སྲེག་པ་མེ་ཡི་ལས་མཐའི་ཤམ་བུ།
རྟ་མགྲིན་དྲེགས་པ་ཟིལ་གནོན་ལས༔ སྲེག་པ་མེ་ཡི་ལས་མཐའི་ཤམ་བུ་བཞུགས་སོ༔ དབང་ཆེན་ཁྲོ་བོའི་རྒྱལ་ལ་འདུད༔ དྲག་སྒྲུབ་དབང་གི་རྣལ་འབྱོར་པས༔ འཕུང་གསུམ་བདུད་ཀྱི་ཉི་མ་འམ༔ ཡང་ན་དགུ་མཚམས་གཟས་ཟིན་སོགས༔ དྲག་པོའི་འགྲུབ་སྦྱོར་ལྡན་པའི་ཚེ༔ དུར་ཁྲོད་འདྲེ་འཚུབ་ཕུང་ཤུལ་སར༔ དྲག་པོའི་མེ་ཡི་སྟེགས་བུ་བརྩིགས༔ དུག་དང་ཁྲག་གིས་ཆག་ཆག་གདབ༔ ལྟེ་བ་ཟླ་གམ་དམར་པོ་ལ༔ འཁོར་ལོ་རྩིབས་བརྒྱད་ཐོད་ར་དང་༔ རྡོ་རྗེ་མེ་རིས་མཚན་པ་བྲི༔ དྲག་པོའི་ཤིང་ལ་ཐབ་བརྩེག་ཅིང་༔ སྲེག་རྫས་མཆོད་རྫས་ཆས་རྣམས་དང་། ཁྱད་པར་ལིངྒ་དུག་ཁྲག་ཚ༔ ཏིལ་ནག་ལ་སོགས་སྲེག་རྫས་བསགས༔ གྲི་ཤའམ་ཤ་ཆེན་ཤ་ཁྲག་མཆོག༔ སྲེག་རྫས་དགྲ་བགེགས་ངོ་བོར་གསལ༔ འགུགས་གཞུག་བརྒྱ་རྩ་དག་གིས་བསྟིམ༔ བདག་བསྐྱེད་རྫོགས་ནས་མེ་ཐབ་བསང་༔ ཧཱུྃ་ཧཱུྃ༔ མེ་ཐབ་གྲུ་གསུམ་རྒྱ་ཆེ་ཡངས་པའི་ནང་༔ མེ་ཡི་འཁོར་ལོ་རྩིབས་བརྒྱད་རཾ་གྱིས་མཚན༔ མེ་ལྷ་དམར་པོ་ཞལ་གཅིག་ཕྱག་བཞི་པ༔ མེ་ཡི་འཁོར་ལོ་མེ་ཡི་རྒྱལ་མཚན་དང་༔ འོག་མ་གཉིས་ཀྱིས་མེ་ཡི་ལྕགས་ཀྱུ་བསྣམས༔ དབང་དྲག་དཔལ་འབར་གཟི་བརྗིད་ལྡན་པར་བསྐྱེད༔ སྤྱན་འདྲེན་པ་ནི༔ ཧཱུྃ༔ དབང་དྲག་སྟོབས་ཀྱི་འཕྲིན་ལས་གར་དགུར་ལྡན༔ འབྱུང་བ་ཆེན་པོ་སྲེག་བྱེད་འབར་བའི་ལྷ༔ དད་པས་སྤྱན་འདྲེན་དྲག་པོའི་གཞལ་ཡས་འདིར༔ དམ་ཚིག་དབང་གིས་གཤེགས་ཤིག་ས་མ་ཡཱ༔ ཛཿཧཱུྃ་བཾ་ཧོ༔ སྲེག་རྫས་འབུལ་ཏེ༔ ཧཱུྃ༔ ཞིང་བཅུ་བསྒྲལ་བའི་རཀྟའི་རྒྱ་མཚོ་འདི༔ འབར་བ་མེ་ཡི་ལྷ་ལ་འབུལ་ལགས་ན༔ ཁྲག་གི་ཡོན་ཆབ་བརྔམ་པའི་སྟོབས་ཀྱིས་བཞེས༔ དགྲ་བགེགས་བྱད་མ་བརླག་པའི་འཕྲིན་ལས་མཛོད༔ ཨཱོཾ་རཾ་ཛྭ་ལ་རཾ་དགྲ་བགེགས་འདི་ཞེས་པའི་དབང་པོ་རྣམ་ལྔ་ཤ་རུས་ཁྲག་དང་བཅས་པ་ལ་རཾ་ཨགྣེ་བྷི་ཛྭ་ལ་རཾ་ཁ་ཁ་ཁཱ་ཧི་ཁཱ་ཧི༔ རིམ་བཞིན་འགྲེ་སྟེ་སྲེག་རྫས་དང་༔ ལིངྒ་ལ་སོགས་རྒྱས་བསྡུས་རྣམས༔ རང་གི་སྐབས་མཐུན་དབུལ་བར་བྱ༔ བསྟོད་པ་ནི༔ ཧཱུྃ༔ དྲང་སྲོང་རྒྱལ་པོ་འབྱུང་བ་མེ་ཡི་ལྷ༔ སྐུ་མདོག་དམར་ནག་འཁྲུག་པ་མེ་ཡི་སྐུ༔ སྐུ་ལས་མེ་འོད་ཚྭ་ཚྭ་ཤ་ར་ར༔ དུས་མཐའི་མེ་ལྟར་འཚིག་ཅིང་ཁམས་གསུམ་གཡོ༔ དགྲ་བགེགས་བྱད་མ་སྲེག་མཛད་ལྷ་ལ་བསྟོད༔ ཅེས་བསྟོད༔ མེ་ཐབ་མི་དམིགས་མེ་ལྷ་ཡི༔ ལྟོ་བ་ཡངས་ཤིང་རྒྱ་ཆེའི་ཀློང་༔ ལྷ་ཚོགས་སྐུ་མདོག་དམར་པོ་འམ༔ ནག་པོ་རང་གི་གང་བདེར་བསྒྱུར༔ སྤྱན་འདྲེན་བཞུགས་གསོལ་ཕྱག་གིས་མཆོད༔ ཚིགས་སུ་བཅད་པ་བརྗོད་པའི་མཐར༔ དྲག་པོའི་སྲེག་རྫས་ལིངྒ་རྣམས༔ བརྒྱ་རྩའམ་ནི་སྟོང་གིས་འབུལ༔ རྩ་སྔགས་ཡོངས་སུ་རྫོགས་པའི་མཐར༔ བྱད་མ་དགྲ་བགེགས་ཆེ་གེ་འདི་ཞེས་པའི་ཤ་ཁྲག་དབང་པོ་དོན་སྙིང་ལྔ་དང་བཅས་པ་ལ་ཁཱ་ཧི་རཾ་རཾ༔ བསད་སྔགས་བརྗོད༔ བསྟོད་པས་བསྟོད་ཅིང་གཉེར་བྱང་གཏད༔ སྨྲ་བཅད་སྔགས་དམིགས་གནད་དུ་གཟིར༔ ཡེ་ཤེས་པ་གཤེགས་དགེ་བ་བསྔོ༔ མེ་ལྷ་གཏང་རག་མཆོད་བསྟོད་གཤེགས༔ ཐལ་བ་མཆོད་རྟེན་ལྷ་ཁང་ཞབས༔ ཡང་ན་ལུང་གསུམ་འདུས་མདོར་མནན༔ ས་མ་ཡཱ༔ རྒྱ་རྒྱ་རྒྱ༔ དབང་དང་དྲག་པོའི་འཕྲིན་ལས་ཀྱི༔ སྲེག་པ་མེ་ཡི་ལས་མཐའ་འདི༔ ཡི་གེའི་རིས་བཏབ་གཏེར་དུ་བཅོལ༔ ལན་ཅིག་དུས་ཀྱི་ཐ་མ་ལ༔ དགེ་དང་མི་དགེ་འཆོལ་བར་སྤྱོད༔ ཆོས་སྤྱིའི་བྱིན་རླབས་ཕལ་ཆེར་ཡལ༔ སྲུང་མ་ཕལ་ཆེར་མཐུ་རྡུགས་ཚེ༔ ཟབ་ཆོས་གསང་བའི་མན་ངག་འདིས༔ བསྟན་འགྲོའི་བདེ་བ་བསྐྲུན་པ་ཡོང་༔ གཅེས་སོ་ཡིད་ཀྱིས་བརྣག་པར་མཛོད༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ རྒྱལ་ཁམས་པ་ཉི་མ་གྲགས་པས་མེ་འབར་ཕུག་ནས་གདན་དྲངས་པའོ། །མངྒ་ལཾ།། །།