ཁྱུང་གི་ལས་མཐའ་ཀླུ་འདུལ་ནག་པོ།
ཟབ་ཆོས་པདྨ་དྲག་ཁྲོས་ལས༔ ཁྱུང་གི་ལས་མཐའ་ཀླུ་འདུལ་ནག་པོ་བཞུགས༔ དྲག་པོ་རྩལ་ལ་ཕྱག་འཚལ་ལོ༔ བྱ་ཁྱུང་ནག་པོའི་ཏིང་འཛིན་གྱིས༔ ཀླུ་གདོན་གཞོམ་ཕྱིར་བསྒྲུབ་འདོད་ན༔ དཀྱིལ་འཁོར་བཅའ་གཞི་གོང་དང་མཚུངས༔ སྐྱབས་སེམས་བཏང་ཞིང་གཏོར་མ་འབུལ༔ འཕྲིན་ལས་བཅོལ་ཞིང་བགེགས་རྣམས་བསྐྲད༔ རང་ཉིད་བྱ་ཁྱུང་བསྐྱེད་རིམ་གསལ༔ ཁྲོཾ་ལས་འོད་ནི་ཉི་ཟེར་ལྟར༔ ཕྱོགས་བཅུ་ཀུན་ཏུ་འཕྲོས་པ་ལས༔ སྤྲུལ་པ་བྱ་ཁྱུང་མེ་གཤོག་ཅན༔ སྟོང་གསུམ་ཀུན་ཀྱང་ཡོམ་ཡོམ་གང་༔ སྲིད་གསུམ་ཀུན་ཀྱང་བུན་བུན་སྲེག༔ ས་བདག་ཀླུ་གཉན་གནོད་པའི་བགེགས༔ མེ་ལྕེའི་ཁ་ཡི་སྦྲང་བུ་ལྟར༔ སྐད་ཅིག་ཉིད་ལ་བརླག་པར་བསམས༔ ཨཱོཾ་ཁྲོཾ་གྷ་རུ་ཌ་ནཱ་ག་དུ་ན༔ ཚན་དྷེ་ཚན་དྷེ༔ མི་ལི་མི་ལི༔ བྷན་དྷ་བྷན་དྷ༔ ནཱ་ག་ཕུ་སོད་སྭཱ་ཧཱ༔ གྲུབ་རྟགས་མ་གསལ་བར་དུ་བཟླ༔ ཐུན་མཚམས་རྣམས་སུ་གཏོར་མ་འབུལ༔ ཁྱུང་གི་བསྐུལ་འདོན་འཕྲིན་ལས་བཅོལ༔ འདོད་པའི་དོན་ལ་གསོལ་བ་གདབ༔ བསྙེན་སྒྲུབ་ཐེམས་ནས་དཀྱིལ་འཁོར་བསྡུ༔ རྫོགས་རིམ་ངང་ནས་མཉམ་པར་འཇོག༔ ས་མ་ཡཱ༔ རྒྱ་རྒྱ་རྒྱ༔ གྷ་རུ་ཌ་ཡི་སྒྲུབ་ཐབས་ཀྱིས༔ ཆར་པ་འབེབས་དང་སེར་བ་བསྲུང་༔ གདོན་བགེགས་འདུལ་བའི་འཕྲིན་ལས་འཐོབ༔ ཁྱད་པར་ཁྱུང་གི་ལས་སྦྱོར་འདིས༔ ས་བདག་ཀླུ་ཡི་མཛེ་ནད་འཇོམས༔ སངས་རྒྱས་སྟོང་གི་ནུས་པ་འཐོབ༔ དེ་ཕྱིར་ཕྱི་རབས་གཅེས་པར་ཆོངས༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀཱིརྟིས་ཟབ་བུ་ལུང་ནས་གདན་དྲངས་ཤིང་ཤོག་སེར་ལས་བསྒྱུར་བའོ། །མངྒ་ལཾ། །