བསྐང་བའི་ལས་རིམ།
རྟ་མགྲིན་དྲེགས་པ་ཟིལ་གནོན་ལས༔ བསྐང་བའི་ལས་རིམ་བཞུགས་སོ༔ དབང་ཆེན་ཁྲོ་བོའི་རྒྱལ་ལ་ཕྱག་འཚལ་བསྟོད༔ མ་འོངས་དུས་སུ་ཆོས་བཞིན་སྤྱོད་པའི་ཚེ༔ སྡེ་བརྒྱད་འཁུ་བཟློག་དལ་ཡམས་འཁྲུག་རྩོད་སོགས༔ མདོར་ན་མི་མཐུན་གནོད་པས་གཟིར་གྱུར་ན༔ དབེན་པའི་གནས་སུ་སྐྱང་ནུལ་དཀྱིལ་འཁོར་བཞེངས༔ གཏོར་ཚོགས་སྨན་རག་མཆོད་པ་སྤྱན་གཟིགས་བཀྲམ༔ ལས་ཀྱི་གཞུང་བསྲང་རིམ་གཉིས་ཏིང་འཛིན་འབད༔ མོས་པ་གཏིང་བསྐྱེད་གནོང་འགྱོད་ཤུགས་ཕྱུངས་ཏེ༔ དཔལ་ཆེན་ལྷ་ཚོགས་ཐུགས་དམ་འདི་ལྟར་བསྐང་༔ ས་མ་ཡཱ༔ རྒྱ་རྒྱ་རྒྱ༔ དཔལ་གྱི་གཏོར་མར་སྨན་དང་རཀྟ་སྦྲེང་༔ རོལ་མོ་འབིར་ཞིང་སྤོས་གསུར་དུད་པ་གཏོང་༔ ལྟ་སྒོམ་ཉམས་རྟོགས་གཟེངས་བསྟོད་འདི་སྐད་དོ༔ ཧཱུྃ༔ དབང་ཆེན་རོལ་པའི་ཞིང་ཁམས་ཆེན་པོ་འདི༔ ཡེ་ནས་ལྷུན་གྲུབ་ཀུན་བཟང་དཔལ་གྱི་ཞིང་༔ ཕྱི་ནང་མཆོད་ཚོགས་བཀོད་པའི་བྱེ་བྲག་འདི༔ ཀུན་བཟང་མཆོད་སྤྲིན་སྟོང་གསུམ་ཁྱོན་དུ་བརྡལ༔ དཔལ་གཏོར་སྨན་དང་རཀྟ་བདུད་རྩིའི་ཚོགས༔ ཕྱི་ནང་གསང་བའི་མཆོད་ཚོགས་བཀོད་པས་བརྒྱན༔ སྤྱན་གཟིགས་ཀ་ཆ་དཀོར་ཆ་ཤ་ཁྲག་སྙིང་༔ མུ་མཐའ་མེད་པར་ཡོངས་སུ་སྤུངས་པ་འདིས༔ ཚེ་རབས་སྔོན་ནས་བསྙེན་ཅིང་བསྒྲུབས་པའི་ལྷ༔ དབང་ཆེན་ཡབ་ཡུམ་ལྷ་ཚོགས་ཐུགས་དམ་བསྐང་༔ ཧཱུྃ༔ ཆོས་ཉིད་དབྱིངས་ལས་བཞེངས་པའི་བཅོམ་ལྡན་འདས༔ དཔལ་ཆེན་འབར་བའི་དབང་ཕྱུག་ཧེ་རུ་ཀ༔ ཁྲག་འཐུང་ཁྲོ་བོའི་རྒྱལ་པོ་དྲེགས་པའི་གཤེད༔ རྟ་མཆོག་རིགས་ལྔའི་ལྷ་ཚོགས་ཐུགས་དམ་བསྐང་༔ ཧཱུྃ༔ མཁའ་དབྱིངས་རྣམ་དག་པདྨ་རིགས་ཀྱི་ཡུམ༔ ཆགས་བྲལ་བདེ་ཆེན་དགྱེས་སྡེ་འཕྲུལ་མོ་ཆེ༔ རྡོ་རྗེ་དྷཀྐི་མ་གཅིག་རྣལ་འབྱོར་མ༔ འབུམ་ཕྲག་མཁའ་འགྲོའི་ཚོགས་ཀྱི་ཐུགས་དམ་བསྐང་༔ ཧཱུྃ༔ དབང་ཆེན་བཀའ་ཉན་དབང་ཕྱུག་དྲག་པོ་རྩལ༔ ལས་ཀྱི་བདེ་འབྱིན་ཨུ་མ་དྲག་མོ་ཡུམ༔ གཉིས་མེད་སྲས་མཆོག་རཀྴ་ཛ་ལ་སྟེ༔ ཡབ་ཡུམ་སྤྲུལ་འཁོར་སྲས་གསུམ་ཐུགས་དམ་བསྐང་༔ ཧཱུྃ༔ གནོད་སྦྱིན་སྡེ་དཔོན་ཁྲོ་བོ་ཡོངས་ཀྱི་རྗེ༔ བཛྲ་པཱ་ཎི་བྱ་ཁྱུང་གྷ་རུ་ཎ༔ རིགས་ཀྱི་བདག་པོ་སངས་རྒྱས་སྣང་མཐའ་ཡས༔ ཡེ་ཤེས་དབྱིངས་ཀྱི་ལྷ་ཚོགས་ཐུགས་དམ་བསྐང་༔ ཧཱུྃ༔ སྲོག་བདག་ཚངས་པ་རྒྱལ་པོ་འབུམ་གྱི་སྡེ༔ བྷེ་ཝ་ས་ཏ་ལས་ཀྱི་གཤིན་རྗེའི་ཚོགས༔ བཙན་རྒོད་དམར་པོ་སྟོང་སྡེ་འཁོར་དང་བཅས༔ རལ་པ་ཚལ་དགུ་འཁོར་ཚོགས་ཐུགས་དམ་བསྐང་༔ ཧཱུྃ༔ ཀླུ་བདུད་ནག་པོ་མི་བཟད་འབར་བའི་འཁོར༔ དྲང་སྲོང་ལྗང་སྔོན་ཀླུ་སྲིན་ཕོ་ཉའི་ཚོགས༔ རྡོ་རྗེ་ལེགས་པ་ཐེའུ་རང་འབུམ་གྱི་སྡེ༔ མ་མོ་ནག་མོ་འཁོར་བཅས་ཐུགས་དམ་བསྐང་༔ ཧཱུྃ༔ རྒྱལ་པོ་སྡེ་བཞི་རང་འཁོར་བྲན་གཡོག་བཅས༔ དཔལ་མགོན་དམ་ཅན་སྲུང་མ་རྒྱ་མཚོའི་ཚོགས༔ ཕྱི་དང་ནང་གི་ལྷ་སྲིན་དྲེགས་པའི་དཔུང་༔ སྡེ་བརྒྱད་མ་ལུས་འཁོར་བཅས་ཐུགས་དམ་བསྐང་༔ ཧཱུྃ༔ ཐུགས་དམ་གཉན་པོ་བསྐང་བའི་དམ་རྫས་ནི༔ སྨན་གཏོར་རཀྟ་གྷ་ནའི་ལོངས་སྤྱོད་དང་༔ ཕྱི་ནང་གསང་མཆོད་བརྟེན་ཅིང་སྒྲུབ་པའི་རྫས༔ གོ་ཁྲབ་མཚོན་ཆ་སྣ་ཚོགས་འབྲུ་སྨན་སྤོས༔ རྔ་གླིང་རོལ་མོའི་སྒྲ་སྙན་གསུར་ཆེན་དུད༔ བྱ་ནག་བྷན་དྷར་བདུད་རྩི་ཁྲག་ཆང་སྦྱར༔ མི་ལྤགས་གཡང་བཞིའི་ཁུག་མ་ཐུན་གྱིས་བཀང་༔ དམར་ཡག་སྟག་གི་ཐོད་པར་ཤ་ཁྲག་སྤུངས༔ ལྟོ་འཕྱེ་སྔོན་མོའི་གཡང་གཞི་རྒྱན་གྱིས་སྤྲས༔ ཕྱར་དར་གཡབ་དར་མང་པོའི་བ་དན་བཙུགས༔ སྟག་སེང་བྱ་རོག་བམ་གྱི་རྒྱལ་མཚན་བསྒྲེངས༔ ལེ་བརྒན་དར་སྣའི་ལྡ་ལྡིའི་ཅོད་པན་འཕྱོ༔ དབང་ཆེན་རྟ་ཕག་ཡབ་ཡུམ་ཐུགས་དམ་བསྐང་༔ དཔའ་བོ་དཔའ་མོ་འབུམ་སྡེའི་ཐུགས་དམ་བསྐང་༔ སྤྲུལ་འཁོར་ལྷ་སྲིན་ཚོགས་ཀྱི་ཐུགས་དམ་བསྐང་༔ བཀའ་འཁོར་སྐྱོང་བའི་དྲེགས་ཚོགས་ཐུགས་དམ་བསྐང་༔ ཧཱུྃ༔ དེ་ལྟར་ཐུགས་དམ་བསྐང་བའི་བྱིན་རླབས་ཀྱིས༔ སྔོན་གྱི་ལས་བཟློག་འཕྲལ་གྱི་རྐྱེན་སོལ་ཅིག༔ མི་དང་མི་མིན་བདུད་དང་ལོག་འདྲེན་སྒྲོལ༔ བྱད་དང་རྦོད་གཏོང་ཐན་ལྟས་གནོད་བྱེད་ཟློག༔ ཚེ་བསོད་ཉམས་རྟོགས་ཡར་ངོ་ལྟར་འཕེལ་ཞིང་༔ མཆོག་ཐུན་དངོས་གྲུབ་སྩོལ་ལ་འཕྲིན་ལས་སྒྲུབས༔ ཅེས་བརྗོད་བཤགས་ཚིག་ཡི་གེ་བརྒྱ་བ་སོགས་བྱའོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ དཔལ་ལྡན་ཧེ་རུ་ཀཿཡི་སྐུ༔ དབང་བཅུའི་རྡོ་རྗེ་འཆང་ཆེན་དགོངས་སུ་གསོལ༔ བདག་ཅག་སྣོད་ལྡན་རིགས་ཀྱི་བུ་རྣམས་ལ༔ ཁྲག་འཐུང་དྲེགས་པའི་དཀྱིལ་འཁོར་སྨིན་གྲོལ་སྩོལ༔ འདིར་འདུས་བདག་ཅག་རྗེས་སུ་འཛིན་པར་གསོལ༔ དྲི་བ་ནི༔ ཧོ་ཁྱོད་ཅག་སྣོད་ལྡན་རིགས་ཀྱི་བུ་ཡིན་ན༔ ཚེ་འདི་བློས་གཏོང་ཆོས་ཕྱིར་དཀའ་བ་སྤྱད༔ དབང་ཆེན་དྲེགས་པའི་ལྷ་ཚོགས་བསྙེན་ཅིང་སྒྲུབ༔ ཆོས་སྐྱོང་བཀའ་སྲུང་རྣམས་ནི་མཆོད་ཅིང་བསྟེན༔ དབང་དང་དྲག་པོའི་ལས་ཀྱི་འཕྲིན་ལས་ཀྱིས༔ བསྟན་འགྲོའི་བདེ་ལེགས་བསྐྲུན་པར་ནུས་ལགས་སམ༔ ལན་ནི༔ ཧོ་དགོངས་ཤིག་སྟོབས་ལྡན་པདྨ་དབང་གི་ལྷ༔ རྡོ་རྗེ་འཛིན་པའི་དཔའ་བོ་ཧེ་རུ་ཀ༔ བདག་ཅག་སྔོན་ནས་བསྙེན་ཅིང་བསྒྲུབ་པའི་ལྷ༔ འདིར་འཇུག་སྲོག་གི་ཕྱིར་ཡང་མི་གཏོང་བསྒྲུབ༔ དབང་དང་དྲག་པོའི་འཕྲིན་ལས་མཐར་ཕྱིན་བརྩམ༔ ཡང་དག་ཉིད་དུ་སྩལ་བར་མཛད་དུ་གསོལ༔ དམ་ཆུ་སྦྱིན་ཞིང་༔ ཧཱུྃ༔ དེ་ལྟར་ཡིན་ན་སྐལ་ལྡན་ཁྱེད་རྣམས་ཀྱི༔ པཉྩ་ཨ་མྲྀ་ཏ་ཡི་བཅུད་འདི་མྱོངས༔ དམ་ནི་བླ་མེད་ཐེག་པའི་ལྟ་སྒོམ་སྤྱོད༔ ཚུལ་བཞིན་དམ་ལ་གནས་ན་མཆོག་ཐུན་འཐོབ༔ ཚིག་ནི་དམ་ལས་རལ་བའི་འགྲོ་བ་རྣམས༔ སྲུང་མས་སྲོག་དབུགས་ཕྲལ་ནས་དམྱལ་བར་འཚིག༔ དེ་ཕྱིར་ཆུ་འཐུང་གསང་སྔགས་དམ་སྲུངས་ཤིག༔ བཛྲ་ས་མ་ཡཱ་ཧཱུྃ༔ རྡོ་རྗེ་སྤྱི་བོར་བཞག་ཅིང་༔ ཧཱུྃ༔ ང་ནི་ཁྲག་འཐུང་དབང་གི་རྡོ་རྗེ་འཛིན༔ ད་ནས་བརྩམས་ཏེ་བུ་ཁྱོད་དམ་ཚིག་སྲུངས༔ ཁྱོད་ཅག་ཡང་དག་དམ་ལ་གནས་གྱུར་ན༔ མཆོག་ཐུན་སྨིན་གྲོལ་དངོས་གྲུབ་བདག་གིས་སྦྱིན༔ བཛྲ་ས་མ་ཡཱ༔ ཛཿཧཱུྃ་བཾ་ཧོ༔ བསྲུང་སྐུད་བཅིང་བ་ནི༔ ཧཱུྃ༔ ཡེ་ཤེས་ལྔ་ལྡན་རྡོ་རྗེའི་མདུད་པས་རྒྱན༔ ཁྱོད་ལ་སྦྱིན་པས་བར་ཆད་གཡུལ་ལས་རྒྱལ༔ སྐུ་དང་ཡེ་ཤེས་མངོན་དུ་མ་གྱུར་བར༔ སྲུངས་ཤིག་བཛྲ་རཀྵ་ཡེ༔ ཀུ་ཤ་སྦྱིན་ཅིང་༔ ཧཱུྃ༔ གཙང་ཞིང་དགེ་བ་དཔལ་མཆོག་ལྷ་ཡི་རྫས༔ སྔས་དང་གདན་དུ་སྦྱིན་པས་འདི་ཁྱེར་ལ༔ སེང་གེ་བཞིན་ཉོལ་རྨི་ལམ་པྲ་རྟགས་རྟོགས༔ ནང་པར་གང་བྱུང་བདག་ལ་སྨྲ་བར་གྱིས༔ ཨཱོཾ་ཨཱཿཧཱུྃ༔ སོ་ཤིང་ནི༔ ཧཱུྃ༔ བྱང་ཆུབ་བསྒྲུབ་པའི་ལྷག་པའི་ལྷ་མཆོག་དེ༔ གསལ་བར་མངོན་དུ་འགྱུར་ཕྱིར་སོ་ཤིང་དོར༔ ལས་ཀྱིས་འབྲེལ་བའི་ལྷ་མཆོག་གང་ཡིན་པ༔ རྟེན་འབྲེལ་ཐབས་འདིས་བདག་ལ་གསལ་བར་སྟོན༔ ན་མོ་སིདྡྷི་ཕ་ལ་ཧོ༔ མེ་ཏོག་ནི༔ ཧཱུྃ༔ ཀུན་གཞི་རྣམ་དག་བྱང་ཆུབ་སེམས་ཉིད་ཀྱི༔ ལྔ་ལྡན་མེ་ཏོག་དབང་ཆེན་ལྷ་ལ་འབུལ༔ ཚེ་རབས་སྔོན་ནས་བསྙེན་ཅིང་བསྒྲུབས་པའི་ལྷ༔ རིགས་ཀྱི་བདག་པོ་དེ་ལ་འབབ་པར་ཤོག༔ ཨཱོཾ་བཛྲ་ས་མ་ཡཱ་ཧཱུྃ༔ ཞེས་དོར་རིགས་མཐུན་གསང་མཚན་བཞད་པ་རྩལ༔ ཅོད་པན་ཐོགས་ཏེ༔ ཧཱུྃ༔ སྐུ་ལྔ་ལྷུན་གྲུབ་དཔལ་ཆེན་དབང་གི་རྟགས༔ ལེ་བརྒན་འབར་བའི་ཅོད་པན་འདི་སྦྱིན་པས༔ ཧེ་རུ་ཀཿཡི་གཙུག་གི་རྒྱན་སྤྲས་ནས༔ བདུད་བཞིའི་གཡུལ་ལས་རྣམ་པར་རྒྱལ་བར་ཤོག༔ ཨཱོཾ་ཤྲཱི་ཧེ་རུ་ཀཿཏིཥྠ་ཏེ་ཧཱུྃ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་བྱིན་དབབ་ཡེ་ཤེས་སེམས་དཔའ་བསྟིམ༔ མེ་ཏོག་འཐོར་ཞིང་སྤྱི་བོར་རྡོ་རྗེ་བཞག༔ ས་མ་ཡཱ༔ རྒྱ་རྒྱ་རྒྱ༔ དེ་ནས་བུམ་པ་ཐོགས༔ ཧཱུྃ༔ སྣང་བའི་ངོ་བོ་དབང་གི་བུམ་པ་ན༔ བཅུད་ནི་རྟ་མགྲིན་དབང་ཆེན་དཀྱིལ་འཁོར་ལྷ༔ སྐལ་ལྡན་བུ་མཆོག་རྣམས་ལ་དབང་བསྐུར་བས༔ འགྱུར་མེད་སྐུ་ཡི་དབང་མཆོག་ཐོབ་པར་ཤོག༔ རྩ་སྔགས་ལ་ཀཱ་ཡ༔ གཙོ་བོ་ཡབ་ཡུམ་གྱི་ཙཀ་ལི་ཐོགས༔ ཧཱུྃ༔ ཁྲོ་མཆོག་དབང་ཆེན་ཡབ་ཡུམ་འབར་བའི་སྐུ༔ ཁྲོ་བོ་ཁྲོ་མོ་འབར་བའི་ཆས་རྣམས་རྫོགས༔ སྐལ་ལྡན་བུ་མཆོག་རྣམས་ལ་དབང་བསྐུར་བས༔ དྲེགས་པ་ཟིལ་གནོན་ཡབ་ཡུམ་དབང་ཐོབ་ཤོག༔ ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་ཨ་བྷི་ཥིཉྩ་ཧཱུྃ༔ རྟ་མགྲིན་རིགས་ལྔའི་སྐུ་ཐོགས་ལ༔ ཧཱུྃ༔ བཅོམ་ལྡན་དབང་ཆེན་ཁྲག་འཐུང་རིགས་ལྔ་དང་༔ གཉིས་མེད་ཡུམ་ཆེན་ཕག་མོ་རིགས་ལྔ་ཡིས༔ སྐལ་ལྡན་བུ་མཆོག་རྣམས་ལ་དབང་བསྐུར་བས༔ ཁྲག་འཐུང་ཡབ་ཡུམ་རྣམས་ཀྱི་དབང་ཐོབ་ཤོག༔ ཨཱོཾ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་ཀཱ་ཡ་ཨ་བྷི་ཥིཉྩ་ཧཱུྃ༔ ཡབ་ཡུམ་སྲས་གསུམ་གྱི་སྐུ་ཐོགས་ལ༔ ཧཱུྃ༔ དྲག་པོ་ཆེན་པོ་སྟོབས་ལྡན་ཧེ་རུ་ཀ༔ ཁྲོས་པའི་རྒྱལ་མོ་སྒེག་པའི་དབང་ཕྱུག་མ༔ གཉིས་མེད་སྤྲུལ་པའི་སྲས་མཆོག་ཟངས་མཆེ་ཅན༔ སྐལ་ལྡན་བུ་མཆོག་རྣམས་ལ་དབང་བསྐུར་བས༔ ཡབ་ཡུམ་སྲས་གསུམ་ཡོངས་རྫོགས་དབང་ཐོབ་ཤོག༔ ཨཱོཾ་མ་ཧཱ་དེ་ཝ་ཨུ་མ་ནི་རཀྴ་ཛ་ལ་ཨ་བྷི་ཥིཉྩ་ཧཱུྃ༔ ཕྱག་ན་རྡོ་རྗེའི་སྐུ་ཐོགས་ལ༔ ཧཱུྃ༔ ཁྲོ་བོའི་རྒྱལ་པོ་ཆེན་པོ་དཔལ་ཆེན་པོ༔ གནོད་སྦྱིན་ཁྲོས་པའི་རྒྱལ་པོ་རྡོ་རྗེ་འཛིན༔ སྐལ་ལྡན་བུ་མཆོག་རྣམས་ལ་དབང་བསྐུར་བས༔ དཔལ་ཆེན་ཁྲོ་མཆོག་འབར་བའི་དབང་ཐོབ་ཤོག༔ ཨཱོཾ་བཛྲ་པཱ་ཎི་ཨ་བྷི་ཥིཉྩ་ཧཱུྃ༔ དེ་ནས་བྱ་ཁྱུང་ཐོགས་ཏེ༔ ཧཱུྃ༔ རིགས་ཀྱི་བདག་པོ་བྱ་ཁྱུང་གྷ་རུ་ཎ༔ སྣང་མཐའ་དམར་པོས་གཙུག་གི་རྒྱན་དུ་སྤྲས༔ སྐལ་ལྡན་བུ་མཆོག་རྣམས་ལ་དབང་བསྐུར་བས༔ རིགས་བདག་གྷ་རུ་ཎ་ཡི་དབང་ཐོབ་ཤོག༔ ཨཱོཾ་གྷ་རུ་ཎ་ཨ་བྷི་ཥིཉྩ་ཧཱུྃ༔ བདུད་རྩི་མགྲིན་པར་སྦྱིན༔ ཧཱུྃ༔ རང་བྱུང་སྣོད་མཆོག་བྷནྡྷ་བདུད་རྩིས་བརྒྱན༔ ཁྱོད་ཀྱི་ངག་ལ་སྦྱིན་པས་རྩ་འཁོར་གང་༔ གསུང་གི་དབང་ཐོབ་ངག་གི་ནུས་མཐུ་འབར༔ ཁྲག་འཐུང་དཔལ་གྱི་གསུང་གི་དབང་ཐོབ་ཤོག༔ རྩ་སྔགས་ཝཱཀྐ་ཨ་བྷི་ཥིཉྩ་ཧཱུྃ༔ ངག་ཏུ་སྦྱིན༔ རྡོ་རྗེ་དར་དམར་གྱི་ཅོད་པན་ཅན་ཐོགས་ཏེ༔ ཧཱུྃ༔ འདི་ནི་མི་ཤིགས་རྡོ་རྗེ་འབར་བ་སྟེ༔ མི་འགྱུར་ཏིང་འཛིན་ཐུགས་ཀྱི་རྡོ་རྗེའི་དབང་༔ སྐལ་ལྡན་བུ་མཆོག་རྣམས་ལ་དབང་བསྐུར་བས༔ ཁྲག་འཐུང་ལྷ་ཚོགས་ཐུགས་ཀྱི་དབང་ཐོབ་ཤོག༔ རྩ་སྔགས་ཙིཏྟ་ཨ་བྷི་ཥིཉྩ་ཧཱུྃ༔ ཡབ་ཡུམ་གཉིས་ཀྱི་ཕྱག་མཚན་ཐོགས༔ ཧཱུྃ༔ དཔལ་ཆེན་ཡབ་ཡུམ་འབར་བའི་ཕྱག་མཚན་འདི༔ ཁམས་གསུམ་དབང་དུ་བསྡུད་པའི་ཕྱག་རྒྱ་ཅན༔ སྐལ་ལྡན་བུ་མཆོག་རྣམས་ལ་དབང་བསྐུར་བས༔ ཁྲག་འཐུང་ལྷ་ཚོགས་ཡོན་ཏན་དབང་ཐོབ་ཤོག༔ རྩ་སྔགས་རཏྣ་ཨ་བྷི་ཥིཉྩ་ཧཱུྃ༔ གཏོར་མ་ཐོགས་ལ༔ ཧཱུྃ༔ འབྲུ་བཅུད་ཤ་ཁྲག་དམ་རྫས་བྷ་ལིངྟ་༔ རྩ་གསུམ་མཆོད་རྫས་སྲིད་གསུམ་ཟིལ་གནོན་དང་༔ སྐལ་ལྡན་བུ་མཆོག་རྣམས་ལ་དབང་བསྐུར་བས༔ ཁྲག་འཐུང་ལྷ་ཚོགས་འཕྲིན་ལས་དབང་ཐོབ་ཤོག༔ རྩ་སྔགས་ཀརྨ་ཨ་བྷི་ཥིཉྩ་ཧཱུྃ༔ ཡོངས་རྫོགས་བརྒྱུད་པའི་བཀའ་གཏད་བྱ༔ ས་མ་ཡཱ༔ རྒྱ་རྒྱ་རྒྱ༔ འདི་ནི་རྩ་གསུམ་དབང་གི་སྙིང་པོ་སྟེ༔ བསྙེན་སྒྲུབ་ཐེམ་པའི་བྱང་སེམས་རྣལ་འབྱོར་པས༔ སྣོད་དང་ལྡན་ལ་བྱིན་པས་མཆོག་ཐུན་འགྲུབ༔ ཕྱི་རབས་དོན་དུ་ཡི་གེའི་རིས་སུ་བཏབ༔ སྐལ་ལྡན་ལས་འཕྲོ་ཅན་དང་འཕྲད་པར་ཤོག༔ བཀའ་ཡི་སྲུང་མས་ཆོས་འདིའི་བྱ་ར་གྱིས༔ ས་མ་ཡཱ༔ རྒྱ་རྒྱ་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གསང་རྒྱ༔ ས་མ་ཡཱ༔ རྒྱ་རྒྱ་རྒྱ༔ རྒྱལ་ཁམས་པ་ཉི་མ་གྲགས་པས་ཁམས་སྲིང་མོ་རྫོང་གི་ནུབ་སྒོ་མེ་འབར་ཕུག་ནས་ཆུ་ཁྱི་ཧོར་ཟླ་དགུ་པའི་ཉི་ཤུ་ཐམ་པ་ལ་གདན་དྲངས་ཤིང་མེ་སྟག་ཧོར་ཟླ་དྲུག་པའི་ཚེས་དགེ་བར་ཤོག་སེར་ལས་བསྒྱུར་བའོ། མངྒ་ལཾ།། །།