ལི་བྱིན་ཧ་ར་སྐུ་ལྔའི་ཐན་གྱི་ལས་མཐའ།
རྟ་མགྲིན་དྲེགས་པ་ཟིལ་གནོན་ལས་བཀའ་སྲུང་ལི་བྱིན་ཧ་ར་སྐུ་ལྔའི་ཐན་གྱི་ལས་མཐའ་བཞུགས་སོ། །དབང་ཆེན་ཁྲོ་བོའི་རྒྱལ་ལ་ཕྱག་འཚལ་ལོ༔ བྱད་མ་དགྲ་བགེགས་ལ་ལྟས་ངན་མངོན་སུམ་གཏོང་བའི་མན་ངག་ཕུང་བྱེད་ཤིཾནྟ་གྷརྦའི་ཐུགས་བཅུད་འདི་ལ༔ བེ་ཤིང་གི་བྱང་བུ་ལ་བེ་ཧར་བཙུན་གཟུགས་གླང་པོ་ཆེ་སྣ་རིང་ལ་ཞོན་པའི་སྙིང་གར་ཏྲི་ཛ་བྲི་ཞིང་མཐར༔ ཏྲིགྴྭ་ཏྲིགྴྭ་སུ་ཏྲི་ར་ཛ་ཏྲི་ལ་ཀཾ་ཀ་ནི་བྷྱོ་བྷྱོ་ཅེས་པས་བསྐོར་ཞིང་ལྷ་ཁང་འདྲེ་ཅན་གྱི་ས༔ རྔ་མོའམ་བོང་བུ་ག་མའི་ཆུས་སྦྲུས་ལ་དྷེའུ་ནག་པོ་བྱ༔ ཡུག་སའི་སྐྲ་ཤད་སྐུད་པ་ལ་བཏགས༔ སྙིང་ཁའི་ཏྲིའི་ཐད་སོར་སླེབས་པའི་ཐག་སྣེ་རང་གིས་འཐེན་ལ་སྔགས་བརྒྱ་རྩ་སོང་འཚམས་དྷེའུ་ཏྲི་ལ་བརྡེག་པ་རེ་བྱ་ཞིང་༔ ཨོཾ་གྷྲིགྴྭ་གྷྲིགྴྭ་རཱ་ཛ་སུ་ཏྲི་ཀཾ་ཀ་ནི་ཏྲི་ར་ཙ་ཏྲི་སང་ག་ཡ་དུན་ཏྲི་ས་མ་ཡཱ་ཛ་བྷྱོ་རྦད༔ ཞེས་ཞག་བདུན་ལ་བཟླ་ཞིང་༔ ལས་ལ་སྦྱར་བར་བྱའོ༔ བསྐང་གསོལ་རྦད་བསྐུལ་གྱི་རྒྱབ་རྟེན་བྱ་ཞིང་བསྒྲུབ་པའི་རྟགས་མངོན་སུམ་དུ་འོང་བར་ཐེ་ཚོམ་མེད་དོ༔ ས་མ་ཡཱ༔ རྒྱ་རྒྱ་རྒྱ༔ མུ་ཟི་ནག་པོ༔ ཐང་ཕྲོམ་འབྲས་བུ༔ བྲག་ཕུག་ཁ་བྱང་བསྟན་གྱི་ས༔ ཁྱི་དཀར་གྱི་ཁྲག་དང་ཤ་སྤུ༔ ལམ་རྒྱ་གྲམ་གྱི་ས༔ རྟ་དཀར་པོའི་ལུད་རྣམས་གཟུགས་དང་སྔགས་འཁོར་ལ་བྱུག༔ རང་དབང་ཆེན་གྱི་བསྐྱེད་རིམ་གསལ་ཞིང་མདུན་གྱི་སྐུ་གཟུགས་དེ་ཁམས་གསུམ་གྱི་སྲོག་བདག་གིང་ཆེན་པོ་དངོས་སུ་བསྐྱེད་ལ༔ དྷེའུ་དེ་གནམ་ལྕགས་འབར་བའི་ཐོགས་རྡེལ་སྲོག་ལ་བརྡུང་བས་དྲག་ཏུ་འཁྲོས་ནས༔ གང་ལ་བྱ་བའི་དགྲ་བགེགས་བྱད་མ་ཐན་དང་ལྟས་ངན་སྣ་ཚོགས་ཀྱིས་ཕུང་ལམ་དུ་བཏང་བར་བསམ༔ གཏོར་མ་ཤ་ཁྲག་གིས་བརྒྱན་པ་གཅིག་དགྲ་བགེགས་ཀྱི་ཤ་ཁྲག་རུས་པར་བསམ་ལ་དགོང་མོ་ཟེར་རེ་བ་ལ་ཉི་མ་ཤར་ཕྱོགས་སུ་གཏོང་༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གསང་རྒྱ༔ གཉན་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་ཆུ་ཁྱི་ལ་གདན་དྲངས་ཤིང་ས་འབྲུག་ཧོར་ཟླ་བརྒྱད་པའི་ཉི་ཤུ་དགུ་ལ་ཤོག་སེར་ལས་ཕབ་པའོ། །དགེའོ།