དྲེགས་པ་ཟིལ་གནོན་གྱི་ཆད་ཐོའི་ཟུར་རྒྱན།
དྲེགས་པ་ཟིལ་གནོན་གྱི་ཆད་ཐོའི་ཟུར་བརྒྱན། གཟུང་འཛིན་གྱིས་བསྡུས་པའི་ཆོས་ཐམས་ཅད་སྟོང་ཞིང་བདག་མེད་པ་ཅིག་ཏུ་གྱུར་པའི་ངང་ལས། བཾ་དཀར་པོ་ཡོངས་སུ་གྱུར་པ་ལས་ཡན་ལག་བརྒྱད་ལྡན་གྱི་རྒྱ་མཚོ་ཆེན་པོ་མུ་མཐའ་མེད་པར་འཁྱིལ་པའི་ཀློང་དུ་པདྨ་གེ་སར་གྱི་སྡོང་པོ་མེ་ཏོག་དང་ལོ་འདབ་རབ་ཏུ་རྒྱས་པའི་དབུས་སུ། པདྨ་ཉི་ཟླའི་སྟེང་དུ་རྡོ་རྗེ་རྩེ་ལྔ་པ་ཧྲཱིཿཡིག་གིས་མཚན་པའི་འཕྲོ་འདུ་ཡོངས་སུ་གྱུར་པ་ལས་རྒྱལ་བ་ཀུན་འདུས་ཀྱི་སྤྱི་དཔལ་ཨོ་རྒྱན་གྱི་སློབ་དཔོན་ཆེན་པོ་པདྨ་འོད་འབར་ལ་རྩ་གསུམ་རྒྱལ་བ་རྒྱ་མཚོ་ཆོས་སྐྱོང་སྲུང་མ་དཔལ་མགོན་དགེ་བསྙེན་བསྟན་མ་ཕྱི་ནང་གསང་བའི་སྡེ་བརྒྱད་ཡུལ་ལྷ་གཞི་བདག་གི་ཚོགས་དང་བཅས་པས་བསྐོར་བར་གསལ་བའི་ཡེ་ཤེས་དང་འཇིག་རྟེན་གྱི་མགྲོན་རིགས་ཐམས་ཅད་རང་རང་གི་གནས་གསུམ་གྱི་འོད་ཟེར་གྱིས་བསྐྱེད་པའི་གནས་འདིར་དམ་ཚིག་དབང་གིས་བཛྲ་ས་མ་ཡཱ་ཛ༔ ཧཱུྃ་སྔོན་གྱི་བསྐལ་པའི་དང་པོ་ལ༔ སོགས། སྤྱན་འདྲེན་སྔགས་འཁོར་གྱི་འདུ་འཕྲོ་སྒྱུར། མགྲོན་འོག་མ་རྣམས་ཏིང་ངེ་འཛིན་གྱིས་ནན་གྱིས་བཀུག །བཛྲ་གུ་རུ་བརྒྱ་རྩ་བགྲང་། ཨཱོཾ་སྭཱ་བྷཱ་ཝས་སྦྱངས། སྟོང་པ་ཉིད་དུ་གྱུར། །སྟོང་པའི་ངང་ལས་རིན་པོ་ཆེ་ཡི་སྣོད་ཡངས་ཤིང་རྒྱ་ཆེ་བའི་ནང་དུ་དཀར་དམར་གྱི་གཏོར་མ་སྡེ་བརྒྱད་ཀྱི་བཤོས་བུ་འདོད་ཡོན་གྱི་ལོངས་སྤྱོད་གཟུགས་སྒྲ་དྲི་རོ་རེག་བྱ་ཀུན་བཟང་མཆོད་པའི་སྤྲིན་གྱི་ཕུང་པོ་བསམ་གྱིས་མི་ཁྱབ་པར་གྱུར། ཨཱོཾ་ཨ་ཀ་རོས་བྱིན་གྱིས་བརླབ། གསུམ། དེ་ནས་འཛམ་གླིང་གི་གཟུགས་མེད་རྣམས་ཀྱི་སྤྱི་བོར་རྡོ་རྗེའི་ཆར་ཕབ་འདོད་ཡོན་གྱི་གཏོར་མ་ཕུལ་བ་བཞེས་ནས་ལས་བསྒྲུབ་པར་བསམས་ཤིང་། ཧཱུྃ། ཉོན་ཅིག་ལྷ་སྲིན་སྡེ་བརྒྱད་ནས་གྱེར། ༈ རྔ་བརྡུང་ན་སྤྱན་འདྲེན་ལ་ཞི་བའི་འུར་བརྡུང་དལ་པོའི་མཐར་སུམ་བརྡུང་དལ་པོ་ཉིས་བརྩེགས། ཆད་ཐོའི་མཚམས་རྣམས་སུ་མཆོད་དོ་བཞེས་ཤིག་སྲུང་མ་རྣམས། །བཅོལ་པའི་འཕྲིན་ལས་གྲུབ་པར་མཛོད། །ཅེས་པ་འདི་ལྟར་དལ་པོ་ཚགས་ཡོད་ལགས། །ཅེས་པ་འདི་ཡང་རི་ཞིང་ཞབས་དྲུང་ཕྱག་ལེན་བདེ་ཕྱིར་ཉི་མ་གྲགས་པས་བྲིས། །མངྒ་ལཾ།། །།