ཟབ་དོན་གཅོད་ཀྱི་སའི་ངོས་འཛིན་ཐབས་དང་ཚར་སློངས་ཀྱི་སྐབས།
ཕག་མོ་སེར་མོའི་ཟབ་ཐིག་ལས༔ ཟབ་དོན་གཅོད་ཀྱི་སའི་ངོས་འཛིན་ཐབས་དང་ཚར་སློངས་ཀྱི་སྐབས་བཞུགས༔ ཡེ་ཤེས་ཕག་གདོང་དོན་གྲུབ་སེར་མོར་འདུད༔ མ་འོངས་དུས་ཀྱི་སྐལ་ལྡན་ཕོ་མོ་རྣམས༔ ཟབ་དོན་གདམས་པ་ཉམས་སུ་ལེན་པའི་ཚེ༔ གཉན་སའི་བརྟག་པ་ས་དཔྱད་འདི་ལྟར་གཅེས༔ གངས་རི་བརྟན་ཆགས་གྲིབ་སོ་འཕོག་པ་གཉན༔ མདུང་སོ་འདྲ་བའི་བྲག་རིའི་རྩེ་མོ་གཉན༔ མདའ་ལྟོང་འདྲ་བའི་ལ་ཡི་ལ་བཙས་གཉན༔ ཤི་ལྤགས་འདྲ་བའི་ཐང་གི་དཀྱིལ་ན་གཉན༔ ནགས་ཚལ་བྲག་ནག་བདུད་གནས་རྩ་བར་གཉན༔ མཚོ་ཡི་འདབས་གཉན་ལུ་མའི་མགོ་བོ་གཉན༔ ཤིང་གཅིག་དྲུང་གཉན་ནེའུ་གསིང་དཀྱིལ་ན་གཉན༔ དེ་དག་རྣམས་ལ་གཉན་རིགས་ཆེ་ཆུང་གནས༔ རི་དང་ཕ་བོང་སྟག་འདྲའི་སྣ་མགོ་གཉན༔ བྲག་རི་དུག་སྦྲུལ་འདྲ་བའི་སྤྱི་གཙུག་གཉན༔ བྲག་རི་སྦལ་པ་འདྲ་བའི་གཉའ་བ་གཉན༔ རི་བྲག་བྱ་ཕོ་འདྲ་བའི་ཟེ་བ་གཉན༔ རི་བྲག་ཕག་མོ་འདྲ་བའི་མཁལ་ཁུང་གཉན༔ དེ་དག་རྣམས་ལ་ས་བདག་གནས་པས་གཅོད༔ བྲག་རི་ཆེ་ཆུང་ཀུན་གྱི་གདོང་པ་གཉན༔ རི་བྲག་སྡིག་པ་འདྲ་བའི་མཇུག་མ་གཉན༔ དེ་བཞིན་རུས་སྦལ་འདྲ་བའི་རྒལ་པ་གཉན༔ མ་ཧེ་གླང་ཆེན་གཡག་རྒོད་རྔ་མོ་འདྲའི༔ རི་བྲག་རྣམས་ཀྱི་མཁལ་ཁུང་དག་ཏུ་གཉན༔ དེ་དག་རྣམས་ལ་ས་བདག་ཀླུ་གཉན་གཅོད༔ བྲག་ཕུག་ནང་གཉན་གཅོང་རོང་དཀྱིལ་ན་གཉན༔ གད་ཕུག་སྒོ་གཉན་དེ་དག་རྣམས་སུ་ནི༔ བསེན་མོ་དམ་སྲི་ཐེའུ་རང་གཅོད་པར་བྱ༔ ཁང་སྟོང་ནང་གཉན་འཕུང་ཤུལ་འགྲམ་ན་གཉན༔ མཚེར་གྱི་ཤུལ་གཉན་གྲོང་པའི་སྲང་མདོ་གཉན༔ ཚོང་དུས་དབུས་གཉན་ལམ་གྱི་རྒྱ་གྲམ་གཉན༔ དེ་དག་རྣམས་སུ་བསེ་རག་འབྱུང་པོ་དང་༔ གྲོ་བོ་གྲེ་མོ་ལ་སོགས་གཅོད་པར་བྱ༔ ཤར་བལྟས་ཆུ་ལ་རྒྱལ་རིགས་ཀླུ་གནས་ཤིང་༔ ལྷོར་བལྟས་རྗེའི་རིགས་ནུབ་བལྟས་བྲམ་ཟེ་དང་༔ བྱང་བལྟས་གདོལ་པ་གནས་པས་ཀླུ་རིགས་གཅོད༔ དེ་དག་རྣམས་ཀྱི་ཟིལ་སྣང་གང་ཆེ་གཉན༔ རི་བྲག་ཀུན་གྱི་སྒང་གི་གཤོངས་ན་གཉན༔ མཐོན་པོའི་ཀོང་དང་ཀོང་གི་མཐོན་པོ་གཉན༔ ལུང་གསུམ་མདོ་གཉན་ཆུ་བོའི་མདུས་མདོ་གཉན༔ ཐོད་ཕོར་འདྲ་བའི་རི་བྲག་དཀྱིལ་ལ་གཉན༔ སྐྱིལ་ཀྲུང་བསྣོལ་འདྲའི་རི་བྲག་མཚམས་ན་གཉན༔ རལ་གྲི་འདྲ་བའི་རི་བྲག་འཆང་བཟུང་གཉན༔ ཙིཏྟ་འདྲ་བའི་རི་བྲག་སྙིང་རྩ་གཉན༔ གློ་བ་འདྲ་བའི་རི་བྲག་ཨོལ་མགོ་གཉན༔ རྡོ་རྗེ་འདྲ་བའི་འཆང་བཟུང་གཉན་པ་ཡིན༔ ཕོ་མཚན་འདྲ་བའི་རྩེ་མོ་གཉན་པ་ཡིན༔ པདྨ་འདྲ་བའི་དཀྱིལ་ན་གཉན་པ་ཡིན༔ གཡུང་དྲུང་འདྲ་བའི་མདོ་མཚམས་གཉན་པ་ཡིན༔ དར་གདུག་འདྲ་བའི་ཤམ་བུ་གཉན་པ་ཡིན༔ རྒྱལ་མཚན་འདྲ་བའི་ཡུ་བ་གཉན་པ་ཡིན༔ ཤིང་རྟ་འདྲ་བའི་འཕང་ལོ་གཉན་པ་ཡིན༔ ཉ་མོ་འདྲ་བའི་རྒལ་པ་གཉན་པ་ཡིན༔ ཆུ་སྲིན་འདྲ་བའི་ཁ་ནང་གཉན་པ་ཡིན༔ གཞུ་དང་འོད་མ་འདྲ་བའི་འཆང་བཟུང་གཉན༔ དེ་དག་རྣམས་ལ་རི་བྲག་ཆེ་ཆུང་དང་༔ ཁ་དོག་གཟུགས་དང་མཐུན་པའི་གཞི་བདག་གནས༔ སྡེ་བརྒྱད་ཆེ་ཆུང་གང་རིགས་དེར་བརྟགས་གཅོད༔ གཡུལ་འཁྲུགས་ས་དང་དུར་ཁྲོད་མི་ཤིའི་ཤུལ༔ གཤིན་རྗེ་སྲོག་བདག་གནས་པས་དེ་བཞིན་གཅོད༔ ལྷ་ཁང་དགོན་གནས་སྒྲུབ་ཁང་ལ་སོགས་སུ༔ རྒྱལ་པོ་དཀོར་བདག་གནས་པས་གཅོད་པར་བྱ༔ ཀླུ་གཉན་ས་བདག་ས་སྲིན་གཅོད་པའི་དུས༔ བྱིང་རྨུགས་འཐིབ་གསུམ་འབྱུང་བས་དྲུང་ཕྱུང་སྟེ༔ རིག་པ་དར་འདོན་ལྟ་སྟངས་མཁའ་ལ་གཅུན༔ འཕྲལ་དུ་འཇིགས་པའི་སྣང་བ་ཆེར་མེད་ཀྱང་༔ ནོན་དང་ལྷོངས་པར་དཀའ་ཞིང་ཕུགས་གདེངས་ཆེ༔ བཙན་དང་ཐེའུ་རང་ལྷ་སོགས་གཅོད་པའི་དུས༔ མིང་ནས་འབོད་དང་བཤུག་པ་འོ་དོད་བྱེད༔ ཉམས་ཀྱང་གཏད་མེད་རྨི་ལམ་ཤིན་ཏུ་འཚུབ༔ རྣལ་དུ་དབབ་ཅིང་ལྟ་བའི་གདེང་བསྐྱེད་དེ༔ ཡིད་གཉིས་འཛིན་པའི་ཁུ་འཕྲིག་དབྱིངས་སུ་གཏོར༔ ལྷོངས་དང་ནོན་སླ་ཕུགས་ཀྱང་འཇམ་པའོ༔ པེ་ཧར་ལ་སོགས་རྒྱལ་རིགས་ཆེ་ཆུང་དང་༔ གྲེ་བོ་གྲེ་མོ་ལ་སོགས་གཅོད་པའི་ཚེ༔ ཤེས་པ་འཚུབ་ཅིང་རིག་པ་ཚོ་མི་ཐུབ༔ ཞེ་སྡང་ཆེ་ཞིང་ང་རྒྱལ་མེ་ལྟར་འབར༔ ཁྲེགས་ཆོད་ལྟ་བའི་ནམ་མཁའ་ཡངས་པའི་ཀློང་༔ རང་བྱུང་རིག་པའི་ཉི་ཟླའི་བསམ་གཏན་བསྐྱིལ༔ འཕྲལ་ལ་འཚུབ་ཀྱང་ལྷོངས་ནོན་གཉིས་ཀ་སླ༔ དམ་སྲི་བསེན་མོ་མ་མོ་གཅོད་པའི་དུས༔ རིག་པ་གཡེལ་ཞིང་འགྲོ་སྙིང་འདོད་པ་དང་༔ ཆགས་པ་སྐྱེ་ཞིང་ཐིག་ལེ་འཕྲོག་པ་ཡོང་༔ སྒོ་གསུམ་རྣལ་དུ་དབབ་པའི་གདམས་པ་དང་༔ འདྲེན་འཁྲེམ་དགྲམ་པའི་འཁྲུལ་འཁོར་འབར་འཛག་སྦྱང་༔ སློང་གནོན་སླ་ཡང་རྗེས་འབྲེང་ཕུག་མི་འཇམ༔ མི་མང་ཤི་ཤུལ་ལྷ་ཁང་གོག་པོ་དང་༔ དུར་ཁྲོད་རྣམས་ནི་འཕྲལ་འཇིགས་ཕུགས་མི་འཇིགས༔ ཤིང་གཅིག་ས་དང་རྒྱ་མཚོ་ཆུ་མིག་རིགས༔ ཕ་བོང་སྦལ་སྡིག་སྡོམ་གཟུགས་འདྲ་བ་རྣམས༔ འཕྲལ་ལ་མི་འཇིགས་ཕུགས་ལ་ཤིན་ཏུ་འཇིགས༔ ཐང་ཆེན་ཐང་ཆུང་ཐང་གི་རིགས་རྣམས་དང་༔ བྲག་ཕུག་གད་ཕུག་གྲོག་ཧྲོལ་ལ་སོགས་པ༔ འཕྲལ་ཕུགས་གང་དུའང་མི་འཇིགས་གནས་པ་ཆུང་༔ ལར་ནི་གཉན་སའི་རིགས་ཀྱི་རྒྱ་དཔངས་ལྟར༔ སྡེ་བརྒྱད་གང་གནས་དེར་བརྟགས་གཅོད་པའི་ཚེ༔ ཟབ་དོན་དམིགས་པའི་ཡང་ཏིག་བཞིན་དུ་སྤྱད༔ མ་ལྷོངས་པ་དང་མ་ནོན་པ་ཡི་རིགས༔ རྒྱུན་བསྲིང་བརྩོན་འགྲུས་བརྩམ་དང་ངར་ཡང་ཕྱུངས༔ ཕྱི་ཡི་ཆོ་འཕྲུལ་ལྷ་འདྲེའི་སློང་ཚད་ནི༔ རང་རང་གཟུགས་སྟོན་ས་གཡོ་ལྕེ་འབབས་ཤིང་༔ བརྡེག་ཆོམ་འུར་སྒྲ་རྒྱོབ་སོད་སྒྲ་འབྱིན་དང་༔ གོང་ལྟར་རང་རང་ཚུལ་གྱི་རྟགས་རྣམས་འཆར༔ ཁྱད་པར་བློ་འབྲིད་ཤེས་པ་ཆོས་ལས་ལྡོག༔ ཚེ་འདིའི་དབང་ཤོར་ནག་པོ་བདུད་ཀྱིས་སློངས༔ ལུས་ལ་ན་ཚ་སེམས་ལ་ཟུག་རྔུས་གཟིར༔ དངོས་ཉམས་རྨི་ལམ་ཤ་ཁྲག་དམར་པོ་སྟེར༔ སྣག་ནག་བྱིན་དང་གོས་དམར་བསྐོན་པ་དང་༔ འཇིགས་ཤིང་བྲེད་དང་ཡ་ང་སྐྱི་བུང་བྱེད༔ ལྷོངས་རིགས་ཆེ་ཆུང་དེ་དག་གང་བྱུང་ཡང་༔ རབ་ནི་འཁོར་འདས་ཆོས་རྣམས་བརྗོད་མེད་ཀློང་༔ འགྲོ་དྲུག་ཁམས་དང་སྲིད་རྩེ་མནར་མེད་ཡུལ༔ གཟུགས་ཅན་གཟུགས་མེད་སྤང་བླང་བྱ་བྱེད་དང་༔ བཟང་རྟོག་ངན་རྟོག་རེ་དོགས་འདུ་འཕྲོའི་རྩལ༔ ལྷ་འདྲེའི་རྡུར་དང་རང་གི་འཇིགས་སྐྲག་སྣང་༔ སྒྱུ་མའི་གྲོང་ཁྱེར་རྨི་ལམ་བྲག་ཆ་ལྟར༔ དུག་གསུམ་བག་ཆགས་རྒྱུ་དང་བཅས་པའི་འཕྲུལ༔ མེད་ལ་ཡོད་པར་གཟུང་བ་དབྱིངས་གཏོར་ཏེ༔ ཀ་དག་བློ་འདས་ལྟ་བསྒོམ་ལྡན་པས་གཅོད༔ འབྲིང་ནི་ཟབ་མོ་གཅོད་ཀྱི་གདམས་པ་ལ༔ ཉམས་ལེན་བྱས་པའི་ཚད་རྡོར་ངོས་བཟུང་སྟེ༔ ལྷོངས་ཚད་ཤར་བ་མ་བུ་འཕྲད་པ་ལྟར༔ བརྩེ་བའི་སེམས་ཀྱིས་དགའ་བ་རབ་བསྒོམས་ཏེ༔ འཁོར་བ་ཐོག་མ་མེད་པའི་དུས་མཐའ་ནས༔ ལས་ཀྱི་དབང་གིས་འཁོར་བ་འདིར་འཁྱམས་ཏེ༔ ཤ་ཁྲག་དྲ་བའི་འདོར་ལེན་མང་བྱས་ཀྱང་༔ བྱང་ཆུབ་ལམ་ལ་ཕན་པ་གཅིག་ཙམ་མེད༔ དེ་རིང་ཟབ་མོ་གཅོད་ཀྱི་ཉམས་ལེན་མཐུས༔ སྣང་སྲིད་ལྷ་འདྲེའི་ལྷོངས་ཚད་ཤར་བའི་ཚེ༔ ང་ཡི་ཤ་ཁྲག་གཟུགས་ཀྱི་ཕུང་པོ་འདི༔ བསྔོས་པ་བཞིན་དུ་མྱུར་དུ་ད་ཁྱེར་ཞིག༔ སྡང་བའི་དགྲ་དང་གནོད་པའི་བགེགས་གཉིས་ཀྱིས༔ གཙོར་བྱས་ཕ་མ་འགྲོ་དྲུག་སེམས་ཅན་རྣམས༔ སྐུ་གསུམ་གོ་འཕང་འཐོབ་པའི་རྒྱུར་གྱུར་ཅིག༔ སྙམ་པའི་ངང་ནས་བདག་འཛིན་བོར་ཏེ་གཅོད༔ ཡེ་ནས་གྲོལ་བའི་རང་བྱུང་ཡེ་ཤེས་འདི༔ ཡོངས་སུ་གྲོལ་ཞིང་འབད་རྩོལ་བྲལ་བཞིན་དུ༔ ཅེར་གྱིས་གྲོལ་བའི་གནས་ལུགས་ངང་ལ་འཇོག༔ ཐ་མ་རྣམས་ཀྱང་ལྷོངས་ཚད་ཤར་བའི་ཚེ༔ འཇིགས་པའི་སྣང་བར་མི་བལྟ་འཇིགས་མཁན་བལྟ༔ བདག་གཞན་གཉིས་སུ་ཕྱེ་བའི་གཟུང་འཛིན་འདི༔ སེམས་ཀྱིས་བྱས་པའི་རྩལ་སྣང་ཕྱི་ནས་ཤར༔ ལྷོངས་ཚད་ཤར་ལ་འཇིགས་སྐྲག་བྱེད་པ་དང་༔ གདོན་བགེགས་དགྲ་ལ་གཟུང་ན་དམ་བཅའ་བུད༔ ངེས་པར་རང་གི་སེམས་ཉིད་མ་རྟོགས་སྐྱོན༔ དེ་རིང་ཕུང་པོ་བཟན་ལ་ཅིས་ཀྱང་བསྐྱུར༔ བདག་ཏུ་མེད་ལ་བདག་འཛིན་བྱས་པ་འཁྲུལ༔ གཉིས་སུ་མེད་ལ་གཉིས་འཛིན་བྱས་པས་བསླུས༔ དེ་སྔ་སེམས་ཉིད་བག་ལ་ཉལ་ཏེ་བསྒྲིབས༔ དེ་རིང་ལྷོངས་ཀྱིས་རིག་པ་རྗེན་ལ་བུད༔ སྣང་སྲིད་ལྷ་འདྲེ་ངོ་སྤྲོད་བླ་མ་རྗེ༔ ད་ལྟ་ཉིད་དུ་དབུགས་དང་བྲལ་ཀྱང་རུང་༔ ཟབ་དོན་གདམས་པ་ནམ་ཡང་མི་གཏོང་ངོ་༔ སྙམ་པའི་ངང་ནས་དམ་བཅའ་མཐའ་ལ་སྐྱེལ༔ ས་མ་ཡཱ༔ རྒྱ༔ དེ་ལྟར་ཉམས་སུ་བླངས་པས་ཚར་ཚད་ནི༔ སྲོག་སྙིང་འབུལ་དང་བྲན་དུ་ཁས་ལེན་དང་༔ དགེ་བསྙེན་འབོགས་དང་གསང་མཚན་སྦྱིན་པ་དང༔ ནོར་བུ་འབུལ་དང་ཚོགས་འཁོར་བསྐོར་བ་དང་༔ དབང་བསྐུར་ཆོས་འཆད་ཁྲིར་བསྡད་རྒྱན་ཆས་སྤྲས༔ རྣག་ཁྲག་ཟགས་དང་ཁྲུས་བྱས་རྒྱལ་མཚན་བསྒྲེངས༔ ཉི་ཟླ་ཤར་དང་མཆོད་རྟེན་གངས་རིར་འཛེགས༔ རང་གྀ་སྐྱེ་བརྒྱུད་བཤད་དང་བཟའ་བཏུང་སྟེར༔ རང་རིག་ངོ་འཕྲོད་ཟབ་དོན་ཉམས་བླངས་པས༔ ལྷ་འདྲེ་ཆོས་ལ་ཚུད་པའི་ཚད་རྡོར་འཛིན༔ བསྔོ་བ་སྨོན་ལམ་མཐའ་རྒྱས་ཡང་དག་སྐྱོང་༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་ཟབ་མོ་གཅོད་ཀྱྀ་གདམས་པའི་གནད༔ ཡང་ཟབ་སྙིང་པོའི་མན་ངག་དམ་པ་འདི༔ ཚུལ་བཞིན་སྤྱད་པས་བདག་གཞན་དོན་གཉིས་འགྲུབ༔ གནས་ལུགས་དོན་རྟོགས་བོགས་ཐོན་བརྡར་ཤ་ཆོད༔ སྐད་ཅིག་རེ་རེའི་བྱེ་བྲག་ཆ་ཤས་ཀྱིས༔ རྫོགས་པའི་སངས་རྒྱས་ས་ལ་འགོད་པའི་ཆོས༔ གཅོད་ཡུལ་གདམས་པ་ཡིན་པས་ཉམས་སུ་ལོང་༔ མ་འོངས་ལས་འཕྲོ་ཅན་དང་འཕྲད་པར་ཤོག༔ སྲུང་མས་གཏེར་འདིའི་བྱ་ར་གྱིས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པས་ཆགས་རུ་ཕུག་སེར་ནས་གདན་དྲངས་ཤིང་ཕུག་ནག་བདེ་བ་ཆེན་པོར་ཤོག་སེར་ལས་བསྒྱུར་བའོ། །མངྒཱ་ལམ།