དྲག་པོའི་སྦྱིན་སྲེག
ཟབ་ཆོས་པདྨ་དྲག་ཁྲོས་ཀྱི་དྲག་པོའི་སྦྱིན་སྲེག་བདུད་དཔུང་བསྲེག་པ་བསྐལ་པའི་མེ་ཆེན་བཞུགས། ལྷུན་གྲུབ་གདོད་མའི་དབྱིངས་ལས་རྒྱལ་བ་ཀུན། །མི་བཟད་སྙིང་རྗེའི་ཕུང་པོ་ཁྲོས་པའི་ཉམས། །རབ་གཏུམ་གར་དགུར་རོལ་པའི་ཧེ་རུ་ཀས། །བདུད་སྡེའི་གཡུལ་ལས་རྒྱལ་བའི་མཐུ་དཔུང་བསྐྱེད། །ལྷ་སྔགས་ཏིང་འཛིན་ཡེ་ཤེས་རོལ་པའི་དབལ། །འཇིགས་རུང་བསྐལ་པའི་མེ་ཆེན་སྟོང་འབར་བས། །ལོག་པར་འདྲེན་པའི་དཀྱིལ་འཁོར་ཀུན་གཞོམ་པའི། །རྣམ་བཞག་བརྩོན་པའི་རླུང་གིས་འདི་ན་བསྐྱེད། །དེ་ཡང་པདྨ་དྲག་པོར་ཁྲོས་པའི་དཀྱིལ་འཁོར་དུ་ཡོངས་སུ་སྨིན་པར་བྱས་ཤིང་བསྙེན་པ་དང་སྒྲུབ་པའི་རིམ་པར་དྲོད་རྟགས་ཐོན་པ་དམ་ཚིག་ལ་གནས་པའི་སྔགས་པས། འཇིགས་ཤིང་སྐྱི་གཡའ་བའི་དུར་ཁྲོད་དམ། ནག་ཅིང་རྩུབ་ལ་ཁ་ལྷོར་བལྟ་བ་སོགས་དྲག་པོའི་གནས་སམ་སྐབས་སུ་བབས་པའི་གནས་སུ་ལྕགས་ཁམས་ཀྱི་ལོ་ཟླ་ཉི་ཁྱིམ་ཡོད་པའི་འཕུང་གསུམ་བདུད་ཀྱི་ཉི་མ་སོགས་རབ་ཏུ་གཉན་ཅིང་རྩུབ་པའི་སྲོད་ལ་སོགས་པར། གྲོག་མཁར་གྱི་ས་འཕུང་ཤུལ་གྱི་ས་གཡུལ་བཀྱེ་བའི་ས་སོགས་ལ་སྟེགས་བུ་ནག་པོ་རྒྱར་ཁྲུ་གང་དཔངས་སུ་མཐོ་གང་པ་དུག་དང་ཁྲག་གིས་ཆག་ཆག་གདབ་པར་མཎྜལ་ནག་པོ་གྲུ་གསུམ་པ་ཐོད་ར་དང་མེ་རིས་བསྐོར་བའི་ནང་ལྷ་གྲངས་ཀྱི་ས་བོན་ནམ་ཕྱག་མཚན་ཚོམ་བུ་གང་ཚོགས་བྲིས་པའི་ཁར་སྐྱེར་པ་སོགས་དུག་དང་ཚེར་མ་ཅན་གྱི་ཤིང་དུག་ཁྲག་གིས་སྦགས་པ་གྲུ་གསུམ་དུ་བརྩིག། གཡོན་དུ་མེ་སྲོག་འཛིན་པའི་རྫས་ལ་ཚེར་མ་ཅན་གྱི་ཤིང་ཟུར་གསུམ་པ་སོར་བཅུ་གཉིས་སྦོམ་ཕྲ་ཐེའུ་ཆུང་ཙམ་དུ་གཞོགས་པ་ལ་དུག་ཁྲག་གིས་གནོད་བྱེད་དགྲ་བགེགས་ཐམས་ཅད་མཱ་ར་ཡ་རྦད༔ ཅེས་བྲིས་པའི་རྩ་རྩེར་དུག་ཁྲག་མར་ནག་ཚིལ་ཆེན་གྱིས་སྦགས་པ་གང་མང་། རྩ་བའི་རྫས་དགྲ་བགེགས་གང་ལ་བྱེད་པའི་གཟུགས། དགྲ་ཡིན་ན་ཟག་རྫས་སོགས་དྲི་མ་དྲུག་གིས་བགོས་པ་བརྒྱ་རྩ་བརྒྱད། དྲག་པོའི་རྫས་མི་རྟ་ཁྱི་གསུམ་སོགས་ཀྱི་ཤ་སྣ་བག་ཕྱེ་དང་བསྲེས་པའི་སྐྱུ་གུ་གྲུ་གསུམ་པའི་ནང་དུ་གནོད་བྱེད་ཀྱི་མིང་རུས་དུག་ཤོག་ལ་དུག་ཁྲག་གིས་བྲིས་ཏེ་བཅུག་པ། གནད་ཀྱི་རྫས་སྦལ་སྤྲུལ་ཉ་ཁྱི་སོགས་ཀྱི་ཤ་དུག་ཐང་ཕྲོམ་བཙན་དུག་བོང་དུག་ཐར་ནུ་སོགས་དུག་སྣ་རྣམས་བསྲེས་པ། གསོད་པའི་རྫས་གྲི་ལྕགས་བྲག་ཐོག་གིས་བཤིགས་པ་གནམ་ནས་བབས་པའི་འཁར་ཟངས་བརྡར་བའི་ཕྱེ་མ། མྱོས་པའི་རྫས་མར་ནག་དམེ་མནོལ་གྱི་ཁྲག་དང་སྦྱར་བ། ཚ་བའི་རྫས་ཏིལ་ནག་ཡུངས་ཀར་ལྕེ་ཚ་དབྱི་མོང་སྲུབ་ཀ་སྟེ་ཚ་བ་གསུམ་རྫས་དེ་རྣམས་ལྕགས་སམ་བྷནྡྷའི་སྣོད་དུ་རིམ་པར་འགོད། གོ་ཡུ་མར་དང་སྦྱར་བའི་སོ་རྩི་ལས་མཐུན་གྱི་གོས་ཟུང་རྣམས་བཤམས། གཡས་སུ་མཆོད་ཡོན་ཞབས་བསིལ་གྱིས་ཐོག་དྲངས་པའི་ཉེར་སྤྱོད་འཇིག་རྟེན་པ་དང་འདས་པའི་སྨན་རཀ་གཏོར་མཆོད། མདུན་དུ་རྡོར་དྲིལ་དགང་གཟར་བླུགས་རླུང་གཡབ་མེ་ཏོག་ལས་བུམ་སོགས་ཉེ་བར་མཁོ་བ་རྣམས་བཤམས། ཡང་གསང་པདྨ་དྲག་པོའི་ལས་གཞུང་ཚོགས་ལྷག་ཡན་གྲུབ་ནས། ལས་བུམ་གྱི་ཁར་གཟུངས་ཐག་འགོད་དེ། སྭཱ་བྷཱ་ཝས་སྟོང་པར་སྦྱངས། སྟོང་པ་ཆེན་པོའི་ངང་ཉིད་ལས། །ལས་བུམ་ཁྲོ་བོའི་གཞལ་ཡས་ཁང་། །མཚན་ཉིད་ཡོངས་རྫོགས་ལྟེ་བ་རུ། །པད་ཉིར་ཧཱུྃ་དམར་འཕྲོ་འདུ་ལས། །ཡཀྴ་མེ་དབལ་རྔམ་ཞིང་ཁྲོ། །གཡས་གཡོན་ཐོ་བ་ཞགས་པ་བསྣམས། །རབ་འཇིགས་ཁྲོ་བོའི་ཆ་ལུགས་རྫོགས། །སྐུ་ལས་ཁྲོ་ཆུང་དཔག་མེད་འཕྲོས། ལྷ་སྲིན་སྡེ་བརྒྱད་དྲེགས་པའི་ཚོགས། བསྐྲད་གཟིར་མནན་བསྲེགས་རྡུལ་དུ་བརླགས། །ཚུར་འདུས་བུམ་པའི་ཆུ་དང་འདྲེས། །ཨཱོཾ་བཛྲ་ཡཀྴ་སིདྡྷི་ཧཱུྃ༔ རཀྴ་མཱ་ར་ཡ་ཕཊ༔ ཅེས་གང་འགྲུབ་བཟླས་རྗེས། ཁྲོ་བོའི་དབང་པོ་འོད་དུ་ཞུ། །བདུད་རྩི་བུམ་ཆུའི་རྣམ་པར་གྱུར། ཞེས་བསྒྲུབ། དེ་ནས་སྔགས་པ་བདུད་ཆས་སུ་ཞུགས་ཏེ་མི་བསྲུན་པའི་ལོག་འདྲེན་མཐའ་དག་དྲག་པོའི་འཕྲིན་ལས་ཀྱི་སྟོབས་ཀྱིས་བཏུལ་ཏེ་པདྨ་དྲག་པོའི་གོ་འཕང་ལ་འགོད་པར་བྱ་བའི་སེམས་བསྐྱེད་དང་ལྡན་པས་རོལ་མོ་འཁྲོལ་ཞིང་འཛབ་དབྱངས་བཟླ། འགྱིང་བག་གི་སྟབས་ཀྱིས་མེ་ཐབ་ལན་གསུམ་བསྐོར་ཏེ། མེ་ཐབ་ཀྱི་དབུས་སུ་ཧཱུྃ་དམར་ནག་རཾ་གྱིས་མཚན་པ་ལས་མེ་དཔུང་དམར་ནག་ཚ་ཞིང་རྩུབ་པ་དཔག་ཏུ་མེད་པ་ཕྱོགས་བཅུར་འཕྲོས་པས་གདོན་བགེགས་འབྱུང་པོ་ཐམས་ཅད་མིང་ཡང་མི་གྲགས་པར་ཐལ་བའི་རྡུལ་དུ་བརླགས་ཚུར་འདུས་པ་ལས་སྟེང་འོག་ཕྱོགས་མཚམས་ཐམས་ཅད་རྣོ་དབལ་མཚོན་ཆ་འབར་བའི་ས་གཞི་ར་གུར་དྲ་གུར་ཡེ་ཤེས་ཀྱི་མེ་རི་དང་བཅས་པའི་བསྲུང་བའི་འཁོར་ལོས་རབ་ཏུ་གཏམས་པར་གྱུར་པར་བསམས་ཤིང་། ཧཱུྃ། བསྐལ་པའི་མེ་ཆེན་འབར་བའི་གཞལ་ཡས་འདིར༔ མེ་ལྷ་དྲང་སྲོང་ཡི་དམ་མ་གཏོགས་པ༔ གདོན་བགེགས་འབྱུང་པོ་བར་དུ་གཅོད་པའི་ཚོགས༔ འདི་རུ་མ་འདུག་རང་རང་གནས་སུ་དེངས༔ གལ་ཏེ་མི་འགྲོ་ཆགས་ཤིང་འདིར་འཁོར་ན༔ མེ་འདག་འབར་བའི་སྦྲང་བུ་བཞིན་དུ་བསྲེག༔ ཞེ་སྡང་འཇོམས་པའི་མེ་ནི་མཐིང་ནག་འབར༔ ང་རྒྱལ་འཇོམས་པའི་མེ་ནི་སེར་ནག་འབར༔ འདོད་ཆགས་འཇོམས་པའི་མེ་ནི་དམར་ནག་འབར༔ ཕྲག་དོག་འཇོམས་པའི་མེ་ནི་ལྗང་ནག་འབར༔ གཏི་མུག་འཇོམས་པའི་མེ་ནི་སྨུག་ནག་འབར༔ ཡེ་ཤེས་འབར་བའི་མེ་ཡིས་མཚམས་ཆོད་ཅིག༔ ཨཱོཾ་ཨཱ་ཧཱུྃ་ཨརྩིག་ནེརྩིག་ན་མོ་བྷ་ག་ཝ་ཏེ་ཨཱཿཧཱུྃ་ཧཱུྃ་ཕཊ་ཕཊ་ཨགྣཱེ་ཡེ་ཛྭ་ལ་རཾ་རཾ་ཨགྣཱེ་ཡེ་ཛྭ་ལ་རཾ་རཾཿ ཨོཾ་སུམ་བྷཱ་ནི་སོགས་བརྗོད༔ དེ་ནས་མཆོད་པ་བྱིན་གྱིས་བརླབ་པ་ནི། ལས་བུམ་གྱི་ཆུས་འཐོར་ཞིང་སྲེག་རྫས་རྣམས་བསང་སྦྱངས། སྟོང་པའི་ངང་ལས་ཨཱཿལས་བྷནྡྷ་ལྕང་ལོར་བཅས་པ་ཡངས་ཤིང་རྒྱ་ཆེ་བ་སྟོང་གསུམ་དང་མཉམ་པའི་ནང་དུ་ནྲི་ཏྲི་ཡོངས་སུ་གྱུར་པ་ལས་དགྲ་བགེགས་གནོད་བྱེད་གདུག་པ་ཅན་རྣམས་བསྒྲལ་བའི་ཕུང་ཁམས་སྐྱེ་མཆེད་ལས་བྱུང་བའི་མཆོད་རྫས་དང་སྲེག་རྫས་རྣམས་ངོ་བོ་ཡེ་ཤེས་གྱི་བདུད་རྩིའི་རྒྱ་མཚོ་ཆེན་པོ་ལ་རྣམ་པ་སོ་སོའི་མཚན་ཉིད་ཐམས་ཅད་ཡོངས་སུ་རྫོགས་ཤིང་། བྱེད་ལས་ལྷ་ཚོགས་མ་ལུས་པའི་ཐུགས་རྒྱུད་ལ་ཟག་མེད་ཀྱི་དགྱེས་པ་བསྐྱེད་པར་ནུས་པའི་རབ་འབྱམས་མཆོད་པའི་སྤྲིན་ཀྱི་ཕུང་པོ་ནམ་མཁའི་མཐའ་དང་མཉམ་པར་གྱུར་པར་བསམས་ཞིང་། ཨཱོཾ་བཛྲ་ཨརྒྷཾ་ཨཱཿཧཱུྃ་ནས་ཤཔྟ་ཨཿཧཱུྃ་གིས་མཆོད་རྫས་དང་། ཨཱོཾ་བཛྲ་མ་ཧཱ་གུ་རུ་ཀྲོ་ཏ་རཱ་ཛ་ནྲི་ཏྲི་མཱ་ར་ཡ་ཛཿཛ༔ ལན་གསུམ་གྱིས་སྲེག་རྫས་རྣམས་བྱིན་གྱིས་བརླབ། དེ་ནས་གདོལ་པའམ་བཤན་བའམ་དམེ་ཕོ་ཡུགས་ས་གང་རུང་ནས་མེ་བླངས་ལ་ཐབ་ཏུ་སྦར་ཞིང་། ཧཱུྃ། བྱང་གི་ཕྱོགས་ནས་མེ་སྦར་མས༔ གནོད་སྦྱིན་ལག་ནས་མེ་ལོངས་ལ༔ དྲག་པོའི་མེ་ནི་སྦར་བར་མཛོད༔ ལྷོ་ནུབ་མཚམས་ནས་ཤིང་ཐུན་མས༔ རླུང་ལྷའི་ཡུལ་ནས་ཤིང་ཐུས་ལ༔ རླུང་གི་ལྷ་མོས་རླུང་གཡོབས་ཤིག༔ ཨཱོཾ་ཨགྣཱེ་ཡེ་ཧ་བྱ་ཀ་བྱ་ཆེ་གེ་མཱ་ར་ཡ་ཛྭ་ལ་རཾ༔ རླུང་གཡབ་ཀྱིས་གཡབ་ཅིང་། ཨཱོཾ་ཨགྣཱེ་ཡེ་ཛྭ་ལ་རཾ་རཾ༔ ཞེས་མར་ནག་བླུགས་གཟར་བདུན་གྱིས་ཀྱང་གསོ། མེ་ཐབས་བསངས་སྦྱངས། སྟོང་པའི་ངང་ལས་རབ་འཇིགས་དྲག་པོའི་ཐབ་ཁུང་གྲུ་གསུམ་ནག་པོ་བང་རིམ་གསུམ་དང་ལྡན་ཞིང་མུ་རན་དང་ཁ་ཁྱེར་ལ་ཐོད་པའི་ཕྲེང་བ་དང་། མེ་དཔུང་འབར་བས་ཀླུབས་པ། གཏིང་རབ་ཏུ་ཟབ་ལ་རྒྱ་ཁྱོན་ཆོས་ཀྱི་དབྱིངས་དང་མཉམ་པའི་དབུས་སུ་རང་ཉིད་པདྨ་དྲག་པོའི་ཐུགས་ཀ་ནས་སྤྲོས་པའི་རཾ་ནག་པོ་ཡོངས་སུ་གྱུར་པ་ལས། ངོ་བོ་དྲང་སྲོང་མེ་ཡི་ལྷ་མཆོག་ཆེན་པོ་ལ་རྣམ་པ་ཁྲོ་རྒྱལ་ལྕགས་ཀྱི་སྡིག་པ་ནག་པོ་ཁ་དགུ་གནམ་སའི་ཚད་དུ་གདངས་ཤིང་། མིག་དགུ་འཇིགས་པའི་སྡང་མིག་བལྟ་བ། ལྕགས་རྭ་བཅོ་བརྒྱད་སྲིད་རྩེར་གཟེངས་ཤིང་གདུག་པའི་མཇུག་མ་ཕྱོགས་བཅུར་གཡུག་པ། གནོད་བྱེད་བགེགས་ལ་ཧབ་ཤ་འདེབས་ཤིང་སྲེགས་པའི་ཚྭ་ཚྭ་ཕྱོགས་བཅུར་འཕྲ་ོབ། །མི་སྡུག་འཇིགས་པའི་ཁྲོ་གཉེར་སྟོང་ཕྲག་བསྡུས་ཏེ་བསྐལ་བའི་མེ་དཔུང་དྲག་ཏུ་འབར་ཞིང་འཚུབ་པའི་ཀློང་ན་ནམ་མཁའ་ས་གཞི་བར་སྣང་ཐམས་ཅད་ཁེངས་པར་བཞུགས་པའོ། །རང་དང་མེ་ལྷའི་ཐུགས་ཀ་ནས་ཛ༔ ཡིག་དམར་པོ་ལྕགས་ཀྱུ་ལྟ་བུ་འཕྲོས་པས་ཡེ་ཤེས་ཀྱི་མེ་ལྷ་འཁོར་དང་བཅས་པ་སྤྱན་དྲངས་པར་བསམས་ལ། ཧཱུྃ། དད་པ་དང་ནི་དམ་ཚིག་གིས། ཚུར་གཤེགས་ཚུར་གཤེགས་འབྱུང་བ་ཆེ༔ མེ་ལྷའི་རྒྱལ་པོ་དྲང་སྲོང་མཆོག༔ བསྲེགས་བྱ་ཟ་བའི་ཞིང་ཁམས་ནས༔ དམ་ཚིག་དབང་གིས་སྤྱན་འདྲེན་ན༔ དྲག་པོ་འབར་བའི་གནས་འདིར་གཤེགས༔ ཨཱོཾ་ཨགྣཱེ་ཡེ་བཛྲ་ས་མཱ་ཛཿཛཿཧཱུཾ་བཾ་ཧོ༔ དམ་ཚིག་པ་དང་གཉིས་སུ་མེད་པར་གྱུར༔ ཧཱུྃ། གཟི་བརྗིད་འབར་བ་མེ་ཡི་ལྷ༔ དྲག་པོའི་འཕྲིན་ལས་བསྒྲུབ་པའི་ཕྱིར༔ འབར་བ་མེ་ཡི་གཞལ་ཡས་འདིར༔ གཉིས་མེད་བརྟན་པར་བཞུགས་སུ་གསོལ༔ ཨཱོཾ་ཨགྣཱེ་ཡེ་དྷེ་ཝ་བཛྲ་ས་མ་ཡ་ཨ་ཝེ་ཤ་ཡ་ཏིཥྛནྟུ༔ ཞེས་པས་གདན་དབུལ༔ ཧཱུྃ། དྲང་སྲོང་ཆེན་པོ་མེ་ཡི་ལྷ༔ གཟི་བརྗིད་འབར་བ་ལྟ་ན་སྡུག༔ འཕྲིན་ལས་ཀུན་སྒྲུབ་ཐུགས་རྗེ་ཅན༔ གུས་པའི་ཡིད་ཀྱིས་ཕྱག་འཚལ་བསྟོད༔ ཨཱོཾ་ཨགྣཱེ་ཡེ་དྷེ་ཝ་ཨ་ལ་ལ་ཨ་ཏི་པུ་ཧོཿས་ཕྱག་བྱ། ཧཱུྃ། དངོས་བཤམས་ཡིད་ལས་སྤྲུལ་པ་ཡི༔ རྨད་དུ་བྱུང་བའི་ཉེར་སྤྱོད་ལྔ༔ ལོག་འདྲེན་དགྲ་བགེགས་གདུག་པ་ཅན༔ བསྒྲལ་བའི་གཟུགས་ཕུང་ལས་བྱུང་བའི༔ རྔམ་བརྗིད་ནང་གི་ཉེར་སྤྱོད་ལྔ༔ རྩ་བརྒྱད་སྟོང་ལ་སྦྱར་བའི་སྨན༔ བདུད་སྡེའི་སྙིང་གི་རཀྟ་དམར༔ རྨད་བྱུང་གཏོར་མའི་རི་བོ་སྟེ༔ ནམ་མཁའ་གང་བའི་མཆོད་པ་རྣམས༔ དྲང་སྲོང་མེ་ལྷའི་ཚོགས་ལ་འབུལ༔ ཨཱོཾ་ཨགྣཱེ་ཡེ་དྷེ་ཝ་ས་པ་རི་ཝཱ་ར་ཨརྒྷཾ་ནས་ཤཔྟ་སརྦ་པཉྩ་ཨ་མྲྀ་ཏ་མ་ཧཱ་རཀྟ་བཱ་ལིངྟ་པཱུ་ཙ་ཁཱ་ཧི། ཞེས་མཆོད། ཧཱུྃ། ཚངས་པའི་དབང་པོ་འཇིག་རྟེན་མགོན་གྱི་སྲས། །ལས་བཞིའི་སྟོབས་ཀྱིས་འཁོར་ལོས་སྒྱུར་བའི་ལྷ། །ཡིད་བཞིན་རེ་སྐོང་གཟི་བརྗིད་སྣང་བའི་གཏེར། །ལོག་འདྲེན་སྲེག་བྱེད་མེ་ཡི་ལྷ་ལ་བསྟོད། །ཅེས་བསྟོད་ཅིང་། དེ་ནས་བྱོན་ཟན་དབུལ་བ་ནི། མེ་ལྷའི་ལྗགས་རྡོ་རྗེ་རྩེ་མོ་གཅིག་པར་རཾ་ཡིག་དམར་པོ་དང་། དགང་བླུག་ག །ི་རྩེ་མོར་ཧཱུྃ་མཐིང་ནག་གཟི་བརྗིད་དང་ལྡན་པ་རེས་མཚན་པར་གྱུར་པར་བསམས་ཤིང་། ཨཱོཾ་ཨགྣཱེ་ཡེ་སྭཱ་ཧཱ༔ ཞེས་པ་བདུན་གྱིས་དགང་བའི་གཟར་བླུགས་གཉིས་ཁ་སྦྱར་བ་རྡོ་རྗེ་ཁུ་ཚུར་གྱིས་བཟུང་ནས་པུས་མོ་ལས་ཕྱིར་མི་འདའ་བར་གཡོན་དུ་བསྐོར་ཞིང་། ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ན་ཡེ། བདག་ཅག་དཔོན་སློབ་རྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་རྦད༔ ཅེས་ལན་གསུམ་གྱིས་ཕུལ་རྗེས༔ ཧཱུྃ། སྲེག་བྱེད་འབྱུང་བའི་ལྷ་ཁྱོད་ཀྱིས། །སྲེག་རྫས་ཡེ་ཤེས་ལྷར་འབུལ་ཞིང་། །མེ་ཡང་ཡེ་ཤེས་མེར་མཛད་ནས། །དྲག་པོའི་འཕྲིན་ལས་བསྒྲུབ་པར་མཛོད། །ཅེས་བརྗོད། དེ་ནས་ཡམ་ཤིང་ལ། ཨཱོཾ་ཨགྣཱེ་ཡེ་ཡ་ཛྙཱ་ན་ཡ། བདག་ཅག་དཔོན་སློབ་རྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་རྦད༔ མར་ཁུ་ལ། ཨཱོཾ་ཨགྣཱེ་ཡེ། བདག་ཅག་དཔོན་སློབ་རྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམས་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་རྦད༔ རྫས་གཞན་རྣམས་ལ། ཧཱུྃ། སྲེག་བྱེད་འབར་བ་དྲག་པོ་མེ་ཡི་ལྷ། །མ་ལུས་འཁོར་དང་བཅས་པ་ཐམས་ཅད་ལ། །དགྲ་བགེགས་ལོག་པར་འདྲེན་པའི་གཟུགས་ཕུང་དང་། །དྲག་པོའི་རྫས་དང་གནད་འབེབས་གསོད་དང་མྱོས། །རབ་ཏུ་ཚ་བའི་རྫས་མཆོག་འདི་ཕུལ་བས། དམིགས་པའི་དགྲ་བགེགས་གཏན་ནས་བརླག་པར་མཛོད། ཨཱོཾ་ཨགྣཱི་ཀྲོ་ཏ་དགྲ་བགེགས་གནོད་བྱེད་མཱ་ར་ཡ་ཛྭ་ལ་རཾ་རཾ་ཧཱུྃ་ཕཊ༔ ཅེས་རྩ་བའི་རྫས་ནས་ཚ་བའི་རྫས་ཀྱི་བར་རྣམས་ལ་བདུན་ནམ་ཉེར་གཅིག་སོགས་ལོང་སྐབས་དང་བསྟུན་ཏེ་འབུལ། ཧཱུྃ། ཚངས་པའི་དབང་པོ་འཇིག་རྟེན་མགོན་གྱི་སྲས། །ལས་བཞིའི་སྟོབས་ཀྱི་འཁོར་ལོས་སྒྱུར་པའི་ལྷ༔ ཡིད་བཞིན་རེ་སྐོང་གཟི་བརྗིད་སྣང་བའི་གཏེར། །ལོག་འདྲེན་སྲེག་བྱེད་མེ་ཡི་ལྷ་ལ་བསྟོད། ཧཱུྃ། སྲེག་བྱེད་འབྱུང་བའི་ལྷ་ཁྱོད་ཀྱིས། །སྲེག་རྫས་ཡེ་ཤེས་ལྷར་འབུལ་ཞིང་། མེ་ཡང་ཡེ་ཤེས་མེར་མཛད་ནས། །དྲག་པོའི་ཕྲིན་ལས་གྲུབ་པར་མཛོད། ཅེས་བརྗོད་ཅིང་འཕྲིན་ལས་བཅོལ། ཨཱོཾ་ཨགྣཱེ་ཡེ་གཙྪ་མུ༔ ཡེ་ཤེས་ཀྱི་མེ་ལྷ་ཐབ་ཀྱི་ཤར་ལྷོར་གཤེགས་ནས་དཔང་པོ་མཛད་པར་གྱུར་པར་བསམ་མོ། འཇིག་རྟེན་ལས་འདས་པའི་མེ་ལྷ་མཆོད་པ་ནི། དམ་ཚིག་མེ་ལྷའི་ངོ་བོ་ནི། གནམ་ལྕགས་སྡིག་པའི་ལྟོ་བའི་ཀློང་། །ཆོས་ཀྱི་དབྱིངས་དང་མཉམ་པའི་དབུས། རྣམ་པ་དྲག་པོའི་གཞལ་ཡས་ཁང་། མི་མགོ་སྐམ་རློན་རྩིག་པས་གཏམས༔ ཞེས་པ་ནས། གྷ་རུ་ཌ་ལ་ཕྱག་འཚལ་བསྟོད༔ ཅེས་པའི་བར་ལས་བྱང་བཞིན་བྱ། ཅེས་བརྗོད་པས། ལྷ་ཚོགས་ཐམས་ཅད་མཐུ་སྟོབས་ཀྱི་དཔུང་གཡོས་པས་སྐུ་མདོག་ཆར་སྤྲིན་ནག་པོ་རབ་ཏུ་རྒྱས་པའི་ཕུང་པོ་ལྟར་གནག་ཅིང་བཟོད་པར་དཀའ་བའི་གཟི་བརྗིད་འབར་ཞིང་འོད་དམར་ནག་ཏུ་འཕྲོ་བ། དྲག་པོས་དགྲ་བགེས་སྒྲོལ་བའི་ལས་ལ་དཔའ་ཞིང་སྲིད་གསུམ་ལོག་འདྲེན་བཟའ་བའི་ལས་ལ་རྔམ་པའི་སྐུར་གྱུར་པར་བསམས་ཏེ། བྱོན་ཟན་ནི། ལྷ་ཚོགས་རྣམས་ཀྱི་ལྗགས་རྡོ་རྗེ་རྩེ་མོ་གཅིག་པར་རཾ་ཡིག་དམར་པོ་དང་། དགང་བླུག་གི་རྩེ་མོར་ཧཱུྃ་ཡིག་མཐིང་ནག་གཟི་བརྗིད་དང་ལྡན་པ་རེས་མཚན་པར་གྱུར་པར་བསམས་ལ། ཨཱོཾ་ཨཱ་ཧཱུྃ་ཨརྩིག་ནེརྩིག་ན་མོ་བྷ་ག་ཝ་ཏེ་ཧཱུྃ་ཕཊ༔ ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ན་ཡེ་བདག་ཅག་དཔོན་སློབ་རྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་རྦད༔ ཅེས་བདུན་ནམ་གསུམ་འབུལ། དེ་ནས། ཧཱུྃ་ང་ནི་པདྨ་ཧེ་རུ་ཀ༔ ཞེས་པ་ནས། བཅོལ་པའི་འཕྲིན་ལས་གྲུབ་པར་མཛོད༔ ཅེས་པའི་བར་ཐུགས་དམ་བསྐུལ་ཆོག་དགྲ་བགེགས་ཀུན་འདུལ་ལྟར་བྱས་རྗེས། སྒྲལ་ལས་དགྲ་བགེགས་ཀུན་འཇོམས་ཀྱིས་ལིངྒ་རྣམས་ཕྱོགས་གཅིག་ཏུ་བསྒྲལ་ལ། ཐོག་མར་ཡམ་ཤིང་ལ། ཧཱུྃ། གདུག་རྩུབ་དྲག་པོའི་ཡམ་ཤིང་ལ། དུག་ཁྲག་ཚིལ་ཆེན་འབྲུ་མར་བྱུགས། །མཐུ་ལྡན་དྲག་པོའི་ལྷར་འབུལ་ན། །དགྲ་བགེགས་དམིགས་མེད་རྒྱ་ཡིས་ཐོབ། །ཨཱོཾ་ཨཱ་ཧཱུྃ་ཨརྩིག་ནེརྩིག་ན་མོ་བྷ་ག་ཝ་ཏེ་ཧཱུྃ་ཕཊ༔ ཨཱོཾ་པདྨ་ཀྲོ་ཏ་ཨགྣཱེ་ཡེ་གནོད་བྱེད་དགྲ་བགེགས་ཐམས་ཅད་མཱ་ར་ཡ་ཛྭ་ལ་རཾ་རཾ་ཧཱུྃ་ཕཊ༔ ཅེས་དང་། གོང་དུ་བསྒྲལ་བའི་ལིང་རོ་རྣམས་ལ། ཧཱུྃ། ལོག་འདྲེན་དགྲ་བགེགས་གདུག་པ་ཅན། །བསྒྲལ་བའི་ཤ་རུས་དོན་སྣོད་རྣམས། །གཏུམ་དྲག་བརྔམ་པའི་ཞལ་དུ་སྟོབ། །སྲིད་གསུམ་དགྲ་བགེགས་རྡུལ་དུ་ཐོང་། ཨཱོཾ་ཨཱ་ཧཱུྃ་ཨརྩིག་ནེརྩིག་ན་མོ་བྷ་ག་ཝ་ཏེ་ཧཱུྃ་ཕཊ༔ ཨཱོཾ་པདྨ་ཀྲོ་ཏ་ཨགྣཱེ་ཡེ་བདག་ཅག་དཔོན་སློབ་རྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་ཛྭ་ལ་རཾ་རཾ་ཧཱུྃ་ཕཊ༔ ཅེས་པའམ་ཡང་ན་ལིངྒ་རེ་རེའམ་ལྔ་བདུན་བཅུ་སོགས་ལ་དགུག་གཞུག་རེའི་མཐར་ལས་བྱང་གི་ཚོགས་ཐ་མའི་བསྒྲལ་ལས་ཀྱིས་བསྒྲལ་ཞིང་དེ་ཀའི་སྟབ་པས་འབུལ་ཞིང་མཐར་རྩ་སྔགས་ལས་སྔགས་ཤམ་བཅས་སྦྱར་ཡང་མཆོག་ཏུ་འགྱུར་རོ། དྲག་པོའི་རྫས་ལ། ཧཱུྃ། ཤ་སྣ་སྟོང་སྦྱར་དྲག་པོའི་རྫས། །གདུག་པ་དུག་གིས་ངར་བཏབ་ནས། །ཟ་བྱེད་བརྔམ་པའི་ཞལ་དུ་འབུལ། །བདུད་སྡེ་དཔུང་བཅས་དུས་མཐའ་བཏུལ། ཨཱོཾ་ཨཱ་ཧཱུྃ་ཨརྩིག་ནེརྩིག་ན་མོ་བྷ་ག་ཝ་ཏེ་ཧཱུྃ་ཕཊ༔ ཨཱོཾ་པདྨ་ཀྲོ་ཏ་ཨགྣཱེ་ཡེ་བདག་ཅག་དཔོན་སློབ་རྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་ཛྭ་ལ་རཾ་རཾ་ཧཱུཾ་ཕཊ༔ གནད་ཀྱི་རྫས་ལ། ཧཱུྃ། གནད་དུ་འབེབས་པའི་རྫས་རྒོད་ལ། །དམིགས་བྱ་བསྟིམས་ནས་འབུལ་ལགས་ན། །སྡང་བའི་དགྲ་དང་གནོད་བའི་བགེགས། །གནད་དུ་ཕོབ་ལ་ལུས་སེམས་ཕྲོལ། ཨཱོཾ་ཨཱ་ཧཱུྃ་ཨརྩིག་ནེ་རྩིག་ན་མོ་བྷ་ག་ཝ་ཏེ་ཧཱུྃ་ཕཊ༔ ཨཱོཾ་ཀརྨ་ཀྲོ་ཏ་ཨགྣཱ་ཡེ། བདག་ཅག་དཔོན་སློབ་རྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་ཛྭ་ལ་རཾ་རཾ་ཧཱུྃ་ཕཊ༔ གསོད་པའི་རྫས་ལ། ཧཱུྃ། ཟངས་ལྕགས་རྡོ་ཕྱེ་དྲག་པོའི་རྫས། །གནོད་བྱེད་དགྲ་བགེགས་གསོད་པའི་མཚོན། །པདྨ་དྲག་པོར་འབུལ་ལགས་ན། །ལོག་འདྲེན་བདུད་སྡེ་ཆམ་ལ་ཕོབ། ཨཱོཾ་ཨཱཾ་ཧཱུྃ་ཨརྩིག་ནེརྩིག་ན་མོ་བྷ་ག་ཝ་ཏེ་ཧཱུྃ་ཕཊ༔ ཨཱོཾ་པདྨ་ཀྲོ་ཏ་ཨགྣཱེ་ཡེ་བདག་ཅག་དཔོན་སློབ་རྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པོ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་ཛྭ་ལ་རཾ་རཾ་ཧཱུྃ་ཕཊ༔ མྱོས་པའི་རྫས་ལ། ཧཱུྃ། མྱོས་པར་བྱེད་པ་གདུག་པའི་རྫས། དབང་དྲག་པདྨར་འབུལ་ལོ་ཞེས། །བསྟན་དང་བདག་ལ་འཚེ་བ་རྣམས། །མྱོས་སུ་ཆུག་ལ་དབང་པོ་དཀྲུགས། ཨཱོཾ་ཨཱ་ཧཱུྃ་ཨ་རྩིག་ནེ་རྩིག་ན་མོ་བྷ་ག་ཝ་ཏེ་ཧཱུྃ་ཕཊ༔ ཨཱོཾ་པདྨ་ཀྲོ་ཏ་ཨགྣཱེ་ཡེ་བདག་ཅག་དཔོན་སློབ་རྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་ཛྭ་ལ་རཾ་རཾ་ཧཱུྃ་ཕཊ༔ ཚ་བའི་རྫས་ལ། ཧཱུྃ། འབར་བའི་ཤུགས་ལྡན་དྲག་པོའི་རྫས། །སྙིང་རྗེས་ཁྲོས་པའི་མགུལ་དུ་བསྟིམས། །ཞིང་བཅུ་བསྒྲུབ་པའི་མི་བསྲུན་དགྲ། རིམས་ནད་ཚ་བའི་དབལ་གྱིས་སོད། ཨཱོཾ་ཨཱཿཧཱུྃ་ཨ་རྩིག་ནེ་རྩིག་ན་མོ་བྷ་ག་ཝ་ཏེ་ཧཱུྃ་ཕཊ༔ ཨཱོཾ་པདྨ་ཀྲོ་ཏ་ཨགྣཱེ་ཡེ་བདག་ཅག་དཔོན་སློབ་རྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་ཛྭ་ལ་རཾ་རཾ་ཧཱུྃ་ཕཊ༔ ཅེས་སྤྱི་ཁྱབ་ཏུ་དེ་ལྟར་དང་། རྒྱས་པར་ན་གཙོ་འཁོར་ཐམས་ཅད་ལ་རང་རང་གི་སྔགས་དང་བཅས་བརྒྱ་རྩ་སོགས་སྐབས་དང་སྦྱར་ཏེ་འབུལ། དེ་ནས་མར་ནག་གིས་དགང་གཟར་བཀང་སྟེ། ཨཱོཾ་ཨཱཿཧཱུྃ་ཨ་རྩིག་ནེ་རྩིག་ན་མོ་བྷ་ག་ཝ་ཏེ་ཧཱུྃ་ཕཊ༔ ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བ་ཧ་ན་ཡེ། བདག་ཅག་དཔོན་སློབ་རྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་རྦད། ཅེས་བྱོན་སྐྱེམས་ལྟར་གཤེགས་སྐྱེམས་ཀྱང་བདུན་ནམ་གསུམ་གང་བདེར་འབུལ། ཧཱུྃ། པདྨ་དྲག་པོའི་ལྷ་ཚོགས་ལ། ལོག་འདྲེན་འབྱུང་པོ་བསྒྲལ་བ་ཡི། །ཕུང་ཁམས་སྐྱེ་མཆེད་ལས་བྱུང་བའི། །ཉེར་སྤྱོད་ལྔ་དང་སྨན་གཏོར་ཁྲག །རྔམ་བརྗིད་འཇིགས་པའི་མཆོད་པའི་ཚོགས། །འཇིག་རྟེན་ཁམས་ཀུན་བཀང་སྟེ་འབུལ། ཨཱོཾ་པདྨ་ཀྲོ་ཏ་ས་པ་རི་ཝཱ་ར་ཨརྒྷཾ་ནས་ཤཔྟ་མ་ཧཱ་པཉྩ་ཨ་མྲྀ་ཏ་མ་ཧཱ་རཀྟ་བ་ལིངྟ་པཱུ་ཙ་ཁཱ་ཧི། ཞེས་པས་མཆོད། ཨཱོཾ་བཛྲ་ཏམྦུ་ལཱ་ཡེ་སྭཱ་ཧཱས་སོ་རྩི་དང་། ཨཱོཾབཛྲ་ཝསྟྲ་ཡེ་སྭཱ་ཧཱས་གོས་ཟུང་དབུལ་ཞིང་། བསྟོད་པ་ནི། ཧཱུྃ། རྒྱལ་བའི་སྤྱི་གཟུགས་དབང་དྲག་རྫོགས༔ ཞེས་པ་ནས་གྷ་རུ་ཌ་ལ་ཕྱག་འཚལ་བསྟོད༔ ཅེས་པའི་བར་གྱིས་བསྟོད་ཅིང་འཕྲིན་ལས་བཅོལ་བ་ནི། ཧོ༔ དུས་གསུམ་སངས་རྒྱས་ཀུན་གྱི་སྤྱི་གཟུགས། རིགས་དང་དཀྱིལ་འཁོར་ཀུན་གྱི་ཁྱབ་བདག །དཔལ་ཆེན་ཁྲོ་བོ་ཀུན་གྱི་སྤྱི་དཔལ། དམ་ཅན་རྒྱ་མཚོའི་ཚོགས་ཀྱི་ཡང་རྗེ། དཀྱིལ་འཁོར་ཀྱི་དབང་ཕྱུག་དབང་དྲག་པདྨ་དྲག་པོ། རིགས་བདག་ཆགས་པ་དམར་པོ། སྐུ་ཡི་ཁྲོ་བོ་འཇམ་དཔལ་གཤིན་རྗེ། གསུང་གི་ཁྲོ་བོ་དབང་ཆེན་རྟ་མགྲིན། ཐུགས་ཀྱི་ཁྲོ་བོ་གསང་བདག་ཕྱག་རྡོར། ཡོན་ཏན་གྱི་ཡུམ་ཆེན་མཁའ་འགྲོ་སྡེ་ལྔ། འཕྲིན་ལས་ཀྱི་ལས་མཁན་ཡཀྴ་མེ་དབལ། བདུད་འདུལ་གྱི་ཕོ་ཉ་ལྕགས་སྡིག་ནག་པོ། ཀླུ་གཉན་གྱི་གཤེད་པོ་བྱ་ཁྱུང་རྒྱལ་པོ། རིགས་བཞིའི་དྲག་པོ་སྡེ་བཞི། འཇིགས་བྱེད་ཀྱི་ཁྲོ་བོ་བཅུ། །ཕྲ་མེན་དྷཀྐི་སྡེ་བཞི། །མཐུ་ལྡན་དམ་ཅན་རྒྱ་མཚོ། སྲོག་གཅོད་ལྷ་སྲིན་སྡེ་བརྒྱད་འཁོར་དང་བཅས་པ་ཁྱེད་རྣམས་ལ་འཕྲིན་ལས་གཉན་པོ་བཅོལ་བ་ནི། སྤྱི་སྒོས་བསྟན་པའི་རུ་ཏྲ་ཕྱོགས་བཅུ་གང་དུ་མཆིས་ཀྱང་ཐལ་བའི་རྡུལ་དུ་རློགས་ཤིག །གནོད་བྱེད་ལོག་འདྲེན་འབྱུང་པོ་སུ་དང་གང་གིས་གནོད་ཀྱང་མིང་ཡང་མེད་པར་མཛོད་ཅིག །བྱད་དང་རྦད་འདྲེ་རྦོད་གཏོང་བན་བོན་གང་གིས་བཏང་ཡང་རང་གཤེད་རང་ལ་ཐོབ་ཅིག །ཟ་འདྲེ་གོད་འདྲེའི་རྒྱུན་ལམ་མི་ནོར་གང་ལ་ཟུག་ཀྱང་གནོད་པའི་རྒྱུན་ལམ་ཆོད་ཅིག །མདོར་ན་གནོད་ཅིང་འཚེ་བར་བྱེད་པའི་དམ་སྲི་བདུད་སྡེ་དཔུང་དང་བཅས་པ་ཐམས་ཅད་མཐུ་སྟོབས་བསྐལ་མེ་འབར་བའི་ཀློང་དུ་བཞེས་ཤིག །ཅེས་འདོད་པའི་དོན་ལ་གསོལ་བ་གདབ། ཡི་གེ་བརྒྱ་པས་ལྷག་ཆད་བསྐང་། བཟོད་གསོལ། ཧཱུྃ། ཏིང་འཛིན་ཉམས་དང་རྫས་མ་ཚོགས། །བཟླས་བརྗོད་མ་དག་ཆོ་ག་འཁྲུལ། །དེ་སོགས་ཉམས་པ་ཅི་མཆིས་ལ། །བཟོད་པར་གསོལ་ལོ་ཚངས་པར་མཛོད། །གཤེགས་གསོལ་ནི། ཧཱུྃ། ཡང་གསང་ཁྲོས་པ་དྲག་པོའི་ལྷ༔ ཤེས་བྱའི་རེ་བ་བཀང་ནས་ཀྱང་། སྐྱེ་མེད་ཀློང་དུ་གཤེགས་སུ་གསོལ༔ དམ་ཚིག་ལྷ་ཚོགས་རང་ལ་བསྡུ༔ དམིགས་མེད་བློ་འདས་རང་བབས་སྐྱོང་༔ ཞེས་ཡེ་ཤེས་པ་གཤེགས་དམ་ཚིག་པ་རང་ལ་བསྡུ། སླར་ཡང་འཇིག་རྟེན་གྱི་མེ་ལྷ་ཐབས་ཀྱི་ཤར་ལྷོར་དཔང་པོར་བཞུགས་པ་བཛྲ་ས་མཱ་ཛ༔ དམ་ཚིག་པ་དང་གཉིས་སུ་མེད་པར་གྱུར་པ་ལ། ཨཱོཾ་ཨགྣཱེ་ཡེ་དེ་ཝ་ས་པ་རི་ཝཱ་ར་ཨརྒྷཾ་ནས་ཤཔྟ་པཉྩ་ཨ་མྲྀ་ཏ་མ་ཧཱ་རཀྟ་བ་ལིངྟ་པཱུ་ཙ་ཁཱ་ཧི༔ ཅེས་མཆོད་ཅིང་། གཟི་བརྗིད་འབར་བ་མེ་ཡི་ལྷ། རིགས་སྔགས་གྲུབ་པའི་དྲང་སྲོང་ཆེ༔ འཇིག་རྟེན་འདས་ཀྱང་སྲིད་པ་ཡི༔ རྣམ་པར་རོལ་པ་ཁྱོད་ལ་འདུད༔ ཅེས་བསྟོད་ཅིང་། ཧཱུྃ། དྲག་པོའི་ཤིང་དང་དགྲ་བགེགས་གཟུགས། །དྲག་རྫས་གནད་འབེབས་གསོད་དང་མྱོས། །ཚ་བའི་རྫས་རྣམས་ལས་གྲུབ་པའི། །གཏང་རག་མཆོད་པ་འབུལ་གྱིས་བཞེས། །ཨཱོཾ་ཨགྣཱེ་ཡེ་སྭཱ་ཧཱས་མར་ཁུ་དང་། ཨཱོཾ་ཨགྣཱེ་ཡེ་ཡ་ཛྙཱ་ན་ཡ་སྭཱ་ཧཱས་ཡམ་ཤིང་དང་། རྫས་གཞན་རྣམས་ལ། ཨཱོཾ་ཨགྣཱེ་ཡེ་ཀྲོ་ཏ་གནོད་བྱེད་དགྲ་བགེགས་མཱ་ར་ཡ་ཛྭ་ལ་རཾ་རཾ་ཧཱུཾ་ཕཊ༔ ཅེས་པ་རྣམས་ཀྱི་མང་ཉུང་སྐབས་དང་བསྟུན་ཏེ་འབུལ། ཨཱོཾ་ཨགྣཱེ་ཡེ་སྭཱ་ཧཱ༔ ཨཱོཾ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ན་ཡེ་བདག་ཅག་དཔོན་སློབ་རྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་རྦད༔ ཅེས་པས་གཤེགས་སྐྱེམས་འབུལ། ཨཱོཾ་བཛྲ་ཏམྦུ་ལཱ་ཡེ་སྭཱ་ཧཱས་སོ་རྩི་དང་། ཨཱོཾ་བཛྲ་ཝསྟྲ་ཡེ་སྭཱ་ཧཱས་གོས་ཟུང་འབུལ། དམར་གཏོར་ལ། ཨཱོཾ་ཨཱགྣཱེ་ཡེ་ས་པ་རི་ཝཱ་ར་མ་ཧཱ་བྷ་ལིངྟ་པཱུ་ཙ་ཁཱ་ཧི། གསུམ་མམ་བདུན་གྱིས་གཏོར་མ་འབུལ། སླར་ཡང་། ཨཱོཾ་ཨགྣཱེ་ཀྲོ་དྷ་རཱ་ཛ་ས་པ་རི་ཝ་ར་ཨརྒྷཱཾ་ནས་ཤཔྟ་མ་ཧཱ་ཨ་མྲྀ་ཏ་མ་ཧཱ་རཀྟ་བྷ་ལིངྟ་པཱུ་ཙ་ཁཱ་ཧིས་མཆོད། ཧཱུྃ། ཤེས་རབ་ཡེ་ཤེས་འབར་བའི་མེས། །ཉོན་མོངས་བུད་ཤིང་ཀུན་བསྲེག་ཅིང་། །དྲག་པོའི་སྟོབས་ཀྱིས་བགེགས་འཇོམས་པའི། །ཁྲོ་ཆེན་མེ་ཡི་ལྷ་ལ་བསྟོད། ཀྱིས་བསྟོད་ཅིང་ཡི་གེ་བརྒྱ་པ་རྗོད། མ་འབྱོར་བ་དང་ཉམས་པ་དང་། །གང་ཡང་བདག་བློ་གཏི་མུག་པས། །ལེགས་བྱས་འདི་ལ་ཉེས་གྱུར་གང་། །མེ་ལྷ་ཁྱོད་ཀྱིས་བཟོད་པར་མཛོད། །ཅེས་ནོངས་པ་བཟོད་པར་གསོལ། འདོད་པའི་དོན་རྣམས་གང་ཡིན་པ། །མེ་ཡི་ཁྲོ་བོས་བསྒྲུབས་ཟིན་པས། གནས་སུ་གཤེགས་ཏེ་འགྲོ་བའི་དོན། སྒྲུབ་ཕྱིར་སླར་ཡང་འབྱོན་འཚལ་ལོ། བཛྲ་མུ༔ ས་ཡེ་ཤེས་པ་གཤེགས། དམ་ཚིག་པ་མེའི་རྣམ་པར་གྱུར་པར་བསམ་མོ། ཧཱུྃ། པདྨ་དྲག་པོའི་ལྷ་ཚོགས་ལ༔ སྒོམ་སྒྲུབ་མཆོད་བསྟོད་ཕུལ་བའི་མཐུས༔ ཐམས་ཅད་སངས་རྒྱས་འཐོབ་པར་ཤོག༔ དབང་དང་དྲག་པོའི་འཕྲིན་ལས་ཀྱིས༔ མཆོག་ཐུན་དཔལ་ལ་སྤྱོད་པར་ཤོག༔ ཅེས་སོགས་བསྔོ་སྨོན་དང་། ཧཱུྃ། ཆོས་དབྱིངས་རོལ་པ་ཆེན་པོ་ནས༔ འཕྲིན་ལས་འགྲོ་བའི་དོན་དུ་སྤྲུལ༔ མཆོག་དང་ཐུན་མོང་ཀུན་གྱི་བདག༔ རྩ་བ་གསུམ་གྱི་བཀྲ་ཤིས་ཤོག༔ ཅེས་སོགས་ཤིས་བརྗོད་རྒྱས་པར་བྱ་ཞིང་། མེ་དུག་ཁྲག་གིས་གཞིལ་བའི་ཐལ་བ་མཆོད་རྟེན་ནམ་ཐེམ་འོག་གམ་ལམ་རྒྱ་གྲམ་དུ་མནན་པ་རྟ་བྲོ་བརྡུང་ཞིང་མཐའ་རྒྱས་བྱའོ། ཅེས་པ་འདི་ཡང་རིག་འཛིན་མཆོག་གི་སྤྲུལ་པའི་སྐུ་ཉིད་ཀྱི་གསུང་གི་གནང་བ་ཐོབ་པ་ལྟར་གཏེར་གཞུང་རྩ་བ་དྲག་པོའི་སྦྱིན་སྲེག་ལས། མེ་ལྷ་ལྕགས་སྡིག་འབར་བར་བསྒོམ༔ ཡམ་ཤིང་ལ་སོགས་སྲེག་རྫས་འབུལ༔ མེ་ཡི་ངོ་བོ་ལྕགས་སྡིག་ལ༔ རྣམ་པ་དྲག་པོའི་དཀྱིལ་འཁོར་ལྷ༔ ཐམས་ཅད་སྐུ་མདོག་ནག་པོར་སྒྱུར༔ སྤྱན་འདྲེན་མཆོད་བསྟོད་སྲེག་རྫས་འབུལ༔ ཞེས་སོགས་དགྲ་བགེགས་ཀུན་འཇོམས་ཀྱི་རྩ་བར་གཞི་བྱས། ཕལ་མོ་ཆེ་དག་གི་ལས་བཞི་སྤྱི་ཁྱབ་ཀྱི་སྦྱིན་སྲེག་ལ། སྔགས་ཀྱི་ཤམ་བུ་སྒྱུར་བ་ཙམ་ལ་དྲག་པོའི་སྦྱིན་སྲེག་ཇི་ལྟ་བར་འདོད་པ་རྣམས་ཀྱི་རྗེས་སུ་མ་འབྲངས་པར། དྲག་སྒྲུབ་ཀྱི་གཏེར་ཁ་མང་དུ་ཐོས་པ་རྣམས་དང་། པད་གནུབས་ཀྱི་དྲག་སྔགས་དུ་མར་འབྱུང་བའི་དྲག་པོའི་སྦྱིན་སྲེག་ཁོ་ན་ལྟར་ཆགས་རི་ཨུ་རྒྱན་བདེ་སྐྱིད་གླིང་དུ་རིག་འཛིན་མཐུ་སྟོབས་རྡོ་རྗེ་བདུད་ལས་རྣམ་པར་རྒྱལ་བའི་དབང་ཕྱུག་གིས་སྦྱར་བ་འདིས་ཀྱང་འགྲོ་ཀུན་བདུད་སྡེའི་གཡུལ་ལས་རྣམ་པར་རྒྱལ་བར་གྱུར་ཅིག། །། དགེའོ།། །།ལས་དང་ཉོན་མོངས་མི་བཟད་རང་གཟུགས་ནི། །བདུད་སྡེ་ཚང་ཚིང་འཁྲིགས་པའི་བུད་ཤིང་རྣམས། །རབ་འབར་ཡེ་ཤེས་ཆེན་པོའི་ཧོམ་ཞལ་དུ། །བཏབས་ན་ལོག་འདྲེན་མིང་གི་ལྷག་མར་བྱེད། །འཇིགས་རུང་གར་དགུའི་ཉམས་ལྡན་ཧེ་རུ་ཀ །ཁྲོ་རྒྱལ་དྲག་པོར་ཁྲོས་པའི་ལས་ཀྱི་མཐའ། །སྦྱིན་སྲེག་བདུད་དཔུང་བསྲེག་པ་བསྐལ་བའི་མེ། །ཆོས་དབྱིངས་ཀློང་ཆེན་ཡངས་པའི་ངང་ཉིད་ལ། །མ་རྟོག་ལོག་པར་བཟུང་འཛིན་དགྲ་བགེགས་རྣམས། །ལྷ་སྔགས་ཏིང་འཛིན་ཡེ་ཤེས་ཞུགས་ཀྱིས་སྦྱངས། །ལེགས་བྱས་འདི་ཡིས་མཁའ་མཉམ་ལུས་ཅན་རྣམས། །དཔལ་ཆེན་གོ་སར་གེགས་མེད་མྱུར་ཕྱིན་ཤོག །ཅེས་པདྨ་ཐེག་མཆོག་བསྟན་པའི་རྒྱལ་མཚན་གྱིས་པར་བྱང་དུ་བཀོད་པའོ། །མངྒ་ལཾ།། །།