ནཱ་ག་རཀྴའི་སྐོར།

ཀླུ་བདུད་སྒྲུབ་ཐབས་གནམ་ལྕགས་ཐོག་རྒོད།

ཀླུ་བདུད་སྒྲུབ་ཐབས་གནམ་ལྕགས་ཐོག་རྒོད་བཞུགས༔ སུརྱ་ཀིརྟིའི་གཏེར་མ་ལགས་སོ། །ཁྲོ་བོའི་རྒྱལ་ལ་ཕྱག་འཚལ་ལོ༔ མ་འོངས་བོད་ཀྱིས་མི་དགེར་འབུང་༔ དཀར་ཕྱོགས་ཉམས་ཤིང་ནག་ཕྱོགས་དར༔ ཁྱད་པར་གཟའ་ཀླུས་མི་ཐོག་འཇོམས༔ དེ་དུས་འགྲོ་ལ་ཕན་དོན་དུ༔ ཤིན་ཏུ་ཟབ་པའི་གདམས་པ་ཞིག༔ ཡི་གེར་འདེབས་ནས་གཏེར་དུ་བཅོལ༔ ལས་འཕྲོ་ཅན་དང་འཕྲད་པར་ཤོག༔ གཅེས་སོ་སྙིང་གི་དཀྱིལ་དུ་ཆོངས༔ གཉན་པས་གསང་བར་མ་ཤེས་ན༔ རང་གི་སྲོག་ལ་འོང་བར་འགྱུར༔ ཞི་བའི་གནས་སམ་དབེན་པའི་གནས༔ ལྟ་སྤྱོད་མཐུན་པའི་སྐལ་ལྡན་གྱིས༔ དྲག་པོའི་གནས་སུ་བསྒྲུབ་པར་བྱ༔ དྲག་པོའི་ཉི་ཁྱིམ་ལོ་ཟླའི་ཁམས༔ ཡང་ན་དྲག་པོའི་འགྲུབ་སྦྱོར་ལ༔ མཎྜལ་དུག་ཁྲག་ཆག་ཆག་གདབ༔ ཚངས་པའི་ཐིག་བཙལ་གྲུ་གསུམ་དབུས༔ དུག་ཁྲག་རྒྱ་མཚོའི་རི་མོ་བྱ༔ དེ་ཡི་ཕྱི་རིམ་པད་འདབ་བཞིར༔ ཕུ་བཞི་བྲི་ཞིང་ཕྱོགས་མདོག་སྒྱུར༔ ཁྱམས་དང་སྒོ་སོགས་སྤྱི་འགྲོས་ལ༔ རིན་ཆེན་སྣ་ཚོགས་ལས་གྲུབ་བྲི༔ དེ་ཡི་ཕྱི་རིམ་རྒྱ་མཚོས་བསྐོར༔ དེ་ཡི་ཕྱི་རིམ་རིན་ཆེན་བྲག༔ རྒྱ་མཚོའི་ནང་དུ་རིན་ཆེན་སྦྲུལ༔ མཛེས་པའི་ཚོན་གྱིས་ཁ་དོག་བསྒྱུར༔ དབུས་སུ་མཉྫིའི་ཁྲིའུའི་ཁར༔ དཔལ་གྱི་གཏོར་མ་བརྗིད་ལྡན་བཤམས༔ གཡས་གཡོན་སྨན་རཀ་ཐ་མ་ལ༔ རྣམ་ལྔ་ལ་སོགས་སྤྱི་འགྲོས་བྱ༔ གཏོར་མར་ཀླུ་བདུད་ཙག་ལི་གཟུགས༔ མཐིང་ནག་དར་གུར་ལེགས་པར་ཕུབ༔ རང་ཉིད་བདེ་བའི་གདན་ལ་འདུག༔ ལས་གཞུང་བསྲང་ཞིང་ཀླུ་བདུད་བསྒོམ༔ སྤྱན་འདྲེན་མཆོད་ཅིང་བསྟོད་ནས་ཀྱང་༔ བདག་དང་མདུན་བསྐྱེད་ཐུགས་ཀ་ནས༔ ས་བོན་ཕེ་ལས་འོད་འཕྲོས་པས༔ ཀླུ་དང་ས་བདག་ཉི་ཁྲི་འབུམ༔ ཁྱད་པར་གནོད་པའི་ཀླུ་ས་བདག༔ ཐམས་ཅད་སྐད་ཅིག་དབང་དུ་སྡུས༔ འབྲུ་བཞིའི་སྔགས་ཀྱིས་སྒྲ་སྒྲོགས་པས༔ ཀུན་ཀྱང་འབོགས་བརྒྱལ་སྙིང་རྩ་ཡེད༔ དམྱལ་སྒྲ་དིར་དིར་ཡོད་པར་བསྒོམ༔ སྔགས་དང་དམིགས་པ་གནད་དུ་བསྣུན༔ ཨཱོཾ་ཕེ་ལཾ་ཧཱུྃ༔ ཅེས་པ་ཡང་སྙིང་འབྲུ་བཞི་འདི༔ ཤུབ་བུས་འབུམ་ཕྲག་བདུན་བཟླ་ཞིང་༔ ཐུན་མཚམས་མཆོད་བསྟོད་གཏོར་མ་འབུལ༔ སྐབས་སྐབས་དམིགས་མེད་གནས་ལུགས་སྐྱོང་༔ བསྙེན་སྒྲུབ་ཐེམས་ནས་གཏོར་མ་ལས༔ དབང་བཞི་ལེན་ཅིང་གནས་གསུམ་གཏུག༔ རང་དང་ཁྲོ་རྒྱལ་གཉིས་མེད་བསམས༔ རྫོགས་རིམ་བསྒོམ་ཞིང་མཉམ་པར་བཞག༔ རྒྱུན་དུ་མཆོད་བསྟོད་རྩ་བསྙེན་བརྒྱའི༔ དམ་བཅའ་བཟུང་ཞིང་ཤིན་ཏུ་གསང་༔ ས་མ་ཡ༔ རྒྱ་རྒྱ་རྒྱ༔ དེ་ལྟར་བསྒྲུབ་ཅིང་བསྙེན་པའི་ཚེ༔ རྟགས་ཀྱི་རིམ་པ་འདི་ལྟར་འབྱུང་༔ ཕྱི་རྟགས་ལུས་ལ་ཤུ་བ་དང་༔ ཐོར་པ་ལང་ལོང་འཆར་བ་དང་༔ སྦྲིད་དང་འདར་དང་རྩེ་ཤུམ་འབྱུང་༔ ས་མ་ཡ༔ རྒྱ་རྒྱ་རྒྱ༔ ནང་རྟགས་རྨི་ལམ་རྒྱ་ལས་ཐར༔ བཀྱིགས་པ་དཀྲོལ་དང་བཟུང་བ་བཏང་༔ བྲག་གཤགས་ལིངས་བཏབ་ཆུ་བཅད་པ༔ གོ་གྱོན་གཡུལ་འགྱེད་མཚོ་ཆེན་སྐམས༔ དེ་ལ་སོགས་པ་སྣ་ཚོགས་འབྱུང་༔ ས་མ་ཡ༔ རྒྱ་རྒྱ་རྒྱ༔ གསང་རྟགས་ཞེ་སྡང་མེ་ལྟར་འབར༔ དྲན་པས་རེས་ཟིན་རེས་མི་ཟིན༔ ཁ་སྐམ་ལུས་རྔུལ་དབུགས་འཚང་དགོག༔ གཤང་ལྕིའི་ལམ་ལ་སྦལ་སྦྲུལ་སྡོམ༔ དངོས་སུ་འདོན་པ་ལ་སོགས་འབྱུང་༔ རྟགས་གསལ་བསྙེན་པ་བསྲིང་བ་དང་༔ གནས་ལུགས་སྐྱོང་ཞིང་མཆོད་སྦྱིན་འབད༔ ས་མ་ཡ༔ རྒྱ་རྒྱ་རྒྱ༔ བསྙེན་སྒྲུབས་མ་རྫོགས་རྟགས་གསལ་ན༔ བསྙེན་པ་ཅུང་བསྲིང་མཚམས་མི་འགྲོལ༔ བསྙེན་གྲངས་རྫོགས་ཀྱང་རྟགས་མེད་ན༔ སྒྲུབ་པ་སྤོ་ཆོག་ནན་ཏན་བསྐྱེད༔ ཤིན་ཏུ་གསང་ཡིག་གབ་པར་ལྟོས༔ ས་མ་ཡ༔ རྒྱ་རྒྱ་རྒྱ༔ ཨེ་མ་གསང་བའི་ཐུགས་ཀྱི་བཅུད༔ ཤིན་ཏུ་གསང་བའི་ཡང་སྙིང་འདི༔ བོད་ཡུལ་གངས་ཀྱི་རི་ལྗོངས་འདིར༔ མཐའ་དབུས་ལྔ་ལ་གཏེར་དུ་སྦས༔ ཤར་གཏེར་ལྷོ་གཏེར་ནུབ་ཀྱི་གཏེར༔ བྱང་གཏེར་དབུས་གཏེར་རྒྱལ་པོའི་སྐོར༔ སྐལ་ལྡན་ལྔ་ལ་སྨོན་ལམ་བཏབ༔ ཁྱད་པར་འཕགས་པའི་གདམས་པ་འདི༔ ཤར་གཏེར་རྡོ་རྗེའི་ཆོས་སྐོར་དུ༔ ཤར་ཕྱོགས་མཐོན་པོའི་རི་བོའི་ལྷོ༔ ཅི་མདའ་བྲག་དམར་མགུལ་དུ་སྦས༔ ནམ་ཞིག་དུས་ཀྱི་ཐ་མ་ལ༔ ལས་འཕྲོ་ཅན་དང་འདི་འཕྲད་ནས༔ འགྲོ་བའི་སྡུག་བསྔལ་སེལ་བར་ཤོག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ཁ་ཐཾ་གྷུ་ཧྱ༔ དྷ་ཐིམ་ཨྠིྀ༔ ཨྠིྀ༔ ཨྠིྀ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་ནགས་ཤོད་ཅི་མདའ་བྲག་དམར་ནས་ས་རྟ་ལ་གདན་དྲངས་ཤིང་ལྕགས་སྤྲེལ་ལ་ཤོག་སེར་ལས་བོད་ཡིག་ཏུ་བསྒྱུར་བའོ། །མངྒ་ལཾ།། །།

ཤིན་ཏུ་གསང་བའི་གབ་ཡིག

ཀླུ་བདུད་ནག་པོའི་གདམས་པ་ལས༔ ཤིན་ཏུ་གསང་བའི་གབ་ཡིག་བཞུགས༔ ཁྲོ་བོའི་རྒྱལ་ལ་ཕྱག་འཚལ་ལོ༔ ཀླུ་གདོན་ས་བདག་གནོད་པས་གཙེར༔ ཁྲོ་རྒྱལ་བསྙེན་ཅིང་སྒྲུབ་པའི་ཚེ༔ རྟགས་མེད་འགྱངས་ཤིང་ཞུད་པ་ན༔ སྒྲུབ་པའི་སྙིང་པོ་བསྐྱེད་རིམ་ཡིན༔ ཡང་གསལ་ཡང་བསྐྱེད་མ་ཡེངས་འབད༔ དྲོད་རྟགས་རྩ་བ་བསྙེན་གྲངས་ཡིན༔ བརྩོན་འགྲུས་བསྐྱེད་ལ་ནན་གྱིས་བཟླ༔ དངོས་གྲུབ་རྩ་བ་དད་པ་ཡིན༔ ཁྱེད་ཤེས་བློ་ཡི་འདུན་པ་བཀལ༔ འདི་ནི་ཡི་དམ་མཐར་ཐུག་སྟེ༔ དོན་ལ་གསང་བདག་རྡོ་རྗེ་འཛིན༔ ནག་པོ་ཀླུ་རྣམས་འདུལ་བའི་གཤེད༔ ཤིན་ཏུ་གཉན་ཅིང་རབ་ཏུ་གཉན༔ འཆལ་ན་རང་གི་སྲོག་ལ་འོང་༔ མ་སྤེལ་སྙིང་གི་དཀྱིལ་དུ་སྦོས༔ ནག་པོ་ཏི་པ་ཙ་ཡ༔ ནཱ་ག་རཀྴ༔ ཨཱོཾ་ཕེ་ལཾ་ཧཱུྃ༔ ཅེས་བཟླས་བདག་མདུན་ཁྲོ་བོའི་རྒྱལ༔ འོད་ཟེར་སྤྲོ་བསྡུ་དྲག་ཏུ་ཁྲོ༔ ཀླུ་དང་ས་བདག་དབང་དུ་བསྡུས༔ ཟིལ་གྱིས་མནན་ཅིང་ཟས་སུ་ཟ༔ རྡུལ་ཕྲན་བཞིན་དུ་བརླགས་པ་དང་༔ མེ་ལྕེ་ཁ་ཡི་སྦྲང་བུ་ལྟར༔ སྐད་ཅིག་ཉིད་ལ་འཇོམས་པར་བསྒོམ༔ མ་ཡེངས་འདུན་པ་རྩེ་གཅིག་ངང་༔ འབུམ་ཕྲག་གསུམ་དུ་བཟླས་པ་ཡིས༔ ཀླུ་གཉན་ས་བདག་གནོད་པ་ཞི༔ ཙི་ཙི་ཛྭ་ལའི་ནད་ལས་ཐར༔ སྒྲུབ་གཞུང་ལྟ་བུར་རྟགས་གསལ་ནས༔ བསྙེན་པ་འཕྲོ་བཅད་ངལ་གསོའོ༔ འཁོར་ལོ་བཏགས་ཤིང་སྨན་སྦྱོར་བསྟེན༔ རྫོགས་རིམ་ཏིང་འཛིན་མཉམ་པར་འཇོག༔ ཆོས་རྣམས་དམིགས་མེད་ལ་ཟླའོ༔ སྒྱུ་ལུས་མཆོད་སྦྱིན་ཆག་མེད་འབད༔ དེས་ནི་སྔོན་ལས་སྒྲིབ་པ་བྱང་༔ ཀླུ་ཆོག་འདོན་དང་ཀླུ་གཏོར་བཏང་༔ ཀླུ་ཡི་སྡེར་ཕན་ཕྱི་མ་བདེ༔ ས་མ་ཡ༔ རྒྱ་རྒྱ་རྒྱ༔ ཀླུ་གདོན་ཀླུ་ཡིས་ཟིན་པའི་ཚེ༔ དང་པོ་རྩ་ཡི་བརྒྱུད་ནས་འཇུག༔ ཐ་མ་ཀླུ་ཡི་ནད་འབྱུང་དུས༔ རྩ་ནས་འཐོན་ཞིང་འབྲོས་པར་འགྱུར༔ དེ་ཕྱིར་དངངས་སྐྲག་འདར་ཞིང་ཡེད༔ སྦྲིད་དང་འཐོམ་དང་བརྒྱལ་དང་འབོགས༔ ཤུ་ཐོར་ལ་སོགས་གང་བྱུང་ཡང་༔ བྲེད་པར་མི་བྱ་མན་ངག་ཡིན༔ རྟགས་རྫོགས་བསྙེན་པ་མ་བཅད་ན༔ དྲག་པོ་ཁྲོས་པའི་སྟོབས་རྫོགས་ནས༔ འཚང་ཁའི་སྐྱོན་གྱིས་བསྡུ་ཉེན་ཆེ༔ གསང་སྒྲུབ་གསང་བའི་དྲག་སྔགས་འདི༔ ཇི་ཙམ་གསང་ཞིང་དངོས་གྲུབ་མྱུར༔ གསང་བའི་རྒྱ་རལ་དངོས་གྲུབ་བརླག༔ དེ་ཕྱིར་སྙིང་ལ་གབ་ནས་ཀྱང་༔ རླུང་ཕྱོགས་ཙམ་དུ་བསྒྲག་མི་བྱ༔ ཆིག་བརྒྱུད་མནའ་རྒྱ་ལན་གསུམ་བསྐྱལ༔ ཤིན་ཏུ་ཟབ་པའི་གབ་ཡིག་འདི༔ རབ་ཏུ་གསོངས་ཤིག་ཨ་ཐམ་རྒྱ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ སོ་ཕག་ཤི་ན་རྒྱ༔ ས་མ་ཡཱ༔ ན་ར་ཀན་རྒྱ༔ སྤྲང་བན་ཉི་མ་གྲགས་པས་ས་རྟ་ཧོར་ཟླ་དྲུག་པ་ལ་ཅི་མདའ་བྲག་དམར་ནས་གདན་དྲངས་ཤིང་ལྕགས་སྤྲེ་ལ་བོད་ཡིག་ཏུ་བསྒྱུར་བའོ། །མངྒ་ལཾ།། །།

དབང་ཆོག་གནམ་ལྕགས་དྲག་མེ།

ཀླུ་བདུད་ནག་པོའི་གདམས་པ་ལས༔ དབང་ཆོག་གནམ་ལྕགས་དྲག་མེ་བཞུགས༔ ཁྲོ་བོའི་རྒྱལ་ལ་ཕྱག་འཚལ་ལོ༔ དབེན་པའི་གནས་སུ་དཀྱིལ་འཁོར་ནི༔ སྒྲུབ་པའི་གཞུང་ལྟར་བཤམས་ནས་ཀྱང་༔ གཡས་སུ་གྲི་གུག་གཡོན་སྦྲུལ་ཞགས༔ ཀླུ་དང་ཁྱུང་གི་ཙཀ་ལི་བསགས༔ སྨན་རག་མཆོད་པ་སྣ་ཚོགས་བཤམས༔ ལས་གཞུང་བསྲང་ཞིང་བསྙེན་སྒྲུབ་གསོ༔ ཏིང་འཛིན་བསྐྱེད་ཅིང་དམིགས་པ་བསྒྱུར༔ ཀླུ་དང་ས་བདག་དབང་བསྡུས་ནས༔ ཟིལ་གྱིས་མནན་ཅིང་བཀའ་ཉན་བསམས༔ བུམ་པ་བསང་སྦྱངས་སློབ་མ་བཀྲུ༔ བགེགས་གཏོར་བསྔོ་ཞིང་མཚམས་གཅོད་བྱ༔ དབང་ཡོན་གོ་ཁྲབ་མཎྜལ་དབུལ༔ དབང་དོན་མཚམས་སྦྱོར་ལོ་རྒྱུས་སྤྲོ༔ སློབ་དཔོན་ལྷར་གསལ་གསོལ་བ་གདབ༔ ཀྱེ་ཁྲོ་བོའི་རྒྱལ་པོ་འབར་བའི་སྐུ༔ གདུག་པ་འདུལ་མཛད་ཧེ་རུ་ཀ༔ འབར་བ་དབང་གི་དཀྱིལ་འཁོར་དུ༔ བདག་ནི་སྨིན་པར་མཛད་དུ་གསོལ༔ ལན་གསུམ༔ ལན་སྦྱིན་པ་ནི༔ ཧཱུྃ༔ ང་ནི་དཔལ་ལྡན་ཧེ་རུ་ཀ༔ ཁྱོད་ཅག་རྡོ་རྗེའི་བུ་ཡིན་ནམ༔ དམ་ཚིག་བཀའ་ལས་མི་འདའ་ཞིང་༔ ཚུལ་བཞིན་སྒྲུབ་པར་བརྩོན་ནུས་སམ༔ ལན་གསོལ་བ༔ དགོངས་ཤིག་ཁྲོ་རྒྱལ་འཇམ་དཔལ་གཤིན་རྗེའི་གཤེད༔ བདག་ནི་གསང་བའི་ཆོས་ལ་དད༔ བཀའ་ལས་མི་འདའ་དམ་ཚིག་བསྲུང་༔ ལུས་སྲོག་འབེན་བཙུགས་སྒྲུབ་ལ་བརྩོན༔ ཁྱེད་ཀྱིས་རྗེས་སུ་འཛིན་པར་ཞུ༔ དེ་ནས་དམ་ཆུ་བླུད་དེ༔ ཧཱུྃ༔ འདི་ནི་དམ་ཚིག་རྡོ་རྗེའི་ཆུ༔ དམ་ཚིག་བསྲུངས་ན་དངོས་གྲུབ་འཐོབ༔ དམ་ཚིག་ཉམས་ན་རྡུལ་དུ་བརླག༔ དེ་བས་ཁྱོད་ཀྱིས་དམ་ཚིག་སྲུངས༔ ནཱ་ག་རཀྴ་ཙིཏྟ་ནི་ཧཱུྃ༔ དེ་ནས་མགོ་ལ་རྡོ་རྗེ་བཞག་སྟེ༔ ཧཱུྃ༔ ང་ནི་རྡོ་རྗེ་འཛིན་པ་སྟེ༔ རྡོ་རྗེ་འཆང་དབང་ང་ཡི་བཀའ༔ ཁྱོད་ཀྱིས་ཚུལ་བཞིན་རྟག་ཏུ་སྲུངས༔ ནམ་ཡང་འདའ་བར་མ་བྱེད་རྒྱ། ས་མ་ཡ་བཛྲ་ཧཱུྃ༔ སྐྱབས་སེམས་ཕོག་ལ་ཡེ་ཤེས་དབབ༔ ཏིཥྛ་བཛྲ་མེ་ཏོག་འཐོར༔ ས་མ་ཡཱ༔ རྒྱ་རྒྱ་རྒྱ༔ དེ་ནས་གཏོར་མ་ལག་ཏུ་ཐོགས༔ སློབ་བུའི་མགོར་བཞག་འདི་སྐད་དོ༔ ཧཱུྃ༔ ཁྲོ་རྒྱལ་དྲག་པོ་ཧེ་རུ་ཀ༔ སྐུ་དང་གཉིས་མེད་གཏོར་མའི་དབང་༔ དེ་རིང་ཁྱོད་ལ་དབང་བསྐུར་བས༔ ཀླུ་བདུད་སྐུ་ཡི་དབང་ཐོབ་ཤོག༔ ཨཱོཾ་ཕེ་ལཾ་ཧཱུྃ༔ ཀཱ་ཡ་ཨ་བྷི་ཥིཉྩ་ཧཱུྃ༔ དེ་ནས་གཏོར་མ་མགྲིན་པར་བཞག༔ ཧཱུྃ༔ ཁྲོ་རྒྱལ་དྲག་པོ་ཧེ་རུ་ཀ༔ གསུང་དང་གཉིས་མེད་གཏོར་མའི་དབང་༔ དེ་རིང་ཁྱོད་ལ་དབང་བསྐུར་བས༔ གསུང་གི་དབང་མཆོག་ཐོབ་པར་ཤོག༔ ཨཱོཾ་ཕེ་ལཾ་ཧཱུྃ༔ ཝཱཀྐ་ཨ་བྷི་ཥིཉྩ་ཧཱུྃ༔ དེ་ནས་གཏོར་མ་སྙིང་གར་བཞག༔ ཧཱུྃ༔ ཁྲོ་རྒྱལ་ཀླུ་བདུད་མགོ་དགུ་པ༔ དེ་རིང་ཁྱོད་ཀྱི་སྙིང་ལ་ཤར༔ ཙིཏྟ་ཐུགས་ཀྱི་དབང་ཐོབ་ནས༔ བསྐྱེད་རྫོགས་ལས་སུ་རུང་བར་ཤོག༔ ཨཱོཾ་ཕེ་ལཾ་ཧཱུྃ༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཕྱག་མཚན་ལག་ཏུ་གཏད༔ ཧཱུྃ༔ གནམ་ལྕགས་གྲི་གུག་རྡོ་རྗེ་གྲི༔ སྦྲུལ་ཞགས་ཀླུ་རྣམས་འཆིང་ཞིང་སྡོམ༔ ཡོན་ཏན་ཕྱག་རྒྱས་དབང་བསྐུར་བས༔ ཁྲོ་རྒྱལ་དྲག་པོའི་དབང་ཐོབ་ཤོག༔ རྩ་སྔགས༔ རཏྣ་ཨ་བྷི་ཥིཉྩ་ཧཱུྃ༔ དེ་ནས་བྱ་ཁྱུང་གནས་ལྔར་བཞག༔ ཧཱུྃ༔ ཐུགས་ལས་སྤྲུལ་པའི་བྱ་ཁྱུང་སྐུ༔ ཁྱོད་ཀྱི་གནས་ལྔར་རྒྱས་བཏབ་པས༔ གཟའ་ཀླུ་དབང་བསྡུས་ཟིལ་གྱིས་གནོན༔ རྡུལ་དུ་བརླག་པའི་དབང་ཐོབ་ཤོག༔ ཨཱོཾ་ཁྲོཾ་གྷ་རུ་ཌ་ཨ་བྷི་ཥིཉྩ་ཧཱུྃ༔ དེ་ནས་ཀླུ་རྣམས་གདན་དུ་དབུལ༔ ཧཱུྃ༔ རྒྱལ་རིགས་རྗེའུ་རིགས་བྲམ་ཟེའི་རིགས༔ གདོལ་པ་ལ་སོགས་ཀླུ་ཆེན་རྣམས༔ དེ་རིང་ཁྲོ་རྒྱལ་གདན་དུ་སྦྱིན༔ འཕྲིན་ལས་འགུགས་འཆིངས་སྦྱོར་སྒྲོལ་དབང་༔ སྐལ་ལྡན་ཁྱོད་ཀྱིས་ཐོབ་པར་ཤོག༔ ཨཱོཾ་ཕེ་ལཾ་ཧཱུྃ༔ ཀརྨ་ཨ་བྷི་ཥིཉྩ་ཧཱུྃ༔ དེ་ནས་དཔལ་གཏོར་སྤྱི་བོར་བཞག༔ ཁྲོ་བོ་ཆེན་པོའི་བདེན་སྟོབས་དང་༔ བཀའ་གཏད་བྱ་ཞིང་ཤིས་པ་བརྗོད༔ དམ་ཚིག་བསྲུང་ཞིང་བསྙེན་སྒྲུབ་འབུང་༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་གསང་བའི་སྙིང་ཞུན་འདི༔ སློབ་དཔོན་འཇམ་དཔལ་བཤེས་གཉེན་གྱིས༔ བཀའ་རྒྱ་བཏབ་སྟེ་བདག་ལ་གནང་༔ བདག་གིས་གཅེས་ཤིང་སྙིང་ལ་གབ༔ འོན་ཀྱང་ཆོས་རྒྱལ་སྐུ་ངོ་ཆེ༔ བར་ཆད་རྐྱེན་འཕྲང་སེལ་ཕྱིར་གདམས༔ འདི་ནས་མ་འོངས་ཕྱི་མའི་དུས༔ རྒྱལ་པོས་རྐྱེན་བྱས་ས་བདག་དང་༔ ཁྱད་པར་ཀླུ་ཡི་གནོད་པ་སྡང་༔ ཙི་ཙི་ཛྭ་ལས་མི་ཕྱེད་འཆི༔ དེ་དུས་ཐུགས་སྲས་ཀླུ་དབང་གི༔ སྐྱེ་བས་ཆོས་འདི་རྙེད་ནས་ཀྱང་༔ བསྟན་དང་སེམས་ཅན་དོན་བྱེད་ཤོག༔ དྲག་སྒྲུབ་ཕུར་པའི་ཆོས་སྐོར་དང་༔ བཀའ་འདི་ཐིག་ལེ་རྩལ་གྱིས་སྲུངས༔ ས་མཱ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ བདག་སྤྲང་བནྡྷེ་སཱུརྱ་ཀཱིརྟིས་ནགས་ཤོད་ཅི་མདའ་བྲག་དམར་ཞེས་བྱ་བ་ནས་ས་རྟ་ལ་གདན་དྲངས་ཤིང་ལྕགས་སྤྲེལ་ལ་ཁམས་སྲིང་མོ་རྫོང་གི་ཆགས་རི་ཨོ་རྒྱན་སྒྲུབ་ཕུག་གི་ཀེ་ཚང་དུ་ཤོག་སེར་ལས་བོད་ཡིག་ཏུ་བསྒྱུར་བའོ། མངྒ་ལཾ།། །།

ལས་བྱང་གནམ་ལྕགས་གོ་ཁྲབ།

ཀླུ་བདུད་ནག་པོའི་གདམས་པ་ལས༔ ལས་བྱང་གནམ་ལྕགས་གོ་ཁྲབ་བཞུགས༔ ཁྲོ་བོའི་རྒྱལ་ལ་ཕྱག་འཚལ་ལོ༔ ཡིད་དང་མཐུན་པའི་གནས་ཉིད་དུ༔ སྨན་གཏོར་མཆོད་པའི་བྱེ་བྲག་བཤམས༔ བསྙེན་སྒྲུབ་དབང་སོགས་གང་བརྩམས་ཀྱང་༔ ལས་གཞུང་འདི་ལྟར་གྱེར་བསྒོམ་བྱ༔ ས་མ་ཡཱ༔ རྒྱ་རྒྱ་རྒྱ༔ དང་པོ་སྐྱབས་སུ་འགྲོ་བ་ནི༔ ཧཱུྃ༔ ཆོས་སྐུ་གསང་བདག་ལོངས་སྐུ་འཇམ་དཔལ་དབྱངས༔ སྤྲུལ་སྐུ་ཁྲོ་རྒྱལ་ནཱ་ག་རཀྴ་ལ༔ དེང་ནས་བཟུང་སྟེ་བྱང་ཆུབ་མ་ཐོབ་བར༔ དབང་དྲག་འཕྲིན་ལས་སྒྲུབ་ཕྱིར་སྐྱབས་སུ་མཆི༔ སེམས་བསྐྱེད་པ་ནི༔ ཧཱུྃ༔ སྡུག་བསྔལ་འགྲོ་བ་བདེ་ལྡན་ཕྱིར༔ ཁྲོ་རྒྱལ་འབར་བའི་ཏིང་འཛིན་བསྒོམ༔ དྲག་པོའི་འཕྲིན་ལས་བསྒྲུབ་ནས་ཀྱང་༔ འགྲོ་དོན་སྒྲུབ་པར་སེམས་བསྐྱེད་དོ༔ མཚམས་གཅོད་པ་ནི༔ ཧཱུྃ༔ ང་ནི་ཁྲོ་རྒྱལ་གཤིན་རྗེའི་གཤེད༔ འབར་བ་དྲག་པོའི་ཏིང་འཛིན་གྱི༔ ཐུགས་ལས་ཁྲོ་ཆུང་ཚ་ཚྭ་འཕྲོ༔ ལྷའམ་འོན་ཏེ་གནོད་པའི་བགེགས༔ ཀླུ་དང་ས་བདག་རྡུལ་དུ་བརླག༔ ཚིནྡྷ་ཚིནྡྷ་བྷནྡྷ་བྷནྡྷ་ཧ་ན་ཧ་ན་ད་ཧ་ད་ཧ་པ་ཙ་པ་ཙ་མཱ་ར་ཡ་ཧཱུྃ་ཕཊ༔ རཀྵ་རཀྵ་སྭཱ་ཧཱ༔ མཆོད་པ་བྱིན་གྱིས་བརླབ་པ་ནི༔ ཧཱུྃ༔ དྲག་པོའི་དཀྱིལ་འཁོར་ཆེན་པོ་འདིར༔ ཕྱི་ནང་གསང་བའི་མཆོད་གཏོར་རྣམས༔ རྣམ་དག་བདུད་རྩིའི་རང་བཞིན་ལ༔ འདོད་ཡོན་མཆོད་པའི་སྤྲིན་ཕུང་གཏིབས༔ ཨཱོཾ་ཨཱཿཧཱུྃ་སྭཱ་ཧཱ༔ གཞལ་ཡས་བསྐྱེད་པ་ནི༔ ཧཱུྃ༔ བློ་འདས་དབྱིངས་ལས་བརྩེ་བའི་འཕྲུལ༔ གནམ་ལྕགས་རྡོ་རྗེ་ཐུགས་སྲོག་ཕེ༔ འོད་ཟེར་འཕྲོ་འདུའི་སྦྱོར་བ་ལས༔ བཾ་ལས་ཆུ་ཡི་རྒྱ་མཚོའི་ཀློང་༔ ཏྲཾ་༼གནམ་ལྕགས་རྡོ་རྗེ་ཡི་གེ་ཏྲཾ་དུ་གྱུར་པ་ལསཿ༽ལས་རིན་ཆེན་གཞལ་ཡས་ཁང་༔ ཀླུ་དང་ས་བདག་ཀ་གདུང་བྲེས༔ ཉ་སྦྲུལ་སྡོམ་སྡིག་ཛ་རས་བཏེག༔ ཐོག་ནི་རུས་སྦལ་ལྤགས་པས་ཁྱབ༔ ཕྱོགས་བཞིར་ཆུ་སྲིན་གྲེ་བའི་སྒོ༔ ཐར་མེད་ཕོ་བྲང་དུག་རླངས་འཚུབ༔ སྐྱི་བུང་ཡ་ང་དྲག་པོའི་ཞིང་༔ གྲུ་གསུམ་དམར་ནག་འབར་བའི་དཀྱིལ༔ ཀླུ་དང་ས་བདག་འབུམ་ཁྲིའི་སྟེང་༔ རང་རིག་ཐུགས་སྲོག་ཡི་གེ་ཕེ༔ སྤྲོ་བསྡུ་སྦྱོར་བས་ཁྲོ་རྒྱལ་སྐུ༔ ཀླུ་སྲིན་མི་གདུག་ཁྲོས་པའི་གཟུགས༔ སྐུ་ནི་རི་རབ་ལོག་དང་མཉམ༔ སྦྲུལ་མཇུག་རྒྱ་མཚོའི་གཏིང་དུ་ཁྱབ༔ དབུ་དགུ་ཕྱག་ནི་བཅོ་བརྒྱད་འབར༔ དྲག་ཏུ་ཁྲོས་པ་སྲིན་པོའི་ཞལ༔ དུག་ཆེན་ཧ་ལའི་མདོག་ལྟར་འཇིགས༔ སྦྲུལ་མགོའི་བར་སྣང་སྤྲིན་ལྟར་ཁྱབ༔ གཡས་བརྒྱད་གནམ་ལྕགས་གྲི་གུག་གིས༔ ཀླུ་གཉན་འབུམ་ཁྲི་ཁྲུམ་ཁྲུམ་གཏུབ༔ གཡོན་བརྒྱད་ཟངས་ལྕགས་འཁོར་ལོ་བསྐོར༔ ཤ་རུས་དོན་སྙིང་རྡུལ་དུ་བརླག༔ ཞལ་ནས་ཨིག་ཤིའི་སྒྲ་སྒྲོག་ཅིང་༔ གང་ལ་དམིགས་པ་ཀྲུམ་ཀྲུམ་འཆའ༔ ཀླུ་མོ་སྤྱན་གཅིག་ལུས་གྲིབ་ལྟར༔ གཡས་པ་གྲི་གུག་གཡོན་སྦྲུལ་ཞགས༔ ཀླུ་དང་ས་བདག་གཤེད་མར་བསྒོམ༔ ཧཱུྃ༔ ཨ་ཝ་གླང་མགོ་གདུག་པ་སྦྲུལ་གྱི་མགོ༔ གཡས་གཡོན་བཀའ་ཉན་ལྕགས་ཀྱུ་ཞགས་པ་ཅན༔ སྐུ་མདོག་སེར་ནག་ཁྲོ་གཏུམ་དོར་སྟབས་བགྲད༔ ལས་བྱེད་ཕོ་ཉ་དྲག་པོའི་ཐུགས་ལས་སྤྲུལ༔ གཞན་ཡང་སྤྲུལ་པ་ཡང་སྤྲུལ་ཕོ་ཉའི་ཚོགས༔ ཁྲོ་བོ་ཁྲོ་མོ་བྱ་ཁྱུང་སྤྲིན་ལྟར་གཏིབ༔ སྤྱན་འདྲེན་པ་ནི༔ ཧཱུྃ༔ ཆོས་དབྱིངས་སྤྲོས་མེད་གསང་བདག་ཐུགས་ཀློང་ནས༔ འགག་མེད་ཁྲོ་རྒྱལ་འཇམ་དཔལ་གཤིན་རྗེའི་གཤེད༔ གཟུགས་སྐུ་དྲག་པོའི་ཆ་ལུགས་འཇིགས་པའི་གཟུགས༔ དུག་ལྔ་མེ་ལྟར་འབར་བའི་དབྱིངས་ནས་བཞེངས༔ དུག་གསུམ་ཆུ་ལྟར་ཁོལ་བའི་གཞལ་ཡས་འདིར༔ ཀླུ་བདུད་ནག་པོ་ཡབ་ཡུམ་སྤྲུལ་འཁོར་བཅས༔ མ་ལུས་འཁོར་བཅས་མ་ཐོགས་མྱུར་དུ་གཤེགས༔ ནཱ་ག་རཀྴ་ས་མ་ཡ་ཛཿཛ༔ བཞུགས་སུ་གསོལ་བ་ནི༔ ཧཱུྃ༔ དྲག་པོའི་གཞལ་ཡས་ཀླུ་གཉན་འབུམ་ཁྲིའི་སྟེང་༔ ཀླུ་ཡི་སྲིན་པོ་མི་བཟད་འཇིགས་པའི་སྐུ༔ དམ་ཚིག་ཡེ་ཤེས་གཉིས་མེད་བརྟན་པར་བཞུགས༔ ཕྱག་ནི༔ ཧཱུྃ༔ ཁྲོ་མཆོག་རྒྱལ་པོ་འཇམ་དཔལ་གཤིན་རྗེའི་གཤེད༔ ཁྱོད་ནི་སྔོན་ནས་འབྲལ་མེད་གསང་བའི་ལྷ༔ ད་ལྟ་རང་རིག་ངང་དུ་ཕྱག་འཚལ་ལོ༔ མཆོད་པ་ནི༔ ཧཱུྃ༔ ཕྱི་མཆོད་ཡིད་འོང་སྣ་ཚོགས་དང་༔ ནང་མཆོད་སྨན་གཏོར་རཀྟའི་ཚོགས༔ གསང་མཆོད་བདེ་སྟོང་དགའ་བ་བཞི༔ ཐུགས་དམ་དབང་གིས་བཞེས་སུ་གསོལ༔ ཁྱད་པར་ཀླུ་གཉན་ས་བདག་འབུམ༔ གང་ལ་དམིགས་པའི་གདོན་དང་བགེགས༔ དབང་པོ་ཤ་ཁྲག་དོན་སྙིང་རུས༔ མུ་མཐའ་མེད་པར་སྤུང་པ་འདི༔ དམ་ཚིག་དབང་གིས་བཞེས་སུ་གསོལ༔ ཨཱོཾ་ནཱ་ག་རཀྴ་ནག་པོ་ཏི་པ་ཙ༔ ཨཱོཾ་ཕེ་ལཾ་ཧཱུྃ་ཕཊ༔ མ་ཧཱ་མཾ་ས་ལ་ཁཱ་ཧི༔ མ་ཧཱ་ཙིཏྟ་ལ་ཁཱ་ཧི༔ མ་ཧཱ་རཀྟ་ལ་ཁཱ་ཧི༔ མ་ཧཱ་བྷ་སུ་ཏ་ལ་ཁཱ་ཧི༔ མ་ཧཱ་གོ་རོ་ཙ་ན་ལ་ཁཱ་ཧི༔ མ་ཧཱ་ཀེང་ནི་རི་ཏི་ལ་ཁཱ་ཧི༔ མ་ཧཱ་ཨ་མྲྀ་ཏ་ལ་ཁཱ་ཧི༔ མ་ཧཱ་བྷ་ལིངྟ་ལ་ཁཱ་ཧི༔ མ་ཧཱ་སརྦ་པུ་ཙ་ཁཱ་ཧི་ཁཱ་ཧི༔ ལན་བདུན་ནམ་ཉེར་གཅིག་གིས་འབུལ༔ བསྟོད་པ་ནི༔ ཧཱུྃ༔ ཀླུ་དང་ས་བདག་འབུམ་ཁྲི་བསྣོལ་བའི་སྟེང་༔ རིག་པའི་རྒྱལ་པོ་འཆི་བདག་མགོ་དགུ་པ༔ བདུད་ཀྱི་སྡེ་དཔོན་ཀླུ་སྲིན་དྲེགས་པའི་གཟུགས༔ ཁྲོ་བོ་ཁྲོས་པའི་རྒྱལ་ལ་ཕྱག་འཚལ་བསྟོད༔ རབ་འཇིགས་བསྐལ་པའི་མེ་རི་དམར་ནག་འཁྲུག༔ དུག་རི་རྒྱ་མཚོ་མུ་མཐའ་མེད་པར་ཁོལ༔ སྐུ་ཡི་རྔམ་བརྗིད་རི་རབ་ལོགས་དང་མཉམ༔ ཀླུ་བདུད་ནག་པོའི་སྐུ་ལ་ཕྱག་འཚལ་བསྟོད༔ དབུ་ནི་མི་མངོན་བར་སྣང་ཁམས་སུ་འཕྱོ༔ སྦྲུལ་ནག་རལ་པ་སྤྲུག་པས་སྡོམ་སྡིག་འཕྲོ༔ དྲག་པོའི་སྤྱན་ནི་དམར་ནག་འཁྲུགས་ཅིང་འཁྱིལ༔ ཀླུ་སྲིན་ཁྲོས་པའི་སྐུ་ལ་ཕྱག་འཚལ་བསྟོད༔ ཨིག་ཤའི་སྒྲ་འབྱིན་རྐན་སྒྲ་སྒྲོག་པའི་ཚེ༔ ཀླུ་འབུམ་ས་བདག་སྦྲུལ་ནག་ཉི་ལི་ལི༔ ཞལ་གདངས་མཆེ་གཙིགས་ཟས་སུ་རིགས་དྲུག་ཟ༔ འཆི་བདག་ནག་པོའི་སྐུ་ལ་ཕྱག་འཚལ་བསྟོད༔ རྒྱལ་རིགས་མགུལ་ཆུན་བྲམ་ཟེ་ཕྱག་གདུབ་བྱས༔ དམངས་རིགས་རྐེད་དཀྲིས་གདོལ་པ་ཞབས་ཀྱིས་མནན༔ འཇིག་རྟེན་འདས་ཀྱང་སོ་མཚམས་གདུག་པ་འདུལ༔ ནཱ་ག་རཀྴའི་སྐུ་ལ་ཕྱག་འཚལ་བསྟོད༔ ཡུམ་མཆོག་ཀླུ་མོ་བཀའ་ཉན་སྤྲུལ་བའི་ཁྱུང་༔ ལས་བྱེད་ཤ་ཟ་བྱེ་བ་སྐུ་ལས་འཕྲོ༔ སྤྲུལ་དང་ཡང་སྤྲུལ་བྲན་དང་ཕོ་ཉའི་ཚོགས༔ མ་ལུས་འཁོར་དང་བཅས་ལ་ཕྱག་འཚལ་བསྟོད༔ ཅེས་བསྟོད་བསྐྱེད་རིམ་གསལ་ཞིང་བསྙེན་པ་བྱ༔ ཨཱོཾ་ཕེ་ལཾ་ཧཱུྃ༔ སྐབས་སུ་དངོས་གྲུབ་ཞུ་བ་འདི་སྐད་དོ༔ ཧཱུྃ༔ ཁྲོ་བོའི་རྒྱལ་པོ་ཀླུ་རྣམས་ཡོངས་ཀྱི་གཤེད༔ འབར་བའི་དབང་གིས་ཁམས་གསུམ་དབང་དུ་སྡུད༔ འཁྲུག་པའི་སྟོབས་ཀྱིས་སྲིད་གསུམ་ཟིལ་གྱིས་གནོན༔ བརྗིད་པའི་སྟོབས་ཀྱིས་ཀླུ་གདོན་རྡུལ་དུ་བརླག༔ ཐུགས་དམ་བསྐུལ་ལོ་སྔོན་གྱི་དམ་ཚིག་དགོངས༔ བདག་གི་རེ་ཞིང་ལྟོས་པའི་ཡི་དམ་ལྷ༔ བསྙེན་བསྒྲུབ་དམ་བཅས་གདུང་བའི་ང་རོས་འབོད༔ ཐུགས་རྗེའི་ཤུགས་ཕྱུངས་ནུས་པའི་རྩལ་བསྐྱེད་ལ༔ སྔོན་གྱི་ལས་བཟློག་འཕྲལ་གྱི་རྐྱེན་སོལ་ཅིག༔ ཀླུ་གདོན་མ་ལུས་ཐུགས་རྗེའི་ཞལ་དུ་སྟོབས༔ སིདྡྷི་རྣམ་གཉིས་བདག་ལ་མྱུར་དུ་སྩོལ༔ ཨཱོཾ་ཕེ་ལཾ་ཧཱུྃ༔ སརྦ་སིདྡྷི་ཧཱུྃ༔ ཐུན་མཇུག་དགེ་རྩ་བསྔོ་བ་ནི༔ ཧཱུྃ༔ ཁྲོ་རྒྱལ་དབང་གི་བསྒོམ་བསྒྲུབ་ལ༔ རིམ་པ་གཉིས་ཀྱི་བསྐྱེད་རྫོགས་བཟླས༔ བསོད་ནམས་མཐུ་ཡིས་འགྲོ་བདེ་ཞིང་༔ ཀུན་ཏུ་བླ་མེད་བྱང་ཆུབ་སེམས༔ རྡོ་རྗེ་འཛིན་པ་གྲུབ་གྱུར་ཅིག༔ ཅེས་བརྗོད་ཡེ་ཤེས་དབྱིངས་སུ་གཤེགས༔ བསྐྱེད་རིམ་ཐིག་ལེ་ནཱ་དར་བསྡུ༔ རྫོགས་རིམ་སྐྱེ་མེད་གནས་ལུགས་སྐྱོང་༔ ས་མ་ཡཱ༔ རྒྱ་རྒྱ་རྒྱ༔ ཀླུ་བདུད་ཁྲོས་པའི་ལས་བྱང་འདི༔ མ་འོངས་འགྲོ་བའི་དོན་དུ་བཀོད༔ ཟབ་ཕྱིར་རིན་ཆེན་གཏེར་དུ་སྦས༔ ལས་འཕྲོ་ཅན་དང་ཕྲད་པའི་ཚེ༔ ཀུན་ལ་མ་སྟོན་སྙིང་དཀྱིལ་སྦོས༔ འཆལ་ན་མི་རུང་རང་ལ་འོང་༔ སེམས་བསྐྱེད་ངང་ནས་སྟོན་མཁས་གྱིས༔ ས་མ་ཡཱ༔ རྒྱ་རྒྱ་རྒྱ༔ ཟབ་རྒྱ༔ གསང་རྒྱ༔ ན་ར་ཀན་རྒྱ་རྒྱ་རྒྱ༔ སཱུརྱ་ཀཱིརྟིས་ས་རྟ་ལ་གཏེར་གནས་ནགས་ཤོད་ཅི་མདའ་ནས་སྤྱན་དྲངས་ཤིང་ལྕགས་སྤྲེལ་ཁམས་སྲིང་མོ་རྫོང་གི་ཨོ་རྒྱན་སངས་རྒྱས་གཉིས་པའི་སྒྲུབ་གནས་ཆགས་རུ་ཕུག་ནག་བདེ་བ་ཆེན་པོའི་ཀེའུ་ཚང་དུ་ཤོག་སེར་ལས་བོད་ཡིག་ཏུ་བསྒྱུར་བའོ།། །།

ལས་ཚོགས་འཁོར་ལོ།

ཀླུ་བདུད་ནག་པོའི་གདམས་པ་ལས༔ ལས་ཚོགས་འཁོར་ལོ་བཞུགས༔ ཁྲོ་བོའི་རྒྱལ་ལ་ཕྱག་འཚལ་ལོ༔ ས་བདག་ཀླུ་ཡི་གནོད་པ་ལས༔ ཐར་བར་བྱ་བ་གསང་བའི་གནད༔ མན་ངག་གསང་བའི་འཁོར་ལོ་ནི༔ དུག་ཤོག་ངོས་ལ་བྱ་ཁྱུང་བྲི༔ ལྟེ་བར༔ ཨཱོཾ་བཛྲ་པཱ་ཎི་ཧཱུྃ༔ ཨཱོཾ་ཁྲོཾ་གྷ་རུ་ཌ་སརྦ་ཧཱུྃ་ཕཊ༔ འཆང་བ་ལ་རཀྵ་བྱ་བ་བྲི༔ དེ་ཡི་ཕྱི་རིམ་མུ་ཁྱུད་ལ༔ བསྙེན་སྒྲུབ་འབྲུ་བཞི་འབྲུ་བཅུ་གདབ༔ དེ་ཡི་ཕྱི་རིམ་རྩིབས་བཞི་ལ༔ རཾ་རཾ་རཾ་རཾ༔ ཡཾ་ཡཾ་ཡཾ་ཡཾ༔ ཁཾ་ཁཾ་ཁཾ་ཁཾ༔ ལཾ་ལཾ་ལཾ་ལཾ༔ རྩིབས་མཆན་རྣམས་ལ་ཁྲོཾ་རེ་བྲི༔ དེ་ཡི་ཕྱི་རིམ་མུ་ཁྱུད་ལ༔ ཨཱོཾ་ནག་པོ་ཏི་པ་ར་ཙ་ཡ༔ ནཱ་ག་རཀྴ་ཙ་ལ་རིལ་ཕྱུངས༔ ནཱ་ག་ཕུ་ནི་མཱ་ར་ཡ༔ ཨཱོཾ་ཕེ་ལཾ་ཧཱུྃ༔ ཙ་ལ་རིལ་ཕྱུངས༔ དེ་ཡི་ཕྱི་རིམ་མུ་ཁྱུད་ལ༔ ཨཱོཾ་ནི་ལཾ་ཝ་ར་བྷ་ར་བཛྲ་པཱ་ཎི་ར་ཛྙཱ་པ་ཡ་ཏི་ཧཱུྃ༔ ཨཱོཾ་ཁྲོཾ་གྷ་རུ་ཌ་ཙ་ལེ་ཙ་ལེ་དུ་ས་མ་ཡ་རཀྵ༔ ཅེས་བྲི་ལྷག་ཆད་བྲིས་གསུབ་སྤང་༔ མཛེ་ཁྲག་དུག་ཁྲག་རྫས་ལ་བཏབ༔ ལས་གཞུང་བསྲང་ཞིང་བསྐྱེད་བསྟིམ་གཞུག༔ རབ་ཏུ་གནས་ཤིང་ཤིས་པ་བརྗོད༔ ཟངས་ཐུམ་གྱིས་གཡོག་བསྲུང་བྱར་གདགས༔ ས་བདག་ཀླུ་ཡི་གནོད་པ་འཇོམས༔ ཤིན་ཏུ་ཟབ་བོ་ས་མ་ཡཱ༔ རྒྱ་རྒྱ་རྒྱ༔ སྨན་ཆེན་བཟང་པོ་ཞོ་གང་ལ༔ ཡུངས་ཀར་བཟང་པོ་ཁྲོ་ཞལ་ཅན༔ ཞོ་དོ་ལོ་བརྒྱད་ཆུ་ཡིས་སྦྲུས༔ འདམ་ཐག་རིལ་བུ་བྲ་རིལ་ཙམ༔ ཐབས་དང་ཤེས་རབ་སྦྱོར་བ་ཡིས༔ རིལ་བུ་ལྔ་གསུམ་རྒྱུན་དུ་བསྟེན༔ ཁྱུང་ལྔ་ཟླ་མཚམས་བདུན་མཚམས་གཏོང་༔ སྐབས་སྐབས་རྩ་བཤལ་དག་ཀྱང་བཏང་༔ སྒྲུབ་པ་སྨན་སྦྱོར་སྤྱོད་ལམ་རྣམས༔ གདམས་པ་བཞིན་དུ་བསྟེན་གྱུར་ན༔ སྔོན་ལས་ཀླུ་ཡི་ནད་སེལ་བས༔ འཕྲལ་རྐྱེན་ཀླུ་གནོད་སྨོས་ཅི་དགོས༔ གཅེས་པར་ཆོངས་ཤིག་སྐལ་ལྡན་རྣམས༔ ལས་འཕྲོ་ཅན་དང་འདི་འཕྲད་ཤོག༔ རྡོ་རྗེ་ལེགས་པར་བཅོལ་ལོ་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ དམ་རྒྱ༔ ས་མ་ཡ༔ རྒྱ་རྒྱ་རྒྱ༔ སྤྲང་བནྡྷེ་སཱུརྱ་ཀཱིརྟིས་གུ་རུའི་གཏེར་གནས་ནགས་ཤོད་ཅི་མདའ་བྲག་ནས་ས་རྟ་ལ་སྤྱན་དྲངས་ཤིང་ལྕགས་སྤྲེལ་ལོ་ཤོག་སེར་ལས་བོད་ཡིག་ཏུ་བསྒྱུར་བ་འདི་ཡང་། ཁམས་སྲིང་མོ་རྫོང་གི་ཨོ་རྒྱན་སྒྲུབ་གནས་ཆགས་རི་ཕུག་ནག་བདེ་བ་ཆེན་པོའི་ཀེ་ཚང་དུ་བྲིས་པའོ།། །།

ལམ་ཡིག་ལོ་རྒྱུས་གནམ་ལྕགས་རལ་གྲི།

རྒྱ་མཚོ་དུག་རི་ཁའི་ལམ་ཡིག་ལོ་རྒྱུས་གནམ་ལྕགས་རལ་གྲི་བཞུགས་སོ། །དཔལ་གསང་བའི་བདག་པོ་ལ་ཕྱག་འཚལ་ལོ། །ཁམས་པ་ཉི་མ་གྲགས་པས་ས་ཕོ་རྟའི་ལོ་ཧོར་ཟླ་དྲུག་པའི་ཡར་ཚེས་དགེ་བར། ལེགས་ཚོགས་ཀྱི་རྟེན་འབྲེལ་ཁ་བྱང་དང་བསྒྲིགས་ཤིང་། གུ་རུ་རིན་པོ་ཆེ་ལ་གསོལ་འདེབས་དང་བཀའ་སྲུང་སྐྱེས་བུ་ལ་མཆོད་ཐབས་ཤ་ཁྲག་རྣམས་ཁྱེར་ནས་གཏེར་གནས་སུ་ཕྱིན་ཏེ། མི་རིང་ལངས་པ་འདྲ་བའི་བྲག་མཐོང་བས་ཤེས་པ་གཏད་མེད་དུ་གྱུར་ཅིང་། ཕག་མོས་ཕེ་གུ་གྱེན་ལ་འཁྲིད་པ་འདྲ་བའི་བྲག་ངོས་ཤིན་ཏུ་མཐོ་བར་རྩ་ཕུང་གི་སྤོ་གཅིག་གི་ཁར་སླེབས་འདུག་པས་ཉམས་ཀྱང་ཟ་ཟི། ཤིས་པ་ཡང་བན་བུན་དུ་འདུག་ཀྱང་། གཏེར་སྒོ་ཡིན་པར་སེམས་ཏེ་བྲག་སྲུབས་སུ་ཕུར་པ་གསེར་མགོ་མ་ལན་གསུམ་བརྒྱབས་པས། གཏེར་སྒོ་མ་བྱེ་ཕུར་པ་འཆགས་ལ་ཉེ་བའི་ཚེ། དམ་ཅན་སྐྱེས་བུ་ཆེན་པོས་རོགས་དན་མཛད་པས། ཤོག་སེར་རྫ་བུམ་གང་མཐོང་ཞིང་དེ་ནས་བདག་ལ་གཅིག་བྱིན་པ་ཚགས་བྱས་མ་ཐག །རྩོལ་མེད་དུ་མཁའ་ལ་བྱ་ལྟར་ལྡིང་ཞིང་ཚུར་ལྡོག་པའི་ཚེ་མུན་པ་དང་མི་མང་འཕྲད་དོགས་པའི་རྐྱེན་དང་ལྡན་ཀྱང་། བློ་མཆོག་ཀུན་གྲོལ་དབང་མོ་རང་དང་བཅས་པ་འཕྲལ་ཉེས་མེད་དུ་སླེབས། སྔགས་འཆང་གུ་རུ་ཆོས་ཀྱི་གྲགས་པ་ཚང་གཏེར་ལྷོངས་འོང་གི་དོགས་ནས་ཤོག་སེར་ཕྱི་སྒོའི་ཡ་ཐེམ་ལ་བཞག །གཏེར་སྲུང་མཆོད་པ་དང་ཚོགས་ཀྱི་འཁོར་ལོ་རྒྱས་པར་བྱས། ཆང་ཉུང་སྐྱོན་ཅུང་ཟད་བྱུང་། །ཀུན་གྱིས་ཅལ་སྒྲོགས་ལ་ནམ་མཁར་འཕུར་བ་དང་གཏེར་བཏོན་པ་སོགས་ཀྱང་གླེང་ཡོད་པར་གདའ། དེ་ལྟའི་ཟབ་ཆོས་རིན་པོ་ཆེ་ཤོག་སེར་ལས་ཕབས་ཏེ་རང་གི་ཉམས་ལེན་རྟགས་ཐོན་དུ་བྱས་པས། སྤེལ་བའི་དུས་ལ་མ་བབས་ཀྱང་བཀའ་སྲུང་ལ་གསོལ་བ་བཏབ་སྟེ། བཙན་སྒོ་ཆོས་བཟང་འགྲོ་འདུག་དཀའ་བའི་གཤིས་ཀྱིས་སྐལ་ལྡན་ཉུང་འདུས་ཤིག་ལ་ཕུལ་བའོ། །མངྒ་ལཾ།། །།

ནཱ་ག་རཀྴའི་བརྒྱུད་པའི་གསོལ་འདེབས།

ཀླུ་བདུད་ནཱ་ག་རཀྴའི་བརྒྱུད་པའི་གསོལ་འདེབས་བཞུགས། །ན་མོ་དྷེ་ཝ་ནཱ་ག་རཀྴ་སརྦ་སིདྡྷི་ཧཱུྃ། །གནས་མཆོག་ལྕང་ལོ་ཅན་གྱི་ཕོ་བྲང་ནས། །ཆོས་སྐུ་གསང་བའི་བདག་པོ་ལ་གསོལ་བ་འདེབས། །གཤིན་རྗེ་རོལ་པའི་དུར་ཁྲོད་ཆེན་པོ་ནས། །ལོངས་སྐུ་འཇམ་དཔལ་དབྱངས་ལ་གསོལ་བ་འདེབས། །དུག་རི་རྒྱ་མཚོ་ཁོལ་བའི་གཞལ་ཡས་ནས། །སྤྲུལ་སྐུ་ནཱ་ག་རཀྴ་ལ་གསོལ་བ་འདེབས། །ལྷོ་ཕྱོགས་སྐུ་ལ་རྫོགས་པའི་གནས་མཆོག་ནས། །སློབ་དཔོན་འཇམ་དཔལ་བཤེས་གཉེན་ལ་གསོལ་བ་འདེབས། །ལྷོ་ནུབ་པདྨ་འོད་ཀྱི་ཕོ་བྲང་ནས། །གུ་རུ་པདྨ་བཛྲ་ལ་གསོལ་བ་འདེབས། །བསམ་ཡས་ཟུར་མོ་མཁར་གྱི་གནས་མཆོག་ནས། །མཁའ་འགྲོ་ཡེ་ཤེས་མཚོ་རྒྱལ་ལ་གསོལ་བ་འདེབས། །ཡེར་པ་ལྷ་རི་སྙིང་བོའི་གཞལ་ཡས་ནས། །ལོ་ཆེན་ཀླུ་ཡི་དབང་པོ་ལ་གསོལ་བ་འདེབས། །གནས་མཆོག་སྲིང་མོ་རྫོང་གི་གཞལ་ཡས་ནས། །རིག་འཛིན་ཉི་མ་གྲགས་པ་ལ་གསོལ་བ་འདེབས། །འགྲོ་ཕན་ཐུགས་སྐྱེད་རྣམ་དག་ཕོ་བྲང་ནས། །ཨོ་རྒྱན་བསྟན་འཛིན་གྲགས་པ་ལ་གསོལ་བ་འདེབས། །སྣང་སྲིད་གཞིར་བཞེངས་བརྡལ་བའི་ཞིང་ཁམས་ནས། །ཁྱབ་བདག་དབང་གི་རྒྱལ་པོ་ལ་གསོལ་བ་འདེབས། །ཕྱོགས་མེད་ཞིང་ཁམས་དག་པའི་ཕོ་བྲང་ནས། རིག་འཛིན་བསྟན་སྐྱོང་རྒྱ་མཚོ་ལ་གསོལ་བ་འདེབས། །མཆོག་དང་ཐུན་མོང་གཉིས་ཀྱི་དངོས་གྲུབ་སྩོལ། །རྐྱེན་ངན་ཕྱི་ནང་གསང་བའི་བར་ཆད་སོལ། །ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཕ་ལ་ཧཱུྃ། ཅེས་པ་འདི་མེ་ཉག་ཀླུ་རྒྱལ་པས་དགོས་གསུངས་པར་རིག་འཛིན་པས་བྲིས། །མངྒ་ལཾ།། །།

ནཱ་ག་རཀྴའི་ལས་བྱང་འགྲིགས་ཆགས་སུ་བཀོད་པ།

ཀླུ་བདུད་ནཱ་ག་རཀྴའི་ལས་བྱང་གནམ་ལྕགས་གོ་ཁྲབ་ཁ་སྐོང་གིས་བརྒྱན་ཏེ་འགྲིགས་ཆགས་སུ་བཀོད་པ་བཞུགས་སོ། །ཁྲོ་བོའི་རྒྱལ་ལ་ཕྱག་འཚལ་ལོ༔ ཡིད་དང་མཐུན་པའི་གནས་ཉིད་དུ༔ སྨན་གཏོར་མཆོད་པའི་བྱེ་བྲག་བཤམས༔ བསྙེན་སྒྲུབ་དབང་སོགས་གང་བརྩམས་ཀྱང་༔ ལས་གཞུང་འདི་ལྟར་གྱེར་བསྒོམ་བྱ༔ ས་མ་ཡཱ༔ རྒྱ་རྒྱ་རྒྱ༔ ཅེས་གསུངས་པ་ལྟར་གྱི་བསྙེན་སྒྲུབ་ཀྱི་འཕྲིན་ལས་མཐོང་ཆོག་ནག་འགྲོས་སུ་བཀོད་པ་ནི། བསྙེན་རྐྱང་ཁོ་ན་ཁྱེར་བདེ་བར་འབྲུ་སིལ་མ་བཅལ་དུ་བཀྲམ་པར། མཆོད་གཏོར་གྲུ་གསུམ་བཤོས་ཕྲན་གསུམ་གྱིས་བསྐོར་བ་རྒྱན་ལྡན་གྱི་གཡས་གཡོན་དུ་སྨན་རཀ །མདུན་དུ་མཆོད་པ་རྣམ་ལྔ་སྤྱིི་མཐུན་ལྟར་བཀོད། དབང་སྒྲུབ་ལ་སོགས་པར་སྒྲུབ་ཐབས་ལས་ཇི་ལྟར་བྱུང་བ་ལྟར་གྱི་དཀྱིལ་འཁོར་སྒྲུབ་རྫས་སོགས་ངེས་པར་དགོས་ཤིང་། དེ་ལ་དབུས་སུ་མཉྫིའི་ཁར་བྷནྡྷའི་ནང་དུ་ནད་འཇོམས་ཀྱི་རྫས་རིལ་ཟུང་དང་འཁོར་ལོ་བཅས་པ་དར་ནག་གི་ཁེབས་ལྡན། དེའི་མདུན་དུ་མཆོད་གཏོར་སྨན་རག་མཆོད་པ་རྣམ་ལྔ་སོགས་དང་། གང་བབས་སུ་བཀའ་དང་གཏེར་སྲུང་རྡོར་ལེགས་ཀྱི་གཏོར་མ། གཞན་ཡང་དཀར་བགེགས་ཚོགས་མཆོད་ཌཱ་དྲིལ་སོགས་ཉེར་མཁོའི་ཡོ་བྱད་ཐམས་ཅད་མངོན་པར་འདུ་བྱས་ཏེ། སྒྲུབ་དཀྱིལ་ལ་ཞལ་ཕྱོགས་པའི་སྟན་ལ་བདེ་བར་འཁོད་དེ། ཐོག་མར་བརྒྱུད་འདེབས་སྔོན་དུ་འགྲོ་བས་གཞི་བགེགས་ཀྱི་གཏོར་མ་བཏང་རྗེས་སུ། ཐུན་བརྡེག་པ་ནི། བདག་ཉིད་ཁྲོ་རྒྱལ་གཤིན་རྗེའི་གཤེད་པོ་མཐིང་ནག་ཞལ་གཅིག་ཕྱག་གཉིས་ཐ་ོབ་དང་མེ་ཞགས་འཛིན་པ་དུར་ཁྲོད་ཀྱི་ཆས་ཅན་པད་ཉིའི་གདན་ལ་སྲིད་གསུམ་གང་བའི་སྐུ་ལས་ཁྲོ་མཚོན་མེ་ཆར་དཔག་མེད་འཕྲོས་པས། སྲིད་གསུམ་འབྱུང་ཁམས་དང་བཅས་པ་ཐམས་ཅད་གཞོབ་ཏུ་བཏུལ་ཞིང་མེ་ཟེར་རྡོར་མཚོན་ཁྲོ་ཚོགས་བཅུད་དུ་འདྲིལ་བའི་གུར་ཁང་རིམ་པ་གསུམ་གྱིས་སྲིད་པ་བཅིངས་པས་གཉིས་འཛིན་གྱི་གདོན་ཚོགས་ཀྱིས་ནམ་ཡང་མི་ཕྱེད་པར་བསྒོམ་ལ། ཧཱུྃ༔ ང་ནི་ཁྲོ་རྒྱལ་གཤིན་རྗེའི་གཤེད༔ འབར་བ་དྲག་པོའི་ཏིང་འཛིན་གྱི༔ ཐུགས་ལས་ཁྲོ་ཆུང་ཚ་ཚྭ་འཕྲོ༔ ལྷའམ་འོན་ཏེ་གནོད་པའི་བགེགས༔ ཀླུ་དང་ས་བདག་རྡུལ་དུ་བརླག༔ ཚིནྡྷ་ཚིནྡྷ་བྷིནྡྷ་བྷིནྡྷ་ཧ་ན་ཧ་ན་ད་ཧ་ད་ཧ་པ་ཙ་པ་ཙ་མཱ་ར་ཡ་ཧཱུྃ་ཕཊ༔ རཀྵ་རཀྵ་སྭཱ་ཧཱ༔ དེ་ནས་སྐྱབས་སུ་འགྲོ་བ་ནི། ཕྱོགས་བཅུའི་བདེ་གཤེགས་ཞི་ཁྲོ་རབ་འབྱམས་ཐམས་ཅད་ཐུགས་ཆོས་ཉིད་ཁྱབ་གདལ་ཞལ་ཕྱག་གི་མཚན་མ་ལས་འདས་པ་གདོད་ནས་རང་ཆས་སུ་བཞུགས་པའི་བརྡ་རྟགས་སུ་མཚོན་བྱེད། །སྤྱི་མཐུན་གྱི་བློ་ཡུལ་དུ་འཇུག་པ་བདེ་ཕྱིར། ཆོས་སྐུ་གསང་བའི་བདག་པོ་ཞེས་དང་། སྟོང་པའི་རྩལ་ཁ་གོ་མ་འགགས་པ་འབར་བའི་སྟོབས་ཤུགས་འཆང་བ་བདེ་གཤེགས་ཐམས་ཅད་ཀྱི་སྐུའི་བདག་ཉིད་འཇམ་དཔལ་དབྱངས་དང་། གསལ་སྟོང་ཟུང་དུ་འཇུག་པའི་རྟེན་འབྲེལ་ཐུགས་རྗེའི་དངོས་སྣང་གདུག་པ་འདུལ་ཕྱིར་ཀླུ་བདུད་ནཱ་ག་རཀྴའི་ཆོ་འཕྲུལ་དུ་རོལ་བ་སྟེ། དོན་ལ་ཆོས་ཉིད་སྟོང་པའི་གསལ་མདངས་ཁྲོ་རྒྱལ་ནཱ་ག་རཀྴའི་སྐུར་སྣང་བ་ལ་དེང་ནས་བཟུང་ཇི་སྲིད་རང་བྱུང་དོན་གྱི་ཧེ་རུ་ཀ་མངོན་དུ་མ་གྱུར་གྱི་བར་དུ་རྩལ་མདངས་ལོངས་སྐུའི་དཀྱིལ་འཁོར་དུ་མི་ཕྱེད་དང་བས་སྐྱབས་སུ་འགྲོ་བའི་བློས། ཧཱུྃ༔ ཆོས་སྐུ་གསང་བདག་ལོངས་སྐུ་འཇམ་དཔལ་དབྱངས༔ སྤྲུལ་སྐུ་ཁྲོ་རྒྱལ་ནཱ་ག་རཀྴ་ལ༔ དེང་ནས་བཟུང་སྟེ་བྱང་ཆུབ་མ་ཐོབ་བར༔ དབང་དྲག་འཕྲིན་ལས་སྒྲུབ་ཕྱིར་སྐྱབས་སུ་མཆི༔ ལན་གསུམ། སེམས་བསྐྱེད་པ་ནི། ཁམས་གསུམ་གྱི་སྐྱེ་འགྲོ་སྤྱི་དང་། ཁྱར་པར་གདུལ་དཀའི་འགྲོ་བ་ཐམས་ཅད་འོད་གསལ་གཉུག་མ་མི་འགྱུར་བ་དཔའ་བོ་གྱད་ཀྱི་ངོ་བོར་ཡོངས་སུ་བསྒྲལ་ཏེ་ཕྱིར་མི་ལྡོག་པའི་བློས། ཧཱུྃ༔ སྡུག་བསྔལ་འགྲོ་བ་བདེ་ལྡན་ཕྱིར༔ ཁྲོ་རྒྱལ་འབར་བའི་ཏིང་འཛིན་བསྒོམ༔ དྲག་པོའི་འཕྲིན་ལས་བསྒྲུབ་ནས་ཀྱང་༔ འགྲོ་དོན་སྒྲུབ་པར་སེམས་བསྐྱེད་དོ༔ ལན་གསུམ། མཆོད་པ་བྱིན་གྱིས་བརླབས་པ་ནི། ཕྱི་མཆོད་འདོད་ཡོན་རྣམ་ལྔ་དང་། ནང་མཆོད་སྨན་གཏོར་རཀྟ། གསང་མཆོད་བདེ་སྟོང་ཟུང་འཇུག་ཆོས་ཅན་ཆོས་ཉིད་དབྱེར་མེད་པའི་རྩལ་སྣང་ཡེ་ཤེས་དངས་མའི་འོད་བཅུད་ལྷུན་གྲུབ་ཐིག་ལེར་འཁྱིལ་བ་ཀུན་བཟང་གི་མཆོད་སྤྲིན་ཆེན་པོར་མོས་ལ། ཧཱུྃ༔ དྲག་པོའི་དཀྱིལ་འཁོར་ཆེན་པོ་འདིར༔ ཕྱི་ནང་གསང་བའི་མཆོད་གཏོར་རྣམས༔ རྣམ་དག་བདུད་རྩིའི་རང་བཞིན་ལས༔ འདོད་ཡོན་མཆོད་པའི་སྤྲིན་ཕུང་གཏིབས༔ ཨཱོཾ་ཨཱཿཧཱུྃ་སྭཱ་ཧཱ༔ ལན་གསུམ། དངོས་གཞིའི་བསྐྱེད་རིམ་ཏིང་འཛིན་ནི། སྲུང་འཁོར་གཞལ་ཡས་གདན་ལྷ་ས་བོན་དང་བཅས་པ་བདག་མདུན་སོ་སོར་སྐུ་གསུམ་གྱི་རང་རྩལ་ཅིག་ཅར་དུ་རྫོགས་པ་བདག་བསྐྱེད་ཀྱི་ཁོག་ཏུ་མདུན་བསྐྱེད་ཆུབ་པ། བདག་མདུན་དབྱེར་མེད་གསལ་སྟོང་ཟུང་འཇུག་ལྷུན་གྲུབ་ལོངས་སྐུའི་དཀྱིལ་འཁོར་གྱི་ཀློང་ལས་ཐུགས་རྗེའི་སྤྲུལ་པ་འབར་བའི་རྩལ་བཅུ་ཡོངས་སུ་རྫོགས་པར་གསལ་བ་ནི། ཧཱུྃ༔ བློ་འདས་དབྱིངས་ལས་བརྩེ་བའི་འཕྲུལ༔ གནམ་ལྕགས་རྡོ་རྗེ་ཐུགས་སྲོག་ཕེ༔ འོད་ཟེར་འཕྲོ་འདུའི་སྦྱོར་བ་ལས༔ བཾ་ལས་ཆུ་ཡི་རྒྱ་མཚོའི་ཀློང་༔ ཏྲཾ་ལས་རིན་ཆེན་གཞལ་ཡས་ཁང་༔ གནམ་ལྕགས་རྡོ་རྗེ་ཡི་གེ་ཏྲཾ་དུ་གྱུར་པ་ལས༔ ཀླུ་དང་ས་བདག་ཀ་གདུང་བྲེས༔ ཉ་སྦྲུལ་སྡོམ་སྡིག་ཛ་རས་བཏེག༔ ཐོག་ནི་རུས་སྦལ་ལྤགས་པས་ཁྱབ༔ ཕྱོགས་བཞིར་ཆུ་སྲིན་གྲེ་བའི་སྒོ༔ ཐར་མེད་ཕོ་བྲང་དུག་རླངས་འཚུབ༔ སྐྱི་བུང་ཡ་ང་དྲག་པོའི་ཞིང་༔ གྲུ་གསུམ་དམར་ནག་འབར་བའི་དཀྱིལ༔ ཀླུ་དང་ས་བདག་འབུམ་ཁྲིའི་སྟེང་༔ རང་རིག་ཐུགས་སྲོག་ཡི་གེ་ཕེ༔ སྤྲོ་བསྡུ་སྦྱོར་བས་ཁྲོ་རྒྱལ་སྐུ༔ ཀླུ་སྲིན་མི་སྡུག་ཁྲོས་པའི་གཟུགས༔ སྐུ་ནི་རི་རབ་ལོག་དང་མཉམ༔ སྦྲུལ་མཇུག་རྒྱ་མཚོའི་གཏིང་དུ་ཁྱབ༔ དབུ་དགུ་ཕྱག་ནི་བཅོ་བརྒྱད་འབར༔ དྲག་ཏུ་ཁྲོས་པ་སྲིན་པོའི་ཞལ༔ དུག་ཆེན་ཧ་ལའི་མདོག་ལྟར་འཇིགས༔ སྦྲུལ་མགོའི་བར་སྣང་སྤྲིན་ལྟར་ཁྱབ༔ གཡས་བརྒྱད་གནམ་ལྕགས་གྲི་གུག་གིས༔ ཀླུ་ག །ཉན་འབུམ་ཁྲི་ཁྲུམ་ཁྲུམ་གཏུབ༔ གཡོན་བརྒྱད་ཟངས་ལྕགས་འཁོར་ལོ་བསྐོར༔ ཤ་རུས་དོན་སྙིང་རྡུལ་དུ་བརླག༔ ཞལ་ནས་ཨིག་ཤའི་སྒྲ་སྒྲོག་ཅིང་༔ རྩ་ཕྱག་དང་པོ་གཉིས་གྲི་གུག་སྦྲུལ་ཞགས་ཡུམ་ལ་འཁྱུད་ཅིང་། འོག་མ་བཅུ་དྲུག་གཡས་གཡོན་དུ་གདེངས་པར་བསྒོམ་ན་འཐད་པ་འདིའི་དབང་དང་རིགས་མཐུན་ལས་གསལ་ལོ། གང་ལ་དམིགས་པ་ཀྲུམ་ཀྲུམ་འཆའ༔ ཀླུ་མོ་སྤྱན་གཅིག་ལུས་གྲིབ་ལྟར༔ གཡས་པ་གྲི་གུག་གཡོན་སྦྲུལ་ཞགས༔ ཀླུ་དང་ས་བདག་གཤེད་མར་བསྒོམ༔ ཧཱུྃ༔ ཨ་ཝ་གླང་མགོ་གདུག་པ་སྦྲུལ་གྱི་མགོ༔ གཡས་གཡོན་བཀའ་ཉན་ལྕགས་ཀྱུ་ཞགས་པ་ཅན༔ སྐུ་མདོག་སེར་ནག་ཁྲོ་གཏུམ་དོར་སྟབས་བགྲད༔ ལས་བྱེད་ཕོ་ཉ་དྲག་པོའི་ཐུགས་ལས་སྤྲུལ༔ གཞན་ཡང་སྤྲུལ་པ་ཡང་སྤྲུལ་ཕོ་ཉའི་ཚོགས༔ ཁྲོ་བོ་ཁྲོ་མོ་བྱ་ཁྱུང་སྤྲིན་ལྟར་གཏིབས༔ དེ་ནས་སྤྱན་འདྲེན་པ་ནི། འཁྲུལ་གཞི་མ་རིག་པ་དུག་ལྔའི་སྟོབས་ཤུགས་བཅུད་དུ་སྨིན་པའི་འབྱུང་བ་སྤྱི་དང་། བྱེ་བྲག་ཀླུ་གཉན་རིགས་ལྔའི་རྣམ་པར་སྣང་བའི་གདུག་རྩུབ་མི་ཟད་པས་མནར་བ་དེ་ཉིད་རང་བྱུང་སེམས་ཀྱི་གནས་ལུགས་རིག་པའི་མདངས་ཆ་ཡེ་ཤེས་ཐུགས་རྗེའི་རོལ་གར་འབར་བའི་རྩལ་ཤུགས་འཆང་བ་ཁྲོ་རྒྱལ་ནཱ་ག་རཀྴའི་སྟོབས་ཀྱིས་འདུལ་བ་ལས་གཞན་དུ་མ་གྱུར་པའི་ཚེ་ན། རང་བཞིན་ཆོས་ཀྱི་དབྱིངས་ལས་ཐུགས་རྗེའི་མདངས་རྩལ་འགག་མེད་ཅིར་ཡང་སྒྱུ་འཕྲུལ་ཆེན་པོར་གཟི་བྱིན་བསྐྱེད་པ་ཙམ་ལས་རང་ཉིད་དམ་ཚིག་སེམས་དཔའ་ངན་པ་དང་། ཡེ་ཤེས་སེམས་དཔའ་བཟང་པོ་ཞིག་ལོག་ནས་སྒྲུབ་རྒྱུ་དངོས་འཛིན་ཨ་འཐས་ཀྱི་སྣང་བས་སྤྱན་འདྲེན་པའི་ཡུལ་དང་། འདྲེན་བྱའི་ལྷ་སོགས་གདོད་ནས་དམིགས་མེད་སྤྲོས་བྲལ་ཡེ་གདོད་མའི་ཤེས་པ་མངོན་དུ་གྱུར་པ་ལ་ཡེ་ཤེས་ཞེས་སུ་བཏགས་པ་སྟེ། དམ་ཡེ་དབྱེར་མེད་གདོད་ནས་རང་ཆས་སུ་གྲུབ་ཀྱང་། ཆོས་ཐམས་ཅད་རྒྱུ་ལ་བརྟེན་ནས་འབྲས་བུ་འབྱུང་བ་ལྟར། སྔོན་བྱོན་གྱི་རིག་འཛིན་གྲུབ་ཐོབ་ཐམས་ཅད་ལྟ་བ་ལ་མཐོ་དམན། སྒོམ་པ་ལ་རེས་འཇོག་སྤྱོད་པ་ལ་སྤང་བླང་དག་ནས་རྩལ་གཞི་ཐོག་ཏུ་འཁྱོལ་བ་ཤ་སྟག་ཡིན་ནའང་། གྲུབ་རྟགས་ལ་ཡོད་མེད་ཐུགས་རྗེ་ལ་ཆེ་ཆུང་ཡོང་བ་ནི། ད་ལྟ་ལམ་གྱི་སྐབས་སུ་རྟེན་འབྲེལ་དང་སྨོན་ལམ་གྱིས་ཁ་བསྒྱུར་བ་ཡིན་པས་ན། ཚོགས་གཉིས་དགེ་བའི་རྒྱུན་གྱིས་སྤྲོས་བཅས་སྤྲོས་མེད་ཟུང་དུ་འཇུག་པས་སྤྱན་འདྲེན་མཆོད་བསྟོད་སོགས་ལམ་གྱི་རྩལ་ཁ་ཐོགས་མེད་དུ་སྤར་བར་བགྱིད་དོ། ཧཱུྃ༔ ཆོས་དབྱིངས་སྤྲོས་མེད་གསང་བདག་ཐུགས་ཀློང་ནས༔ འགག་མེད་ཁྲོ་རྒྱལ་འཇམ་དཔལ་གཤིན་རྗེའི་གཤེད༔ གཟུགས་སྐུ་དྲག་པོའི་ཆ་ལུགས་འཇིགས་པའི་གཟུགས༔ དུག་ལྔ་མེ་ལྟར་འབར་བའི་དབྱིངས་ནས་བཞེངས༔ དུག་གསུམ་ཆུ་ལྟར་ཁོལ་བའི་གཞལ་ཡས་འདིར༔ ཀླུ་བདུད་ནག་པོ་ཡབ་ཡུམ་སྤྲུལ་འཁོར་བཅས༔ མ་ལུས་འཁོར་བཅས་མ་ཐོགས་མྱུར་དུ་གཤེགས༔ ནཱ་ག་རཀྴ་བཛྲ་ས་མ་ཡ་ཛཿཛ༔ བཞུགས་སུ་གསོལ་བ་ནི། ཧཱུྃ༔ དྲག་པོའི་གཞལ་ཡས་ཀླུ་གཉན་འབུམ་ཁྲིའི་སྟེང་༔ ཀླུ་ཡི་སྲིན་པོ་མི་བཟད་འཇིགས་པའི་སྐུ༔ དམ་ཚིག་ཡེ་ཤེས་གཉིས་མེད་བརྟན་པར་བཞུགས༔ ཕྱག་འཚལ་བ་ནི། ཧཱུྃ༔ ཁྲོ་མཆོག་རྒྱལ་པོ་འཇམ་དཔལ་གཤིན་རྗེའི་གཤེད༔ ཁྱོད་ནི་སྔོན་ནས་འབྲལ་མེད་གསང་བའི་ལྷ༔ ད་ལྟ་རང་རིག་ངང་དུ་ཕྱག་འཚལ་ལོ༔ མཆོད་པ་ནི། ཧཱུྃ༔ ཕྱི་མཆོད་ཡིད་འོང་སྣ་ཚོགས་དང་༔ ནང་མཆོད་སྨན་གཏོར་རཀྟའི་ཚོགས༔ གསང་མཆོད་བདེ་སྟོང་དགའ་བ་བཞི༔ ཐུགས་དམ་དབང་གིས་བཞེས་སུ་གསོལ༔ ཁྱད་པར་ཀླུ་གཉན་ས་བདག་འབུམ༔ གང་ལ་དམིགས་པའི་གདོན་དང་བགེགས༔ དབང་པོ་ཤ་ཁྲག་དོན་སྙིང་རུས༔ མུ་མཐའ་མེད་པར་སྤུངས་པ་འདི༔ དམ་ཚིག་དབང་གིས་བཞེས་སུ་གསོལ༔ ཨཱོཾ་ནཱ་ག་རཀྴ་ནག་པོ་ཏི་པ་ཙ༔ ཨཱོཾ་ཕེ་ལམ་ཧཱུྃ་ཕཊ༔ མ་ཧཱ་མཾ་ས་ལ་ཁཱ་ཧི༔ མ་ཧཱ་ཙིཏྟ་ལ་ཁཱ་ཧི༔ མ་ཧཱ་རཀྟ་ལ་ཁཱ་ཧི༔ མ་ཧཱ་བྷ་སུ་ཏ་ལ་ཁཱ་ཧི༔ མ་ཧཱ་གོ་རོ་ཙ་ན་ལ་ཁཱ་ཧི༔ མ་ཧཱ་ཀེཾ་ནི་རི་ཏི་ལ་ཁཱ་ཧི༔ མ་ཧཱ་ཨཱ་མྲྀ་ཏ་ལ་ཁཱ་ཧི༔ མ་ཧཱ་བྷ་ལིངྟ་ལ་ཁཱ་ཧི༔ མ་ཧཱ་སརྦ་པུ་ཙ་ཁཱ་ཧི་ཁཱ་ཧི༔ ལན་བདུན་ནམ་ཉེར་གཅིག་གིས་འབུལ༔ བསྟོད་པ་ནི། ཧཱུྃ༔ ཀླུ་དང་ས་བདག་འབུམ་ཁྲི་བསྣོལ་བའི་སྟེང་༔ རིག་པའི་རྒྱལ་པོ་འཆི་བདག་མགོ་དགུ་པ༔ བདུད་ཀྱི་སྡེ་དཔོན་ཀླུ་སྲིན་དྲེགས་པའི་གཟུགས༔ ཁྲོ་བོ་ཁྲོས་པའི་རྒྱལ་ལ་ཕྱག་འཚལ་བསྟོད༔ རབ་འཇིགས་བསྐལ་བའི་མེ་རི་དམར་ནག་འཁྲུག༔ དུག་རི་རྒྱ་མཚོ་མུ་མཐའ་མེད་པར་ཁོལ༔ སྐུ་ཡི་རྔམ་བརྗིད་རི་རབ་ལོགས་དང་མཉམ༔ ཀླུ་བདུད་ནག་པོའི་སྐུ་ལ་ཕྱག་འཚལ་བསྟོད༔ དབུ་ནི་མི་མངོན་བར་སྣང་ཁམས་སུ་འཕྱོ༔ སྦྲུལ་ནག་རལ་པ་སྤྲུག་པས་སྡོམ་སྡིག་འཕྲོ༔ དྲག་པོའི་སྤྱན་ནི་དམར་ནག་འཁྲུགས་ཅིང་འཁྱིལ༔ ཀླུ་སྲིན་ཁྲོས་པའི་སྐུ་ལ་ཕྱག་འཚལ་བསྟོད༔ ཨིག་ཤའི་སྒྲ་འབྱིན་རྐན་སྒྲ་སྒྲོག་པའི་ཚེ༔ ཀླུ་འབུམ་ས་བདག་སྦྲུལ་ནག་ཉི་ལི་ལི༔ ཁ་གདངས་མཆེ་གཙིགས་བ་སུ་རིགས་དྲུག་ཟ༔ འཆི་བདག་ནག་པོའི་སྐུ་ལ་ཕྱག་འཚལ་བསྟོད༔ རྒྱལ་རིགས་མགུལ་ཆུན་བྲམ་ཟེ་ཕྱག་གདུབ་བྱས༔ དམངས་རིགས་སྐེད་དཀྲིས་གདོལ་པ་ཞབས་ཀྱིས་མནན༔ འཇིག་རྟེན་འདས་ཀྱང་སོ་མཚམས་གདུག་པ་འདུལ༔ ནཱ་ག་རཀྴའི་སྐུ་ལ་ཕྱག་འཚལ་བསྟོད༔ ཡུམ་མཆོག་ཀླུ་མོ་བཀའ་ཉན་སྤྲུལ་པའི་ཁྱུང་༔ ལས་བྱེད་ཤ་ཟ་བྱེ་བ་སྐུ་ལས་འཕྲོ༔ སྤྲུལ་དང་ཡང་སྤྲུལ་བྲན་དང་ཕོ་ཉའི་ཚོགས༔ མ་ལུས་འཁོར་དང་བཅས་ལ་ཕྱག་འཚལ་བསྟོད༔ ༈ ནཱ་ག་རཀྴའི་བསྙེན་སྒྲུབ་དམིགས་རིམ་ངག་འདོན་དུ་བྱ་བ་ནི། ཧཱུྃ༔ བདག་ཉིད་རིག་རྒྱལ་ཐུགས་ཀ་ནས། །ཉི་དཀྱིལ་ས་བོན་ཕེ་ཡིག་ལས། །ཚ་ཞིང་མྱུར་བའི་འོད་དམར་ནག །ཕྱོགས་བཅུར་འཕྲོས་པས་འོག་གདོན་ཚོགས། །སྤྱི་དང་ཁྱད་པར་འཚེ་བ་ཡི། །ཀླུ་གཉན་ས་བདག་ཐམས་ཅད་བཀུག །རང་གི་ཞལ་ནས་སྔགས་བཟླས་པས། །ཀུན་ཀྱང་འབོག་བརྒྱལ་སྙིང་རྩ་ཡེད། །དམྱལ་སྒྲ་དིར་དིར་ཡོད་པར་བསམས། །ཤིན་ཏུ་ཐུལ་དཀའི་གདེང་ཅན་རྣམས། །མཚོན་ཆས་གཏུབ་ཅིང་ཞལ་དུ་གསོལ། །རྡུལ་ཕྲན་བཞིན་དུ་བརླག་པར་གྱུར། །བསྙེན་སྒྲུབ་རྩ་སྔགས་འབྲུ་བཞི་ནི། ཨཱོཾ་ཕེ་ལམ་ཧཱུྃ༔ ཡིག་འབྲུ་བཅུ་བཞི་ནི། ནག་པོ་ཏི་པ་ཙ་ཡ་ནཱ་ག་རཀྴ༔ ཨཱོཾ་ཕེ་ལམ་ཧཱུྃ༔ རྒྱུན་དུ་གོང་མ་གཙོ་བོར་བྱ། བཅུ་བཞི་པའི་དྲག་སྔགས་མང་ཉུང་རང་གི་འདོད་དང་བསྟུན། གང་ཡང་གོས་ཀྱི་གོང་བ་ཕྱིན་ལ་མི་གོ་བའི་སྒྲ་དག་པར་ཤུབ་བུས་བཟླ་ཞིང་དམིགས་པ་གནད་དུ་བསྣུན་པས་ཀླུ་གཉན་ས་གདོན་ཀྱི་འཚེ་བ་ལས་གྲོལ་བར་འགྱུར་རོ། །ཞེས་པདྨའི་མིང་ཅན་གྱིས་བྲིས་པའོ། །ཅེས་བརྗོད་བསྐྱེད་རིམ་གསལ་ཞིང་བསྙེན་པ་བྱཿ

ཅེས་མཆོག་གི་རྣལ་འབྱོར་པ་རྣམས་ནི་རིག་པ་ཀྲོང་གྱུར་གྱི་རྟོགས་པ་བསལ་བཞག་དོན་གྱི་ཧེ་རུ་ཀ་མཚན་འཛིན་གདོན་བགེགས་ཀྱིས་མི་ཕྱེད་པ། ཀ་དག་གྱད་ཀྱི་དཔའ་བོ་ཆེན་པོར་རྫོགས་པ་ཡིན་ཀྱང་། ཉམས་རྟོགས་ལ་བྲི་གང་སྤང་ལེན་བར་མཚམས་ཕྲ་མོ་ཡོད་པའི་བར་དུ་རྟེན་འབྲེལ་གྱི་མཚམས་སྦྱོར་ཁོ་ན་གཙོ་ཕྱིར་ཡི་དམ་ལྷ་ཡི་གསལ་སྣང་ཆེས་ཆེར་བསྐྱེད་པའི་སྟོབས་ཀྱིས་སྣང་སྲིད་ཐམས་ཅད་ཡེ་ཤེས་ཀྱི་ཆོ་འཕྲུལ་དང་རོལ་བར་ཡེ་ཡིན་ལ། སླར་གསལ་གདབ་པ་རྩལ་སྣང་སྤྲོ་བསྡུ་གང་འདོད་དུ་བསྒྱུར་ལ་བཟླས་པ་བྱའོ། །ལམ་ཞུགས་པ་རྣམས་ཀྱིས་ནི། བདག་ཉིད་དམ་ཚིག་སེམས་དཔའ་ནཱ་ག་རཀྴའི་སྐུ་གསལ་སྟོང་ཐུགས་མཆོག་ཡེ་ཤེས་སེམས་དཔའ་གསང་བདག་གི་རང་བཞིན་གནམ་ལྕགས་ཀྱི་རྡོ་རྗེ་རྩེ་དགུ་པ་གྱེན་དུ་ལངས་པའི་ལྟེ་བར་ཉི་དཀྱིལ་ལ་ཏིང་ངེ་འཛིན་སེམས་དཔའ་ཕེ་དམར་ནག །རྡོ་རྗེའི་མཐའ་སྐོར་དུ་རྩ་བའི་སྔགས་ཀྱིས་བསྐོར་བ་ལས་འོད་ཟེར་མདུན་བསྐྱེད་ཀྱི་ཐུགས་ཀར་མཆོད་པའི་ཚུལ་དུ་འཕྲོས་ཤིང་ཐིམ་པས་ཐུགས་རྒྱུད་དགྱེས་ཤིང་ཐུགས་དམ་དབྱིངས་ནས་བསྐུལ། དེ་ལས་འོད་ཟེར་དཔག་ཏུ་མེད་པ་ཕྱོགས་བཅུར་འཕྲོས། བདེ་གཤེགས་ཞི་ཁྲོ་རབ་འབྱམས་ཐམས་ཅད་ལ་མཉེས་པའི་མཆོད་པ་ཕུལ་བས་ཐུགས་རྒྱུད་བདེ་བ་ཆེན་པོའི་བདུད་རྩིས་གཏམས། དེ་དག་གི་ཐུགས་རྗེ་ནུས་རྩལ་ཐམས་ཅད་སྐུ་དང་ཡིག་འབྲུ་ཐིག་ལེའི་རྣམ་པར་ཆར་ལྟར་བབས་པ་བདག་མདུན་གྱི་ཐུགས་སྲོག་སྔགས་འཕྲེང་དང་བཅས་པ་ལ་ཐིམ་པས། རིག་སྔགས་ཀྱི་ནུས་རྩལ་རྫོགས་ཏེ་གཟི་བྱིན་སྟོབས་ཤུགས་འབར་བའི་དབལ་ལས་མེ་ཟེར་རབ་ཏུ་མཆེད་པས་ལུས་ཀྱི་རྩ་གནས་ཐམས་ཅད་ཁྱབ་སྟེ་རྣམ་རྟོག་གི་རང་གཟུགས་གཟའ་ཀླུ་སྡེ་བརྒྱད་ཀྱི་དུག་རླངས་བཅུད་དུ་སྨིན་པ་སྲོག་ཆགས་ཀྱི་རྣམ་པར་གྱུར་པ་རྣམས་ཕྱི་རོལ་དུ་དེད་དེ་གཞོབ་ཏུ་བསྲེག །ནད་དང་སྡིག་སྒྲིབ་ཐམས་ཅད་ཁྲག་རྣག་དང་ན་བུན་གྱི་རྣམ་པར་ཕྱིར་དབྱུངས་ཏེ་དམིགས་མེད་དུ་སྦྱངས། འཁོར་འདས་ཐམས་ཅད་ཁྲག་འཐུང་རོལ་བའི་ཞིང་ཁམས་ཡེ་ཤེས་ཀྱི་ཁྲོ་བོ་ཁྲོ་མོ་བྱ་ཁྱུང་ལྕགས་སྡིག་དུག་རླངས་མེ་མཚོན་གྱིས་གང་ཞིང་། སྒྲར་གྲག་པ་ཐམས་ཅད་འབྲུ་བཞིའི་སྔགས་ཀྱི་སྒྲ་སྒྲོག་པས་ཀླུ་གཉན་ས་བདག་གི་གནོད་བྱེད་རྣམས་འབོག་བརྒྱལ་སྙིང་རྩ་ཡེད་ཅིང་དམྱལ་སྒྲ་དིར་དིར་ཡོད་པར་བསམ་ཞིང་། དུག་ཁྲག་ཡེ་ཤེས་ཀྱི་གཟི་འོད་ཆེས་ཆེར་འབར་བས་སྣང་སྲིད་ཀུན་ཏུ་འགྲན་ཟླ་དང་བྲལ་བའི་ཏིང་འཛིན་གཡེལ་མེད་ཀྱི་ངང་ནས་འབྲུ་བཞི་པ་ཁོ་ན་བཟླ། ཨཱོཾ་ཕེ་ལམ་ཧཱུྃ༔ སླར་ཡང་འོད་ཟེར་འཕྲོས། མདུན་བསྐྱེད་ཀྱི་ཐུགས་ཀར་ཕོག་པས་བདེ་ཆེན་བསྐྱེད། ཟུང་འཇུག་སྦྱོར་བའི་འགུགས་ཟེར་ཕྱོགས་བཅུར་སྤྲོས་པས་སྣོད་བཅུད་ཀྱི་ནུས་རྩལ་ཐམས་ཅད་བསྡུས་ཏེ་གཟི་བྱིན་འབར་བས། གནམ་ལྕགས་ཞུན་མའི་ཕོ་བྲང་གཞོམ་མེད་རེག་གཅོད་ཀྱི་ཚྭ་ཚྭ་འཕྲོ་བ་ཞིག་ཏུ་བསྐྱེད་ལ་བཟླ། ཨཱོཾ་ཕེ་ལམ་ཧཱུྃ༔ ཡང་འབྲུ་བཅུ་བཞི་པའི་སྐབས་སུ། བདག་མདུན་གྱི་ལྷ་རྣམས་སླར་ཡང་སྔར་ལས་དྲག་ཏུ་ཁྲོས་ཤིང་ཐུགས་སྲོག་ས་བོན་དང་སྔགས་འཕྲེང་ལས་འོད་ཟེར་རྡོ་རྗེ་མེའི་ཚྭ་ཚྭ་རབ་ཏུ་ཁོལ་ཞིང་འཕྱུར་བས། སྐུའི་དབྱིངས་ཐམས་ཅད་ལྕགས་སྲེག་དང་ཁྲོ་ཆུ་ཞུན་མའི་བྱེད་ལས་བཞིན་དུ་འབར་བའི་ཤུགས་ལས། གནམ་ལྕགས་ཀྱི་ཐོག་དང་མེ་ཟེར་ཁྲོ་མཚོན་ཁྱུང་སོགས་ཕོ་ཉ་རབ་ཏུ་འཁྲུག་པས། སྣང་སྲིད་ཀྱི་འདྲེ་སྲིན་གཟའ་ཀླུ་བདུད་འགོང་འབྱུང་པོ་བྱད་གདོན་ཐམས་ཅད་དབང་དུ་བསྡུས་ཟིལ་གྱིས་མནན་ཅིང་། རྡུལ་ཕྲན་ཕྱེ་མར་མེ་ལྕེར་སྦྲང་བུ་ལྷུང་བ་ལྟར་སྐད་ཅིག་ཉིད་ལ་བཅོམ་ཞིང་དམིགས་མེད་དུ་བརླག་ནས། སྲོག་གི་དངས་བཅུད་སྐུའི་དབྱིངས་སུ་བསྡུས་པས་རབ་འབྱམས་ཞི་ཁྲོའི་གཟི་བྱིན་ནུས་སྟོབས་ཐམས་ཅད་ཅིག་ཅར་དུ་རྫོགས་ཏེ། འཁོར་འདས་ཟིལ་གནོན་གྱི་ཏིང་ངེ་འཛིན་དང་བཅས་ནས་རྟགས་རྫོགས་སུ་བཟླའོ། །ནག་པོ་ཏི་པ་ཙ་ཡ༔ ནཱ་ག་རཀྴ༔ ཨཱོཾ་ཕེ་ལམ་ཧཱུྃ༔ དེ་ལྟར་བསྙེན་བསྒྲུབ་སྔོན་དུ་སོང་ནས། ཡེ་ཤེས་ཀྱི་ཌཱཀྐིའི་སྙན་བརྒྱུད་ལས་བྱུང་བའི་ཕ་རོལ་བྱད་མའི་གཏད་ཁྲམ་བཟློག་པར་འདོད་ན། བདག་ཉིད་ཀླུ་བདུད་ནག་པོ་རྒྱ་མཚོ་ཆེན་པོའི་ཀློང་ལས་སྐུ་སྟོད་ཡན་ཐོན་པ་ཀླུ་གཉན་ས་བདག་དཔག་ཏུ་མེད་པས་བསྐོར་བ་ཐམས་ཅད་དུག་ལྔའི་སྟོབས་ཤུགས་འབར་བའི་དབལ་ལས་ནད་མཚོན་དུག་རླངས་གླིང་ཁམས་ཁྱབ་པར་འཕྲོས་པས་འཇིག་རྟེན་ཐམས་ཅད་སྨྱོ་འབོག་རེངས་ཤིང་བརྒྱལ། ཁྱད་པར་ཕ་རོལ་བྱད་མའི་མི་ནོར་ཕྱུགས་འཁོར་ཡུལ་ཞིང་དང་བཅས་པ་ཕོ་ཉ་རྣམས་དང་། ལས་རླུང་དྲག་པོའི་རྦ་ལ་གཡེངས་ཏེ། བདག་ཉིད་ཀྱི་ཞལ་དུ་སིབ་སིབ་བཏབ་པ་རྔམ་པའི་སྟོབས་ཀྱིས་ཀྲུམ་ཀྲུམ་བཞེས་ཏེ་འཁོར་བ་རྩད་ནས་གཅོད་པར་སྒོམས་ལ་དྲག་སྔགས་བརྒྱ་ཕྲག་དུ་བཟླ་བ་སྲོད་ཐུན་ལའོ། །ཡང་འཁོར་འདས་ཀུན་གྱི་རྦོད་གཏོང་དང་དམོད་ཁ་བཟློག་པར་འདོད་ན། བདག་ཉིད་ཁྲོ་རྒྱལ་ནཱ་ག་རཀྴ་སྟོང་གསུམ་གསལ་ཁྱབ་ཀྱི་སྐུར་བསྒོམ་པའི་ལྟོ་བར། གླིང་བཞི་རི་རབ་ལྕགས་རི་མུ་ཁྱུད་སྡེ་བརྒྱད་དྲེགས་པའི་གནས་རྟེན་ཐམས་ཅད་ཡོངས་སུ་ཆུབ་པ་ལ། རླུང་བུམ་པ་ཅན་གྱི་སྦྱོར་བས་བསྣུན་པས་ཡེ་ཤེས་རྡོ་རྗེ་སེར་བ་དྲག་པོས་འབྱུང་པོ་ཐམས་ཅད་དམྱལ་ཐག་བཅད། མཐར་ལྟོ་བ་གཡས་སུ་བསྐོར་བས་འབྱུང་ལྔ་རབ་ཏུ་འཁྲུགས་པའི་སྤུ་གྲི་འབར་བས་དྲེགས་བྱེད་ཕོ་རྒྱུད་ཐམས་ཅད་ཚར་བཅད། གཡོན་དུ་འཁོར་བས་མོ་རྒྱུད་ཐམས་ཅད་ཚར་བཅད། དྲག་ཏུ་མནན་པས་མ་ནིང་གི་སྡེ་ཚོགས་ཐམས་ཅད་ཚར་བཅད་པས། བག་ཆགས་སྣང་གཟུགས་ཀྱི་ཤ་ཁྲག་ཐམས་ཅད་འོག་ཏུ་ལྟེམ་གྱིས་ཞུ་བ། བདག་ཉིད་དཔལ་ཆེན་པོའི་སྲས་སུ་གྱུར་ནས་བཀྲག་མདངས་གཟི་བརྗིད་ཆེས་ཆེར་འབར་ཏེ་། སྲིད་པའི་འབྱུང་ཁམས་ཐམས་ཅད་ཐུགས་རྗེའི་རོལ་པར་ཁྱབ་གདལ་བས་གཟུང་འཛིན་གྱི་བདུད་ཚོགས་ནམ་ཡང་ལྡང་མེད་དུ་མོས་ལ། ཨཱོཾ་ནཱ་ག་རཀྴ་ཡ་མནྟ་ཀ་བཛྲ་པཱ་ཎི་ཀྲོ་ཏ་ཙཎྜ་ཨེ་ཀ་དུ་ན་ཨེ་ས་བྷྱོཿབཟློག༔ ཅེས་བཟླ་བ་སྟེ་དག་སྣང་དང་ལྡན་པ་རྣམས་ཀྱིས་ཉམས་སུ་ལེན་བྱར་གྱུར་པའོ། །དེ་ལ་ཞལ་ཤེས་ནི། ཐུན་མཚམས་དབྱངས་གསལ་ཡིག་བརྒྱ་ཡེ་དྷར་བཟླ་ཞིང་མཆོད་ཅིང་བསྟོད་ནས་དངོས་གྲུབ་ཞུ་བ་འདི་སྐད་དོ། །ཧཱུྃ༔ ཁྲོ་བོའི་རྒྱལ་པོ་ཀླུ་རྣམས་ཡོངས་ཀྱི་གཤེད༔ འབར་བའི་དབང་གིས་ཁམས་གསུམ་དབང་དུ་སྡུད༔ འཁྲུག་པའི་སྟོབས་ཀྱིས་སྲིད་གསུམ་ཟིལ་གྱིས་གནོན༔ བརྗིད་པའི་སྟོབས་ཀྱིས་ཀླུ་གདོན་རྡུལ་དུ་བརླག༔ ཐུགས་དམ་བསྐུལ་ལོ་སྔོན་གྱི་དམ་ཚིག་དགོངས༔ བདག་གི་རེ་ཞིང་ལྟོས་པའི་ཡི་དམ་ལྷ༔ བསྙེན་བསྒྲུབ་དམ་བཅས་གདུང་བའི་ང་རོས་འབོད༔ ཐུགས་རྗེའི་ཤུགས་ཕྱུང་ནུས་པའི་རྩལ་བསྐྱེད་ལ༔ སྔོན་གྱི་ལས་བཟློག་འཕྲལ་གྱི་རྐྱེན་སོལ་ཅིག༔ ཀླུ་གདོན་མ་ལུས་ཐུགས་རྗེའི་ཞལ་དུ་སྟོབས༔ སིདྡྷི་རྣམ་གཉིས་བདག་ལ་མྱུར་དུ་སྩོལ༔ ཨཱོཾ་ཕེ་ལམ་ཧཱུྃ༔ སརྦ་སིདྡྷི་ཧཱུྃ། ཅེས་པས་དབང་དངོས་གྲུབ་ཡིད་ལེན་བྱེད། ༈ འདིར་བླ་མེད་ཀྱི་རྒྱུད་དང་འབྲེལ་བར་གཞུང་ནས་བསྟན་ཕྱིར་ཚོགས་མཆོད་ཀྱི་རིམ་པ་བྱ་བར་སྤྲོ་ན། ཚོགས་རྫས་སུ་འོས་པ་རྣམས་བཤམས་ལ་བདུད་རྩིས་བསངས། ཨཱོཾ་ཨཱཿཧཱུྃ། འཁོར་འདས་དམིགས་མེད་རང་བཞིན་དབྱིངས་ཀྱི་སྣོད། །ཀ་དག་རིག་བཅུད་ག །ཉུག་མ་བདུད་རྩིའི་རྒྱུན། །ལྷུན་གྲུབ་ཡེ་ཤེས་འོད་ལྔར་བརྡལ་བའི་སྤྲིན། །རྨད་བྱུང་ནམ་མཁའི་མཐའ་ཀླས་ཁྱབ་པར་གྱུར། །ཨཱོཾ་ཨཱཿཧཱུྃ། ཕུད་དང་པོ་མཆོད་པ་ནི། ཧཱུྃ༔ ཐེག་བཅུད་འོད་གསལ་སྙིང་པོའི་མཆོད་སྤྲིན་མཆོག །གང་དུ་མི་གནས་ཅིར་ཡང་ལྷུན་གྲུབ་པ། །རང་བྱུང་རོལ་པ་རྒྱན་གྱི་འཁོར་ལོའི་ལྷ། །འཇོམས་བྱེད་ཁྲོ་རྒྱལ་འབར་བའི་སྣང་ཆ་རུ། །སྲིད་གསུམ་ཀ་ནས་དག་པར་འབུལ་ལགས་ན། །ཁམས་གསུམ་ཡོངས་སྒྲོལ་ཀློང་དུ་བཞེས་སུ་གསོལ། །གྷ་ན་ཙཀྲ་པཱུ་ཙ་ཁཱ་ཧི། བར་པ་བསྐང་བ་ནི། ཧཱུྃ༔ ཀློང་ལྔའི་རྩལ་མདངས་ཡེ་ཤེས་རོལ་པའི་གར། །གཏུམ་ཆེན་གདུག་པ་ཀུན་འདུལ་ཐུགས་དམ་བསྐང་། །སྐུ་མཆོག་རིགས་སྔགས་དམོད་པ་མཚོན་ཆའི་དབལ། །འཇིགས་བྱེད་འཇམ་དཔལ་དཔའ་བོའི་ཐུགས་དམ་བསྐང་། །སྟོབས་བཅུའི་རྩལ་འབྱིན་ནག་པོ་ཀླུ་གཉན་གཤེད། །ཁྲོ་རྒྱལ་ནཱ་ག་རཀྴའི་ཐུགས་དམ་བསྐང་། །ཤེས་རབ་སྟོང་པའི་དབྱིངས་སུ་ཆོས་ཀུན་སྡུད། །བདེ་ཆེན་ཀླུ་མོ་སྤྱན་གཅིག་ཐུགས་དམ་བསྐང་། །རྨོངས་ཚོགས་སྲིད་གཞོམ་ཆོས་དབྱིངས་སྙིང་པོ་ཅན། །འཆི་བདག་གླང་གདོང་སེར་པོའི་ཐུགས་དམ་བསྐང་། །ཞེ་སྡང་སྲིད་གཞོམ་ཡེ་ཤེས་འོད་ཆེན་པོ། །གདུག་པ་སྦྲུལ་གདོང་ནག་པོའི་ཐུགས་དམ་བསྐང་། །ཞེན་ཆགས་སྲིད་གཞོམ་ཐུགས་རྗེ་སོ་སོར་གསལ། །བྱ་ཁྱུང་སྲོག་ཟན་དམར་པོའི་ཐུགས་དམ་བསྐང་། །ང་རྒྱལ་སྲིད་གཞོམ་ཡིད་བཞིན་འབར་བའི་ཤུགས། །ལས་བྱེད་སྤྲུལ་དང་ཡང་སྤྲུལ་ཐུགས་དམ་བསྐང་། །ཕྲག་དོག་སྲིད་གཞོམ་འཁོར་འདས་དམིགས་མཐའ་བྲལ། །མེ་རླུང་ཚ་ཟེར་འཁྲུགས་པས་ཐུགས་དམ་བསྐང་། །མ་བསྐྱེད་གསལ་རྫོགས་འོད་སྐུའི་རྣམ་རོལ་ཅན། །ལྷུན་འབྱམས་རྫོགས་པ་ཆེན་པོའི་ཐུགས་དམ་བསྐང་། །བཤགས་པ་ནི། ཧོ་འོད་གསལ་ཀློང་ཡངས་དམིགས་མེད་ཐུགས་རྗེའི་དཔྱིད། །རྒྱུད་སྡེ་བཞི་དྲུག་ཐེག་པ་རིམ་དགུ་ཡི། །རྟེན་འབྲེལ་ས་མཚམས་སྤང་བླང་རྒྱུ་ཡི་ཆོས། །འགོག་ལམ་ཉེས་ལྟུང་དམ་ཚིག་ཉམས་ཆག་སོགས། །བཟང་རེ་ངན་དོགས་རྣམ་རྟོག་འཁྲུལ་པའི་དྲི། །མི་གནས་མི་དམིགས་ཆོས་སྐུའི་ཀློང་དུ་བཤགས། །རིས་མེད་བློ་འདས་ངང་དུ་བཟོད་པར་གསོལ། །ཅེས་ཡིག་བརྒྱ་བཟླ། ཐ་མ་སྒྲལ་བ་ནི། ཨེ་ལས་གཏིང་མཐའ་བྲལ་བའི་གནམ་ལྕགས་ཁང་། །གྲུ་གསུམ་མཚོན་ཚོགས་ཁྲོ་ཆུ་ཁོལ་མའི་རུམ། །ནག་པོ་ཀླུ་ཁམས་རྣམ་རྟོག་འདྲེ་གདོན་རྣམས། །ཉམ་ཐག་སྐད་ངན་ཙི་དིར་ཁོལ་བའི་སྟེང་། །བདག་ཉིད་དཔལ་ཆེན་ཐུགས་ལས་སྤྲུལ་བའི་སྲས། དམར་ནག་བྱ་ཁྱུང་མེ་ཟེར་སྲིད་གསུམ་འཁྲུག །སྐུ་སྟོད་ཁྲོ་རྒྱལ་ཡེ་ཤེས་ཐུགས་དང་ལྡན། །སྒྲོ་གཤོག་རླབས་ཀྱིས་ས་བཞི་བརྡར་ཤ་གཅོད། །སྐུ་སྨད་སྒྲོལ་བྱེད་དབལ་བཤམས་རྣོ་ངར་ལྡན། །གསོད་ཅིང་སྡིགས་པས་ཤུགས་ཀྱིས་ཕུང་ཁམས་བཤིག །སྒྲིབ་གཉིས་བག་ཆགས་དངོས་འཛིན་ཀ་ནས་དག །དཔལ་ཆེན་སྲས་མཆོག་ཡེ་ཤེས་སྦུབས་སུ་ཐིམ། ཁྲོམ་གྷ་རུ་ཊ་ཀཱི་ལ་ཡཱ་ནཱ་ག་སརྦ་ཏྲིག་ནན་རྦད་ཡ། ཅེས་བསྒྲལ་ཏེ་བསྟབ་པ་ནི། ཧཱུྃ། ཡེ་ཤེས་རང་རྩལ་རྔམ་ཡང་དགྱེས་པའི་ཞལ། །ཕྱེས་ཤིག་རང་རིག་ལྟ་བའི་མཐོང་ལམ་ཕྱེས། །བསྟབ་བོ་ལས་དང་ཉོན་མོངས་སྡིག་སྒྲིབ་བསྟབ། །བཞེས་ཤིག་རིས་མེད་མཉམ་པ་ཆེན་པོར་བཞེས། །ཨ་ལ་ལ་ཏེ་སུ་ཁ་ཛྙཱ་ན་ཧོ༔ ཅེས་ཕུལ། དེ་ནས་སྐབས་འདིར་བསྙེན་སྒྲུབ་ལས་སྦྱོར་མཐའ་རུ་ཕྱིན་པའི་ཚེ། སྒྲུབ་རྫས་བྷནྡྷ་རྟེན་གཏོར་ལྷར་གསལ་བ་སྤྱི་བོར་བཀོད་ལ། ཧཱུྃ། ཁྲོ་བོའི་རྒྱལ་པོ་ཀླུ་རྣམས་ཡོངས་ཀྱི་གཤེད། སོགས་ཀྱི་དབང་བླངས་ཤིང་ཙཀྲ་མགུལ་དུ་བཏགས། །རྫས་རིལ་ནང་རེ་བཞིན་ལོངས་སྤྱོད་པའམ། སླད་དོན་དམོད་རྫས་སུ་བཅང་བ་ཡུལ་དང་བསྟུན། ཚོགས་ལྷག་ནི། ཧཱུྃ། ཡེ་ཤེས་རོལ་པའི་ཆོ་འཕྲུལ་དཀྱིལ་འཁོར་ལྷ། མ་ཡེངས་མི་རྟོག་རྩོལ་བྲལ་ལྷུག་པའི་མདངས། །སྤྲུལ་དང་ཡང་སྤྲུལ་བྲན་གྱི་ཚུལ་སྣང་བ། །ཕོ་རྒྱུད་མོ་རྒྱུད་དྲེགས་པའི་སྡེ་ཚོགས་རྣམས། །འདོད་ཡོན་ཚོགས་ཀྱི་ལྷག་མ་འདི་བཞེས་ལ། ཟབ་གསང་བསྟན་འདི་ཕྱོགས་བཅུར་འཕེལ་ཞིང་རྒྱས། །བསྟན་དགྲ་གནོད་བྱེད་མིང་ཡང་མེད་པར་མཛོད། །ཨུ་ཙི་ཊ་བྷཀྵ་བྷྱ་སྭཱ་ཧཱ། དེ་ནས་སྐབས་འདིར་བསྲུང་མའི་བསྐུལ་པ་གཏོང་ཞིང་གཏོར་མ་འབུལ། ཆད་ཐོ་བྱ་བ་ནི། ཧཱུྃ། སྔོན་དུས་ཡེ་ཤེས་དཔལ་གྱི་དམ་ཚིག་དང་། །བར་དུ་སྤྲུལ་བའི་རིག་འཛིན་དམ་ཚིག་དང་། །ཐ་མར་གང་ཟག་དམ་ཚིག་གཉན་པོ་དང་། །ད་ལྟ་བདག་ཅག་རྣལ་འབྱོར་དམ་ཚིག་ལ། །ཚུལ་བཞིན་རྟོགས་པ་མ་ལུས་འདིར་གཤེགས་ལ། །ཇི་ལྟར་རང་རང་དམ་བཅས་ཇི་བཞིན་དུ། །རྣལ་འབྱོར་བཅོལ་བའི་འཕྲིན་ལས་སྒྲུབ་པར་མཛོད། །ཅེས་དབུལ། བསྟན་སྐྱོང་ནི། ཧཱུྃ་བྷྱོ༔ སྔོན་ཚེ་སློབ་དཔོན་པདྨའི་སྤྱན་སྔ་དུ། །འཛམ་གླིང་བོད་ཁམས་སྐྱོང་བར་ཞལ་བཞེས་པའི། །བསྟན་མ་ཆེན་མོ་མ་སྲིང་འཁོར་དང་བཅས། །འདིར་གཤེགས་བཀའ་ཡི་གཏོར་མ་འདི་བཞེས་ལ། །དགྲ་བགེགས་སྒྲོལ་ལ་རྐྱེན་ངན་བར་ཆད་བཟློག །ནད་ཁ་ཆོད་ལ་རིམས་ཁ་མ་ལུས་སྒྱུར། ཐུགས་དམ་རྒྱུད་བསྐུལ་བཅོལ་པའི་འཕྲིན་ལས་མཛོད། །གཏོར་བྲོ་བརྡུང་བ་ནི། གཏོར་གཞོང་ཁ་སྦུབ་པའི་འོག་ཏུ་དགྲ་བགེགས་མནན་པར་བསམ་སྟེ། ཧཱུྃ། སྟོང་གསུམ་བརྡལ་བའི་དཔལ་གྱི་གཞལ་ཡས་སུ། །རྔམ་བརྗིད་རོལ་པ་ཁྲོ་རྒྱལ་གཤིན་རྗེའི་གཤེད། །རྐང་པ་རྡོ་རྗེ་འཁོར་ལོ་འབར་བ་ཡི། །བྲོ་བརྡུང་འཕྲིན་ལས་ཐམས་ཅད་ལྷུན་གྱིས་གྲུབ། །ཤཱནྟིང་པུཥྟིང་ཝ་ཤཾ་མཱ་ར་ཡ་ནན༔ དེ་ནས་མཆོད་བསྟོད་ནོངས་བཤགས་བྱས་ཏེ་གཤེགས་སུ་གསོལ་བའམ་རྟེན་ཡོད་ན་བརྟན་བཞུགས་སོགས་བྱ་ཞིང་། དཀྱིལ་འཁོར་བསྡུ་བ་ནི། ཧཱུྃ། རིག་པའི་ཆོ་འཕྲུལ་ཧེ་རུ་ཀ །དམིགས་མེད་ཀ་དག་ཀློང་དུ་མུ། །འགག་མེད་སྐུ་གསུམ་ལྷུན་གྲུབ་ཞིང་། །འཁོར་འདས་དབྱེར་མེད་ཨ་ལ་ལ། །ཅེས་རྫོགས་རིམ་བསྡུ་ཞིང་། རྗེས་སྣང་གི་རྒྱུན་སྤྱོད་ལ་འཇུག །ཐུན་མཇུག་དགེ་རྩ་བསྔོ་བ་ནི། ཧཱུྃ༔ ཁྲོ་རྒྱལ་དབང་གི་བསྒོམ་བསྒྲུབ་ལ༔ རིམ་པ་གཉིས་ཀྱི་བསྐྱེད་རྫོགས་བཟླས༔ བསོད་ནམས་མཐུ་ཡིས་འགྲོ་བདེ་ཞིང་༔ ཀུན་ཏུ་བླ་མེད་བྱང་ཆུབ་སེམས༔ རྡོ་རྗེ་འཛིན་པ་འགྲུབ་གྱུར་ཅིག༔ བཀྲ་ཤིས་ནི། གང་ཞིག་བླ་མེད་བཅོམ་ལྡན་གཤིན་རྗེའི་གཤེད། །སྐུ་གསུང་ཐུགས་ཀྱི་ཡོན་ཏན་མ་ལུས་པ། །འགྲོ་བ་ཀུན་གྱི་རྒྱུད་ལ་རབ་ཞུགས་ནས༔ དངོས་གྲུབ་རྣམ་གཉིས་འཕེལ་བའི་བཀྲ་ཤིས་ཤོག །ཅེས་དང་། གཞན་ཡང་བཀྲ་ཤིས་ཅི་རིགས་བརྗོད་ཅིང་དཀྱིལ་འཁོར་གྱི་སྣང་ཆ་རྣམས་སྐལ་མེད་ཀྱི་མིག་ལམ་དུ་མི་མངོན་པར་བསྡུ་བ་སོགས་མཐའ་རྒྱས་པར་བྱའོ། །ཅེས་པ་འདི་ནི་གཏེར་ཆེན་ཉི་མ་གྲགས་པའི་གཏེར་བྱོན་ལ་གོ་དོན་ཟབ་མོ་གསལ་བར་བྱས་པ་སོགས་མ་ཚང་ཁ་སྐོང་རྣམས་གུ་རུའི་ཟབ་གཏེར་གྱི་བཀའ་རྟགས་མངོན་དུ་གྱུར་པ་ཐུགས་མཆོག་རྡོ་རྗེས་མཛད་པ་ལྟར་ལ། གོང་འོག་འཁྲིགས་རིམ་རྣམས་གཏེར་ཆེན་ཉི་མ་གྲགས་ཀྱི་ཕྱག་བཞེས་མ་འཁྲུལ་བར་འགྲིགས་ཆགས་སུ་བཀོད་པ་འདི་ནི་འགྱུར་མེད་པདྨ་ཀུན་གྲོལ་རྣམ་རྒྱལ་པས་དད་མོས་ཀྱི་ངང་ནས་བྲིས་པའོ། །མངྒ་ལཾ། ༈ རབ་འཇིགས་འབར་བའི་བྱིན་གཟས་གདེང་ཅན་དཔུང་། །སྲེག་བྱེད་རིགས་གསུམ་འདུས་པའི་སྒྲུབ་ཕྲིན་ཁྲིགས། །པར་དུ་བཞེངས་པའི་དགེ་དེས་སྙིགས་དུས་འགྲོ། །འཇམ་དཔལ་དཔའ་བོའི་གོ་འཕང་མཆོག་ཐོབ་ཤོག །ཅེས་པའང་རིག་འཛིན་པས་བྲིས་པ་མངྒ་ལཾ།། །།

ནཱ་ག་རཀྴའི་བསྙེན་སྒྲུབ་དམིགས་རིམ་ངག་འདོན།

ནཱ་ག་རཀྴའི་བསྙེན་སྒྲུབ་དམིགས་རིམ་ངག་འདོན་དུ་བྱ་བ་ནི། ཧཱུྃ། བདག་ཉིད་རིག་རྒྱལ་ཐུགས་ཀ་ནས། །ཉི་དཀྱིལ་ས་བོན་ཕེ་ཡིག་ལས། །ཚ་ཞིང་མྱུར་བའི་འོད་དམར་ནག །ཕྱོགས་བཅུར་འཕྲོས་པས་འོག་གདོན་ཚོགས། །སྤྱི་དང་ཁྱད་པར་འཚེ་བ་ཡི། །ཀླུ་གཉན་ས་བདག་ཐམས་ཅད་བཀུག །རང་གི་ཞལ་ནས་སྔགས་བཟླས་པས། །ཀུན་ཀྱང་འབོག་བརྒྱལ་སྙིང་རྩ་ཡེད། །དམྱལ་སྒྲ་དིར་དིར་ཡོད་པར་བསམས། །ཤིན་ཏུ་ཐུལ་དཀའི་གདེངས་ཅན་རྣམས། །མཚོན་ཆས་གཏུབ་ཅིང་ཞལ་དུ་གསོལ། །རྡུལ་ཕྲན་བཞིན་དུ་བརླག་པར་གྱུར། །བསྙེན་སྒྲུབ་རྩ་སྔགས་འབྲུ་བཞི་པ་ནི། ཨཱོཾ་ཕེ་ལཾ་ཧཱུྃ༔ ཡིག་འབྲུ་བཅུ་བཞི་པ་ནི། ནག་པོ་ཏི་པ་ཙ་ཡ་ནཱ་ག་རཀྴ༔ ཨཱོཾ་ཕེ་ལཾ་ཧཱུྃ༔ རྒྱུན་ཏུ་གོང་མ་གཙོ་བོར་བྱ། །བཅུ་བཞི་པའི་དྲག་སྔགས་མང་ཉུང་རང་གི་འདོད་དང་བསྟུན། །གང་ཡང་གོས་ཀྱི་གོང་བ་ཕྱིན་ལ་མི་གོ་བའི་སྒྲ་དག་པར་ཤུབ་བུས་བཟླ་ཞིང་དམིགས་པ་གནད་དུ་བསྣུན་པས་ཀླུ་གཉན་ས་གདོན་གྱི་འཚེ་བ་ལས་གྲོལ་བར་འགྱུར་རོ། །ཞེས་པདྨའི་མིང་ཅན་གྱིས་བྲིས་པའོ། །དགེའོ།། །།

ནཱ་ག་རཀྴའི་དབང་ཆོག་ཁྲིགས་སུ་སྡེབས་པ་ཕན་བདེའི་ཉིན་བྱེད།

ཀླུ་བདུད་ནཱ་ག་རཀྴའི་དབང་ཆོག་ཁྲིགས་སུ་སྡེབས་པ་ཕན་བདེའི་ཉིན་བྱེད་ཅེས་བྱ་བ་བཞུགས་སོ། །རབ་ཞིའི་དཔལ་ལས་ཆེར་ཁྲོས་འཇམ་དཔལ་དབྱངས། ཀླུ་སྲིན་དྲག་པོར་རོལ་བའི་རྣམ་འགྱུར་གྱིས། འབྱུང་གདོན་ཟ་བར་དུས་ཀྱི་ལྕེ་རྣོན་བཞིན། རབ་འབར་རིག་པའི་རྒྱལ་པོར་གུས་བཏུད་ནས། གདེངས་ཅན་དུག་རླངས་མུན་པས་འཚེ་བའི་སྨག །གཞིལ་ནུས་གསང་བདག་ཁྲོ་བོའི་བསྐྱེད་བཟླས་ཉི། དོན་གཉེར་སྐལ་བཟང་དགའ་བའི་ལེགས་བཤད་སྐྱེས། དབང་ཆོག་ཕན་བདེའི་སྣང་བ་དེང་འདིར་སྤྲོ། དེ་ཡང་འཇམ་དཔལ་རིག་པའི་རྒྱལ་པོ་ནཱ་ག་རཀྴའི་དབང་བསྐུར་བ་ལ་སྦྱོར་བ་ཡོ་བྱད་ཀྱི་བཤམས་དང་དབང་བསྐུར་བའི་ཚུལ་གཉིས་ལས། དང་པོ་ནི་སྟེགས་བུ་ཁེབས་ལྡན་གྱི་ཁར་རས་བྲིས་སམ་ཡང་ནའང་འབྲུ་ཚོམ་གྱི་ཁར་གཏོར་མ་དམར་ནག་ཟུར་གསུམ་པ། གཡས་གཡོན་དུ་ཅུང་ཟད་དམན་པའི་འཁོར་རང་འདྲ་གཉིས་ཙཀླི་གཏོར་གདུགས་ནག་པོས་བརྒྱན་པ། གཡས་སུ་གྲི་གུག །གཡོན་དུ་སྦྲུལ་ཞགས། མདུན་དུ་བྱ་ཁྱུང་སྐུ། རྒྱབ་ཏུ་ཀླུ་གདོན་ཙཀླི། དམ་ཚིག་གི་ཆུ་ལ་སོགས་པ་དང་། གཞན་ཡང་སློབ་དཔོན་མདུན་དུ། ནས་ཟེ། སྤོས་ཐུན། ཌ་དྲིལ། ལས་བུམ། བགེགས་གཏོར། མཎྜལ། སོགས་ཚོགས་པར་བྱས་ལ་ལས་ཀྱི་གཞུང་བསྲང་ཞིང་འཛབ་བསྙེན་ནུས་ལྡན་དུ་བྱ་ཞིང་བདག་འཇུག་བླང་། དེ་ནས་ལས་བུམ་བསང་སྦྱངས། སྭ་བྷ་ཝཱ་སོགས། སྟོང་པའི་ངང་ལས་པད་ཟླའི་སྟེང་དུ་བྷྲུྃ་ལས་བུམ་པ་མཚན་ཉིད་དང་ལྡན་པའི་ནང་དུ་ཧཱུྃ་ལས་སྣ་ཚོགས་རྡོ་རྗེ་ཧཱུྃ་གིས་མཚན་པ་དེ་ཡོངས་སུ་གྱུར་པ་ལས་ཁྲོ་བོ་བདུད་རྩི་འཁྱིལ་བ་སྐུ་མདོག་ལྗང་སྔོན་ཕྱག་གཡས་སྣ་ཚོགས་རྡོ་རྗེ་དང་གཡོན་དེས་ཡུ་བ་བྱས་པའི་དྲིལ་བུ་བསྣམས་པ། དར་གྱི་ན་བཟའ་དང་རིན་པོ་ཆེའི་རྒྱན་གྱིས་བརྒྱན་པ། ཞབས་གཡས་བསྐུམ་གཡོན་བརྐྱང་གིས་བཞུགས་པའི་སྤྱི་བོར་ཨོཾ་མགྲིན་པར་ཨཱཿཐུགས་ཀར་ཧཱུྃ་གིས་མཚན་པ། ཧཱུྃ་ལས་འོད་ཟེར་འཕྲོས། ཡེ་ཤེས་པ་དང་དབང་གི་ལྷ་རྣམས་སྤྱན་དྲངས། དམ་ཚིག་པ་དང་གཉིས་སུ་མེད་པར་གྱུར། དབང་གིས་ལྷས་དབང་བསྐུར་མི་བསྐྱོད་པས་དབུ་རྒྱན་པར་གྱུར། ཨོཾ་ཨརྒྷཾ་སོགས་ཀྱིས་མཆོད། ཧཱུྃ༔ འཇིགས་པའི་ཧཱུྃ་སྒྲ་ངེས་སྒྲོག་ཅིང་། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་སྩོལ་བའི་ལྷ། །བགེགས་ཀྱི་དགྲ་ལ་ཕྱག་འཚལ་བསྟོད། །བདུད་རྩི་འཁྱིལ་བའི་ཐུགས་ཀར་ཉི་མའི་སྟེང་དུ་ཧཱུྃ་གི་མཐར་སྔགས་ཕྲེང་གིས་བསྐོར་བ་ལས་འོད་ཟེར་འཕྲོས་གནོད་བྱེད་ཐམས་ཅད་ཚར་བཅད་སངས་རྒྱས་དང་བྱང་སེམས་ཐམས་ཅད་ཀྱི་བྱིན་རླབས་ནུས་མཐུ་ཐམས་ཅད་བཀུག་ནས་བུམ་པའི་ཆུ་ལ་ཐིམ་པར་གྱུར། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། གང་འགྲུབ་བཟླ་ཞིང་མཐར། ཁྲོ་བོ་འོད་དུ་ཞུ་ནས་བུམ་ཆུའི་རྣམ་པར་གྱུར། ཞེས་བསྐྱེད་བཟླས་གྲུབ་ནས། སློབ་མ་ཁྲུས་བྱ། གྲལ་དུ་འཁོད། བགེགས་བསྐྲད། ཆོས་བཤད་ཇི་རིགས་པ་སྔོན་དུ་འགྲོ་བས། འདིར་བཅོམ་ལྡན་འདས་འཇམ་དཔལ་དབྱངས་ཉིད་གཏི་མུག་གདུག་པ་འདུལ་བའི་ཆེད་དུ་རིག་པའི་རྒྱལ་པོ་ནཱ་ག་རཀྴའི་སྐུར་བཞེངས་པའི་སྒྲུབ་ཐབས་ཁྱད་པར་ཅན་འདི་ནི། སྔོན་རྒྱ་གར་བྷ་ཡ་ཏི་རར་རྒྱལ་པོ་གཙུག་གི་ནོར་བུ་མཐའ་ཡས་འོད་ཅེས་བྱ་བ་ལོ་བཅུ་གཅིག་ལོན་པ་ས་བདག་དམངས་རིགས་ཀྱི་གདོན་གྱིས་ཟིན་པ་ལ་བླ་མཆོད་དུ་དགེ་སློང་ཚུལ་ཁྲིམས་དག་པ་གཅིག་ཡོད་པ་དེས་ལྷ་ལ་གསོལ་བ་བཏབ་པས། རི་བོ་མགྲིན་བཟང་ནས་སངས་རྒྱས་འོད་སྲུང་གི་མཆོད་རྟེན་གྱི་བུམ་པའི་ནང་ན་ཀླུ་བདུད་འབུམ་གྱི་སྙིང་པོ་ཡོད་པ་ལོང་ལ་ཉམས་སུ་ལོང་ཞིག་བྱ་བ་བྱུང་བས། གཏེར་ནས་ཕྱུངས་ཏེ་རྒྱལ་བུ་ནད་ལས་བཀྲོལ། ཕྱིས་མངའ་བདག་ཁྲི་སྲོང་ལྡེའུ་བཙན་གྱིས་ཆོས་འཁོར་བསམ་ཡས་བཞེངས་དུས། མལ་གྲོའི་ཀླུས་སྤྲུལ་བའི་གཟུགས་ཀྱིས་གྲོགས་བྱས་པའི་དྲིན་བརླན་ཕྱིར་གཟུགས་བསྟན་པ་ནན་གྱིས་བསྐུལ་བ་ལས་གཟི་ཅན་གྱི་རང་གཟུགས་སྟན་པའི་དུག་གིས་ཕོག་པས་ནད་དང་སྡུག་བསྔལ་གྱིས་མནར་བར་གྱུར་ཅིང་། འོན་ཀྱང་སློབ་དཔོན་ཆེན་པོ་ལྟ་བུ་བཞུགས་པས་ཕན་བའི་ཐབས་མཆིས་སམ་སྙམ་སྟེ། ཚུལ་དེ་ཞུས་ནས་གསོལ་བ་བཏབ་པས་གདམས་པ་འདི་ཉིད་བསྟན་པས་རྒྱལ་པོ་བསྙུན་ལས་གྲོལ་ཏེ་སྔོན་གྱི་རབས་ཀྱང་གསུངས་སོ། །དེ་ལྟ་བུའི་གདམས་པ་འདི་ནི། ཇི་སྐད་དུ། སློབ་དཔོན་ཆེན་པོས། དྲན་པ་ཙམ་གྱིས་ཀླུ་ནད་འཇོམས༔ ས་བདག་ས་སྲིན་སྨོས་ཅི་དགོས༔ ས་བདག་ཀླུ་ཡི་གཤེད་མ་ནི༔ ནཱ་ག་རཀྴ་ཞེས་བྱ་བ༔ ཀླུ་རྣམས་སྲོག་གཅོད་སྲིན་པོ་ཡིན༔ ཞེས་གསུངས་པ་ལྟར་མཐུ་སྟོབས་བྱིན་རླབས་ཀྱི་ནུས་པ་བསམ་གྱིས་མི་ཁྱབ་པའི་ལྷག་པའི་ལྷ་འདི་ལ། སྒྲུབ་པའི་བཀའ་སྲོལ་རྣམ་གྲངས་མང་དུ་བཞུགས་པ་ལས། འདིར་ནི་ཁམས་པ་ཉི་མ་གྲགས་པའམ་གར་དབང་འགྲོ་འདུལ་གླིང་པ་ཞེས་ཡོངས་གྲགས་ཀྱི་གཏེར་ཆེན་དེ་ཉིད་ཀྱིས་གདན་དྲངས་པ་སྟེ། དེ་ཡང་སྒྲུབ་ཐབས་ལས། མ་འོངས་བོད་ཀྱི་མི་དགེར་འབུང་༔ དཀར་ཕྱོགས་ཉམས་ཤིང་ནག་ཕྱོགས་དར༔ ཁྱད་པར་གཟའ་ཀླུས་མི་ཐོག་འཇོམས༔ དེ་དུས་འགྲོ་ལ་ཕན་དོན་དུ༔ ཤིན་ཏུ་ཟབ་པའི་གདམས་པ་ཞིག༔ ཡི་གེར་འདེབས་ནས་གཏེར་དུ་བཅོལ༔ ཞེས་དང་ཨེ་མ་གསང་བ་ཐུགས་ཀྱི་བཅུད༔ ཤིན་ཏུ་གསང་བའི་ཡང་སྙིང་འདི༔ བོད་ཡུལ་གངས་ཀྱི་རི་ལྗོངས་འདིར༔ མཐའ་དབུས་ལྔ་ལ་གཏེར་དུ་སྦོས༔ ཤར་གཏེར་ལྷོ་གཏེར་ནུབ་ཀྱི་གཏེར༔ བྱང་གཏེར་དབུས་གཏེར་རྒྱལ་པོའི་དཀོར༔ སྐལ་ལྡན་ལྔ་ལ་སྨོན་ལམ་བཏབ༔ ཁྱད་པར་འཕགས་པའི་གདམས་པ་འདི༔ ཤར་ཕྱོགས་རྡོ་རྗེའི་ཆོས་སྐོར་དུ༔ ཤར་ཕྱོགས་མཐོན་པོའི་རི་བོའི་ལྷོ༔ ཅི་མདའ་བྲག་དམར་མགུལ་དུ་སྦས༔ ནམ་ཞིག་དུས་ཀྱི་ཐ་མ་ལ༔ ལས་འཕྲོ་ཅན་དང་འདི་འཕྲད་ནས༔ འགྲོ་བའི་སྡུག་བསྔལ་སེལ་བར་ཤོག༔ ཅེས་གསུངས་པ་ལྟར་ཁམས་ཀྱི་སྲིང་མོ་རྫོང་གི་ལྷོ་ཕྱོགས་ནགས་ཤོད་ཅི་མདའ་བྲག་དམར་ཞེས་ཆུ་བོ་ཆེན་པོ་རབ་ཏུ་འཁྲུག་པའི་ཕར་འགྲམ་ན། ཤིན་ཏུ་མཐོ་བའི་བྲག་རི་ལྟར་མི་བཟོད་པའི་གཡང་ས་ཆེན་པོ་ཉམས་ང་བའི་ལོགས་ལ། གཏེར་སྟོན་རིག་འཛིན་ཆེན་པོ་དེ་ཉིད་མཁའ་ལ་བྱ་ལྟར་ལྡིང་བའི་རྫུ་འཕྲུལ་གྱི་བཀོད་པ་རྨད་དུ་བྱུང་བས། ཆུ་དང་བྲག་གཡང་སོགས་གང་ལའང་ཐོགས་མེད་དུ་གཤེགས་པའི་ཚེ་དམ་སེལ་ཞིག་གི་རྐྱེན་གྱིས་གཏེར་སྒོ་འགག་ཏུ་ཉེ་བ་ན་དམ་ཅན་སྐྱེས་བུ་ཆེན་པོའི་གཟུགས་དངོས་སུ་བསྟན་ནས་ཤོག་སེར་རྫ་བུམ་གང་ཕུལ་བ་བཞེས་ནས། སླར་ཡང་རྫུ་འཕྲུལ་འགོག་པ་མེད་པའི་རྣམ་འཕྲུལ་དུ་མ་དང་བཅས་ཚུར་འགྲམ་དུ་གཤེགས་པར་མཛད་པ་ངོ་མཚར་ཡ་མཚན་གཞལ་དུ་མེད་པར་བསྟན་ནས་གདན་དྲངས་པའི། ཟབ་ཆོས་གསང་བདག་རིག་པའི་རྒྱལ་པོ་ནཱ་ག་རཀྴའི་ཆོས་ཚན་ཟབ་ཁྱད་ཕུལ་དུ་བྱུང་བའི་གདམ་ཟབ་གང་གི་སྒོ་ནས་དབང་བསྐུར་བ་ལ། སློབ་དཔོན་གྱི་བགྱི་འོས་དང་སློབ་མའི་བགྱི་བ་གཉིས་ཀྱི་སློབ་དཔོན་གྱི་བགྱི་བར་འོས་པ་རྣམས་ལེགས་པར་གྲུབ་ཟིན་པས། ད་ཁྱེད་རང་རྣམས་ཀྱི་ངོ་སྐལ་དུ་གྱུར་པ་དབང་བསྐུར་ཟབ་མོ་ཞུ་བའི་ཡོན་དུ་མཎྜལ་ཕུལ་མཛོད། ཞེས་བརྡ་སྤྲད། དེ་ནས་གསོལ་བ་འདེབས་པ་འདིའི་རྗེས་ཟློས་མཛོད། ཤཾ༔ ཀླུ་བདུད་ནག་པོའི་གདམས་པ་ལས༔ དབང་ཆོག་གནམ་ལྕགས་དྲག་མེ་བཞུགས༔ ཤཾ༔ ཁྲོ་བོའི་རྒྱལ་ལ་ཕྱག་འཚལ་ལོ༔ དབེན་པའི་གནས་སུ་དཀྱིལ་འཁོར་ནི༔ སྒྲུབ་པའི་གཞུང་ལྟར་བཤམས་ནས་ཀྱང་༔ གཡས་སུ་གྲི་གུག་གཡོན་སྦྲུལ་ཞགས༔ ཀླུ་དང་ཁྱུང་གི་ཙཀ་ལི་བསགས༔ སྨན་རག་མཆོད་པ་སྣ་ཚོགས་བཤམས༔ ལས་གཞུང་བསྲང་ཞིང་བསྙེན་སྒྲུབ་གསོ༔ ཏིང་འཛིན་བསྐྱེད་ཅིང་དམིགས་པ་བསྒྱུར༔ ཀླུ་དང་ས་བདག་དབང་བསྡུས་ནས༔ ཟིལ་གྱིས་མནན་ཞིང་བཀའ་ཉན་བསམ༔ བུམ་པ་བསང་སྦྱངས་སློབ་མ་བཀྲུ༔ བགེགས་བཏོར་བསྔོ་ཞིང་མཚམས་གཅོད་བྱ༔ དབང་ཡོན་གོ་ཁྲབ་མཎྜལ་འབུལ༔ དབང་དོན་མཚམས་སྦྱོར་ལོ་རྒྱུས་འཕྲོད༔ སློབ་དཔོན་ལྷར་གསལ་གསོལ་བ་གདབ༔ ཀྱཻ༔ ཁྲོ་བོའི་རྒྱལ་པོ་འབར་བའི་སྐུ༔ གདུག་པ་འདུལ་མཛད་ཧེ་རུ་ཀ༔ འབར་བ་དབང་གི་དཀྱིལ་འཁོར་དུ༔ བདག་ནི་སྨིན་པར་མཛད་དུ་གསོལ༔ ལན་གསུམ༔ ལན་སྦྱིན་པ་ནི༔ ཧཱུྃ༔ ང་ནི་དཔལ་ལྡན་ཧེ་རུ་ཀ༔ ཁྱེད་ཅག་རྡོ་རྗེའི་བུ་ཡིན་ནམ༔ དམ་ཚིག་བཀའ་ལས་མི་འདའ་ཞིང་༔ ཚུལ་བཞིན་སྒྲུབ་པར་བརྩོན་ནུས་སམ༔ ལན་གསོལ་བ༔ དགོངས་ཤིག་ཁྲོ་རྒྱལ་གཤིན་རྗེ་གཤེད༔ བདག་ནི་གསང་བའི་ཆོས་ལ་དད༔ བཀའ་ལས་མི་འདའ་དམ་ཚིག་བསྲུང་༔ ལུས་སྲོག་འབེན་བཙུག་སྒྲུབ་ལ་བརྩོན༔ ཁྱེད་ཀྱིས་རྗེས་སུ་འཛིན་པར་ཞུ༔ དེ་ནས་སྐྱབས་སུ་འགྲོ་བ་ནི༔ ཕྱོགས་བཅུའི་བདེ་གཤེགས་ཞི་ཁྲོ་རབ་འབྱམས་ཐམས་ཅད་ཐུགས་ཆོས་ཉིད་ཁྱབ་བརྡལ་ཞལ་ཕྱག་གི་མཚན་མ་ལས་འདས་པ་གདོད་མ་ནས་རང་ཆས་སུ་ཞུགས་པའི་བརྡ་རྟགས་མཚོན་བྱེད། སྤྱི་མཐུན་བློ་ཡུལ་དུ་འཇུག་པ་བདེ་ཕྱིར་ཆོས་སྐུ་གསང་བའི་བདག་པོ་ཞེས་དང་༔ སྟོང་པའི་རྩལ་ཁ་གོ་མ་འགགས་པའི་སྟོབས་ཤུགས་འཆང་བ་བདེ་གཤེགས་ཐམས་ཅད་ཀྱི་སྐུའི་བདག་ཉིད་འཇམ་དཔལ་དབྱངས་དང་གསལ་སྟོང་ཟུང་དུ་འཇུག་པའི་རྟེན་འབྲེལ་ཐུགས་རྗེའི་དངོས་སྣང་གདུག་པ་འདུལ་ཕྱིར་ཀླུ་བདུད་ནཱ་ག་རཀྴའི་ཆོ་འཕྲུལ་དུ་རོལ་པ་སྟེ། དོན་ལ་ཆོས་ཉིད་སྟོང་པའི་གསལ་མདངས་ཁྲོ་རྒྱལ་ནཱ་ག་རཀྴའི་སྐུར་སྣང་བ་ལ་དེང་ནས་བཟུང་སྟེ་ཇི་སྲིད་རང་བྱུང་དོན་གྱི་ཧེ་རུ་ཀ༔ མངོན་དུ་མ་གྱུར་གྱི་བར་དུ་རྩལ་མདངས་ལོངས་སྐུའི་དཀྱིལ་འཁོར་ལ་མི་ཕྱེད་དད་པས་སྐྱབས་སུ་འགྲོ་བའི་བློས། ཧཱུྃ༔ ཆོས་སྐུ་གསང་བདག་ལོངས་སྐུ་འཇམ་དཔལ་དབྱངས༔ སྤྲུལ་སྐུ་ཁྲོ་རྒྱལ་ནཱ་ག་རཀྴ་ལ༔ དེང་ནས་བཟུང་སྟེ་བྱང་ཆུབ་མ་ཐོབ་བར༔ དབང་དྲག་ཕྲིན་ལས་སྒྲུབ་ཕྱིར་སྐྱབས་སུ་མཆི༔ ལན་གསུམ༔ སེམས་བསྐྱེད་པ་ནི༔ ཁམས་གསུམ་སྐྱེ་འགྲོ་སྤྱི་དང་ཁྱད་པར་གདུལ་དཀའི་འགྲོ་བ་ཐམས་ཅད་འོད་གསལ་གཉུག་མ་མི་འགྱུར་བ་དཔའ་བོ་གྱད་ཀྱི་ངོ་བོར་ཡོངས་སུ་བསྒྲལ་ཏེ་ཕྱིར་མི་ལྡོག་པའི་བློས༔ ཧཱུྃ༔ སྡུག་བསྔལ་འགྲོ་བ་བདེ་ལྡན་ཕྱིར༔ ཁྲོ་རྒྱལ་འབར་བའི་ཏིང་འཛིན་བསྒོམ༔ དྲག་པོའི་འཕྲིན་ལས་སྒྲུབ་ནས་ནི༔ འགྲོ་དོན་འགྲུབ་པར་སེམས་བསྐྱེད་དོ༔ ལན་གསུམ༔ དེ་ནས་དམ་ཆུ་བླུད༔ ཧཱུྃ༔ འདི་ནི་དམ་ཚིག་རྡོ་རྗེའི་ཆུ༔ དམ་ཚིག་བསྲུང་ན་དངོས་གྲུབ་ཐོབ༔ དམ་ཚིག་ཉམས་ན་རྡུལ་དུ་བརླག༔ དེ་བས་ཁྱེད་ཀྱིས་དམ་ཚིག་བསྲུང་༔ ནཱ་ག་རཀྴ་ཙིཏྟ་ཧཱུྃ༔ དེ་ནས་རྡོ་རྗེ་མགོ་ལ་བཞག་སྟེ༔ ཧཱུྃ༔ ང་ནི་རྡོ་རྗེ་འཛིན་པ་སྟེ༔ རྡོ་རྗེ་འཆང་དབང་ང་ཡི་བཀའ༔ ཁྱོད་ཀྱི་ཚུལ་བཞིན་རྟག་དུ་བསྲུང་༔ ནམ་ཡང་འདའ་བར་མ་བྱེད་རྒྱ༔ ས་མ་ཡ་བཛྲ་ཧཱུྃ༔ སྐྱབས་སེམས་ཕོག་ལ་ཡེ་ཤེས་དབབ༔ ཏིཥྛ་བཛྲ་མེ་ཏོག་འཐོར༔ ས་མ་ཡཱ༔ རྒྱ་རྒྱ་རྒྱ༔ ཞེས་པ་ལས་བུམ་གྱི་ཆུས་བསངས། ཨོཾ་མ་ཧཱ་ཤུ་ནྱ་ཏ༴ སོགས་ཞེས་བརྗོད་པས་ཁྱེད་རང་རྣམས་རྣམ་སྨིན་གྱི་ལུས་འདིས་མཚོན་པའི་མ་དག་པའི་སྣང་བ་ཐམས་ཅད་སྟོང་པར་སྦྱངས། སྟོང་པའི་ངང་ལས་བཾ་ལས་རྒྱ་མཚོ་ཆེན་པོའི་ཀློང་དུ་གྲུ་གསུམ་དམར་ནག་གི་དབུས་སུ་ཀླུ་གཉན་ས་བདག་འབུམ་ཁྲི་བསྣོལ་བའི་སྟེང་དུ། ཁྱེད་རང་རྣམས་སེམས་ཉིད་ཀྱི་ངོ་བོ་ཡི་གེ་ཕེ་དམར་ནག་ཞིག་ཏུ་གྱུར། དེ་ཡོངས་སུ་གྱུར་པ་ལས་ཁྱེད་རང་ཁྲོ་རྒྱལ་རིག་པའི་རྒྱལ་པོ་ནཱ་ག་རཀྴ་ཀླུ་སྲིན་མི་སྡུག་པའི་ཉམས་ཅན། དབུ་དགུ་ཕྱག་བཅོ་བརྒྱད་པ་རབ་ཏུ་ཁྲོས་པ་སྲིན་པོའི་ཞལ་ལ་རྣོ་ཞིང་གདུག་པའི་དུག་གི་མཆེ་བ་ཟུར་གསུམ་དུ་གཙིགས་ཤིང་སྤྱན་དགུ་སྡང་མིག་ཏུ་བགྲད་པ། ཤིན་ཏུ་མི་བཟད་པ་དུག་ཆེན་ཧ་ལའི་མདོག་ལྟ་བུའི་སྐུ་རི་རབ་འབར་བའི་ལོགས་ལ་བརྟེན་པའི་དུག་སྤྲུལ་ནག་པོའི་གདེང་ཀས་བར་སྣང་སྤྲིན་ལྟར་འཐིབ་པ་འཇུག་མ་རྒྱ་མཚོའི་གཏིང་དུ་འཁྱིལ་བ། རྩ་བའི་ཕྱག་གཉིས་གྲི་གུག་དང་སྦྲུལ་ཞགས་འཛིན་པས་ཡུམ་ལ་འཁྱུད་པ། ལྷག་མ་བཅུ་དྲུག་གི་གཡས་གྲི་གུག་དང་གཡོན་རྣམས་ཟངས་ལྕགས་ཀྱི་འཁོར་ལོ་འཛིན་པ། ཞལ་ནས་ཨིག་ཤའི་སྒྲ་སྒྲོགས་ཤིང་ཀླུ་གདོན་གདུག་པ་ཐམས་ཅད་ཀྲུམ་ཀྲུམ་འཆའ་བ། ཀླུ་མོ་སྤྱན་གཅིག་སྐུ་ལ་འཁྲིལ་བ་གཡས་སུ་ཨ་ཝ་གླང་མགོ་དང་གཡོན་དུ་གདུག་པ་སྦྲུལ་མགོ་གཉིས་སེར་ནག་ལྕགས་ཀྱུ་དང་ཞགས་པ་འཛིན་པ། ཞབས་དོར་སྟབས་སུ་བཞུགས་པར་གསལ་བའི་ཐུགས་སྲོག་ཡི་གེ་དང་བླ་མ་དང་མདུན་བསྐྱེད་ཀྱི་སྐུ་ལས་ཀྱང་འོད་ཟེར་འཕྲོས་པའི་རྐྱེན་གྱིས། རང་བཞིན་གྱི་གནས་ནས་བསྒོམ་པ་དང་འདྲ་བའི་ཡེ་ཤེས་པ་ཁ་བ་བུ་ཡུག་འཚུབས་པ་ལྟར་བྱོན་ནས། ཁྱེད་རྣམས་ལ་སིབ་སིབ་ཐིམ་བྱུང་སྙམས་པའི་མོས་པ་མཛོད། ཅེས་བརྗོད་སྤོས་རོལ་དང་བཅས་སྤྱན་འདྲེན་པ་ནི༔ ཧཱུྃ༔ ཆོས་དབྱིངས་སྤྲོས་མེད་གསང་བདག་ཐུགས་ཀློང་ནས༔ འགགས་མེད་ཁྲོ་རྒྱལ་འཇམ་དཔལ་གཤིན་རྗེའི་གཤེད༔ གཟུགས་སྐུ་དྲག་པོའི་ཆ་ལུགས་འཇིགས་པའི་གཟུགས༔ དུག་ལྔ་མེ་ལྟར་འབར་བའི་དབྱིངས་ནས་བཞེངས༔ དུག་གསུམ་ཆུ་ལྟར་ཁོལ་བའི་གཞལ་ཡས་འདིར༔ ཀླུ་བདུད་ནག་པོ་ཡབ་ཡུམ་སྤྲུལ་འཁོར་བཅས༔ མ་ལུས་འཁོར་བཅས་མ་ཐོགས་མྱུར་དུ་གཤེགས༔ ནཱ་ག་རཀྴ་བཛྲ་ས་མ་ཡ་ཛཿཛ༔ ཞེས་དང་རྩ་སྔགས་མཐར། ཨ་བེ་ཤ་ཡ་ཨ་ཨཱཿ བརྗོད་ལ་བྱིན་ཕབ། སྤྱན་དྲངས་པའི་ཡེ་ཤེས་པ་རྣམས་བརྟན་པའི་མོས་པ་མཛོད༔ ཅེས་རྡོ་རྗེ་མེ་ཏོག་བཅས་སྤྱི་བོར་རྒྱས་གདབ། ཏིཥྛ་བཛྲ་སོགས་ཀྱིས་བརྟན་པར་བྱའོ། །དེ་ནས་དབང་རྣམས་གཞུང་རིམ་ལྟར་བསྐུར་བ་ནི། དེ་ནས་གཏོར་མ་ལག་ཏུ་ཐོགས༔ སློབ་བུའི་མགོར་བཞག་འདི་སྐད་དོ༔ ཧཱུྃ༔ ཁྲོ་རྒྱལ་དྲག་པོ་ཧེ་རུ་ཀ༔ སྐུ་དང་གཉིས་མེད་གཏོར་མའི་དབང་༔ དེ་རིང་ཁྱོད་ལ་དབང་བསྐུར་བས༔ ཀླུ་བདུད་སྐུ་ཡི་དབང་ཐོབ་ཤོག༔ ཨོཾ་ཕེ་ལཾ་ཧཱུྃ༔ ཀ་ཡ་ཨ་བྷི་ཥིཉྩ་ཧཱུྃ༔ དེ་ནས་གཏོར་མ་མགྲིན་པར་བཞག༔ ཧཱུྃ༔ ཁྲོ་རྒྱལ་དྲག་པོ་ཧེ་རུཿཀ༔ གསུང་དང་གཉིས་མེད་གཏོར་མའི་དབང་༔ དེ་རིང་ཁྱོད་ལ་དབང་བསྐུར་བས༔ གསུང་གི་དབང་མཆོག་ཐོབ་པར་ཤོག༔ ཨོཾ་ཕེ་ལཾ་ཧཱུྃ༔ ཝཀྐ་ཨ་བྷི་ཥིཉྩ་ཧཱུྃ༔ དེ་ནས་གཏོར་མ་སྙིང་གར་བཞག༔ ཧཱུྃ༔ ཁྲོ་རྒྱལ་ཀླུ་བདུད་མགོ་དགུ་པ༔ དེ་རིང་ཁྱོད་ཀྱི་སྙིང་ལ་ཤར༔ ཙིཏྟ་ཐུགས་ཀྱི་དབང་ཐོབ་ནས༔ བསྐྱེད་རྫོགས་ལས་སུ་རུང་བར་ཤོག༔ ཨོཾ་ཕེ་ལཾ་ཧཱུྃ༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཕྱག་མཚན་ལག་ཏུ་གཏད་ལ༔ ཧཱུྃ༔ གནམ་ལྕགས་གྲི་གུག་རྡོ་རྗེ་གྲི༔ སྦྲུལ་ཞགས་ཀླུ་རྣམས་འཆིང་ཤིང་སྡོམས༔ ཡོན་ཏན་ཕྱག་རྒྱས་དབང་བསྐུར་བས༔ ཁྲོ་རྒྱལ་དྲག་པོའི་དབང་ཐོབ་ཤོག༔ རྩ་སྔགས་རཏྣ་ཨ་བྷི་ཥིཉྩ་ཧཱུྃ༔ དེ་ནས་བྱ་ཁྱུང་གནས་ལྔར་བཞག༔ ཧཱུྃ༔ ཐུགས་ལས་སྤྲུལ་པའི་བྱ་ཁྱུང་སྐུ༔ ཁྱོད་ཀྱི་གནས་ལྔར་རྒྱས་གདབ་པས༔ གཟའ་ཀླུ་དབང་བསྡུས་ཟིལ་གྱིས་གནོན༔ རྡུལ་དུ་བརླག་པའི་དབང་ཐོབ་ཤོག༔ ཨོཾ་ཁྲོཾ་གྷ་རུ་ཊ་ཨ་བྷི་ཥིཉྩ་ཧཱུྃ༔ དེ་ནས་ཀླུ་རྣམས་གདན་དུ་འབུལ༔ ཧཱུྃ༔ རྒྱལ་རིགས་རྗེ་རིགས་བྲམ་ཟེའི་རིགས༔ གདོལ་བ་ལ་སོགས་ཀླུ་ཆེན་རྣམས༔ དེ་རིང་ཁྲོ་རྒྱལ་གདན་དུ་སྦྱིན༔ འཕྲིན་ལས་འགུགས་འཆིང་སྦྱོར་སྒྲོལ་དབང་༔ སྐལ་ལྡན་ཁྱོད་ཀྱིས་ཐོབ་པར་ཤོག༔ རྩ་སྔགས་ཀརྨ་ཨ་བྷི་ཥིཉྩ་ཧཱུྃ༔ དེ་ནས་དཔལ་གཏོར་སྤྱི་བོར་བཞག༔ ཁྲོ་བོ་ཆེན་པོའི་བདེན་སྟོབས་དང་༔ བཀའ་གཏད་བྱ་ཞིང་ཤིས་པ་བརྗོད༔ དམ་ཚིག་བསྲུང་ཞིང་བསྙེན་སྒྲུབ་འབུང་༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་གསང་བའི་སྙིང་ཞུན་འདི༔ སློབ་དཔོན་འཇམ་དཔལ་བཤེས་གཉེན་གྱིས༔ བཀའ་རྒྱས་བཏབ་སྟེ་བདག་ལ་གནང་༔ བདག་གིས་གཅེས་ཤིང་སྙིང་ལ་གབ༔ འོན་ཀྱང་ཆོས་རྒྱལ་སྐུ་ངོ་ཆེ༔ བར་ཆད་རྐྱེན་འཕྲང་སེལ་ཕྱིར་གདམས༔ འདི་ནས་མ་འོངས་ཕྱི་མའི་དུས༔ རྒྱལ་པོའི་རྐྱེན་བྱས་ས་བདག་དར༔ ཁྱད་པར་ཀླུ་ཡི་གདོན་གྱིས་སྡང་༔ ཙི་ཙི་ཛྭ་ལས་མི་ཕྱེད་འཆི༔ དེ་དུས་ཐུགས་སྲས་ཀླུ་དབང་གི༔ སྐྱེ་བས་ཆོས་འདི་རྙེད་ནས་ཀྱང་༔ བསྟན་དང་སེམས་ཅན་དོན་བྱེད་ཤོག༔ དྲག་སྒྲུབ་ཕུར་པའི་ཆོས་སྐོར་དང་༔ བཀའ་འདི་ཐིག་ལེ་རྩལ་གྱིས་བསྲུང་༔ ས་མ་ཡཱ༔ གཏེར་རྒྱ༔ སྦས་རྒྱ༔ ས་མ་ཡཱ༔ བདག་བནྡྷེ་སུརྱ་ཀིརྟིས་ནགས་ཤོད་ཅི་མདའ་བྲག་དམར་ཞེས་བྱ་བ་ནས་ས་རྟ་ལོར་གདན་དྲངས་ཤིང་ལྕགས་སྤྲེལ་ལོར་ཁམས་སྲིང་མོ་རྫོང་གི་ཆགས་རི་ཨོ་རྒྱན་སྒྲུབ་ཕུག་གི་ཀེའུ་ཚང་དུ་ཤོག་སེར་ལས་བོད་ཡིག་ཏུ་བསྒྱུར་བའོ། །གཞུང་ལས་དེ་ནས་དཔལ་གཏོར་སྤྱི་བོར་བཞག༔ ཁྲོ་བོ་ཆེན་པོའི་བདེན་སྟོབས་དང་༔ བཀའ་གཏད་བྱ་ཞིང་ཤིས་པ་བརྗོད༔ ས་མ་ཡཱ༔ ཞེས་གསུངས་པའི་དོན་རིགས་མཐུན་ལས། གཏོར་མ་འདི་ཉིད་རིག་པའི་རྒྱལ་པོ་ནཱ་ག་རཀྴ་དངོས་སུ་བསྒོམ། དེ་ལ་མོས་གུས་དུང་དུང་བ་བྱས་པས་དེ་ཉིད་ཁྱེད་རང་རྣམས་ཀྱི་སྤྱི་བོར་བྱོན་ཕྱི་ནང་གི་བར་ཆད་ཐམས་ཅད་བསྲུང་བ་དང་གདོན་བགེགས་ཐམས་ཅད་ཚར་བཅད་ནས་ཞལ་དུ་ཆེམ་ཆེམ་གསོལ་བར་མོས་ཤིག་བྱས་ལ། གཏོར་མ་སྤྱི་བོར་བཟུང་ལ་རོལ་མོ་དང་བཅས་པས་བཀའ་བསྒོ་དྲག་ཏུ་བྱས་པའི་མཐར་གཏོར་མའི་ལྷ་འོད་དུ་ཞུ་ནས་སྤྱི་བོར་ཐིམ་ཏེ་གཉིས་སུ་མེད་པར་བསམ་ཞིང་། ཨོཾ་ཨཱཿཧཱུྃ་བཅོམ་ལྡན་འདས་ཆོས་སྐུ་གསང་བའི་བདག་པོ། ལོངས་སྐུ་འཇམ་དཔལ་དབྱངས། སྤྲུལ་སྐུ་ནཱ་ག་རཀྴ། པདྨ་ཐོད་ཕྲེང་རྩལ། མཁར་ཆེན་གཟའ། ཀླུ་དབང་བསྲུང་། གཏེར་ཆེན་ཉི་མ་གྲགས། རྒྱལ་སྲས་རིན་པོ་ཆེ། རྡོ་རྗེ་འཆང་ཀུན་བཟང་ཐེག་མཆོག་རྒྱ་མཚོ། ངེས་དོན་བསྟན་འཛིན་བཟང་པོ། ཨོ་རྒྱན་བསྟན་པའི་ཉི་མ། མི་འགྱུར་ནམ་མཁའི་རྡོ་རྗེ། འཇིགས་མེད་ཆོས་དབྱིངས་རྡོ་རྗེ། ཀུན་བཟང་ཐེག་མཆོག་རྡོ་རྗེ། ཨོ་རྒྱན་འགྲོ་འདུལ་རྡོ་རྗེ། ཐུབ་བསྟན་ཆོས་ཀྱི་རྡོ་རྗེ། དྲིན་ཅན་རྩ་བའི་བླ་མ་སོགས་རྩ་བརྒྱུད་ཀྱི་བླ་མ་རྣམས་དང་། ཡི་དམ་རྒྱལ་བའི་དཀྱིལ་འཁོར་སྤྱི་དང་ཁྱད་པར་བཅོམ་ལྡན་འདས་གསང་བདག་ནཱ་ག་རཀྴའི་སྐུ་གསུང་ཐུགས་ཀྱི་བྱིན་རླབས་ནུས་པའི་སྟོབས་ཀྱིས་རྡོ་རྗེའི་སློབ་མ་འདིའི་སྒོ་གསུམ་ལ་བྱིན་གྱིས་རླབས་པ་དང་། གནོད་བྱེད་འབྱུང་པོ་ཀླུ་དང་ས་བདག་གི་འཚེ་བ་ལས་བསྲུང་ཞིང་སྐྱོབས་པར་མཛད་དུ་གསོལ། ཨོཾ་ཕེ་ལཾ་ཧཱུྃ༔ སརྦ་བྷ་ལིངྟ་ཀ་ཡ་ཝཀྐ་ཙིཏྟ་ཨ་དྷིཥྛ་ན་ཨ་བྷི་ཥིཉྩ་ཧཱུྃ། ཞེས་བརྗོད་གཏོར་མ་ལག་དུ་བཞག །དེ་ནས་ཤིས་བརྗོད་ནི༔ གང་ཞིག་བླ་མེད་བཅོམ་ལྡན་གཤིན་རྗེའི་གཤེད༔ སྐུ་གསུང་ཐུགས་ཀྱི་ཡོན་ཏན་མ་ལུས་པ༔ སྐལ་ལྡན་འདི་ཡི་རྒྱུད་ལ་རབ་ཞུགས་ནས། དངོས་གྲུབ་རྣམ་གཉིས་འཕེལ་བའི་བཀྲ་ཤིས་ཤོག །ཅེས་དང་། བགེགས་རིགས་སྟོང་ཕྲག༴ སོགས་བརྗོད་མེ་ཏོག་མཐོར། དེ་ལྟར་འཇམ་དཔལ་རིག་པའི་རྒྱལ་པོ་ནཱ་ག་རཀྴའི་དབང་བསྐུར་ཟབ་མོ་ལེགས་པར་ཐོབ་པ་ཡིན་པས། གནས་སྐབས་དེ་དག་ཏུ་ཁས་བླངས་པའི་དམ་ཚིག་དང་སྡོམ་པའི་རིམ་པ་ཚུལ་བཞིན་བསྲུང་བར་བགྱི་སྙམས་པས་འདིའི་རྗེས་བཟློས་གྱིས། གཙོ་བོས་ཇི་ལྟར་སོགས་གཏང་རག་གི་མཎྜལ་ཕུལ། སླར་ཡང་ལུས་ལོངས་སྤྱོད་དུས་གསུམ་གྱི་དགེ་ཚོགས་དང་བཅས་པ་འཁོར་ལོས་བསྒྱུར་བའི་རྒྱལ་སྲིད་ཀྱི་འབྱོར་བ་ལྟར་སྤྲུལ་ཏེ་འབུལ་སྙམས་པས་འདིའི་རྗེས་བཟློས་གྱིས། དེང་ནས་བརྩམས་ཏེ༴ སོགས། དེ་ལྟར་དབང་བསྐུར་ཐོབ་པའི་དགེ་རྩ་སེམས་ཅན་གྱི་དོན་དུ་བསྔོ་བར་གྱིས། བསོད་ནམས་འདི་ཡི་སོགས་དང་། རིན་ཆེན་དགེ་ཚོགས༴ སོགས་བརྗོད། སྲུང་མའི་གཏོར་མ་ཡོད་ན་ཕུལ། དཀྱིལ་འཁོར་གྱི་རྗེས་ཆོག་ལས་གཞུང་ལྟར་མཇུག་བསྐྱང་ངོ་། འབྱུང་གདོན་མུན་པའི་སྨག་དག་རྒྱང་བསྲིང་ཞིང་། །ཕན་བདེའི་ལེགས་ལམ་མི་འགོག་སྣང་བའི་དཔྱིད། །སྦྱིན་བྱེད་གདམས་པའི་ཉི་མ་འོད་པོ་ཆེ། །འདྲེན་པའི་ཤིང་རྟ་ལེགས་བཤད་ཁྱུང་སྔོན་སྐྱེས། །ཚུལ་འདི་དཔལ་ལྡན་བླ་མའི་བཀའ་སྩལ་ཉིད། །བསྐུལ་བས་དྲོད་ཆུང་བླུན་པོའི་སྤྱི་བརྟོལ་ནི། །བབ་ཅོལ་ཤར་རིའི་རྩེ་ནས་ལངས་པའི་འོད། །འདི་ཡང་འགྲོ་ལ་ཕན་པའི་ཆེད་དུ་བསྔོ། །ཞེས་འཇམ་དཔལ་རིག་པའི་རྒྱལ་པོ་ནཱ་ག་རཀྴའི་དབང་ཆོག་ཁྲིགས་སུ་སྡེབས་པ་འདི་ནི། སྒྲུབ་པའི་དབང་པོ་བསྟན་འཛིན་སྙིང་པོ་དང་རྣམ་འདྲེན་དམ་པ་འགྱུར་མེད་བློ་ལྡན་ཟུང་གིས་བཀའ་བསྩལ་སྤྱི་བོར་བཅིང་ནས། གཏེར་གཞུང་ཉམས་མེད་ལ་སྔོན་རབས་ལོ་རྒྱུས་དང་བསྐྱེད་རིམས་གསལ་འདེབས་བཀའ་བསྒོ་མཚམས་སྦྱོར་ཤིས་བརྗོད་བཅས་གསར་དུ་བྲིས་པ་འདི་ནི་སྤྲང་བན་བླུན་རྨོངས་ཝ་གིནྡྲའི་མིང་གིས་བགྱིས་པ་ཉེས་འགལ་མཆིས་ན་རྣམ་འདྲེན་བླ་མ་ཉིད་ལ་ཚེ་རབས་སྡིག་དང་ལྷན་ཅིག་ཏུ་སྙིང་ནས་བཤགས་སོ། །དགེའོ། དགེའོ། དགེའོ།། །།