གཏེར་སྲུང་བསང་གསུར་གྱིས་མཆོད་ཐབས།
རྟ་མགྲིན་དྲེགས་པ་ཟིལ་གནོན་ལས༔ གཏེར་སྲུང་བསང་གསུར་གྱིས་མཆོད་ཐབས་བཞུགས་སོ༔ ཁྲོ་བོའི་ཆེ་བཙན་ཧེ་རུ་ཀཿལ་འདུད༔ གཏེར་སྲུང་ཆེན་པོ་བསང་ངམ་གསུར་མཆོད་ཀྱིས༔ བརྔན་ཞིང་སྒྲུབ་པོའི་བར་ཆད་སེལ་བའི་ཐབས༔ རང་ཉིད་ཡི་དམ་ལྷ་ཡི་བསྐྱེད་རིམ་ངང་༔ ཧཱུྃ༔ བསང་གསུར་འདོད་ཡོན་ལྔ་ལྡན་མཆོད་པའི་སྤྲིན༔ རྩ་གསུམ་དཔལ་མགོན་སྣང་སྲིད་ལྷ་སྲིན་ཚོགས༔ ཁྱད་པར་ཡ་མཚན་ལྡན་པའི་གནས་ཆེན་པོ༔ འབར་བ་དབང་གི་སྒྲུབ་གནས་མེ་འབར་ཕུག༔ གནམ་གྱི་གོང་བ་ཤར་ནས་ཉི་ཟླས་བརྒྱན༔ ཆབ་ཀྱི་གོང་བ་ནུབ་ནས་ཆུ་བོ་འབབས༔ རི་ཡི་རྒྱལ་པོ་བྲག་དམར་མདའ་སྒྲོའི་དབྱིབས༔ གྲིབ་སོ་གཉིས་ཀྱིས་ཉིན་མཚན་ཆུ་ཚོད་འཛིན༔ རིན་ཆེན་ཐང་བརྡལ་ལྷོ་ནས་འབྲས་དྲུག་སྨིན༔ སྨན་སྤོས་དྲི་བསུང་ལྡན་པའི་ལྗོངས་ཆེན་པོར༔ ཇོ་བོ་ཆེན་པོ་གྲི་བཙན་དགྲ་འཇོམས་དཔལ༔ མཆེད་ཟླ་ལྷ་སྲིན་དགྱེས་སྡེ་ཡུམ་དང་སྲས༔ ལྷ་ཤིང་ཤུག་པའི་དུད་པས་བསང་ངོ་མཆོད༔ དཀར་མངར་གསུར་གྱི་དུད་པས་བརྔན་ནོ་འབུལ༔ ཕུ་ཡི་མཚོ་སྨན་ནག་མོ་འཁོར་བཅས་བསངས༔ དགྱེས་སྡེ་ཡུམ་ཆེན་ཡིན་པས་མངའ་གསོལལོ༔ ཤར་གྱི་རྫོང་བཙན་དམར་པོ་འཁོར་བཅས་བསངས༔ གཡར་དམ་གཅིག་པའི་གྲོགས་པོ་མངའ་གསོལ་ལོ༔ ལྷོ་ཕྱོགས་ཡེ་རིའི་ལྷ་བཙན་འཁོར་བཅས་བསངས༔ སྐུ་ཡི་སྲས་མཆོག་ཡིན་པས་མངའ་གསོལ་ལོ༔ ནུབ་ཀྱི་རྒྱལ་བ་ཐོད་དཀར་འཁོར་བཅས་བསངས༔ ཡིད་ལུས་བསྐྱེད་པའི་ཕ་གཅིག་མངའ་གསོལ་ལོ༔ བྱང་གི་སྨན་མོ་རང་འཚོགས་བཙན་རྒོད་བསངས༔ མཆེད་ཀྱི་སྤུན་ཟླ་ཡིན་པས་མངའ་གསོལ་ལོ༔ ཆུ་དྲོན་གཡུ་ཡི་ཕུག་པའི་ཀླུ་སྨན་བསངས༔ ལྕམ་དྲལ་སྲིང་དུ་གྱུར་པས་མངའ་གསོལ་ལོ༔ མདོ་གསུམ་ཀླུ་བྲག་བཙན་རྒོད་འཁོར་བཅས་བསངས༔ གཉེར་གྱི་ཕྱག་ཚངས་ཡིན་པས་མངའ་གསོལ་ལོ༔ ཡོབ་ཀྱི་རྐྱང་རིའི་བཙན་དམར་འཁོར་བཅས་བསངས༔ བཀའ་ཡི་བློན་པོ་ཡིན་པས་མངའ་གསོལ་ལོ༔ ཟླ་བའི་དམར་པོ་བློན་སྲས་འཁོར་བཅས་བསངས༔ ཕྱུགས་ཀྱི་རྫི་བོ་ཡིན་པས་མངའ་གསོལ་ལོ༔ ནགས་སོག་ཆུ་ཡི་དགེ་བསྙེན་ཆེན་པོ་བསངས༔ ལས་ཀྱི་ཕོ་ཉ་ཡིན་པས་མངའ་གསོལ་ལོ༔ གཞན་ཡང་བསངས་འོས་བརྔན་དང་མཆོད་པར་འོས༔ མ་ལུས་ཐམས་ཅད་བསངས་ཤིང་གསུར་གྱིས་བརྔན༔ ཁྱེད་རྣམས་བསངས་ཤིང་མཆོད་དེ་བརྔན་པའི་མཐུས༔ བསྟན་པ་དར་ཞིང་སེམས་ཅད་སྐྱིད་པ་དང་༔ བདག་ཅག་མི་ནོར་འཁོར་དང་བཅས་པ་ལ༔ སྲུང་སྐྱོབ་མགོན་དང་སྡོང་གྲོགས་འཕྲིན་ལས་སྒྲུབས༔ གཞི་བྱེས་ཀུན་ཏུ་མེལ་ཚེ་བྱ་ར་གྱིས༔ ཕུ་ཡི་གནག་སྐྱོངས་མདའ་ཡི་འབྲས་དྲུག་སྲུངས༔ ཉིན་གྱི་ལྷ་མཛོད་མཚན་གྱི་ཟོ་དོར་གྱིས༔ ཡུལ་ལྷ་གཞི་བདག་མཆོད་དོ་ངོ་མ་ཆུང་༔ རྣལ་འབྱོར་འདོད་པའི་འབྲས་བུ་མཆིས་པར་མཛོད༔ ཅེས་བརྗོད་ཕུད་དང་གཏོར་མ་ཅི་འབྱོར་འབུལ༔ བར་ཆད་སེལ་ཞིང་སྡོང་གྲོགས་བྱེད་པར་འགྱུར༔ དེ་ཕྱིར་མ་འོངས་རྣམས་ཀྱིས་སྤྱོད་མཁས་བྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རྒྱལ་ཁམས་པ་ཉི་མ་གྲགས་པས་ནགས་ཤོད་མེ་འབར་ཕུག་ནས་ཆུ་ཁྱི་ལ་གདན་དྲངས་ཤིང་ས་འབྲུག་ལ་ཤོག་སེར་ལས་བསྒྱུར་བའོ། །མངྒ་ལཾ། །