དབང་གི་སྦྱིན་སྲེག
རྟ་མགྲིན་དྲེགས་པ་ཟིལ་གནོན་གྱི་དབང་གི་སྦྱིན་སྲེག་བཞུགས་སོ། །དཔལ་ཆེན་པོ་དབང་ཆེན་དྲེགས་པ་ཟིལ་གནོན་གྱི་ལྷ་ཚོགས་བརྒྱུད་ལྡན་བླ་མའི་ཚོགས་དང་བཅས་པ་ལ་ཕྱག་འཚལ་ཞིང་སྐྱབས་སུ་མཆིའོ་བྱིན་གྱིས་བརླབ་པར་མཛད་དུ་གསོལ་ལོ། དེ་ཡང་དབང་ཆེན་དྲེགས་པ་ཟིལ་གནོན་གྱི་དཀྱིལ་འཁོར་དུ་དབང་ཐོབ་ཅིང་བསྙེན་སྒྲུབ་དང་ལྡན་པའི་རྣལ་འབྱོར་པས་འགྲོ་དོན་དུ་སེམས་བསྐྱེད་དེ་སྐྱེ་འགྲོ་སེམས་ཅན་ཐམས་ཅད་བསྡུ་བ་རིན་པོ་ཆེ་རྣམ་པ་བཞི་ལ་བརྟེན་ནས་སངས་རྒྱས་ཀྱི་གོ་འཕང་ལ་འགོད་པའི་ཆེད་དུ་ལྷག་པའི་ལྷ་ཆེན་པོ་འདིའི་དབང་གི་སྦྱིན་སྲེག་གི་ཆོ་ག་བྱ་བར་འདོད་པས། དེ་ལ་གསུམ་སྔོན་འགྲོ་དངོས་གཞི་རྗེས་སོ། །དང་པོ་ལ་འབྲིང་པོ་བཞིའི་ཉི་ཤུ་ལ་སོགས་པ་དབང་གི་དུས་ཁྱད་པར་ཅན་ལ་གནས་དབེན་ཞིང་ཡིད་དུ་འོང་བའམ་དབང་གི་ལས་དང་རྗེས་སུ་མཐུན་པའི་གནས་ཉིད་དུ། སྒྲུབ་ཁོག་ཞིག་ནས་འབྱུང་བ་ལྟར་ས་ཆོག་ལེགས་པར་བྱ་བའི་ས་ལ་སྟེགས་བུ་རྒྱར་མདའ་གང་པ་དཔངས་སུ་ཁྲུ་གང་པ་བྱས་པའི་དབུས་སུ་དབང་གི་ཐབ་ཁུང་དམར་པོ་ཟླ་གམ་རྒྱར་ཁྲུ་གང་། དཔངས་སུ་མཐོ་གང་པ་རྐན་གཉེར་རིམ་པ་གསུམ་དང་ལྡན་པའི་ཁ་ཁྱེར་ལ་པདྨའམ་ལྕགས་ཀྱུའི་ཕྲེང་བས་བསྐོར་བ་བརྩིགས། དེའི་ནང་དུ་ལྟེ་བ་ཟླུམ་པོའི་ཕྱི་རིམ་ལ་པདྨ་འདབ་མ་ཉིས་རིམ་མུ་ཁྱུད་ཅན་ལ་ལྷ་རྣམས་ཀྱི་ས་བོན་ནམ་ཕྱག་མཚན་ཚོམ་བུ་ལྷ་མདོག་ཅན་བཀོད་པ་གང་བདེར་བྱས་ལ་ཐབ་ཁུང་གི་ནང་དུ་ཙན་དན་ནམ་མཛོ་མོ་ཤིང་ངམ་ཨ་ཀ་རུ་སོགས་དབང་ལ་ཤིས་པའི་བུད་ཤིང་རྒྱ་ཚོས་སམ་དྲི་བཟང་བཏབ་པས་མདོག་བསྒྱུར་བ་ཟླ་གམ་དུ་བརྩིགས། གཡས་ལོགས་སུ་གོང་དུ་བཤད་པའི་ཤིང་ཟླ་གམ་གྱི་དབྱིབས་སུ་གཞོགས་པ་སོར་བཅུ་གཉིས་པ་སྤོམ་ཕྲ་སྲིན་ལག་གམ་གུང་མོ་ཙམ་བྱས་པ་ལ། བསྒྲུབ་བྱ་དམིགས་བསལ་ཡོད་ན་མིང་རུས་དང་། མེད་ན་སྣང་སྲིད་ཐམས་ཅད་དབང་དུ་སྡུས་ཤིག་ཝ་ཤཾ་ཀུ་རུ་ཡེ་སྭཱ་ཧཱ། ཞེས་རྒྱ་སྐྱེགས་ཀྱི་ཁུ་བས་བྲིས་པ་གྲངས་ལྡན་ལ་བུ་རམ་དང་ཏིལ་མར་གྱིས་བྱུགས་པ། མར་ཁུ། ཏིལ། ཡུངས་ཀར། ཟས་སྣ། དཱུརྦ། འབྲས། སོ་བ། ནས། སྲན་མ། གྲོ། ཀུ་ཤ། ཕྲུམ། འབྲུ་སྣ། དར་སྣ། ཤིང་ཏོག །ཟངས། བྱི་རུ། བུར་སྦྲང་། ཧ་ལོ། ཨུག་ཆོས། གླང་སྣ་དམར་པོ། བཙོད། རྒྱ་སྐྱེགས། དར་ཟབ་དམར་པོའི་རིགས་སོགས་དབང་ལ་འོས་པའི་རྫས་གང་ཚོགས། མར་ལ་གོ་ཡུ་བཏབ་པའི་སོ་རྩི། གོས་ཟུང་རྣམས་དང་། གཡོན་དུ་ཉེར་སྤྱོད་སྨན་རག་གཏོར་མ་རྣམས་ཀྱང་དམར་པོའི་ཚོན་གྱིས་བསྒྱུར་བར་འོས་པ་རྣམས་བསྒྱུར་བ་དང་། མདུན་དུ་རྡོར་དྲིལ། དགང་གཟར་བླུགས། ཀུ་ཤ། ལས་བུམ་སོགས་ཉེ་བར་མཁོ་བ་ཐམས་ཅད་དང་། གཞན་ཡང་དྲེགས་པ་ཟིལ་གནོན་གྱི་མཆོད་གཏོར་ཚོགས་འཁོར་སོགས་ཀྱང་བཟང་ཞིང་གྱ་ནོམ་པ་སྣང་བ་གཡོ་བར་ནུས་པའི་རྔམ་བརྗིད་དང་ལྡན་པའི་ས་རྒྱན་གནམ་རྒྱན་སོགས་བཀོད་པའི་རྟེན་འབྲེལ་རབ་ཏུ་ཕུན་སུམ་ཚོགས་པར་བཤམས་ལ་ལས་གཞུང་བསྲང་ཞིང་བསྙེན་པའི་སྐབས་སུ་ཝ་ཤཾ་ཀུ་རུའི་ཤམ་བུ་ཅན་གྱི་བཟླས་པ་དང་དབང་སྡུད་ཀྱི་དམིགས་པ་དང་ལྡན་པའི་སྒོ་ནས་སྐབས་དང་བསྟུན་ཏེ་བཟླ། ཚོགས་ལྷག་ཡན་སོང་ནས་ལས་བུམ་བསང་བ་ནི། སྟོང་པའི་ངང་ནས་བུམ་པ་ནི། །རིན་པོ་ཆེ་ཡི་གཞལ་ཡས་ཁང་། །མཚན་ཉིད་རྫོགས་པའི་ནང་ཉིད་དུ། དབང་གི་ཁྲོ་བོ་རྟ་མཆོག་དཔལ། །དམར་པོ་རྡོར་དྲིལ་ཡུམ་ལ་འཁྱུད། །རྟ་མགོས་མཚན་ཞིང་ཁྲོ་ཆས་རྫོགས། །སྐུ་ལས་སྤྲུལ་པའི་ཁྲོ་ཆུང་གིས། །གདོན་བགེགས་བཅོམ་ནས་བུམ་པའི་ཆུར། །ཐིམ་པས་བུམ་ཆུ་ནུས་ལྡན་གྱུར། །ཨཱོཾ་བཛྲ་ཀྲོ་ཏ་ཧྱ་གྷྲཱྀ་ཝ་ཧཱུྃ་ཕཊ༔ གང་མང་བཟླས་རྗེས། །ཁྲོ་བོ་ཞུ་ནས་བུམ་ཆུར་འདྲེས། །ལས་ཀུན་བསྒྲུབ་པའི་བདུད་རྩིར་གྱུར། །དེ་ནས་སྒྲུབ་པ་པོ་དམར་པོའི་ཆས་གོས་དང་རྒྱན་གྱིས་བརྒྱན་ཏེ་བརྗིད་ཤིང་སྒེག་པའི་ཆ་ལུགས་དང་ལྡན་པས་མེ་ཐབ་བསྐོར་ཏེ། རོལ་མོ་རྣམས་སྦིར་ཞིང་། རང་ཉིད་རྟ་མཆོག་དབང་གི་རྒྱལ་པོ་གསལ་བའི་སྐུ་ལས་སྤྲོས་པའི་མེ་དཔུང་དང་མཚོན་ཆའི་ཚོགས་ཀྱིས་གདོན་བགེགས་འབྱུང་པོ་ཐམས་ཅད་ཐལ་བར་བརླགས་ཤིང་སྟེང་འོག་ཕྱོགས་མཚམས་ཐམས་ཅད་ཁྲོ་ཆུང་མཚོན་ཆ་ཐོགས་པ་དང་། དམར་ནག་མེ་དཔུང་འཁྱིལ་བའི་བསྲུང་བའི་འཁོར་ལོར་གྱུར་པར་བསམས་ཤིང་། ཧཱུྃ། རིགས་འདུས་དབང་གི་ཕོ་བྲང་འདིར། །འབྱུང་བ་མེ་ཡི་མཆོད་སྤྲིན་གྱི། །གསང་བ་མཆོག་ཏུ་བསྒྲུབས་པ་ལ། །ཉན་དང་ལྟ་བར་མི་དབང་པའི། །གདོན་བགེགས་འབྱུང་པོ་གཞན་དུ་སོང་། །བཀའ་དང་དམ་ལ་འདའ་བྱེད་ན། །རྟ་མཆོག་རྒྱལ་པོ་ཐུགས་ཁྲོས་ནས། །གཏུམ་པའི་ཁྲོ་མོས་བགེགས་དཔུང་འཇོམས། །འབར་བའི་མེ་ཡིས་གཟུགས་ཕུང་བསྲེགས། །རྣོ་དབལ་མཚོན་ཆས་དུམ་བུར་གཏོང་། །ཡེ་ཤེས་རྡོ་རྗེས་མགོ་བོ་འགེམས། །དེ་བས་མ་འདུག་གཞན་དུ་སོང་། །ཨཱོཾ་སུམ་བྷཱ་ནི་སོགས་བརྗོད། ཧཱུྃ། སྟེང་ནི་མེ་ཡི་བླ་རེ་ལ། །འོག་ནི་འབར་བའི་ཕྲེང་བས་འཁྲིགས། །ཕྱོགས་མཚམས་ཀུན་ཀྱང་མེ་རིའི་གུར། །བར་སྣང་མེ་ཡི་སྤྲིན་ཕུང་གཏིབས། །གཞན་དུ་མེ་ཡི་ཚ་ཚ་འཕྲོ། །མེ་སྒྲ་འུར་འུར་ཆེམས་ཆེམས་ལྡིར། །འབར་བ་མེ་ཡི་གུར་ཁང་ལ། །སྲིད་ཞི་སུས་ཀྱང་མི་ཚུགས་པའི། །མཚམས་ཀྱི་དཀྱིལ་འཁོར་གཞོམ་དུ་མེད། ཨཱོཾ་བཛྲ་རཀྵ་ཛཱ་ལ་རཾ་རཾ། ཞེས་བསྒོ་ཞིང་གྲལ་དུ་འཁོད་ལ། ལས་བུམ་གྱི་ཆུས་རྫས་རྣམས་ལ་འཐོར་ཞིང་། ཨཱོཾ་བཛྲ་ཀྲོ་ཏ་ཧྱ་གྷྲཱྀ་ཝ་ཧཱུྃ་ཕཊཿཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་པྃ་ལས་པདྨ་འབར་བའི་སྣོད་ཡངས་ཤིང་རྒྱ་ཆེ་བའི་ནང་དུ་མཆོད་རྫས་དང་སྲེག་རྫས་ཀྱི་དངོས་པོ་རྣམས་ཟག་མེད་ཀྱི་བདུད་རྩི་ལ་རྣམ་པ་སོ་སོའི་མཚན་ཉིད་མ་འདྲེས་པར་གསལ་ལ་རྫོགས་པ་ཆགས་ལྡན་སྙིང་རྩ་འདར་ཞིང་རྒྱལ་བའི་བསམ་གཏན་གཡོ་བར་ནུས་པའི་རྒྱལ་སྲིད་རིན་ཆེན་བཀྲ་ཤིས་རྫས་རྟགས་འདོད་ཡོན་ཉེར་སྤྱོད་སོགས་མཆོད་པའི་སྤྲིན་གྱི་ཕུང་པོ་མ་ཚངས་པའི་དངོས་པོ་མེད་པས་ནམ་མཁའ་ས་གཞི་བར་སྣང་ཐམས་ཅད་ཁེངས་པར་གྱུར་པར་བསམས་ལ། ཨཱོཾ་ཨཱཿཧཱུྃ་སརྦ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་ཧྲཱིཿཐཱ༔ གསུམ་མམ་བདུན་གྱིས་བྱིན་གྱིས་བརླབས། དེ་ནས་རྗེའུ་རིགས་སམ་སྨད་འཚོང་མ་ལས་བླངས་པའི་མེ་སྤར་ལ་རླུང་གཡབ་ཀྱིས་གཡབ་ཅིང་། རཾ། སྤྱི་མཐུན་ལས་ཀྱི་བསོད་ནམས་དང་། །རྒྱལ་བའི་ཐུགས་བསྐྱེད་ལས་གྲུབ་པའི། །ལྗོན་ཤིང་ནགས་ཚལ་བསྲུང་བ་ཡི། །ཤིང་གི་ལྷ་མོས་ཤིང་ཐུས་ལ། །སྐྱེ་དགུ་ཀུན་གྱི་སྲོག་འཛིན་ཅིང་། །སྣང་བ་རབ་ཏུ་གསལ་བའི་སྒྲོན། །མེ་ཡི་ལྷ་མོ་སྲེག་བྱེད་མས། །མེ་ལྷའི་ཡུལ་ནས་མེ་སྤོར་ཞིག །འོག་གཞི་རྗོ་རྗེ་རྒྱ་གྲམ་གྱི། །ཡང་ཞིང་གཡོ་བའི་བ་དན་འཛིན། །འབྱུང་བ་རླུང་ལ་མངའ་མཛད་མས། །རླུང་ལྷའི་ཡུལ་ནས་རླུང་གཡོབས་ཤིག །ཨཱོཾ་ཨགྣཱེ་ཡེ་སྭཱ་ཧཱ༔ ཅེས་སྔགས་བདུན་དང་མར་ཁུ་དགང་བླུགས་བདུན་གྱིས་གསོ། དེ་ནས་ཐབ་ཀྱི་ཁ་ཁྱེར་ལ་ཀུ་ཤ་དཀྲམ་ཞིང་། ཧཱུྃ། གཙང་ཞིང་དགེ་བ་ཀུ་ཤའི་རྩྭ། །རྒྱལ་བས་བྱང་ཆུབ་བརྙེས་པའི་གདན། །དག་ཅིང་ཚངས་པའི་རྫས་མཆོག་འདིས། །བགེགས་རྣམས་ཞི་ཞིང་ཤིས་པར་མཛོད། ཨཱོཾ་བཛྲ་ས་ཏྭ་ཨཱ༔ ཞེས་བཀྲམ་མོ། དེ་ནས་དངོས་གཞི་ལ་གཉིས། འཇིག་རྟེན་པའི་མེ་ལྷ་མཆོད་པ་ནི། ལས་བུམ་གྱི་ཆུས་མེ་ཐབ་ལ་འཐོར་ཞིང་བསང་སྦྱངས། མེ་ཐབ་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་འབར་བའི་ཐབ་ཁུང་ཟླ་གམ་དམར་པོ་ཡངས་ཤིང་རྒྱ་ཆེ་བ་རྐན་གཉེར་རིམ་པ་གསུམ་དང་ལྡན་ཞིང་ཁ་ཁྱེར་ལ་ལྕགས་ཀྱུ་དམར་པོའི་ཕྲེང་བས་བསྐོར་བ། ཟླ་གམ་དབང་གི་གཞལ་ཡས་ཁང་གི་བཀོད་པ་ཐམས་ཅད་རྫོགས་པ། དེ་དག་གི་དབུས་སུ་པད་ཉིའི་གདན་ལ་རཾ་ཡིག་དམར་པོ་ཡོངས་སུ་གྱུར་པ་ལས་མེ་ལྷ་དམར་པོ་ཞལ་གཅིག་ཕྱག་གཉིས་པ་ཕྱག་གཡས་མེ་ཡི་འཁོར་ལོ་དང་གཡོན་པས་རླུང་གི་འཁོར་ལོ་བསྣམས་པ་ར་སྐྱེས་ཁམ་པ་འཇའ་འོད་དང་གློག་གི་ཕྲེང་བའི་གོང་རྨེད་དང་སྲབ་མཐུར་ཅན་ལ་ཆིབས་པ། རིན་པོ་ཆེ་སྣ་ཚོགས་པ་དང་པདྨའི་ཕྲེང་བས་བརྒྱན་ཞིང་ཞི་འཛུམ་སྒེག་པའི་ཉམས་དང་ལྡན་པ། དེའི་སྤྱི་བོར་ཨཱོཾ་མགྲིན་པར་ཨཱཿཐུགས་ཀར་ཧཱུྃ་གི་ཁོང་གསེང་དུ་ཐུགས་སྲོག་རཾ་གྱིས་མཚན་པ། དེ་ལས་འོད་ཟེར་འཕྲོས་པས་བསྒོམ་པ་དང་འདྲ་བའི་ཡེ་ཤེས་པ་སྤྱན་དྲངས། སྤྱན་འདྲེན་ནི། ཧཱུྃ། དད་པས་སྤྱན་འདྲེན་དྲང་སྲོང་ཆེ། །དམ་ཚིག་དབང་གིས་ད་ཚུར་སྤྱོན། །ཁམས་གསུམ་སྲིད་གསུམ་དབང་བསྡུད་ཕྱིར། །དྲང་སྲོང་ཆེན་པོ་གཤེགས་སུ་གསོལ། །ཨཱོཾ་ཨགྣཱེ་ཡེ་ཛཿཧཱུྃ་བཾ་ཧོ༔ བཛྲ་ས་མ་ཡ་ཛཿཛ༔ བཞུགས་སུ་གསོལ་བ་ནི། ཧཱུྃ། དྲང་སྲོང་ཆེན་པོ་འཕྲིན་ལས་བདག །འདོད་པའི་དངོས་གྲུབ་སྤེལ་བའི་ལྷ། །དེང་གི་གནས་མཆོག་དམ་པ་འདིར། །འབར་བའི་གདན་ལ་བཞུགས་སུ་གསོལ། །ཨཱོཾ་ཨགྣཱེ་ཡེ་བཛྲ་ས་མ་ཡ་ཏིཥྛ་ལྷན། ཕྱག་ནི། ཧཱུྃ། མེ་ཡི་ལྷ་སྟེ་དྲང་སྲོང་ཆེ། །ལས་བཞིའི་འཕྲིན་ལས་སྩོལ་བའི་ལྷ། །མཐུ་སྟོབས་རྫུ་འཕྲུལ་བསམ་མི་ཁྱབ། །འབར་བ་ཁྱོད་ལ་ཕྱག་འཚལ་ལོ། །ཨཱོཾ་ཨགྣཱེ་ཡེ་ས་མ་ཡ་ཨ་ཏི་པུ་ཧོ༔ མཆོད་པ་ནི། ཧཱུྃ། སྟོང་གསུམ་འཇིག་རྟེན་རབ་འབྱམས་ན། །ཕྱི་ནང་གསང་བའི་མཆོད་པའི་ཚོགས། །དངོས་བཤམས་ཡིད་ཀྱིས་རྣམ་སྤྲུལ་ཏེ། །སྲེག་བྱེད་མེ་ཡི་ལྷ་ལ་འབུལ། །ཨཱོཾ་ཨགྣཱེ་ཡེ་སརྦ་པཱུ་ཙ་ཧོ༔ ཧཱུྃ། དྲང་སྲོང་ཆེན་པོ་འཁོར་འདས་ལ། །དངོས་གྲུབ་མྱུར་དུ་སྩོལ་བའི་ཕྱིར། །སྨན་གཏོར་རཀྟའི་མཆོད་པ་འབུལ། །བཞེས་ནས་དངོས་གྲུབ་སྩལ་དུ་གསོལ། ཨཱོཾ་ཨགྣཱེ་ཡེ་མ་ཧཱ་པཉྩ་རཀྟ་བ་ལིངྟ་པཱུ་ཙ་ཁཱ་ཧི། བསྟོད་པ་ནི། ཧཱུྃ། གཟི་བརྗིད་འབར་བ་མེ་ཡི་ལྷ། །ཚངས་པ་འཇིག་རྟེན་དབང་པོའི་སྲས། །འཕྲིན་ལས་མ་ལུས་ཀུན་གྱི་བདག །འབར་བ་ཁྱོད་ལ་ཕྱག་འཚལ་བསྟོད། །བྱོན་སྐྱེམས་ནི། མེ་ལྷའི་ལྗགས་པདྨ་འདབ་མ་བརྒྱད་པའི་ལྟེ་བར་རཾ་དང་། དགང་བླུགས་ཀྱི་རྩེར་ཧཱུྃ་ཡིག་གིས་མཚན་པར་གྱུར་པར་བསམས་ཤིང་། ཧཱུྃ། འབྲུ་མར་རྩི་མར་བཅུད་ལྡན་སྲེག་པའི་རྫས། །དམ་རྫས་བདུད་རྩིའི་མཆོད་པ་བླ་མེད་འདི། །དྲང་སྲོང་ཆེན་པོ་མེ་ཡི་ལྷ་ལ་འབུལ། །བདག་གི་འདོད་དོན་འཕྲིན་ལས་གྲུབ་པར་མཛོད། །ཨཱོཾ་ཨགྣཱེ་ཡེ་སྭཱ་ཧཱ། ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱྀ་ཧ་བྱ་ཀ་བྱ་བཱ་ཧ་ན་ཡེ་ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤཾ་ཀུ་རུ་ཡེ་སྭཱ་ཧཱ། ཞེས་བདུན་འབུལ། ཡམ་ཤིང་ལ། ཨཱོཾ་བོ་དྷི་བྲྀཀྵ་ཡེ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། མར་ཁུ་ལ། ཨཱོཾ་ཨགྣཱེ་ཡེ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། ཏིལ་ལ། ཨཱོཾ་སརྦ་པཱ་པཾ་ད་ཧ་ན་བཛྲ་ཡ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། ཡུངས་ཀར་ལ། ཨཱོཾ་སརྦ་ཨཪྠ་ས་དྷཱ་ཡ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། ཟས་སྣ་ལ། ཨཱོཾ་སརྦ་སཾ་བྷ་དེ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། དཱུརྦ་ལ། ཨཱོཾ་བཛྲ་ཨཱ་ཡུ་ཥེ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། འབྲས་ལ། ཨཱོཾ་བཛྲ་པུཥྟཱ་ཡེ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། སོ་བ་ལ། ཨཱོཾ་བཛྲ་བི་ཛཱ་ཡ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། ནས་ལ། ཨཱོཾ་མ་ཧཱ་བེ་གྷཱ་ཡ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། སྲན་མ་ལ། ཨཱོཾ་བཛྲ་མ་ཧཱ་བ་ལཱ་ཡ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། གྲོ་ལ། ཨཱོཾ་བཛྲ་གྷསྨ་རེ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། ཀུ་ཤ་ལ། ཨཱོཾ་ཨ་པྲ་ཏི་ཧ་ཏ་བཛྲ་ཡ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། ཕྲུམ་ལ། ཨཱོཾ་ཨཱཿསྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། འབྲུ་སྣ་ལ། ཨཱོཾ་ཛྲིཾ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། ཤིང་ཏོག་ལ། ཨཱོཾ་བཛྲ་ཤྲཱི་བཱ་ཡ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། དར་སྣ་ལ། ཨཱོཾ་བཛྲ་ཝསྟྲ་ཡེ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། སྲེག་རྫས་སྔགས་མེད་པའི་རིགས་ཐམས་ཅད་ལ། ཨཱོཾ་ཀུ་རུ་ཀུ་རུ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། ཧཱུྃ། འབར་བ་མེ་ཡི་ལྷ་ཚོགས་ལ། །ཕྱི་ནང་གསང་བ་སྨན་རག་དང་། །དམ་རྫས་གཏོར་མའི་མཆོད་པ་སོགས། །རབ་འབྱམས་མཆོད་སྤྲིན་རྒྱ་མཚོས་མཆོད། །ཨཱོཾ་ཨགྣཱེ་ཡེ་ས་པ་རི་ཝཱ་ར་སརྦ་པཱུ་ཙ་ཧོཿས་མཆོད། ཧཱུྃ། འབར་བ་མེ་ཡི་ཀློང་ཡངས་ནས། །གཟི་བརྗིད་འབར་ཞིང་འཕྲིན་ལས་མཛད། །རྩལ་ལྡན་ར་སྐྱེས་སྟེང་ནས་བརྗིད། །འབར་བའི་དཔའ་བོ་ཁྱོད་ལ་བསྟོད། །ཞེས་བསྟོད། ཧཱུྃ། ཨགྣཱི་རཱ་ཛ་མེ་ཡི་ལྷས། །རྫས་རྣམས་ལྷག་པའི་ལྷར་འབུལ་ཞིང་། །མེ་ཡང་ཡེ་ཤེས་མེར་མཛད་ནས། །སྣང་བ་དབང་དུ་བསྡུ་བར་མཛོད། །ཅེས་འཕྲིན་ལས་བཅོལ། བཛྲ་མུཿས་མེ་ལྷའི་ཡེ་ཤེས་པ་ཐབ་ཀྱི་ཤར་ལྷོར་གཤེགས་ནས་མཆོད་བསྟོད་འཕྲིན་ལས་ཀྱི་དཔང་པོ་མཛད་པར་གྱུར། གཉིས་པ་ཡེ་ཤེས་པའི་མེ་ལྷ་མཆོད་པ་ནི། དམ་ཚིག་མེ་ལྷའི་ལྟོ་བ་ཟབ་ཅིང་ཡངས། །རབ་འབྱམས་ཆོས་ཀྱི་དབྱིངས་དང་མཉམ་པའི་ནང་། །བྷྲཱུྃ་འཕྲོས་དབང་དྲག་རོལ་པའི་གཞལ་ཡས་ཁང་༔ ཞེས་པ་ནས། བཀའ་སྲུང་དམ་ཅན་རྒྱ་མཚོར་ཕྱག་འཚལ་བསྟོད༔ ཅེས་པའི་བར་ལས་བྱང་བཞིན་ཚར་རྗེས། དེ་ལྟར་མཆོད་ཅིང་བསྟོད་པས་ལྷ་ཚོགས་རྣམས་ཀྱང་བརྩེ་བའི་ཐུགས་རྗེ་ཆེན་པོས་འགྲོ་བ་ཡོངས་ལ་རྗེས་སུ་ཆགས་པའི་སྐུ་མདོག་པདྨ་རཱ་གའི་ལྷུན་པོ་ལྟར་དམར་ཞིང་འཚེར་བའི་སྐུའི་གཟི་བརྗིད་ཀྱིས་བརྟན་གཡོ་ཐམས་ཅད་དབང་མེད་དུ་འགུགས་པར་ནུས་པའི་མཐུ་དང་ལྡན་པར་གྱུར། ལྷ་རྣམས་ཀྱི་ལྗགས་པདྨ་དམར་པོ་འདབ་མ་བརྒྱད་པའི་ལྟེ་བར་རཾ་དང་དགང་བླུགས་ཀྱི་ཁར་ཧཱུྃ་དམར་པོ་འོད་དང་ལྡན་པས་མཚན་པར་གྱུར་པར་བསམས་ལ། ཧཱུྃ། འབྲུ་མར་རྩི་མར་བཅུད་ལྡན་བསྲེགས་པའི་རྫས། །དམ་རྫས་བདུད་རྩིའི་མཆོད་པ་དམ་པ་འདི། །མེ་ལྷ་རྩ་གསུམ་རྒྱ་མཚོའི་ཚོགས་ལ་འབུལ། བདག་གི་འདོད་དོན་འཕྲིན་ལས་བསྒྲུབ་པར་མཛོད། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ༔ ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ན་ཡེ་སྭཱ་ཧཱ། ཞེས་སམ། ཨཱོཾ་ཨགྣཱེ་ཡེ་སྭཱ་ཧཱ། ཞེས་པ་གཉིས་ཀའམ་གང་རུང་རྩ་སྔགས་དང་སྦྲེལ་བ་བདུན་གྱིས་འབུལ། དེ་ནས་ཡམ་ཤིང་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ༔ ཨཱོཾ་བོ་དྷི་བྲིཀྵ་ཡེ་སྭཱ་ཧཱ། ཁམསགསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། ཧཱ། མར་ཁུ་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ༔ ཨཱོཾ་ཨགྣཱེ་ཡེ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། ཏིལ་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ། ཨཱོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ ཡུངས་ཀར་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ༔ ཨཱོཾ་སརྦ་ཨཪྠ་ས་དྷཱ་ཡ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། ཟས་སྣ་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ། ཨཱོཾ་སརྦ་སཾ་བྷ་དེ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། དཱུརྦ་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ། ཨཱོཾ་བཛྲ་ཨཱ་ཡུ་ཥེ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིང་ཝ་ཤང་ཀུ་རུ་ཡེ་སྭཱ་ཧཱ། འབྲས་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ། ཨཱོཾ་བཛྲ་པཥྟཱ་ཡེ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། སོ་བ་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ། ཨཱོཾ་བཛྲ་བི་ཛཱ་ཡེ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ ནས་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ༔ ཨཱོཾ་མ་ཧཱ་བེ་གྷཱ་ཡེ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། སྲན་མ་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ། ཨཱོཾ་བཛྲ་མ་ཧཱ་བ་ལཱ་ཡ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། གྲོ་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ། ཨཱོཾ་བཛྲ་གྷསྨ་ཡེ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། ཀུ་ཤ་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ། ཨཱོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། ཕྲུམ་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ༔ ཨཱོཾ་ཨཱཿསྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། འབྲུ་སྣ་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ༔ ཨཱོཾ་ཛྲིཾ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། ཤིང་ཏོག་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ༔ ཨཱོཾ་བཛྲ་ཤྲི་བཱ་ཡ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། དར་སྣ་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ༔ ཨཱོཾ་བཛྲ་ཝསྟྲ་ཡེ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། སྲེག་རྫས་སྔགས་མེད་པའི་རིགས་ཐམས་ཅད་ལ། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ༔ ཨཱོཾ་ཀུ་རུ་ཀུ་རུ་སྭཱ་ཧཱ། ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ། སླར་བྱོན་སྐྱེམས་ལྟར་གཤེགས་སྐྱེམས་ཀྱང་། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་སརྦ་སིདྡྷི་ཧཱུྃ་ཕཊ༔ ཨཱོཾ་ཨགྣཱེ་ཡེ་སྭཱ་ཧཱ། ཞེས་འབུལ། ཧྲཱི༔ དབང་མཛད་དབང་གི་ལྷ་ཚོགས་ལ། །ཕྱི་ནང་གསང་བའི་མཆོད་པ་དང་། །སྨན་རག་གཏོར་སོགས་འཇིག་རྟེན་གྱི། མཆོད་པའི་རྫས་ཀུན་ཡོངས་སུ་འབུལ། །ཨཱོཾ་ཧྱ་གྷྲཱི་ཝ་དྷཀྐི་ནི་ས་པ་རི་ཝཱ་ར་ཨརྒྷཾ་སོགས་ནས། ཤཔྟ་པཉྩ་ཨ་མྲྀ་ཏ་རཀྟ་བཱ་ལིངྟ་པཱུ་ཙ་ཁཱ་ཧིས་མཆོད། ཨཱོཾ་བཛྲ་ཏམྦུ་ལཱ་ཡེ་སྭཱ་ཧཱས་སོ་རྩི་དང་། ཨཱོཾ་བཛྲ་ཝསྟྲ་ཡེ་སྭཱ་ཧཱས་གོས་ཟུང་འབུལ་ཞིང་། ཧཱུྃ་ཧྲཱི༔ འོག་མིན་གསང་ཆེན་རོལ་པའི་མཁའ་དབྱིང་ནས༔ ཞེས་པ་ནས་བཀའ་སྲུང་དམ་ཅན་རྒྱ་མཚོར་ཕྱག་འཚལ་བསྟོད། ཞེས་པའི་བར་ལས་བྱང་བཞིན། དེ་ནས་འཕྲིན་ལས་བཅོལ་བ་ནི། ཧོ༔ དུས་གསུམ་སངས་རྒྱས་ཀུན་གྱི་སྤྱི་གཟུགས། རིགས་དང་དཀྱིལ་འཁོར་ཀུན་གྱི་ཁྱབ་བདག །དཔལ་ཆེན་ཁྲོ་བོ་ཀུན་གྱི་སྤྱི་དཔལ། དམ་ཅན་རྒྱ་མཚོའི་ཚོགས་ཀྱི་ཡང་རྗེ། འཁོར་འདས་ཀུན་གྱི་སྤྱི་དཔལ་ཆེན་པོ་རྟ་མཆོག་དབང་གི་རྒྱལ་པོ་ཆེན་པོ་དཔལ་དྲེགས་པ་ཟིལ་གནོན། རིགས་བདག་ཆགས་པ་དམར་པོ། དྲིན་ཅན་རྩ་བརྒྱུད་ཀྱི་བླ་མ། འཇིགས་བྱེད་བྱ་ཁྱུང་རྒྱལ་པོ། རིགས་ལྔའི་རྟ་ཕག་ཡབ་ཡུམ། གནོན་སྦྱིན་བཛྲ་པཱ་ཎི། ལྷ་ཆེན་གུ་ལང་ནག་པོ། ཡུམ་མཆོག་ཨུ་མ་དྲག་མོ། སྲས་མཆོག་སྲིན་པོ་ཟངས་མཆེ། སྲོག་བདག་ཚངས་པ་དཀར་པོ། གཤིན་རྗེ་ཡ་མ་རཱ་ཛ། བཙན་རྒོད་ཡམ་ཤུད་དམར་པོ། འཆི་བདག་རལ་པ་ཚར་དགུ། ཀླུ་བདུད་ནཱ་ག་རཀྴ། གཟའ་རྒོད་ཁྱབ་མཇུག་ཆེན་པོ། དམ་ཅན་མགར་བ་ནག་པོ། མ་བདུད་ནག་མོ་རེ་ཏཱི། ཕྱི་ནང་གསང་བའི་སྡེ་བརྒྱད། དཔལ་མགོན་དམ་ཅན་སྲུང་མ། རྒྱལ་ཆེན་ལས་བྱེད་བྲན་གཡོག་སྐུ་འཁོར་དང་བཅས་པ་རྣམས་དང་། ཁྱད་པར་དུ་བཀའ་སྲུང་ལི་བྱིན་སྐུ་ལྔ། གཏེར་སྲུང་གྲི་བཙན་དམར་པོ་རོལ་པ་སྐྱ་བདུན་དང་བཅས་པ་ཁྱེད་རྣམས་ལ་སྲེག་བྱེད་མེའི་མཆོད་པས་མཉེས་པར་བྱས་ཏེ་འདོད་དོན་གྱི་འཕྲིན་ལས་གསོལ་བ་ནི། ཟག་མེད་མྱ་ངན་ལས་འདས་པའི་ཐུགས་རྗེ་དང་འཕྲིན་ལས་ཐམས་ཅད་བླ་ན་མེད་པའི་ཐུགས་རྗེའི་ཤུགས་ཀྱིས་དབང་དུ་བསྡུས་ནས་བདག་ལ་རྫོགས་པར་མཛད་དེ་ཚེ་འདི་ཉིད་དུ་མངོན་པར་བྱང་ཆུབ་པར་མཛད་དུ་གསོལ། ཚངས་དབང་བརྒྱ་བྱིན་རྒྱལ་ཆེན་བཞི་དང་འཁོར་ལོས་སྒྱུར་བའི་རྒྱལ་པོ་ལ་སོགས་ཟག་བཅས་འཁོར་བ་པའི་དཔལ་ཐམས་ཅད་དབང་དུ་སྡུས་ནས་བདག་ལ་སྩལ་ཏེ་སྲིད་པའི་ཁམས་འདིར་དེང་ནས་བཟུང་སྟེ་བྱང་ཆུབ་ཀྱི་བར་དུ་མངོན་པར་མཐོ་བར་མཛད་དུ་གསོལ། འཇིག་རྟེན་ཁམས་ཀྱི་རྒྱལ་བློན་ཆེ་བཙུན་ཁ་དྲག་མོ་བཙུན་འབངས་དང་བཅས་པ་ཐམས་ཅད་རྗེས་ཆགས་སྙིང་རྗེའི་སྟོབས་ཀྱིས་དབང་དུ་བསྡུས་ལ་བྱང་ཆུབ་ཆེན་པོར་འགོད་པར་མཛད་དུ་གསོལ། སྲིད་པ་གསུམ་གྱི་དཔལ་འབྱོར་ལོངས་སྤྱོད་རིན་ཆེན་དར་ཟབ་འབྲུ་སྨན་རྐང་འགྲོ་སོགས་འབྱོར་བའི་དཔལ་ཐམས་ཅད་དབང་དུ་སྡུས་ལ་བསོད་ནམས་ཀྱི་ཚོགས་ཡོངས་སུ་རྫོགས་པར་མཛད་དུ་གསོལ། འཁོར་འདས་ཀུན་གྱི་ཚེ་དཔལ་དང་འབྱོར་བ་ཐམས་ཅད་དབང་དུ་སྡུས་ལ་སྲིད་ཞིའི་ཕུན་ཚོགས་ཐམས་ཅད་རབ་ཏུ་འཕེལ་ཞིང་རྒྱས་པར་མཛད་དུ་གསོལ། ཞེས་གསོལ་ཞིང་དངོས་གྲུབ་བླང་བ་ལ་རྟེན་ཅིང་འབྲེལ་འབྱུང་བཟང་བའི་ཟས་ཀྱི་དངོས་པོ་སྣ་ཚོགས་པ་བཏེག་ལ། ཧཱུྃ་ཧྲཱི༔ དགོངས་ཤིག་ཐུགས་རྗེ་ཆེ་མངའ་བཅོམ་ལྡན་འདས༔ འཕགས་མཆོག་དབང་གི་ལྷ་ཚོགས་དགོངས་སུ་གསོལ༔ བསྐལ་པའི་མེ་ལྟར་འབར་བའི་ཀློང་དཀྱིལ་ནས༔ རྟ་གདོང་དྲག་པོར་ཁྲོས་པ་དྲེགས་པའི་གཤེད༔ སྙིང་རྗེ་ཆེན་པོའི་དབང་ཕྱུག་ཧེ་རུ་ཀ༔ གསང་སྔགས་དབང་ནོས་འདའ་ཀ་ཁས་བླངས་ཀྱང་༔ ཤེས་རབ་ཟབ་མོའི་འབད་པ་རྔོ་མ་ཐོགས༔ ལྟ་སྒོམ་སྤྱོད་གསུམ་འགལ་གྱུར་ཉམས་ཆགས་བཤགས༔ ཚངས་པར་སྩལ་ནས་མཆོག་དང་ཐུན་མོང་དཔལ༔ དབང་བཞིའི་ཡེ་ཤེས་སྐུ་བཞིར་མངོན་གྱུར་སྩོལ༔ ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་དྷཀྐི་ནི་བྷ་ར་ཧི་ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཧཱུྃ༔ བདུན་བརྗོད་དམིགས་པ་གནད་དུ་གཟིར་ཏེ་དབང་བཞི་ལེན་པར་བྱའོ། །རྫས་དངོས་གྲུབ་ཏུ་རོལ། ཡི་གེ་བརྒྱ་པས་ལྷག་ཆད་བསྐང་ཞིང་། མ་འབྱོར་པ་དང་ཉམས་པ་དང་། །སོགས་ཀྱིས་ནོངས་པ་བཟོད་པར་གསོལ། ཧཱུྃ་ཧྲཱི༔ རྟོག་མེད་དབྱིངས་ལས་ཤར་བའི་གཙོ་དང་འཁོར། ནས་སླར་ཡང་བདག་ཅག་རྗེས་མཐུན་དངོས་གྲུབ་སྩོལ༔ ཅེས་ཡེ་ཤེས་པ་གཤེགས། དམ་ཚིག་པ་རང་ལ་བསྡུ་བ་ནི། ཧཱུྃ་ཧྲཱི༔ གསང་ཆེན་རོལ་པའི་དུར་ཁྲོད་གཞལ་ཡས་ཁང་༔ ཞེས་པ་ནས། མངོན་རྫོགས་བརྗོད་མེད་ཟང་ཐལ་སྤྲོས་དང་བྲལ༔ སླར་ཡང་འཇིག་རྟེན་པའི་མེ་ལྷ་ཐབ་ཀྱི་ཤར་ལྷོར་དཔང་པོ་བཞུགས་པ་བཛྲ་ས་མཱ་ཛ༔ དམ་ཚིག་པ་དང་གཉིས་སུ་མེད་པར་གྱུར་པ་ལ། ཨརྒྷཾ་སོགས་ཀྱིས་མཆོད་ཅིང་། ཧཱུྃ། བསྲེག་པའི་རེག་བྱ་ཚ་བའི་ཀློང་། །འབར་བའི་ནུས་པས་སྲིད་གསུམ་གྱི། །ལོག་པར་འདྲེན་པ་ཀུན་སྲེག་པའི། །ལྷ་ཡི་ལྷ་མཆོག་ཁྱོད་ལ་བསྟོད། །དེ་ནས། ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ནེ་ཡེ་སྭཱ་ཧཱ། ཨཱོཾ་ཨགྣཱེ་ཡེ་སྭཱ་ཧཱ། ཞེས་འབུལ། ཨཱོཾ་བོ་དྷི་བྲིཀྵ་ཡེ་སྭཱ་ཧཱ། ཡམ་ཤིང་གིའོ། །ཨཱོཾ་ཨགྣཱེ་ཡེ་སྭཱ་ཧཱ། མར་ཁུའོ། །ཨཱོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། ཏིལ་གྱིའོ། །ཨཱོཾ་སརྦ་ཨཪྠ་ས་དྷཱ་ཡ་སྭཱ་ཧཱ། ཡངས་ཀར་གྱིའོ། །ཨཱོཾ་སརྦ་སཾ་བྷ་དེ་སྭཱ་ཧཱ། ཟས་སྣའོ། །ཨཱོཾ་བཛྲ་ཨཱ་ཡུ་ཥེ་སྭཱ་ཧཱ། དཱུརྦའོ། །ཨཱོཾ་བཛྲ་པུཥྟཱ་ཡེ་སྭཱ་ཧཱ། འབྲས་ཀྱིའོ། །ཨཱོཾ་བཛྲ་བི་ཛཱ་ཡ་སྭཱ་ཧཱ། སོ་བ་ལའོ། །ཨཱོཾ་མ་ཧཱ་བེ་གྷཱ་ཡ་སྭཱ་ཧཱ། ནས་ཀྱིའོ། །ཨཱོཾ་བཛྲ་མ་ཧཱ་བ་ལཱ་ཡ་སྭཱ་ཧཱ། སྲན་མའོ། །ཨཱོཾ་བཛྲ་གྷསྨ་རེ་སྭཱ་ཧཱ། གྲོའོ། །ཨཱོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། ཀུ་ཤའོ། །ཨཱོཾ་ཨཱཿསྭཱ་ཧཱ། ཕྲུམ་གྱིའོ། །ཨཱོཾ་ཛྲིཾ་སྭཱ་ཧཱ། འབྲུ་སྣའོ། །ཨཱོཾ་བཛྲ་ཤྲཱི་བཱ་ཡ་སྭཱ་ཧཱ། ཤིང་ཏོག་གོ། ཨཱོཾ་བཛྲ་ཝསྟྲ་ཡེ་སྭཱ་ཧཱ། དར་སྣའོ། །ཨཱོཾ་ཀུ་རུ་ཀུ་རུ་སྭཱ་ཧཱ། སྲེག་རྫས་སྔགས་མེད་པའི་རིགས་ཐམས་ཅད་ཀྱིའོ། །ཨཱོཾ་བཛྲ་ཏམྦུ་ལ་ཡེ་སྭཱ་ཧཱ། སོ་རྩིའོ། །ཨཱོཾ་བཛྲ་ཝསྟྲ་ཡེ་སྭཱ་ཧཱ། གོས་ཟུང་ངོ་། །ཞེས་པ་རྣམས་ལ་གསུམ་མམ་བདུན་སོགས་འབུལ་རྒྱས་པར་རེ་རེའམ་བསྡུ་ན་ཀུན་གྱི་མཐར་འདོད་གསོལ་གཅིག་བྱས་ཀྱང་རུང་། དེ་ནས་གཏོར་མ་ལ། ཨཱོཾ་ཨགྣཱེ་ཡེ་ས་པ་རི་ཝཱ་ར་ཨི་དམ་བ་ལིངྟ་ཁ་ཁ་ཁཱ་ཧི་ཁཱ་ཧི༔ ཅེས་འབུལ། སླར་ཡང་ཨརྒྷཾ་ནས་ཤཔྟའི་བར་གྱིས་མཆོད་ཅིང་། ཧཱུྃ། གཟི་བརྗིད་ཕུང་པོ་ལྟ་ན་སྡུག །འོད་བཟང་ཉི་མའི་དཔལ་དུ་འབར། །རབ་འབྱམས་འཕྲིན་ལས་རྒྱ་མཚོའི་དཔལ། །ཨགྣཱི་རཱ་ཛ་ཁྱོད་ལ་བསྟོད། །ཅེས་བསྟོད། ཡི་གེ་བརྒྱ་པ་བརྗོད། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་བ། །དེ་ཀུན་མགོན་པོས་བཟོད་པར་གསོལ། མེ་ལྷའི་རྒྱལ་པོ་གང་ཁྱོད་ཀྱིས། །བདག་གཞན་དོན་གཉིས་ཀུན་མཛོད་ཅིག །ཆོས་ཉིད་ཀློང་དུ་གཤེགས་ནས་ཀྱང་། །གསོལ་བ་བཏབ་ན་སླར་ཡང་བྱོན། ཨགྣཱེ་ཡེ་མུ༔ ཞེས་ཡེ་ཤེས་པ་གཤེགས། དམ་ཚིག་པ་མེའི་ཕུང་པོར་གྱུར་པར་བསམ་མོ། །དེ་ནས་བཀྲ་ཤིས་བརྗོད་པ་ནི། ཧཱུྃ་ཧྲཱི༔ ཆོས་དབྱིངས་ཀུན་ཁྱབ་ཡངས་པ་ཐུགས་རྗེའི་ལྷ༔ སོགས་བཀྲ་ཤིས་བརྗོད། བསྔོ་བ་ནི། ཧཱུྃ་ཧྲཱི༔ རྡོ་རྗེ་གསུམ་གྱི་གསལ་སྣང་ལྷ་རུ་བསྐྱེད༔ སོགས། སྨོན་ལམ་ནི། ཧཱུྃ་ཧྲཱི༔ ཚེ་རབས་སྔོན་ནས་བསྟེན་པའི་ཡི་དམ་ལྷ༔ སོགས་བརྗོད། དེ་ནས་ཐལ་བ་ཆུ་བོ་རྒྱུན་བཟང་ལ་གཤེགས། ཞེས་པ་འདི་ཡང་ཧོར་ཀྱི་པཎ་ཆེན་ངག་དབང་འཇམ་དབྱངས་བློ་ལྡན་གྱིས་མཛད་པའི་དབང་གི་སྦྱིན་སྲེག་སོར་བཞག་སྟེ། དབང་ཆེན་དྲེགས་པ་ཟིལ་གནོན་གྱི་དབང་གི་སྦྱིན་སྲེག་ཏུ་ཁོ་བོ་ཉི་མ་གྲགས་པས་དཔལ་ལྡན་སྟག་མོ་སྒང་གི་བསྐལ་བཟང་ཕུན་ཚོགས་གླིང་དུ་སྦྱར་བ་བསྟན་པ་དང་འགྲོ་བའི་དོན་འབད་མེད་ཡོངས་གྲོལ་ཆེན་པོར་འབྱུང་བར་གྱུར་ཅིག །མངྒ་ལཾ།། །།