ཟབ་ཐིག་ཕག་མོ་ནག་མོའི་གཏེར་འབྱུང་།
ཟབ་ཐིག་ཕག་མོ་ནག་མོའི་གཏེར་འབྱུང་བཞུགས༔ ཁ་བྱང་ལས། ཕག་གདོང་ནག་མོའི་སྒྲུབ་ཕུག་ན༔ ཟབ་ཏིག་མཁའ་འགྲོའི་གསང་སྒྲུབ་དང་༔ ནཱ་ག་ཨིནྡྲའི་བསྙེན་སྒྲུབ་རྟེན༔ ཕུར་པ་མ་བུ་ཟུང་གཉིས་དང་༔ རིང་བསྲེལ་བདུད་རྩིའི་རིལ་བུ་ཡོད༔ ལུང་བྱང་བཞིན་དུ་རྟེན་འབྲེལ་བསྒྲིགས༔ དུས་བབས་ལོན་ན་བདག་གཞན་འཚེང་༔ དུས་མཐའི་འགྲོ་བ་འདུལ་བ་དང་༔ གསང་སྔགས་བསྟན་ལ་ཕན་པ་ཡོང་༔ ཞེས་གསུངས་འདུག་པས། ས་ཕོ་རྟ་ལོ་ཧོར་ཟླ་བདུན་པར་གནས་མཆོག་ཆེན་པོ་ཁམས་སྲིང་མོ་རྫོང་གི་ཕོ་བྲང་ཡུམ་མཚོའི་ཁར་ཚོགས་ཀྱི་འཁོར་ལོ་བསྐོར། མཚོ་མཇལ་བ་རྣམས་ལ་དབང་ཆོས་ཀྱི་འབྲེལ་བ་བཟང་པོ་བྱས། རི་བོ་བྱ་ཁྱུང་ལྡིང་འདྲའི་ལུང་བསྟན་དུས་བབས་ཀྱི་སྒྲུབ་སྡེ་ཨེ་ཚུགས་ཀྱི་རྟེན་འབྲེལ་ལན་མང་གཟབ་པར། སྔོན་གྱི་སྨོན་ལམ་ངན་པས་འབྲེལ་བའི་གྲྭ་རིགས་མགྲོན་གཉེར་པས་ཐབས་ལམ་སྣ་ཚོགས་ཀྱིས་བར་ཆད་བྱུང་བས། རྟེན་འབྲེལ་མ་འགྲིག་ཅིང་ཡིད་ཆད་བཞིན་ཆགས་རུ་ཕུག་ནག་གི་གཏེར་གདན་ཨེ་དྲོངས་རེ་བས། འཁོར་འདབ་ཉུང་ཙམ་དང་གཏེར་སྲུང་མཆོད་རྫས་བཅས་སོང་བར། རྟེན་འབྲེལ་རྣམས་རིམ་གྱིས་འགྲིག་ཅིང་རྐྱེན་ལམ་མ་ཤོར་ཙམ་གྱི་རིང་ནས། ས་ཕོ་རྟ་ལོ་ཧོར་ཟླ་བརྒྱད་པའི་ཚེས་ཉི་ཤུ་ལྔའི་སྔ་དྲོ་སྒྲུབ་གནས་ཆེན་པོ་གུ་ཧྱ་ཀཱ་ལའི་ཆོས་འབྱུང་གསང་ཕུག་ནས། བཅོམ་ལྡན་འདས་མ་ཕག་གདོང་ནག་མོའི་ཟབ་ཏིག་ཁམ་སའི་གཏེར་སྒྲོམ་གྲུ་གསུམ་པ་ཞིག་གི་ནང་ལ་སྨྱུག་ཚིགས་ལ་བསེས་བསྡམས་པའི་ནང་ནས་ཐུགས་རྗེ་ཁྲོས་མ་ནག་མོའི་སྒྲུབ་བསྐོར་གྱི་ཤོག་སེར་དང་། ལོ་ཆེན་ཀླུའི་དབང་པོའི་སྒྲུབ་ཕུར་མ་བུ་གཉིས། སངས་རྒྱས་ཀྱི་རིང་བསྲེལ་གསུམ། བདུད་རྩིའི་རིལ་བུ་བརྒྱ་གྲངས་བྱོན་པ་ལ་ཚོགས་འཁོར་གྱིས་མཆོད་ཅིང་། ཤོག་སེར་ཞལ་བཤུས་སྒྲུབ་པ་གནས་དེ་ཉིད་དུ་དང་བླངས་བྱས་པར་འཚུབས་ལྷོངས་ཤིན་ཏུ་ཆེ་བ་མང་པོ་བྱུང་། ཤོག་སེར་ཀརྨ་བརྩོན་འགྲུས་པས་སྟོན་ཟེར་ནན་ཆེར་བྱུང་བར་བསྟན་པས། ཁོ་རང་དེ་དགོང་གཡང་ལ་ལྷུང་སྟེ་ཤི། ཕ་རྒན་འདས་པ་སོགས་ཡི་ཟ་བ་མང་དུ་བྱུང་ཡང་། སྒྲུབ་འཕྲོ་མ་ཤོར་བར་བྱས་ཤིང་། སྲིང་མོ་རྫོང་གི་གནས་ཡིག་ལྟར་གསོལ་འདེབས་དང་ཚོགས་འཁོར་སོགས་བརྩོན་འགྲུས་དྲག་པོ་བྱས་པས་ཕྱིར་ལོག་ལ་མ་ཤོར་ཙམ་བྱུང་བ་འདི་ཡང་ཕག་མོ་ནག་མོའི་གཏེར་འབྱུང་མངྒ་ལམ། །