ཀླུ་ནད་གདུག་པ་ཀུན་འཇོམས།
ཟབ་ཆོས་པདྨ་དྲག་ཁྲོས་ལས༔ ཀླུ་ནད་གདུག་པ་ཀུན་འཇོམས་བཞུགས༔ དྲག་པོ་པདྨའི་སྐུ་ལ་འདུད༔ ལྔ་བརྒྱའི་དུས་ཀྱི་ཐ་མ་ལ༔ དཀར་ཕྱོགས་སྲུང་མ་ཉམས་དམའ་ཞིང་༔ ཁྱད་པར་ནག་ཕྱོགས་གཟའ་ཀླུ་དར༔ ཙི་ཙི་ཛྭ་ལས་མི་ཐོག་འབུད༔ དེ་དུས་སེམས་བསྐྱེད་ལྡན་པའི་བུས༔ གདམས་པ་འདི་བཞིན་གཞན་དོན་སྤྱོད༔ ས་མ་ཡཱ༔ རྒྱ༔ མཎྜལ་དམར་ནག་དུག་ཁྲག་བྱུག༔ ལྟེ་བ་གྲུ་གསུམ་ཐོད་ར་ཅན༔ ཕྱི་རིམ་འཁོར་ལོ་རྩིབས་བཞི་འབྲི༔ དུར་ཁྲོད་མེ་རི་པད་རྡོར་བྲག༔ ལེགས་པར་མཐའ་བསྐོར་ཚོན་གྱིས་སྒྱུར༔ ཕག་ནག་ཐོད་པ་ཁ་སྦྱོར་ནང་༔ དྲི་ཆུ་བར་པས་ལེགས་པར་དགང་༔ གླ་རྩི་ཤིང་ཀུན་མུ་ཟི་ནག༔ དྲི་ཆེན་ཡུངས་ཀར་གུ་གུལ་དང་༔ ཀླུ་བདུད་རྡོ་རྗེ་སྒོག་ཅིག་པ༔ ཕག་ནག་བྱ་རོག་ནེའུ་ལེ་གསུམ༔ བྱ་ཁྲ་རྣམས་ཀྱི་ཤའམ་ཁྲག༔ ཞིབ་པར་བསྣུར་ཞིང་དྲི་ཆུར་བཏབ༔ མི་ལྤགས་ཚལ་པ་ཁ་གང་པས༔ ཐོད་པ་གཡོག་ཏེ་དཀྱིལ་འཁོར་དབུས༔ ལེགས་པར་བཞག་ཅིང་དུག་ཁྲག་གི༔ གཏོར་མ་བྷནྡྷའི་སྣོད་དུ་བཤམ༔ སྨན་རཀ་མཆོད་པ་ཅི་འབྱོར་དགྲམ༔ དྲག་པོའི་ལས་གཞུང་བསྲང་ནས་ཀྱང་༔ རང་ཉིད་པདྨ་དྲག་པོར་བསྒོམ༔ དཀྱིལ་འཁོར་གནམ་ལྕགས་ཕོ་བྲང་དབུས༔ རྫས་ཐོད་བྱ་ཁྱུང་སྐུ་རུ་བསྐྱེད༔ སྤྱན་འདྲེན་མཆོད་ཅིང་བསྟོད་པས་བསྟོད༔ ཨཱོཾ་ཁྲོཾ་གྷ་རུ་ཌ་ནཱ་ག་ར་ཙའི་ཙིཏྟ་མཱ་ར་ཡ་སོད་སོད༔ ནཱ་གའི་ཙིཏྟ་མཱ་ར་ཡ་ཆོད་ཆོད༔ ནཱ་གའི་ཙིཏྟ་མཱ་ར་ཡ་གཏུབས་གཏུབས༔ ནཱ་གའི་ཙིཏྟ་མཱ་ར་ཡ་རྦུད་རྦུད༔ ནཱ་གའི་ཙིཏྟ་མཱ་ར་ཡ་རྦད་རྦད༔ ནཱ་གའི་ཙིཏྟ་མཱ་ར་ཡ་ཆིངས་ཆིངས༔ ནཱ་ག་སརྦ་མཱ་ར་ཡ་ཐུམ་ཐུམ་རིལ་རིལ་མཱ་ར་ཡ་ཁུག་ཛཿསོད་ཅིག་སྭཱ་ཧཱ༔ ཞེས་བཟླས་བདག་མདུན་སྔགས་ཕྲེང་འཁོར༔ སྤྲུལ་པ་བྱ་ཁྱུང་འཁོར་བཅས་ཀྱིས༔ ཀླུ་བཀུག་ཀླུ་ཟོས་ཀླུ་བརླགས་ཤིང་༔ གནོད་བྱེད་ཀླུ་རྣམས་རྗེས་མེད་བསམ༔ སྨྲ་བ་བཅད་ནས་ཞག་བདུན་བསྒྲུབ༔ ཐུན་མཚམས་ཉིན་དགུང་མཚན་དགུང་དུ༔ ཁྱུང་གི་བསྟོད་བསྐུལ་གཏོར་མར་འབུལ༔ ཐོད་རྫས་བྱ་ཁྱུང་ཞུ་བ་ལས༔ ངོ་བོ་བདུད་རྩིའི་རང་བཞིན་ལ༔ རྣམ་པ་གནམ་ལྕགས་ཁྲོ་ཆུ་ཁོལ༔ མེ་ལྕེ་ཚྭ་ཚྭ་འཕྲོ་བར་བསམས༔ རང་གི་གནས་གསུམ་ཐིག་ལེ་བྱ༔ ཏིང་འཛིན་ངང་ནས་དབང་བཞི་བླངས༔ ནད་པ་བཀྲུ་ཞིང་ཁ་རུ་བླུད༔ ནད་གདོན་ཐམས་ཅད་བསྲེགས་པར་བསམས༔ ཞག་བདུན་བརྟེན་པར་ཀླུ་ནད་སེལ༔ ནཱ་གའི་གནོད་པ་འཕྲལ་ལ་འཇོམས༔ ས་མ་ཡཱ༔ རྒྱ་རྒྱ་རྒྱ༔ ཀླུ་ནད་སེལ་བའི་མན་ངག་འདི༔ ཐུགས་ཀྱི་སྲས་དང་འཕྲད་ནས་ཀྱང་༔ མ་འོངས་འགྲོ་ལ་ཕན་ཐོགས་ཤོག༔ རྐུན་ནོར་ལྟ་བུར་སྤྱོད་མཁས་བྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀཱིརྟིས་གནས་མཆོག་ཆེན་པོ་ཟབ་བུ་ལུང་ནས་ཤིང་ཡོས་ལ་གདན་དྲངས་ཤིང་། །ལྕགས་བྱ་ལ་ཤོག་སེར་ལས་བོད་ཡིག་ཏུ་སྒྱུར་བའོ། །མངྒ་ལཾ། །