སངས་རྒྱས་སྣང་བ་མཐའ་ཡས་ཀྱི་ལྟ་ཁྲིད།
རྟ་མགྲིན་དྲེགས་པ་ཟིལ་གནོན་ལས༔ སངས་རྒྱས་སྣང་བ་མཐའ་ཡས་ཀྱི་ལྟ་ཁྲིད་བཞུགས་སོ༔ པདྨ་རིགས་ཀྱི་བརྡ་སྐད་དུ༔ རུ་ཊི་ར་ཊ་མ་ཎི་ཧེ༔ བོད་སྐད་དུ༔ སངས་རྒྱས་སྣང་བ་མཐའ་ཡས་ཀྱི་ལྟ་ཁྲིད༔ ཆོས་ཀྱི་དབྱིངས་ལ་ཕྱག་འཚལ་ལོ༔ སངས་རྒྱས་སྣང་བ་མཐའ་ཡས་ཀྱིས༔ གསང་ལམ་ལྟ་བའི་ཁྲིད་གསུངས་པ༔ ཚེ་འདིའི་འདུ་འཛི་གཡེང་བ་མེད༔ དབེན་པའི་གནས་སུ་སྣོད་ལྡན་གྱིས༔ མཚན་ཉིད་ལྡན་པའི་སློབ་དཔོན་ལ༔ མཎྜལ་སྒོ་གསུམ་ཡོན་གྱིས་མཆོད༔ ཆ་གཅིག་རང་གིས་སྤྱད་པར་ཞུ༔ ཕྱི་ནང་འདུ་འཛིའི་འཕྲོ་བཅད་ནས༔ གསང་སྔགས་གསང་བའི་ལམ་འདིར་འཇུག༔ ས་མ་ཡཱ༔ རྒྱ་རྒྱ་རྒྱ༔ ཀྱེ་ཧོ༔ སྲིད་པ་འདི་ནི་སྲིད་མེད་ཀློང་༔ ཀློང་ཡངས་དག་པ་རང་གྲོལ་བ༔ རང་རིག་བརྗོད་མིན་ལྷན་ཅིག་སྐྱེས༔ སྐུ་གསུམ་ཡེ་ནས་འདུ་འབྲལ་མེད༔ འདི་དོན་ཉམས་སུ་ལེན་འདོད་ན༔ ལུས་ངག་ཡིད་གསུམ་སྐྱོན་རྣམས་བསྡམས༔ འདུག་སྟངས་བཟང་པོའི་འཁྲུལ་འཁོར་བཅའ༔ དུས་གསུམ་རྟོག་ཚོགས་འཕྲོ་བཅད་ནས༔ རྟོག་པའི་རྩལ་བསྐྱེད་འདི་ལྟར་རོ༔ འཁོར་བ་ཐོག་མ་མེད་དུས་ནས༔ ལས་ཉོན་འཁྲུལ་བའི་རྦ་ལ་གཡེང་༔ ཁམས་གསུམ་འགྲོ་བ་ཉམ་རེ་ཐག༔ རིགས་དྲུག་འཁོར་བ་གར་སྐྱེས་ཀྱང་༔ བདག་འདོད་ཚོར་བས་སྲེག་ཅིང་གདུང་༔ བདེ་བ་འདོད་ནས་ཆགས་སྡང་སྤྱད༔ མི་རྟག་འདུས་བྱས་འཁོར་ལོར་འཁོར༔ སྔ་མའི་ལས་ཀྱིས་ཕྱི་མ་མནར༔ མི་འདོད་བཞིན་དུ་ལས་རྗེས་འབྲིང་༔ ལས་དབང་ཆུ་བོའི་གཞུང་དང་འདྲ༔ བདེ་འདོད་སྡུག་བསྔལ་འདམ་ལ་བྱིང་༔ ལས་ཀྱི་རྣམ་སྨིན་རླུང་གིས་སྐྱོད༔ ལས་ཀྱི་བག་ཆགས་ཆུ་བོས་འཁྱེར༔ ལས་ཀྱི་རྣམ་པར་སྨིན་པ་རྣམས༔ ལུས་དང་གྲིབ་མའི་ངང་ཚུལ་འདྲ༔ རང་གི་ལེགས་པའི་དོན་བསམས་ནས༔ རང་དོན་སྒྲུབ་ཅིང་གཞན་ལ་འཚེ༔ ལས་དེའི་བག་ཆགས་སྨིན་པའི་ཚེ༔ འབྲས་བུ་དམྱལ་བའི་གནས་སུ་ལྷུང་༔ ཚ་གྲང་གདུང་བའི་ཚོར་བས་མནར༔ འདོད་ཆགས་དབང་གིས་ཡི་དྭགས་སྐྱེས༔ བཀྲེས་ཤིང་བཀྲེས་ཏེ་སྐོམས་པས་གདུངས༔ གཏི་མུག་ལས་ཀྱིས་དུད་འགྲོར་སྐྱེས༔ གླེན་ལྐུགས་སྡུག་བསྔལ་ཕ་མཐའ་ཡས༔ ཕྲག་དོག་དབང་གིས་ལྷ་མིན་མཐོང་༔ གསོད་གཅོད་ལས་ཀྱི་འཁོར་ལོར་འཁོར༔ ང་རྒྱལ་དབང་གིས་ལྷ་ཡུལ་ཏེ༔ དེ་ཡང་སྲེད་འཛིན་བདེ་བས་ཁྱེར༔ དུག་ལྔ་འདུས་པ་མི་ཡི་ལུས༔ སྐྱེ་རྒ་ན་འཆིའི་རྦ་ལ་སྤྱོད༔ རིགས་དྲུག་པོ་ནི་སེམས་ཀྱིས་བྱས༔ འདི་ནི་འཁོར་བའི་འཇིག་རྟེན་ཏེ༔ རྟག་པར་གྱུར་དང་བརྟན་པ་མེད༔ སྐྱེ་རྒ་ན་འཆིའི་སྡུག་བསྔལ་དང་༔ གླེན་ལྐུགས་གཅིག་གིས་གཅིག་ལ་ཟ༔ ཕྱི་ནང་སྒྲིབ་ཅན་མེ་མདག་འཁོར༔ ཚ་དང་གྲང་དང་རབ་ཏུ་ཚ༔ རབ་ཏུ་བསིལ་བས་གདུང་བ་དང་༔ འཐབ་རྩོད་གསོད་གཅོད་ལྷ་མ་ཡིན༔ འཆི་འཕོ་ལྟུང་བ་ལ་སོགས་ཏེ༔ བདེ་བ་མེད་བཞིན་སྡུག་བསྔལ་སྡང་༔ དུག་ལྔའི་མེ་མདག་འབར་བས་སྲེག༔ དུག་གསུམ་ཆུ་བོའི་རྦ་ལ་འཁྲུལ༔ ས་མ་ཡཱ༔ རྒྱ་རྒྱ་རྒྱ༔ འདི་ལྟར་སྡུག་བསྔལ་གྲོང་ཁྱེར་ལས༔ དལ་འབྱོར་ལྡན་པའི་ལུས་ལྡན་ཞིང་༔ སྤང་རྟོགས་གཉིས་ཀྱི་བསླབ་བྱ་ལ༔ ཡང་དག་སྤྱོད་པའི་དཔལ་ཕྱུག་ཚེ༔ འཁོར་བའི་སྡུག་བསྔལ་སྙིང་ནས་བསམ༔ མི་རྟག་འཆི་བའི་སྡུག་བསྔལ་སྒོམས༔ དགྲ་གཉེན་བྱིས་པའི་བརྩེ་འཇོ་སྤོངས༔ སྐྱབས་གནས་གསུམ་དང་ཁྱད་པར་དུ༔ ཆོས་ཀྱི་སྐུ་ལ་སྐྱབས་སུ་འགྲོ༔ འགྲོ་དྲུག་ཕ་མ་སེམས་ཅན་རྣམས༔ རྣམ་མཁྱེན་སངས་རྒྱས་ལ་འགོད་ཕྱིར༔ བྱང་ཆུབ་སེམས་མཆོག་བླ་ན་མེད༔ ཕྱི་ནང་གསང་བའི་སྡོམ་ལ་གནས༔ རྡོ་རྗེ་སེམས་དཔའི་ཏིང་འཛིན་གྱིས༔ སྔགས་འཁོར་སྤྲོ་བསྡུས་སྒྲིབ་གཉིས་སྦྱངས༔ སངས་རྒྱས་ཀུན་དང་མཉམ་སྦྱོར་བ༔ སངས་རྒྱས་ཀུན་གྱི་གསང་བའི་ལམ༔ བདེ་གཤེགས་ཀུན་འདུས་ཀུན་གྱི་མཆོག༔ བླ་མེད་སྟོན་པའི་བླ་མ་ནི༔ སྐུ་གསུམ་སྟོན་མཆོག་རྡོ་རྗེ་འཛིན༔ སྙིང་ནས་ཡང་དག་དྲན་བྱ་ཞིང་༔ གསོལ་གདབ་དབང་བཞི་འོད་ཀྱིས་བླངས༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ལུས་ནི་ཆོས་བདུན་ལྡན༔ མིག་ནི་བུདྡྷའི་ལྟ་སྟངས་བཅས༔ འབྱུང་འདུས་ཕུང་པོ་སྐད་ཅིག་གིས༔ མི་དམིགས་སྟོང་གསལ་འོད་ལུས་ཀྱི༔ གནས་ལྔར་བཅོམ་ལྡན་རིགས་ལྔ་བསྐྱེད༔ རིགས་ལྔའི་ཐུགས་ཀར་ས་བོན་མཐར༔ སྔགས་འཁོར་འོད་ཟེར་འདུ་འཕྲོ་བསྒྱུར༔ དང་པོ་ཐོག་མ་མེད་པའི་དུས༔ རང་བྱུང་རིག་པའི་རྩལ་སྣང་ལས༔ འཆར་སྒོ་མ་འགགས་ཕྱིར་ཤར་བའི༔ འོད་ལ་འཛིན་པ་ཞུགས་པ་ཡི༔ དུག་ལྔ་དག་ཅིང་སྐུ་ལྔ་ཡི༔ ཡེ་ཤེས་ལྔ་ལྡན་མངོན་གྱུར་ལམ༔ བརྗོད་མེད་དབྱིངས་ནས་ལྷན་ནེར་གསལ༔ རྟོག་མེད་དབྱིངས་ནས་སྤྲོས་དང་ཕྲོལ༔ མ་ཡེངས་མི་སྒོམ་ཆོས་དབྱིངས་ཀློང་༔ གྲག་སྟོང་ངང་ནས་སྔགས་འདི་བཟླས༔ ཨཱོཾ་ཧཱུྃ་ཏྲཾ་ཧྲཱིཿཨཱ༔ ཧཱུྃ་ཧཱུྃ་སྭཱ་ཧཱ༔ ཞེས་བཟླས་ཐུན་སྐབས་ཕྱི་སྣོད་དང་༔ ནང་བཅུད་འཛིན་པ་རོ་གཅིག་གི༔ བདག་མེད་སྟོང་དང་ཡེ་ཤེས་ཀྱི༔ ཏིང་འཛིན་ལྡན་པས་རྣལ་དུ་དབབ༔ འབུམ་ཚོ་ལྔ་ཡི་གྲངས་ཐེམས་ན༔ དུག་ལྔ་ཡེ་ཤེས་ལྔ་རུ་སྨིན༔ ཕྱི་སྣོད་འབྱུང་བཞིའི་སྣང་བ་དག༔ ནང་བཅུད་སྒྱུ་ལུས་འཛིན་པ་གྲོལ༔ ཕུང་ཁམས་སངས་རྒྱས་རིགས་ལྔར་སྨིན༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་རྡོ་རྗེའི་འཁྲུལ་འཁོར་བཅས༔ མིག་ནི་སྨིན་ཕྲག་མཁའ་ལ་བལྟ༔ འབྱུང་བཞི་འདུས་པའི་ཕུང་པོ་འདི༔ སྐད་ཅིག་མི་དམིགས་སྟོང་པར་གྱུར༔ འོད་མཐིང་ལས་གྲུབ་རྡོ་རྗེ་ནི༔ རྩེ་ལྔ་པ་ཡི་ལྟེ་བའི་དཀྱིལ༔ འོད་དཀྱིལ་ཧཱུྃ་ཡིག་མཐིང་ནག་མཐར༔ ཧཱུྃ༔ འཕྲེང་སྔགས་འབྲུ་བ་ཐག་འཁོར༔ ཞལ་ནས་བཟླས་པས་ཧཱུྃ་ལས་ཧཱུྃ༔ ཆེ་ཆུང་མ་ངེས་སྣ་ཚོགས་པ༔ བ་དག་མ་ཆད་ཕྱོགས་བཅུར་འཕྲོ༔ སྣང་བའི་ངོ་བོ་འབྱུང་བཞིའི་ཁམས༔ རིག་པའི་ངོ་བོ་ཧཱུྃ་སྒྲ་སྒྲོགས༔ མེ་དང་སྦུར་མའི་དཔེ་བཞིན་དུ༔ སྣང་བའི་འཇིག་རྟེན་བུན་བུན་བསྲེགས༔ རིག་པའི་ཡེ་ཤེས་ཏ་ལ་ལ༔ མ་ཡེངས་ཏིང་འཛིན་བློ་འདས་ངང་༔ སྙིང་པོ་འདི་ལ་འབུམ་བདུན་བཟླས༔ ཧཱུྃ་ཧཱུྃ་ཧཱུྃ༔ ཐུན་སྐབས་རྣམས་སུ་དུས་གསུམ་གྱི༔ རྟོག་ཚོགས་སྤང་བླང་དགག་སྒྲུབ་ཕྲལ༔ རང་བྱུང་ངང་ལ་རྣལ་དུ་དབབ༔ སྐབས་རེ་སྣང་སེམས་ཕྲལ་ནས་ཀློད༔ སྐབས་རེ་སྣང་སེམས་བསྲེ་སྟེ་སྐྱོང་༔ ས་མ་ཡཱ༔ རྒྱ་རྒྱ་རྒྱ༔ གསུམ་པ་ཁྲོ་བོའི་དོར་སྟབས་བགྲད༔ མི་དམིགས་སྟོང་དང་སྙིང་རྗེའི་ངང་༔ ཁྲོ་བོ་ཞེ་སྡང་རྡོ་རྗེ་ཁྲོས༔ གཡས་གཡོན་སྡིགས་མཛུབ་དོར་སྟབས་བགྲད༔ འོད་མཐིང་སྐུ་ཡི་སྣང་བརྙན་ནི༔ མེ་ལོང་གཟུགས་སམ་ཆུ་ཟླ་ལྟར༔ ཧཱུྃ་ཡིག་འོད་དཀྱིལ་མཐིང་གའི་མཐར༔ སྔགས་ཕྲེང་བ་དག་གཡས་གཡོན་འཁོར༔ ཡ་ཀི་སྲིད་པའི་རྩེ་མོ་ནས༔ མ་ཀི་ན་རག་འཇིག་རྟེན་ཁམས༔ སྟོང་གསུམ་མི་མཇེད་ཕྱི་ནང་སྣོད༔ ཐམས་ཅད་མི་དམིགས་སྟོང་པར་གྱུར༔ སྟོང་པའི་ངང་ལས་ཡེ་ཤེས་རྩལ༔ ཕྱི་སྣོད་ཧེ་རུ་ཀཿཡི་ཞིང་༔ ནང་བཅུད་ཁྲོ་བོ་ཁྲོ་མོར་འབར༔ འཁོར་འདས་ཐམས་ཅད་འབར་བའི་ཞིང་༔ དཔལ་ཆེན་ཆོས་ཉིད་རོལ་པར་གསལ༔ ཨཱོཾ་བཛྲ་ཤྲཱི་ཧེ་རུ་ཀ་ཧཱུྃ་ཧཱུྃ་ཕཊ༔ འབུམ་ཚོ་གསུམ་གྱི་གྲངས་ཐེམས་ན༔ ཕྱི་སྣོད་དཔལ་ཆེན་འབར་བའི་ཞིང་༔ ནང་བཅུད་ཧེ་རུ་ཀཿདཔལ་ཆེ༔ གསང་བ་སྣང་སེམས་རང་དབང་བསྒྱུར༔ དུས་གསུམ་རྟོག་ཚོགས་ཆམ་བརྡལ་ཞིང་༔ སྟོང་ཉིད་ངང་དུ་རྣལ་དུ་དབབ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ཡང་དག་བཤད་བྱ་བ༔ ལས་ལྡན་སྦྱངས་པ་མཐའ་གྲོལ་བའི༔ སྐལ་བར་ལྡན་པ་གང་དང་གང་༔ ཡང་གསང་སྙིང་པོའི་དོན་ལ་བལྟ༔ ཡང་དག་ངེས་མཐོང་གང་རྟོགས་དེ༔ གཅིག་ཤེས་འབྲས་བུ་ཀུན་གྲོལ་ཏེ༔ འཁོར་བ་འམ་ནི་མྱ་ངན་འདས༔ སྒྱུ་མས་སྤྲུལ་པའི་རྒྱུ་བཞིན་ཏེ༔ སྤང་བླང་མེད་པར་རང་སར་གྲོལ༔ འདི་ནི་མི་གནས་མངོན་འཚང་རྒྱ༔ ཡང་ལྟོས་ཡང་ལྟོས་རང་ལ་ལྟོས༔ ཡང་གཞིགས་ཡང་གཞིགས་རང་ངོར་གཞིགས༔ ཐོག་མ་བར་དང་མཐའ་ཡས་གསུམ༔ ཕུང་པོ་ལྔ་ཡི་རང་བཞིན་སྟོང་༔ གཟུགས་རྣམས་ཐམས་ཅད་སྟོང་པའི་རྩལ༔ སྟོང་པའི་གཟུགས་བརྙན་སྟོང་ཉིད་ཀློང་༔ དམིགས་མེད་རིས་སུ་གྲུབ་པ་མེད༔ རྣམ་པར་ཤེས་པ་ཡེ་སྟོང་པས༔ གཟུགས་ལས་འབྱུང་བའི་ཚོར་བ་དང་༔ འདུ་ཤེས་རྟོག་པ་འདུ་བྱེད་སོགས༔ ཚོགས་བརྒྱད་ཡུལ་བརྒྱད་རང་རང་གི༔ རང་བཞིན་ངོ་བོ་ཉིད་ནས་དག༔ སྒོ་ངའི་ཤེས་པ་རྣམ་གྲོལ་སྟོང་༔ སྡུག་བསྔལ་རྣམ་དག་འཁྲུལ་པ་ཟད༔ བདེ་བ་མི་ལྡན་བདེ་སྡུག་མེད༔ ཟད་པ་ཟད་མེད་ཟད་ཡུལ་བྲལ༔ སྐྱེ་བ་མེད་པས་གདོད་ནས་སྟོང་༔ འགག་པ་མེད་པས་བློ་ལས་འདས༔ གནས་པ་མེད་པས་འགྲོ་འོང་བྲལ༔ ཐོབ་པ་མེད་པས་རྣམ་པར་རྒྱལ༔ སྦྱང་བ་མེད་པས་ས་ལས་འདས༔ མཐོང་བ་མེད་པས་རྟོག་པ་བྲལ༔ རེ་བ་མེད་པས་ཡེ་ཤེས་དག༔ དོགས་པ་མེད་པས་འཁོར་བ་སྟོང་༔ བྱས་པ་མེད་པས་ལྷུན་གྲུབ་རྫོགས༔ སྨྲ་བ་མེད་པས་ཚིག་ལས་འདས༔ བསམ་ཡུལ་མིན་པའི་ཡིད་དང་བྲལ༔ བརྗོད་པ་མེད་པས་དཔེས་མི་མཚོན༔ ཆོས་སྒོ་བརྒྱད་ཁྲི་བཞི་སྟོང་གི༔ སྤང་བླང་འབྲས་བུའི་ཕན་གནོད་དག༔ སེམས་ཅན་སྦྲུལ་གྱི་མདུད་པ་ནི༔ བཀྲོལ་བ་མེད་ཀྱང་རང་སར་གྲོལ༔ སྟོང་གསུམ་དག་གི་ཆུ་བོ་རྣམས༔ ཕྱོགས་མཐར་འབབས་ཀྱང་རྒྱ་མཚོར་གཅིག༔ སྲིད་རྩེ་མནར་མེད་འགྲོ་བའི་ཁམས༔ མངོན་སུམ་མཐོང་ཡང་མཐོང་སར་ཡལ༔ ཐམས་ཅད་སྐྱེ་མེད་རོ་གཅིག་སྟེ༔ དམིགས་མེད་སྤྲོས་བྲལ་ནམ་མཁའི་ཁམས༔ འདི་ནི་སངས་རྒྱས་ཐམས་ཅད་ཀྱི༔ གསང་བའི་སྙིང་པོ་དམ་པ་སྟེ༔ སྐད་ཅིག་མ་ཡི་ཆོས་ཉིད་འདིས༔ སྐད་ཅིག་དེ་ཡིས་དེ་གྲོལ་ལོ༔ གྲོལ་བ་རྣམ་དག་དག་པའི་མཆོག༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ཡང་དག་བཤད་བྱ་བ༔ མིག་གི་ཡུལ་གྱི་མཛེས་པའི་གཟུགས༔ གང་ལ་ཆགས་པར་གྱུར་པ་དང་༔ གང་དག་གཟུགས་ངན་མི་སྡུག་པ༔ ཡིད་ལ་སྦྲེང་ཞིང་ལེགས་པར་དཔྱད༔ ཐ་མ་གཟུགས་ཕུང་དེ་གཉིས་ཀྱི༔ ཤ་ཁྲག་རུས་པ་ནང་རོལ་དང་༔ གཤང་ལྕི་ཀེང་རུས་སྣབས་ལུད་སོགས༔ ཡིད་ལ་སྦྲེང་ཞིང་མིག་ཡུལ་གྱི༔ གཟུགས་སྣང་ཆགས་སྡང་རྟོག་པ་རྣམས༔ བདེན་འཛིན་བྲལ་བའི་དོན་ལ་བལྟ༔ སྤང་བླང་མེད་པའི་སྤྱོད་པ་སྐྱོང་༔ དེ་བཞིན་རྣ་བའི་ཡུལ་གྱི་སྒྲ༔ སྙན་དང་མི་སྙན་བསྟོད་དང་དམད༔ བདེན་པ་རྫུན་པའི་དྲང་ཤན་དང་༔ བསྟོད་དམད་ལས་ཀྱི་འབྲས་བུར་སེམས༔ བྱིས་པས་བྱེ་མའི་ཁང་བུ་ལ༔ བདེན་འཛིན་ཞུགས་པའི་དཔེ་བཞིན་དུ༔ འཁྲུལ་བར་མི་བལྟ་གྲག་སྟོང་བསྒྱུར༔ ངོ་བོ་ཉིད་ལ་བསྟོད་དམད་བྲལ༔ དེ་བཞིན་སྣ་ཡི་ཡུལ་གྱི་དྲི༔ དྲི་བསུང་བརྒྱད་ལྡན་སྤོས་ངད་དང་༔ མི་གཙང་འདམ་ཁྲོད་དྲི་ངན་སོགས༔ མཐའ་གཉིས་བལྟ་ཞིང་ཡིད་ལ་བཀོད༔ སྣང་བ་སེམས་ཀྱི་སྒྲོ་བཏགས་ཀྱིས༔ གཉིས་སུ་འཛིན་པར་ཕྱེ་བ་ལས༔ དེ་གཉིས་རང་ངོར་བཟང་ངན་མེད༔ དོན་རིག་དོན་མཐོང་དབྱེར་མེད་དོ༔ དྲི་ཡི་ཆགས་སྡང་བཏང་སྙོམས་ཕྲལ༔ དེ་བཞིན་ལྕེ་ཡི་ཡུལ་གྱི་རོ༔ རོ་བརྒྱ་ལྡན་པའི་ཁ་ཟས་དང་༔ ལྗན་ལྗིན་ཟོས་པའི་ལང་ཚོ་སྟེ༔ ཟག་པ་དྲི་ཆུར་ཁྱད་པར་ཅི༔ བརྟགས་ཤིང་དཔྱད་པས་གཙང་སྨེ་ཞིག༔ རང་བཞིན་གཅིག་གི་རྟོག་པ་ལྟོས༔ དེ་བཞིན་ལུས་ཀྱི་རེག་བྱ་རྣམས༔ ལྷ་རྣམས་པཉྩ་ལི་ཀའི་གོས༔ མི་རྣམས་བལ་ཚོན་སྣལ་མ་སྟེ༔ བགེགས་དང་སྲིན་ནི་གཡང་གཞིས་ཀླུབས༔ དེ་ཡང་ཀུན་རྟོག་རང་གཟུགས་ཏེ༔ བྱིས་པས་འཇའ་ཚོན་མཐོང་བའི་དཔེ༔ རེག་བྱའི་རྟོག་པའི་ཆགས་འཛིན་དོར༔ དེ་བཞིན་ཡིད་ཀྱི་རྟོག་ཚོགས་རྣམས༔ རྨི་ལམ་ཡུལ་གྱི་སྣང་བ་ལ༔ སྤྲང་པོས་རྒྱལ་སྲིད་ཐོབ་པ་དང་༔ སྟོབས་ཀྱི་འཁོར་ལོས་སྒྱུར་རྒྱལ་ཡང་༔ མུ་ཏོའི་ལུས་སུ་གྱུར་པ་ཡི༔ བག་ཆགས་སྣང་བ་འབྲེང་གྱུར་ན༔ དེ་ནི་དེ་ཡི་བདེ་སྡུག་གི༔ སྤངས་བླང་དག་གིས་མནར་བར་འགྱུར༔ དེ་ཕྱིར་ཡིད་ཀྱི་རྟོག་ཚོགས་ཀྱང་༔ རྨི་ལམ་སྣང་བའི་དོན་ལྟར་དུ༔ སྤང་བླང་བྲལ་བའི་རྟོག་པ་བསྐྱེད༔ ས་མ་ཡཱ༔ རྒྱ་རྒྱ་རྒྱ༔ དེ་རྣམས་རྗེས་ཤེས་སྤྱོད་པའི་སྐབས༔ སྔོན་འགྲོ་དངོས་གཞི་རྗེས་གསུམ་སྟེ༔ ཕྱི་ཡི་ས་བཅད་རྣམ་པ་གསུམ༔ ནང་གི་རྐང་ཚིག་བཅུ་བདུན་ཏེ༔ སྣང་བ་རང་གྲོལ་ལྟ་བའི་ཕྲེང་༔ སངས་རྒྱས་སྣང་བ་མཐའ་ཡས་ཀྱིས༔ བདེ་ཆེན་དབྱིངས་ཀྱི་ཕོ་བྲང་དུ༔ བདག་འདྲ་པདྨ་འབྱུང་གནས་ལ༔ གདམས་པའི་སྙིང་པོ་འདི་གནང་བ༔ དཔལ་གྱི་བེའུའི་ཀློང་དུ་བསྟིམ༔ དེ་ནས་ཁྲི་སྲོང་ལྡེའུ་བཙན་གྱིས༔ རྟ་མགྲིན་དྲག་པོའི་བསྐྱེད་རིམ་ལ༔ མན་ངག་གསང་ཆེན་རྫོགས་རིམ་གཅིག༔ ཡང་དང་ཡང་དུ་སྩོལ་ཞེས་གསུངས༔ རྒྱལ་པོ་སྐུ་ངོ་ཆེ་བ་དང་༔ མ་འོངས་འགྲོ་བའི་དོན་བསམས་ནས༔ དྲེགས་པ་ཟིལ་གནོན་ཆོས་སྐོར་དུ༔ ཡི་གེའི་རིས་བཏབ་རྗེ་ལ་གདམས༔ ལྷ་རི་སྙིང་པོར་ཀླུ་དབང་ལ༔ ཉམས་ཁྲིད་བཏབ་ཅིང་བཀའ་གཏད་བྱིན༔ ཤར་ཕྱོགས་མཐོན་པོའི་རི་བོ་ནི༔ ཁམས་ཀྱི་སྲིང་མོ་རྫོང་གི་ནུབ༔ མེ་འབར་ཕུག་གི་བྲག་ལོགས་ལ༔ རྒྱ་བདུན་བཏབ་པའི་ཟབ་ཆོས་འདི༔ ཁམས་ནས་ཉི་མ་གྲགས་དང་འཕྲད༔ མི་རྣམ་བཞི་བཅུའི་མར་འགྲིབ་དུས༔ མཐོངས་སྐར་ཉི་ཞུར་ཤར་བ་བཞིན༔ སྐལ་ལྡན་མང་ཞིག་གྲོལ་ལམ་འགོད༔ ལས་འཕྲོ་ལྡན་དེས་སྤྱོད་པར་ཤོག༔ བཀའ་ཡི་སྲུང་མས་བྱ་ར་གྱིས༔ གཏེར་ཀྱི་སྲུང་མས་མེལ་ཚེ་མཛོད༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རྒྱལ་ཁམས་པ་ཉི་མ་གྲགས་པས་ཁམས་སྲིང་མོ་རྫོང་གི་ནུབ་སྒོ་མེ་འབར་ཕུག་ནས་གདན་དྲངས་ཤིང་ཤོག་སེར་ལས་བསྒྱུར་བའོ། །མངྒ་ལཾ།། །།