བདེ་སྟོང་ངོ་སྤྲོད་སྦས་བཤད་ཆོས་ཉིད་འཁོར་ལོ།
ཕག་མོ་དམར་མོའི་ཟབ་ཐིག་ལས༔ བདེ་སྟོང་ངོ་སྤྲོད་སྦས་བཤད་ཆོས་ཉིད་འཁོར་ལོ་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ ཟབ་མོ་གདམས་པའི་ཡང་སྙིང་དམ་པའི་དོན༔ ཉེ་ལམ་སྨར་འཁྲིད་ངོ་སྤྲོད་ཞལ་གདམས་ནི༔ ཉེ་བའི་ཟབ་ལམ་ཐེག་པའི་རྩེ་རྒྱལ་ཏེ༔ ངོ་སྤྲོད་འདི་བཞིན་ཉམས་ལེན་ལྡན་པར་བྱ༔ ས་མ་ཡཱ༔ རྒྱ་རྒྱ་རྒྱ༔ དང་པོ་ཕྱག་རྒྱ་དང་སྙོམས་པར་ཞུགས་ནས་དལ་བུས་སྤྱོད་པའི་ཚེ༔ དངས་མ་སྤྱི་བོ་ནས་གཡོ་ཞིང་མགྲིན་པར་འཁྱིལ་བས་ཕྱི་རོལ་གྱི་རྣམ་རྟོག་རགས་རིམ་རྣམས་འགག །དགའ་བའི་ཡེ་ཤེས་རྒྱུད་ལ་སྐྱེ་ཐེག་པ་ནི་ཉན་ཐོས་དང་རང་སངས་རྒྱས་ཀྱི་གྲུབ་མཐའ་མཐར་ཕྱིན༔ སྙིང་གར་སླེབས་པས་བདེ་བ་ཆེས་ཆེར་འབར་བདག་ཏུ་འཛིན་པའི་རྣམ་རྟོག་འགག་མཆོག་ཏུ་དགའ་བའི་ཡེ་ཤེས་རྒྱུད་ལ་སྐྱེ་ཐེག་པ་ནི་བྱང་ཆུབ་སེམས་དཔའི་གྲུབ་མཐའ་རྫོགས༔ ལྟེ་བར་སླེབས་པས་ལུས་ཀུན་བདེ་བས་རྒྱས་ཤིང་དགའ་བྲལ་གྱི་ཡེ་ཤེས་རྒྱུད་ལ་སྐྱེ་ཕྱག་རྒྱར་འཛིན་པའི་རྟོག་པ་སྤངས་ཐེག་པ་ནི་སྔགས་ཀྱི་གྲུབ་མཐའ་རྫོགས༔ གསང་བར་སླེབས་པས་བདེ་བ་རྟོག་མེད་ཀྱི་ངང་ནས་ལྷན་ཅིག་སྐྱེས་པའི་དགའ་བ་རྒྱུད་ལ་སྐྱེ་དགའ་བ་གསུམ་དུ་འཛིན་པའི་རྟོག་པ་སྤངས་བླ་ན་མེད་པའི་གྲུབ་མཐའ་རྫོགས༔ ཡབ་ཡུམ་ལྷ་རུ་བསྐྱེད་པ་ཚོགས་ལམ་སྦྱོར་བ་སྦྱོར་ལམ་དགའ་བཞིའི་ཡེ་ཤེས་མཐོང་བས་མཐོང་ལམ༔ དེ་ཉིད་ལྟར་བསྒོམས་པས་སྒོམ་ལམ༔ བདེ་སྟོང་མངོན་དུ་གྱུར་ཚེ་མཐར་ཕྱིན་པའི་ལམ་སྟེ་ལམ་ལྔ་རྫོགས༔ ཡབ་ཡུམ་ལྷར་བསྐྱེད་བདེ་བས་མཆོད་ཚེ་ཚོགས་གཉིས་རྫོགས་པས་སྦྱིན་པ༔ དགའ་བའི་ཡེ་ཤེས་དང་སྦྱོར་བ་ཟུང་འཇུག་ལ་སྤྱོད་ཚེ་ལེ་ལོ་མེད་པས་བརྩོན་འགྲུས༔ བདེ་སྟོང་གི་དགོངས་པའི་ཡེ་ཤེས་ཁོར་ཡུག་ཏུ་འབྱུང་བ་བསམ་གཏན༔ ཐིག་ལེ་མ་ཉམས་པར་གཉེན་པོས་བསྲུང་ཞིང་བཟློག་པ་ཚུལ་ཁྲིམས༔ སྣང་བའི་ཆོས་རྣམས་བདེ་བར་ཤར་བས་ཁོང་ཁྲོ་དང་བྲལ་བ་བཟོད་པ༔ བདེ་སྟོང་གི་ལྟ་བ་མཐར་ཕྱིན་པས་ཤེས་རབ་ཀྱི་ཕ་རོལ་ཏུ་ཕྱིན་པ་དང་དྲུག་གོ༔ ཡབ་ཡུམ་ལྷར་བསྐྱེད་པ་བུམ་པའི་དབང་དང་༔ མཁའ་གསང་སྦྱོར་པ་གསང་བའི་དབང་དང་༔ བདེ་སྟོང་གི་ཉམས་ཤེས་རབ་ཡེ་ཤེས༔ དགའ་བདེའི་ཕ་རོལ་དུ་སོན་པ་ངོ་བོ་ཉིད་ཀྱི་དོན་མཐོང་བ་དབང་བཞི་པའོ༔ ཕྱག་རྒྱ་མཐོང་བས་དགའ་བ་སྐྱེས་པ་ས་དང་པོ་རབ་ཏུ་དགའ་བ༔ ཡབ་ཡུམ་ལྷའི་བསྐྱེད་རིམ་གྱིས་ཐ་མལ་གྱི་སྒྲིབ་པ་མེད་པས་དྲི་མ་མེད་པ༔ སྦྱོར་བས་བྱང་སེམས་རྩ་ལས་འཕྲོ་བས་གསུམ་པ་འོད་བྱེད་པ་དང་༔ དེ་ལས་སྤྱོད་པས་བྱང་སེམས་དྲག་ཏུ་གཡོ་ཞིང་འཕྲོ་བས་འོད་བྱེད་པ་ཆེན་པོའི་ས་དང་༔ བྱང་སེམས་གསང་བ་ནས་ཟིན་ཅིང་ལྡོག་དཀའ་བས་སྦྱང་དཀའ་བའི་ས་དང་༔ བྱང་སེམས་བསྐྱིལ་ཞིང་བདེ་བ་མངོན་དུ་གྱུར་པས་ས་དྲུག་པ་མངོན་དུ་གྱུར་པ་དང་༔ བྱང་ཆུབ་སེམས་ཀྱི་ཁམས་རྩ་ལ་ལྡོག་ཅིང་བཀྲམས་པས་བདུན་པ་རིང་དུ་སོང་པའི་ས་དང་༔ བློ་འདས་ཀྱི་དོན་མ་བཅོས་པའི་དགོངས་པ་དེ་རང་བྱུང་དུ་ལྷན་ནེར་གནས་པ་བརྒྱད་པ་མི་གཡོ་བའི་ས་དང་༔ དེའི་རྟོགས་པ་ཡིད་སྨོན་དུ་མིན་པར་མངོན་དུ་གྱུར་པས་ལེགས་པའི་བློ་གྲོས་ཀྱི་ས་དང་༔ སྣང་བའི་ཆོས་ཐམས་ཅད་བདེ་སྟོང་ཡེ་ཤེས་ཀྱི་ཆོས་ལས་རང་ཤར་ཞིང་རང་གྲོལ་བས་བཅུ་པ་ཆོས་ཀྱི་སྤྲིན་གྱི་ས་ཐོབ་པའོ༔ བདེ་བ་ཆེན་པོ་འགྱུར་བ་མེད་པས་རྡོ་རྗེ་སེམས་དཔའ༔ ཡོན་ཏན་གྱི་རྟོག་པ་མང་པོ་འབྱུང་བས་རིན་ཆེན་འབྱུང་ལྡན༔ ཆགས་པས་ཆགས་པའི་འདུ་ཤེས་ཡེ་ཤེས་ཀྱིས་ཟིན་པས་སྣང་བ་མཐའ་ཡས༔ ཡེ་ཤེས་ཀྱི་འཕྲིན་ལས་ཉོན་མོངས་ལ་བརྟེན་ཏེ་ཐོགས་མེད་དུ་གྲུབ་པས་དོན་ཡོད་གྲུབ་པ༔ དོན་དམ་པ་ཆོས་ཉིད་ཀྱི་དགོངས་པ་བདེ་སྟོང་གི་ཡེ་ཤེས་དེ་སྐད་ཅིག་མའི་སྟེང་ནས་རྟོགས་པས་རྣམ་པར་སྣང་མཛད་དེ་རིགས་ལྔ་མངོན་པར་རྫོགས་སོ༔ པདྨ་དང་རྡོ་རྗེ་སྤྲད་པས་སངས་རྒྱས་སྤྱན་མ༔ གཡོ་བ་དམ་ཚིག་སྒྲོལ་མ༔ དྲོད་འབྱུང་བ་ནི་ན་བཟའ་དཀར་མོ༔ བྱང་ཆུབ་ཀྱི་རྒྱུན་འབྱུང་བ་ནི་མཱ་མ་ཀི༔ བདེ་བ་དང་སྟོང་པའི་ཡེ་ཤེས་དབྱེར་མེད་དུ་རྒྱས་པ་ནི་དབྱིངས་ཕྱུག་མ་སྟེ་ཡུམ་ལྔ་མངོན་དུ་གྱུར་པའོ༔ སྐུ་དང་ཡེ་ཤེས་བདེ་སྟོང་གི་ཡོན་ཏན་ཐམས་ཅད་མངོན་པར་སྒྲིབ་མེད་གསལ་བས་མེ་ལོང་ལྟ་བུའི་ཡེ་ཤེས༔ བདེ་སྟོང་དགའ་བ་བཞིའི་ཚོགས་རྣམས་མ་འདྲེས་པར་སོ་སོར་ཕྱེད་པ་སོ་སོར་རྟོགས་པའི་ཡེ་ཤེས༔ ཡབ་ཡུམ་སྦྱོར་བས་ཐབས་ཤེས་ཟུང་འཇུག་ཏུ་དཀར་དམར་འདྲེས་པས་ཉོན་མོངས་པའི་རྟོག་པ་ཡེ་ཤེས་དང་ལྡན་པའི་རང་བཞིན་དུ་གྱུར་པས་མཉམ་པ་ཉིད་ཀྱི་ཡེ་ཤེས༔ བདེ་བའི་ངོ་བོ་ལས་སྟོང་བའི་ཡེ་ཤེས་ཟུང་འཇུག་ཏུ་གྲུབ་པའི་ཕྱིར་བྱ་བ་གྲུབ་པའི་ཡེ་ཤེས༔ བདེ་སྟོང་ཞེས་ལམ་གྱི་སྟེགས་ལས་ངོ་བོ་ཉིད་ཀྱི་ཡེ་ཤེས་ལ་སུས་ཀྱང་བཅོས་སུ་མེད་པས་ཆོས་ཀྱི་དབྱིངས་ཀྱི་ཡེ་ཤེས་ཏེ་ཡེ་ཤེས་ལྔ་མངོན་དུ་གྱུར་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ཡི་ཕྱིར་ན་ཚེ་འདི་བློས་བཏང་ཞིང་༔ གསང་སྔགས་རྡོ་རྗེ་ཐེག་པའི་སྣོད་གྱུར་པའི༔ སྐལ་ལྡན་སྐྱེས་བུ་མྱུར་ལམ་སྒྲོད་འདོད་རྣམས༔ མཚན་དང་ལྡན་པའི་མུ་དྲ་བསྟེན་པར་བྱ༔ ཡ་ག་འཇིག་རྟེན་ཆོས་བརྒྱད་ཀྱིས་བཅིངས་ནས༔ སྐལ་ལྡན་སྐྱེས་བུས་ཉམས་ལེན་མ་འབྱོངས་ན༔ དལ་འབྱོར་སྣོད་དུ་གསང་སྔགས་རུལ་བ་ཡིན༔ ཚ་ེའདིའི་སྐྱིད་སྡུག་རྨི་ལམ་སྣང་བ་འདྲ༔ ཐབས་ཀྱི་གདམས་པས་མཐར་ཕྱིན་རྩོལ་བ་བྱ༔ ཉིན་མཚན་མེད་པར་ཆུ་བོའི་གཞུང་བཞིན་སྦྱོར༔ དེ་ཚེ་ལོངས་སྤྱོད་རྫོགས་སྐུའི་ལྷ་ཚོགས་རྣམས༔ རྡོ་རྗེ་བཙུན་མོའི་བྷ་གའི་གཞལ་ཡས་ན༔ དགའ་བཞིའི་བརྡ་སྐད་བསྒོམ་བཟླས་མཆོད་བསྟོད་ཀྱིས༔ ཕྱོགས་བཅུའི་རྒྱལ་བ་རིག་འཛིན་ཕོ་མོ་དང་༔ དཔའ་བོ་མཁའ་འགྲོ་ཐམས་ཅད་སྙོམས་པར་འཇུག༔ ཉོན་མོངས་ལས་རླུང་ཛྙཱ་ན་དྷུ་ཏིར་རྒྱས༔ ཐམས་ཅད་བདེ་བའི་གོ་འཕང་རྡོ་རྗེ་འཆང་༔ འབྲིང་གིས་ཉིན་མཚན་ཐུན་དྲུག་བཅད་ལ་སྦྱོར༔ ཐ་ནའང་ནི་ཉིན་མཚན་དུས་བཞིར་སྤྱད༔ འདི་ནི་མཐར་ཕྱིན་རྡོ་རྗེ་གསང་བའི་སྐུ༔ མི་དྲ་མི་འབྲལ་གྲིབ་བཞིན་བསྟེན་ཅིང་བཀོལ༔ བལྟའ་དང་འཁྱུད་དང་འོ་སེན་ཆགས་གཏམ་སྨྲ༔ དེ་ལྟར་ཉམས་སུ་བླངས་པའི་ཡོན་ཏན་ནི༔ ཉམས་གྲིབ་ཀུན་བྱང་ཡིད་འོང་བུད་མེད་འདུ༔ མཚན་ལྡན་མཁའ་འགྲོ་རྣམས་ཀྱིས་སྲོག་ལྟར་བརྩེ༔ ངག་སྙན་ཏིང་འཛིན་གསལ་ཞིང་ཤེས་རབ་འབར༔ མི་རྟོག་ཉམས་མྱོང་འཆར་ཞིང་ཡེ་ཤེས་རྒྱས༔ བདེ་བ་རྒྱས་པས་ལྷ་ཀླུ་མི་གསུམ་གྱི༔ རིགས་ལྡན་བུ་མོ་ཐམས་ཅད་དབང་དུ་འགྱུར༔ འབྱུང་བ་སྙོམས་པས་ནད་མེད་རྒས་སྲ་ཞིང་༔ ངག་ལ་ནུས་པ་སེམས་ལ་རྟོགས་པ་འཆར༔ ཀུན་རྫོབ་ཐིག་ལེ་འབྱོངས་པའི་ཏིང་འཛིན་གྱིས༔ ཉིན་མོ་མི་འདུ་མཚན་མོ་བུད་མེད་འདུ༔ ནང་ནུབ་ཟས་འདུ་བདེ་བ་མེ་ལྟར་འབར༔ ཚོགས་དྲུག་ཡུལ་སྣང་བདེ་བ་ཆེན་པོར་འཆར༔ འདོད་ཆགས་མ་སྤང་ལམ་དུ་ཁྱེར་བ་ཡིས༔ གནས་ལུགས་མངོན་གྱུར་ཆོས་སྐུར་འཚང་རྒྱ་ཞིང་༔ འགག་མེད་ལོངས་སྐུས་ས་བཅུའི་ཞིང་ཀུན་ཁྱབ༔ མ་འགགས་སྤྲུལ་སྐུས་འགྲོ་དྲུག་ཁ་ལོ་བསྒྱུར༔ ཡེ་ཤེས་མཁའ་འགྲོའི་ལུང་བསྟན་རྒྱུན་དུ་འབྱུང་༔ འཇིག་རྟེན་མི་མོས་ཞབས་ཏོག་མཉེས་པར་བསྒྲུབ༔ ལྷ་འདྲེ་མི་གསུམ་འདུ་ཞིང་ཁ་ལོར་བསྒྱུར༔ གཟའ་གཏད་མེད་པའི་སྤྱོད་པ་ཤུགས་འབྱུང་སྐྱེ༔ རྡོ་རྗེ་ལུས་ཀྱི་རྩ་ནི་འབྱོངས་པའི་ཚེ༔ ཤིང་བལ་བཞིན་དུ་ཡང་དང་ངལ་དུབ་མེད༔ ཁབ་ཟོས་མགྲིན་པའི་ལམ་ནས་རྡོ་རྗེར་འཐོན༔ ཟོ་མདོག་བཟང་ཞིང་ཤིན་ཏུ་དངས་མཉེན་འཇམ༔ འགྱུ་བ་རླུང་ནི་འབྱོངས་རྟགས་མང་དུ་འབྱུང་༔ རི་བྲག་རྣམས་ལ་ཟང་ཐལ་འགྲོ་བ་དང་༔ བར་སྣང་རྡོ་རྗེའི་སྐྱིལ་ཀྲུང་བཅའ་བ་དང་༔ སོར་མོའི་རྩེ་ནས་རླུང་འབུད་ཆུར་མི་འབྱིང་༔ སྟེང་རླུང་འོག་ལ་འོག་རླུང་སྟེང་དུ་འདྲེན༔ འཇག་མའི་རྩེ་དང་མདུང་རྩེར་སྐྱིལ་ཀྲུང་བཅའ༔ དེ་སོགས་ཡོན་ཏན་ཐོབ་པའི་རྟགས་རྣམས་འབྱུང་༔ གསུམ་པ་ཀུན་ད་འབྱོངས་པའི་རྟགས་རྣམས་ནི༔ ཆུ་དང་འོ་མ་སོ་སོར་འབྱེད་པ་དང་༔ རྡོ་རྗེ་སྦ་བ་སྦུབས་སུ་ནུབ་པ་དང་༔ བདེ་དྲོད་འབར་དང་རྡེའུ་ཟོས་ཀྱང་འཇུ༔ ལུས་བཀྲག་རྒྱས་དང་པགས་པའི་མདོག་ནི་སྣུམ༔ གངས་ཁྲོད་རི་རྩེར་བསྡད་ཀྱང་མཚན་ལྡན་འདུ༔ ཕྱག་རྒྱའི་དངས་མ་དབང་དུ་འདུ་བར་འགྱུར༔ བདེ་སྟོང་བསྒོམས་པའི་བསྐྱེད་རིམ་འབྱོངས་པའི་རྟགས༔ ཡི་དམ་ཞལ་གཟིགས་གཟུགས་སྣང་ལྷ་རུ་འཆར༔ ལྷ་འདྲེ་མི་གསུམ་དབང་འདུ་བཀའ་ལ་ཉན༔ གདོན་བགེགས་ཚར་ཆོད་འབྱུང་པོ་བྲན་དུ་ཁོལ༔ དེ་སོགས་བསྐྱེད་རིམ་ཟིན་རྟགས་མང་དུ་འབྱུང་༔ བདེ་སྟོང་འབྱོང་ནས་སེམས་ཉིད་གྲོལ་བའི་རྟགས༔ འགྲོ་དྲུག་སེམས་ཅན་བྱ་བྱེད་ཐམས་ཅད་རྣམས༔ སྒྱུ་མ་རྨི་ལམ་ཆུ་ཟླ་ལྟ་་བུར་རྟོགས༔ བདེ་གསལ་མི་རྟོག་ཉམས་མྱོང་རྒྱུད་ལ་སྐྱེ༔ རིག་པས་བཙན་ས་ཟིན་ནས་གདོད་མར་གྲོལ༔ བྱང་ཆུབ་མཆོག་གི་གོ་འཕང་ཕྱིར་མི་ལྡོག༔ བདག་གཞན་དོན་གཉིས་ལྷུན་གྱིས་གྲུབ་པ་འབྱུང་༔ གོམས་པ་རབ་རྣམས་དགའ་རབ་རྡོ་རྗེ་ལྟར༔ འོད་ཀྱི་ལུས་ལ་མཁའ་སྤྱོད་གཤེགས་པ་དང་༔ འབྲིང་རྣམས་རིགས་འཛིན་ཤྲཱི་སེང་ཧ་བཞིན༔ སྒྱུ་ལུས་འབྱོངས་པས་སྣང་སྟོང་སྐུ་རུ་འགྱུར༔ ཐ་མ་འཆི་མེད་པདྨ་ང་འདྲ་བར༔ ཚེ་ཡི་རིགས་འཛིན་འཐོབ་པར་འགྱུར་པ་དང་༔ ཡར་མཐའ་ལུས་ནི་ལྷུང་གཟེད་ཤོང་བ་དང་༔ འཇའ་འཛུགས་འོད་འཁྱུག་ས་གཡོ་འབྱུང་བ་དང་༔ ཞིང་ཁམས་ལྔ་རུ་བགྲོད་པའི་ཡོན་ཏན་འཐོབ༔ ཤ་ཡི་དངས་མ་ཤ་རི་རམ་དུ་འགྲིལ༔ ཁ་དོག་དམར་པོ་སྐྱེ་མེད་ཐོབ་པའི་གདུང་༔ ཁྲག་གི་དངས་མ་ཆུ་རི་རམ་དུ་འགྲིལ༔ ཁ་དོག་སྔོན་པོ་ཡོན་ཏན་འཕེལ་བའི་གདུང་༔ རུས་པའི་དངས་མ་བ་རི་རམ་དུ་འགྲིལ༔ ཁ་དོག་དཀར་པོ་ཆོས་སྐུ་ཐོབ་པའི་གདུང་༔ ཆ་སེར་དངས་མ་གསེར་རི་རམ་དུ་འགྲིལ༔ ཁ་དོག་སེར་པོ་དགོས་འདོད་འབྱུང་བའི་གདུང་༔ རྐང་གི་དངས་མ་ཉ་རི་རམ་དུ་འགྲིིལ༔ ཁ་དོག་ལྗང་གུ་འཕྲིན་ལས་གྲུབ་པའི་གདུང་༔ དངས་མ་ལྔ་འདུས་པཉྩ་རམ་དུ་འགྲིལ༔ ཁ་དོག་ལྔ་ལྡན་སྐུ་ལྔ་ཐོབ་པའི་གདུང་༔ དེ་རྣམས་ཆོས་སྐུ་ལོངས་སྐུ་ཐོབ་པའི་རྟགས༔ རྐྱེན་གྱིས་མི་འཇིགས་པ་ནི་ཁྱད་པར་རོ༔ དངས་མའི་སྙིགས་མ་རིང་བསྲེལ་ཕྲ་མོ་ནི༔ རྐྱེན་གྱིས་འཇིགས་ཀྱང་སྤྲུལ་སྐུ་ཐོབ་པའི་རྟགས༔ དེ་ཡི་སྙིགས་མ་ཐོད་རྒལ་རུས་ཚིགས་སོགས༔ རུས་དུམ་ཀུན་ལ་སྐུ་དང་ཡིག་འབྲུ་དང་༔ རིགས་ལྔའི་ཕྱག་མཚན་ལ་སོགས་འབྱུང་བ་ནི༔ འཁོར་ལོ་ལྔ་ཡི་གདམས་པས་གྲོལ་བའི་རྟགས༔ འབྱུང་བཞི་དངས་དང་ནམ་མཁའ་གཡའ་དག་པ༔ བར་དོ་མེད་ཅིང་བརྟན་པ་ཐོབ་པའི་རྟགས༔ དེ་ལྟར་རྟགས་དང་ཡོན་ཏན་མང་ཡོད་ཀྱང་༔ མདོར་བསྡུས་ཙམ་དུ་བརྗོད་པ་དེ་རྣམས་ཀྱང་༔ མ་རྒྱུད་ཐབས་ལམ་བསྒོམ་པ་མཐར་ཕྱིན་པའི༔ ཕྱི་ནང་དྲོད་རྟགས་རིམ་པར་བསྟན་པའོ༔ གཞན་ཡང་སྤྱི་བོར་གཙུག་ཏོར་རྒྱས་པ་དང་༔ པགས་པ་གསེར་མདོག་ཕྱག་ཞབས་དྲ་བས་འབྲེལ༔ ལྗགས་ཀྱིས་ཞལ་ཁེབས་སྨིན་ཕྲག་མཛོད་སྤུ་ལྡན༔ བ་སྤུ་གཡས་འཁྱིལ་མཐིལ་བཞིར་འཁོར་ལོས་མཚན༔ རོ་སྟོད་སེང་གེ་བཞིན་དུ་རྒྱས་པ་དང་༔ ཐུགས་ཀར་དཔལ་གྱི་བེའུས་མཚན་པ་དང་༔ འདོམས་ཀྱི་སྦ་བ་སྦུབས་སུ་ནུབ་པ་དང་༔ ཚེམས་ཀྱི་ཕྲེང་བ་ཆུ་ཤེལ་སེན་མོ་དམར༔ དངས་མ་ལུས་ཀྱི་གནས་རྣམས་གར་དྲངས་སར༔ མཚན་བཟང་ཡོན་ཏན་ལྡན་པ་དེ་དག་འབྱུང་༔ དཔེར་ན་རིགས་འཛིན་དགའ་རབ་རྡོ་རྗེ་དང་༔ གནས་བརྟན་སྒྲ་གཅན་འཕགས་པ་ཀླུ་སྒྲུབ་སྙིང་༔ བདག་འདྲ་པདྨ་འབྱུང་གནས་ལ་སོགས་རྣམས༔ མཚན་བཟང་ལྡན་པའི་ཡོན་ཏན་འདི་ལས་ཐོབ༔ ཕྱི་མའི་སྐལ་ལྡན་རྣམས་ཀྱང་བརྩོན་པས་བསྒྲུབས༔ ཚེ་འདི་བློས་ཐོང་བཙོན་འགྲུས་རབ་བསྐྱེད་འབུངས༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་གདམས་པའི་སྙིང་པོ་བདེ་སྟོང་ལ༔ ཉམས་སུ་ལེན་པའི་ཐབས་ལམ་ངོ་སྤྲོད་འདི༔ མ་འོངས་ཕྱི་མའི་དུས་ཀྱི་སྐལ་ལྡན་དོན༔ བརྡ་ཡི་ཡི་གེའི་རིས་བཏབ་གཏེར་དུ་བཅོལ༔ ལས་འཕྲོ་ལྡན་པའི་བུ་དང་འཕྲད་ནས་ཀྱང་༔ རྡོ་རྗེ་ཐེག་པའི་འབྲས་བུ་དར་ཞིང་རྒྱས༔ བསྟན་པའི་རིང་ལུགས་ནམ་ཡང་འཕོ་མེད་ཤོག༔ རྟོག་གེ་མཁན་དང་དད་པ་སྣུམ་དྲེད་ཅན༔ ཐོས་པ་ཆུང་དང་གསང་བ་བློར་མི་ཤོང་༔ མ་དག་འགྲོ་ལ་གསང་ཤིག་ཨ་ཐཾ་རྒྱ༔ དབེན་པ་བསྟེན་ཞིང་ཚེ་འདིའི་འདུ་བྱེད་བོར༔ སྒྲུབ་པ་དང་ལེན་བརྩོན་འགྲུས་ཞེ་བཅད་ལྡན༔ དམ་ཚིག་ལྡན་པའི་བུ་ལ་སྤེལ་ཞིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པས་ཆགས་རུ་ཕུག་དམར་ནས་གདན་དྲངས་ཤིང་ཤོག་སེར་ལས་བསྒྱུར་བ་མངྒ་ལཾ། །