བདུད་རྩི་བཞིའི་བཅུད་ལེན།
ཕག་མོ་སེར་མོའི་ཟབ་ཐིག་ལས༔ བདུད་རྩི་བཞིའི་བཅུད་ལེན་བཞུགས༔ ཡེ་ཤེས་མཁའ་འགྲོ་ཕག་གདོང་མ་ལ་འདུད༔ ཕྱི་མའི་དུས་ཀྱི་རྣལ་འབྱོར་སྒྲུབ་པ་པོས༔ ཚེ་འདི་བློས་ཐོང་ཟབ་དོན་ཉམས་ལེན་འབུངས༔ དུར་ཁྲོད་གཉན་ས་བས་མཐའ་ཀུན་ཏུ་རྒྱུ༔ ཆགས་ཞེན་འཁྲི་བ་གསོག་འཇོག་མདུད་པ་ཁྲོལ༔ དེ་ཚེ་བཀྲེས་སྐོམ་ཚོར་བ་ཅི་བྱུང་ཡང་༔ རྐྱེན་དང་བསྲེ་ཞིང་གཉེན་པོས་ལམ་དུ་འཁྱེར༔ མི་ཟད་ལོངས་སྤྱོད་བཅུད་ལེན་འདི་ལ་འབུངས༔ ཕག་མོའི་གདོང་ཅན་རིགས་ཀྱི་དམ་ཚིག་ཡིན༔ ས་མ་ཡཱ༔ རྒྱ༔ རྡོ་རྗེ་རིགས་ཀྱི་མཁའ་འགྲོའི་དམ་ཚིག་ཏུ༔ བྱང་སེམས་དཀར་པོ་ཅོང་ཞིའི་བཅུད་ལེན་ནི༔ ཕོ་ཅོང་དཀར་སེར་མདོག་ལ་སུལ་དང་ལྡན༔ མོ་ཡི་ཅོང་ཞི་དཀར་སྔོ་གངས་རྙིང་འདྲ༔ ཁམས་དང་བསྟུནཏེ་བླངས་ནས་ཁྲུམ་ཙམ་བརྡུངས༔ ཆུ་ལ་གད་བྱ་གྲང་ཤས་ཅན་རྣམས་ཀྱིས༔ བསྲེ་ནས་འདུལ་སྦྱང་ལས་ལ་སྦྱར་ཏེ་འབད༔ ཚ་ཤས་ཅན་དང་བད་ཀན་ཆེ་བའི་རིགས༔ བསྲེ་འདུལ་མི་དགོས་རང་བྱུང་འདུལ་སྦྱོང་བྱ༔ འོ་མ་སྦྱར་འཚོད་བད་ཀན་སེལ་བར་བྱེད༔ ཆང་ལ་བཙོས་པས་གྲང་བ་སེལ་བར་བྱེད༔ རུས་ཁུ་བུ་རམ་སྦྱར་བཙོས་རླུང་རིགས་སེལ༔ དེ་ནས་ཕྱུང་ཏེ་གྲིབ་མར་གཡམ་སྟེང་བསྐམས༔ རྣལ་འབྱོར་གྲང་ཤས་ཅན་གྱིས་ཉི་མར་བསྲེགས༔ དེ་ནས་བཙང་མའི་སྣོད་བགོས་མདུན་དུ་བཞག༔ རང་ཉིད་ཁྲོ་མོའི་ང་རྒྱལ་བགེགས་བསྐྲད་སྦྱངས༔ མེ་རླུང་སྦྱོང་བའི་སྔགས་དང་བསྐྱེད་རིམ་གསལ༔ དམ་ཚིག་ཡེ་ཤེས་གཉིས་མེད་བདུད་རྩིར་བསམས༔ དེ་དབུས་རྟ་ཕག་ཡབ་ཡུམ་སྐུ་མདོག་དཀར༔ འོད་ལྔའི་མདངས་ལྡན་ཡེ་ཤེས་མེ་དཔུང་འབར༔ དམ་ཚིག་ཡེ་ཤེས་གཉིས་མེད་བདུད་རྩིར་བསམས༔ དེ་དབུས་རྟ་ཕག་ཡབ་ཡུམ་སྐུ་མདོག་དཀར༔ འོད་ལྔའི་མདངས་ལྡན་ཡེ་ཤེས་མེ་དཔུང་འབར༔ དམ་ཚིག་ཡེ་ཤེས་གཉིས་སུ་མེད་པའི་སྐུ༔ བདེ་སྟོང་དགའ་བཞིའི་འཁོར་ལོའི་ཤུགས་སྒྱུར་བསམས༔ མ་ཡེངས་ཏིང་འཛིན་ངང་ནས་འཛབ་སྟོང་བསྙེན༔ ཨཱོཾ་བཛྲ་ཀྲོ་ཏ་བཛྲ་དྷཀྐི་ནི་བྷ་ར་ཧི་ཛྙཱ་ན་པཉྩ་སིདྡྷི་ས་མ་ཡ་སྟྭཾ་སྭཱ་ཧཱ༔ ཡིད་ཀྱིས་མཆོད་བསྟོད་དམ་ཚིག་དབང་གིས་ཞུ༔ དངོས་གྲུབ་འཁོར་འདས་བཅུད་ཀྱི་ཕུང་པོར་བསྒོམ༔ ས་མ་ཡཱཿ རྒྱ༔ ཚ་བ་གསུམ་དང་སེའུ་འབྲུ་སྐྱོབས་སུ་སྦྱར༔ མེ་རླུང་བདེ་སྟོང་དྲོད་སྦར་སྔོན་ལ་བསྟེན༔ ཆུ་སྐོལ་ནང་དུ་ཅོང་ཞི་བཏབ་སྟེ་བསྲུབ༔ དེ་ལ་ཕྱེ་ནི་སུམ་ཆ་བཏབ་ལ་སྐོལ༔ གར་སླ་འཚམས་པར་མར་དཀར་དུམ་ཙམ་བཏབ༔ སྐྱོ་ཚར་བསྟེན་པའི་གདམས་ཟབ་ཨི་ཐི་རྒྱ༔ ཅོང་ཞི་ཆུར་མཚོད་དྲུག་ཆའི་མར་བཏབ་ཅིང་༔ བརྒྱད་ཆའི་བུ་རམ་བཏབ་ཅིང་བསྲུབ་པའི་ཚེ༔ སྐྱ་བ་འཛིན་ཚེ་ཆང་བསྣན་ལེགས་པར་སྐོལ༔ ཕྱེ་ནི་སུམ་ཆ་ཉེ་ཤིང་ར་མཉེ་བཏབ༔ ཞོ་ཙམ་བྱུང་ཚེ་ངད་ཡལ་ཕབ་བཏབ་སྟེ༔ ལེགས་པར་བསྙལ་ཞིང་ལངས་ཚེ་ཆུ་ཡིས་སྦྲན༔ གར་སླ་ཐུག་པ་ཙམ་དུ་བསིང་ནས་ཀྱང་༔ ཞོ་དང་དར་བ་ཡང་ན་འོ་མ་སྦྱར༔ ཅོང་ཞི་རྩམ་པ་བུ་རམ་ཆང་བཞིས་བསྣན༔ སྐོལ་ཐག་ལེགས་བཏང་གཡམ་སྟེང་གྲིབ་མར་བསྐམས༔ ལྟོ་སྟོང་དུས་ལ་བཟའ་ཞིང་རླུང་སྦྱོར་འབད༔ བདུད་རྩི་སྨན་མར་བསྟེན་ཐབས་ཨྀ་ཐི་རྒྱ༔ སྐྲན་དང་གྲང་བ་གཅོང་གི་རིགས་རྣམས་འཇོམས༔ ཚེ་རིང་རྒས་སྲ་སྡིག་སྒྲིབ་དྲུངས་ནས་ཕྱུང་༔ རླུང་དང་མཁྲིས་པ་བད་ཀན་རིགས་རྣམས་ཞི༔ དྲི་མ་འགགས་ན་ལོ་མའི་སྐྱོ་ཚ་གཏོང་༔ རླུང་གིས་གཡེང་ན་ནང་སྔ་རུས་ཁུ་བསྟེན༔ སྐབས་སྐབས་པ་གྲོ་སྐམ་པོའི་ཕྱེ་མ་དང་༔ ཅོང་ཞིའི་སྐྱོ་ཚ་བཏང་བས་གེགས་རྣམས་སེལ༔ མར་ནག་ཤིང་ཐོག་ཤ་མོང་ཡོས་དང་ཡུང་༔ དྲག་ཤུལ་ལས་དང་མཚན་འགྲོས་ཉིན་གཉིད་སྤང་༔ ཐིག་ལེ་མ་ཉམས་རླུང་སྦྱོར་སྐབས་བབས་ཚེ༔ ཁམས་དང་བསྟུན་པའི་ཁ་ཟས་སྤྱད་པར་བྱ༔ འདི་ནི་རྡོ་རྗེ་མཁའ་འགྲོའི་དམ་ཚིག་སྟེ༔ མ་དང་མཁའ་འགྲོ་སྤྲིན་ཕུང་བཞིན་དུ་འདུ༔ མེ་ལོང་ལྟ་བུའི་ཡེ་ཤེས་མངོན་དུ་འགྱུར༔ མཆོག་དང་ཐུན་མོང་དཔལ་ལ་ཚེ་འདིས་སྤྱོད༔ དེ་ཕྱིར་མ་འོངས་རྣམས་ཀྱིས་ཉམས་སུ་ལོང་༔ ས་མ་ཡཱཿ རྒྱ༔ རིན་ཆེན་རིགས་ཀྱི་མཁའ་འགྲོའི་དམ་ཚིག་ཏུ༔ བདུད་རྩི་ར་མཉེ་ཤིང་གི་བཅུད་ལེན་ནི༔ མཁའ་འགྲོར་བསྒོམ་ཞིང་དཔྱིད་དང་སྟོན་ཀའི་དུས༔ ར་མཉེ་བརྐོ་ཞིང་གད་བྱ་དུམ་དུམ་གཅོད༔ ཆུ་ལ་འཚོད་ཅིང་རང་ཁུ་རང་ཐགས་བྱ༔ གྲིབ་མར་བསྐམས་ཤིང་ཤིན་ཏུ་ཞིབ་པར་བསྣུན༔ རྩམ་པ་སུམ་ཆ་བསྲེ་སྟེ་སྣོད་དུ་བླུགས༔ རཏྣ་དྷཀྐི་ཡབ་ཡུམ་འདུ་འཕྲོ་བསྒྱུར༔ བྱིན་གྱིས་བརླབ་ཅིང་སྙིང་པོའི་འཛབ་ལ་འབད༔ སྭཱ་རཏྣ་ཀྲོ་ཏ་རཏྣ་དྷཀྐི་ནི་བྷ་ར་ཧི་ཛྙཱ་ན་པཉྩ་སིདྡྷི་ས་མ་ཡ་སྟྭཾ་སྭཱ་ཧཱ༔ ཞེས་བཟླས་འོད་ཞུ་དངོས་གྲུབ་ཕུང་པོར་བསམས༔ གོམས་ནས་ཕྱེ་ཕྲི་ར་མཉེའི་བདུད་རྩིར་སྤྱོད༔ ཁ་ཟས་ལྟ་བུར་བསྟེན་པའི་མན་ངག་རྒྱ༔ དེ་ལ་མེ་ཏོག་སྣ་ཚོགས་བཏབ་ཟོས་ན༔ མདངས་ལྡན་ཚེ་རིང་རྒས་སྲ་དབང་པོ་གསལ༔ དབང་ལག་འོ་མར་བཙོས་པའི་ཕྱེ་མ་དང་༔ རང་གི་ནད་གཞི་ཚ་གྲང་སྨན་སྐྱོབས་སྦྱར༔ ཆང་གི་རྟར་བསྐྱོན་སྐབས་རེ་བསྟེན་པར་བྱ༔ དངས་མ་འཕེལ་ཞིང་མཱུ་དྲ་བརྒྱར་སྤྱོད་ཐུབ༔ འདི་ལྟར་ཉམས་བླངས་ཆུ་སེར་ནད་རིགས་ཞི༔ མ་དང་མཁའ་འགྲོས་དངོས་གྲུབ་མྱུར་དུ་སྟེར༔ ས་མ་ཡཱ༔ རྒྱ་རྒྱ་རྒྱ༔ མཉམ་པ་ཉིད་ཀྱི་ཡེ་ཤེས་མངོན་དུ་འགྱུར༔ ཚེ་དང་བསོད་ནམས་ཡར་ངོའི་ཟླ་ལྟར་རྒྱས༔ དེ་ཕྱིར་མ་འོངས་རྣམས་ཀྱི་ཉམས་སུ་ལོང་༔ ས་མ་ཡཱ༔ རྒྱ་རྒྱ་རྒྱ༔ པདྨ་རིགས་ཀྱི་མཁའ་འགྲོའི་དམ་ཚིག་ཏུ༔ བདུད་རྩི་དྲི་ཆེན་བཅུད་ལེན་རིམ་པ་ནི༔ མཁའ་འགྲོར་བསྒོམ་ཞིང་དྲི་ཆེན་སྐེད་པ་བསྒྲུབ༔ བླ་མ་སློབ་དཔོན་དྲི་ཆེན་ཕབ་ཏུ་བཏབ༔ གྲིབ་སྐམས་བྱས་ནས་ཆུ་དྲོན་ནང་དུ་འཁྲུད༔ ཁུ་བ་བཞུར་ཞིང་དུག་བསངས་སླར་ཡང་བསྐམས༔ སྤོད་དང་བཅུད་བསྲེ་ཞིབ་པར་ཕྱེ་རུ་འཐག༔ གོང་བཞིན་འདུལ་སྦྱང་བྱས་ལ་དངོས་གཞི་ནི༔ པདྨ་དྷཀྐི་ཡབ་ཡུམ་འདུ་འཕྲོ་བསྒྱུར༔ བྱིན་རླབས་ཏིང་འཛིན་ལྡན་པས་འཛབ་འདི་བགྲང་༔ ཨ་པདྨ་ཀྲོ་ཏ་པདྨ་དྷཀྐི་ནི་བྷ་ར་ཧི་ཛྙཱ་ན་པཉྩ་སིདྡྷི་ས་མ་ཡ་སྟྭཾ་སྭཱ་ཧཱ༔ ཞེས་བཟླས་ཡབ་ཡུམ་བཞུ་ཞིང་བདུད་རྩིར་བསྟིམ༔ སུམ་ཆའི་ཕྱེ་བསྣན་ཆང་གིས་རིལ་བུ་བསྒྲིལ༔ རླུང་སྦྱོར་འབད་ཅིང་ཁ་ཟས་ལྟ་བུར་བསྟེན༔ ཨི་ཐི་རྒྱ༔ ཆུ་ཁོལ་ནང་བཏབ་མར་དཀར་སྡོར་གྱིས་སྦྲན༔ ཁམས་བསྟུན་བཏུང་བ་སྐྱོ་ཚའི་མན་ངག་ཡིན༔ ཨི་ཐི་རྒྱ༔ དེ་ལ་ཨ་ཝ་ལྕམ་ཕྱེ་རྟག་དུ་སྦྱར༔ མར་སྦྱར་བསྟེན་པས་མིག་གི་ནད་རིགས་སེལ༔ ཨི་ཐི་རྒྱ༔ དེ་ལ་གླ་རྩི་གུ་གུལ་སྦྱར་ཏེ་བསྟེན༔ ཀླུ་ཡི་ནད་རིགས་ཙི་ཙི་ཛྭ་ལ་བྱང་༔ ཨྀཐི་རྒྱ༔ ཤ་རྙིང་ཕྱེ་མ་ལྔ་ཆ་བསྲེས་ཏེ་བསྟེན༔ ཤ་ལུས་སྟོབས་འཕེལ་དབང་པོའི་སྒོ་རྣམས་གསལ༔ ཨི་ཐི་རྒྱ༔ འོ་མར་སྦྱར་ལ་ཕབ་རྩིས་ལེགས་པར་བསྙལ༔ ཞོ་ལྟར་བསྟེན་པས་ཀུན་ད་ཡོངས་སུ་འཕེལ། ཨི་ཐི་རྒྱ༔ སྐབས་སུ་སྒོས་པས་སྲིན་ནད་བཤལ་བ་གནད༔ བཅའ་བ་གཞན་དང་མེ་ཉི་དྲག་ལས་སྤང་༔ འདི་ལྟར་སྤྱོད་པའི་རྣལ་འབྱོར་དབང་ཕྱུག་ལ༔ སོ་སོར་རྟོགས་པའི་ཡེ་ཤེས་མངོན་འགྱུར་ཞིང་༔ ཚེ་རིང་རྒས་སྲ་འབྱུང་པོའི་ནད་རིགས་གྲོལ༔ བར་ཆད་རྐྱེན་ཞི་མཚམས་མེད་ལས་སྒྲིབ་བྱང་༔ མ་དང་མཁའ་འགྲོ་འཇིག་རྟེན་མི་མོ་འདུ༔ གྲགས་པའི་དཔལ་རྒྱས་ཟས་ནོར་ཆར་ལྟར་འབེབ༔ དེ་ཕྱིར་མ་འོངས་རྣམས་ཀྱིས་ཉམས་སུ་ལོང་༔ ས་མ་ཡཱཿ རྒྱ་རྒྱ་རྒྱ༔ ལས་ཀྱི་རིགས་ཀྱི་མཁའ་འགྲོའི་དམ་ཚིག་ཏུ༔ བདུད་རྩི་དྲི་ཆུའི་བཅུད་ལེན་རིམ་པ་ནི༔ དྲི་ཆུ་བར་པ་ལྕགས་རྫའི་སྣོད་དུ་བསགས༔ མང་ཉུང་རང་གི་སྙིམ་པ་དྲུག་གི་ཚད༔ ཨ་རུ་གསེར་མདོག་ལྔ་དང་བ་རུ་གསུམ༔ ཨ་བ་ལི་དང་བ་རུ་ར་ཡི་ཆ༔ ཆོམས་ཙམ་བརྡུང་སྟེ་དྲི་ཆུའི་ནང་དུ་བཏབ༔ ཤུ་དག་དཀར་པོ་ཐུན་གཅིག་བཏབ་ནས་ཀྱང་༔ བགེགས་བསྐྲད་མཚམས་གཅོད་ཞག་གཅིག་བསྙལ་བར་བྱ༔ དེ་ནས་བཏོན་དེ་མེ་རླུང་སྦྱོར་བ་དང་༔ ཀརྨ་དྷཀྐི་ཡབ་ཡུམ་འདུ་འཕྲོ་བསྒྱུར༔ བྱིན་གྱིས་བརླབ་ཅིང་འཛབ་འདིས་བརྩོན་པར་བསྒྲུབ༔ ཧ་ཀརྨ་ཀྲོ་ཏ་ཀརྨ་དྷཀྐི་བྷ་ར་ཧི་ཛྙཱ་ན་པཉྩ་སིདྡྷི་ས་མ་ཡ་སྟྭཾ་སྭཱ་ཧཱ༔ བཟླས་པ་རྫོགས་ནས་ཡབ་ཡུམ་འོད་དུ་ཞུ༔ དངོས་གྲུབ་འཁྱིལ་བའི་བདུད་རྩིའི་རྒྱ་མཚོར་བསྒོམ༔ ནང་སྔ་རྣལ་འབྱོར་ཁྲུས་ནས་ཕྱུང་བར་བྱ༔ ཁ་སྤྲིས་འདོར་ཞིང་མ་འཁྲུགས་པར་བསིངས་ནས༔ ནང་རེ་རྩ་སྟོང་འཁྱོར་བ་རེ་རེ་བསྟེན༔ སྐབས་སུ་བསྐུ་མཉེ་བག་རེ་ཁམས་དང་བསྟུན༔ དམ་ཚིག་རུལ་བསུངས་ཟོ་ཤེ་འབྲས་རྗེན་སྤང་༔ ཁ་ཟས་རིག་པས་དཔྱད་ཅིང་མི་མཐུན་འདོར༔ འདི་ལྟར་ལན་གསུམ་བསྐྱལ་ཏེ་ཉམས་བླང་པས༔ བྱ་བ་གྲུབ་པའི་ཡེ་ཤེས་མངོན་འགྱུར་ཞིང་༔ མི་དགེ་བཅུ་ཡི་སྡིག་སྒྲིབ་དྲུངས་ནས་ཕྱུངས༔ ཚངས་པའི་དབྱངས་འཐོབ་འཕྲིན་ལས་མ་ལུས་འགྲུབ༔ བསྟན་འགྲོའི་དོན་འགྲུབ་སེམས་ཅན་བདེ་ལ་འཁོད༔ ཡོན་ཏན་དཔག་མེད་ཕྱི་རབས་ཉམས་སུ་ལོང་༔ དད་བརྩོན་ལྡན་པའི་སྐལ་ལྡན་རྣམས་ལ་སྤེལ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་མཁའ་འགྲོ་རིགས་བཞིའི་དམ་ཚིག་ཏུ༔ བདུད་རྩི་རྣམ་བཞིའི་བཅུད་ལེན་གདམས་པ་འདི༔ གཅོད་ཀྱི་ཉམས་ལེན་གདམས་པའི་མཐའ་རྒྱས་ཡིན༔ མི་དགེའི་གཞིར་གྱུར་ཚེ་འདིའི་བདེ་སྐྱིད་སྤོངས༔ གཏན་གྱི་སོ་ནམ་ཕྱི་མའི་བྱང་ཆུབ་སྒྲུབས༔ ཐར་བའི་བདུད་གཅིག་ཆོས་ཀྱི་གྲུབ་མཐའ་བསྐྱུར༔ ཁ་བསགས་མ་ཆེ་གདམས་པ་ཉམས་སུ་ལོང་༔ ལུས་ངག་ཡིད་གསུམ་སྨིན་གྲོལ་གདེང་ཐོབས་འབུངས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པ་རྩལ་གྱིས་ཆགས་རུ་ཕུག་སེར་ནས་གདན་དྲངས་པའོ། །མངྒལཾ། །