ཟབ་དོན་དམིགས་པ་དང་ལག་ལེན་གྱི་ཡང་ཐིག
ཕག་མོ་སེར་མོའི་ཟབ་ཐིག་ལས༔ ཟབ་དོན་དམིགས་པ་དང་ལག་ལེན་གྱི་ཡང་ཐིག་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ ཟབ་མོ་དོན་གྱི་གདམས་པ་གཅོད་ཡུལ་ལ༔ ཉམས་སུ་ལེན་པའི་མན་ངག་རིམ་པ་ནི༔ དཀར་པོ་ལྷ་དང་ནག་པོ་བདུད་ཀྱིི་སྡེ༔ དམར་པོ་བཙན་དང་ཁྲ་བོ་གཟའ་ཡི་ཚོགས༔ རྒྱལ་པོ་འགོང་པོ་ཐེའུ་རང་དམུ་ཡི་རིགས༔ ས་བདག་འབྱུང་པོ་དཀོར་བདག་བསེན་མོ་དང་༔ མདོར་ན་སྣང་ཞིང་སྲིད་པའི་ལྷ་འདྲེའི་སྡེ༔ ཁྱད་པར་ཆོས་ལ་གནག་ཅིང་འགྲོ་ལ་གནོད༔ དེ་ལ་ཡང་ཟབ་གདམས་པའི་གནད་གཟིར་བས༔ རིག་པ་རྗེན་འབུད་བག་ཆགས་དྲུང་ནས་ཕྱུངས༔ ལྟ་བའི་ཀློང་རྡོལ་སྒོམ་པའི་ཏིང་འཛིན་རྒྱས༔ ཚེ་རབས་སྡིག་སྒྲིབ་ཤ་འཁོན་བུ་ལོན་འཁོར༔ ལྷ་འདྲེ་རྣམས་ཀྱང་ཆོས་ལ་འཁོད་པ་དང་༔ དགེ་བའི་རྟོག་པ་རྒྱུད་་ལ་ཤར་བའི་མཐུས༔ ཡུལ་ཁམས་བདེ་ཞིང་ནད་མུག་རྐྱེན་ངན་ཞི༔ དེ་ཕྱིར་མ་འོངས་རྣམས་ཀྱི་ཚུལ་བཞིན་སྤྱོད༔ ས་མ་ཡཱ༔ རྒྱ་རྒྱ་རྒྱ༔ ཟབ་དོན་གཅོད་ཀྱི་ཉམས་ལེན་སྤྱོད་པའི་ཚེ༔ སྐྱིད་སྡུག་རོ་སྙོམས་དགག་སྒྲུབ་སྤང་བླང་བསྐྱུར༔ རྐྱེན་ངན་ཅི་ཤར་གཉེན་པོས་གྲོགས་སུ་ཁྱེར༔ འདྲེ་གདོན་ཕྱི་ན་མེད་དོ་རང་ལ་ཚང་༔ གདོད་ནས་དག་པའི་རང་བྱུང་ཆོས་སྐུ་ལ༔ མ་རིག་པ་ཡི་འདྲེ་བོ་ཆེ་ཞུགས་པས༔ ང་ཡི་བདུད་ལངས་སྣང་བའི་འགོང་པོ་རྒྱས༔ འཛིན་པའི་གཤིན་རྗེ་འདོད་ཆགས་མ་མོ་འཁྲུག༔ ཕྲག་དོག་གཟའ་འཕྲོ་ཞེ་སྡང་སྲིན་པོ་ཁྲོ༔ གཏི་མུག་ཀླུ་འཐིབ་ཟུག་རྔུའི་ཐེའུ་རང་ཚོགས༔ བག་ཆགས་རྒྱལ་འགོང་གཟུགས་ཀྱི་འབྱུང་པོ་དར༔ སྒྲ་ཡི་ཕོ་གདོན་དྲི་ཡི་མོ་གདོན་འཕྲོ༔ རོ་ཡི་ཟ་འདྲེ་རེག་བྱའི་ཤི་གཤེད་རྒྱས༔ མདོར་ན་གདོན་དང་བགེགས་དང་འབྱུང་པོ་འདི༔ བསད་དང་བཅད་དང་གཞིལ་བར་བྱ་བ་དང་༔ སྦྱང་དང་འཁྲུད་དང་དེ་ཉིད་དེས་གྲོལ་ཕྱིར༔ ཕུང་པོ་གཟན་བསྐྱུར་འཁོར་འདས་མགྲོན་ལ་འབོད༔ ཡར་མཆོད་མར་སྦྱིན་བདག་ཏུ་འཛིན་པ་བཤིག༔ བཟང་ངན་རྟོག་པ་བག་ཆགས་རྐྱེན་ངན་ཚོགས༔ ལམ་དུ་སློང་ཞིང་ངོ་བོ་ཉིད་དང་བསྲེ༔ འདི་ནི་ཟབ་མོ་གཅོད་ཀྱི་གདམས་པའི་སྙིང་༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་ལྟ་སྒོམ་ལྡན་པའི་རྣལ་འབྱོར་པས༔ གཉན་ས་གང་དུ་འགྲོ་ཡང་གསང་སྟེ་འགྲོ༔ གྲོགས་མེད་གཅིག་པུར་ཟླ་བོ་ཁྲིད་མི་བྱ༔ སྐྱེ་འགྲོ་གཞན་དང་ངག་ཚིག་མི་བསྲེ་ཞིང་༔ མིག་གི་བརྡ་དང་ལག་པའི་ཕྱག་རྒྱ་བསྒྱུར༔ ཤར་དུ་འགྲོ་ན་ནུབ་ནས་བསྐོར་ཏེ་འགྲོ༔ ཕྱོགས་བཞི་མཚམས་བཞི་རྣམས་ཀྱང་དེ་བཞིན་ནོ༔ མཁའ་འགྲོའི་གར་དང་གིང་གི་འགྲོས་ཀྱིས་སྤྱོད༔ སྐབས་སྐབས་དྲན་ཐང་སྨྱོན་སྤྱོད་བག་རེ་བརྩམ༔ རྐྱེན་དང་བསྲེ་ཞིང་གཉེན་པོས་ལམ་དུ་འཁྱེར༔ རབ་ནི་མི་ལྤགས་འབྲིང་ནི་གཅན་ལྤགས་དང་༔ ཐ་ན་ཡང་ནི་པགས་རིགས་གདན་དང་བཅས༔ བྷནྡྷ་རྐང་གླིང་ཅང་ཏེའུ་འཆང་བ་དང་༔ ཁ་ཊྭཱྃ་དྷཀྐི་བརྟེན་དང་འབྲལ་མི་བྱ༔ སྟག་ཤམ་རུས་རྒྱན་སྦུབ་ར་ཐོད་གདེང་སོགས༔ མདོར་ན་ཧེ་རུ་ཀཿཡི་ཆས་ཀྱིས་སྤྲས༔ རང་ཉིད་དོན་གྲུབ་སེར་མོའི་ཐུགས་ཀ་ནས༔ འོད་ཟེར་ལྔ་ལྡན་རྡོ་རྗེ་ཁ་ཊྭཱྃ་ག༔ སྐར་ལྟར་སྤྲོས་པས་གཉན་སར་ཐོག་ལྟར་དབབ༔ དེར་གནས་ལྷ་འདྲེ་དེ་ཉིད་རང་མལ་ལས༔ གཞན་དུ་འཁྱུག་དབང་མེད་པའི་རྒྱས་གདབ་བསམ༔ ཛཿཧཱུྃ་བཾ་ཧོཿཕཊཿ་ཕཊཿཕཊཿ རྐང་གླིང་ལན་བདུན་སྒྲོག་སྟེ་འདི་ལྟར་བསྒོམ༔ སྲིད་པའི་རྩེ་ནས་ན་རག་དམྱལ་བའི་ཁམས༔ འགྲོ་དྲུག་སེམས་ཅན་གཟུགས་ཅན་གཟུགས་མེད་རྣམས༔ ཐམས་ཅད་འདུས་ཤིག་ཚོགས་ཤིག་འདིར་འདུས་ཤིག༔ ད་སྟེ་འཁོར་བའི་གནས་འདིར་སྙུགས་རེ་བུད༔ དེ་རིང་ང་ཡི་ཤ་ཁྲག་ཕུང་པོ་འདི༔ ཡར་མཆོད་མར་སྦྱིན་བྱང་ཆུབ་དོན་དུ་བསྔོ༔ ཀུན་ཀྱང་རྫོགས་པའི་སངས་རྒྱས་རྒྱུར་གྱུརཅིག༔ ཅེས་བརྗོད་བླ་གབ་སྤངས་ཏེ་ཚ་གྲང་གི༔ ཚོར་བ་ཅི་བྱུང་རྐྱེན་དང་བསྲེ་སྟེ་བསྒོམ༔ གཅོད་ཡུལ་གདམས་པ་ཐུན་དྲུག་གཅོད་པ་དང་༔ སྐབས་སྐབས་ལུས་ངག་ཡིད་གསུམ་རུ་ཤན་དབྱེ༔ ཁྲེག་ཆོད་གདེང་བསྐྱེད་ཐོད་རྒལ་འབེན་ལ་གཅུན༔ སྐད་ཅིག་ཙམ་ཡང་མ་ཡེངས་དོན་ལ་བལྟ༔ བྱམས་དང་སྙིང་རྗེ་འགྲོ་དྲུག་སེམས་ཅན་དང་༔ ཁྱད་པར་གཟུགས་མེད་སྣང་སྲིད་ལྷ་འདྲེ་ལ༔ སྙིང་ནས་བསྒོམ་ཞིང་ཡང་དང་ཡང་དུ་བསྐྱར༔ ང་མེད་ངར་གཟུང་བདག་མེད་བདག་ཏུ་གཟུང་༔ གཟུགས་མེད་གཟུགས་ལ་ཞེན་པའི་ལྷ་འདྲེ་རྣམས༔ དེ་རིང་རང་རིག་ཡེ་ཤེས་ངོ་འཕྲོད་དེ༔ རྫོགས་པའི་སངས་རྒྱས་གོ་འཕང་ཐོབ་པར་ཤོག༔ འདུ་ཤེས་འདི་དང་ཀུན་ཏུ་ལྡན་པ་གཅེས༔ རིག་པ་ངར་ཆུང་ལྷ་འདྲེ་གཡོ་ཆེ་ནས༔ ལྷོངས་དང་ཆོ་འཕྲུལ་ཅི་ཡང་མ་གསལ་ན༔ ཉམས་དང་རྟོག་པའི་ཡེ་ཤེས་བོག་མི་ཐོན༔ ཡུག་སའི་སྐྲ་དང་གཡག་རྒོད་སྙིང་རྩིད་ལ༔ བསྒྲིལ་བའི་གཅོད་ཐག་འདོམ་པ་དགུ་བཟོས་ཏེ༔ གྲི་ལྕགས་ཨ་ལུང་ཕུར་པས་སྣ་གཉིས་བརྒྱན༔ ལྷ་འདྲེ་གནས་པའི་ས་རྡོ་ནགས་ཚལ་སོགས༔ གང་འོང་འཆིང་སྟེ་ལྷ་འདྲེ་བཅིངས་བར་བསམས༔ ཕུར་པ་མལ་གྱི་འོག་ཏུ་བརྡེབ་པར་བྱ༔ ཀྱེ་མ༔ ལས་ངན་འགྲོ་བ་ལྷ་འདྲེ་ཆེ་གེ་མོ༔ བདག་གིས་བྱང་ཆུབ་མཆོག་ཏུ་སེམས་བསྐྱེད་དེ༔ ཤ་ཁྲག་ཕུང་པོ་འདི་ཉིད་ཁྱོད་ལ་སྦྱིན༔ ངན་རྟོག་དབང་གིས་འཁོར་བར་འཁྱམས་པ་ཁྱོད༔ ཆོས་ལ་སྤྱོད་པའི་སྡོམ་པ་འབོགས་ནས་ཀྱང་༔ རང་གཞན་སྒྲིབ་སྦྱོང་སངས་རྒྱས་བསྒྲུབ་བསམ་ཡང་༔ ཁྱོད་ཀྱིས་བྱིན་པའི་ཟས་ལ་མི་བཟའ་ཞིང་༔ མངགས་པའི་ཆོས་ཀྱི་སྡོམ་ལ་མི་འཇུག་ན༔ ནམ་ཡང་འཆོར་བ་མེད་པའི་གཅོད་ཐག་གིས༔ ཁྱོད་ཀྱི་ལུས་སྡོམས་གཅོད་ཕུར་སྙིང་ལ་གཟིར༔ མི་ལྤགས་གཡབ་ཀྱིས་འདོར་ནས་རྡུལ་དུ་བརླག༔ རྣམ་པར་ཤེས་པ་མཁའ་སྤྱོད་གནས་སུ་སྤར༔ ང་ནི་ཆོས་དབྱིངས་ཡེ་ཤེས་མཁའ་འགྲོ་མ༔ འཁོར་འདས་ཐམས་ཅད་ང་ཡི་བྲན་དང་འཁོར༔ འགྲོ་དྲུག་ཐམས་ཅད་ང་ཡི་རྩལ་ལས་ཤར༔ བསད་པ་ཐམས་ཅད་བསྒྲལ་བ་བླ་ན་མེད༔ འདྲེན་པ་ཐམས་ཅད་སྦྱོར་བ་བླ་ན་མེད༔ ཁྱོད་ལ་སྦྱོར་སྒྲོལ་འཕྲིན་ལས་བརྩམ་པར་བྱ༔ ཅེས་བརྗོད་དམིགས་པའི་འདུ་འཕྲོའང་དེ་བཞིན་གཟིར༔ དེས་ནི་མ་སློང་པ་རྣམས་ལྷོངས་པར་འགྱུར༔ དེ་ནས་ཚར་ཚད་རྫོགས་ནས་དགེ་བ་བསྔོ༔ བསྡད་རྗེས་ཐབ་སོགས་ཤུལ་ནི་མི་མངོན་བྱ༔ འགྲོ་ཁ་ཟན་ལ་མི་ཡི་གཟུགས་བཟོས་སྟེ༔ དུར་ཁྲོད་བམ་གྱི་ཚོགས་མཐར་མགྲོན་རྣམས་གཤེགས༔ གོམ་དགུའི་མཚམས་ན་ཐོ་རེ་དགུ་རྫོགས་བྱ༔ ཚིག་ཏུ་བོས་ལ་ལྷ་འདྲེ་ཆེ་གེ་ཁྱོད༔ ཁྱོད་རང་ཡུལ་འདིར་སྡོད་ལ་དམ་ཚིག་སྲུངས༔ དགེ་བའི་ལས་སྤྱོད་འགྲོ་ལ་གནོད་པ་སྤོངས༔ ང་ཡི་ཕྱི་རུ་ཁྱོད་ཅག་འབྲེང་ས་མེད༔ ང་ནི་ཡེ་ཤེས་དབྱིངས་ཀྱི་མཁའ་འགྲོ་མ༔ སེར་མོ་དོན་གྲུབ་ཆོས་ཀྱི་དབྱིངས་ལས་ཤར༔ མཁའ་སྤྱོད་གནས་མཆོག་མཁའ་འགྲོའི་ཞིང་དུ་འགྲོ༔ ལིང་ལིང་ལྡིང་ཞིང་ལྷབས་ལྷབ་འཕུར་ནས་འགྲོ༔ བཀའ་ལས་འདས་ན་ཁྱོད་ཀྱི་དམ་ཚིག་ཉམས༔ གོ་བར་གྱིས་ཤིག་ཡུལ་འདིའི་གཞི་བདག་ཚོ༔ ཞེས་སྨྲ་འཁྱུག་ཅིང་འཁྲབ་ཅིང་འདུར་ཞིང་འོང་༔ དེ་ནས་གཉན་ས་གང་དུ་དམིགས་ལ་སྤྱོད༔ གཉན་ས་བརྒྱ་རྩ་རྫོགས་ནས་ཆོས་ཉིད་ཟད༔ བློ་ཟད་ཆོས་ཟད་རང་བྱུང་རྫོགས་སངས་རྒྱས༔ ཟབ་མོ་གཅོད་ཀྱི་འབྲས་བུ་མངོན་དུ་འགྱུར༔ དེ་ལྟར་མ་གྱུར་བར་དུ་ཉམས་སུ་བླངས༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་ཟབ་དོན་སྙིང་པོའི་མན་ངག་འདི༔ རྒྱ་གར་མཁས་པ་བདག་འདྲ་པདྨ་འབྱུང་༔ ཆོས་སྐུ་ཀུན་ཏུ་བཟང་མོས་བྱིན་གྱིས་བརླབས༔ ལོངས་སྐུ་རྡོ་རྗེ་ཕག་མོས་དབང་བཞི་བསྐུར༔ སྤྲུལ་སྐུ་ཁྲོས་མ་ནག་མོ་གྲིབ་ལྟར་འགྲོགས༔ རིགས་བཞིའི་མཁའ་འགྲོས་རྒྱུན་དུ་ཉེ་གནས་མཛད༔ འབུམ་ཕྲག་མཁའ་འགྲོ་བྲན་དང་ཕོ་ཉར་འགྱེད༔ ཁྱད་པར་སྐུ་ལ་རྫོང་གི་དུར་ཁྲོད་དུ༔ སེར་མོ་དོན་གྲུབ་ཡེ་ཤེས་མཁའ་ལ་ཤར༔ ཟབ་མོའི་གདམས་པ་གཅོད་ཀྱི་མན་ངག་གནང་༔ ཉམས་སུ་ལོངས་ཤིག་སྐལ་ལྡན་ཕོ་མོ་རྣམས༔ རང་རིག་བློ་སྣང་ཆོས་ཟད་རྫོགས་སངས་རྒྱས༔ མ་འོངས་འགྲོ་བ་ཕྱི་མའི་དོན་ཕྱིར་དུ༔ གདམས་པའི་མཐར་ཐུག་བརྡ་ཡི་ཡིག་གེར་བཏབ༔ ཉམས་སུ་ལོངས་ཤིག་སྐལ་ལྡན་ཕོ་མོ་རྣམས༔ འབྲས་བུ་ཚེ་འདི་ཉིད་ལ་འཐོབ་པར་འགྱུར༔ བཀའ་ཡི་སྲུང་མས་མེལ་ཚེ་གྱིས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པ་རྩལ་གྱིས་ཆགས་རུ་ཕུག་སེར་ནས་གདན་དྲན་དྲངས་ཤིང་ཤོག་སེར་ལས་བསྒྱུར་བ་མངྒ་ལཾ།། །།