བྱིན་དབབ་པའི་རིམ་པ།
རྟ་མགྲིན་དྲེགས་པ་ཟིལ་གནོན་ལས༔ བྱིན་དབབ་པའི་རིམ་པ་བཞུགས་སོ༔ པདྨ་དབང་གི་ལྷ་ལ་འདུད༔ རྟ་མགྲིན་དབང་གི་རྣལ་འབྱོར་པས༔ བསྙེན་བསྒྲུབ་དབང་ལ་འཇུག་པའི་ཚེ༔ མཆེད་ལྕམ་ཆས་བརྒྱན་རོལ་མོ་འཁྲོལ༔ ད་ལ་རྡོ་རྗེའི་འགྲོས་ཀྱིས་བསྐོར༔ སྤོས་དང་གུ་གུལ་ཤ་ཆེན་བདུག༔ གདུང་བའི་དབྱངས་ཀྱིས་འདི་སྐད་དོ༔ ཧཱུྃ་ཧྲཱིཿ ནུབ་ཕྱོགས་བདེ་བ་ཅན་གྱི་ཞིང་ཁམས་ནས༔ ཆོས་སྐུ་སྣང་བ་མཐའ་ཡས་འཁོར་བཅས་ཀྱིས༔ སྒྲུབ་པའི་གཞལ་ཡས་འདི་ལ་བྱིན་ཅིག་ཕོབ༔ ཕྱི་ནང་མཆོད་རྫས་འདི་ལ་བཅུད་ཅིག་སྩོལ༔ རིག་འཛིན་རྣལ་འབྱོར་བདག་ལ་དབང་བཞི་བསྐུར༔ རི་བོ་པོ་ཊ་ལ་ཡི་གནས་མཆོག་ནས༔ ལོངས་སྐུ་ཐུགས་རྗེ་ཆེན་པོ་འཁོར་བཅས་ཀྱིས༔ སྒྲུབ་པའི་གཞལ་ཡས་འདི་ལ་བྱིན་ཅིག་ཕོབ༔ ཕྱི་ནང་མཆོད་རྫས་འདི་ལ་བཅུད་ཅིག་སྩོལ༔ རིག་འཛིན་རྣལ་འབྱོར་བདག་ལ་དབང་བཞི་བསྐུར༔ ཟངས་མདོག་དཔལ་གྱི་རི་བོའི་རྩེ་མོ་ནས༔ སྤྲུལ་སྐུ་པདྨ་འབྱུང་གནས་འཁོར་བཅས་ཀྱིས༔ སྒྲུབ་པའི་གཞལ་ཡས་འདི་ལ་བྱིན་ཅིག་ཕོབ༔ ཕྱི་ནང་མཆོད་རྫས་འདི་ལ་བཅུད་ཅིག་སྩོལ༔ རིག་འཛིན་རྣལ་འབྱོར་བདག་ལ་དབང་བཞི་བསྐུར༔ ལྷོ་ཕྱོགས་ལྕགས་མཁར་འབར་བའི་རྩེ་མོ་ནས༔ རིག་འཛིན་ཆེན་པོ་ཤཱནྟིང་གྷརྦ་ཡིས༔ སྒྲུབ་པའི་གཞལ་ཡས་འདི་ལ་བྱིན་ཅིག་ཕོབ༔ ཕྱི་ནང་མཆོད་རྫས་འདི་ལ་བཅུད་ཅིག་སྩོལ༔ རིག་འཛིན་རྣལ་འབྱོར་བདག་ལ་དབང་བཞི་བསྐུར༔ མཁའ་སྤྱོད་རྣམ་དག་བདེ་བ་ཆེན་པོ་ནས༔ དྷཀྐི་ཡེ་ཤེས་མཚོ་རྒྱལ་འཁོར་བཅས་ཀྱིས༔ སྒྲུབ་པའི་གཞལ་ཡས་འདི་ལ་བྱིན་ཅིག་ཕོབ༔ ཕྱི་ནང་མཆོད་རྫས་འདི་ལ་བཅུད་ཅིག་སྩོལ༔ རིག་འཛིན་རྣལ་འབྱོར་བདག་ལ་དབང་བཞི་བསྐུར༔ དབང་དྲག་རོལ་པའི་ཞིང་ཁམས་ཆེན་པོ་ནས༔ དབང་ཆེན་དྲེགས་པ་ཟིལ་གནོན་འཁོར་བཅས་ཀྱིས༔ སྒྲུབ་པའི་གཞལ་ཡས་འདི་ལ་བྱིན་ཅིག་ཕོབ༔ ཕྱི་ནང་མཆོད་རྫས་འདི་ལ་བཅུད་ཅིག་སྩོལ༔ རིག་འཛིན་རྣལ་འབྱོར་བདག་ལ་དབང་བཞི་བསྐུར༔ བཀའ་དང་དམ་ཚིག་གསང་བའི་དཀྱིལ་འཁོར་ནས༔ བཀའ་སྲུང་དམ་ཅན་རྒྱ་མཚོ་འཁོར་བཅས་ཀྱིས༔ སྒྲུབ་པའི་གཞལ་ཡས་འདི་ལ་བྱིན་ཅིག་ཕོབ༔ ཕྱི་ནང་མཆོད་རྫས་འདི་ལ་བཅུད་ཅིག་སྩོལ༔ རིག་འཛིན་རྣལ་འབྱོར་བདག་ལ་དབང་བཞི་བསྐུར༔ ཞེས་མོས་གུས་བསྐྱེད་ཅིང་བྱིན་དབབ་པར་བྱའོ༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རྒྱལ་ཁམས་པ་ཉི་མ་གྲགས་པས་ཁམས་སྲིང་མོ་རྫོང་གི་མེ་འབར་ཕུག་ནས་གདན་དྲངས་པ་མངྒ་ལཾ།། །།