ཧོམ་སྐྱེད་དང་འགུགས་པ།
བདག་ཉིད་སྐད་ཅིག་གིས་དཔལ་ཆེན་པོར་གསལ་བའི་མདུན་དུ། ཨེ་ལས་གནམ་ལྕགས་ཀྱི་ཁང་སྒྲོམ་ཟུར་གསུམ་མཚན་ཉིད་དང་ལྡན་པའི་ནང་དུ། ནྲི་ཡིག་ཡོངས་སུ་གྱུར་པ་ལས། དམ་ཉམས་པའི་དགྲ་བོ་དེ་ཉིད་ཉམ་ཐག་པའི་གཟུགས་ཅན་སྐྱ་ལ་ཧམ་པ་སྔོ་ལ་རིད་པ། མྱ་ངན་གྱི་ཕྱག་རྒྱ་བཅས་ཤིང་འོ་དོད་ཀྱི་སྨྲེ་ངག་འདོན་པ་མགོན་སྐྱོབས་ཐམས་ཅད་དང་བྲལ་ཞིང་འདར་ཕྲི་ལི་ལི་བྱེད་པ་ཅིག་ཏུ་གྱུར། ༈ ན་མོ་རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། གསང་སྔགས་དང་། རིགས་སྔགས་དང་། གཟུངས་སྔགས་དང་། སྙིང་པོ་དང་། ཕྱག་རྒྱ་དང་། ཏིང་ངེ་འཛིན་གྱི་བདེན་པ་དང་། ཆོས་ཉིད་རང་བཞིན་གྱི་རྣམ་པར་དག་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུ་ཡི་དམ་རྩ་གསུམ་རྒྱལ་བ་རྒྱ་མཚོ་ཆོས་སྐྱོང་སྲུང་མའི་ཚོགས་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོའི་མཐུ་ལ་བསྟེན་ནས་བསྟན་དང་འགྲོ་བའི་སྤྱི་དགྲ། ཁྱད་པར་རིག་པ་འཛིན་པ་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ལ། གནོད་ཅིང་འཚེ་བར་བྱེད་པའི་དམ་ཉམས་པའི་དགྲ་བོ། སྔ་དགྲ་ལག་གིས་བརྡར་བ། ཕྱི་དགྲ་ཡིད་ལ་སེམས་པ། ད་དགྲ་དངོས་སུ་བརྡོ་བའི་བཀའ་འདས་དམ་ཉམས་མི་བསྲུན་ལོག་འདྲེན་ཐམས་ཅད་ཀྱི་བླ་སྲོག་རྣམ་པར་ཤེས་པ་བྱ་སྤུ་རླུང་གིས་ཁྱེར་བ་བཞིན་དུ་དམིགས་པའི་རྟེན་འདི་ལ་ཁུག་ཅིག །