས་ནག་པོ་ཀུན་སྤྱོད་ཟེར༔ སྒོམ་སྒྲུབ་བྱེད་པས་འདི་ཟོས་ན༔ བསྐལ་བ་བརྒྱར་ཡང་ལྷ་མི་འགྲུབ༔ འཆི་བ་འོད་གསལ་ཆོས་ཀྱི་སྐུ༔ དབྱིངས་རིག་བར་དོའི་འོད་གསལ་འགག༔ ཐོས་བསམས་བྱེད་པས་འདི་ཟོས་ན༔ ཤེས་རབ་རླུང་འགག་གཏི་མུག་སྐྱེ༔ ཆགས་སྡང་འཕེལ་ཞིང་བསོད་ནམས་ཉམས༔ དེ་དུས་མི་ཐུབ་ལྔ་འབྱུང་བས༔ ཀུན་གྱི་ཁ་བསྡོམས་འདི་སྤོངས་ཤིག༔ འོན་ཀྱང་ལས་ངན་དབང་ཆེ་བས༔ པདྨ་བདག་ལ་མི་ཉན་དུས༔ བྱ་སླ་ཚེགས་ཆུང་མན་ངག་འདིས༔ ཆར་ཆུའི་སྒང་གཤོངས་བར་ཆད་སེལ༔ སེམས་བསྐྱེད་ངང་ནས་ལས་འདིར་བརྩོན༔ མ་འོངས་འགྲོ་ལ་ཕན་ཐོགས་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་ཟབ་བུ་ལུང་ནས་གདན་དྲངས་པའོ། །མངྒ་ལཾ།། །།ཧྂ༔