ཟོར་བསྐུལ་གྱི་ལས་རིམ།
རྟ་མགྲིན་དྲེགས་པ་ཟིལ་གནོན་ལས༔ ཟོར་བསྐུལ་གྱི་ལས་རིམ་བཞུགས༔ དཔལ་ཆེན་རྟ་མཆོག་ཧེ་རུ་ཀལ་འདུད༔ སྔོན་གྱི་སྨོན་ལམ་ལས་ཀྱི་འཕྲོ་བཙན་པས༔ བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་དང་༔ བདག་ཉིད་པདྨ་མཁན་སློབ་བདག་ཅག་བཞིས༔ བྱ་རུང་ཁ་ཤོར་ཁ་ལ་སྨོན་ལམ་བཏབ༔ མཐའ་འཁོབ་འདུལ་བའི་དུས་ལ་བབས་པའི་ཚེ༔ བོད་དུ་འཛོམ་ཞིང་བསྟན་འགྲོའི་དོན་ཆེན་བསྐྱངས༔ ཁྱད་པར་ཟབ་པའི་མན་ངག་སྙིང་པོ་འདི༔ ཨཱརྱ་པ་ལོའི་གླིང་དུ་བདག་གིས་བསྒྲུབས༔ དབང་ཆེན་གྲུབ་པས་ཁམས་གསུམ་དབང་དུ་བསྡུས༔ སྲིད་གསུམ་ཟིལ་མནོན་དྲེགས་ཚོགས་བྲན་དུ་ཁོལ༔ འོན་ཀྱང་ཆོས་ཀྱི་རྒྱལ་པོས་རྟེན་འབྲེལ་གྱི༔ གནད་ཟུར་ཉམས་པས་མ་འོངས་ཕྱི་མའི་དུས༔ དྲེགས་ཚོགས་ཁ་རྒྱས་འགྲོ་བའི་བདེ་བ་བཅོམ༔ དེ་དུས་ཕན་ཕྱིར་ཟབ་ཆོས་གདམས་པ་འདི༔ རིས་སུ་འདེབས་ནས་གསང་བའི་གཏེར་དུ་སྦ༔ དུས་ནི་བཞི་བཅུ་ཁ་རལ་དུས་དག་ཏུ༔ ལོ་ཙཱ་ཀླུ་ཡི་དབང་པོའི་སྐྱེ་བའི་མཐས༔ གདམས་པ་འདི་འབྱིན་འགྲོ་ལ་ཕན་པ་འོང་༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་རིགས་སྔགས་བྱད་སྟེམས་རྦོད་གཏོང་དང་༔ ནད་མཚོན་མུ་གེ་རྒྱ་འདྲེ་དམ་སྲི་ཡིས༔ བསྟན་འགྲོའི་བདེ་ལ་གནོད་ཅིང་བར་གཅོད་ན༔ རང་རང་གཞུང་བཞིན་ལས་སྦྱོར་ཚུལ་བཞིན་འབད༔ གཏོར་མ་བསྒྲུབ་ཅིང་ཟོར་དུ་འཕེན་པའམ༔ ཡང་ན་བྷནྡྷ་ཟངས་ལྕགས་སྣོད་ནང་དུ༔ བཤོས་ཆེན་གཅིག་ལ་བཤོས་ཕྲན་བཅུ་གཉིས་བསྐོར༔ ཤ་སྣ་སྙིང་སྣ་ལིངྒ་དཔལ་འབར་གཟུགས༔ ལིངྒར་ཟག་རྫས་བྱུག་ཅིང་འགུགས་བསྟིམ་བྱ༔ དགྲ་བགེགས་གང་གནོད་དངོས་བསམ་སྔགས་འདིས་བསྒྲལ༔ ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་བཛྲ་པཱ་ཎི་དྷཀྐི་ནི་བྷ་ར་ཧི་ཧཱུྃ་མ་ཧཱ་དྷེ་ཝ་ཧྲཱིཿཨུ་མ་དྷེ་ཝི་ཛ་ལ་རཀྴ་ཨ་ཡ་མ་དུ་རུ་ཙ་ཤན་ཏྲི་ས་མ་ཡ་ཧཱུྃ་ཧཱུྃ༔ དགྲ་བགེགས་ཆེ་གེའི་སྲོག་ལ་ཏྲི་དུ་ཛ་ཏྲི་དུ་ཛ་ནྲི་ཏྲི་མཱ་ར་ཡ་རྦད་རྦད༔ ཏྲག་རཀྴ་མཱ་ར་ཡ་རྦད་ཆོད་ཐུམ་རིལ་རྦད༔ དུམ་བུར་གཏུབས་གཏུབས་སྙིང་ལ་ཡཾ་ཡཾ་མ་ར་ཐུལ་མཱ་ར་ཡ་བྷྱོ་ནན༔ དགྲ་བགེགས་སམ་བན་བོན་བྱད་གཏད་ལྷ་སྲུང་ཞེས་མིང་ལྟེམ་པའི་མཐར༔ ཏྲི་དུ་ཛ་ཧྲི་དུ་ཛ་ནྲིའམ་ཏྲི་མཱ་ར་ཡ་རྦད་རྦད༔ བྱད་གཏད་ཁྲམ་གསུམ་ཐམས་ཅད་ས་ཐུན་ཡ་བྷྱོ་ཟློག༔ ཨཱོཾ་བིརྱ་དགྲ་བགེགས་བྱད་མའི་སྙིང་ལ་རྦད༔ ཁྲི་འཕོ་དགྲ་བགེགས་བྱད་མའི་སྙིང་ལ་རྦད༔ དམ་ལིང་དགྲ་བགེགས་བྱད་མའི་སྙིང་ལ་རྦད༔ པྲ་ཧ་ར་ན་དགྲ་བགེགས་བྱད་མའི་སྙིང་ལ་རྦད་རྦད༔ ཅེས་བསྒྲལ་རྩ་སྔགས་ལ་ཁཱ་ཧི་དང་བཅས་ལན་བདུན་གྱིས་གཏོར་མར་མཆོད་སྨན་རག་སྦྲེང་ཞིང་རོལ་མོ་ལྡིར༔ ཧཱུྃ་བྷྱོ༔ དགོངས་ཤིག་གསན་དུ་གསོལ་ལོ་དཔལ་ཆེན་པོ༔ ཕྱོགས་བཅུ་དུས་བཞིའི་སྐྱབས་གནས་ལྷ་ཡི་ཚོགས༔ རེ་ཞིང་ལྟོས་པའི་ཆོས་སྐྱོང་རྒྱ་མཚོའི་སྡེ༔ བདག་གིས་བྱང་ཆུབ་སེམས་ལ་བློ་སྦྱངས་ཏེ༔ བསྟན་དང་འགྲོ་བའི་དོན་དུ་སེམས་བསྐྱེད་ཀྱང་༔ ཉམས་པའི་དགྲ་བོ་སྡིག་ཅན་ལས་ངན་འདིས༔ ཡོངས་ལ་འཚེས་ཤིང་རྣལ་འབྱོར་བདག་ལ་སྡངས༔ དོ་རུ་བསྡོས་ཤིང་ཆོས་ལ་བདེན་མེད་ཟེར༔ ཚད་དུ་བཙུགས་ཤིང་ལྷ་ལ་མཐུ་མེད་ཟེར༔ དེ་ཕྱིར་དབང་དྲག་ཁྲོས་པའི་ལྷ་ཚོགས་རྣམས༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ ཧཱུྃ་བྷྱོ༔ དབང་དྲག་རོལ་པའི་དུར་ཁྲོད་ཆེན་པོ་ནས༔ རྟ་མཆོག་རྒྱལ་པོ་པདྨ་ཧེ་རུ་ཀ༔ འཁོར་འདས་ཡོངས་ཀྱི་ཆེ་བཙན་དྲེགས་པའི་གཤེད༔ བཞེངས་ཤིག་བཞེངས་ཤིག་དབྱིངས་ནས་སྐུ་བཞེངས་འཚལ༔ སྐྱེ་མེད་ཀློང་ནས་གཏུམ་དྲག་འབར་བའི་སྐུ༔ དཔའ་ལ་སྒེག་པའི་ཉམས་ལྡན་སྲིན་པོའི་གཟུགས༔ བསྐལ་པའི་མེ་ལྟར་འབར་ཞིང་གློག་ལྟར་འཁྱུག༔ མ་རུངས་ཚར་གཅོད་དབང་གི་སྒྲ་ཆེན་སྒྲོགས༔ ལེ་བརྒན་རྔོག་མའི་ཟེར་ལས་ཐོག་ཆར་འཁྲུག༔ སྐུ་ཡི་བ་སྤུའི་ཀློང་ནས་ཁྲོ་ཆུང་འགྱེད༔ ཕྱག་མཚན་གདེངས་པས་མཚོན་ཆའི་ཆར་པ་འབེབས༔ སྨ་ར་ཁ་སྤུའི་རྩེ་ལས་མེ་འོད་འཕྲོ༔ ཞལ་གདངས་ལྗགས་འདྲིལ་དགྲ་བགེགས་སྲོག་ལ་བརྔམས༔ སྤྱན་གསུམ་བསྐོར་བས་ཁམས་གསུམ་ས་ལེར་གཟིགས༔ དུར་ཁྲོད་ཆས་བརྒྱད་ཁྲག་ཏུ་ཙ་ར་ར༔ དཔལ་གྱི་ཆས་བཅུ་འོད་དུ་ཙེ་རེ་རེ༔ དུག་གསུམ་འབར་བའི་རྔམ་བརྗིད་ཡ་ལ་ལ༔ དུག་ལྔ་འཁྲུག་པའི་མེ་རླུང་འུ་རུ་རུ༔ རྡོ་རྗེ་ཕག་མོ་ལུས་དང་གྲིབ་མའི་ཚུལ༔ མ་རྒྱུད་མཁའ་འགྲོ་འབུམ་སྡེ་ཉི་ལི་ལི༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ དབང་ཆེན་ཆོས་དབྱིངས་དྲག་པོའི་ནམ་མཁའ་ནས༔ བྱ་ཁྱུང་དམར་པོ་བཅོམ་ལྡན་རིགས་ཀྱི་བདག༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ སྤྱི་གཙུག་དུང་ཁང་འབར་བའི་ཕོ་བྲང་ནས༔ སྐུ་སྤྲུལ་ཧྱ་གྷྲཱི་ཝ་ཡབ་ཡུམ་འབུམ༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ ལོངས་སྤྱོད་འཁོར་ལོ་འབར་བའི་གཞལ་ཡས་ནས༔ གསུང་སྤྲུལ་ཧྱ་གྷྲཱི་ཝ་ཡབ་ཡུམ་འབུམ༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ ཆོས་དབྱིངས་འཁོར་ལོ་འབར་བའི་གཞལ་ཡས་ནས༔ ཐུགས་སྤྲུལ་ཧྱ་གྷྲཱི་ཝ་ཡབ་ཡུམ་འབུམ༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ སྤྲུལ་པའི་འཁོར་ལོ་འབར་བའི་གཞལ་ཡས་ནས༔ ཡོན་ཏན་སྤྲུལ་པའི་རྟ་གདོང་ཡབ་ཡུམ་འབུམ༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ བདེ་སྤྱོད་འཁོར་ལོ་འབར་བའི་གཞལ་ཡས་ནས༔ འཕྲིན་ལས་སྤྲུལ་པའི་རྟ་གདོང་ཡབ་ཡུམ་འབུམ༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ ཐབས་ཀྱི་རོལ་པ་སྐུ་ཡི་གཡས་ཟུར་ནས༔ ཁམས་གསུམ་སྡེ་དཔོན་དྲེགས་པ་སྟོབས་ལྡན་ཆེ༔ སྐུ་མདོག་ནག་པོ་མུན་ལྟར་ཐིབས་སེ་ཐིབ༔ མི་ལྤགས་གཡང་གཞིའི་ན་བཟའ་ཡ་ལ་ལ༔ སྟག་ལྤགས་རློན་པའི་ཤམ་ཐབས་ཀྱི་ལི་ལི༔ ཕྱག་གཉིས་གནམ་ལྕགས་འཁོར་ལོ་ཟངས་སེ་ཟང་༔ སྤྱན་བགྲད་ཞལ་གདངས་གད་བརྒྱངས་ཡ་ལ་ལ༔ གནམ་ལྕགས་ཐོག་གི་བུ་ཡུག་ཚུབས་སེ་ཚུབ༔ ཁྲག་གི་བུང་བ་མང་པོ་འུ་རུ་རུ༔ ཁྲོ་ཆུའི་སྦྲང་མ་མང་པོ་ཉི་ལི་ལི༔ སྤྲུལ་པ་ཡང་སྤྲུལ་ཕོ་ཉ་ཤ་ར་ར༔ སྲིད་གསུམ་སྡེ་དཔོན་དྲེགས་པ་མཐུ་བོ་ཆེ༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ ཤེས་རབ་རོལ་པ་སྐུ་ཡི་གཡོན་ཟུར་ནས༔ ཡུམ་ཆེན་རྒྱལ་མོ་ཨུ་མ་དྷེ་ཝ་དམར༔ འདོད་ཆགས་ཁྲོས་པའི་སྒེག་མོ་ཁྲག་མདོག་མ༔ ནུ་མ་འཕྱང་ཞིང་བྷ་ག་དྲག་ཏུ་བགྲད༔ ཕྱག་གཉིས་ཟངས་ཀྱི་འཁོར་ལོ་ཀྱི་ལི་ལི༔ ནད་རླངས་མཚོན་ཆར་བུ་ཡུག་ཐིབས་སེ་ཐིབས༔ དམར་ནག་འོད་ཀྱི་ཕོ་ཉ་ཁྱུགས་སེ་ཁྱུག༔ དམ་ཉམས་དགྲ་བགེགས་བླ་ལེན་སྲོག་འགུགས་མ༔ སྙིང་ཁྲག་འཇིབས་པའི་འདོད་ཁམས་དཔལ་མོ་ཆེ༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ མི་རོ་གསར་རྙིང་ཀེང་རུས་འབུམ་ཁྲིའི་ཀློང་༔ ཁྲག་ཞག་རྒྱ་མཚོ་འཁྱིལ་བའི་ཀློང་དཀྱིལ་ནས༔ སྤྲུལ་པའི་སྲས་མཆོག་རཀྴ་ཛ་ལ་ནི༔ ཕྱག་ནས་དུག་དང་མཚོན་གྱི་ཆར་པ་འབེབས༔ དར་ནག་བེར་གསོལ་སྲིད་གསུམ་མུན་ལྟར་གཏིབས༔ རབ་ཏུ་ཁྲོས་པའི་གད་རྒྱངས་སྟོང་གསུམ་འགེངས༔ སྲོག་གཅོད་དབུགས་ལེན་འབུམ་སྡེ་སྤྲུལ་པར་འགྱེད༔ རབ་ཁྲོས་མི་བསྲུན་དྲེགས་ཆེན་འཇིགས་པའི་གཟུགས༔ གཏུམ་ལ་བརྔམ་པའི་མི་ཟན་སྲིན་པོ་ཆེ༔ སྙིང་རྗེ་མེད་པའི་དྲག་རྩལ་རྡོ་རྗེའི་ཐོག༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ བཅོམ་ལྡན་དཔལ་ཆེན་དྲེགས་པ་ཀུན་གྱི་གཤེད༔ སྤྲུལ་པའི་གནོད་སྦྱིན་འབུམ་སྡེ་སྡེ་བརྒྱད་ཚོགས༔ རྣོ་ངར་ལྡན་པའི་མཚོན་ཆའི་བུ་ཡུག་འཚུབ༔ རལ་པ་ཁམ་ནག་ཐོད་པ་སྦྲུལ་གྱིས་བརྒྱན༔ སྐུ་མདོག་མཐིང་ནག་འོད་དུ་ཙེ་རེ་རེ༔ དུག་སྦྲུལ་མང་པོའི་ཆུན་པོ་ཉི་ལི་ལི༔ ཞལ་གདངས་ལྗགས་ལས་གློག་དམར་ཀེམས་སེ་ཀེམ༔ ཁྲོ་ཚོགས་ཕོ་ཉ་མང་པོ་ཕྱོགས་བཅུར་འཕྲོ༔ འཛིན་གིང་ཕོ་ཉའི་ཚོགས་ནི་ཤ་ར་ར༔ འཁོར་གཡོག་ལས་བྱེད་སྡེ་ཚོགས་འུ་རུ་རུ༔ མི་བསྲུན་དྲག་པོ་འཁོར་དང་བཅས་པ་རྣམས༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ ལྷ་སྲིན་སྡེ་བརྒྱད་འཚུབས་པའི་ཀློང་དཀྱིལ་ནས༔ རྒྱལ་པོའི་སྡེ་དཔོན་སྲོག་བདག་ཚངས་པ་ནི༔ སྐུ་མདོག་དཀར་པོ་ཟླ་ལྟར་ཡ་ལ་ལ༔ ཁྲབ་དཀར་རྡོ་རྗེའི་གོ་ཆེན་ལྷུབས་སེ་ལྷུབ༔ ཕྱག་གཡས་མདུང་དར་བ་དན་ལྷབས་སེ་ལྷབ༔ ཕྱག་གཡོན་དགྲ་སྙིང་ཁྲག་ཏུ་ཙ་ར་ར༔ ཆིབས་སུ་ཉི་ཟླ་འབར་བའི་ཟེར་ལ་བཅིབས༔ འཁོར་ནི་གིང་ཕོ་སྟོང་སྡེ་ཉི་ལི་ལི༔ ཆོ་འཕྲུལ་མི་རུང་སྣ་དགུ་ཕོ་ཉར་འགྱེད༔ དཀོར་བདག་རྒྱལ་པོ་འབུམ་སྡེ་དབང་བསྒྱུར་ལ༔ གནོད་བྱེད་དགྲ་བགེགས་སྟེང་དུ་དམག་ལ་ཆོས༔ སྨྱོ་འབོག་རྒྱལ་ནད་དམ་ཉམས་དགྲ་ལ་ཐོངས༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ བསྐལ་པའི་མེ་ལྟར་འབར་བའི་ཀློང་དཀྱིལ་ནས༔ བྷེ་ཝ་ས་ཏ་བཅོམ་ལྡན་གཤིན་རྗེའི་གཤེད༔ སེར་ནག་འབར་བ་འཇིགས་བྱེད་དྲག་པོའི་སྐུ༔ འཁོར་ལོ་སྡིགས་མཛུབ་ཞགས་པའི་ཕྱག་རྒྱ་ཅན༔ གཤིན་རྗེ་གདན་དུ་བཏིང་ནས་མ་ཧེ་ཆིབས༔ དྲག་ཤུལ་རྔམས་འཁྲུག་འཆི་བདག་འབུམ་འབུམ་འཕྲོ༔ སྤྲུལ་པ་མེ་ཡི་བསྐལ་པས་སྲིད་གསུམ་སྲེག༔ དུང་ཆེན་རཀྟས་བཀང་བའི་རྫས་ལ་དགྱེས༔ སྟོང་གསུམ་ཟས་སུ་ཟ་བའི་མཐུ་བོ་ཆེ༔ དགྲ་བགེགས་སྙིང་ཁྲག་འཐུང་ཞིང་གསོད་ལ་བརྩོན༔ གཤིན་རྗེའི་དམགས་ཚོགས་དམ་ཉམས་དགྲ་ལ་ཆོས༔ བསད་རྟགས་དམར་པོའི་དོན་སྙིང་ཁྱེར་ལ་ཤོག༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ རླུང་དམར་བུ་ཡུག་འཚུབ་པའི་ཀློང་དཀྱིལ་ནས༔ བཙན་རྒོད་ཆེན་པོ་རྡོ་རྗེ་དྲག་རྩལ་འཇིགས༔ སྐུ་མདོག་དམར་པོ་མེ་ཡི་འོད་ལྟར་འབར༔ སྨ་ར་སྨིན་མ་མེ་སྟག་ཁྱུགས་སེ་ཁྱུག༔ བ་སྤུ་མེ་ཡི་ཚ་ཚ་ཐོར་རོ་རོ༔ ཆིབས་སུ་བར་སྣང་ཁམས་ཀྱི་གློག་ལ་བཅིབས༔ སྤྲུལ་པ་སུམ་བརྒྱ་དྲུག་ཅུ་ཕོ་ཉར་འགྱེད༔ བཙན་དམག་འབུམ་སྡེ་འཁྲུག་པའི་ཀློང་ནས་བཞེངས༔ སྲོག་གཅོད་མི་ཟན་དམར་པོའི་དུས་ལ་བབས༔ གྲི་རྒོད་བཙན་ཐབས་ཐོང་ལ་དགྲ་བགེགས་སྒྲོལ༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ བདུད་ཡུལ་ཁ་རག་ནག་པོའི་མགོ་དགུ་ནས༔ བདུད་མཚོ་ཁོལ་མ་འཁྲུག་པའི་ནང་ཤེད་ནས༔ བདུད་ཀྱི་སྡེ་དཔོན་རལ་པ་ཚར་དགུ་ནི༔ སྐུ་མདོག་ནག་པོ་མུན་ལྟར་ཐིབས་སེ་ཐིབ༔ འོད་ནག་འཚུབ་མ་མང་པོ་ཀྱི་ལི་ལི༔ རེ་ལྡེ་མི་ལྤགས་གོས་ཟུང་ལྷབས་སེ་ལྷབ༔ གཡས་ན་གཤིན་རྗེའི་ཁྲམ་ཤིང་ཡ་ལ་ལ༔ གཡོན་ན་བདུད་ཀྱི་ཞགས་པ་ན་ར་ར༔ ཆིབས་སུ་བདུད་རྟ་ནག་པོ་སྤྲིངས་སེ་སྤྲིང་༔ འཆི་བདག་དྲེགས་པ་ཆེན་པོ་བཅོ་བརྒྱད་ནི༔ གྲིབ་སོའི་དམག་དང་བསྡོངས་ཏེ་ཕོ་ཉར་འགྱེད༔ གཏི་མུག་མུན་པར་བསྡོངས་ཏེ་ཁྲམ་ལ་འདེབས༔ སྐྱེ་འགྲོའི་ཚེ་བདུད་འབུམ་སྡེ་དགྲ་ལ་ཆོས༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ དུག་གི་རྒྱ་མཚོ་འཁྱིལ་བའི་ཀློང་ཡངས་ནས༔ དུག་གི་རི་རབ་འབར་བའི་ངོས་ཡངས་ནས༔ ཀླུ་བདུད་ནག་པོ་མགོ་དགུ་འཇིགས་པའི་གཟུགས༔ སྐུ་མདོག་དམར་ནག་ཀླུ་སྲིན་ཁྲོས་པའི་ཞལ༔ སྐུ་ནི་རི་རབ་འབར་བའི་ལོགས་ལ་བརྟེན༔ དབུ་ནི་མི་མངོན་བར་སྣང་ཁམས་སུ་འཕྱོ༔ སྦྲུལ་ནག་གདེང་ཀས་བར་སྣང་སྤྲིན་ལྟར་གཡོ༔ མཇུག་མ་བརྐྱངས་པས་རྒྱ་མཚོའི་ཀློང་རྣམས་འཁྱོམ༔ ཀླུ་ཆེན་བརྒྱད་ནི་ཐུགས་ཀྱི་ཀློང་ནས་རྡོལ༔ ཀླུ་ཡི་ཕོ་རྒྱུད་སྤྲུལ་འཁོར་གཡས་ནས་འགྱེད༔ ཀླུ་ཡི་མོ་རྒྱུད་སྤྲུལ་འཁོར་གཡོན་ནས་འགྱེད༔ ས་བདག་སྟོང་སྡེ་སྐུ་ཡི་མདུན་ནས་སྤྲུལ༔ ཀླུ་བཙན་འབུམ་ནི་སྐུ་ཡི་རྒྱབ་ནས་གཡོ༔ ཚ་གྲང་ནད་ཀྱི་རླངས་པ་ཞལ་ལས་འཕྲོ༔ དུག་རིགས་བཅོ་བརྒྱད་སྐུ་ཡི་འོད་ལས་འཆད༔ སྐད་ནི་མི་སྙན་སྒྲ་སྒྲོགས་ཨིག་ཤ་འབྱིན༔ ཁྱོད་ནི་ཀླུ་བདུད་རྡོ་རྗེ་ཁྲོ་བོའི་རྒྱལ༔ ཆིབས་སུ་བུ་ཡུག་ནག་པོའི་དུག་རླུང་བཅིབས༔ ཁམས་གསུམ་དབང་བསྒྱུར་དེ་རིང་དགྲ་ལ་ཆོས༔ མཛེ་རིགས་བཅོ་བརྒྱད་ནད་ཀྱིས་དགྲ་སྲོག་ཆོད༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ དུག་ལྔ་རབ་གཏུམ་འཁྲུག་པའི་ཀློང་དཀྱིལ་ནས༔ ཀླུ་སྲིན་ཚོགས་པའི་དྲང་སྲོང་རཱ་ཧུ་ལ༔ སྐུ་མདོག་ལྗང་གུ་དབུ་དགུ་བྱ་རོག་མགོ༔ གཡས་པས་ཆུ་སྲིན་འབར་བའི་རྒྱལ་མཚན་འཕྱར༔ གཡོན་པས་རྭ་ཡི་མདའ་གཞུས་དགྲ་བགེགས་སྒྲོལ༔ མགོ་ལུས་མེད་པར་སྤྱན་སྟོང་འབར་བས་གཏམས༔ ཆིབས་སུ་ཆུ་སྲིན་དེ་ནི་ངར་མ་བཅིབས༔ ཟླ་བའི་རྗེས་གཅོད་ནུབ་ནས་ཤར་དུ་རྒྱུག༔ ཉི་མའི་རྗེས་གཅོད་ཤར་ནས་ནུབ་ཏུ་རྒྱུག༔ ཉིན་མོ་རྒྱུགས་པས་མཚམས་བཞིའི་དགྲ་བགེགས་འཇོམས༔ མཚན་མོ་རྒྱུགས་པས་ཕྱོགས་བཞིའི་དགྲ་བགེགས་འཇོམས༔ ལྷ་ཀླུ་གཉན་ཁམས་ཀུན་ཀྱང་བྲན་དུ་བཀོལ༔ དུག་དང་ནད་ཀྱི་རླངས་པ་ཕྱུར་རུ་རུ༔ ཐོག་སེར་ལོ་ཉེས་ནད་མཚོན་ཕོ་ཉར་འགྱེད༔ ཕྱི་དྲིལ་ཡང་འདྲིལ་དམག་དཔོན་ལྗང་སྔོན་ཆེ༔ འཕུང་བྱེད་ཆེན་པོ་དྲང་སྲོང་རྭ་ཛ་ཀ༔ སྡེ་བརྒྱད་དམག་དཔུང་གཟའ་དམག་དགྲ་ལ་ཆོས༔ རྡོ་རྗེ་འཛིན་པའི་དམ་གྱི་བཀའ་བཞིན་དུ༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ ཕྲག་དོག་དྲེགས་རླུང་ཁམས་ནག་འབར་བའི་ཀློང་༔ འགོང་པོ་ཐེའུ་རང་འབུམ་སྡེའི་དབང་ཕྱུག་ཆེ༔ སྐུ་མདོག་སྨུག་ནག་ཁྲོས་པ་དགྲ་བགེགས་གཤེད༔ ལྕགས་ཞྭ་ནག་པོ་དབུ་ལ་ཀྱི་ལི་ལི༔ ལྕགས་བེར་ནག་པོ་སྐུ་ལ་ལྷུབས་སེ་ལྷུབ༔ ལྕགས་ལྷམ་ནག་པོ་ཞབས་ལ་ལྡེམས་སེ་ལྡེམ༔ རྡོ་རྗེ་འབར་བའི་ཐོ་བ་ཡ་ལ་ལ༔ བདུད་ཀྱི་ཞགས་པ་ནག་པོ་ཁྱུགས་སེ་ཁྱུག༔ དྲག་ཤུལ་བརྔམས་པའི་སྒྲ་སྒྲོགས་དི་རི་རི༔ ཆིབས་སུ་ར་སྐྱེས་དེ་ནི་ཁམ་པ་བཅིབས༔ སྤྲུལ་པ་ཐེའུ་རང་སྟོང་སྡེ་ཤ་ར་ར༔ ཐན་བདག་འགོང་པོ་འབུམ་ནི་ཉི་ལི་ལི༔ བླ་རྐུན་མ་མོ་བསྟན་མ་ཁྱུགས་སེ་ཁྱུག༔ བྱ་ཁྱི་གཅན་སྤྱང་དོམ་དྲེད་ཚུབས་སེ་ཚུབས༔ བཀའ་ཡི་ཕོ་ཉ་གཙང་བཙན་རྡོ་རྗེ་འབར༔ མ་ལུས་འཁོར་དང་བཅས་པ་དགྲ་ལ་ཆོས༔ ལྟས་ངན་ཆོ་འཕྲུལ་སྣ་དགུའི་ཆར་པ་ཐོབ༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་འཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ ནད་གཏོང་བུ་ཡུག་འཚུབ་པའི་ཀློང་དཀྱིལ་ནས༔ ཤེས་རབ་འབར་བའི་དབང་མོ་ཀུན་འདུས་མ༔ སྐུ་མདོག་མཐིང་ནག་ནམ་མཁའི་ཁམས་དང་མཉམ༔ ཞལ་གདངས་མཆེ་གཙིགས་ལྗགས་ཀྱིས་བམ་ཆེན་སྒྲིལ༔ རལ་གྲི་དམར་པོ་གཡས་ན་ཟངས་སེ་ཟང་༔ གཡོན་པ་ཐོད་ཁྲག་ཐུགས་ཀར་ཀྱི་ལི་ལི༔ བརྗིད་པའི་གཟི་བརྗིད་མདངས་ལྡན་ཏ་ལ་ལ༔ སྐད་ཅིག་རེ་རེས་སྟོང་ཁམས་བང་གིས་བསྐོར༔ སྤྲུལ་པའི་ཕོ་ཉ་ནད་རིགས་ཆར་དུ་འབེབས༔ རྡོ་རྗེ་ནག་མོ་མ་ཚོགས་ཀུན་གྱི་གཙོ༔ སྲིན་ལྤགས་སྲིན་སྒའི་རྒྱན་བཅས་རྒྱ་བོང་བཅིབས༔ མ་མོ་མཁའ་འགྲོ་ཐམས་ཅད་དབང་བསྒྱུར་ལ༔ དགྲ་བགེགས་གནོད་བྱེད་སྟེང་དུ་དམག་ལ་ཆོས༔ དགྲ་བོའི་ཡུལ་དུ་ནད་ཡམས་ཆར་པ་ཕོབ༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་དྲག་པོའི་ཕྲིན་ལས་མཛོད༔ དམ་སྲི་བསྟན་དགྲ་བར་ཆད་རྡུལ་དུ་རློག༔ ཧཱུྃ་བྷྱོ༔ དབང་ཆེན་དཔལ་གྱི་བཀའ་ཡི་ཁོར་ཡུག་ནས༔ རྒྱལ་ཆེན་སྡེ་བཞི་གཙང་རིས་དཔལ་མགོན་དང་༔ མགུར་ལྷ་དགེ་བསྙེན་དྲེགས་པའི་ལྷ་སྲིན་ཚོགས༔ བཀའ་སྲུང་གཏེར་བདག་དམ་ཅན་རྒྱ་མཚོ་རྣམས༔ མི་འདའ་དམ་ཚིག་ཀློང་ནས་ད་བཞེངས་ཏེ༔ སངས་རྒྱས་བསྟན་པའི་གཞུག་གཉེར་ཆེན་པོ་འདིར༔ སྔོན་ཚེ་རྒྱལ་བ་རྣམས་ཀྱིས་བཀའ་བསྒོས་ལྟར༔ རྣལ་འབྱོར་གདུང་བས་འབོད་ཅིང་རྗེས་བསྐུལ་ཚེ༔ དམ་ལས་མ་གཡེལ་དམ་ཅན་རྒྱ་མཚོའི་ཚོགས༔ ཆད་བཞིན་མ་སྟོངས་བཀའ་ཡི་སྲུང་མ་རྣམས༔ ཆོས་ལ་བདེན་མེད་ཟས་ལ་ངོ་མེད་ཅིང་༔ བསྒྲུབ་ལ་རྟགས་མེད་ལས་ལ་མཐུ་མེད་ན༔ དམ་ཅན་རྒྱ་མཚོ་དམ་དང་མི་འགལ་ལམ༔ སྲུང་མ་རྣམས་ཀྱང་ཆད་དུས་མི་སྟོངས་སམ༔ སྤྱི་བོར་རྡོ་རྗེས་རྒྱས་གདབས་མེ་འབར་ན༔ རྡོ་རྗེ་འབར་བའི་དམྱལ་བར་མི་འཇིགས་སམ༔ ལྕེ་དཀྱིལ་ཨརྒམ་ཐིག་ལེ་སྙིང་ཞུགས་ནས༔ སྡིག་པས་སྙིང་ཁྲག་འཇིབས་ན་མི་བྲེད་དམ༔ དེ་ཕྱིར་བསྟན་སྲུང་རྒྱ་མཚོ་དམ་མ་གཡེལ༔ མ་བཏང་དྲག་ཏུ་སྒྲོལ་ཅིག་ཤོར་ར་རེ༔ རྫོགས་སངས་རྒྱས་ཀྱི་བསྟན་ལ་སྡང་བའི་དགྲ༔ རྒྱལ་བའི་གདུང་འཚོབ་བླ་མའི་སྐུ་ཡི་དགྲ༔ གསང་ཆེན་ཐེག་པའི་ཆོས་ལ་དམོད་པ་དང་༔ རིམ་གཉིས་རྡོ་རྗེའི་ཏིང་འཛིན་དཀྲོགས་པ་དང་༔ འཕགས་པའི་དགེ་འདུན་མཐུན་པའི་དབྱེན་ལས་བྱེད༔ དབེན་རི་གཉེན་པོའི་སྒྲུབ་གནས་བཅོམ་པ་དང་༔ དགེ་བའི་ལས་རྣམས་སྡིག་པར་བསྒྱུར་བ་དང་༔ འགྲོ་བ་སེམས་ཅན་ཡོངས་ལ་འཚེ་བ་དང་༔ སྐྱེ་བོ་སྡིགས་ལྟུང་ཁོ་ནར་སྤྱད་པ་དང་༔ སྡེ་དགོན་མཆོད་ཚོགས་ཡོ་བྱད་བརྐུ་བ་སྟེ༔ ཞིང་བཅུ་ལྡན་པའི་དམ་ཉམས་དགྲ་དང་བགེགས༔ མཐུ་སྟོབས་རྩལ་ཕྱུངས་སྒྲོལ་བའི་དུས་ལ་བབས༔ སྲོག་རྩ་ཆོད་ལ་སྙིང་ཁྲག་ཧུབ་ཀྱིས་ཐོབ༔ བསད་རྟགས་དམར་པོའི་དོན་སྙིང་ཁྱེར་ལ་ཤོག༔ ལས་ཀྱི་མཐའ་སྡུས་སྡིག་ལྟུང་རྣམས་སྨིན་ཆོམས༔ རྣམ་པར་ཤེས་པ་སྐྱེ་མེད་དབྱིངས་སུ་བསྟིམ༔ ཐུགས་དམ་དུས་ལ་བབ་པོ་ས་མ་ཡ༔ རྣལ་འབྱོར་བཅོལ་པའི་འཕྲིན་ལས་གྲུབ་པར་མཛོད༔ ཅེས་བརྗོད་ལས་ལ་བསྐུལ་ཞིང་གཏོར་ཟོར་བརྡེག༔ མི་མཐུན་བར་ཆད་གཡུལ་ལས་རྒྱལ་བ་དང་༔ བསམས་པའི་དོན་གྲུབ་དེ་ཕྱིར་ཉམས་སུ་ལོང་༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ ས་མ་ཡཱ༔ རྒྱ་རྒྱ་རྒྱ༔ སྤྲང་བན་རིག་འཛིན་ཉི་མ་གྲགས་པས་ནགས་ཤོད་མེ་འབར་ཕུག་ནས་གདན་དྲངས་ཤིང་བུ་འབོར་སྒང་དུ་ཤོག་སེར་ལས་བསྒྱུར་བའོ། །མངྒ་ལཾ།། །།