བསད་ལས་ཀྱི་བཅའ་བཞིའི་ཤོག་དྲིལ།
རྟ་མགྲིན་དྲེགས་པ་ཟིལ་གནོན་ལས༔ བསད་ལས་ཀྱི་བཅའ་བཞིའི་ཤོག་དྲིལ་བཞུགས་སོ༔ པདྨ་དབང་ཆེན་ལྷ་ལ་འདུད༔ མ་འོངས་བསྐལ་བའི་སྙིགས་མ་ལ༔ སངས་རྒྱས་བསྟན་པ་ཉམས་དམའ་ཞིང་༔ བདུད་འགོང་ཐམས་ཅད་ཁ་རྒྱས་ནས༔ ཆོས་བཞིན་སྤྱོད་ལ་བར་གཅོད་ཅིང་༔ ཁྱད་པར་དམ་ཉམས་རཱུ་ཊ་ཡི༔ བྱད་མ་རྦོད་གཏོང་ལྟས་བྱུང་ངམ༔ ཡང་ན་མི་ནག་སྐྱེ་བོས་འཚེ༔ བསད་པར་བྱ་བའི་ལས་སྦྱོར་ནི༔ འཕུང་གསུམ་བདུད་ཀྱི་ཉི་མ་ལ༔ དུར་ཁྲོད་ལུང་སྟོང་བས་མཐའ་རུ༔ འཕུང་ཤུལ་ས་ལ་སྟེགས་བུ་ནི༔ གྲུ་བཞི་དུག་ཁྲག་དུར་སོལ་བྱུག༔ དབུས་སུ་ཧོམ་ཁུང་བང་རིམ་བཞི༔ ཕྱི་ནང་དུག་ཁྲག་རོ་སོལ་བྱུག༔ རྩང་ཕུར་ཉེར་གཅིག་མཐའ་ནས་གཟུགས༔ གྲི་ཤོག་ངོས་ལ་བྱད་མ་ཡི༔ ལིངྒ་འབྲི་ཞིང་སྙིང་གར་ནྲི༔ ཛཿ བསྐོར་དམིགས་བྱའི་མིང་དང་ནི༔ དགྲ་བགེགས་བྱད་མ་འདི་ཞེས་པ༔ ཁུག་ཅིག་སོད་ཅིག་དྲག་ཏུ་སྒྲོལ༔ ཅེས་པའམ་ནི་བསད་སྔགས་བྲི༔ ལྟེ་བ་ཁོ་ཡི་བླ་དྭགས་འབྲི༔ ཡན་ལག་སྡིག་པས་ཟ་བར་བྲི༔ ཐ་མར་བསད་སྔགས་དམོད་བཅོལ་དང་༔ གནས་ཡིག་སྤྱི་འགྲོས་ཛཿགྲཾ་བསྐོར༔ གྲོ་ག་ཤོག་བུ་གང་རུང་ལ༔ ལྟེ་བ་ལྷ་ཆེན་ཡབ་ཡུམ་གསུམ༔ རྩིབས་བརྒྱད་སྡེ་བརྒྱད་གཟུགས་འདྲི་ཞིང་༔ ཐུགས་ཀར་རང་རང་ཐུགས་སྲོག་དང་༔ ཐ་མར་བསད་སྔགས་ཛཿཡིས་སྐོར༔ གཟུགས་དང་ལིངྒ་ཁ་སྦྱར་དྲིལ༔ ཡུགས་སའི་སྐྲ་ཤད་སྐུད་པས་བསྡམས༔ དེ་ཉིད་ལིངྒའི་ཁོག་པར་གཞུག༔ ལ་ཆའི་སྦལ་པ་ལྟོ་སྦྱོར་བར༔ ལིངྒ་ལྟེམ་ཞིང་ཚོན་སྐུད་དཀྲིས༔ ཁམས་སར་བྱད་མའི་ལྷ་ཡི་གཟུགས༔ ལག་ན་ཕུར་བ་འདྲིལ་བ་བཟོ༔ དེ་ནང་མན་ངག་འཁོར་ལོ་དང་༔ ཁོ་ཡི་ལྷ་སྲུང་ལིངྒ་གཉིས༔ ཁ་སྦྱར་ཚོན་སྐུད་བཅིངས་ལ་བཅུག༔ གཟུགས་དེ་སྦལ་པའི་སྟེང་ལ་སྐྱོན༔ སྐྱེར་ཕུར་སོ་ལ་བསད་སྔགས་ལྡན༔ སྦལ་པར་གདབ་ཅིང་ལིངྒར་འདེབས༔ ལིངྒ་མགོ་ལྷོ་སྦལ་པ་བྱང་༔ ཧོམ་ཁུང་ནང་དུ་གཟུད་པར་བྱ༔ དེ་སྟེང་པུ་རི་བང་རིམ་དགུ༔ ཛཿཁུང་བསད་སྔགས་སྐྱེར་ཕུར་མཚན༔ ཆོས་འབྱུང་ཁ་བཀབ་མཐའ་སྐོར་དུ༔ ཡུངས་ཀར་ཡུངས་ནག་ལྕགས་ཟངས་ཕྱེ༔ དུག་ཁྲག་མཚོན་ཐུན་རྒྱས་པར་བཤམས༔ མཆོད་རྟེན་སྟེང་དུ་ཁྲིའུ་ཁར༔ ཡབ་ཡུམ་སྲས་གསུམ་བཤོས་བུ་དང་༔ ཧོམ་ཁུང་ཁ་རན་མུ་ཁྱུད་ལ༔ སྡེ་བརྒྱད་བཤོས་བུས་བསྐོར་བར་བྱ༔ མཆོད་གཏོར་སྨན་རག་ལས་གཞུང་ལྟར༔ ལིངྒར་ལྷ་དབྱེ་འགུགས་བསྟིམ་དང་༔ སྔགས་དམིགས་ལ་སོགས་གནད་དུ་བསྣུན༔ བདུན་གཅིག་བདུན་གཉིས་བདུན་གསུམ་དུ༔ བརྩོན་འགྲུས་ལྡན་པས་ལས་ལ་སྦྱར༔ ས་མ་ཡཱ༔ རྒྱ་རྒྱ་རྒྱ༔ དེ་ཚེ་རྟགས་ཀྱི་རིམ་པ་ནི༔ ལིངས་བྱས་གཡུལ་འགྱེད་རི་ཕྲག་བཤིག༔ ཁྱད་པར་ཁོ་ཡི་བླ་རྟགས་བསད༔ ཤ་ཁྲག་བྱིན་ཟོས་དོན་སྙིང་གཏད༔ དེ་སོགས་ལྟས་ནི་སྣ་ཚོགས་འབྱུང་༔ དེ་ནས་ལུང་གསུམ་འདུས་པའི་མདོ༔ རྒྱ་གྲམ་ལམ་མམ་མཆོད་རྟེན་ཞབས༔ ལས་སྦྱར་ཤགས་འདེབས་དམོད་བཅོལ་མནན༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གསང་རྒྱ༔ ས་མ་ཡཱ༔ རྒྱ་རྒྱ་རྒྱ༔ རྒྱལ་ཁམས་པ་ཉི་མ་གྲགས་པས་ཁམས་སྲིང་མོ་རྫོང་གི་ནུབ་སྒོ་མེ་འབར་ཕུག་ནས་གདན་དྲངས་ཤིང་ཤོག་སེར་ལས་བསྒྱུར་བའོ། །མངྒ་ལམ།། །།