སེར་སྲུང་འཇིགས་མེད་གོ་ཆ།
ཟབ་ཆོས་པདྨ་དྲག་ཁྲོས་ལས༔ སེར་སྲུང་འཇིགས་མེད་གོ་ཆ་བཞུགས༔ ཐོད་ཕྲེང་རྩལ་ལ་ཕྱག་འཚལ་བསྟོད༔ མ་འོངས་ལྔ་བརྒྱའི་ཡང་མཐའ་ལ༔ གདོང་དམར་བོད་ཀྱི་རྒྱལ་ཁམས་འདིར༔ ཆོས་མིན་ཆོས་ལོག་སྣ་ཚོགས་དར༔ དམ་ཉམས་བཀའ་ལོག་མང་དུ་བྱེད༔ དམག་དང་མཚོན་ཆའི་འཁོར་ལོ་བསྐོར༔ དེ་དུས་དཀར་ཕྱོགས་སྲུང་མ་ཉམས༔ ནག་ཕྱོགས་འབྱུང་པོ་འུར་ཟིང་ལང་༔ དམ་སྲི་རྒྱལ་འགོང་ཟ་ཁ་དར༔ གདོན་བགེགས་འབྱུང་པོ་རླུང་ལྟར་འཚུབ༔ དེ་ཡི་དབང་གིས་བོད་ཁམས་འདིར༔ བདེ་བ་མེད་ཅིང་སྡུག་བསྔལ་ཆེ༔ ཁྱད་པར་བཙའ་སད་སེར་གསུམ་སྡང་༔ དེ་དུས་སེར་སྲུང་གདམས་པ་འདིས༔ མ་འོངས་འགྲོ་ལ་ཕན་ཐོགས་ཤོག༔ ས་མ་ཡཱ༔ རྒྱ་རྒྱ་རྒྱ༔ བསྙེན་སྒྲུབ་ཐེམས་པའི་རྣལ་འབྱོར་པས༔ སེང་ལྡེང་ངམ་ནི་སྐྱེར་ཕུར་ངོས༔ དྲག་སྒྲུབ་ལྷ་ཚོགས་བསྙེན་སྒྲུབ་བྲི༔ ཡུལ་ཕྱོགས་ཆེ་གེ་འདི་ཉིད་དུ༔ སེར་བའི་གནོད་པ་རཀྵ་འབྲི༔ དྲག་པོའི་དཀྱིལ་འཁོར་དབུས་སུ་བཞག༔ ཞིང་ཆེན་པགས་པའི་ཁུག་མའི་ནང་༔ ཡུངས་དཀར་བླུགས་པ་ཕུར་པར་བཏགས༔ མཆོད་གཏོར་བཤམས་ཤིང་ལས་གཞུང་བསྲང་༔ ཕུར་པ་ལྷ་ཚོགས་ཡབ་ཏུ་བསྐྱེད༔ ཡུངས་དཀར་ཁྲོ་མོ་ཡུམ་དུ་བསྐྱེད༔ དྲག་སྒྲུབ་གཞུང་ལྟར་བསྙེན་པ་བསྐྱལ༔ སྐབས་སྐབས་འདོད་གསོལ་ཤམ་བུ་སྦྱར༔ ཕུར་པ་ལྷ་ཚོགས་དངོས་སུ་བསྐྱེད༔ མཆོད་བསྟོད་བྱ་ཞིང་སེར་ཐོར་དགྲམ༔ བརྔན་མགྱོགས་བདེན་བརྡར་གསེར་སྐྱེམས་མཆོད༔ ས་མ་ཡཱ༔ རྒྱ་རྒྱ་རྒྱ༔ དེ་ནས་གདོང་བཟློག་བྱ་བ་ནི༔ ཐོར་ཁ་སྤྲིན་ལ་ལེགས་པར་བརྟག༔ ཐེ་ཚོམ་བྱུང་ནས་སྔགས་ཀྱིས་གཞོམ༔ མ་ནོན་སེར་བ་གཡོ་འདུག་ན༔ རང་ཉིད་པདྨ་དྲག་པོར་བསྒོམ༔ ཡུལ་ཁམས་ལྕགས་སྲེག་ས་གཞིར་བསམས༔ ལོ་ཏོག་ལྕགས་སྡིག་ནག་པོ་ལ༔ རྔམ་བརྗིད་ཡོམ་ཡོམ་ཤིགས་ཤིགས་གཡོ༔ སྡེ་བརྒྱད་ཀུན་གྱི་གཤེད་མར་བསམས༔ སེར་བ་འོང་བའི་ས་ཕྱོགས་སུ༔ རང་ཉིད་པདྨ་དྲག་པོའི་སྤྲུལ༔ ཁྱུང་དང་ཁྲོ་བོ་ཁྲོ་མོའི་ཚོགས༔ ནམ་མཁའ་བར་སྣང་ཁྱབ་པར་འཕྲོས༔ སེར་བ་གཏོར་བྱེད་ལྷ་སྲིན་རྣམས༔ བསད་བཅད་གཏུབས་ཏེ་ཤ་ཁྲག་ཟོས༔ ཐལ་བའི་རྡུལ་བཞིན་བརླགས་པར་བསྒོམས༔ ཡུངས་དཀར་ལ་སོགས་ཐུན་བརྡེག་ཅིང་༔ སེར་བ་སེར་བྱེད་སྣ་འདྲེན་དང་བཅས་པ༔ སྟཾ་བྷ་ཡ་ནན༔ ན་ཤ་ཡ༔ མཱ་ར་ཡ༔ ཧཱུྃ་རཾ་ཕཊ་རཾ་བྷྱོ་རཾ་ཏྲཀ་རཾ༔ བྷྱོ་བྷྱོ་ཟློག་ཟློག༔ སེར་བ་ཆོད༔ སྤྲིན་གཏོར་༔ སྣ་འདྲེན་སྒྲོལ༔ མཱ་ར་ཡ་ཛྭ་ལ་རཾ་རཾ་ཧཱུྃ་ཕཊ༔ རྩ་བའི་སྔགས་ལ་བཏགས་ནས་ཀྱང་༔ ཅེས་བཟླས་སྔགས་འཁོར་མེ་རླུང་གཡོས༔ སེར་བ་བཞུས་ཤིང་སེར་བདག་བརླགས༔ ཡང་ན་དགྲ་བོའི་ཡུལ་དུ་གཏོང་༔ ཆོད་ནས་སྡེ་བརྒྱད་བཤོས་བུས་མཆོད༔ ཡང་ན་བསངས་ཀྱིས་བརྔན་པར་བྱའོ༔ ས་མ་ཡཱ༔ རྒྱ་རྒྱ་རྒྱ༔ འདི་ནི་དྲག་སྔགས་སྙིང་ཞུན་ཏེ༔ ཤིན་ཏུ་རྣོ་མྱུར་དཔུང་དང་ལྡན༔ དེ་ཕྱིར་གཅེས་པས་སྙིང་ལ་ཆོངས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀིརྟིས་ཟབ་བུ་ལུང་ནས་གདན་དྲངས་པའོ། །མངྒཱ་ལཾ། །