ཁྱུང་གི་བཟློག་པ་ལྟས་ངན་ཀུན་འཇོམས།
ཟབ་ཆོས་པདྨ་དྲག་ཁྲོས་ལས༔ ཁྱུང་གི་བཟློག་པ་ལྟས་ངན་ཀུན་འཇོམས་བཞུགས༔ ཐོད་ཕྲེང་རྩལ་ལ་ཕྱག་འཚལ་ལོ༔ ཐོད་ཕྲེང་དྲག་པོའི་རྣལ་འབྱོར་པས༔ བཟློག་པའི་འཕྲིན་ལས་བརྩམས་པའི་ཚེ༔ ཁྱུང་ལས་ཁྱུང་འཕྲོས་སྟོང་གསུམ་གང་༔ གནོད་བྱེད་གདོན་བགེགས་ཀུན་བཟློག་ཅིང་༔ དྲག་པོའི་འཕྲིན་ལས་བསྒྲུབ་པར་བསམས༔ དགྲ་བོའི་ཤ་ཁྲག་གཏོར་མ་འབུལ༔ རོལ་མོ་འཁྲོལ་ཞིང་འདི་སྐད་དོ༔ ཧཱུྃ༔ ནམ་མཁའ་དབྱིངས་ཀྱི་ད་ལ་ནས༔ བྱ་ཁྱུང་རྒྱལ་པོ་གནས་འདིར་སྤྱོན༔ ཤ་ཁྲག་དམར་གྱི་གཏོར་མ་བཞེས༔ ཐུགས་དམ་བསྐུལ་ལོ་འཕྲིན་ལས་མཛོད༔ ཧཱུྃ༔ དྲག་པོའི་འཕྲིན་ལས་མཛད་པའི་ཚེ༔ འཁོར་དུ་བྱ་ཁྱུང་མང་པོས་བསྐོར༔ སྤྲུལ་པའི་ཁྱུང་ནི་ཐོག་ལྟར་འབེབས༔ ཡང་སྤྲུལ་ཁྱུང་གིས་དགྲ་སྲོག་གཅོད༔ གཉིས་མེད་སྤྲུལ་པས་དགྲ་བགེགས་ཟློག༔ རིགས་བཞིའི་ཁྱུང་སྐད་འབྲུག་ལྟར་ལྡིར༔ ཀླུ་དང་ས་བདག་རྒྱལ་བསེན་རྣམས༔ རང་དབང་མེད་པར་བརྒྱལ་ཞིང་འབོག༔ ཁྱུང་གི་སྐན་སྒྲ་དང་པོ་ཡིས༔ སྟེང་གི་ལྷ་རྣམས་ཡེད་ཅིང་འདར༔ སྟེང་ཕྱོགས་ལྷ་ཡི་གདོན་བགེགས་ཟློག༔ ཁྱུང་གི་རྐན་སྒྲ་གཉིས་པ་ཡིས༔ བར་སྣང་གཉན་རྣམས་སྨྱོ་ཞིང་འབོག༔ བར་སྣང་གཉན་གྱི་གནོད་པ་ཟློག༔ ཁྱུང་གི་རྐན་སྒྲ་གསུམ་པ་ཡིས༔ ཀླུ་དང་ས་བདག་རྡུལ་དུ་བརླག༔ ས་བདག་ཀླུ་ཡི་གདོན་བགེགས་ཟློག༔ ཁྱུང་གི་གཤོག་སྒྲ་དང་པོ་ཡིས༔ གནམ་ས་ཐམས་ཅད་གཡོ་ཞིང་འགུལ༔ གནམ་སའི་གཡོ་འགུལ་ལྟས་ངན་ཟློག༔ ཁྱུང་གི་གཤོག་སྒྲ་གཉིས་པ་ཡིས༔ རྒྱ་མཚོ་ཀུན་ཀྱང་འཁྲུག་ཅིང་འཁྱོམས༔ ཀླུ་དང་ས་བདག་ལྟས་ངན་ཟློག༔ ཁྱུང་གི་གཤོག་སྒྲ་གསུམ་པ་ཡིས༔ རི་རབ་བསྙིལ་ཞིང་ཉི་ཟླ་འབེབས༔ སྡེ་བརྒྱད་རྒྱུ་སྐར་ལྟས་ངན་ཟློག༔ ཤ་ཟ་ཁྲག་འཐུང་རྡོ་རྗེའི་མཆུས༔ སྲིན་པོ་ཡོངས་ཀྱི་ལྟས་ངན་ཟློག༔ ཁྲོ་ཆུ་ཞུན་མ་འབར་བའི་རྭས༔ ལྷ་རྣམས་ཡོངས་ཀྱི་ལྟས་ངན་ཟློག༔ གཙུག་ན་ནོར་བུ་རིན་ཆེན་འབར༔ གནོད་སྦྱིན་ཡོངས་ཀྱི་ལྟས་ངན་ཟློག༔ རལ་པ་ཁམ་ནག་སྲིད་གསུམ་འཐིབ༔ བདུད་རྣམས་ཡོངས་ཀྱི་ལྟས་ངན་ཟློག༔ སྤྱན་ནས་ཁྲག་གི་རྦ་ཀློང་འཕྱོ༔ མ་མོ་ཡོངས་ཀྱི་ལྟས་ངན་ཟློག༔ སྤུ་ལས་རྡོ་རྗེའི་ཚ་ཚ་འཐོར༔ ཐེའུ་རང་ཡོངས་ཀྱི་ལྟས་ངན་ཟློག༔ མཇུག་མས་གནོད་བྱེད་འཕྱག་ཅིང་འདེད༔ དམུ་རྣམས་ཡོངས་ཀྱི་ལྟས་ངན་ཟློག༔ སྡེར་མོ་ལྕགས་ཀྱུར་དྲག་མེ་མཆེད༔ གཟའ་རྣམས་ཡོངས་ཀྱི་ལྟས་ངན་ཟློག༔ ཀྲང་ཀྲང་ཀྲིང་ཀྲིང་རྐན་སྒྲ་རྡེབ༔ རྒྱལ་འགོངས་ཡོངས་ཀྱི་ལྟས་ངན་ཟློག༔ སྦྲུལ་རིགས་ལྔ་གསོལ་ཇུར་མིད་གཏོང་༔ ཀླུ་རྣམས་ཡོངས་ཀྱི་ལྟས་ངན་ཟློག༔ མེ་གཤོག་རྡེབ་པས་སྲིད་གསུམ་འདར༔ བཙན་རྣམས་ཡོངས་ཀྱི་ལྟས་ངན་ཟློག༔ མཆུ་ཡིས་མཆུ་ཅན་ལྟས་ངན་ཟློག༔ རྭ་ཡིས་རྭ་ཅན་ལྟས་ངན་ཟློག༔ སྡེར་མོས་སྡེར་ཅན་ལྟས་ངན་ཟློག༔ གཤོག་པས་འདབ་ཆགས་ལྟས་ངན་ཟློག༔ ཁྱུང་ཆེན་འབར་བའི་ཐུགས་དམ་བསྐུལ༔ གྷ་རུ་ཌ་ཡི་དུས་ལ་བབས༔ དགྲ་བགེགས་ཤ་ཁྲག་གཏོར་མ་བཞེས༔ ཟློག་ཅིག་སྒྱུར་ཅིག་གྷ་རུ་ཌ༔ བཅོལ་བའི་འཕྲིན་ལས་གྲུབ་པར་མཛོད༔ ཅེས་བརྗོད་ཤ་ཁྲག་གཏོར་མར་སྦྲན༔ སྡེ་བརྒྱད་མ་རུངས་ལྟས་ངན་ཚོགས༔ མི་རུང་སྣ་ཚོགས་འདི་ཡིས་བཟློག༔ ཕྱི་རབས་རྣམས་ཀྱིས་གཅེས་པར་ཆོངས༔ འགྲོ་བའི་བར་ཆད་སེལ་བར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀཱིརྟིས་ཤངས་ཟབ་བུ་ལུང་ནས་གདན་དྲངས་ཤིང་། ཁམས་སྲིང་མོ་རྫོང་གི་ཕུག་ནག་བདེ་བ་ཆེན་པོའི་ཀེའུ་ཚང་དུ་ཤོག་སེར་ལས་བོད་ཡིག་ཏུ་བསྒྱུར་བའོ།། །།མངྒཱ་ལཾ།